7. திரோகுட்டஸுத்தவண்ணனா

நிக்கே²பப்பயோஜனம்

இதா³னி ‘‘திரோகுட்டேஸு திட்ட²ந்தீ’’திஆதி³னா ரதனஸுத்தானந்தரம் நிக்கி²த்தஸ்ஸ திரோகுட்டஸுத்தஸ்ஸ அத்த²வண்ணனாக்கமோ அனுப்பத்தோ, தஸ்ஸ இத⁴ நிக்கே²பப்பயோஜனம் வத்வா அத்த²வண்ணனம் கரிஸ்ஸாம.

தத்த² இத³ஞ்ஹி திரோகுட்டம் இமினா அனுக்கமேன ப⁴க³வதா அவுத்தம்பி யாயம் இதோ புப்³பே³ நானப்பகாரேன குஸலகம்மபடிபத்தி த³ஸ்ஸிதா, தத்த² பமாத³ம் ஆபஜ்ஜமானோ நிரயதிரச்சா²னயோனீஹி விஸிட்ட²தரேபி டா²னே உப்பஜ்ஜமானோ யஸ்மா ஏவரூபேஸு பேதேஸு உப்பஜ்ஜதி, தஸ்மா ந ஏத்த² பமாதோ³ கரணீயோதி த³ஸ்ஸனத்த²ம், யேஹி ச பூ⁴தேஹி உபத்³து³தாய வேஸாலியா உபத்³த³வவூபஸமனத்த²ம் ரதனஸுத்தம் வுத்தம், தேஸு ஏகச்சானி ஏவரூபானீதி த³ஸ்ஸனத்த²ம் வா வுத்தந்தி.

இத³மஸ்ஸ இத⁴ நிக்கே²பப்பயோஜனம் வேதி³தப்³ப³ம்.

அனுமோத³னாகதா²

யஸ்மா பனஸ்ஸ அத்த²வண்ணனா –

‘‘யேன யத்த² யதா³ யஸ்மா, திரோகுட்டம் பகாஸிதம்;

பகாஸேத்வான தம் ஸப்³ப³ம், கயிரமானா யதா²க்கமம்;

ஸுகதா ஹோதி தஸ்மாஹம், கரிஸ்ஸாமி ததே²வ தம்’’.

கேன பனேதம் பகாஸிதம், கத்த² கதா³ கஸ்மா சாதி? வுச்சதே – ப⁴க³வதா பகாஸிதம், தம் கோ² பன ராஜக³ஹே து³தியதி³வஸே ரஞ்ஞோ மாக³த⁴ஸ்ஸ அனுமோத³னத்த²ம். இமஸ்ஸ சத்த²ஸ்ஸ விபா⁴வனத்த²ம் அயமேத்த² வித்தா²ரகதா² கதே²தப்³பா³ –

இதோ த்³வானவுதிகப்பே காஸி நாம நக³ரம் அஹோஸி. தத்த² ஜயஸேனோ நாம ராஜா. தஸ்ஸ ஸிரிமா நாம தே³வீ, தஸ்ஸா குச்சி²யம் பு²ஸ்ஸோ நாம போ³தி⁴ஸத்தோ நிப்³ப³த்தித்வா அனுபுப்³பே³ன ஸம்மாஸம்போ³தி⁴ம் அபி⁴ஸம்பு³ஜ்ஜி². ஜயஸேனோ ராஜா ‘‘மம புத்தோ அபி⁴னிக்க²மித்வா பு³த்³தோ⁴ ஜாதோ, மய்ஹமேவ பு³த்³தோ⁴, மய்ஹம் த⁴ம்மோ, மய்ஹம் ஸங்கோ⁴’’தி மமத்தம் உப்பாதே³த்வா ஸப்³ப³காலம் ஸயமேவ உபட்ட²ஹதி, ந அஞ்ஞேஸம் ஓகாஸம் தே³தி.

ப⁴க³வதோ கனிட்ட²பா⁴தரோ வேமாதிகா தயோ பா⁴தரோ சிந்தேஸும் – ‘‘பு³த்³தா⁴ நாம ஸப்³ப³லோகஹிதாய உப்பஜ்ஜந்தி, ந சேகஸ்ஸேவத்தா²ய, அம்ஹாகஞ்ச பிதா அஞ்ஞேஸம் ஓகாஸம் ந தே³தி, கத²ம் நு மயம் லபே⁴ய்யாம ப⁴க³வந்தம் உபட்டா²து’’ந்தி. தேஸம் ஏதத³ஹோஸி – ‘‘ஹந்த³ மயம் கிஞ்சி உபாயம் கரோமா’’தி. தே பச்சந்தம் குபிதம் விய காராபேஸும். ததோ ராஜா ‘‘பச்சந்தோ குபிதோ’’தி ஸுத்வா தயோபி புத்தே பச்சந்தவூபஸமனத்த²ம் பேஸேஸி. தே வூபஸமேத்வா ஆக³தா, ராஜா துட்டோ² வரம் அதா³ஸி ‘‘யம் இச்ச²த², தம் க³ண்ஹதா²’’தி. தே ‘‘மயம் ப⁴க³வந்தம் உபட்டா²தும் இச்சா²மா’’தி ஆஹம்ஸு. ராஜா ‘‘ஏதம் ட²பேத்வா அஞ்ஞம் க³ண்ஹதா²’’தி ஆஹ. தே ‘‘மயம் அஞ்ஞேன அனத்தி²கா’’தி ஆஹம்ஸு. தேன ஹி பரிச்சே²த³ம் கத்வா க³ண்ஹதா²தி. தே ஸத்த வஸ்ஸானி யாசிம்ஸு, ராஜா ந அதா³ஸி. ஏவம் ச², பஞ்ச, சத்தாரி, தீணி, த்³வே, ஏகம், ஸத்த மாஸானி, ச², பஞ்ச, சத்தாரீதி யாவ தேமாஸம் யாசிம்ஸு. ராஜா ‘‘க³ண்ஹதா²’’தி அதா³ஸி.

தே வரம் லபி⁴த்வா பரமதுட்டா² ப⁴க³வந்தம் உபஸங்கமித்வா வந்தி³த்வா ஆஹம்ஸு – ‘‘இச்சா²ம மயம், ப⁴ந்தே, ப⁴க³வந்தம் தேமாஸம் உபட்டா²தும், அதி⁴வாஸேது நோ, ப⁴ந்தே, ப⁴க³வா இமம் தேமாஸம் வஸ்ஸாவாஸ’’ந்தி. அதி⁴வாஸேஸி ப⁴க³வா துண்ஹீபா⁴வேன. ததோ தே அத்தனோ ஜனபதே³ நியுத்தகபுரிஸஸ்ஸ லேக²ம் பேஸேஸும் ‘‘இமம் தேமாஸம் அம்ஹேஹி ப⁴க³வா உபட்டா²தப்³போ³, விஹாரம் ஆதி³ம் கத்வா ஸப்³ப³ம் ப⁴க³வதோ உபட்டா²னஸம்பா⁴ரம் கரோஹீ’’தி. ஸோ தம் ஸப்³ப³ம் ஸம்பாதே³த்வா படினிவேதே³ஸி. தே காஸாயவத்த²னிவத்தா² ஹுத்வா அட்³ட⁴தேய்யேஹி புரிஸஸஹஸ்ஸேஹி வேய்யாவச்சகரேஹி ப⁴க³வந்தம் ஸக்கச்சம் உபட்ட²ஹமானா ஜனபத³ம் நேத்வா விஹாரம் நிய்யாதேத்வா வஸாபேஸும்.

