9. மேத்தஸுத்தவண்ணனா

நிக்கே²பப்பயோஜனம்

இதா³னி நிதி⁴கண்டா³னந்தரம் நிக்கி²த்தஸ்ஸ மேத்தஸுத்தஸ்ஸ வண்ணனாக்கமோ அனுப்பத்தோ. தஸ்ஸ இத⁴ நிக்கே²பப்பயோஜனம் வத்வா ததோ பரம் –

‘‘யேன வுத்தம் யதா³ யத்த², யஸ்மா சேதேஸ தீ³பனா;

நிதா³னம் ஸோத⁴யித்வாஸ்ஸ, கரிஸ்ஸாமத்த²வண்ணனம்’’.

தத்த² யஸ்மா நிதி⁴கண்டே³ன தா³னஸீலாதி³புஞ்ஞஸம்பதா³ வுத்தா, ஸா ச ஸத்தேஸு மேத்தாய கதாய மஹப்ப²லா ஹோதி யாவ பு³த்³த⁴பூ⁴மிம் பாபேதும் ஸமத்தா², தஸ்மா தஸ்ஸா புஞ்ஞஸம்பதா³ய உபகாரத³ஸ்ஸனத்த²ம், யஸ்மா வா ஸரணேஹி ஸாஸனே ஓதரித்வா ஸிக்கா²பதே³ஹி ஸீலே பதிட்டி²தானம் த்³வத்திம்ஸாகாரேன ராக³ப்பஹானஸமத்த²ம், குமாரபஞ்ஹேன மோஹப்பஹானஸமத்த²ஞ்ச கம்மட்டா²னம் த³ஸ்ஸேத்வா, மங்க³லஸுத்தேன தஸ்ஸ பவத்தியா மங்க³லபா⁴வோ அத்தரக்கா² ச, ரதனஸுத்தேன தஸ்ஸானுரூபா பரரக்கா², திரோகுட்டேன ரத்தனஸுத்தே வுத்தபூ⁴தேஸு ஏகச்சபூ⁴தத³ஸ்ஸனம் வுத்தப்பகாராய புஞ்ஞஸம்பத்தியா பமஜ்ஜந்தானம் விபத்தி ச, நிதி⁴கண்டே³ன திரோகுட்டே வுத்தவிபத்திபடிபக்க²பூ⁴தா ஸம்பத்தி ச த³ஸ்ஸிதா, தோ³ஸப்பஹானஸமத்த²ம் பன கம்மட்டா²னம் அத³ஸ்ஸிதமேவ, தஸ்மா தம் தோ³ஸப்பஹானஸமத்த²ம் கம்மட்டா²னம் த³ஸ்ஸேதும் இத³ம் மேத்தஸுத்தம் இத⁴ நிக்கி²த்தம். ஏவஞ்ஹி ஸுபரிபூரோ ஹோதி கு²த்³த³கபாடோ²தி இத³மஸ்ஸ இத⁴ நிக்கே²பப்பயோஜனம்.

நிதா³னஸோத⁴னம்

இதா³னி யாயம் –

‘‘யேன வுத்தம் யதா³ யத்த², யஸ்மா சேதேஸ தீ³பனா;

நிதா³னம் ஸோத⁴யித்வாஸ்ஸ, கரிஸ்ஸாமத்த²வண்ணன’’ந்தி. –

மாதிகா நிக்கி²த்தா, தத்த² இத³ம் மேத்தஸுத்தம் ப⁴க³வதாவ வுத்தம், ந ஸாவகாதீ³ஹி, தஞ்ச பன யதா³ ஹிமவந்தபஸ்ஸதோ தே³வதாஹி உப்³பா³ள்ஹா பி⁴க்கூ² ப⁴க³வதோ ஸந்திகம் ஆக³தா, ததா³ ஸாவத்தி²யம் தேஸம் பி⁴க்கூ²னம் பரித்தத்தா²ய கம்மட்டா²னத்தா²ய ச வுத்தந்தி ஏவம் தாவ ஸங்கே²பதோ ஏதேஸம் பதா³னம் தீ³பனா நிதா³னஸோத⁴னா வேதி³தப்³பா³.

வித்தா²ரதோ பன ஏவம் வேதி³தப்³பா³ – ஏகம் ஸமயம் ப⁴க³வா ஸாவத்தி²யம் விஹரதி உபகட்டா²ய வஸ்ஸூபனாயிகாய, தேன கோ² பன ஸமயேன ஸம்ப³ஹுலா நானாவேரஜ்ஜகா பி⁴க்கூ² ப⁴க³வதோ ஸந்திகே கம்மட்டா²னம் க³ஹேத்வா தத்த² தத்த² வஸ்ஸம் உபக³ந்துகாமா ப⁴க³வந்தம் உபஸங்கமந்தி. தத்ர ஸுத³ம் ப⁴க³வா ராக³சரிதானம் ஸவிஞ்ஞாணகஅவிஞ்ஞாணகவஸேன ஏகாத³ஸவித⁴ம் அஸுப⁴கம்மட்டா²னம், தோ³ஸசரிதானம் சதுப்³பி³த⁴ம் மேத்தாதி³கம்மட்டா²னம், மோஹசரிதானம் மரணஸ்ஸதிகம்மட்டா²னாதீ³னி, விதக்கசரிதானம் ஆனாபானஸ்ஸதிபத²வீகஸிணாதீ³னி, ஸத்³தா⁴சரிதானம் பு³த்³தா⁴னுஸ்ஸதிகம்மட்டா²னாதீ³னி, பு³த்³தி⁴சரிதானம் சதுதா⁴துவவத்தா²னாதீ³னீதி இமினா நயேன சதுராஸீதிஸஹஸ்ஸப்பபே⁴த³சரிதானுகூலானி கம்மட்டா²னானி கதே²தி.

அத² கோ² பஞ்சமத்தானி பி⁴க்கு²ஸதானி ப⁴க³வதோ ஸந்திகே கம்மட்டா²னம் உக்³க³ஹேத்வா ஸப்பாயஸேனாஸனஞ்ச கோ³சரகா³மஞ்ச பரியேஸமானானி அனுபுப்³பே³ன க³ந்த்வா பச்சந்தே ஹிமவந்தேன ஸத்³தி⁴ம் ஏகாப³த்³த⁴ம் நீலகாசமணிஸன்னிப⁴ஸிலாதலம் ஸீதலக⁴னச்சா²யனீலவனஸண்ட³மண்டி³தம் முத்தாஜாலரஜதபட்டஸதி³ஸவாலுகாகிண்ணபூ⁴மிபா⁴க³ம் ஸுசிஸாதஸீதலஜலாஸயபரிவாரிதம் பப்³ப³தமத்³த³ஸம்ஸு. அத² தே பி⁴க்கூ² தத்தே²கரத்திம் வஸித்வா பபா⁴தாய ரத்தியா ஸரீரபரிகம்மம் கத்வா தஸ்ஸ அவிதூ³ரே அஞ்ஞதரம் கா³மம் பிண்டா³ய பவிஸிம்ஸு. கா³மோ க⁴னனிவேஸனஸன்னிவிட்ட²குலஸஹஸ்ஸயுத்தோ, மனுஸ்ஸா சேத்த² ஸத்³தா⁴ பஸன்னா தே பச்சந்தே பப்³ப³ஜிதத³ஸ்ஸனஸ்ஸ து³ல்லப⁴தாய பி⁴க்கூ² தி³ஸ்வா ஏவ பீதிஸோமனஸ்ஸஜாதா ஹுத்வா தே பி⁴க்கூ² போ⁴ஜேத்வா ‘‘இதே⁴வ, ப⁴ந்தே, தேமாஸம் வஸதா²’’தி யாசித்வா பஞ்ச பதா⁴னகுடிஸதானி காரேத்வா தத்த² மஞ்சபீட²பானீயபரிபோ⁴ஜனீயக⁴டாதீ³னி ஸப்³பூ³பகரணானி படியாதே³ஸும்.

பி⁴க்கூ² து³தியதி³வஸே அஞ்ஞம் கா³மம் பிண்டா³ய பவிஸிம்ஸு. தத்த²பி மனுஸ்ஸா ததே²வ உபட்ட²ஹித்வா வஸ்ஸாவாஸம் யாசிம்ஸு. பி⁴க்கூ² ‘‘அஸதி அந்தராயே’’தி அதி⁴வாஸேத்வா தம் வனஸண்ட³ம் பவிஸித்வா ஸப்³ப³ரத்திந்தி³வம் ஆரத்³த⁴வீரியா யாமக⁴ண்டி³கம் கோட்டேத்வா யோனிஸோமனஸிகாரப³ஹுலா விஹரந்தா ருக்க²மூலானி உபக³ந்த்வா நிஸீதி³ம்ஸு. ஸீலவந்தானம் பி⁴க்கூ²னம் தேஜேன விஹததேஜா ருக்க²தே³வதா அத்தனோ அத்தனோ விமானா ஓருய்ஹ தா³ரகே க³ஹேத்வா இதோ சிதோ விசரந்தி. ஸேய்யதா²பி நாம ராஜூஹி வா ராஜமஹாமத்தேஹி வா கா³மகாவாஸம் க³தேஹி கா³மவாஸீனம் க⁴ரேஸு ஓகாஸே க³ஹிதே க⁴ரமனுஸ்ஸகா க⁴ரா நிக்க²மித்வா அஞ்ஞத்ர வஸந்தா ‘‘கதா³ நு க³மிஸ்ஸந்தீ’’தி தூ³ரதோவ ஓலோகேந்தி, ஏவமேவ தே³வதா அத்தனோ அத்தனோ விமானானி ச²ட்³டே³த்வா இதோ சிதோ ச விசரந்தியோ தூ³ரதோவ ஓலோகேந்தி ‘‘கதா³ நு ப⁴த³ந்தா க³மிஸ்ஸந்தீ’’தி. ததோ ஏவம் ஸமசிந்தேஸும் ‘‘பட²மவஸ்ஸூபக³தா பி⁴க்கூ² அவஸ்ஸம் தேமாஸம் வஸிஸ்ஸந்தி, மயம் பன தாவ சிரம் தா³ரகே க³ஹேத்வா ஓக்கம்ம வஸிதும் ந ஸக்கோம, ஹந்த³ மயம் பி⁴க்கூ²னம் ப⁴யானகம் ஆரம்மணம் த³ஸ்ஸேமா’’தி. தா ரத்திம் பி⁴க்கூ²னம் ஸமணத⁴ம்மகரணவேலாய பி⁴ம்ஸனகானி யக்க²ரூபானி நிம்மினித்வா புரதோ புரதோ திட்ட²ந்தி, பே⁴ரவஸத்³த³ஞ்ச கரோந்தி. பி⁴க்கூ²னம் தானி ரூபானி தி³ஸ்வா தஞ்ச ஸத்³த³ம் ஸுத்வா ஹத³யம் ப²ந்தி³, து³ப்³ப³ண்ணா ச அஹேஸும் உப்பண்டு³ப்பண்டு³கஜாதா. தேன தே பி⁴க்கூ² சித்தம் ஏகக்³க³ம் காதும் நாஸக்கி²ம்ஸு, தேஸம் அனேகக்³க³சித்தானம் ப⁴யேன ச புனப்புனம் ஸம்விக்³கா³னம் ஸதி ஸம்முஸ்ஸி, ததோ தேஸம் முட்ட²ஸதீனம் து³க்³க³ந்தா⁴னி ஆரம்மணானி பயோஜேஸும், தேஸம் தேன து³க்³க³ந்தே⁴ன நிம்மதி²யமானமிவ மத்த²லுங்க³ம் அஹோஸி, கா³ள்ஹா ஸீஸவேத³னா உப்பஜ்ஜிம்ஸு, ந ச தம் பவத்திம் அஞ்ஞமஞ்ஞஸ்ஸ ஆரோசேஸும்.

