35. பரினிப்³பா³னஞாணனித்³தே³ஸவண்ணனா

86. பரினிப்³பா³னஞாணனித்³தே³ஸே இதா⁴தி இமஸ்மிம் ஸாஸனே. ஸம்பஜானோதி ஸாத்த²கஸம்பஜஞ்ஞம், ஸப்பாயஸம்பஜஞ்ஞம், கோ³சரஸம்பஜஞ்ஞம், அஸம்மோஹஸம்பஜஞ்ஞந்தி இமேஹி சதூஹி ஸம்பஜஞ்ஞேஹி ஸம்பஜானோ. பவத்தந்தி ஸப்³ப³த்த² யதா²னுரூபம் பரியுட்டா²னபவத்தஞ்ச அனுஸயப்பவத்தஞ்ச. பரியாதி³யதீதி உபசாரப்பனாவஸேன வுத்தேஸு விக்க²ம்ப⁴னவஸேன, விபஸ்ஸனாவஸேன வுத்தேஸு தத³ங்க³வஸேன, மக்³க³வஸேன வுத்தேஸு ஸமுச்சே²த³வஸேன கே²பேதி அப்பவத்தம் கரோதி. பேய்யாலமுகே²ன ஹி து³தியாதி³ஜா²னஸமாபத்திமஹாவிபஸ்ஸனாமக்³கா³ ஸம்கி²த்தா. யஸ்மா ஏதம் பச்சவேக்க²ந்தஸ்ஸ பவத்தம் ஞாணம் பரினிப்³பா³னே ஞாணம் நாம ஹோதி, தஸ்மா விக்க²ம்ப⁴னபரினிப்³பா³னம் தத³ங்க³பரினிப்³பா³னம் ஸமுச்சே²த³பரினிப்³பா³னந்திபி வுத்தமேவ ஹோதி. ஏதேஹி கிலேஸபரினிப்³பா³னபச்சவேக்க²ணஞாணம் வுத்தம். அத² வா பனாதிஆதீ³ஹி க²ந்த⁴பரினிப்³பா³னபச்சவேக்க²ணஞாணம் நித்³தி³ஸதி. அனுபாதி³ஸேஸாய நிப்³பா³னதா⁴துயாதி து³விதா⁴ ஹி நிப்³பா³னதா⁴து ஸஉபாதி³ஸேஸா ச அனுபாதி³ஸேஸா ச. தத்த² உபாதீ³யதே ‘‘அஹம் மமா’’தி பு⁴ஸம் க³ண்ஹீயதீதி உபாதி³, க²ந்த⁴பஞ்சகஸ்ஸேதம் அதி⁴வசனம். உபாதி³யேவ ஸேஸோ அவஸிட்டோ²தி உபாதி³ஸேஸோ, ஸஹ உபாதி³ஸேஸேன வத்ததீதி ஸஉபாதி³ஸேஸா. நத்தே²த்த² உபாதி³ஸேஸோதி அனுபாதி³ஸேஸா. ஸஉபாதி³ஸேஸா பட²மம் வுத்தா. அயம் பன அனுபாதி³ஸேஸா. தாய அனுபாதி³ஸேஸாய நிப்³பா³னதா⁴துயா. சக்கு²பவத்தந்தி சக்கு²பவத்தி சக்கு²ஸமுதா³சாரோ. பரியாதி³யதீதி கே²பீயதி மத்³தீ³யதீதி. ஏஸ நயோ ஸேஸேஸு.

பரினிப்³பா³னஞாணனித்³தே³ஸவண்ணனா நிட்டி²தா.