தேஸம் ப⁴ண்டா³கா³ரிகோ ஏகோ க³ஹபதிபுத்தோ ஸபஜாபதிகோ ஸத்³தோ⁴ அஹோஸி பஸன்னோ. ஸோ பு³த்³த⁴ப்பமுக²ஸ்ஸ ஸங்க⁴ஸ்ஸ தா³னவத்தம் ஸக்கச்சம் அதா³ஸி. ஜனபதே³ நியுத்தகபுரிஸோ தம் க³ஹேத்வா ஜானபதே³ஹி ஏகாத³ஸமத்தேஹி புரிஸஸஹஸ்ஸேஹி ஸத்³தி⁴ம் ஸக்கச்சமேவ தா³னம் பவத்தாபேஸி. தத்த² கேசி ஜானபதா³ படிஹதசித்தா அஹேஸும். தே தா³னஸ்ஸ அந்தராயம் கத்வா தே³ய்யத⁴ம்மே அத்தனா கா²தி³ம்ஸு, ப⁴த்தஸாலஞ்ச அக்³கி³னா த³ஹிம்ஸு. பவாரிதே ராஜபுத்தா ப⁴க³வதோ மஹந்தம் ஸக்காரம் கத்வா ப⁴க³வந்தம் புரக்க²த்வா பிதுனோ ஸகாஸமேவ அக³மம்ஸு. தத்த² க³ந்த்வா ஏவ ப⁴க³வா பரினிப்³பா³யி. ராஜா ச ராஜபுத்தா ச ஜனபதே³ நியுத்தகபுரிஸோ ச ப⁴ண்டா³கா³ரிகோ ச அனுபுப்³பே³ன காலம் கத்வா ஸத்³தி⁴ம் பரிஸாய ஸக்³கே³ உப்பஜ்ஜிம்ஸு, படிஹதசித்தஜனா நிரயேஸு நிப்³ப³த்திம்ஸு. ஏவம் தேஸம் த்³வின்னம் க³ணானம் ஸக்³க³தோ ஸக்³க³ம், நிரயதோ நிரயம் உபபஜ்ஜந்தானம் த்³வானவுதிகப்பா வீதிவத்தா.

அத² இமஸ்மிம் ப⁴த்³த³கப்பே கஸ்ஸபபு³த்³த⁴ஸ்ஸ காலே தே படிஹதசித்தஜனா பேதேஸு உப்பன்னா. ததா³ மனுஸ்ஸா அத்தனோ ஞாதகானம் பேதானம் அத்தா²ய தா³னம் த³த்வா உத்³தி³ஸந்தி ‘‘இத³ம் அம்ஹாகம் ஞாதீனம் ஹோதூ’’தி. தே ஸம்பத்திம் லப⁴ந்தி. அத² இமேபி பேதா தம் தி³ஸ்வா ப⁴க³வந்தம் கஸ்ஸபம் உபஸங்கமித்வா புச்சி²ம்ஸு – ‘‘கிம் நு கோ², ப⁴ந்தே, மயம்பி ஏவரூபம் ஸம்பத்திம் லபே⁴ய்யாமா’’தி? ப⁴க³வா ஆஹ – ‘‘இதா³னி ந லப⁴த², அபிச அனாக³தே கோ³தமோ நாம பு³த்³தோ⁴ ப⁴விஸ்ஸதி, தஸ்ஸ ப⁴க³வதோ காலே பி³ம்பி³ஸாரோ நாம ராஜா ப⁴விஸ்ஸதி, ஸோ தும்ஹாகம் இதோ த்³வானவுதிகப்பே ஞாதி அஹோஸி, ஸோ பு³த்³த⁴ஸ்ஸ தா³னம் த³த்வா தும்ஹாகம் உத்³தி³ஸிஸ்ஸதி, ததா³ லபி⁴ஸ்ஸதா²’’தி. ஏவம் வுத்தே கிர தேஸம் பேதானம் தம் வசனம் ‘‘ஸ்வே லபி⁴ஸ்ஸதா²’’தி வுத்தம் விய அஹோஸி.

அத² ஏகஸ்மிம் பு³த்³த⁴ந்தரே வீதிவத்தே அம்ஹாகம் ப⁴க³வா லோகே உப்பஜ்ஜி. தேபி தயோ ராஜபுத்தா தேஹி அட்³ட⁴தேய்யேஹி புரிஸஸஹஸ்ஸேஹி ஸத்³தி⁴ம் தே³வலோகா சவித்வா மக³த⁴ரட்டே² ப்³ராஹ்மணகுலே உப்பஜ்ஜித்வா அனுபுப்³பே³ன இஸிபப்³ப³ஜ்ஜம் பப்³ப³ஜித்வா க³யாஸீஸே தயோ ஜடிலா அஹேஸும், ஜனபதே³ நியுத்தகபுரிஸோ, ராஜா அஹோஸி பி³ம்பி³ஸாரோ, ப⁴ண்டா³கா³ரிகோ, க³ஹபதி விஸாகோ² நாம மஹாஸேட்டி² அஹோஸி, தஸ்ஸ பஜாபதி த⁴ம்மதி³ன்னா நாம ஸேட்டி²தீ⁴தா அஹோஸி. ஏவம் ஸப்³பா³பி அவஸேஸா பரிஸா ரஞ்ஞோ ஏவ பரிவாரா ஹுத்வா நிப்³ப³த்தா.

அம்ஹாகம் ப⁴க³வா லோகே உப்பஜ்ஜித்வா ஸத்தஸத்தாஹம் அதிக்கமித்வா அனுபுப்³பே³ன பா³ராணஸிம் ஆக³ம்ம த⁴ம்மசக்கம் பவத்தேத்வா பஞ்சவக்³கி³யே ஆதி³ம் கத்வா யாவ அட்³ட⁴தேய்யஸஹஸ்ஸபரிவாரே தயோ ஜடிலே வினேத்வா ராஜக³ஹம் அக³மாஸி. தத்த² ச தத³ஹுபஸங்கமந்தம்யேவ ராஜானம் பி³ம்பி³ஸாரம் ஸோதாபத்திப²லே பதிட்டா²பேஸி ஏகாத³ஸனவுதேஹி மாக³த⁴கேஹி ப்³ராஹ்மணக³ஹபதிகேஹி ஸத்³தி⁴ம். அத² ரஞ்ஞா ஸ்வாதனாய ப⁴த்தேன நிமந்திதோ ப⁴க³வா அதி⁴வாஸேத்வா து³தியதி³வஸே ஸக்கேன தே³வானமிந்தே³ன புரதோ புரதோ க³ச்ச²ந்தேன –

‘‘த³ந்தோ த³ந்தேஹி ஸஹ புராணஜடிலேஹி, விப்பமுத்தோ விப்பமுத்தேஹி;

ஸிங்கீ³னிக்க²ஸவண்ணோ, ராஜக³ஹம் பாவிஸி ப⁴க³வா’’தி. (மஹாவ. 58) –

ஏவமாதீ³ஹி கா³தா²ஹி அபி⁴த்த²வியமானோ ராஜக³ஹம் பவிஸித்வா ரஞ்ஞோ நிவேஸனே மஹாதா³னம் ஸம்படிச்சி². தே பேதா ‘‘இதா³னி ராஜா அம்ஹாகம் தா³னம் உத்³தி³ஸிஸ்ஸதி, இதா³னி உத்³தி³ஸிஸ்ஸதீ’’தி ஆஸாய பரிவாரேத்வா அட்ட²ம்ஸு.

