13. உத³யமாணவஸுத்தனித்³தே³ஸவண்ணனா

74. தேரஸமே உத³யஸுத்தே – அஞ்ஞாவிமோக்க²ந்தி பஞ்ஞானுபா⁴வனிஜ்ஜா²னம் தம் விமோக்க²ம் புச்ச²தி.

பட²மேனபி ஜா²னேன ஜா²யீதி விதக்கவிசாரபீதிஸுக²சித்தேகக்³க³தாஸம்பயுத்தேன பஞ்சங்கி³கேன பட²மஜ்ஜா²னேன ஜா²யதீதி ஜா²யீ. து³தியேனாதி பீதிஸுக²சித்தேகக்³க³தாஸம்பயுத்தேன. ததியேனாதி ஸுக²சித்தேகக்³க³தாஸம்பயுத்தேன. சதுத்தே²னாதி உபேக்கா²சித்தேகக்³க³தாஸம்பயுத்தேன. ஸவிதக்கஸவிசாரேனபி ஜா²னேன ஜா²யீதி சதுக்கனயபஞ்சகனயேஸு பட²மஜ்ஜா²னேன ஸவிதக்கஸவிசாரேனபி ஜா²னேன ஜா²யதீதி ஜா²யீ. அவிதக்கவிசாரமத்தேனாதி பஞ்சகனயே து³தியேன ஜா²னேன. அவிதக்கஅவிசாரேனாதி து³தியததியாதி³அவஸேஸஜா²னேன. ஸப்பீதிகேனாதி பீதிஸம்பயுத்தேன து³கதிகஜா²னேன. நிப்பீதிகேனாதி பீதிவிரஹிதேன தத³வஸேஸஜா²னேன. ஸாதஸஹக³தேனாதி ஸுக²ஸஹக³தேன திகசதுக்கஜா²னேன. உபேக்கா²ஸஹக³தேனாதி சதுக்கபஞ்சகேன. ஸுஞ்ஞதேனபீதி ஸுஞ்ஞதவிமோக்க²ஸம்பயுத்தேன. அனிமித்தேனபீதி அனிச்சனிமித்தம் து⁴வனிமித்தம் அனிமித்தஞ்ச உக்³கா⁴டேத்வா படிலத்³தே⁴ன அனிமித்தேனபி ஜா²னேன ஜா²யதீதி ஜா²யீ. அப்பணிஹிதேனபீதி மக்³கா³க³மனவஸேன பணிதி⁴ம் ஸோதே⁴த்வா பரியாதி³யித்வா ப²லஸமாபத்திவஸேன அப்பணிஹிதேனபி. லோகியேனபீதி லோகியேன பட²மது³தியததியசதுத்தே²ன.

லோகுத்தரேனபீதி தேனேவ லோகுத்தரஸம்பயுத்தேன. ஜா²னரதோதி ஜா²னேஸு அபி⁴ரதோ. ஏகத்தமனுயுத்தோதி ஏகத்தம் ஏகீபா⁴வம் அனுயுத்தோ பயுத்தோ. ஸத³த்த²க³ருகோதி ஸகத்த²க³ருகோ, க-காரஸ்ஸாயம் த³-காரோ கதோ. ஸத³த்தோ²தி ச அரஹத்தம் வேதி³தப்³ப³ம். தஞ்ஹி அத்தூபனிப³த்³த⁴ட்டே²ன அத்தானம் அவிஜஹனட்டே²ன அத்தனோ பரமத்த²ட்டே²ன ச அத்தனோ அத்த²த்தா ஸகத்தோ²தி வுச்சதி. ப²லஸமாபத்திஸமாபஜ்ஜனவஸேன ஸகத்த²க³ருகோ, ‘‘நிப்³பா³னக³ருகோ’’தி ஏகே. அரஜோதி நிக்கிலேஸோ. விரஜோதி விக³தகிலேஸோ. நிரஜோதி அபனீதகிலேஸோ, ‘‘விதரஜோ’’திபி பாடோ², ஸோயேவத்தோ². ரஜாபக³தோதி கிலேஸேஹி தூ³ரீபூ⁴தோ. ரஜவிப்பஹீனோதி கிலேஸப்பஹீனோ. ரஜவிப்பயுத்தோதி கிலேஸேஹி முத்தோ.