அதே²கதி³வஸம் ஸங்க⁴த்தே²ரஸ்ஸ உபட்டா²னகாலே ஸப்³பே³ஸு ஸன்னிபதிதேஸு ஸங்க⁴த்தே²ரோ புச்சி² ‘‘தும்ஹாகம், ஆவுஸோ, இமம் வனஸண்ட³ம் பவிட்டா²னம் கதிபாஹம் அதிவிய பரிஸுத்³தோ⁴ ச²விவண்ணோ அஹோஸி பரியோதா³தோ, விப்பஸன்னானி ச இந்த்³ரியானி, ஏதரஹி பனத்த² கிஸா து³ப்³ப³ண்ணா உப்பண்டு³ப்பண்டு³கஜாதா, கிம் வோ இத⁴ அஸப்பாய’’ந்தி. ததோ ஏகோ பி⁴க்கு² ஆஹ – ‘‘அஹம், ப⁴ந்தே, ரத்திம் ஈதி³ஸஞ்ச ஈதி³ஸஞ்ச பே⁴ரவாரம்மணம் பஸ்ஸாமி ச ஸுணாமி ச, ஈதி³ஸஞ்ச க³ந்த⁴ம் கா⁴யாமி, தேன மே சித்தம் ந ஸமாதி⁴யதீ’’தி, ஏதேனேவ உபாயேன ஸப்³பே³வ தே தம் பவத்திம் ஆரோசேஸும். ஸங்க⁴த்தே²ரோ ஆஹ – ‘‘ப⁴க³வதா, ஆவுஸோ, த்³வே வஸ்ஸூபனாயிகா பஞ்ஞத்தா, அம்ஹாகஞ்ச இத³ம் ஸேனாஸனம் அஸப்பாயம், ஆயாமாவுஸோ, ப⁴க³வதோ ஸந்திகம் க³ந்த்வா அஞ்ஞம் ஸப்பாயஸேனாஸனம் புச்சா²மா’’தி. ‘‘ஸாது⁴, ப⁴ந்தே’’தி தே பி⁴க்கூ² தே²ரஸ்ஸ படிஸ்ஸுணித்வா ஸப்³பே³வ ஸேனாஸனம் ஸம்ஸாமேத்வா பத்தசீவரமாதா³ய அனுபலித்தத்தா குலேஸு கஞ்சி அனாமந்தேத்வா ஏவ யேன ஸாவத்தி² தேன சாரிகம் பக்கமிம்ஸு. அனுபுப்³பே³ன ஸாவத்தி²ம் க³ந்த்வா ப⁴க³வதோ ஸந்திகம் ஆக³மிம்ஸு.

ப⁴க³வா தே பி⁴க்கூ² தி³ஸ்வா ஏதத³வோச – ‘‘ந, பி⁴க்க²வே, அந்தோவஸ்ஸம் சாரிகா சரிதப்³பா³தி மயா ஸிக்கா²பத³ம் பஞ்ஞத்தம், கிஸ்ஸ தும்ஹே சாரிகம் சரதா²’’தி. தே ப⁴க³வதோ ஸப்³ப³மாரோசேஸும். ப⁴க³வா ஆவஜ்ஜேந்தோ ஸகலஜம்பு³தீ³பே அந்தமஸோ சதுபாத³பீட²கட்டா²னமத்தம்பி தேஸம் ஸப்பாயஸேனாஸனம் நாத்³த³ஸ. அத² தே பி⁴க்கூ² ஆஹ – ‘‘ந, பி⁴க்க²வே, தும்ஹாகம் அஞ்ஞம் ஸப்பாயஸேனாஸனம் அத்தி², தத்தே²வ தும்ஹே விஹரந்தா ஆஸவக்க²யம் பாபுணிஸ்ஸத², க³ச்ச²த², பி⁴க்க²வே, தமேவ ஸேனாஸனம் உபனிஸ்ஸாய விஹரத², ஸசே பன தே³வதாஹி அப⁴யம் இச்ச²த², இமம் பரித்தம் உக்³க³ண்ஹத². ஏதஞ்ஹி வோ பரித்தஞ்ச கம்மட்டா²னஞ்ச ப⁴விஸ்ஸதீ’’தி இத³ம் ஸுத்தமபா⁴ஸி.

அபரே பனாஹு – ‘‘க³ச்ச²த², பி⁴க்க²வே, தமேவ ஸேனாஸனம் உபனிஸ்ஸாய விஹரதா²’’தி இத³ஞ்ச வத்வா ப⁴க³வா ஆஹ – ‘‘அபிச கோ² ஆரஞ்ஞகேன பரிஹரணம் ஞாதப்³ப³ம். ஸேய்யதி²த³ம் – ஸாயம் பாதம் கரணவஸேன த்³வே மேத்தா த்³வே பரித்தா த்³வே அஸுபா⁴ த்³வே மரணஸ்ஸதீ அட்ட²மஹாஸம்வேக³வத்து²ஸமாவஜ்ஜனஞ்ச, அட்ட² மஹாஸம்வேக³வத்தூ²னி நாம ஜாதிஜராப்³யாதி⁴மரணம் சத்தாரி அபாயது³க்கா²னீதி, அத² வா ஜாதிஜராப்³யாதி⁴மரணானி சத்தாரி, அபாயது³க்க²ம் பஞ்சமம், அதீதே வட்டமூலகம் து³க்க²ம், அனாக³தே வட்டமூலகம் து³க்க²ம், பச்சுப்பன்னே ஆஹாரபரியேட்டி²மூலகம் து³க்க²’’ந்தி. ஏவம் ப⁴க³வா பரிஹரணம் ஆசிக்கி²த்வா தேஸம் பி⁴க்கூ²னம் மேத்தத்த²ஞ்ச பரித்தத்த²ஞ்ச விபஸ்ஸனாபாத³கஜ்ஜா²னத்த²ஞ்ச இத³ம் ஸுத்தமபா⁴ஸீதி. ஏவம் வித்தா²ரதோபி ‘‘யேன வுத்தம் யதா³ யத்த², யஸ்மா சே’’தி ஏதேஸம் பதா³னம் தீ³பனா நிதா³னஸோத⁴னா வேதி³தப்³பா³.

ஏத்தாவதா ச யா ஸா ‘‘யேன வுத்தம் யதா³ யத்த², யஸ்மா சேதேஸ தீ³பனா. நிதா³னம் ஸோத⁴யித்வா’’தி மாதிகா ட²பிதா, ஸா ஸப்³பா³காரேன வித்தா²ரிதா ஹோதி.

பட²மகா³தா²வண்ணனா

1. இதா³னி ‘‘அஸ்ஸ கரிஸ்ஸாமத்த²வண்ணன’’ந்தி வுத்தத்தா ஏவம் கதனிதா³னஸோத⁴னஸ்ஸ அஸ்ஸ ஸுத்தஸ்ஸ அத்த²வண்ணனா ஆரப்³ப⁴தே. தத்த² கரணீயமத்த²குஸலேனாதி இமிஸ்ஸா பட²மகா³தா²ய தாவ அயம் பத³வண்ணனா – கரணீயந்தி காதப்³ப³ம், கரணாரஹந்தி அத்தோ². அத்தோ²தி படிபதா³, யம் வா கிஞ்சி அத்தனோ ஹிதம், தம் ஸப்³ப³ம் அரணீயதோ அத்தோ²தி வுச்சதி, அரணீயதோ நாம உபக³ந்தப்³ப³தோ. அத்தே² குஸலேன அத்த²குஸலேன அத்த²சே²கேனாதி வுத்தம் ஹோதி. யந்தி அனியமிதபச்சத்தம். ந்தி நியமிதஉபயோக³ம், உப⁴யம்பி வா யம் தந்தி பச்சத்தவசனம். ஸந்தம் பத³ந்தி உபயோக³வசனம், தத்த² லக்க²ணதோ ஸந்தம், பத்தப்³ப³தோ பத³ம், நிப்³பா³னஸ்ஸேதம் அதி⁴வசனம். அபி⁴ஸமேச்சாதி அபி⁴ஸமாக³ந்த்வா. ஸக்கோதீதி ஸக்கோ, ஸமத்தோ² படிப³லோதி வுத்தம் ஹோதி. உஜூதி அஜ்ஜவயுத்தோ. ஸுட்டு² உஜூதி ஸுஹுஜு. ஸுக²ம் வசோ தஸ்மிந்தி ஸுவசோ. அஸ்ஸாதி ப⁴வேய்ய. முதூ³தி மத்³த³வயுத்தோ. ந அதிமானீதி அனதிமானி.

அயம் பனேத்த² அத்த²வண்ணனா – கரணீயமத்த²குஸலேன, யந்தம் ஸந்தம் பத³ம் அபி⁴ஸமேச்சாதி ஏத்த² தாவ அத்தி² கரணீயம், அத்தி² அகரணீயம். தத்த² ஸங்கே²பதோ ஸிக்க²த்தயம் கரணீயம். ஸீலவிபத்தி, தி³ட்டி²விபத்தி, ஆசாரவிபத்தி, ஆஜீவவிபத்தீதி ஏவமாதி³ அகரணீயம். ததா² அத்தி² அத்த²குஸலோ, அத்தி² அனத்த²குஸலோ. தத்த² யோ இமஸ்மிம் ஸாஸனே பப்³ப³ஜித்வா ந அத்தானம் ஸம்மா பயோஜேதி, க²ண்ட³ஸீலோ ஹோதி, ஏகவீஸதிவித⁴ம் அனேஸனம் நிஸ்ஸாய ஜீவிகம் கப்பேதி. ஸேய்யதி²த³ம் – வேளுதா³னம் பத்ததா³னம் புப்ப²தா³னம் ப²லதா³னம் த³ந்தகட்ட²தா³னம் முகோ²த³கதா³னம் ஸினானதா³னம் சுண்ணதா³னம் மத்திகாதா³னம் சாடுகம்யதம் முக்³க³ஸூப்யதம் பாரிப⁴டயதம் ஜங்க⁴பேஸனிகம் வேஜ்ஜகம்மம் தூ³தகம்மம் பஹிணக³மனம் பிண்ட³படிபிண்ட³ம் தா³னானுப்பதா³னம் வத்து²விஜ்ஜம் நக்க²த்தவிஜ்ஜம் அங்க³விஜ்ஜந்தி. ச²ப்³பி³தே⁴ ச அகோ³சரே சரதி. ஸேய்யதி²த³ம் – வேஸியாகோ³சரே வித⁴வது²ல்லகுமாரிகபண்ட³கபி⁴க்கு²னீபானாகா³ரகோ³சரேதி. ஸம்ஸட்டோ² ச விஹரதி ராஜூஹி ராஜமஹாமத்தேஹி தித்தி²யேஹி தித்தி²யஸாவகேஹி அனனுலோமிகேன கி³ஹிஸம்ஸக்³கே³ன, யானி வா பன தானி குலானி அஸ்ஸத்³தா⁴னி அப்பஸன்னானி அனோபானபூ⁴தானி அக்கோஸகபரிபா⁴ஸகானி அனத்த²காமானி அஹிதஅபா²ஸுகயோக³க்கே²மகாமானி பி⁴க்கூ²னம்…பே… உபாஸிகானம், ததா²ரூபானி குலானி ஸேவதி ப⁴ஜதி பயிருபாஸதி. அயம் அனத்த²குஸலோ.

