15. வத்து²னானத்தஞாணனித்³தே³ஸவண்ணனா

66. வத்து²னானத்தஞாணனித்³தே³ஸே சக்கு²ம் அஜ்ஜ²த்தம் வவத்தே²தீதி அஜ்ஜ²த்தபூ⁴தம் சக்கு²ம் வவத்த²பேதி. யதா² ஸோ சக்கு²ம் வவத்த²பேதி, ததா² வத்துகாமோ கத²ம் சக்கு²ம் அஜ்ஜ²த்தம் வவத்தே²தீதி புச்சி²த்வா புன சக்கு² அவிஜ்ஜாஸம்பூ⁴தந்தி வவத்தே²தீதிஆதி³னா வவத்தா²பனாகாரம் த³ஸ்ஸேதி. தத்த² அவிஜ்ஜாதண்ஹா அதீதா உபத்த²ம்ப⁴கஹேதுயோ, கம்மம் அதீதம் ஜனகஹேது, ஆஹாரோ இதா³னி உபத்த²ம்ப⁴கஹேது. ஏதேன சக்கூ²பத்த²ம்ப⁴கானி உதுசித்தானி க³ஹிதானேவ ஹோந்தி. சதுன்னம் மஹாபூ⁴தானம் உபாதா³யாதி உபயோக³த்தே² ஸாமிவசனம், சத்தாரி மஹாபூ⁴தானி உபாதி³யித்வா பவத்தந்தி அத்தோ². ஏதேன பஸாத³சக்கு²பா⁴வோ த³ஸ்ஸிதோ ஹோதி, ஸஸம்பா⁴ரபா⁴வோ படிக்கி²த்தோ. உப்பன்னந்தி அத்³தா⁴வஸேன, ஸந்ததிக²ணவஸேன வா பச்சுப்பன்னம். ஸமுதா³க³தந்தி ஹேதுதோ ஸமுட்டி²தம். ஏத்தாவதா விபஸ்ஸனாபுப்³ப³பா⁴கே³ சக்கு²வவத்தா²னம் த³ஸ்ஸிதம். அஹுத்வா ஸம்பூ⁴தந்திஆதீ³ஹி அனிச்சானுபஸ்ஸனா. புப்³பே³ உத³யா அவிஜ்ஜமானதோ அஹுத்வா ஸம்பூ⁴தம், உத்³த⁴ம் வயா அபா⁴வதோ ஹுத்வா ந ப⁴விஸ்ஸதி. அந்தவந்ததோதி அந்தோ அஸ்ஸ அத்தீ²தி அந்தவா, அந்தவா ஏவ அந்தவந்தோ யதா² ‘‘ஸதிமந்தோ, க³திமந்தோ, தி⁴திமந்தோ ச யோ இஸீ’’தி (தே²ரகா³. 1052). ததோ அந்தவந்ததோ, ப⁴ங்க³விஜ்ஜமானதோதி அத்தோ². அத்³து⁴வந்தி ஸப்³பா³வத்தா²னிபாதிதாய, தி²ரபா⁴வஸ்ஸ ச அபா⁴வதாய ந தி²ரம். அஸஸ்ஸதந்தி ந நிச்சம். விபரிணாமத⁴ம்மந்தி ஜராய சேவ மரணேன சாதி த்³வேதா⁴ விபரிணாமபகதிகம். சக்கு² அனிச்சந்திஆதீ³னி சக்கு²ம் அனிச்சதோதிஆதீ³னி ச வுத்தத்தா²னி. மனோதி இத⁴ ப⁴வங்க³மனஸ்ஸ அதி⁴ப்பேதத்தா அவிஜ்ஜாஸம்பூ⁴தோதிஆதி³ யுஜ்ஜதியேவ. ஆஹாரஸம்பூ⁴தோதி ஏத்த² ஸம்பயுத்தப²ஸ்ஸாஹாரமனோஸஞ்சேதனாஹாரவஸேன வேதி³தப்³ப³ம். உப்பன்னோதி ச அத்³தா⁴ஸந்ததிவஸேன.

வத்து²னானத்தஞாணனித்³தே³ஸவண்ணனா நிட்டி²தா.