12. ஓதரணஹாரவிப⁴ங்க³வண்ணனா

42. தத்த² கதமோ ஓதரணோ ஹாரோதி ஓதரணஹாரவிப⁴ங்கோ³. தத்த² அஸேக்கா² விமுத்தீதி அயம் தேதா⁴துகே வீதராக³தா அஸேக்கா² ப²லவிமுத்தி. தானியேவாதி தானி அஸேக்கா²யம் விமுத்தியம் ஸத்³தா⁴தீ³னி. அயம் இந்த்³ரியேஹி ஓதரணாதி அஸேக்கா²ய விமுத்தியா நித்³தா⁴ரிதேஹி ஸத்³தா⁴தீ³ஹி இந்த்³ரியேஹி ஸம்வண்ணனாய ஓதரணா.

பஞ்சிந்த்³ரியானி விஜ்ஜாதி ஸம்மாஸங்கப்போ விய ஸம்மாதி³ட்டி²யா உபகாரகத்தா பஞ்ஞாக்க²ந்தே⁴ ஸத்³தா⁴தீ³னி சத்தாரி இந்த்³ரியானி விஜ்ஜாய உபகாரகத்தா ஸங்க³ண்ஹனவஸேன வுத்தானி. ஸங்கா²ரபரியாபன்னானீதி பஞ்சஸு க²ந்தே⁴ஸு ஸங்கா²ரக்க²ந்தே⁴ அந்தோக³தா⁴னி. யே ஸங்கா²ரா அனாஸவாதி தம் ஸங்கா²ரக்க²ந்த⁴ம் விஸேஸேதி, அக்³க³ப²லஸ்ஸ அதி⁴ப்பேதத்தா. ததோ ஏவ ச நோ ப⁴வங்கா³. த⁴ம்மதா⁴துஸங்க³ஹிதாதி அட்டா²ரஸதா⁴தூஸு த⁴ம்மதா⁴துஸங்க³ஹிதா. யதி³பி புப்³பே³ வீதராக³தா அஸேக்கா² விமுத்தி த³ஸ்ஸிதா, தஸ்ஸா பன படிபத்தித³ஸ்ஸனத்த²ம் ‘‘அயம் அஹமஸ்மீதி அனானுபஸ்ஸீ’’தி த³ஸ்ஸனமக்³கோ³ இத⁴ வுத்தோதி இமமத்த²ம் த³ஸ்ஸேதும் ‘‘அயம் அஹமஸ்மீதி அனானுபஸ்ஸீ’’திஆதி³ வுத்தம். ஸப்³ப³ம் வுத்தனயமேவ.

43. நிஸ்ஸிதஸ்ஸ சலிதந்தி தண்ஹாதி³ட்டி²வஸேன கம்மம் அனவட்டா²னம். சுதூபபாதோதி அபராபரம் சவனம் உபபதனஞ்ச. நிஸ்ஸிதபதே³ லப்³ப⁴மானம் நிஸ்ஸயனம் உத்³த⁴ரந்தோ ஆஹ – ‘‘நிஸ்ஸயோ நாமா’’தி. தண்ஹானிஸ்ஸயோதி தண்ஹாபி⁴னிவேஸோ. ஸோ ஹி தண்ஹாசரிதஸ்ஸ பதிட்டா²பா⁴வேன ததா² வுத்தோ. ஏவம் தி³ட்டி²னிஸ்ஸயோபி த³ட்ட²ப்³போ³. ரத்தஸ்ஸ சேதனாதி சேதனாபதா⁴னத்தா ஸங்கா²ரக்க²ந்த⁴த⁴ம்மானம் சேதனாஸீஸேன தண்ஹம் ஏவ வத³தி. தேனேவாஹ – ‘‘அயம் தண்ஹானிஸ்ஸயோ’’தி. யஸ்மா பன விபரீதாபி⁴னிவேஸோ மோஹஸ்ஸ ப³லவபா⁴வே ஏவ ஹோதி, தஸ்மா ‘‘யா மூள்ஹஸ்ஸ சேதனா, அயம் தி³ட்டி²னிஸ்ஸயோ’’தி வுத்தம்.

ஏவம் சேதனாஸீஸேன தண்ஹாதி³ட்டி²யோ வத்வா இதா³னி தத்த² நிப்பரியாயேன சேதனம்யேவ க³ண்ஹந்தோ ‘‘சேதனா பன ஸங்கா²ரா’’தி ஆஹ. யா ரத்தஸ்ஸ வேத³னா, அயம் ஸுகா² வேத³னாதி ஸுகா²ய வேத³னாய ராகோ³ அனுஸேதீதி கத்வா வுத்தம். ததா² அது³க்க²மஸுகா²ய வேத³னாய அவிஜ்ஜா அனுஸேதீதி ஆஹ – ‘‘யா ஸம்மூள்ஹஸ்ஸ வேத³னா, அயம் அது³க்க²மஸுகா² வேத³னா’’தி. இத⁴ வேத³னாஸீஸேன சேதனா வுத்தா. தண்ஹாயாதி தண்ஹம். தி³ட்டி²யாதி தி³ட்டி²ம். யதா² வா ஸேஸத⁴ம்மானம் தண்ஹாய நிஸ்ஸயபா⁴வே புக்³க³லோ தண்ஹாய நிஸ்ஸிதோதி வுச்சதி. ஏவம் தண்ஹாய ஸேஸத⁴ம்மானம் பச்சயபா⁴வே புக்³க³லோ தண்ஹாய நிஸ்ஸிதோதி வுச்சதீதி ஆஹ – ‘‘தண்ஹாய அனிஸ்ஸிதோ’’தி.

