4. பத³ட்டா²னஹாரஸம்பாதவண்ணனா

66. ஸகஸம்பத்தியா விய ஸுஸம்விஹிதஸங்கப்போ ப⁴வதி. இந்த்³ரியேஸு கு³த்தத்³வாரதா ஸுசரிதபாரிபூரியா ஆஸன்னகாரணந்தி ஆஹ – ‘‘ரக்கி²தசித்தஸ்ஸாதி திண்ணம் ஸுசரிதானம் பத³ட்டா²ன’’ந்தி. தஸ்ஸத்தோ² – ‘‘ரக்கி²தசித்தஸ்ஸா’’தி இத³ம் திண்ணம் ஸுசரிதானம் பத³ட்டா²னவசனந்தி. நேக்க²ம்மஸங்கப்பாதி³ப³ஹுலஸ்ஸ காமச்ச²ந்தா³தி³னீவரணப்பஹானம் ஸுகரந்தி நேக்க²ம்மஸங்கப்பாத³யோ ஸமத²ஸ்ஸ ஆஸன்னகாரணந்தி ஆஹ – ‘‘ஸம்மாஸங்கப்பகோ³சரோதி ஸமத²ஸ்ஸ பத³ட்டா²ன’’ந்தி. கம்மஸ்ஸகதாஸம்மாதி³ட்டி²யம் ஸப்பச்சயனாமரூபத³ஸ்ஸனஸம்மாதி³ட்டி²யஞ்ச டி²தோ அத்தாதீ⁴னம் ஸம்ஸாரது³க்க²ம் பஸ்ஸந்தோ தத³திக்கமனுபாயம் விபஸ்ஸனம் ஆரப⁴தீதி ஸம்மாதி³ட்டி²விபஸ்ஸனாய விஸேஸகாரணந்தி ஆஹ – ‘‘ஸம்மாதி³ட்டி²புரேக்கா²ரோதி விபஸ்ஸனாய பத³ட்டா²ன’’ந்தி. உத³யப்³ப³யத³ஸ்ஸனம் உஸ்ஸுக்காபேந்தோ ஸம்மத்தனியாமம் ஓக்கமதீதி தம் பட²மமக்³கா³தி⁴க³மஸ்ஸ காரணந்தி ஆஹ – ‘‘ஞத்வான உத³யப்³ப³யந்தி த³ஸ்ஸனபூ⁴மியா பத³ட்டா²ன’’ந்தி. ஆலோகஸஞ்ஞாமனஸிகாராதீ³ஹி தி²னமித்³த⁴ஸ்ஸ அபி⁴ப⁴வனம் வீரியஸ்ஸ ஆஸன்னகாரணந்தி ஆஹ – ‘‘தி²னமித்³தா⁴பி⁴பூ⁴ பி⁴க்கூ²தி வீரியஸ்ஸ பத³ட்டா²ன’’ந்தி. யதி³பி அரியமக்³க³க்க²ணே பஹானபா⁴வனா ஸமானகாலா ஏகாபி⁴ஸமயஸ்ஸ இச்சி²தத்தா, ததா²பி பஹாதப்³ப³ஸ்ஸ பஹானாபா⁴வே பா⁴வனாபாரிபூரீ நத்தீ²தி பஹானனிமித்தா விய கத்வா பா⁴வனா வுத்தா ‘‘ஸப்³பா³ து³க்³க³தியோ ஜஹேதி பா⁴வனாய பத³ட்டா²ன’’ந்தி. அத² வா ‘‘ஸப்³பா³ து³க்³க³தியோ ஜஹே’’தி இத³ம் ப⁴க³வதோ வசனம் யோகீ³னம் உஸ்ஸாஹஜனனத்த²ம் ஆனிஸம்ஸகித்தனம் ஹோதீதி பா⁴வனாய விஸேஸகாரணந்தி வுத்தம் ‘‘ஸப்³பா³…பே… பத³ட்டா²ன’’ந்தி.

பத³ட்டா²னஹாரஸம்பாதவண்ணனா நிட்டி²தா.