யோ பன இமஸ்மிம் ஸாஸனே பப்³ப³ஜித்வா அத்தானம் ஸம்மா பயோஜேதி, அனேஸனம் பஹாய சதுபாரிஸுத்³தி⁴ஸீலே பதிட்டா²துகாமோ ஸத்³தா⁴ஸீஸேன பாதிமோக்க²ஸம்வரம் ஸதிஸீஸேன இந்த்³ரியஸம்வரம் வீரியஸீஸேன ஆஜீவபாரிஸுத்³தி⁴ம், பஞ்ஞாஸீஸேன பச்சயபடிஸேவனம் பூரேதி. அயம் அத்த²குஸலோ.

யோ வா ஸத்தாபத்திக்க²ந்த⁴ஸோத⁴னவஸேன பாதிமோக்க²ஸம்வரம், ச²த்³வாரே க⁴ட்டிதாரம்மணேஸு அபி⁴ஜ்ஜா²தீ³னம் அனுப்பத்திவஸேன இந்த்³ரிஸம்வரம், அனேஸனபரிவஜ்ஜனவஸேன விஞ்ஞுப்பஸத்த²பு³த்³த⁴பு³த்³த⁴ஸாவகவண்ணிதபச்சயபடிஸேவனேன ச ஆஜீவபாரிஸுத்³தி⁴ம், யதா²வுத்தபச்சவேக்க²ணவஸேன பச்சயபடிஸேவனம், சதுஇரியாபத²பரிவத்தனே ஸாத்த²கதாதி³பச்சவேக்க²ணவஸேன ஸம்பஜஞ்ஞஞ்ச ஸோதே⁴தி. அயம்பி அத்த²குஸலோ.

யோ வா யதா² ஊஸோத³கம் படிச்ச ஸம்கிலிட்ட²ம் வத்த²ம் பரியோதா³பயதி, சா²ரிகம் படிச்ச ஆதா³ஸோ, உக்காமுக²ம் படிச்ச ஜாதரூபம், ததா² ஞாணம் படிச்ச ஸீலம் வோதா³யதீதி ஞத்வா ஞாணோத³கேன தோ⁴வந்தோ ஸீலம் பரியோதா³பேதி. யதா² ச கிகீ ஸகுணிகா அண்ட³ம், சமரீ மிகோ³ வாலதி⁴ம், ஏகபுத்திகா நாரீ பியம் ஏகபுத்தகம், ஏகனயனோ புரிஸோ தம் ஏகனயனஞ்ச ரக்க²தி, ததா² அதிவிய அப்பமத்தோ அத்தனோ ஸீலக்க²ந்த⁴ம் ரக்க²தி, ஸாயம் பாதம் பச்சவேக்க²மானோ அணுமத்தம்பி வஜ்ஜம் ந பஸ்ஸதி. அயம்பி அத்த²குஸலோ.

யோ வா பன அவிப்படிஸாரகரே ஸீலே பதிட்டா²ய கிலேஸவிக்க²ம்ப⁴னபடிபத³ம் பக்³க³ண்ஹாதி, தம் பக்³க³ண்ஹித்வா கஸிணபரிகம்மம் கரோதி, கஸிணபரிகம்மம் கத்வா ஸமாபத்தியோ நிப்³ப³த்தேதி. அயம்பி அத்த²குஸலோ.

யோ வா பன ஸமாபத்திதோ வுட்டா²ய ஸங்கா²ரே ஸம்மஸித்வா அரஹத்தம் பாபுணாதி, அயம் அத்த²குஸலானம் அக்³கோ³. தத்த² யே இமே யாவ அவிப்படிஸாரகரே ஸீலே பதிட்டா²னேன யாவ வா கிலேஸவிக்க²ம்ப⁴னபடிபதா³யபக்³க³ஹணேன வண்ணிதா அத்த²குஸலா, தே இமஸ்மிம் அத்தே² அத்த²குஸலாதி அதி⁴ப்பேதா. ததா² விதா⁴ ச தே பி⁴க்கூ². தேன ப⁴க³வா தே பி⁴க்கூ² ஸந்தா⁴ய ஏகபுக்³க³லாதி⁴ட்டா²னாய தே³ஸனாய ‘‘கரணீயமத்த²குஸலேனா’’தி ஆஹ.

ததோ ‘‘கிம் கரணீய’’ந்தி தேஸம் ஸஞ்ஜாதகங்கா²னம் ஆஹ ‘‘யந்தம் ஸந்தம் பத³ம் அபி⁴ஸமேச்சா’’தி. அயமேத்த² அதி⁴ப்பாயோ – தம் பு³த்³தா⁴னுபு³த்³தே⁴ஹி வண்ணிதம் ஸந்தம் நிப்³பா³னபத³ம் படிவேத⁴வஸேன அபி⁴ஸமேச்ச விஹரிதுகாமேன யம் கரணீயந்தி. ஏத்த² ச யந்தி இமஸ்ஸ கா³தா²பத³ஸ்ஸ ஆதி³தோ வுத்தமேவ கரணீயந்தி அதி⁴காரதோ அனுவத்ததி, தம் ஸந்தம் பத³ம் அபி⁴ஸமேச்சாதி. அயம் பன யஸ்மா ஸாவஸேஸபாடோ² அத்தோ², தஸ்மா விஹரிதுகாமேனாதி வுத்தந்தி வேதி³தப்³ப³ம்.

அத² வா ஸந்தம் பத³ம் அபி⁴ஸமேச்சாதி அனுஸ்ஸவாதி³வஸேன லோகியபஞ்ஞாய நிப்³பா³னபத³ம் ‘‘ஸந்த’’ந்தி ஞத்வா தம் அதி⁴க³ந்துகாமேன யந்தம் கரணீயந்தி அதி⁴காரதோ அனுவத்ததி, தம் கரணீயமத்த²குஸலேனாதி ஏவம்பேத்த² அதி⁴ப்பாயோ வேதி³தப்³போ³. அத² வா ‘‘கரணீயமத்த²குஸலேனா’’தி வுத்தே ‘‘கி’’ந்தி சிந்தேந்தானம் ஆஹ ‘‘யந்தம் ஸந்தம் பத³ம் அபி⁴ஸமேச்சா’’தி. தஸ்ஸேவம் அதி⁴ப்பாயோ வேதி³தப்³போ³ – லோகியபஞ்ஞாய ஸந்தம் பத³ம் அபி⁴ஸமேச்ச யம் கரணீயம் காதப்³ப³ம், தம் கரணீயம், கரணாரஹமேவ தந்தி வுத்தம் ஹோதி.

கிம் பன தந்தி? கிமஞ்ஞம் ஸியா அஞ்ஞத்ர தத³தி⁴க³முபாயதோ, காமஞ்சேதம் கரணாரஹட்டே²ன ஸிக்க²த்தயதீ³பகேன ஆதி³பதே³னேவ வுத்தம். ததா² ஹி தஸ்ஸ அத்த²வண்ணனாயம் அவோசும்ஹா ‘‘அத்தி² கரணீயம், அத்தி² அகரணீயம். தத்த² ஸங்கே²பதோ ஸிக்க²த்தயம் கரணீய’’ந்தி. அதிஸங்கே²பேன தே³ஸிதத்தா பன தேஸம் பி⁴க்கூ²னம் கேஹிசி விஞ்ஞாதம், கேஹிசி ந விஞ்ஞாதம். ததோ யேஹி ந விஞ்ஞாதம், தேஸம் விஞ்ஞாபனத்த²ம் யம் விஸேஸதோ ஆரஞ்ஞகேன பி⁴க்கு²னா காதப்³ப³ம், தம் வித்தா²ரேந்தோ ‘‘ஸக்கோ உஜூ ச ஸுஹுஜூ ச, ஸுவசோ சஸ்ஸ முது³ அனதிமானீ’’தி இமம் தாவ உபட்³ட⁴கா³த²மாஹ.

கிம் வுத்தம் ஹோதி? ஸந்தம் பத³ம் அபி⁴ஸமேச்ச விஹரிதுகாமோ, லோகியபஞ்ஞாய வா தம் அபி⁴ஸமேச்ச தத³தி⁴க³மாய படிபஜ்ஜமானோ ஆரஞ்ஞகோ பி⁴க்கு² து³தியசதுத்த²பதா⁴னியங்க³ஸமன்னாக³மேன காயே ச ஜீவிதே ச அனபேக்கோ² ஹுத்வா ஸச்சப்படிவேதா⁴ய படிபஜ்ஜிதும் ஸக்கோ அஸ்ஸ, ததா² கஸிணபரிகம்மவத்தஸமாதா³னாதீ³ஸு அத்தனோ பத்தசீவரப்படிஸங்க²ரணாதீ³ஸு ச யானி தானி ஸப்³ரஹ்மசாரீனம் உச்சாவசானி கிம் கரணீயானி, தேஸு அஞ்ஞேஸு ச ஏவரூபேஸு ஸக்கோ அஸ்ஸ த³க்கோ² அனலஸோ ஸமத்தோ². ஸக்கோ ஹோந்தோபி ச ததியபதா⁴னியங்க³ஸமன்னாக³மேன உஜு அஸ்ஸ. உஜு ஹோந்தோபி ச ஸகிம் உஜுபா⁴வேன த³ஹரகாலே வா உஜுபா⁴வேன ஸந்தோஸம் அனாபஜ்ஜித்வா யாவஜீவம் புனப்புனம் அஸிதி²லகரணேன ஸுட்டு²தரம் உஜு அஸ்ஸ. அஸட²தாய வா உஜு, அமாயாவிதாய ஸுஹுஜு. காயவசீவங்கப்பஹானேன வா உஜு, மனோவங்கப்பஹானேன ஸுஹுஜு. அஸந்தகு³ணஸ்ஸ வா அனாவிகரணேன உஜு, அஸந்தகு³ணேன உப்பன்னஸ்ஸ லாப⁴ஸ்ஸ அனதி⁴வாஸனேன ஸுஹுஜு. ஏவம் ஆரம்மணலக்க²ணூபனிஜ்ஜா²னேஹி புரிமத்³வயததியஸிக்கா²ஹி பயோகா³ஸயஸுத்³தீ⁴ஹி ச உஜு ச ஸுஹுஜு ச அஸ்ஸ.