பாஸாணகே சேதியேதி பாஸாணபிட்டே² பாராயனஸுத்தந்ததே³ஸிதட்டா²னே. ஸப்³போ³ஸ்ஸுக்கபடிப்பஸ்ஸத்³த⁴த்தாதி ஸப்³பே³ஸம் கிலேஸஉஸ்ஸுக்கானம் படிப்பஸ்ஸத்³த⁴த்தா, நாஸிதத்தா ஆஸீனோ.

கிச்சாகிச்சந்தி ‘‘இத³ம் கத்தப்³ப³ம், இத³ம் ந கத்தப்³ப³’’ந்தி ஏவம் மனஸா சிந்தேதப்³ப³ம். கரணீயாகரணீயந்தி காயத்³வாரேன அவஸ்ஸம் இத³ம் கரணீயம், இத³ம் ந கரணீயந்தி ஏவம் கரணீயாகரணீயம். பஹீனந்தி விஸ்ஸட்ட²ம். வஸிப்பத்தோதி பகு³ணபா⁴வப்பத்தோ.

75. அத² ப⁴க³வா யஸ்மா உத³யோ சதுத்த²ஜ்ஜா²னலாபீ⁴, தஸ்மாஸ்ஸ படிலத்³த⁴ஜா²னவஸேன நானப்பகாரதோ அஞ்ஞாவிமோக்க²ம் த³ஸ்ஸேந்தோ உபரூபரிகா³த²மாஹ. தத்த² பஹானம் காமச்ச²ந்தா³னந்தி யதி³த³ம் பட²மம் ஜா²னம் நிப்³ப³த்தேந்தஸ்ஸ காமச்ச²ந்த³பஹானம், தம்பி அஞ்ஞாவிமோக்க²ந்தி பப்³ரூமி. ஏவம் ஸப்³ப³பதா³னி யோஜேதப்³பா³னி.

யா சித்தஸ்ஸ அகல்யதாதி சித்தஸ்ஸ கி³லானபா⁴வோ. கி³லானோ ஹி அகல்லகோதி வுச்சதி. வினயேபி வுத்தம் – ‘‘நாஹம், ப⁴ந்தே, அகல்லகோ’’தி (பாரா. 151). அகம்மஞ்ஞதாதி சித்தகே³லஞ்ஞஸங்கா²தோவ அகம்மஞ்ஞதாகாரோ. ஓலீயனாதி ஓலீயனாகாரோ. இரியாபதி²கசித்தஞ்ஹி இரியாபத²ம் ஸந்தா⁴ரேதும் அஸக்கோந்தம் ருக்கே² வக்³கு³லி விய கீ²லே லக்³கி³தபா²ணிதவாரகோ விய ச ஓலீயதி, தஸ்ஸ தம் ஆகாரம் ஸந்தா⁴ய ‘‘ஓலீயனா’’தி வுத்தம். து³தியபத³ம் உபஸக்³க³வஸேன வட்³டி⁴தம். லீனாதி அவிப்பா²ரிகதாய படிகுடிதம். இதரே த்³வே ஆகாரபா⁴வனித்³தே³ஸா. தி²னந்தி ஸப்பிபிண்டோ³ விய அவிப்பா²ரிகதாய க⁴னபா⁴வேன டி²தம். தி²யனாதி ஆகாரனித்³தே³ஸோ. தி²யிதபா⁴வோ தி²யிதத்தம், அவிப்பா²ரவஸேனேவ த²த்³த⁴தாதி அத்தோ² (த⁴. ஸ. அட்ட². 1162).