ராஜா தா³னம் த³த்வா ‘‘கத்த² நு கோ² ப⁴க³வா விஹரேய்யா’’தி ப⁴க³வதோ விஹாரட்டா²னமேவ சிந்தேஸி, ந தம் தா³னம் கஸ்ஸசி உத்³தி³ஸி. பேதா சி²ன்னாஸா ஹுத்வா ரத்திம் ரஞ்ஞோ நிவேஸனே அதிவிய பி⁴ம்ஸனகம் விஸ்ஸரமகம்ஸு. ராஜா ப⁴யஸம்வேக³ஸந்தாஸமாபஜ்ஜி, ததோ பபா⁴தாய ரத்தியா ப⁴க³வதோ ஆரோசேஸி – ‘‘ஏவரூபம் ஸத்³த³மஸ்ஸோஸிம், கிம் நு கோ² மே, ப⁴ந்தே, ப⁴விஸ்ஸதீ’’தி. ப⁴க³வா ஆஹ – ‘‘மா பா⁴யி, மஹாராஜ, ந தே கிஞ்சி பாபகம் ப⁴விஸ்ஸதி, அபிச கோ² தே புராணஞாதகா பேதேஸு உப்பன்னா ஸந்தி, தே ஏகம் பு³த்³த⁴ந்தரம் தமேவ பச்சாஸீஸமானா விசரந்தி ‘பு³த்³த⁴ஸ்ஸ தா³னம் த³த்வா அம்ஹாகம் உத்³தி³ஸிஸ்ஸதீ’தி, ந தேஸம் த்வம் ஹிய்யோ உத்³தி³ஸி, தே சி²ன்னாஸா ததா²ரூபம் விஸ்ஸரமகம்ஸூ’’தி.

ஸோ ஆஹ ‘‘இதா³னி பன, ப⁴ந்தே, தி³ன்னே லபே⁴ய்யு’’ந்தி? ‘‘ஆம, மஹாராஜா’’தி. ‘‘தேன ஹி மே, ப⁴ந்தே, அதி⁴வாஸேது ப⁴க³வா அஜ்ஜதனாய தா³னம், தேஸம் உத்³தி³ஸிஸ்ஸாமீ’’தி? ப⁴க³வா அதி⁴வாஸேஸி. ராஜா நிவேஸனம் க³ந்த்வா மஹாதா³னம் படியாதே³த்வா ப⁴க³வதோ காலம் ஆரோசாபேஸி. ப⁴க³வா ராஜந்தேபுரம் க³ந்த்வா பஞ்ஞத்தே ஆஸனே நிஸீதி³ ஸத்³தி⁴ம் பி⁴க்கு²ஸங்கே⁴ன. தேபி கோ² பேதா ‘‘அபி நாம அஜ்ஜ லபே⁴ய்யாமா’’தி க³ந்த்வா திரோகுட்டாதீ³ஸு அட்ட²ம்ஸு. ப⁴க³வா ததா² அகாஸி, யதா² தே ஸப்³பே³வ ரஞ்ஞோ பாகடா அஹேஸும். ராஜா த³க்கி²ணோத³கம் தே³ந்தோ ‘‘இத³ம் மே ஞாதீனம் ஹோதூ’’தி உத்³தி³ஸி, தங்க²ணஞ்ஞேவ தேஸம் பேதானம் பது³மஸஞ்ச²ன்னா போக்க²ரணியோ நிப்³ப³த்திம்ஸு. தே தத்த² ந்ஹத்வா ச பிவித்வா ச படிப்பஸ்ஸத்³த⁴த³ரத²கிலமத²பிபாஸா ஸுவண்ணவண்ணா அஹேஸும். ராஜா யாகு³க²ஜ்ஜகபோ⁴ஜனானி த³த்வா உத்³தி³ஸி, தங்க²ணஞ்ஞேவ தேஸம் தி³ப்³ப³யாகு³க²ஜ்ஜகபோ⁴ஜனானி நிப்³ப³த்திம்ஸு. தே தானி பரிபு⁴ஞ்ஜித்வா பீணிந்த்³ரியா அஹேஸும். அத² வத்த²ஸேனாஸனானி த³த்வா உத்³தி³ஸி. தேஸம் தி³ப்³ப³வத்த²தி³ப்³ப³யானதி³ப்³ப³பாஸாத³தி³ப்³ப³பச்சத்த²ரணதி³ப்³ப³ஸேய்யாதி³அலங்காரவித⁴யோ நிப்³ப³த்திம்ஸு. ஸாபி தேஸம் ஸம்பத்தி யதா² ஸப்³பா³வ பாகடா ஹோதி, ததா² ப⁴க³வா அதி⁴ட்டா²ஸி. ராஜா அதிவிய அத்தமனோ அஹோஸி. ததோ ப⁴க³வா பு⁴த்தாவீ பவாரிதோ ரஞ்ஞோ மாக³த⁴ஸ்ஸ அனுமோத³னத்த²ம் ‘‘திரோகுட்டேஸு திட்ட²ந்தீ’’தி இமா கா³தா² அபா⁴ஸி.

ஏத்தாவதா ச ‘‘யேன யத்த² யதா³ யஸ்மா, திரோகுட்டம் பகாஸிதம், பகாஸேத்வான தம் ஸப்³ப³’’ந்தி அயம் மாதிகா ஸங்கே²பதோ வித்தா²ரதோ ச விப⁴த்தா ஹோதி.

பட²மகா³தா²வண்ணனா

1. இதா³னி இமஸ்ஸ திரோகுட்டஸ்ஸ யதா²க்கமம் அத்த²வண்ணனம் கரிஸ்ஸாம. ஸேய்யதி²த³ம் – பட²மகா³தா²ய தாவ திரோகுட்டாதி குட்டானம் பரபா⁴கா³ வுச்சந்தி. திட்ட²ந்தீதி நிஸஜ்ஜாதி³ப்படிக்கே²பதோ டா²னகப்பனவசனமேதம். தேன யதா² பாகாரபரபா⁴க³ம் பப்³ப³தபரபா⁴க³ஞ்ச க³ச்ச²ந்தம் ‘‘திரோபாகாரம் திரோபப்³ப³தம் அஸஜ்ஜமானோ க³ச்ச²தீ’’தி வத³ந்தி, ஏவமிதா⁴பி குட்டஸ்ஸ பரபா⁴கே³ஸு திட்ட²ந்தே ‘‘திரோகுட்டேஸு திட்ட²ந்தீ’’தி ஆஹ. ஸந்தி⁴ஸிங்கா⁴டகேஸு சாதி ஏத்த² ஸந்தி⁴யோதி சதுக்கோணரச்சா² வுச்சந்தி க⁴ரஸந்தி⁴பி⁴த்திஸந்தி⁴ஆலோகஸந்தி⁴யோ சாபி. ஸிங்கா⁴டகாதி திகோணரச்சா² வுச்சந்தி, ததே³கஜ்ஜ²ம் கத்வா புரிமேன ஸத்³தி⁴ம் ஸங்க⁴டேந்தோ ‘‘ஸந்தி⁴ஸிங்கா⁴டகேஸு சா’’தி ஆஹ. த்³வாரபா³ஹாஸு திட்ட²ந்தீதி நக³ரத்³வாரக⁴ரத்³வாரானம் பா³ஹா நிஸ்ஸாய திட்ட²ந்தி. ஆக³ந்த்வான ஸகம் க⁴ரந்தி ஏத்த² ஸகம் க⁴ரம் நாம புப்³ப³ஞாதிக⁴ரம்பி அத்தனா ஸாமிகபா⁴வேன அஜ்ஜா²வுத்த²புப்³ப³க⁴ரம்பி. தது³ப⁴யம்பி யஸ்மா தே ஸகக⁴ரஸஞ்ஞாய ஆக³ச்ச²ந்தி, தஸ்மா ‘‘ஆக³ந்த்வான ஸகம் க⁴ர’’ந்தி ஆஹ.