ந கேவலஞ்ச உஜு ச ஸுஹுஜு ச, அபிச பன ஸுவசோ ச அஸ்ஸ. யோ ஹி புக்³க³லோ ‘‘இத³ம் ந கத்தப்³ப³’’ந்தி வுத்தோ ‘‘கிம் தே தி³ட்ட²ம், கிம் தே ஸுதம், கோ மே ஸுத்வா வத³ஸி, கிம் உபஜ்ஜா²யோ ஆசரியோ ஸந்தி³ட்டோ² ஸம்ப⁴த்தோ வா’’தி வதே³தி, துண்ஹீபா⁴வேன வா தம் விஹேஸேதி, ஸம்படிச்சி²த்வா வா ந ததா² கரோதி, ஸோ விஸேஸாதி⁴க³மஸ்ஸ தூ³ரே ஹோதி. யோ பன ஓவதி³யமானோ ‘‘ஸாது⁴, ப⁴ந்தே ஸுட்டு² வுத்தம், அத்தனோ வஜ்ஜம் நாம து³த்³த³ஸம் ஹோதி, புனபி மம் ஏவரூபம் தி³ஸ்வா வதே³ய்யாத² அனுகம்பம் உபாதா³ய, சிரஸ்ஸம் மே தும்ஹாகம் ஸந்திகா ஓவாதோ³ லத்³தோ⁴’’தி வத³தி, யதா²னுஸிட்ட²ஞ்ச படிபஜ்ஜதி, ஸோ விஸேஸாதி⁴க³மஸ்ஸ அவிதூ³ரே ஹோதி. தஸ்மா ஏவம் பரஸ்ஸ வசனம் ஸம்படிச்சி²த்வா கரோந்தோ ஸுவசோ ச அஸ்ஸ.

யதா² ச ஸுவசோ, ஏவம் முது³ அஸ்ஸ. முதூ³தி க³ஹட்டே²ஹி தூ³தக³மனபஹிணக³மனாதீ³ஸு நியுஜ்ஜமானோ தத்த² முது³பா⁴வம் அகத்வா த²த்³தோ⁴ ஹுத்வா வத்தபடிபத்தியம் ஸகலப்³ரஹ்மசரியே ச முது³ அஸ்ஸ ஸுபரிகம்மகதஸுவண்ணம் விய தத்த² தத்த² வினியோக³க்க²மோ. அத² வா முதூ³தி அபா⁴குடிகோ உத்தானமுகோ² ஸுக²ஸம்பா⁴ஸோ படிஸந்தா²ரவுத்தி ஸுதித்த²ம் விய ஸுகா²வகா³ஹோ அஸ்ஸ. ந கேவலஞ்ச முது³, அபிச பன அனதிமானீ அஸ்ஸ, ஜாதிகோ³த்தாதீ³ஹி அதிமானவத்தூ²ஹி பரே நாதிமஞ்ஞேய்ய, ஸாரிபுத்தத்தே²ரோ விய சண்டா³லகுமாரகஸமேன சேதஸா விஹரேய்யாதி.

து³தியகா³தா²வண்ணனா

2. ஏவம் ப⁴க³வா ஸந்தம் பத³ம் அபி⁴ஸமேச்ச விஹரிதுகாமஸ்ஸ தத³தி⁴க³மாய வா படிபஜ்ஜமானஸ்ஸ விஸேஸதோ ஆரஞ்ஞகஸ்ஸ பி⁴க்கு²னோ ஏகச்சம் கரணீயம் வத்வா புன ததுத்தரிபி வத்துகாமோ ‘‘ஸந்துஸ்ஸகோ சா’’தி து³தியகா³த²மாஹ.

தத்த² ‘‘ஸந்துட்டீ² ச கதஞ்ஞுதா’’தி ஏத்த² வுத்தப்பபே⁴தே³ன த்³வாத³ஸவிதே⁴ன ஸந்தோஸேன ஸந்துஸ்ஸதீதி ஸந்துஸ்ஸகோ. அத² வா துஸ்ஸதீதி துஸ்ஸகோ, ஸகேன துஸ்ஸகோ, ஸந்தேன துஸ்ஸகோ, ஸமேன துஸ்ஸகோதி ஸந்துஸ்ஸகோ. தத்த² ஸகம் நாம ‘‘பிண்டி³யாலோபபோ⁴ஜனம் நிஸ்ஸாயா’’தி ஏவம் உபஸம்பத³மண்ட³லே உத்³தி³ட்ட²ம் அத்தனா ச ஸம்படிச்சி²தம் சதுபச்சயஜாதம், தேன ஸுந்த³ரேன வா அஸுந்த³ரேன வா ஸக்கச்சம் வா அஸக்கச்சம் வா தி³ன்னேன படிக்³க³ஹணகாலே பரிபோ⁴க³காலே ச விகாரம் அத³ஸ்ஸேத்வா யாபேந்தோ ‘‘ஸகேன துஸ்ஸகோ’’தி வுச்சதி. ஸந்தம் நாம யம் லத்³த⁴ம் ஹோதி அத்தனோ ‘விஜ்ஜமானம், தேன ஸந்தேனேவ துஸ்ஸந்தோ ததோ பரம் ந பத்தே²ந்தோ அத்ரிச்ச²தம் பஜஹந்தோ ‘‘ஸந்தேன துஸ்ஸகோ’’தி வுச்சதி. ஸமம் நாம இட்டா²னிட்டே²ஸு அனுனயபடிக⁴ப்பஹானம், தேன ஸமேன ஸப்³பா³ரம்மணேஸு துஸ்ஸந்தோ ‘‘ஸமேன துஸ்ஸகோ’’தி வுச்சதி.

ஸுகே²ன ப⁴ரீயதீதி ஸுப⁴ரோ, ஸுபோஸோதி வுத்தம் ஹோதி. யோ ஹி பி⁴க்கு² மனுஸ்ஸேஹி ஸாலிமம்ஸோத³னாதீ³னம் பத்தே பூரேத்வா தி³ன்னேபி து³ம்முக²பா⁴வம் அனத்தமனபா⁴வமேவ ச த³ஸ்ஸேதி, தேஸம் வா ஸம்முகா²வ தம் பிண்ட³பாதம் ‘‘கிம் தும்ஹேஹி தி³ன்ன’’ந்தி அபஸாதே³ந்தோ ஸாமணேரக³ஹட்டா²தீ³னம் தே³தி, ஏஸ து³ப்³ப⁴ரோ. ஏதம் தி³ஸ்வா மனுஸ்ஸா தூ³ரதோவ பரிவஜ்ஜேந்தி ‘‘து³ப்³ப⁴ரோ பி⁴க்கு² ந ஸக்கா போஸேது’’ந்தி. யோ பன யம் கிஞ்சி லூக²ம் வா பணீதம் வா அப்பம் வா ப³ஹும் வா லபி⁴த்வா அத்தமனோ விப்பஸன்னமுகோ² ஹுத்வா யாபேதி, ஏஸ ஸுப⁴ரோ. ஏதம் தி³ஸ்வா மனுஸ்ஸா அதிவிய விஸ்ஸத்தா² ஹோந்தி, ‘‘அம்ஹாகம் ப⁴த³ந்தோ ஸுப⁴ரோ, தோ²கதோ²கேனாபி துஸ்ஸதி, மயமேவ நம் போஸேஸ்ஸாமா’’தி படிஞ்ஞம் கத்வா போஸேந்தி. ஏவரூபோ இத⁴ ஸுப⁴ரோதி அதி⁴ப்பேதோ.

அப்பம் கிச்சமஸ்ஸாதி அப்பகிச்சோ, ந கம்மாராமதாப⁴ஸ்ஸாராமதாஸங்க³ணிகாராமதாதி³அனேககிச்சப்³யாவடோ, அத² வா ஸகலவிஹாரே நவகம்மஸங்க⁴பரிபோ⁴க³ஸாமணேரஆராமிகவோஸாஸனாதி³கிச்சவிரஹிதோ, அத்தனோ கேஸனக²ச்சே²த³னபத்தசீவரகம்மாதி³ம் கத்வா ஸமணத⁴ம்மகிச்சபரோ ஹோதீதி வுத்தம் ஹோதி.

ஸல்லஹுகா வுத்தி அஸ்ஸாதி ஸல்லஹுகவுத்தி. யதா² ஏகச்சோ ப³ஹுப⁴ண்டோ³ பி⁴க்கு² தி³ஸாபக்கமனகாலே ப³ஹும் பத்தசீவரபச்சத்த²ரணதேலகு³ளாதி³ம் மஹாஜனேன ஸீஸபா⁴ரகடிபா⁴ராதீ³ஹி உப்³ப³ஹாபேத்வா பக்கமதி, ஏவம் அஹுத்வா யோ அப்பபரிக்கா²ரோ ஹோதி, பத்தசீவராதி³அட்ட²ஸமணபரிக்கா²ரமத்தமேவ பரிஹரதி, தி³ஸாபக்கமனகாலே பக்கீ² ஸகுணோ விய ஸமாதா³யேவ பக்கமதி, ஏவரூபோ இத⁴ ஸல்லஹுகவுத்தீதி அதி⁴ப்பேதோ. ஸந்தானி இந்த்³ரியானி அஸ்ஸாதி ஸந்திந்த்³ரியோ, இட்டா²ரம்மணாதீ³ஸு ராகா³தி³வஸேன அனுத்³த⁴திந்த்³ரியோதி வுத்தம் ஹோதி. நிபகோதி விஞ்ஞூ விபா⁴வீ பஞ்ஞவா, ஸீலானுரக்க²ணபஞ்ஞாய சீவராதி³விசாரணபஞ்ஞாய ஆவாஸாதி³ஸத்தஸப்பாயபரிஜானனபஞ்ஞாய ச ஸமன்னாக³தோதி அதி⁴ப்பாயோ.

ந பக³ப்³போ⁴தி அப்பக³ப்³போ⁴, அட்ட²ட்டா²னேன காயபாக³ப்³பி⁴யேன சதுட்டா²னேன வசீபாக³ப்³பி⁴யேன அனேகேன டா²னேன மனோபாக³ப்³பி⁴யேன ச விரஹிதோதி அத்தோ².

