6. சதுப்³யூஹஹாரஸம்பாதவண்ணனா

68. ரக்கீ²யதீதி ரக்கி²தம். இத³ம் பத³வஸேன நிப்³ப³சனம். யஸ்மா பன அத்த²வஸேன நிப்³ப³சனே வுத்தே பத³வஸேன நிப்³ப³சனம் வுத்தமேவ ஹோதி, தஸ்மா ‘‘ரக்கி²தம் பரிபாலீயதீதி ஏஸா நிருத்தீ’’தி வுத்தம். தத்த² இதி-ஸத்³தோ³ ஆத்³யத்தோ², பகாரே வா. தேன ஏவமாதி³கா ஏவம்பகாரா வா ஏஸா நிருத்தீதி வுத்தம் ஹோதி. தஸ்மா சிந்தேதீதி சித்தம். அத்தனோ ஸந்தானம் சினோதீதி சித்தம், பச்சயேஹி சிதந்தி சித்தம், சித்தவிசித்தட்டே²ன சித்தம், சித்தகரணட்டே²ன சித்தம். ஸம்மா ஸங்கப்பேதீதி ஸம்மாஸங்கப்போதிஆதி³னா நிருத்தி வேதி³தப்³பா³.

அயம் ஏத்த² ப⁴க³வதோ அதி⁴ப்பாயோதி ‘‘ரக்கி²தசித்தோ அஸ்ஸா’’திஆதி³னா இந்த்³ரியஸம்வராத³யோ து³க்³க³திபஹானஞ்ச வத³தோ ப⁴க³வதோ ஏத்த² கா³தா²யம் அதி⁴ப்பாயோ. கோகாலிகோ ஹீதிஆதி³ நிதா³னனித்³தே³ஸோ. தத்த² ஹி-ஸத்³தோ³ காரணே. இத³ம் வுத்தம் ஹோதி – யஸ்மா கோகாலிகோ (ஸம். நி. 1.181; அ. நி. 10.89; ஸு. நி. கோகாலிகஸுத்த) அரக்கி²தசித்ததாய அக்³க³ஸாவகேஸு சித்தம் பதோ³ஸேத்வா பது³மனிரயம் உபபன்னோ, தஸ்மா து³க்³க³தியோ ஜஹிதுகாமோ ரக்கி²தசித்தோ அஸ்ஸாதி ப⁴க³வா ஸதிஆரக்கே²ன சேதஸா ஸமன்னாக³தோ ஸப்³பா³ து³க்³க³தியோ ஜஹதீதி அத்தோ². ஸுத்தம்ஹி வுத்தம் ‘‘ஸதியா சித்தம் ரக்கி²தப்³ப³’’ந்தி தே³ஸனானுஸந்தி⁴த³ஸ்ஸனம்.

சதுப்³யூஹஹாரஸம்பாதவண்ணனா நிட்டி²தா.