து³தியகா³தா²வண்ணனா

2. ஏவம் ப⁴க³வா புப்³பே³ அனஜ்ஜா²வுத்த²புப்³ப³ம்பி புப்³ப³ஞாதிக⁴ரம் பி³ம்பி³ஸாரனிவேஸனம் ஸகக⁴ரஸஞ்ஞாய ஆக³ந்த்வா திரோகுட்டஸந்தி⁴ஸிங்கா⁴டகத்³வாரபா³ஹாஸு டி²தே இஸ்ஸாமச்ச²ரியப²லம் அனுப⁴வந்தே, அப்பேகச்சே தீ³க⁴மஸ்ஸுகேஸவிகாரத⁴ரே அந்த⁴காரமுகே² ஸிதி²லப³ந்த⁴னவிலம்ப³மானகிஸப²ருஸகாளகங்க³பச்சங்கே³ தத்த² தத்த² டி²தவனதா³ஹத³ட்³ட⁴தாலருக்க²ஸதி³ஸே, அப்பேகச்சே ஜிக⁴ச்சா²பிபாஸாரணினிம்மத²னேன உத³ரதோ உட்டா²ய முக²தோ வினிச்ச²ரந்தாய அக்³கி³ஜாலாய பரிட³ய்ஹமானஸரீரே, அப்பேகச்சே ஸூசிசி²த்³தா³ணுமத்தகண்ட²பி³லதாய பப்³ப³தாகாரகுச்சி²தாய ச லத்³த⁴ம்பி பானபோ⁴ஜனம் யாவத³த்த²ம் பு⁴ஞ்ஜிதும் அஸமத்த²தாய கு²ப்பிபாஸாபரேதே அஞ்ஞம் ரஸமவிந்த³மானே, அப்பேகச்சே அஞ்ஞமஞ்ஞஸ்ஸ அஞ்ஞேஸம் வா ஸத்தானம் பபி⁴ன்னக³ண்ட³பிளகமுகா² பக்³க⁴ரிதருதி⁴ரபுப்³ப³லஸிகாதி³ம் லத்³தா⁴ அமதமிவ ஸாயமானே அதிவிய து³த்³த³ஸிகவிரூபப⁴யானகஸரீரே ப³ஹூ பேதே ரஞ்ஞோ நித³ஸ்ஸேந்தோ –

‘‘திரோகுட்டேஸு திட்ட²ந்தி, ஸந்தி⁴ஸிங்கா⁴டகேஸு ச;

த்³வாரபா³ஹாஸு திட்ட²ந்தி, ஆக³ந்த்வான ஸகம் க⁴ர’’ந்தி. –

வத்வா புன தேஹி கதஸ்ஸ கம்மஸ்ஸ தா³ருணபா⁴வம் த³ஸ்ஸேந்தோ ‘‘பஹூதே அன்னபானம்ஹீ’’தி து³தியகா³த²மாஹ.

தத்த² பஹூதேதி அனப்பகே ப³ஹும்ஹி, யாவத³த்தி²கேதி வுத்தம் ஹோதி. ப⁴-காரஸ்ஸ ஹி ஹ-காரோ லப்³ப⁴தி ‘‘பஹு ஸந்தோ ந ப⁴ரதீ’’திஆதீ³ஸு (ஸு. நி. 98) விய. கேசி பன ‘‘ப³ஹூதே’’ இதி ச ‘‘ப³ஹூகே’’ இதி ச பட²ந்தி. பமாத³பாடா² ஏதே. அன்னே ச பானம்ஹி ச அன்னபானம்ஹி. க²ஜ்ஜே ச போ⁴ஜ்ஜே ச க²ஜ்ஜபோ⁴ஜ்ஜே, ஏதேன அஸிதபீதகா²யிதஸாயிதவஸேன சதுப்³பி³த⁴ம் ஆஹாரம் த³ஸ்ஸேதி. உபட்டி²தேதி உபக³ம்ம டி²தே, ஸஜ்ஜிதே படியத்தே ஸமோஹிதேதி வுத்தம் ஹோதி. ந தேஸம் கோசி ஸரதி, ஸத்தானந்தி தேஸம் பேத்திவிஸயே உப்பன்னானம் ஸத்தானம் கோசி மாதா வா பிதா வா புத்தோ வா ந ஸரதி. கிம் காரணா? கம்மபச்சயா, அத்தனா கதஸ்ஸ அதா³னதா³னப்படிஸேத⁴னாதி³பே⁴த³ஸ்ஸ கத³ரியகம்மஸ்ஸ பச்சயா. தஞ்ஹி தேஸம் கம்மம் ஞாதீனம் ஸரிதும் ந தே³தி.

ததியகா³தா²வண்ணனா

3. ஏவம் ப⁴க³வா அனப்பகேபி அன்னபானாதி³ம்ஹி பச்சுபட்டி²தே ‘‘அபி நாம அம்ஹே உத்³தி³ஸ்ஸ கிஞ்சி த³தே³ய்யு’’ந்தி ஞாதீ பச்சாஸீஸந்தானம் விசரதம் தேஸம் பேதானம் தேஹி கதஸ்ஸ அதிகடுகவிபாககரஸ்ஸ கம்மஸ்ஸ பச்சயேன கஸ்ஸசி ஞாதினோ அனுஸ்ஸரணமத்தாபா⁴வம் த³ஸ்ஸேந்தோ –

‘‘பஹூதே அன்னபானம்ஹி, க²ஜ்ஜபோ⁴ஜ்ஜே உபட்டி²தே;

ந தேஸம் கோசி ஸரதி, ஸத்தானம் கம்மபச்சயா’’தி. –

வத்வா புன ரஞ்ஞோ பேத்திவிஸயூபபன்னே ஞாதகே உத்³தி³ஸ்ஸ தி³ன்னம் தா³னம் பஸம்ஸந்தோ ‘‘ஏவம் த³த³ந்தி ஞாதீன’’ந்தி ததியகா³த²மாஹ.

தத்த² ஏவந்தி உபமாவசனம். தஸ்ஸ த்³விதா⁴ ஸம்ப³ந்தோ⁴ – தேஸம் ஸத்தானம் கம்மபச்சயா அஸரந்தேபி கிஸ்மிஞ்சி த³த³ந்தி, ஞாதீனம், யே ஏவம் அனுகம்பகா ஹோந்தீதி ச யதா² தயா, மஹாராஜ, தி³ன்னம், ஏவம் ஸுசிம் பணீதம் காலேன கப்பியம் பானபோ⁴ஜனம் த³த³ந்தி ஞாதீனம், யே ஹோந்தி அனுகம்பகாதி ச. த³த³ந்தீதி தே³ந்தி உத்³தி³ஸந்தி நிய்யாதேந்தி. ஞாதீனந்தி மாதிதோ ச பிதிதோ ச ஸம்ப³ந்தா⁴னம். யேதி யே கேசி புத்தா வா தீ⁴தரோ வா பா⁴தரோ வா ஹோந்தீதி ப⁴வந்தி. அனுகம்பகாதி அத்த²காமா ஹிதேஸினோ. ஸுசிந்தி விமலம் த³ஸ்ஸனேய்யம் மனோரமம் த⁴ம்மிகம் த⁴ம்மலத்³த⁴ம். பணீதந்தி உத்தமம் ஸேட்ட²ம். காலேனாதி ஞாதிபேதானம் திரோகுட்டாதீ³ஸு ஆக³ந்த்வா டி²தகாலேன. கப்பியந்தி அனுச்ச²விகம் பதிரூபம் அரியானம் பரிபோ⁴கா³ரஹம். பானபோ⁴ஜனந்தி பானஞ்ச போ⁴ஜனஞ்ச. இத⁴ பானபோ⁴ஜனமுகே²ன ஸப்³போ³பி தே³ய்யத⁴ம்மோ அதி⁴ப்பேதோ.