பஸ்ஸத்³தீ⁴தி த³ரத²படிப்பஸ்ஸம்ப⁴னா. காயிகாதி கரஜகாயஸன்னிஸ்ஸிதா. சேதஸிகாதி சித்தஸன்னிஸ்ஸிதா. யஸ்மா பன ஸா த³ரத²படிப்பஸ்ஸத்³தி⁴ காயசித்தானம் ஸுகே² ஸதி பாகடா ஹோதி, தஸ்மா ‘‘யம் காயிகம் ஸுக²’’ந்திஆதி³னா ப²லூபசாரேன வுத்தாய பஸ்ஸத்³தி⁴யா நதிஅபா⁴வஸ்ஸ காரணபா⁴வம் த³ஸ்ஸேதும் ‘‘பஸ்ஸத்³த⁴காயோ’’திஆதி³ வுத்தம். ஸோதி ஏவம் விமுத்தசித்தோ கீ²ணாஸவோ. ரூபஸங்க²யே விமுத்தோதி ரூபானம் ஸங்க²யஸங்கா²தே நிப்³பா³னே விமுத்தோ. அத்தீ²திபி ந உபேதீதி ஸஸ்ஸதோ அத்தா ச லோகோ சாதிபி தண்ஹாதி³ட்டி²உபயேன ந உபேதி ந க³ண்ஹாதி. நத்தீ²தி அஸஸ்ஸதோதி. அத்தி² நத்தீ²தி ஏகச்சம் ஸஸ்ஸதம் ஏகச்சம் அஸஸ்ஸதந்தி. நேவத்தி² நோ நத்தீ²தி அமராவிக்கே²பவஸேன. க³ம்பீ⁴ரோதி உத்தானபா⁴வஹேதூனம் கிலேஸானம் அபா⁴வேன க³ம்பீ⁴ரோ. நிப்³பு³தோதி அத்தீ²திஆதி³னா உபக³மனகிலேஸானம் வூபஸமேன பரினிப்³பு³தோ ஸீதிபூ⁴தோ.

இதா⁴க³தீதி பரலோகதோ இத⁴ ஆக³தி. க³தீதி இத⁴லோகதோ பரலோகக³மனம். தம் பன புனப்³ப⁴வோதி ஆஹ ‘‘பேச்சப⁴வோ’’தி. இத⁴ ஹுரந்தி த்³வாராரம்மணத⁴ம்மா த³ஸ்ஸிதாதி ‘‘உப⁴யமந்தரேனா’’தி பதே³ன த்³வாரப்பவத்தத⁴ம்மே த³ஸ்ஸேந்தோ ‘‘ப²ஸ்ஸஸமுதி³தேஸு த⁴ம்மேஸூ’’தி ஆஹ. தஸ்ஸத்தோ² – ப²ஸ்ஸேன ஸத்³தி⁴ம் ப²ஸ்ஸேன காரணபூ⁴தேன ச ஸமுதி³தேஸு ஸம்பூ⁴தேஸு விஞ்ஞாணவேத³னாஸஞ்ஞாசேதனாவிதக்கவிசாராதி³த⁴ம்மேஸு. அத்தானம் ந பஸ்ஸதீதி தேஸம் த⁴ம்மானம் அனத்தபா⁴வேனேவ தத்த² அத்தானம் ந பஸ்ஸதி. விரஜ்ஜதி விராகா³ விமுச்சதீதி பதே³ஹி லோகுத்தரத⁴ம்மானம் படிச்சஸமுப்பாத³பா⁴வம் த³ஸ்ஸேந்தோ தத³த்த²தாய ஸீலாதீ³னம்பி பரியாயேன தப்³பா⁴வமாஹ ‘‘லோகுத்தரோ’’திஆதி³னா.

44. நாமஸம்பயுத்தோதி நாமேன மிஸ்ஸிதோ. ஸஉபாதி³ஸேஸா நிப்³பா³னதா⁴தூதி அரஹத்தப²லம் அதி⁴ப்பேதம். தஞ்ச பஞ்ஞாபதா⁴னந்தி ஆஹ – ‘‘ஸஉபாதி³ஸேஸா நிப்³பா³னதா⁴து விஜ்ஜாதி. ஸேஸம் ஸப்³ப³ம் உத்தானமேவ.

ஓதரணஹாரவிப⁴ங்க³வண்ணனா நிட்டி²தா.