6. உபஸீவமாணவஸுத்தனித்³தே³ஸவண்ணனா

38. ச²ட்டே² உபஸீவஸுத்தே – மஹந்தமோக⁴ந்தி மஹந்தம் ஓக⁴ம். அனிஸ்ஸிதோதி புக்³க³லம் வா த⁴ம்மம் வா அனல்லீனோ. நோ விஸஹாமீதி ந ஸக்கோமி. ஆரம்மணந்தி நிஸ்ஸயம். யம் நிஸ்ஸிதோதி யம் த⁴ம்மம் வா புக்³க³லம் வா நிஸ்ஸிதோ.

நித்³தே³ஸே காமோக⁴ந்தி அனாகா³மிமக்³கே³ன காமோக⁴ம். அரஹத்தமக்³கே³ன ப⁴வோக⁴ம். ஸோதாபத்திமக்³கே³ன தி³ட்டோ²க⁴ம். அரஹத்தமக்³கே³ன அவிஜ்ஜோக⁴ம் தரேய்யம். ஸக்யகுலா பப்³ப³ஜிதோதி ப⁴க³வதோ உச்சாகுலபரிதீ³பனவஸேன வுத்தம். ஆலம்ப³ணந்தி அவத்த²ரித்வா டா²னம். நிஸ்ஸயந்தி அல்லீயனம். உபனிஸ்ஸயந்தி அபஸ்ஸயனம்.

39. இதா³னி யஸ்மா ப்³ராஹ்மணோ ஆகிஞ்சஞ்ஞாயதனலாபீ⁴ தஞ்ச ஸந்தம்பி நிஸ்ஸயம் ந ஜானாதி. தேனஸ்ஸ ப⁴க³வா தஞ்ச நிஸ்ஸயம் உத்தரிஞ்ச நிய்யானபத²ம் த³ஸ்ஸேந்தோ ‘‘ஆகிஞ்சஞ்ஞ’’ந்தி கா³த²மாஹ. தத்த² பேக்க²மானோதி தம் ஆகிஞ்சஞ்ஞாயதனஸமாபத்திம் ஸதோ ஸமாபஜ்ஜித்வா வுட்ட²ஹித்வா ச அனிச்சாதி³வஸேன பஸ்ஸமானோ. நத்தீ²தி நிஸ்ஸாயாதி தம் ‘‘நத்தி² கிஞ்சீ’’தி பவத்தம் ஸமாபத்திம் ஆரம்மணம் கத்வா. தரஸ்ஸு ஓக⁴ந்தி ததோ பபு⁴தி பவத்தாய விபஸ்ஸனாய யதா²னுரூபம் சதுப்³பி³த⁴ம்பி ஓக⁴ம் தரஸ்ஸு. கதா²ஹீதி கத²ம்கதா²ஹி. தண்ஹக்க²யம் நத்தமஹாபி⁴பஸ்ஸாதி ரத்திந்தி³வம் நிப்³பா³னம் விபூ⁴தம் கத்வா பஸ்ஸ. ஏதேனஸ்ஸ தி³ட்ட²த⁴ம்மஸுக²விஹாரம் கதே²ஸி.

நித்³தே³ஸே தஞ்ஞேவ விஞ்ஞாணம் அபா⁴வேதீதி ஆகாஸாலம்ப³ணம் கத்வா பவத்தமஹக்³க³தவிஞ்ஞாணம் அபா⁴வேதி அபா⁴வம் க³மேதி. விபா⁴வேதீதி விவிதா⁴ அபா⁴வம் க³மேதி. அந்தரதா⁴பேதீதி அத³ஸ்ஸனம் க³மேதி. நத்தி² கிஞ்சீதி பஸ்ஸதீதி அந்தமஸோ ப⁴ங்க³மத்தம்பிஸ்ஸ நத்தீ²தி பஸ்ஸதி.

40. இதா³னி ‘‘காமே பஹாயா’’தி ஸுத்வா விக்க²ம்ப⁴னவஸேன அத்தனா பஹீனே காமே ஸம்பஸ்ஸமானோ ‘‘ஸப்³பே³ஸூ’’தி கா³த²மாஹ. தத்த² ஹித்வா மஞ்ஞந்தி அஞ்ஞம் ததோ ஹேட்டா² ச²ப்³பி³த⁴ம்பி ஸமாபத்திம் ஹித்வா. ஸஞ்ஞாவிமோக்கே² பரமேதி ஸத்தஸு ஸஞ்ஞாவிமோக்கே²ஸு உத்தமே ஆகிஞ்சஞ்ஞாயதனே. திட்டே² நு ஸோ தத்த² அனானுயாயீதி ஸோ புக்³க³லோ தத்த² ஆகிஞ்சஞ்ஞாயதனப்³ரஹ்மலோகே அவிக³ச்ச²மானோ திட்டே²ய்ய நூதி புச்ச²தி.