அட்ட²ட்டா²னம் காயபாக³ப்³பி⁴யம் (மஹானி. 87) நாம ஸங்க⁴க³ணபுக்³க³லபோ⁴ஜனஸாலாஜந்தாக⁴ரன்ஹானதித்த²பி⁴க்கா²சாரமக்³க³அந்தரக⁴ரப்பவேஸனேஸு காயேன அப்பதிரூபகரணம். ஸேய்யதி²த³ம் – இதே⁴கச்சோ ஸங்க⁴மஜ்ஜே² பல்லத்தி²காய வா நிஸீத³தி பாதே³ பாத³மோத³ஹித்வா வாதி ஏவமாதி³. ததா² க³ணமஜ்ஜே² சதுபரிஸஸன்னிபாதே, ததா² வுட்³ட⁴தரே புக்³க³லே. போ⁴ஜனஸாலாயம் பன வுட்³டா⁴னம் ஆஸனம் ந தே³தி, நவானம் ஆஸனம் படிபா³ஹதி. ததா² ஜந்தாக⁴ரே, வுட்³டே⁴ சேத்த² அனாபுச்சா² அக்³கி³ஜாலனாதீ³னி கரோதி. ந்ஹானதித்தே² ச யதி³த³ம் ‘‘த³ஹரோ வுட்³டோ⁴தி பமாணம் அகத்வா ஆக³தபடிபாடியா ந்ஹாயிதப்³ப³’’ந்தி வுத்தம், தம்பி அனாதி³யந்தோ பச்சா² ஆக³ந்த்வா உத³கம் ஓதரித்வா வுட்³டே⁴ ச நவே ச பா³தே⁴தி. பி⁴க்கா²சாரமக்³கே³ பன அக்³கா³ஸனஅக்³கோ³த³கஅக்³க³பிண்ட³த்த²ம் வுட்³டா⁴னம் புரதோ புரதோ யாதி, பா³ஹாய பா³ஹம் பஹரந்தோ. அந்தரக⁴ரப்பவேஸனே வுட்³டா⁴னம் பட²மதரம் பவிஸதி, த³ஹரேஹி காயகீளனம் கரோதீதி ஏவமாதி³.

சதுட்டா²னம் வசீபாக³ப்³பி⁴யம் (மஹானி. 87) நாம ஸங்க⁴க³ணபுக்³க³லஅந்தரக⁴ரேஸு அப்பதிரூபவாசானிச்சா²ரணம். ஸேய்யதி²த³ம் – இதே⁴கச்சோ ஸங்க⁴மஜ்ஜே² அனாபுச்சா² த⁴ம்மம் பா⁴ஸதி, ததா² புப்³பே³ வுத்தப்பகாரே க³ணே வுட்³ட⁴தரே புக்³க³லே ச, தத்த² மனுஸ்ஸேஹி பஞ்ஹம் புட்டோ² வுட்³ட⁴தரம் அனாபுச்சா² விஸ்ஸஜ்ஜேதி, அந்தரக⁴ரே பன ‘‘இத்த²ன்னாமே கிம் அத்தி², கிம் யாகு³ உதா³ஹு கா²த³னீயம் வா போ⁴ஜனீயம் வா, கிம் மே த³ஸ்ஸஸி, கிம் அஜ்ஜ கா²தி³ஸ்ஸாமி, கிம் பு⁴ஞ்ஜிஸ்ஸாமி, கிம் பிவிஸ்ஸாமீ’’தி ஏவமாதி³ம் பா⁴ஸதி.

அனேகட்டா²னம் மனோபாக³ப்³பி⁴யம் (மஹானி. 87) நாம தேஸு தேஸு டா²னேஸு காயவாசாஹி அஜ்ஜா²சாரம் அனாபஜ்ஜித்வாபி மனஸா ஏவ காமவிதக்காதி³னானப்பகாரம் அப்பதிரூபவிதக்கனம்.

குலேஸ்வனனுகி³த்³தோ⁴தி யானி தானி குலானி உபஸங்கமதி, தேஸு பச்சயதண்ஹாய வா அனனுலோமிககி³ஹிஸம்ஸக்³க³வஸேன வா அனனுகி³த்³தோ⁴, ந ஸஹஸோகீ, ந ஸஹனந்தீ³, ந ஸுகி²தேஸு ஸுகி²தோ, ந து³க்கி²தேஸு து³க்கி²தோ, ந உப்பன்னேஸு கிச்சகரணீயேஸு அத்தனா வா உய்யோக³மாபஜ்ஜிதாதி வுத்தம் ஹோதி. இமிஸ்ஸாய ச கா³தா²ய யம் ‘‘ஸுவசோ சஸ்ஸா’’தி ஏத்த² வுத்தம் அஸ்ஸாதி வசனம், தம் ஸப்³ப³பதே³ஹி ஸத்³தி⁴ம் ஸந்துஸ்ஸகோ ச அஸ்ஸ, ஸுப⁴ரோ ச அஸ்ஸாதி ஏவம் யோஜேதப்³ப³ம்.

ததியகா³தா²வண்ணனா

3. ஏவம் ப⁴க³வா ஸந்தம் பத³ம் அபி⁴ஸமேச்ச விஹரிதுகாமஸ்ஸ தத³தி⁴க³மாய வா படிபஜ்ஜிதுகாமஸ்ஸ விஸேஸதோ ஆரஞ்ஞகஸ்ஸ பி⁴க்கு²னோ தது³த்தரிபி கரணீயம் ஆசிக்கி²த்வா இதா³னி அகரணீயம்பி ஆசிக்கி²துகாமோ ‘‘ந ச கு²த்³த³மாசரே கிஞ்சி, யேன விஞ்ஞூ பரே உபவதே³ய்யு’’ந்தி இமம் உபட்³ட⁴கா³த²மாஹ.

தஸ்ஸத்தோ² – ஏவமிமம் கரணீயம் கரோந்தோ யம் தம் காயவசீமனோது³ச்சரிதம் கு²த்³த³ம் லாமகந்தி வுச்சதி, தம் ந ச கு²த்³த³ம் ஸமாசரே, அஸமாசரந்தோ ச ந கேவலம் ஓளாரிகம், கிந்து கிஞ்சி ந ஸமாசரே, அப்பமத்தகம்பி அணுமத்தகம்பி ந ஸமாசரேதி வுத்தம் ஹோதி.

ததோ தஸ்ஸ ஸமாசாரே ஸந்தி³ட்டி²கமேவாதீ³னவம் த³ஸ்ஸேதி ‘‘யேன விஞ்ஞூ பரே உபவதே³ய்யு’’ந்தி. ஏத்த² ச யஸ்மா அவிஞ்ஞூ பரே அப்பமாணம். தே ஹி அனவஜ்ஜம் வா ஸாவஜ்ஜம் கரோந்தி, அப்பஸாவஜ்ஜம் வா மஹாஸாவஜ்ஜம். விஞ்ஞூ ஏவ பன பமாணம். தே ஹி அனுவிச்ச பரியோகா³ஹேத்வா அவண்ணாரஹஸ்ஸ அவண்ணம் பா⁴ஸந்தி, வண்ணாரஹஸ்ஸ வண்ணம் பா⁴ஸந்தி. தஸ்மா ‘‘விஞ்ஞூ பரே’’தி வுத்தம்.

ஏவம் ப⁴க³வா இமாஹி அட்³ட⁴தேய்யாஹி கா³தா²ஹி ஸந்தம் பத³ம் அபி⁴ஸமேச்ச விஹரிதுகாமஸ்ஸ தத³தி⁴க³மாய வா படிபஜ்ஜிதுகாமஸ்ஸ விஸேஸதோ ஆரஞ்ஞகஸ்ஸ, ஆரஞ்ஞகஸீஸேன ச ஸப்³பே³ஸம்பி கம்மட்டா²னம் க³ஹேத்வா விஹரிதுகாமானம் கரணீயாகரணீயபே⁴த³ம் கம்மட்டா²னூபசாரம் வத்வா இதா³னி தேஸம் பி⁴க்கூ²னம் தஸ்ஸ தே³வதாப⁴யஸ்ஸ படிகா⁴தாய பரித்தத்த²ம் விபஸ்ஸனாபாத³கஜ்ஜா²னவஸேன கம்மட்டா²னத்த²ஞ்ச ‘‘ஸுகி²னோவ கே²மினோ ஹோந்தூ’’திஆதி³னா நயேன மேத்தகத²ம் கதே²துமாரத்³தோ⁴.

தத்த² ஸுகி²னோதி ஸுக²ஸம்பன்னா. கே²மினோதி கே²மவந்தோ, அப⁴யா நிருபத்³த³வாதி வுத்தம் ஹோதி. ஸப்³பே³தி அனவஸேஸா. ஸத்தாதி பாணினோ. ஸுகி²தத்தாதி ஸுகி²தசித்தா. ஏத்த² ச காயிகேன ஸுகே²ன ஸுகி²னோ, மானஸேன ஸுகி²தத்தா, தது³ப⁴யேனாபி ஸப்³ப³ப⁴யுபத்³த³வவிக³மேன வா கே²மினோதி வேதி³தப்³போ³. கஸ்மா பன ஏவம் வுத்தம்? மேத்தாபா⁴வனாகாரத³ஸ்ஸனத்த²ம். ஏவஞ்ஹி மேத்தா பா⁴வேதப்³பா³ ‘‘ஸப்³பே³ ஸத்தா ஸுகி²னோ ஹோந்தூ’’தி வா, ‘‘கே²மினோ ஹோந்தூ’’தி வா, ‘‘ஸுகி²தத்தா ஹோந்தூ’’தி வா.

சதுத்த²கா³தா²வண்ணனா

4. ஏவம் யாவ உபசாரதோ அப்பனாகோடி, தாவ ஸங்கே²பேன மேத்தாபா⁴வனம் த³ஸ்ஸேத்வா இதா³னி வித்தா²ரதோபி தம் த³ஸ்ஸேதும் ‘‘யே கேசீ’’தி கா³தா²த்³வயமாஹ. அத² வா யஸ்மா புது²த்தாரம்மணே பரிசிதம் சித்தம் ந ஆதி³கேனேவ ஏகத்தே ஸண்டா²தி ஆரம்மணப்பபே⁴த³ம் பன அனுக³ந்த்வா அனுக³ந்த்வா கமேன ஸண்டா²தி, தஸ்மா தஸ்ஸ தஸதா²வராதி³து³கதிகப்பபே⁴தே³ ஆரம்மணே அனுக³ந்த்வா அனுக³ந்த்வா ஸண்டா²னத்த²ம்பி ‘‘யே கேசீ’’தி கா³தா²த்³வயமாஹ. அத² வா யஸ்மா யஸ்ஸ யம் ஆரம்மணம் விபூ⁴தம் ஹோதி, தஸ்ஸ தத்த² சித்தம் ஸுக²ம் திட்ட²தி, தஸ்மா தேஸம் பி⁴க்கூ²னம் யஸ்ஸ யம் விபூ⁴தம் ஆரம்மணம், தஸ்ஸ தத்த² சித்தம் ஸண்டா²பேதுகாமோ தஸதா²வராதி³து³கதிகாரம்மணபே⁴த³தீ³பகம் ‘‘யே கேசீ’’தி இமம் கா³தா²த்³வயமாஹ.