76. உபேக்கா²ஸதிஸம்ஸுத்³த⁴ந்தி சதுத்த²ஜ்ஜா²னஉபேக்கா²ஸதீஹி ஸம்ஸுத்³த⁴ம். த⁴ம்மதக்கபுரேஜவந்தி இமினா தஸ்மிம் சதுத்த²ஜ்ஜா²னவிமோக்கே² ட²த்வா ஜா²னங்கா³னி விபஸ்ஸித்வா அதி⁴க³தம் அரஹத்தவிமோக்க²ம் வத³தி. அரஹத்தவிமோக்க²ஸ்ஸ ஹி மக்³க³ஸம்பயுத்தஸம்மாஸங்கப்பாதி³பே⁴தோ³ த⁴ம்மதக்கோ புரேஜவோ ஹோதி. தேனாஹ ‘‘த⁴ம்மதக்கபுரேஜவ’’ந்தி. அவிஜ்ஜாய பபே⁴த³னந்தி ஏதமேவ ச அஞ்ஞாவிமோக்க²ம் அவிஜ்ஜாபபே⁴த³னஸங்கா²தம் நிப்³பா³னம் நிஸ்ஸாய ஜாதத்தா காரணோபசாரேன ‘‘அவிஜ்ஜாய பபே⁴த³ன’’ந்தி ப்³ரூமீதி.

யா சதுத்தே² ஜா²னே உபேக்கா²தி ஏத்த² உபபத்திதோ இக்க²தீதி உபேக்கா², ஸமம் பஸ்ஸதி அபக்க²பதிதா ஹுத்வா பஸ்ஸதீதி அத்தோ². உபேக்க²னாதி ஆகாரனித்³தே³ஸோ. அஜ்ஜு²பேக்க²னாதி உபஸக்³க³வஸேன பத³ம் வட்³டி⁴தம். சித்தஸமதாதி சித்தஸ்ஸேகக்³க³பா⁴வோ. சித்தப்பஸ்ஸத்³த⁴தாதி சித்தஸ்ஸ ஊனாதிரித்தவஜ்ஜிதபா⁴வோ. மஜ்ஜ²த்ததாதி சித்தஸ்ஸ மஜ்ஜே² டி²தபா⁴வோ.

77. ஏவம் அவிஜ்ஜாபபே⁴த³வசனேன வுத்தம் நிப்³பா³னம் ஸுத்வா ‘‘தம் கிஸ்ஸ விப்பஹானேன வுச்சதீ’’தி புச்ச²ந்தோ ‘‘கிம்ஸு ஸம்யோஜனோ’’தி கா³த²மாஹ. தத்த² கிம்ஸு ஸம்யோஜனோதி கிம்ஸம்யோஜனோ. விசாரணந்தி விசாரணகாரணம். கிஸ்ஸஸ்ஸ விப்பஹானேனாதி கிம்னாமகஸ்ஸ அஸ்ஸ த⁴ம்மஸ்ஸ விப்பஹானேன.

78. அத²ஸ்ஸ ப⁴க³வா தமத்த²ம் ப்³யாகரோந்தோ ‘‘நந்தி³ஸம்யோஜனோ’’தி கா³த²மாஹ. தத்த² விதக்கஸ்ஸாதி காமவிதக்காதி³கோ விதக்கோ அஸ்ஸ.

79. இதா³னி தஸ்ஸ நிப்³பா³னஸ்ஸ மக்³க³ம் புச்ச²ந்தோ ‘‘கத²ம் ஸதஸ்ஸா’’தி கா³த²மாஹ. தத்த² விஞ்ஞாணந்தி அபி⁴ஸங்கா²ரவிஞ்ஞாணம்.

80. அத²ஸ்ஸ மக்³க³ம் கதே²ந்தோ ப⁴க³வா ‘‘அஜ்ஜ²த்தஞ்சா’’தி கா³த²மாஹ. தத்த² ஏவம் ஸதஸ்ஸாதி ஏவம் ஸதஸ்ஸ ஸம்பஜானஸ்ஸ. ஸேஸம் ஸப்³ப³த்த² பாகடமேவ.

ஏவம் ப⁴க³வா இத³ம்பி ஸுத்தம் அரஹத்தனிகூடேனேவ தே³ஸேஸி, தே³ஸனாபரியோஸானே ச புப்³ப³ஸதி³ஸோவ த⁴ம்மாபி⁴ஸமயோ அஹோஸீதி.

ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய

உத³யமாணவஸுத்தனித்³தே³ஸவண்ணனா நிட்டி²தா.