9. பரிவத்தனஹாரவிப⁴ங்க³வண்ணனா

35. தத்த² கதமோ பரிவத்தனோ ஹாரோதி பரிவத்தனஹாரவிப⁴ங்கோ³. தத்த² யஸ்மா ஸம்வண்ணியமானே ஸுத்தே யதா²னித்³தி³ட்டா²னம் குஸலாகுஸலத⁴ம்மானம் படிபக்க²பூ⁴தே அகுஸலகுஸலத⁴ம்மே பஹாதப்³ப³பா⁴வாதி³வஸேன நித்³தா⁴ரணம் படிபக்க²தோ பரிவத்தனம், தஸ்மா ‘‘ஸம்மாதி³ட்டி²ஸ்ஸ புரிஸபுக்³க³லஸ்ஸ மிச்சா²தி³ட்டி² நிஜ்ஜிண்ணா ப⁴வதீ’’திஆதி³ ஆரத்³த⁴ம். தத்த² ஸம்மா பஸத்தா², ஸுந்த³ரா தி³ட்டி² ஏதஸ்ஸாதி ஸம்மாதி³ட்டி², தஸ்ஸ. ஸா பனஸ்ஸ ஸம்மாதி³ட்டி²தா புப்³ப³பா⁴க³ஸம்மாதி³ட்டி²யா வா லோகுத்தரஸம்மாதி³ட்டி²யா வா வேதி³தப்³பா³. மிச்சா²தி³ட்டி² நிஜ்ஜிண்ணா ப⁴வதீதி புரிமனயே விபஸ்ஸனாஸம்மாதி³ட்டி²யா பஹீனா ஹோதி, விக்க²ம்பி⁴தாதி அத்தோ². பச்சி²மனயே பட²மமக்³க³ஸம்மாதி³ட்டி²யா பஹீனா ஸமுச்சி²ன்னாதி அத்தோ².

யே சஸ்ஸ மிச்சா²தி³ட்டி²பச்சயாதி மிச்சா²பி⁴னிவேஸஹேது யே அரியானம் அத³ஸ்ஸனகாமதாத³யோ லோபா⁴த³யோ பாணாதிபாதாத³யோ ச அனேகே லாமகட்டே²ன பாபகா அகோஸல்லஸம்பூ⁴தட்டே²ன அகுஸலா த⁴ம்மா உப்பஜ்ஜேய்யும். இமஸ்ஸ ஆரத்³த⁴விபஸ்ஸகஸ்ஸ அரியஸ்ஸ ச. த⁴ம்மாதி ஸமத²விபஸ்ஸனாத⁴ம்மா, ஸத்தத்திம்ஸபோ³தி⁴பக்கி²யத⁴ம்மா வா அனுப்பன்னா வா ஸம்ப⁴வந்தி உப்பன்னா, பா⁴வனாபாரிபூரிம் க³ச்ச²ந்தி. ஸம்மாஸங்கப்பஸ்ஸாதிஆதீ³னம்பி இமினாவ நயேன அத்தோ² வேதி³தப்³போ³. அயம் பன விஸேஸோ – ஸம்மாவிமுத்திஆதீ³னம் மிச்சா²விமுத்தி அவிமுத்தாவ ஸமானா ‘‘விமுத்தா மய’’ந்தி ஏவம்ஸஞ்ஞினோ அவிமுத்தியம் வா விமுத்திஸஞ்ஞினோ. தத்ராயம் வசனத்தோ² – மிச்சா² பாபிகா விமுத்தி விமோக்கோ² ஏதஸ்ஸாதி மிச்சா²விமுத்தி. அட்ட²ங்கா³ ச மிச்சா²விமுத்தி யதா²வுத்தேனாகாரேன மிச்சா²பி⁴னிவேஸவஸேன ச பவத்தா அந்தத்³வயலக்க²ணா. ஸம்மாவிமுத்தி பன ப²லத⁴ம்மா, மிச்சா²தி³ட்டி²கே ஸமாஸேவதோ மிச்சா²விமோக்கோ² வா மிச்சா²விமுத்தி. மிச்சா²விமுத்திஞாணத³ஸ்ஸனம் பன மிச்சா²விமோக்கே² மிச்சா²தி³ட்டி²யா ச ஸாரந்தி க³ஹணவஸேன பவத்தோ அகுஸலசித்துப்பாதோ³ அந்தமஸோ பாபம் கத்வா ‘‘ஸுகதம் மயா’’தி பச்சவேக்க²தோ உப்பன்னமோஹோ ச. ஸம்மாவிமுத்திஞாணத³ஸ்ஸனஸ்ஸாதி ஏத்த² ஸேக்கா²னம் பச்சவேக்க²ணஞாணம் ஸம்மாவிமுத்திஞாணத³ஸ்ஸனந்தி அதி⁴ப்பேதம். தஞ்ஹி உத்தரிபா⁴வனாபாரிபூரியா ஸம்வத்ததி.