நித்³தே³ஸே அவிச்சமானோதி அவியுஜ்ஜமானோ. அவிக³ச்ச²மானோதி வியோக³ம் அனாபஜ்ஜமானோ. அனந்தரதா⁴யமானோதி அந்தரதா⁴னம் அனாபஜ்ஜமானோ. அபரிஹாயமானோதி அனந்தரா பரிஹானம் அனாபஜ்ஜமானோ.

41-2. அத²ஸ்ஸ ப⁴க³வா ஸட்டி²கப்பஸஹஸ்ஸமத்தகம்யேவ டா²னம் அனுஜானந்தோ சதுத்த²ம் கா³த²மாஹ. ஏவம் தஸ்ஸ தத்த² டா²னம் ஸுத்வா இதா³னிஸ்ஸ ஸஸ்ஸதுச்சே²த³பா⁴வம் புச்ச²ந்தோ ‘‘திட்டே² சே’’தி கா³த²மாஹ. தத்த² பூக³ம்பி வஸ்ஸானந்தி அனேகஸங்க்²யம்பி வஸ்ஸானம், க³ணனராஸிந்தி அத்தோ². ‘‘பூக³ம்பி வஸ்ஸானீ’’திபி பாடோ². தத்த² விப⁴த்திப்³யத்தயேன ஸாமிவசனஸ்ஸ பச்சத்தவசனம் காதப்³ப³ம், பூக³ந்தி வா ஏதஸ்ஸ ப³ஹூனீதி அத்தோ² வத்தப்³போ³. ‘‘பூகா³னீ’’தி வாபி பட²ந்தி, புரிமபாடோ²யேவ ஸப்³ப³ஸுந்த³ரோ. தத்தே²வ ஸோ ஸீதி ஸியா விமுத்தோதி ஸோ புக்³க³லோ தத்தே²வாகிஞ்சஞ்ஞாயதனே நானாது³க்கே²ஹி விமுத்தோ ஸீதிபா⁴வப்பத்தோ ப⁴வேய்ய, நிப்³பா³னப்பத்தோ ஸஸ்ஸதோ ஹுத்வா திட்டே²ய்யாதி அதி⁴ப்பாயோ. சவேத² விஞ்ஞாணம் ததா²வித⁴ஸ்ஸாதி ‘‘உதா³ஹு ததா²வித⁴ஸ்ஸ விஞ்ஞாணம் அனுபாதா³ய பரினிப்³பா³யேய்யா’’தி உச்சே²த³ம் புச்ச²தி, ‘‘படிஸந்தி⁴க்³க³ஹணத்த²ம் வாபி ப⁴வேய்யா’’தி படிஸந்தி⁴ம்பி தஸ்ஸ புச்ச²தி.

தஸ்ஸ விஞ்ஞாணம் சவேய்யாதி தஸ்ஸ ஆகிஞ்சஞ்ஞாயதனே உப்பன்னஸ்ஸ விஞ்ஞாணம் சுதிம் பாபுணேய்ய. உச்சி²ஜ்ஜேய்யாதி உச்சே²த³ம் ப⁴வேய்ய. வினஸ்ஸேய்யாதி வினாஸம் பாபுணேய்ய. ந ப⁴வேய்யாதி அபா⁴வம் க³மேய்ய. உபபன்னஸ்ஸாதி படிஸந்தி⁴வஸேன உபபன்னஸ்ஸ.

43. அத²ஸ்ஸ ப⁴க³வா உச்சே²த³ஸஸ்ஸதம் அனுபக³ம்ம தத்து²பபன்னஸ்ஸ அரியஸாவகஸ்ஸ அனுபாதா³ய பரினிப்³பா³னம் த³ஸ்ஸேந்தோ ‘‘அச்சீ யதா²’’தி கா³த²மாஹ. தத்த² அத்த²ம் பலேதீதி அத்த²ம் க³ச்ச²தி. ந உபேதி ஸங்க²ந்தி ‘‘அஸுகம் நாம தி³ஸம் க³தோ’’தி வோஹாரம் ந க³ச்ச²தி. ஏவம் முனீ நாமகாயா விமுத்தோதி ஏவம் தத்த² உப்பன்னோ ஸேக்க²முனி பகதியா புப்³பே³வ ரூபகாயா விமுத்தோ, தத்த² சதுத்த²மக்³க³ம் நிப்³ப³த்தேத்வா த⁴ம்மகாயஸ்ஸ பரிஞ்ஞாதத்தா புன நாமகாயாபி விமுத்தோ உப⁴தோபா⁴க³விமுத்தோ கீ²ணாஸவோ ஹுத்வா அனுபாதா³னிப்³பா³னஸங்கா²தம் அத்த²ம் பலேதி ந உபேதி ஸங்க²ம் ‘‘க²த்தியோ வா ப்³ராஹ்மணோ வா’’தி ஏவமாதி³கம்.

