29-31. ஞாணத்தயனித்³தே³ஸவண்ணனா

78. ஞாணத்தயனித்³தே³ஸே நிமித்தந்தி ஸங்கா²ரனிமித்தம். அனிமித்தேதி ஸங்கா²ரனிமித்தபடிபக்கே² நிப்³பா³னே. அதி⁴முத்தத்தாதி தன்னின்னபா⁴வேன சித்தஸ்ஸ விஸ்ஸட்ட²த்தா. பு²ஸ்ஸ பு²ஸ்ஸ வயம் பஸ்ஸதீதி ஸங்கா²ரனிமித்தம் ஞாணேன பு²ஸித்வா பு²ஸித்வா தஸ்ஸ ப⁴ங்க³ம் விபஸ்ஸனாஞாணேனேவ பஸ்ஸதி. ஏதேன ப⁴ங்கா³னுபஸ்ஸனா ஸித்³தா⁴. ஸா அனிச்சானுபஸ்ஸனம் ஸாதே⁴தி, அனிச்சஸ்ஸ து³க்க²த்தா ஸா து³க்கா²னுபஸ்ஸனம், து³க்க²ஸ்ஸ அனத்தத்தா ஸா அனத்தானுபஸ்ஸனந்தி ஏவமேத்த² திஸ்ஸோ அனுபஸ்ஸனா வுத்தா ஹோந்தி. அனிமித்தோ விஹாரோதி நிமித்தம் ப⁴யதோ தி³ட்ட²த்தா ஸோ விபஸ்ஸனத்தயவிஹாரோ அனிமித்தவிஹாரோ நாம ஹோதி. பணிதி⁴ந்தி தண்ஹம். அப்பணிஹிதேதி தண்ஹாபடிபக்கே² நிப்³பா³னே. அபி⁴னிவேஸந்தி அத்தாபி⁴னிவேஸம். ஸுஞ்ஞதேதி அத்தவிரஹிதே நிப்³பா³னே. ஸுஞ்ஞதோதி ஸுஞ்ஞம்யேவ ஸுஞ்ஞதோ. பவத்தம் அஜ்ஜு²பேக்கி²த்வாதி விபாகப்பவத்தம் ஸங்கா²ருபேக்கா²ய அஜ்ஜு²பேக்கி²த்வா. ஸுக³திஸங்கா²தவிபாகப்பவத்தாபி⁴னந்தி³னோ ஹி ஸத்தா. அயம் பன ப²லஸமாபத்திம் ஸமாபஜ்ஜிதுகாமோ தம் பவத்தம், ஸப்³ப³ஞ்ச ஸங்கா²ரக³தம் அனிச்சாதி³தோ பஸ்ஸித்வா அஜ்ஜு²பேக்க²தியேவ. ஏவஞ்ஹி தி³ட்டே² ப²லஸமாபத்திம் ஸமாபஜ்ஜிதும் ஸக்கோதி, ந அஞ்ஞதா². ஆவஜ்ஜித்வாதி ஆவஜ்ஜனேன ஆவஜ்ஜித்வா. ஸமாபஜ்ஜதீதி ப²லஸமாபத்திம் படிபஜ்ஜதி. அனிமித்தா ஸமாபத்தீதி நிமித்தம் ப⁴யதோ தி³ஸ்வா ஸமாபன்னத்தா அனிமித்தா ஸமாபத்தி நாம. அனிமித்தவிஹாரஸமாபத்தீதி விபஸ்ஸனாவிஹாரவஸேன ச ப²லஸமாபத்திவஸேன ச தது³ப⁴யம் நாம ஹோதி.

79. இதா³னி ஸங்கா²ரனிமித்தமேவ விப⁴ஜித்வா த³ஸ்ஸேந்தோ ரூபனிமித்தந்திஆதி³மாஹ. ஜராமரணக்³க³ஹணே வத்தப்³ப³ம் புப்³பே³ வுத்தமேவ. ‘‘அஞ்ஞோ அனிமித்தவிஹாரோ’’திஆதீ³ஹி வுத்தேயேவ நிக³மேத்வா த³ஸ்ஸேதி. ஸங்கே²பேன விஹாரட்டே² ஞாணம் நாம ப²லஸமாபத்தியா புப்³ப³பா⁴கே³ ஸங்கா²ருபேக்கா²ஞாணே டி²தஸ்ஸ விபஸ்ஸனாவிஹாரனானத்தே ஞாணம் ஸமாபத்தட்டே² ஞாணம் நாம ப²லஸமாபத்தினானத்தே ஞாணம். விஹாரஸமாபத்தட்டே² ஞாணம் நாம தது³ப⁴யனானத்தே ஞாணம். விபஸ்ஸனாவிஹாரேனேவ வீதினாமேதுகாமோ விபஸ்ஸனாவிஹாரமேவ பவத்தேதி, ப²லஸமாபத்திவிஹாரேனேவ வீதினாமேதுகாமோ விபஸ்ஸனாபடிபாடியா உஸ்ஸக்கித்வா ப²லஸமாபத்திவிஹாரமேவ பவத்தேதி, தது³ப⁴யேன வீதினாமேதுகாமோ தது³ப⁴யம் பவத்தேதி. ஏவம் புக்³க³லாதி⁴ப்பாயவஸேன திவித⁴ம் ஜாதம். ஸேஸமேத்த² வத்தப்³ப³ம் ஸங்கா²ருபேக்கா²ஞாணவண்ணனாயம் வுத்தமேவ.

ஞாணத்தயனித்³தே³ஸவண்ணனா நிட்டி²தா.