40. த³ஸ்ஸனவிஸுத்³தி⁴ஞாணனித்³தே³ஸவண்ணனா

91. த³ஸ்ஸனவிஸுத்³தி⁴ஞாணனித்³தே³ஸே ஸப்³பே³ த⁴ம்மா ஏகஸங்க³ஹிதாதி ஸப்³பே³ ஸங்க²தாஸங்க²தா த⁴ம்மா ஏகேன ஸங்க³ஹிதா பரிச்சி²ன்னா. தத²ட்டே²னாதி பூ⁴தட்டே²ன, அத்தனோ அத்தனோ ஸபா⁴வவஸேன விஜ்ஜமானத்தே²னாதி அத்தோ². அனத்தட்டே²னாதி காரகவேத³கஸங்கா²தேன அத்தனா ரஹிதட்டே²ன. ஸச்சட்டே²னாதி அவிஸம்வாத³கட்டே²ன, அத்தனோ ஸபா⁴வஞ்ஞத²த்தாபா⁴வேனாதி அத்தோ². படிவேத⁴ட்டே²னாதி ஸபா⁴வதோ ஞாணேன படிவிஜ்ஜி²தப்³ப³ட்டே²ன. இத⁴ லோகுத்தரஞாணேன அஸம்மோஹதோ ஆரம்மணதோ ச படிவேதோ⁴ வேதி³தப்³போ³. அபி⁴ஜானனட்டே²னாதி லோகிகேன ஞாணேன ஆரம்மணதோ, லோகுத்தரேன ஞாணேன அஸம்மோஹதோ ஆரம்மணதோ ச தேஸம் தேஸம் த⁴ம்மானம் ஸபா⁴வதோ அபி⁴ஜானிதப்³ப³ட்டே²ன. ‘‘ஸப்³ப³ம், பி⁴க்க²வே, அபி⁴ஞ்ஞேய்ய’’ந்தி (ஸம். நி. 4.46) ஹி வுத்தம். பரிஜானனட்டே²னாதி வுத்தனயேனேவ லோகியலோகுத்தரேஹி ஞாணேஹி ஸபா⁴வதோ அபி⁴ஞ்ஞாதானம் த⁴ம்மானம் அனிச்சாதி³தோ நிய்யானாதி³தோ ச பரிச்சி²ந்தி³த்வா ஜானிதப்³ப³ட்டே²ன. ‘‘ஸப்³ப³ம், பி⁴க்க²வே, பரிஞ்ஞேய்ய’’ந்தி ஹி வுத்தம். த⁴ம்மட்டே²னாதி ஸபா⁴வதா⁴ரணாதி³னா த⁴ம்மட்டே²ன. தா⁴துட்டே²னாதி நிஜ்ஜீவதாதி³னா தா⁴துட்டே²ன. ஞாதட்டே²னாதி லோகியலோகுத்தரேஹி ஞாணேஹி ஞாதும் ஸக்குணேய்யட்டே²ன. யதா² த³ட்டு²ம் ஸக்குணேய்யாதி³னா அத்தே²ன ‘‘தி³ட்ட²ம் ஸுதம் முதம் விஞ்ஞாதம் ரூப’’ந்தி வுத்தம், ஏவமிதா⁴பி ஞாதும் ஸக்குணேய்யட்டோ² ஞாதட்டோ²தி வேதி³தப்³போ³. ஸச்சி²கிரியட்டே²னாதி ஆரம்மணதோ பச்சக்க²காதப்³ப³ட்டே²ன. பு²ஸனட்டே²னாதி பச்சக்க²கதஸ்ஸ ஆரம்மணதோ புனப்புனம் பு²ஸிதப்³ப³ட்டே²ன. அபி⁴ஸமயட்டே²னாதி லோகிகேன ஞாணேன அபி⁴ஸமாக³ந்தப்³ப³ட்டே²ன. கிஞ்சாபி ஹி ‘‘தத²ட்டே² பஞ்ஞா ஸச்சவிவட்டே ஞாணம், அபி⁴ஞ்ஞாபஞ்ஞா ஞாதட்டே² ஞாணம், ஸச்சி²கிரியாபஞ்ஞா ப²ஸ்ஸனட்டே² ஞாண’’ந்தி ஏகேகமேவ ஞாணம் வுத்தம். அட்ட²கதா²யஞ்ச –

‘‘ஸமவாயே க²ணே காலே, ஸமூஹே ஹேதுதி³ட்டி²ஸு;

படிலாபே⁴ பஹானே ச, படிவேதே⁴ ச தி³ஸ்ஸதீ’’தி . –

கா³தா²வண்ணனாயம் அபி⁴ஸமயஸத்³த³ஸ்ஸ படிவேத⁴த்தோ² வுத்தோ, இத⁴ பன யதா²வுத்தேன அத்தே²ன தேஸம் நானத்தம் வேதி³தப்³ப³ம். அட்ட²கதா²யமேவ ஹி ஸோ லோகியஞாணவஸேன த⁴ம்மாபி⁴ஸமயோ வுத்தோதி.