36. ஏவம் ஸம்மாதி³ட்டி²ஆதி³முகே²ன மிச்சா²தி³ட்டி²ஆதி³ம் த³ஸ்ஸேத்வா புன பாணாதிபாதஅதி³ன்னாதா³னகாமேஸுமிச்சா²சாராதி³தோ வேரமணியாதீ³ஹி பாணாதிபாதாதீ³னம் பரிவத்தனம் த³ஸ்ஸேதும் ‘‘யஸ்ஸா’’திஆதி³ ஆரத்³த⁴ம். தத்த² காலவாதி³ஸ்ஸாதி லக்க²ணவசனம். காலேன ஸாபதே³ஸம் பரியந்தவதிம் அத்த²ஸஞ்ஹிதந்தி ஸோ ஸம்ப²ப்பலாபஸ்ஸ பஹானாய படிபன்னோ ஹோதீதி வுத்தம்.

புன ‘‘யே ச கோ² கேசீ’’திஆதி³னா ஸம்மாதி³ட்டி²ஆதி³முகே²னேவ மிச்சா²தி³ட்டி²ஆதீ³ஹி ஏவ பரிவத்தனம் பகாரந்தரேன த³ஸ்ஸேதி. தத்த² ஸந்தி³ட்டி²காதி பச்சக்கா². ஸஹத⁴ம்மிகாதி ஸகாரணா. கா³ரய்ஹாதி க³ரஹிதப்³ப³யுத்தா. வாதா³னுவாதா³தி வாதா³ சேவ அனுவாதா³ ச. ‘‘வாதா³னுபாதா’’திபி பாடோ², வாதா³னுபவத்தியோதி அத்தோ². புஜ்ஜாதி பூஜனீயா. பாஸம்ஸாதி பஸம்ஸிதப்³பா³.

புன ‘‘யே ச கோ² கேசீ’’திஆதி³னா மஜ்ஜி²மாய படிபத்தியா அந்தத்³வயபரிவத்தனம் த³ஸ்ஸேதி. தத்த² பு⁴ஞ்ஜிதப்³பா³திஆதீ³னி சத்தாரி பதா³னி வத்து²காமவஸேன யோஜேதப்³பா³னி. பா⁴வயிதப்³பா³ ப³ஹுலீகாதப்³பா³தி பத³த்³வயம் கிலேஸகாமவஸேன. தேஸம் அத⁴ம்மோதி பா⁴வேதப்³போ³ நாம த⁴ம்மோ ஸியா, காமா ச தேஸம் பா⁴வேதப்³பா³ இச்சி²தா, காமேஹி ச வேரமணீ காமானம் படிபக்கோ², இதி ஸா தேஸம் அத⁴ம்மோ ஆபஜ்ஜதீதி அதி⁴ப்பாயோ.

நிய்யானிகோ த⁴ம்மோதி ஸஹ விபஸ்ஸனாய அரியமக்³கோ³. து³க்கோ²தி பாபம் நிஜ்ஜராபேஸ்ஸாமாதி பவத்திதம் ஸரீரதாபனம் வத³தி. ஸுகோ²தி அனவஜ்ஜபச்சயபரிபோ⁴க³ஸுக²ம். ஏதேஸுபி வாரேஸு வுத்தனயேனேவ அத⁴ம்மபா⁴வாபத்தி வத்தப்³பா³. இதா³னி அஸுப⁴ஸஞ்ஞாதி³முகே²ன ஸுப⁴ஸஞ்ஞாதி³பரிவத்தனம் த³ஸ்ஸேதும் ‘‘யதா² வா பனா’’திஆதி³ வுத்தம். ஆரத்³த⁴விபஸ்ஸகஸ்ஸ கிலேஸாஸுசிபக்³க⁴ரணவஸேன தேபூ⁴மகஸங்கா²ரா அஸுப⁴தோ உபட்ட²ஹந்தீதி கத்வா வுத்தம் ‘‘ஸப்³ப³ஸங்கா²ரேஸு அஸுபா⁴னுபஸ்ஸினோ விஹரதோ’’தி. ‘‘யம் யம் வா பனா’’திஆதி³னா படிபக்க²ஸ்ஸ லக்க²ணம் விபா⁴வேதி. தத்த² அஜ்ஜா²பன்னோதி அதி⁴ஆபன்னோ, அபி⁴உபக³தோ பரிஞ்ஞாதோதி அத்தோ².

பரிவத்தனஹாரவிப⁴ங்க³வண்ணனா நிட்டி²தா.