52. சேதோபரியஞாணனித்³தே³ஸவண்ணனா

104. சேதோபரியஞாணனித்³தே³ஸே ஸோ ஏவம் பஜானாதீதி இதா³னி வத்தப்³ப³ம் விதா⁴னம் உபதி³ஸதி. இத³ம் ரூபம் ஸோமனஸ்ஸிந்த்³ரியஸமுட்டி²தந்திஆதி³ ஆதி³கம்மிகேன ஜா²யினா படிபஜ்ஜிதப்³ப³ம் விதா⁴னம். கத²ம்? ஏதஞ்ஹி ஞாணம் உப்பாதே³துகாமேன ஜா²யினா பட²மம் தாவ தி³ப்³ப³சக்கு²ஞாணம் உப்பாதே³தப்³ப³ம். ஏதஞ்ஹி தி³ப்³ப³சக்கு²வஸேன இஜ்ஜ²தி, தம் ஏதஸ்ஸ பரிகம்மம். தஸ்மா தேன பி⁴க்கு²னா ஆலோகம் வட்³டே⁴த்வா தி³ப்³பே³ன சக்கு²னா பரஸ்ஸ ஹத³யரூபம் நிஸ்ஸாய வத்தமானஸ்ஸ லோஹிதஸ்ஸ வண்ணம் பஸ்ஸித்வா பஸ்ஸித்வா சித்தம் பரியேஸிதப்³ப³ம். தஞ்ஹி லோஹிதம் குஸலஸோமனஸ்ஸே வத்தமானே ரத்தம் ஹோதி நிக்³ரோத⁴பக்கவண்ணம், அகுஸலஸோமனஸ்ஸே வத்தமானே ததே³வ லுளிதம் ஹோதி, தோ³மனஸ்ஸே வத்தமானே காளகம் ஹோதி ஜம்பு³பக்கவண்ணம் லுளிதம். குஸலூபேக்கா²ய வத்தமானாய பஸன்னம் ஹோதி திலதேலவண்ணம். அகுஸலூபேக்கா²ய வத்தமானாய ததே³வ லுளிதம் ஹோதி. தஸ்மா தேன ‘‘இத³ம் ரூபம் ஸோமனஸ்ஸிந்த்³ரியஸமுட்டி²தம், இத³ம் ரூபம் தோ³மனஸ்ஸிந்த்³ரியஸமுட்டி²தம், இத³ம் ரூபம் உபேக்கி²ந்த்³ரியஸமுட்டி²த’’ந்தி பரஸ்ஸ ஹத³யலோஹிதவண்ணம் பஸ்ஸித்வா பஸ்ஸித்வா சித்தம் பரியேஸந்தேன சேதோபரியஞாணம் தா²மக³தம் காதப்³ப³ம். ஏவம் தா²மக³தே ஹி தஸ்மிம் அனுக்கமேன ஸப்³ப³ம்பி காமாவசராதி³பே⁴த³ம் சித்தம் பஜானாதி சித்தா சித்தமேவ ஸங்கமந்தோ வினா ஹத³யரூபத³ஸ்ஸனேன. வுத்தம்பி சேதம் அட்ட²கதா²யம் –

‘‘ஆருப்பே பரஸ்ஸ சித்தம் ஜானிதுகாமோ கஸ்ஸ ஹத³யரூபம் பஸ்ஸதி, கஸ்ஸிந்த்³ரியவிகாரம் ஓலோகேதீதி? ந கஸ்ஸசி. இத்³தி⁴மதோ விஸயோ ஏஸ, யதி³த³ம் யத்த² கத்த²சி சித்தம் ஆவஜ்ஜந்தோ ஸோளஸப்பபே⁴த³ம் சித்தம் ஜானாதி. அகதாபி⁴னிவேஸஸ்ஸ பன வஸேன அயம் கதா²’’தி (விஸுத்³தி⁴. 2.401).