ஏத்த² ஹி தஸதா²வரது³கம் தி³ட்டா²தி³ட்ட²து³கம் தூ³ரஸந்திகது³கம் பூ⁴தஸம்ப⁴வேஸிது³கந்தி சத்தாரோ து³கே, தீ³கா⁴தீ³ஹி ச ச²ஹி பதே³ஹி மஜ்ஜி²மபத³ஸ்ஸ தீஸு அணுகபத³ஸ்ஸ ச த்³வீஸு திகேஸு அத்த²ஸம்ப⁴வதோ தீ³க⁴ரஸ்ஸமஜ்ஜி²மதிகம் மஹந்தாணுகமஜ்ஜி²மதிகம் தூ²லாணுகமஜ்ஜி²மதிகந்தி தயோ திகே ச தீ³பேதி. தத்த² யே கேசீதி அனவஸேஸவசனம். பாணா ஏவ பூ⁴தா பாணபூ⁴தா. அத² வா பாணந்தீதி பாணா, ஏதேன அஸ்ஸாஸபஸ்ஸாஸப்படிப³த்³தே⁴ பஞ்சவோகாரஸத்தே க³ண்ஹாதி. ப⁴வந்தீதி பூ⁴தா, ஏதேன ஏகவோகாரசதுவோகாரஸத்தே க³ண்ஹாதி. அத்தீ²தி ஸந்தி ஸம்விஜ்ஜந்தி.

ஏவம் ‘‘யே கேசி பாணபூ⁴தத்தீ²’’தி இமினா வசனேன து³கதிகேஹி ஸங்க³ஹேதப்³பே³ ஸப்³ப³ஸத்தே ஏகதோ த³ஸ்ஸேத்வா இதா³னி ஸப்³பே³பி தே தஸா வா தா²வரா வ நவஸேஸாதி இமினா து³கேன ஸங்க³ஹேத்வா த³ஸ்ஸேதி.

தத்த² தஸந்தீதி தஸா, ஸதண்ஹானம் ஸப⁴யானஞ்சேதம் அதி⁴வசனம். திட்ட²ந்தீதி தா²வரா, பஹீனதண்ஹாப⁴யானம் அரஹதம் ஏதம் அதி⁴வசனம். நத்தி² தேஸம் அவஸேஸந்தி அனவஸேஸா, ஸப்³பே³பீதி வுத்தம் ஹோதி. யஞ்ச து³தியகா³தா²ய அந்தே வுத்தம், தம் ஸப்³ப³து³கதிகேஹி ஸம்ப³ந்தி⁴தப்³ப³ம் ‘‘யே கேசி பாணபூ⁴தத்தி² தஸா வா தா²வரா வா அனவஸேஸா, இமேபி ஸப்³பே³ ஸத்தா ப⁴வந்து ஸுகி²தத்தா. ஏவம் யாவ பூ⁴தா வா ஸம்ப⁴வேஸீ வா, இமேபி ஸப்³பே³ ஸத்தா ப⁴வந்து ஸுகி²தத்தா’’தி.

இதா³னி தீ³க⁴ரஸ்ஸமஜ்ஜி²மாதி³திகத்தயதீ³பகேஸு தீ³கா⁴ வாதிஆதீ³ஸு ச²ஸு பதே³ஸு தீ³கா⁴தி தீ³க⁴த்தபா⁴வா நாக³மச்ச²கோ³தா⁴த³யோ. அனேகப்³யாமஸதப்பமாணாபி ஹி மஹாஸமுத்³தே³ நாகா³னம் அத்தபா⁴வா அனேகயோஜனப்பமாணா ச மச்ச²கோ³தா⁴தீ³னம் அத்தபா⁴வா ஹோந்தி. மஹந்தாதி மஹந்தத்தபா⁴வா ஜலே மச்ச²கச்ச²பாத³யோ, த²லே ஹத்தி²னாகா³த³யோ, அமனுஸ்ஸேஸு தா³னவாத³யோ. ஆஹ ச ‘‘ராஹுக்³க³ம் அத்தபா⁴வீன’’ந்தி (அ. நி. 4.15). தஸ்ஸ ஹி அத்தபா⁴வோ உப்³பே³தே⁴ன சத்தாரி யோஜனஸஹஸ்ஸானி அட்ட² ச யோஜனஸதானி, பா³ஹூ த்³வாத³ஸயோஜனஸதபரிமாணா, பஞ்ஞாஸயோஜனம் ப⁴முகந்தரம், ததா² அங்கு³லந்தரிகா, ஹத்த²தலானி த்³வே யோஜனஸதானீதி. மஜ்ஜி²மாதி அஸ்ஸகோ³ணமஹிம்ஸஸூகராதீ³னம் அத்தபா⁴வா. ரஸ்ஸகாதி தாஸு தாஸு ஜாதீஸு வாமனாத³யோ தீ³க⁴மஜ்ஜி²மேஹி ஓமகப்பமாணா ஸத்தா. அணுகாதி மம்ஸசக்கு²ஸ்ஸ அகோ³சரா தி³ப்³ப³சக்கு²விஸயா உத³காதீ³ஸு நிப்³ப³த்தா ஸுகு²மத்தபா⁴வா ஸத்தா ஊகாத³யோ வா. அபிச யே தாஸு தாஸு ஜாதீஸு மஹந்தமஜ்ஜி²மேஹி தூ²லமஜ்ஜி²மேஹி ச ஓமகப்பமாணா ஸத்தா, தே அணுகாதி வேதி³தப்³பா³. தூ²லாதி பரிமண்ட³லத்தபா⁴வா ஸிப்பிகஸம்பு³காத³யோ ஸத்தா.

பஞ்சமகா³தா²வண்ணனா

5. ஏவம் தீஹி திகேஹி அனவஸேஸதோ ஸத்தே த³ஸ்ஸேத்வா இதா³னி ‘‘தி³ட்டா² வா யே வ அதி³ட்டா²’’திஆதீ³ஹி தீஹி து³கேஹிபி தே ஸங்க³ஹேத்வா த³ஸ்ஸேதி.

தத்த² தி³ட்டா²தி யே அத்தனோ சக்கு²ஸ்ஸ ஆபாத²மாக³தவஸேன தி³ட்ட²புப்³பா³. அதி³ட்டா²தி யே பரஸமுத்³த³பரஸேலபரசக்கவாளாதீ³ஸு டி²தா. ‘‘யே வா தூ³ரே வஸந்தி அவிதூ³ரே’’தி இமினா பன து³கேன அத்தனோ அத்தபா⁴வஸ்ஸ தூ³ரே ச அவிதூ³ரே ச வஸந்தே ஸத்தே த³ஸ்ஸேதி, தே அபத³த்³விபத³வஸேன வேதி³தப்³பா³. அத்தனோ ஹி காயே வஸந்தா ஸத்தா அவிதூ³ரே, ப³ஹிகாயே வஸந்தா ஸத்தா தூ³ரே. ததா² அந்தோஉபசாரே வஸந்தா அவிதூ³ரே, ப³ஹிஉபசாரே வஸந்தா தூ³ரே. அத்தனோ விஹாரே கா³மே ஜனபதே³ தீ³பே சக்கவாளே வஸந்தா அவிதூ³ரே, பரசக்கவாளே வஸந்தா தூ³ரே வஸந்தீதி வுச்சந்தி.

பூ⁴தாதி ஜாதா அபி⁴னிப்³ப³த்தா. யே பூ⁴தா ஏவ, ந புன ப⁴விஸ்ஸந்தீதி ஸங்க்²யம் க³ச்ச²ந்தி, தேஸம் கீ²ணாஸவானம் ஏதம் அதி⁴வசனம். ஸம்ப⁴வமேஸந்தீதி ஸம்ப⁴வேஸீ. அப்பஹீனப⁴வஸம்யோஜனத்தா ஆயதிம்பி ஸம்ப⁴வம் ஏஸந்தானம் ஸேக²புது²ஜ்ஜனானமேதம் அதி⁴வசனம். அத² வா சதூஸு யோனீஸு அண்ட³ஜஜலாபு³ஜா ஸத்தா யாவ அண்ட³கோஸம் வத்தி²கோஸஞ்ச ந பி⁴ந்த³ந்தி, தாவ ஸம்ப⁴வேஸீ நாம, அண்ட³கோஸம் வத்தி²கோஸஞ்ச பி⁴ந்தி³த்வா ப³ஹி நிக்க²ந்தா பூ⁴தா நாம. ஸம்ஸேத³ஜா ஓபபாதிகா ச பட²மசித்தக்க²ணே ஸம்ப⁴வேஸீ நாம, து³தியசித்தக்க²ணதோ பபு⁴தி பூ⁴தா நாம. யேன வா இரியாபதே²ன ஜாயந்தி, யாவ ததோ அஞ்ஞம் ந பாபுணந்தி, தாவ ஸம்ப⁴வேஸீ நாம, ததோ பரம் பூ⁴தாதி.

ச²ட்ட²கா³தா²வண்ணனா

6. ஏவம் ப⁴க³வா ‘‘ஸுகி²னோ வா’’திஆதீ³ஹி அட்³ட⁴தேய்யாஹி கா³தா²ஹி நானப்பகாரதோ தேஸம் பி⁴க்கூ²னம் ஹிதஸுகா²க³மபத்த²னாவஸேன ஸத்தேஸு மேத்தாபா⁴வனம் த³ஸ்ஸேத்வா இதா³னி அஹிதது³க்கா²னாக³மபத்த²னாவஸேனாபி தம் த³ஸ்ஸேந்தோ ஆஹ ‘‘ந பரோ பரம் நிகுப்³பே³தா²’’தி. ஏஸ போராணோ பாடோ², இதா³னி பன ‘‘பரம் ஹீ’’திபி பட²ந்தி, அயம் ந ஸோப⁴னோ.

தத்த² பரோதி பரஜனோ. பரந்தி பரஜனம். ந நிகுப்³பே³தா²தி ந வஞ்சேய்ய. நாதிமஞ்ஞேதா²தி ந அதிக்கமித்வா மஞ்ஞேய்ய. கத்த²சீதி கத்த²சி ஓகாஸே, கா³மே வா கா³மகே²த்தே வா ஞாதிமஜ்ஜே² வா பூக³மஜ்ஜே² வாதிஆதி³. நந்தி ஏதம். கஞ்சீதி யம் கஞ்சி க²த்தியம் வா ப்³ராஹ்மணம் வா க³ஹட்ட²ம் வா பப்³ப³ஜிதம் வா ஸுகி²தம் வா து³க்கி²தம் வாதிஆதி³. ப்³யாரோஸனா படிக⁴ஸஞ்ஞாதி காயவசீவிகாரேஹி ப்³யாரோஸனாய ச மனோவிகாரேன படிக⁴ஸஞ்ஞாய ச. ‘‘ப்³யாரோஸனாய படிக⁴ஸஞ்ஞாயா’’தி ஹி வத்தப்³பே³ ‘‘ப்³யாரோஸனா படிக⁴ஸஞ்ஞா’’தி வுச்சதி, யதா² ‘‘ஸம்மத³ஞ்ஞாய விமுத்தா’’தி வத்தப்³பே³ ‘‘ஸம்மத³ஞ்ஞா விமுத்தா’’தி, யதா² ச ‘‘அனுபுப்³ப³ஸிக்கா²ய அனுபுப்³ப³கிரியாய அனுபுப்³ப³படிபதா³யா’’தி வத்தப்³பே³ ‘‘அனுபுப்³ப³ஸிக்கா² அனுபுப்³ப³கிரியா அனுபுப்³ப³படிபதா³’’தி. நாஞ்ஞமஞ்ஞஸ்ஸ து³க்க²மிச்சே²ய்யாதி அஞ்ஞமஞ்ஞஸ்ஸ து³க்க²ம் ந இச்சே²ய்ய. கிம் வுத்தம் ஹோதி? ந கேவலம் ‘‘ஸுகி²னோ வா கே²மினோ வா ஹோந்தூ’’திஆதி³மனஸிகாரவஸேனேவ மேத்தம் பா⁴வேய்ய, கிந்து ‘‘அஹோவத யோ கோசி பரபுக்³க³லோ யம் கஞ்சி பரபுக்³க³லம் வஞ்சனாதீ³ஹி நிகதீஹி ந நிகுப்³பே³த², ஜாதிஆதீ³ஹி ச நவஹி மானவத்தூ²ஹி கத்த²சி பதே³ஸே கஞ்சி பரபுக்³க³லம் நாதிமஞ்ஞேய்ய, அஞ்ஞமஞ்ஞஸ்ஸ ச ப்³யாரோஸனாய வா படிக⁴ஸஞ்ஞாய வா து³க்க²ம் ந இச்சே²ய்யா’’தி ஏவம்பி மனஸிகரோந்தோ பா⁴வேய்யாதி.