சதுத்த²கா³தா²புப்³ப³த்³த⁴வண்ணனா

4. ஏவம் ப⁴க³வா ரஞ்ஞா மாக³தே⁴ன பேதபூ⁴தானம் ஞாதீனம் அனுகம்பாய தி³ன்னம் பானபோ⁴ஜனம் பஸம்ஸந்தோ –

‘‘ஏவம் த³த³ந்தி ஞாதீனம், யே ஹோந்தி அனுகம்பகா;

ஸுசிம் பணீதம் காலேன, கப்பியம் பானபோ⁴ஜன’’ந்தி. –

வத்வா புன யேன பகாரேன தி³ன்னம் தேஸம் ஹோதி, தம் த³ஸ்ஸேந்தோ ‘‘இத³ம் வோ ஞாதீனம் ஹோதூ’’தி சதுத்த²கா³தா²ய புப்³ப³த்³த⁴மாஹ தம் ததியகா³தா²ய புப்³ப³த்³தே⁴ன ஸம்ப³ந்தி⁴தப்³ப³ம் –

‘‘ஏவம் த³த³ந்தி ஞாதீனம், யே ஹோந்தி அனுகம்பகா;

இத³ம் வோ ஞாதீனம் ஹோது, ஸுகி²தா ஹோந்து ஞாதயோ’’தி.

தேன ‘‘இத³ம் வோ ஞாதீனம் ஹோதூதி ஏவம் த³த³ந்தி, நோ அஞ்ஞதா²’’தி ஏத்த² ஆகாரத்தே²ன ஏவம்ஸத்³தே³ன தா³தப்³பா³காரனித³ஸ்ஸனம் கதம் ஹோதி.

தத்த² இத³ந்தி தே³ய்யத⁴ம்மனித³ஸ்ஸனம். வோதி ‘‘கச்சி பன வோ அனுருத்³தா⁴ ஸமக்³கா³ ஸம்மோத³மானா’’தி ச (ம. நி. 1.326; மஹாவ. 466), ‘‘யேஹி வோ அரியா’’தி ச ஏவமாதீ³ஸு விய கேவலம் நிபாதமத்தம், ந ஸாமிவசனம். ஞாதீனம் ஹோதூதி பேத்திவிஸயே உப்பன்னானம் ஞாதகானம் ஹோது. ஸுகி²தா ஹோந்து ஞாதயோதி தே பேத்திவிஸயூபபன்னா ஞாதயோ இத³ம் பச்சனுப⁴வந்தா ஸுகி²தா ஹோந்தூதி.

சதுத்த²கா³தா²பரத்³த⁴பஞ்சமகா³தா²புப்³ப³த்³த⁴வண்ணனா

4-5. ஏவம் ப⁴க³வா யேன பகாரேன பேத்திவிஸயூபபன்னானம் ஞாதீனம் தா³தப்³ப³ம், தம் த³ஸ்ஸேந்தோ ‘‘இத³ம் வோ ஞாதீனம் ஹோது, ஸுகி²தா ஹோந்து ஞாதயோ’’தி வத்வா புன யஸ்மா ‘‘இத³ம் வோ ஞாதீனம் ஹோதூ’’தி வுத்தேபி ந அஞ்ஞேன கதம் கம்மம் அஞ்ஞஸ்ஸ ப²லத³ம் ஹோதி, கேவலந்து ததா² உத்³தி³ஸ்ஸ தி³ய்யமானம் தம் வத்து² ஞாதீனம் குஸலகம்மஸ்ஸ பச்சயோ ஹோதி. தஸ்மா யதா² தேஸம் தஸ்மிம்யேவ வத்து²ஸ்மிம் தங்க²ணே ப²லனிப்³ப³த்தகம் குஸலகம்மம் ஹோதி, தம் த³ஸ்ஸேந்தோ ‘‘தே ச தத்தா²’’தி சதுத்த²கா³தா²ய பச்சி²மத்³த⁴ம் ‘‘பஹூதே அன்னபானம்ஹீ’’தி பஞ்சமகா³தா²ய புப்³ப³த்³த⁴ஞ்ச ஆஹ.

தேஸம் அத்தோ² – தே ஞாதிபேதா யத்த² தம் தா³னம் தீ³யதி, தத்த² ஸமந்ததோ ஆக³ந்த்வா ஸமாக³ந்த்வா, ஸமோதா⁴ய வா ஏகஜ்ஜ²ம் ஹுத்வாதி வுத்தம் ஹோதி, ஸம்மா ஆக³தா ஸமாக³தா ‘‘இமே நோ ஞாதயோ அம்ஹாகம் அத்தா²ய தா³னம் உத்³தி³ஸிஸ்ஸந்தீ’’தி ஏதத³த்த²ம் ஸம்மா ஆக³தா ஹுத்வாதி வுத்தம் ஹோதி. பஹூதே அன்னபானம்ஹீதி தஸ்மிம் அத்தனோ உத்³தி³ஸ்ஸமானே பஹூதே அன்னபானம்ஹி. ஸக்கச்சம் அனுமோத³ரேதி அபி⁴ஸத்³த³ஹந்தா கம்மப²லம் அவிஜஹந்தா சித்தீகாரம் அவிக்கி²த்தசித்தா ஹுத்வா ‘‘இத³ம் நோ தா³னம் ஹிதாய ஸுகா²ய ஹோதூ’’தி மோத³ந்தி அனுமோத³ந்தி, பீதிஸோமனஸ்ஸஜாதா ஹோந்தீதி.

பஞ்சமகா³தா²பரத்³த⁴ச²ட்ட²கா³தா²புப்³ப³த்³த⁴வண்ணனா

5-6. ஏவம் ப⁴க³வா யதா² பேத்திவிஸயூபபன்னானம் தங்க²ணே ப²லனிப்³ப³த்தகம் குஸலம் கம்மம் ஹோதி, தம் த³ஸ்ஸேந்தோ –

‘‘தே ச தத்த² ஸமாக³ந்த்வா, ஞாதிபேதா ஸமாக³தா;

பஹூதே அன்னபானம்ஹி, ஸக்கச்சம் அனுமோத³ரே’’தி. –

வத்வா புன ஞாதகே நிஸ்ஸாய நிப்³ப³த்தகுஸலகம்மப²லம் பச்சனுபோ⁴ந்தானம் தேஸம் ஞாதீ ஆரப்³ப⁴ தோ²மனாகாரம் த³ஸ்ஸேந்தோ ‘‘சிரம் ஜீவந்தூ’’தி பஞ்சமகா³தா²ய பச்சி²மத்³த⁴ம் ‘‘அம்ஹாகஞ்ச கதா பூஜா’’தி ச²ட்ட²கா³தா²ய புப்³ப³த்³த⁴ஞ்ச ஆஹ.

தேஸம் அத்தோ² – சிரம் ஜீவந்தூதி சிரஜீவினோ தீ³கா⁴யுகா ஹோந்து. நோ ஞாதீதி அம்ஹாகம் ஞாதகா. யேஸம் ஹேதூதி யே நிஸ்ஸாய யேஸம் காரணா. லபா⁴மஸேதி லபா⁴ம. அத்தனா தங்க²ணம் படிலத்³த⁴ஸம்பத்திம் அபதி³ஸந்தா ப⁴ணந்தி. பேதானஞ்ஹி அத்தனோ அனுமோத³னேன, தா³யகானம் உத்³தே³ஸேன, த³க்கி²ணேய்யஸம்பதா³ய சாதி தீஹி அங்கே³ஹி த³க்கி²ணா ஸமிஜ்ஜ²தி, தங்க²ணே ப²லனிப்³ப³த்திகா ஹோதி. தத்த² தா³யகா விஸேஸஹேது. தேனாஹம்ஸு ‘‘யேஸம் ஹேது லபா⁴மஸே’’தி. அம்ஹாகஞ்ச கதா பூஜாதி ‘‘இத³ம் வோ ஞாதீனம் ஹோதூ’’தி ஏவம் இமம் தா³னம் உத்³தி³ஸந்தேஹி அம்ஹாகஞ்ச பூஜா கதா. தா³யகா ச அனிப்ப²லாதி யம்ஹி ஸந்தானே பரிச்சாக³மயம் கம்மம் கதம், தஸ்ஸ தத்தே²வ ப²லதா³னதோ தா³யகா ச அனிப்ப²லாதி.

