20-24. ஞாணபஞ்சகனித்³தே³ஸவண்ணனா

75. ஞாணபஞ்சகனித்³தே³ஸே தேஸம் பஞ்சன்னம் ஞாணானம் அனுபுப்³ப³ஸம்ப³ந்த⁴ஸப்³பா⁴வதோ ஏகதோவ புச்சா²விஸ்ஸஜ்ஜனானி கதானி. அபி⁴ஞ்ஞாதா ஹோந்தீதி த⁴ம்மஸபா⁴வலக்க²ணஜானனவஸேன ஸுட்டு² ஞாதா ஹோந்தி. ஞாதா ஹோந்தீதி ஞாதபரிஞ்ஞாவஸேன ஸபா⁴வதோ ஞாதத்தா ஞாதா நாம ஹோந்தி. யேன ஞாணேன தே த⁴ம்மா ஞாதா ஹோந்தி, தம் ஞாதட்டே²ன ஞாணம், பஜானனட்டே²ன பஞ்ஞாதி ஸம்ப³ந்தோ⁴. இமினாவ நயேன ஸேஸஞாணானிபி யோஜேதப்³பா³னி. பரிஞ்ஞாதா ஹோந்தீதி ஸாமஞ்ஞலக்க²ணவஸேன ஸமந்ததோ ஞாதா ஹோந்தி. தீரிதா ஹோந்தீதி தீரணபரிஞ்ஞாவஸேன அனிச்சாதி³தோ உபபரிக்கி²தா ஸமாபிதா நாம ஹோந்தி. பஹீனா ஹோந்தீதி அனிச்சானுபஸ்ஸனாதி³னா ஞாணேன நிச்சஸஞ்ஞாத³யோ ப⁴ங்கா³னுபஸ்ஸனதோ பட்டா²ய பஹீனா ஹோந்தி. பரிச்சத்தா ஹோந்தீதி பஹானவஸேனேவ ச²ட்³டி³தா நாம ஹோந்தி. பா⁴விதா ஹோந்தீதி வட்³டி⁴தா பரிபா⁴விதா ச ஹோந்தி. ஏகரஸா ஹோந்தீதி ஸகிச்சஸாத⁴னபடிபக்க²பஹானேன ஏககிச்சா ஹோந்தி, பச்சனீகதோ வா விமுத்திவஸேன விமுத்திரஸேன ஏகரஸா ஹோந்தி. ஸச்சி²கதா ஹோந்தீதி படிலாப⁴வஸேன ப²லத⁴ம்மோ படிவேத⁴வஸேன நிப்³பா³னத⁴ம்மோதி பச்சக்க²கதா ஹோந்தி. ப²ஸ்ஸிதா ஹோந்தீதி படிலாப⁴பு²ஸனேன படிவேத⁴பு²ஸனேன ச ப²ஸ்ஸிதா அனுபூ⁴தா ஹோந்தி. இமானி பஞ்ச ஞாணானி ஹேட்டா² ஸுதமயஞாணவஸேன வுத்தானி, இத⁴ ஸகிச்சஸாத⁴னவஸேன.

ஞாணபஞ்சகனித்³தே³ஸவண்ணனா நிட்டி²தா.