ஸத்தமகா³தா²வண்ணனா

7. ஏவம் அஹிதது³க்கா²னாக³மபத்த²னாவஸேன அத்த²தோ மேத்தாபா⁴வனம் த³ஸ்ஸேத்வா இதா³னி தமேவ உபமாய த³ஸ்ஸேந்தோ ஆஹ ‘‘மாதா யதா² நியம்புத்த’’ந்தி.

தஸ்ஸத்தோ² – யதா² மாதா நியம் புத்தம் அத்தனி ஜாதம் ஓரஸம் புத்தம், தஞ்ச ஏகபுத்தமேவ ஆயுஸா அனுரக்கே², தஸ்ஸ து³க்கா²க³மப்படிபா³ஹனத்த²ம் அத்தனோ ஆயும்பி சஜித்வா தம் அனுரக்கே², ஏவம்பி ஸப்³ப³பூ⁴தேஸு இத³ம் மேத்தாக்²யம் மானஸம் பா⁴வயே, புனப்புனம் ஜனயே வட்³ட⁴யே, தஞ்ச அபரிமாணஸத்தாரம்மணவஸேன ஏகஸ்மிம் வா ஸத்தே அனவஸேஸப²ரணவஸேன அபரிமாணம் பா⁴வயேதி.

அட்ட²மகா³தா²வண்ணனா

8. ஏவம் ஸப்³பா³காரேன மேத்தாபா⁴வனம் த³ஸ்ஸேத்வா இதா³னி தஸ்ஸேவ வட்³ட⁴னம் த³ஸ்ஸேந்தோ ஆஹ ‘‘மேத்தஞ்ச ஸப்³ப³லோகஸ்மீ’’தி.

தத்த² மிஜ்ஜதி தாயதி சாதி மித்தோ, ஹிதஜ்ஜா²ஸயதாய ஸினிய்ஹதி, அஹிதாக³மதோ ரக்க²தி சாதி அத்தோ². மித்தஸ்ஸ பா⁴வோ மேத்தம். ஸப்³ப³லோகஸ்மீதி அனவஸேஸே ஸத்தலோகே. மனஸி ப⁴வந்தி மானஸம். தஞ்ஹி சித்தஸம்பயுத்தத்தா ஏவம் வுத்தம். பா⁴வயேதி வட்³ட⁴யே. ந அஸ்ஸ பரிமாணந்தி அபரிமாணம், அப்பமாணஸத்தாரம்மணதாய ஏவம் வுத்தம். உத்³த⁴ந்தி உபரி, தேன அரூபப⁴வம் க³ண்ஹாதி. அதோ⁴தி ஹேட்டா², தேன காமப⁴வம் க³ண்ஹாதி. திரியந்தி வேமஜ்ஜ²ம், தேன ரூபப⁴வம் க³ண்ஹாதி. அஸம்பா³த⁴ந்தி ஸம்பா³த⁴விரஹிதம், பி⁴ன்னஸீமந்தி வுத்தம் ஹோதி. ஸீமா நாம பச்சத்தி²கோ வுச்சதி, தஸ்மிம்பி பவத்தந்தி அத்தோ². அவேரந்தி வேரவிரஹிதம், அந்தரந்தராபி வேரசேதனாபாதுபா⁴வவிரஹிதந்தி அத்தோ². அஸபத்தந்தி விக³தபச்சத்தி²கம். மேத்தாவிஹாரீ ஹி புக்³க³லோ மனுஸ்ஸானம் பியோ ஹோதி, அமனுஸ்ஸானம் பியோ ஹோதி, நாஸ்ஸ கோசி பச்சத்தி²கோ ஹோதி, தேனஸ்ஸ தம் மானஸம் விக³தபச்சத்தி²கத்தா அஸபத்தந்தி வுச்சதி. பரியாயவசனஞ்ஹி ஏதம், யதி³த³ம் பச்சத்தி²கோ ஸபத்தோதி. அயம் அனுபத³தோ அத்த²வண்ணனா.

அயம் பனேத்த² அதி⁴ப்பேதத்த²தீ³பனா – யதி³த³ம் ‘‘ஏவம்பி ஸப்³ப³பூ⁴தேஸு மானஸம் பா⁴வயே அபரிமாண’’ந்தி வுத்தம், தஞ்சேதம் அபரிமாணம் மேத்தம் மானஸம் ஸப்³ப³லோகஸ்மிம் பா⁴வயே வட்³ட⁴யே, வுட்³டி⁴ம் விரூள்ஹிம் வேபுல்லம் க³மயே பாபயே. கத²ம்? உத்³த⁴ம் அதோ⁴ ச திரியஞ்ச, உத்³த⁴ம் யாவ ப⁴வக்³கா³, அதோ⁴ யாவ அவீசிதோ, திரியம் யாவ அவஸேஸதி³ஸா. உத்³த⁴ம் வா ஆருப்பம், அதோ⁴ காமதா⁴தும், திரியம் ரூபதா⁴தும் அனவஸேஸம் ப²ரந்தோ. ஏவம் பா⁴வேந்தோபி ச தம் யதா² அஸம்பா³த⁴ம் அவேரம் அஸபத்தஞ்ச ஹோதி, ததா² ஸம்பா³த⁴வேரஸபத்தானம் அபா⁴வம் கரோந்தோ பா⁴வயே. யம் வா தம் பா⁴வனாஸம்பத³ம் பத்தம் ஸப்³ப³த்த² ஓகாஸலோகவஸேன அஸம்பா³த⁴ம், அத்தனோ பரேஸு ஆகா⁴தப்படிவினயனேன அவேரம், அத்தனி ச பரேஸம் ஆகா⁴தவினயனேன அஸபத்தம் ஹோதி. தம் அஸம்பா³த⁴மவேரமஸபத்தம் அபரிமாணம் மேத்தம் மானஸம் உத்³த⁴ம் அதோ⁴ திரியஞ்சாதி திவித⁴பரிச்சே²தே³ ஸப்³ப³லோகஸ்மிம் பா⁴வயே வட்³ட⁴யேதி.

நவமகா³தா²வண்ணனா

9. ஏவம் மேத்தாபா⁴வனாய வட்³ட⁴னம் த³ஸ்ஸேத்வா இதா³னி தம் பா⁴வனமனுயுத்தஸ்ஸ விஹரதோ இரியாபத²னியமாபா⁴வம் த³ஸ்ஸேந்தோ ஆஹ ‘‘திட்ட²ம் சரம்…பே… அதி⁴ட்டே²ய்யா’’தி.

தஸ்ஸத்தோ² – ஏவமேதம் மேத்தம் மானஸம் பா⁴வேந்தோ ஸோ ‘‘நிஸீத³தி பல்லங்கம் ஆபு⁴ஜித்வா உஜும் காயம் பணிதா⁴யா’’திஆதீ³ஸு விய இரியாபத²னியமம் அகத்வா யதா²ஸுக²ம் அஞ்ஞதரஞ்ஞதரஇரியாபத²பா³த⁴னவினோத³னம் கரோந்தோ திட்ட²ம் வா சரம் வா நிஸின்னோ வா ஸயானோ வா யாவதா விக³தமித்³தோ⁴ அஸ்ஸ, அத² ஏதம் மேத்தாஜா²னஸதிம் அதி⁴ட்டே²ய்ய.

அத² வா ஏவம் மேத்தாபா⁴வனாய வட்³ட⁴னம் த³ஸ்ஸேத்வா இதா³னி வஸீபா⁴வம் த³ஸ்ஸேந்தோ ஆஹ ‘‘திட்ட²ம் சர’’ந்தி. வஸிப்பத்தோ ஹி திட்ட²ம் வா சரம் வா நிஸின்னோ வா ஸயானோ வா யாவதா இரியாபதே²ன ஏதம் மேத்தாஜா²னஸதிம் அதி⁴ட்டா²துகாமோ ஹோதி, அத² வா திட்ட²ம் வா சரம் வா…பே… ஸயானோ வாதி ந தஸ்ஸ டா²னாதீ³னி அந்தராயகரானி ஹோந்தி, அபிச கோ² யாவதா ஏதம் மேத்தாஜா²னஸதிம் அதி⁴ட்டா²துகாமோ ஹோதி, தாவதா விக³தமித்³தோ⁴ ஹுத்வா அதி⁴ட்டா²தி, நத்தி² தஸ்ஸ தத்த² த³ந்தா⁴யிதத்தம். தேனாஹ ‘‘திட்ட²ம் சரம் நிஸின்னோ வ, ஸயானோ யாவதாஸ்ஸ விதமித்³தோ⁴. ஏதம் ஸதிம் அதி⁴ட்டே²ய்யா’’தி.

தஸ்ஸாயமதி⁴ப்பாயோ – யம் தம் ‘‘மேத்தஞ்ச ஸப்³ப³லோகஸ்மி, மானஸம் பா⁴வயே’’தி வுத்தம், தம் யதா² பா⁴வேய்ய, யதா² டா²னாதீ³ஸு யாவதா இரியாபதே²ன டா²னாதீ³னி வா அனாதி³யித்வா யாவதா ஏதம் மேத்தாஜா²னஸதிம் அதி⁴ட்டா²துகாமோ அஸ்ஸ, தாவதா விக³தமித்³தோ⁴வ ஹுத்வா ஏதம் ஸதிம் அதி⁴ட்டே²ய்யாதி.

ஏவம் மேத்தாபா⁴வனாய வஸீபா⁴வம் த³ஸ்ஸேந்தோ ‘‘ஏதம் ஸதிம் அதி⁴ட்டே²ய்யா’’தி தஸ்மிம் மேத்தாவிஹாரே நியோஜேத்வா இதா³னி தம் விஹாரம் து²னந்தோ ஆஹ ‘‘ப்³ரஹ்மமேதம் விஹாரமித⁴மாஹூ’’தி.