ஏத்தா²ஹ – ‘‘கிம் பன பேத்திவிஸயூபபன்னா ஏவ ஞாதயோ லப⁴ந்தி, உதா³ஹு அஞ்ஞேபி லப⁴ந்தீ’’தி? வுச்சதே – ப⁴க³வதா ஏவேதம் ப்³யாகதம் ஜாணுஸ்ஸோணினா ப்³ராஹ்மணேன புட்டே²ன, கிமேத்த² அம்ஹேஹி வத்தப்³ப³ம் அத்தி². வுத்தம் ஹேதம் –

‘‘மயமஸ்ஸு, போ⁴ கோ³தம, ப்³ராஹ்மணா நாம தா³னானி தே³ம, ஸத்³தா⁴னி கரோம ‘இத³ம் தா³னம் பேதானம் ஞாதிஸாலோஹிதானம் உபகப்பது, இத³ம் தா³னம் பேதா ஞாதிஸாலோஹிதா பரிபு⁴ஞ்ஜந்தூ’தி, கச்சி தம், போ⁴ கோ³தம, தா³னம் பேதானம் ஞாதிஸாலோஹிதானம் உபகப்பதி, கச்சி தே பேதா ஞாதிஸாலோஹிதா தம் தா³னம் பரிபு⁴ஞ்ஜந்தீதி. டா²னே கோ², ப்³ராஹ்மண, உபகப்பதி, நோ அட்டா²னேதி.

‘‘கதமம் பன தம், போ⁴ கோ³தம, டா²னம், கதமம் அட்டா²னந்தி? இத⁴, ப்³ராஹ்மண, ஏகச்சோ பாணாதிபாதீ ஹோதி…பே… மிச்சா²தி³ட்டி²கோ ஹோதி, ஸோ காயஸ்ஸ பே⁴தா³ பரம் மரணா நிரயம் உபபஜ்ஜதி. யோ நேரயிகானம் ஸத்தானம் ஆஹாரோ, தேன ஸோ தத்த² யாபேதி, தேன ஸோ தத்த² திட்ட²தி. இத³ம் கோ², ப்³ராஹ்மண, அட்டா²னம், யத்த² டி²தஸ்ஸ தம் தா³னம் ந உபகப்பதி.

‘‘இத⁴ பன, ப்³ராஹ்மண, ஏகச்சோ பாணாதிபாதீ ஹோதி…பே… மிச்சா²தி³ட்டி²கோ ஹோதி, ஸோ காயஸ்ஸ பே⁴தா³ பரம் மரணா திரச்சா²னயோனிம் உபபஜ்ஜதி. யோ திரச்சா²னயோனிகானம் ஸத்தானம் ஆஹாரோ, தேன ஸோ தத்த² யாபேதி, தேன ஸோ தத்த² திட்ட²தி. இத³ம்பி கோ², ப்³ராஹ்மண, அட்டா²னம், யத்த² டி²தஸ்ஸ தம் தா³னம் ந உபகப்பதி.

‘‘இத⁴ பன, ப்³ராஹ்மண, ஏகச்சோ பாணாதிபாதா படிவிரதோ ஹோதி…பே… ஸம்மாதி³ட்டி²கோ ஹோதி, ஸோ காயஸ்ஸ பே⁴தா³ பரம் மரணா மனுஸ்ஸானம் ஸஹப்³யதம் உபபஜ்ஜதி…பே… தே³வானம் ஸஹப்³யதம் உபபஜ்ஜதி. யோ தே³வானம் ஆஹாரோ, தேன ஸோ தத்த² யாபேதி, தேன ஸோ தத்த² திட்ட²தி. இத³ம்பி கோ², ப்³ராஹ்மண, அட்டா²னம், யத்த² டி²தஸ்ஸ தம் தா³னம் ந உபகப்பதி.

‘‘இத⁴ பன, ப்³ராஹ்மண, ஏகச்சோ பாணாதிபாதீ ஹோதி…பே… மிச்சா²தி³ட்டி²கோ ஹோதி, ஸோ காயஸ்ஸ பே⁴தா³ பரம் மரணா பேத்திவிஸயம் உபபஜ்ஜதி. யோ பேத்திவேஸயிகானம் ஸத்தானம் ஆஹாரோ, தேன ஸோ தத்த² யாபேதி, தேன ஸோ தத்த² திட்ட²தி. யம் வா பனஸ்ஸ இதோ அனுபவேச்ச²ந்தி மித்தாமச்சா வா ஞாதிஸாலோஹிதா வா, தேன ஸோ தத்த² யாபேதி, தேன ஸோ தத்த² திட்ட²தி. இத³ம் கோ², ப்³ராஹ்மண, டா²னம், யத்த² டி²தஸ்ஸ தம் தா³னம் உபகப்பதீதி.

‘‘ஸசே பன, போ⁴ கோ³தம, ஸோ பேதோ ஞாதிஸாலோஹிதோ தம் டா²னம் அனுபபன்னோ ஹோதி, கோ தம் தா³னம் பரிபு⁴ஞ்ஜதீதி? அஞ்ஞேபிஸ்ஸ, ப்³ராஹ்மண, பேதா ஞாதிஸாலோஹிதா தம் டா²னம் உபபன்னா ஹோந்தி, தே தம் தா³னம் பரிபு⁴ஞ்ஜந்தீதி.

‘‘ஸசே பன, போ⁴ கோ³தம, ஸோ சேவ பேதோ ஞாதிஸாலோஹிதோ தம் டா²னம் அனுபபன்னோ ஹோதி, அஞ்ஞேபிஸ்ஸ பேதா ஞாதிஸாலோஹிதா தம் டா²னம் அனுபபன்னா ஹோந்தி, கோ தம் தா³னம் பரிபு⁴ஞ்ஜதீதி? அட்டா²னம் கோ² ஏதம் ப்³ராஹ்மண அனவகாஸோ, யம் தம் டா²னம் விவித்தம் அஸ்ஸ இமினா தீ³கே⁴ன அத்³து⁴னா யதி³த³ம் பேதேஹி ஞாதிஸாலோஹிதேஹி. அபிச ப்³ராஹ்மண தா³யகோபி அனிப்ப²லோ’’தி (அ. நி. 10.177).

ச²ட்ட²கா³தா²பரத்³த⁴ஸத்தமகா³தா²வண்ணனா

6-7. ஏவம் ப⁴க³வா ரஞ்ஞோ மாக³த⁴ஸ்ஸ பேத்திவிஸயூபபன்னானம் புப்³ப³ஞாதீனம் ஸம்பத்திம் நிஸ்ஸாய தோ²மேந்தோ ‘‘ஏதே தே, மஹாராஜ, ஞாதீ இமாய தா³னஸம்பதா³ய அத்தமனா ஏவம் தோ²மேந்தீ’’தி த³ஸ்ஸேந்தோ –

‘‘சிரம் ஜீவந்து நோ ஞாதீ, யேஸம் ஹேது லபா⁴மஸே;

அம்ஹாகஞ்ச கதா பூஜா, தா³யகா ச அனிப்ப²லா’’தி. –

வத்வா புன தேஸம் பேத்திவிஸயூபபன்னானம் அஞ்ஞஸ்ஸ கஸிகோ³ரக்கா²தி³னோ ஸம்பத்திபடிலாப⁴காரணஸ்ஸ அபா⁴வம் இதோ தி³ன்னேன யாபனபா⁴வஞ்ச த³ஸ்ஸேந்தோ ‘‘ந ஹி தத்த² கஸீ அத்தீ²’’தி ச²ட்ட²கா³தா²ய பச்சி²மத்³த⁴ம் ‘‘வணிஜ்ஜா தாதி³ஸீ’’தி இமம் ஸத்தமகா³த²ஞ்ச ஆஹ.