பரஸத்தானந்தி அத்தானம் ட²பேத்வா ஸேஸஸத்தானம். பரபுக்³க³லானந்தி இத³ம்பி இமினா ஏகத்த²மேவ, வேனேய்யவஸேன பன தே³ஸனாவிலாஸேன ச ப்³யஞ்ஜனேன நானத்தம் கதம். சேதஸா சேதோ பரிச்ச பஜானாதீதி அத்தனோ சித்தேன தேஸம் சித்தம் பரிச்சி²ந்தி³த்வா ஸராகா³தி³வஸேன நானப்பகாரதோ ஜானாதி. ஸராக³ம் வாதிஆதீ³ஸு வா-ஸத்³தோ³ ஸமுச்சயத்தோ². தத்த² அட்ட²வித⁴ம் லோப⁴ஸஹக³தசித்தம் ஸராக³ம் சித்தம் நாம, அவஸேஸம் சதுபூ⁴மககுஸலாப்³யாகதசித்தம் வீதராக³ம் நாம. த்³வே தோ³மனஸ்ஸசித்தானி, த்³வே விசிகிச்சா²உத்³த⁴ச்சசித்தானீதி இமானி பன சத்தாரி சித்தானி இமஸ்மிம் து³கே ஸங்க³ஹம் ந க³ச்ச²ந்தி. கேசி பன தே²ரா தானிபி வீதராக³பதே³ன ஸங்க³ண்ஹந்தி. து³வித⁴ம் பன தோ³மனஸ்ஸஸஹக³தம் சித்தம் ஸதோ³ஸம் சித்தம் நாம, ஸப்³ப³ம்பி சதுபூ⁴மகம் குஸலாப்³யாகதம் வீததோ³ஸம் நாம. ஸேஸானி த³ஸ அகுஸலசித்தானி இமஸ்மிம் து³கே ஸங்க³ஹம் ந க³ச்ச²ந்தி. கேசி பன தே²ரா தானிபி வீததோ³ஸபதே³ன ஸங்க³ண்ஹந்தி. ஸமோஹம் வீதமோஹந்தி ஏத்த² பன மோஹேகஹேதுகவஸேன விசிகிச்சா²உத்³த⁴ச்சஸஹக³தத்³வயமேவ ஸமோஹம். மோஹஸ்ஸ பன ஸப்³பா³குஸலேஸு ஸம்ப⁴வதோ த்³வாத³ஸவித⁴ம்பி அகுஸலம் சித்தம் ‘‘ஸமோஹ’’ந்தி வேதி³தப்³ப³ம். அவஸேஸம் குஸலாப்³யாகதம் வீதமோஹம். தி²னமித்³தா⁴னுக³தம் பன ஸம்கி²த்தம், உத்³த⁴ச்சானுக³தம் விக்கி²த்தம். ரூபாவசராரூபாவசரம் மஹக்³க³தம், அவஸேஸம் அமஹக்³க³தம். ஸப்³ப³ம்பி தேபூ⁴மகம் ஸஉத்தரம், லோகுத்தரம் அனுத்தரம். உபசாரப்பத்தம் அப்பனாப்பத்தஞ்ச ஸமாஹிதம், தது³ப⁴யமஸம்பத்தம் அஸமாஹிதம். தத³ங்க³விக்க²ம்ப⁴னஸமுச்சே²த³படிப்பஸ்ஸத்³தி⁴னிஸ்ஸரணவிமுத்திப்பத்தம் விமுத்தம், பஞ்சவித⁴ம்பி ஏதம் விமுத்திமப்பத்தம் அவிமுத்தந்தி வேதி³தப்³ப³ம். இதி சேதோபரியஞாணலாபீ⁴ பி⁴க்கு² ஸோளஸப்பபே⁴த³ம்பி சித்தம் பஜானாதி. புது²ஜ்ஜனா பன அரியானம் மக்³க³ப²லசித்தம் ந ஜானந்தி, அரியாபி ச ஹேட்டி²மா ஹேட்டி²மா உபரிமானம் உபரிமானம் மக்³க³ப²லசித்தம் ந ஜானந்தி, உபரிமா உபரிமா பன ஹேட்டி²மானம் ஹேட்டி²மானம் சித்தம் ஜானந்தீதி.

சேதோபரியஞாணனித்³தே³ஸவண்ணனா நிட்டி²தா.