நித்³தே³ஸே கி²த்தாதி சலிதா. உக்கி²த்தாதி அதிசலிதா. நுன்னாதி பப்போ²டியா. பணுன்னாதி தூ³ரீகதா. க²ம்பி⁴தாதி படிக்கமாபிதா. விக்க²ம்பி⁴தாதி ந ஸந்திகே கதா.

44. இதா³னி ‘‘அத்த²ம் பலேதீ’’தி ஸுத்வா தஸ்ஸ யோனிஸோ அத்த²மஸல்லக்கே²ந்தோ ‘‘அத்த²ங்க³தோ ஸோ’’தி கா³த²மாஹ. தஸ்ஸத்தோ² – ஸோ அத்த²ங்க³தோ உதா³ஹு நத்தி², உதா³ஹு வே ஸஸ்ஸதியா ஸஸ்ஸதபா⁴வேன அரோகோ³ அவிபரிணாமத⁴ம்மோ ஸோதி ஏவம் தம் மே முனீ ஸாது⁴ ப்³யாகரோஹி. கிம்காரணா? ததா² ஹி தே விதி³தோ ஏஸ த⁴ம்மோதி.

நித்³தே³ஸே நிருத்³தோ⁴தி நிரோத⁴ம் பத்தோ. உச்சி²ன்னோதி உச்சி²ன்னஸந்தானோ. வினட்டோ²தி வினாஸம் பத்தோ.

45. அத²ஸ்ஸ ப⁴க³வா ததா² அவத்தப்³ப³தம் த³ஸ்ஸேந்தோ ‘‘அத்த²ங்க³தஸ்ஸா’’தி கா³த²மாஹ. தத்த² அத்த²ங்க³தஸ்ஸாதி அனுபாதா³பரினிப்³பு³தஸ்ஸ. ந பமாணமத்தீ²தி ரூபாதி³பமாணம் நத்தி². யேன நம் வஜ்ஜுந்தி யேன ராகா³தி³னா நம் வதே³ய்யும். ஸப்³பே³ஸு த⁴ம்மேஸூதி ஸப்³பே³ஸு க²ந்தா⁴தி³த⁴ம்மேஸு.

நித்³தே³ஸே அதி⁴வசனானி சாதி ஸிரிவட்³ட⁴கோ த⁴னவட்³ட⁴கோதிஆத³யோ ஹி வசனமத்தம்யேவ அதி⁴காரம் கத்வா பவத்தா அதி⁴வசனா நாம. அதி⁴வசனானம் பதா² அதி⁴வசனபதா² நாம. ‘‘அபி⁴ஸங்க²ரோந்தீதி கோ², பி⁴க்க²வே, தஸ்மா ஸங்கா²ரா’’தி (ஸம். நி. 3.79) ஏவம் நித்³தா⁴ரித்வா ஸஹேதுகம் கத்வா வுச்சமானா அபி⁴லாபா நிருத்தி நாம. நிருத்தீனம் பதா² நிருத்திபதா² நாம. ‘‘தக்கோ விதக்கோ ஸங்கப்போ’’தி (த⁴. ஸ. 7) ஏவம் தேன தேன பகாரேன பஞ்ஞாபனதோ பஞ்ஞத்தி நாம. பஞ்ஞத்தீனம் பதா² பஞ்ஞத்திபதா² (த⁴. ஸ. அட்ட². 101-108) நாம. ஸேஸம் ஸப்³ப³த்த² பாகடமேவ.

ஏவம் ப⁴க³வா இத³ம்பி ஸுத்தம் அரஹத்தனிகூடேனேவ தே³ஸேஸி, தே³ஸனாபரியோஸானே ச வுத்தஸதி³ஸோவ த⁴ம்மாபி⁴ஸமயோ அஹோஸீதி.

ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய

உபஸீவமாணவஸுத்தனித்³தே³ஸவண்ணனா நிட்டி²தா.