தத்ராயம் அத்த²வண்ணனா – ந ஹி, மஹாராஜ, தத்த² பேத்திவிஸயே கஸி அத்தி², யம் நிஸ்ஸாய தே பேதா ஸம்பத்திம் படிலபே⁴ய்யும். கோ³ரக்கே²த்த² ந விஜ்ஜதீதி ந கேவலம் கஸி ஏவ, கோ³ரக்கா²பி ஏத்த² பேத்திவிஸயே ந விஜ்ஜதி, யம் நிஸ்ஸாய தே ஸம்பத்திம் படிலபே⁴ய்யும். வணிஜ்ஜா தாதி³ஸீ நத்தீ²தி வாணிஜ்ஜாபி தாதி³ஸீ நத்தி², யா தேஸம் ஸம்பத்திபடிலாப⁴ஹேது ப⁴வேய்ய. ஹிரஞ்ஞேன கயாகயந்தி ஹிரஞ்ஞேன கயவிக்கயம்பி தத்த² தாதி³ஸம் நத்தி², யம் தேஸம் ஸம்பத்திபடிலாப⁴ஹேது ப⁴வேய்ய. இதோ தி³ன்னேன யாபேந்தி, பேதா காலக³தா தஹிந்தி கேவலம் பன இதோ ஞாதீஹி வா மித்தாமச்சேஹி வா தி³ன்னேன யாபேந்தி, அத்தபா⁴வம் க³மேந்தி. பேதாதி பேத்திவிஸயூபபன்னா ஸத்தா. காலக³தாதி அத்தனோ மரணகாலேன க³தா, ‘‘காலகதா’’தி வா பாடோ², கதகாலா கதமரணாதி அத்தோ². தஹிந்தி தஸ்மிம் பேத்திவிஸயே.

அட்ட²மனவமகா³தா²த்³வயவண்ணனா

8-9. ஏவம் ‘‘இதோ தி³ன்னேன யாபேந்தி, பேதா காலக³தா தஹி’’ந்தி வத்வா இதா³னி உபமாஹி தமத்த²ம் பகாஸேந்தோ ‘‘உன்னமே உத³கம் வுட்ட²’’ந்தி இத³ம் கா³தா²த்³வயமாஹ.

தஸ்ஸத்தோ² – யதா² உன்னதே த²லே உஸ்ஸாதே³ பூ⁴மிபா⁴கே³ மேகே⁴ஹி அபி⁴வுட்ட²ம் உத³கம் நின்னம் பவத்ததி, யோ யோ பூ⁴மிபா⁴கோ³ நின்னோ ஓணதோ, தம் தம் பவத்ததி க³ச்ச²தி பாபுணாதி, ஏவமேவ இதோ தி³ன்னம் தா³னம் பேதானம் உபகப்பதி நிப்³ப³த்ததி, பாதுப⁴வதீதி அத்தோ². நின்னமிவ ஹி உத³கப்பவத்தியா டா²னம் பேதலோகோ தா³னுபகப்பனாய. யதா²ஹ – ‘‘இத³ம் கோ², ப்³ராஹ்மண, டா²னம், யத்த² டி²தஸ்ஸ தம் தா³னம் உபகப்பதீ’’தி (அ. நி. 10.177). யதா² ச கந்த³ரபத³ரஸாகா²பஸாக²குஸோப்³ப⁴மஹாஸோப்³ப⁴ஸன்னிபாதேஹி வாரிவஹா மஹானஜ்ஜோ பூரா ஹுத்வா ஸாக³ரம் பரிபூரேந்தி, ஏவம்பி இதோ தி³ன்னதா³னம் புப்³பே³ வுத்தனயேனேவ பேதானம் உபகப்பதீதி.

த³ஸமகா³தா²வண்ணனா

10. ஏவம் ப⁴க³வா ‘‘இதோ தி³ன்னேன யாபேந்தி, பேதா காலக³தா தஹி’’ந்தி இமம் அத்த²ம் உபமாஹி பகாஸேத்வா புன யஸ்மா தே பேதா ‘‘இதோ கிஞ்சி லச்சா²மா’’தி ஆஸாபி⁴பூ⁴தா ஞாதிக⁴ரம் ஆக³ந்த்வாபி ‘‘இத³ம் நாம நோ தே³தா²’’தி யாசிதும் அஸமத்தா², தஸ்மா தேஸம் இமானி அனுஸ்ஸரணவத்தூ²னி அனுஸ்ஸரந்தோ குலபுத்தோ த³க்கி²ணம் த³ஜ்ஜாதி த³ஸ்ஸேந்தோ ‘‘அதா³ஸி மே’’தி இமம் கா³த²மாஹ.

தஸ்ஸத்தோ² – ‘‘இத³ம் நாம மே த⁴னம் வா த⁴ஞ்ஞம் வா அதா³ஸீ’’தி ச, ‘‘இத³ம் நாம மே கிச்சம் அத்தனா உய்யோக³மாபஜ்ஜந்தோ அகாஸீ’’தி ச, ‘‘அமு மே மாதிதோ வா பிதிதோ வா ஸம்ப³ந்த⁴த்தா ஞாதீ’’தி ச ஸினேஹவஸேன தாணஸமத்த²தாய ‘‘மித்தா’’தி ச, ‘‘அஸுகோ மே ஸஹ பம்ஸுகீளகோ ஸகா²’’தி ச ஏவம் ஸப்³ப³மனுஸ்ஸரந்தோ பேதானம் த³க்கி²ணம் த³ஜ்ஜா, தா³னம் நிய்யாதேய்யாதி. அபரோ பாடோ² ‘‘பேதானம் த³க்கி²ணா த³ஜ்ஜா’’தி. தஸ்ஸத்தோ² – தா³தப்³பா³தி த³ஜ்ஜா. கா ஸா? பேதானம் த³க்கி²ணா, தேனேவ ‘‘அதா³ஸி மே’’திஆதி³னா நயேன புப்³பே³ கதமனுஸ்ஸரம் அனுஸ்ஸரதாதி வுத்தம் ஹோதி. கரணவசனப்பஸங்கே³ பச்சத்தவசனம் வேதி³தப்³ப³ம்.

ஏகாத³ஸமகா³தா²வண்ணனா

11. ஏவம் ப⁴க³வா பேதானம் த³க்கி²ணானிய்யாதனே காரணபூ⁴தானி அனுஸ்ஸரணவத்தூ²னி த³ஸ்ஸேந்தோ –

‘‘அதா³ஸி மே அகாஸி மே, ஞாதிமித்தா ஸகா² ச மே;

பேதானம் த³க்கி²ணம் த³ஜ்ஜா, புப்³பே³ கதமனுஸ்ஸர’’ந்தி. –

வத்வா புன யே ஞாதிமரணேன ருண்ணஸோகாதி³பரா ஏவ ஹுத்வா திட்ட²ந்தி, ந தேஸம் அத்தா²ய கிஞ்சி தே³ந்தி, தேஸம் தம் ருண்ணஸோகாதி³ கேவலம் அத்தபரிதாபனமேவ ஹோதி, ந பேதானம் கிஞ்சி அத்த²ம் நிப்பா²தே³தீதி த³ஸ்ஸேந்தோ ‘‘ந ஹி ருண்ணம் வா’’தி இமம் கா³த²மாஹ.

தத்த² ருண்ணந்தி ரோத³னா ரோதி³தத்தம் அஸ்ஸுபாதனம், ஏதேன காயபரிஸ்ஸமம் த³ஸ்ஸேதி. ஸோகோதி ஸோசனா ஸோசிதத்தம், ஏதேன சித்தபரிஸ்ஸமம் த³ஸ்ஸேதி. யா சஞ்ஞாதி யா ச ருண்ணஸோகேஹி அஞ்ஞா. பரிதே³வனாதி ஞாதிப்³யஸனேன பு²ட்ட²ஸ்ஸ லாலப்பனா, ‘‘கஹம் ஏகபுத்தக பிய மனாபா’’தி ஏவமாதி³னா நயேன கு³ணஸம்வண்ணனா, ஏதேன வசீபரிஸ்ஸமம் த³ஸ்ஸேதி.