தஸ்ஸத்தோ² – ய்வாயம் ‘‘ஸுகி²னோ வா கே²மினோ வா ஹோந்தூ’’திஆதி³ கத்வா யாவ ‘‘ஏதம் ஸதிம் அதி⁴ட்டே²ய்யா’’தி வண்ணிதோ மேத்தாவிஹாரோ. ஏதம் சதூஸு தி³ப்³ப³ப்³ரஹ்மஅரியஇரியாபத²விஹாரேஸு நித்³தோ³ஸத்தா அத்தனோபி பரேஸம்பி அத்த²கரத்தா ச இத⁴ அரியஸ்ஸ த⁴ம்மவினயே ப்³ரஹ்மவிஹாரமாஹு ஸேட்ட²விஹாரமாஹூதி, யதோ ஸததம் ஸமிதம் அப்³போ³கிண்ணம் திட்ட²ம் சரம் நிஸின்னோ வா ஸயானோ வா யாவதாஸ்ஸ விக³தமித்³தோ⁴, ஏதம் ஸதிம் அதி⁴ட்டே²ய்யாதி.

த³ஸமகா³தா²வண்ணனா

10. ஏவம் ப⁴க³வா தேஸம் பி⁴க்கூ²னம் நானப்பகாரதோ மேத்தாபா⁴வனம் த³ஸ்ஸேத்வா இதா³னி யஸ்மா மேத்தா ஸத்தாரம்மணத்தா அத்ததி³ட்டி²யா ஆஸன்னா ஹோதி, தஸ்மா தி³ட்டி²க³ஹனனிஸேத⁴னமுகே²ன தேஸம் பி⁴க்கூ²னம் ததே³வ மேத்தாஜா²னம் பாத³கம் கத்வா அரியபூ⁴மிப்பத்திம் த³ஸ்ஸேந்தோ ‘‘தி³ட்டி²ஞ்ச அனுபக்³க³ம்மா’’தி இமாய கா³தா²ய தே³ஸனம் ஸமாபேஸி.

தஸ்ஸத்தோ² – ய்வாயம் ‘‘ப்³ரஹ்மமேதம் விஹாரமித⁴மாஹூ’’தி ஸம்வண்ணிதோ மேத்தாஜா²னவிஹாரோ, ததோ வுட்டா²ய யே தத்த² விதக்கவிசாராத³யோ த⁴ம்மா, தே தேஸஞ்ச வத்தா²தி³அனுஸாரேன ரூபத⁴ம்மே பரிக்³க³ஹேத்வா இமினா நாமரூபபரிச்சே²தே³ன ‘‘ஸுத்³த⁴ஸங்கா²ரபுஞ்ஜோயம், நயித⁴ ஸத்தூபலப்³ப⁴தீ’’தி (ஸம். நி. 1.171; மஹானி. 186) ஏவம் தி³ட்டி²ஞ்ச அனுபக்³க³ம்ம அனுபுப்³பே³ன லோகுத்தரஸீலேன ஸீலவா ஹுத்வா லோகுத்தரஸீலஸம்பயுத்தேனேவ ஸோதாபத்திமக்³க³ஸம்மாதி³ட்டி²ஸஞ்ஞிதேன த³ஸ்ஸனேன ஸம்பன்னோ, ததோ பரம் யோபாயம் வத்து²காமேஸு கே³தோ⁴ கிலேஸகாமோ அப்பஹீனோ ஹோதி, தம்பி ஸகதா³கா³மிஅனாகா³மிமக்³கே³ஹி தனுபா⁴வேன அனவஸேஸப்பஹானேன ச காமேஸு கே³த⁴ம் வினேய்ய வினயித்வா வூபஸமேத்வா ந ஹி ஜாது க³ப்³ப⁴ஸேய்யம் புன ரேதி ஏகம்ஸேனேவ புன க³ப்³ப⁴ஸேய்யம் ந ஏதி. ஸுத்³தா⁴வாஸேஸு நிப்³ப³த்தித்வா தத்தே²வ அரஹத்தம் பாபுணித்வா பரினிப்³பா³தீதி.

ஏவம் ப⁴க³வா தே³ஸனம் ஸமாபேத்வா தே பி⁴க்கூ² ஆஹ – ‘‘க³ச்ச²த², பி⁴க்க²வே, தஸ்மிம்யேவ வனஸண்டே³ விஹரத², இமஞ்ச ஸுத்தம் மாஸஸ்ஸ அட்ட²ஸு த⁴ம்மஸ்ஸவனதி³வஸேஸு க⁴ண்டி³ம் ஆகோடேத்வா உஸ்ஸாரேத², த⁴ம்மகத²ம் கரோத² ஸாகச்ச²த² அனுமோத³த², இத³மேவ கம்மட்டா²னம் ஆஸேவத² பா⁴வேத² ப³ஹுலீகரோத², தேபி வோ அமனுஸ்ஸா தம் பே⁴ரவாரம்மணம் ந த³ஸ்ஸேஸ்ஸந்தி, அஞ்ஞத³த்து² அத்த²காமா ஹிதகாமா ப⁴விஸ்ஸந்தீ’’தி. தே ‘‘ஸாதூ⁴’’தி ப⁴க³வதோ படிஸ்ஸுணித்வா உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா தத்த² க³ந்த்வா ததா² அகம்ஸு. தே³வதாயோ ச ‘‘ப⁴த³ந்தா அம்ஹாகம் அத்த²காமா ஹிதகாமா’’தி பீதிஸோமனஸ்ஸஜாதா ஹுத்வா ஸயமேவ ஸேனாஸனம் ஸம்மஜ்ஜந்தி, உண்ஹோத³கம் படியாதே³ந்தி, பிட்டி²பரிகம்மம் பாத³பரிகம்மம் கரோந்தி, ஆரக்க²ம் ஸம்வித³ஹந்தி. தேபி பி⁴க்கூ² தமேவ மேத்தம் பா⁴வேத்வா தமேவ ச பாத³கம் கத்வா விபஸ்ஸனம் ஆரபி⁴த்வா ஸப்³பே³ தஸ்மிம்யேவ அந்தோதேமாஸே அக்³க³ப²லம் அரஹத்தம் பாபுணித்வா மஹாபவாரணாய விஸுத்³தி⁴பவாரணம் பவாரேஸுந்தி.

ஏவம்பி அத்த²குஸலேன ததா²க³தேன,

த⁴ம்மிஸ்ஸரேன கதி²தம் கரணீயமத்த²ம்;

கத்வானுபு⁴ய்ய பரமம் ஹத³யஸ்ஸ ஸந்திம்,

ஸந்தம் பத³ம் அபி⁴ஸமேந்தி ஸமத்தபஞ்ஞா.

தஸ்மா ஹி தம் அமதமப்³பு⁴தமரியகந்தம்,

ஸந்தம் பத³ம் அபி⁴ஸமேச்ச விஹரிதுகாமோ;

விஞ்ஞூ ஜனோ விமலஸீலஸமாதி⁴பஞ்ஞா-

பே⁴த³ம் கரேய்ய ஸததம் கரணீயமத்த²ந்தி.

பரமத்த²ஜோதிகாய கு²த்³த³கபாட²-அட்ட²கதா²ய

மேத்தஸுத்தவண்ணனா நிட்டி²தா.

நிக³மனகதா²

ஏத்தாவதா ச யம் வுத்தம் –

‘‘உத்தமம் வந்த³னேய்யானம், வந்தி³த்வா ரதனத்தயம்;

கு²த்³த³கானம் கரிஸ்ஸாமி, கேஸஞ்சி அத்த²வண்ணன’’ந்தி.

தத்த² ஸரணஸிக்கா²பத³த்³வத்திம்ஸாகாரகுமாரபஞ்ஹமங்க³லஸுத்தரதனஸுத்ததிரோகுட்டனிதி⁴கண்ட³மேத்தஸுத்தவஸேன நவப்பபே⁴த³ஸ்ஸ கு²த்³த³கபாட²ஸ்ஸ தாவ அத்த²வண்ணனா கதா ஹோதி. தேனேதம் வுச்சதி –

‘‘இமம் கு²த்³த³கபாட²ஸ்ஸ, கரோந்தேனத்த²வண்ணனம்;

ஸத்³த⁴ம்மட்டி²திகாமேன, யம் பத்தம் குஸலம் மயா.

தஸ்ஸானுபா⁴வதோ கி²ப்பம், த⁴ம்மே அரியப்பவேதி³தே;

வுத்³தி⁴ம் விரூள்ஹிம் வேபுல்லம், பாபுணாது அயம் ஜனோ’’தி.

பரமவிஸுத்³த⁴ஸத்³தா⁴பு³த்³தி⁴வீரியகு³ணப்படிமண்டி³தேன ஸீலாசாரஜ்ஜவமத்³த³வாதி³கு³ணஸமுத³யஸமுதி³தேன ஸகஸமயஸமயந்தரக³ஹனஜ்ஜோ²கா³ஹணஸமத்தே²ன பஞ்ஞாவேய்யத்தியஸமன்னாக³தேன திபிடகபரியத்தித⁴ம்மப்பபே⁴தே³ ஸாட்ட²கதே² ஸத்து²ஸாஸனே அப்படிஹதஞாணப்பபா⁴வேன ச²மஹாவேய்யாகரணேனச²மஹாவேய்யாகரணேன கரணஸம்பத்திஜனிதஸுக²வினிக்³க³தமது⁴ரோதா³ரவசனலாவண்ணயுத்தேன யுத்தமுத்தவாதி³னா வாதீ³வரேன மஹாகவினா ச²ளபி⁴ஞ்ஞாபடிஸம்பி⁴தா³தி³ப்பபே⁴த³கு³ணப்படிமண்டி³தே உத்தரிமனுஸ்ஸத⁴ம்மே ஸுப்பதிட்டி²தபு³த்³தீ⁴னம் தே²ரவம்ஸப்பதீ³பானம் தே²ரானம் மஹாவிஹாரவாஸீனம் வம்ஸாலங்காரபூ⁴தேன விபுலவிஸுத்³த⁴பு³த்³தி⁴னா பு³த்³த⁴கோ⁴ஸோதி க³ரூஹி க³ஹிதனாமதே⁴ய்யேன தே²ரேன கதா அயம் பரமத்த²ஜோதிகா நாம கு²த்³த³கபாட²வண்ணனா –

தாவ திட்ட²து லோகஸ்மிம், லோகனித்த²ரணேஸினம்;

த³ஸ்ஸேந்தீ குலபுத்தானம், நயம் ஸீலாதி³ஸுத்³தி⁴யா.

யாவ பு³த்³தோ⁴தி நாமம்பி, ஸுத்³த⁴சித்தஸ்ஸ தாதி³னோ;

லோகம்ஹி லோகஜேட்ட²ஸ்ஸ, பவத்ததி மஹேஸினோதி.

பரமத்த²ஜோதிகாய கு²த்³த³க-அட்ட²கதா²ய

கு²த்³த³கபாட²வண்ணனா நிட்டி²தா.