5. தோ⁴தகமாணவஸுத்தனித்³தே³ஸவண்ணனா

30. பஞ்சமே தோ⁴தகஸுத்தே – வாசாபி⁴கங்கா²மீதி வாசம் அபி⁴கங்கா²மி. ஸிக்கே² நிப்³பா³னமத்தனோதி அத்தனோ ராகா³தீ³னம் நிப்³பா³னத்தா²ய அதி⁴ஸீலாதீ³னி ஸிக்கே²ய்ய. நித்³தே³ஸே அபுப்³ப³ம் நத்தி².

31. இதோதி மம முக²தோ.

நித்³தே³ஸே ஆதப்பந்தி கிலேஸதாபனம். உஸ்ஸாஹந்தி அஸங்கோசம். உஸ்ஸோள்ஹீந்தி ப³லவவீரியம். தா²மந்தி அஸிதி²லம். தி⁴திந்தி தா⁴ரணம். வீரியம் கரோஹீதி பரக்கமம் கரோஹி. ச²ந்த³ம் ஜனேஹீதி ருசிம் உப்பாதே³ஹி.

32. ஏவம் வுத்தே அத்தமனோ தோ⁴தகோ ப⁴க³வந்தம் அபி⁴த்த²வமானோ கத²ம்கதா²பமோக்க²ம் யாசந்தோ ‘‘பஸ்ஸாமஹ’’ந்தி கா³த²மாஹ. தத்த² பஸ்ஸாமஹம் தே³வமனுஸ்ஸலோகேதி பஸ்ஸாமி அஹம் தே³வமனுஸ்ஸலோகே. தம் தம் நமஸ்ஸாமீதி தம் ஏவரூபம் தம் நமஸ்ஸாமி. பமுஞ்சாதி பமோசேஹி.

நித்³தே³ஸே பச்சேகபு³த்³தா⁴தி தம் தம் ஆரம்மணம் பாடியேக்கம் சதுஸச்சம் ஸயமேவ பு³த்³தா⁴ படிவேத⁴ப்பத்தாதி பச்சேகபு³த்³தா⁴. ஸீஹஸீஹோதி அச²ம்பி⁴தட்டே²ன ஸீஹானம் அதிஸீஹோ. நாக³னாகோ³தி நிக்கிலேஸட்டே²ன, மஹந்தட்டே²ன வா நாகா³னம் அதினாகோ³. க³ணிக³ணீதி க³ணவந்தானம் அதீவ க³ணவா. முனிமுனீதி ஞாணவந்தானம் அதீவ ஞாணவா. ராஜராஜாதி உத்தமராஜா. முஞ்ச மந்தி மோசேஹி மம். பமுஞ்ச மந்தி நானாவிதே⁴ன முஞ்சேஹி மம். மோசேஹி மந்தி ஸிதி²லம் கரோஹி மம். பமோசேஹி மந்தி அதீவ ஸிதி²லம் கரோஹி மம். உத்³த⁴ர மந்தி மம் ஸம்ஸாரபங்கா உத்³த⁴ரித்வா த²லே பதிட்டா²பேஹி. ஸமுத்³த⁴ர மந்தி ஸம்மா உத்³த⁴ரித்வா த²லே பதிட்டா²பேஹி மம். வுட்டா²பேஹீதி விசிகிச்சா²ஸல்லதோ அபனேத்வா விஸும் கரணவஸேன உட்டா²பேஹி.

33. அத²ஸ்ஸ ப⁴க³வா அத்தாதீ⁴னமேவ கத²ம்கதா²பமோக்க²ம் ஓக⁴தரணமுகே²ன த³ஸ்ஸேந்தோ ‘‘நாஹ’’ந்தி கா³த²மாஹ. தத்த² நாஹம் ஸஹிஸ்ஸாமீதி அஹம் ந ஸஹிஸ்ஸாமி ந ஸக்கோமி. ந வாயமிஸ்ஸாமீதி வுத்தம் ஹோதி. பமோசனாயாதி பமோசேதும். கத²ம்கதி²ந்தி ஸகங்க²ம். தரேஸீதி தரேய்யாஸி.

நித்³தே³ஸே ந ஈஹாமீதி பயோக³ம் ந கரோமி. ந ஸமீஹாமீதி அதீவ பயோக³ம் ந கரோமி. அஸ்ஸத்³தே⁴ புக்³க³லேதி ரதனத்தயே ஸத்³தா⁴விரஹிதே புக்³க³லே. அச்ச²ந்தி³கேதி மக்³க³ப²லத்த²ம் ருசிவிரஹிதே. குஸீதேதி ஸமாதி⁴விரஹிதே. ஹீனவீரியேதி நிப்³பீ³ரியே. அப்படிபஜ்ஜமானேதி படிபத்தியா ந படிபஜ்ஜமானே.

34. ஏவம் வுத்தே அத்தமனதரோ தோ⁴தகோ ப⁴க³வந்தம் அபி⁴த்த²வமானோ அனுஸாஸனிம் யாசந்தோ ‘‘அனுஸாஸ ப்³ரஹ்மே’’தி கா³த²மாஹ. தத்த² ப்³ரஹ்மேதி ஸேட்ட²வசனமேதம். தேன ப⁴க³வந்தம் ஆமந்தயமானோ ஆஹ ‘‘அனுஸாஸ ப்³ரஹ்மே’’தி. விவேகத⁴ம்மந்தி ஸப்³ப³ஸங்கா²ரவிவேகம் நிப்³பா³னத⁴ம்மம். அப்³யாபஜ்ஜமானோதி நானப்பகாரகம் அனாபஜ்ஜமானோ. இதே⁴வ ஸந்தோதி இதே⁴வ ஸமானோ. அஸிதோதி அனிஸ்ஸிதோ.

35-7. இதோ பரா த்³வே கா³தா² மேத்தகூ³ஸுத்தே வுத்தனயா ஏவ. கேவலஞ்ஹி தத்த² த⁴ம்மம், இத⁴ ஸந்திந்தி அயம் விஸேஸோ. ததியகா³தா²யபி புப்³ப³ட்³ட⁴ம் தத்த² வுத்தனயமேவ. அபரட்³டே⁴ ஸங்கோ³தி ஸஜ்ஜனட்டா²னம், லக்³க³னந்தி வுத்தம் ஹோதி. ஸேஸம் ஸப்³ப³த்த² பாகடமேவ.

ஏவம் ப⁴க³வா இத³ம்பி ஸுத்தம் அரஹத்தனிகூடேனேவ தே³ஸேஸி, தே³ஸனாபரியோஸானே ச வுத்தஸதி³ஸோ ஏவ த⁴ம்மாபி⁴ஸமயோ அஹோஸீதி.

ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய

தோ⁴தகமாணவஸுத்தனித்³தே³ஸவண்ணனா நிட்டி²தா.