த்³வாத³ஸமகா³தா²வண்ணனா

12. ஏவம் ப⁴க³வா ‘‘ருண்ணம் வா ஸோகோ வா யா சஞ்ஞா பரிதே³வனா, ஸப்³ப³ம்பி தம் பேதானம் அத்தா²ய ந ஹோதி, கேவலந்து அத்தானம் பரிதாபனமத்தமேவ, ஏவம் திட்ட²ந்தி ஞாதயோ’’தி ருண்ணாதீ³னம் நிரத்த²கபா⁴வம் த³ஸ்ஸேத்வா புன மாக³த⁴ராஜேன யா த³க்கி²ணா தி³ன்னா, தஸ்ஸா ஸாத்த²கபா⁴வம் த³ஸ்ஸேந்தோ ‘‘அயஞ்ச கோ² த³க்கி²ணா’’தி இமம் கா³த²மாஹ.

தஸ்ஸத்தோ² – அயஞ்ச கோ², மஹாராஜ, த³க்கி²ணா தயா அஜ்ஜ அத்தனோ ஞாதிக³ணம் உத்³தி³ஸ்ஸ தி³ன்னா, ஸா யஸ்மா ஸங்கோ⁴ அனுத்தரம் புஞ்ஞக்கே²த்தம் லோகஸ்ஸ, தஸ்மா ஸங்க⁴ம்ஹி ஸுப்பதிட்டி²தா அஸ்ஸ பேதஜனஸ்ஸ தீ³க⁴ரத்தம் ஹிதாய உபகப்பதி ஸம்பஜ்ஜதி ப²லதீதி வுத்தம் ஹோதி. உபகப்பதீதி ச டா²னஸோ உபகப்பதி, தம்க²ணம்யேவ உபகப்பதி, ந சிரேன. யதா² ஹி தம்க²ணஞ்ஞேவ படிப⁴ந்தம் ‘‘டா²னஸோவேதம் ததா²க³தம் படிபா⁴தீ’’தி வுச்சதி, ஏவமிதா⁴பி தம்க²ணம்யேவ உபகப்பந்தா ‘‘டா²னஸோ உபகப்பதீ’’தி வுத்தா. யம் வா தம் ‘‘இத³ம் கோ², ப்³ராஹ்மண, டா²னம், யத்த² டி²தஸ்ஸ தம் தா³னம் உபகப்பதீ’’தி (அ. நி. 10.177) வுத்தம், தத்த² கு²ப்பிபாஸிகவந்தாஸபரத³த்தூபஜீவினிஜ்ஜா²மதண்ஹிகாதி³பே⁴த³பி⁴ன்னே டா²னே உபகப்பதீதி வுத்தம் யதா² கஹாபணம் தே³ந்தோ ‘‘கஹாபணஸோ தே³தீ’’தி லோகே வுச்சதி. இமஸ்மிஞ்ச அத்த²விகப்பே உபகப்பதீதி பாதுப⁴வதி, நிப்³ப³த்ததீதி வுத்தம் ஹோதி.

தேரஸமகா³தா²வண்ணனா

13. ஏவம் ப⁴க³வா ரஞ்ஞா தி³ன்னாய த³க்கி²ணாய ஸாத்த²கபா⁴வம் த³ஸ்ஸேந்தோ –

‘‘அயஞ்ச கோ² த³க்கி²ணா தி³ன்னா, ஸங்க⁴ம்ஹி ஸுப்பதிட்டி²தா;

தீ³க⁴ரத்தம் ஹிதாயஸ்ஸ, டா²னஸோ உபகப்பதீ’’தி. –

வத்வா புன யஸ்மா இமம் த³க்கி²ணம் தே³ந்தேன ஞாதீனம் ஞாதீஹி கத்தப்³ப³கிச்சகரணவஸேன ஞாதித⁴ம்மோ நித³ஸ்ஸிதோ, ப³ஹுஜனஸ்ஸ பாகடீகதோ, நித³ஸ்ஸனம் வா கதோ, தும்ஹேஹிபி ஞாதீனம் ஏவமேவ ஞாதீஹி கத்தப்³ப³கிச்சகரணவஸேன ஞாதித⁴ம்மோ பரிபூரேதப்³போ³, ந நிரத்த²கேஹி ருண்ணாதீ³ஹி அத்தா பரிதாபேதப்³போ³தி ச பேதே தி³ப்³ப³ஸம்பத்திம் அதி⁴க³மேந்தேன பேதானம் பூஜா கதா உளாரா, பு³த்³த⁴ப்பமுக²ஞ்ச பி⁴க்கு²ஸங்க⁴ம் அன்னபானாதீ³ஹி ஸந்தப்பேந்தேன பி⁴க்கூ²னம் ப³லம் அனுபதி³ன்னம், அனுகம்பாதி³கு³ணபரிவாரஞ்ச சாக³சேதனம் நிப்³ப³த்தேந்தேன அனப்பகம் புஞ்ஞம் பஸுதம், தஸ்மா ப⁴க³வா இமேஹி யதா²பு⁴ச்சகு³ணேஹி ராஜானம் ஸம்பஹம்ஸேந்தோ –

‘‘ஸோ ஞாதித⁴ம்மோ ச அயம் நித³ஸ்ஸிதோ,

பேதான பூஜா ச கதா உளாரா;

ப³லஞ்ச பி⁴க்கூ²னமனுப்பதி³ன்னம்,

தும்ஹேஹி புஞ்ஞம் பஸுதம் அனப்பக’’ந்தி. –

இமாய கா³தா²ய தே³ஸனம் பரியோஸாபேதி.

அத² வா ‘‘ஸோ ஞாதித⁴ம்மோ ச அயம் நித³ஸ்ஸிதோ’’தி இமினா கா³தா²பதே³ன ப⁴க³வா ராஜானம் த⁴ம்மியா கதா²ய ஸந்த³ஸ்ஸேதி. ஞாதித⁴ம்மனித³ஸ்ஸனமேவ ஹி ஏத்த² ஸந்த³ஸ்ஸனம் பேதான பூஜா ச கதா உளாராதி இமினா ஸமாத³பேதி. உளாராதி பஸம்ஸனமேவ ஹி ஏத்த² புனப்புனம் பூஜாகரணே ஸமாத³பனம். ப³லஞ்ச பி⁴க்கூ²னமனுப்பதி³ன்னந்தி இமினா ஸமுத்தேஜேதி. ப³லானுப்பதா³னமேவ ஹி ஏத்த² ஏவம் தா³னம், ப³லானுப்பதா³னதாதி தஸ்ஸ உஸ்ஸாஹவட்³ட⁴னேன ஸமுத்தேஜனம். தும்ஹேஹி புஞ்ஞம் பஸுதம் அனப்பகந்தி இமினா ஸம்பஹம்ஸேதி. புஞ்ஞப்பஸுதகித்தனமேவ ஹி ஏத்த² தஸ்ஸ யதா²பு⁴ச்சகு³ணஸம்வண்ணனபா⁴வேன ஸம்பஹம்ஸனஜனனதோ ஸம்பஹம்ஸனந்தி வேதி³தப்³ப³ம்.

தே³ஸனாபரியோஸானே ச பேத்திவிஸயூபபத்திஆதீ³னவஸம்வண்ணனேன ஸம்விக்³கா³னம் யோனிஸோ பத³ஹதம் சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி. து³தியதி³வஸேபி ப⁴க³வா தே³வமனுஸ்ஸானம் இத³மேவ திரோகுட்டம் தே³ஸேஸி, ஏவம் யாவ ஸத்தமதி³வஸா தாதி³ஸோ ஏவ த⁴ம்மாபி⁴ஸமயோ அஹோஸீதி.

பரமத்த²ஜோதிகாய கு²த்³த³கபாட²-அட்ட²கதா²ய

திரோகுட்டஸுத்தவண்ணனா நிட்டி²தா.