காமச்ச²ந்தோ³ நானத்தந்தி விக்கே²பஸப்³பா⁴வதோ நானாரம்மணத்தா ச நானாஸபா⁴வோதி அத்தோ². ஏவம் ஸப்³ப³கிலேஸா வேதி³தப்³பா³. நேக்க²ம்மம் ஏகத்தந்தி சித்தேகக்³க³தாஸப்³பா⁴வதோ நானாரம்மணவிக்கே²பாபா⁴வதோ ச ஏகஸபா⁴வந்தி அத்தோ². ஏவம் ஸப்³ப³குஸலா வேதி³தப்³பா³. இத⁴ பேய்யாலேன ஸம்கி²த்தானம் ப்³யாபாதா³தீ³னம் அகுஸலானம் யதா²வுத்தேன அத்தே²ன நானத்தம் வேதி³தப்³ப³ம். விதக்கவிசாராதீ³னம் பன ஹேட்டி²மானம் ஹேட்டி²மானம் உபரிமதோ உபரிமதோ ஓளாரிகட்டே²ன நானத்தம் வேதி³தப்³ப³ம். யஸ்மா ஏகஸங்க³ஹிதனானத்தேகத்தானம் படிவேதோ⁴ மக்³க³க்க²ணே ஸச்சபடிவேதே⁴ன ஸிஜ்ஜ²தி, தஸ்மா ‘‘படிவேதோ⁴’’தி பத³ம் உத்³த⁴ரித்வா ஸச்சாபி⁴ஸமயம் த³ஸ்ஸேஸி.

பரிஞ்ஞா படிவேத⁴ம் படிவிஜ்ஜ²தீதி பரிஞ்ஞாபி⁴ஸமயேன அபி⁴ஸமேதி. ஏஸ நயோ ஸேஸேஸு. ஸச்சாபி⁴ஸமயகாலஸ்மிஞ்ஹி மக்³க³ஞாணஸ்ஸ ஏகக்க²ணே பரிஞ்ஞா, பஹானம், ஸச்சி²கிரியா, பா⁴வனாதி சத்தாரி கிச்சானி ஹோந்தி. யதா² நாவா அபுப்³ப³ம் அசரிமம் ஏகக்க²ணே சத்தாரி கிச்சானி கரோதி, ஓரிமம் தீரம் பஜஹதி, ஸோதம் சி²ந்த³தி, ப⁴ண்ட³ம் வஹதி, பாரிமம் தீரம் அப்பேதி, ஏவமேவ மக்³க³ஞாணம் அபுப்³ப³ம் அசரிமம் ஏகக்க²ணே சத்தாரி ஸச்சானி அபி⁴ஸமேதி, து³க்க²ம் பரிஞ்ஞாபி⁴ஸமயேன அபி⁴ஸமேதி, ஸமுத³யம் பஹானாபி⁴ஸமயேன அபி⁴ஸமேதி, மக்³க³ம் பா⁴வனாபி⁴ஸமயேன அபி⁴ஸமேதி, நிரோத⁴ம் ஸச்சி²கிரியாபி⁴ஸமயேன அபி⁴ஸமேதி. கிம் வுத்தம் ஹோதி? நிரோத⁴ம் ஆரம்மணம் கத்வா கிச்சவஸேன சத்தாரிபி ஸச்சானி பாபுணாதி பஸ்ஸதி படிவிஜ்ஜ²தீதி. யதா² ஓரிமம் தீரம் பஜஹதி, ஏவம் மக்³க³ஞாணம் து³க்க²ம் பரிஜானாதி. யதா² ஸோதம் சி²ந்த³தி, ஏவம் ஸமுத³யம் பஜஹதி. யதா² ப⁴ண்ட³ம் வஹதி, ஏவம் ஸஹஜாதாதி³பச்சயதாய மக்³க³ம் பா⁴வேதி. யதா² பாரிமம் தீரம் அப்பேதி, ஏவம் பாரிமதீரபூ⁴தம் நிரோத⁴ம் ஸச்சி²கரோதீதி ஏவம் உபமாஸம்ஸந்த³னம் வேதி³தப்³ப³ம்.

த³ஸ்ஸனம் விஸுஜ்ஜ²தீதி தம்தம்மக்³க³வஜ்ஜ²கிலேஸதமப்பஹானேன ஞாணத³ஸ்ஸனம் விஸுத்³தி⁴பா⁴வம் பாபுணாதி. த³ஸ்ஸனம் விஸுத்³த⁴ந்தி தஸ்ஸ தஸ்ஸ ப²லஸ்ஸ உப்பாத³க்க²ணே தஸ்ஸ தஸ்ஸ மக்³க³ஞாணஸ்ஸ கிச்சஸித்³தி⁴ப்பத்திதோ ஞாணத³ஸ்ஸனம் விஸுத்³தி⁴பா⁴வம் பத்தம் ஹோதி. ஸப்³ப³த⁴ம்மானம் ஏகஸங்க³ஹிதாய நானத்தேகத்தபடிவேத⁴பஞ்ஞாய மக்³க³ப²லஞாணேஹி ஸித்³தி⁴தோ அந்தே மக்³க³ப²லஞாணானி வுத்தானி.

த³ஸ்ஸனவிஸுத்³தி⁴ஞாணனித்³தே³ஸவண்ணனா நிட்டி²தா.