6. ரதனஸுத்தவண்ணனா

நிக்கே²பப்பயோஜனம்

இதா³னி யானீத⁴ பூ⁴தானீதிஏவமாதி³னா மங்க³லஸுத்தானந்தரம் நிக்கி²த்தஸ்ஸ ரதனஸுத்தஸ்ஸ அத்த²வண்ணனாக்கமோ அனுப்பத்தோ. தஸ்ஸ இத⁴ நிக்கே²பப்பயோஜனம் வத்வா ததோ பரம் ஸுபரிஸுத்³தே⁴ன தித்தே²ன நதி³தளாகாதீ³ஸு ஸலிலஜ்ஜோ²கா³ஹணமிவ ஸுபரிஸுத்³தே⁴ன நிதா³னேன இமஸ்ஸ ஸுத்தஸ்ஸ அத்த²ஜ்ஜோ²கா³ஹணம் த³ஸ்ஸேதும் –

‘‘யேன வுத்தம் யதா³ யத்த², யஸ்மா சேதம் இமம் நயம்;

பகாஸேத்வான ஏதஸ்ஸ, கரிஸ்ஸாமத்த²வண்ணனம்’’.

தத்த² யஸ்மா மங்க³லஸுத்தேன அத்தரக்கா² அகல்யாணகரணகல்யாணாகரணபச்சயானஞ்ச ஆஸவானம் படிகா⁴தோ த³ஸ்ஸிதோ, இமஞ்ச ஸுத்தம் பராரக்க²ம் அமனுஸ்ஸாதி³பச்சயானஞ்ச ஆஸவானம் படிகா⁴தம் ஸாதே⁴தி, தஸ்மா தத³னந்தரம் நிக்கி²த்தம் ஸியாதி.

இத³ம் தாவஸ்ஸ இத⁴ நிக்கே²பப்பயோஜனம்.

வேஸாலிவத்து²

இதா³னி ‘‘யேன வுத்தம் யதா³ யத்த², யஸ்மா சேத’’ந்தி ஏத்தா²ஹ ‘‘கேன பனேதம் ஸுத்தம் வுத்தம், கதா³ கத்த², கஸ்மா ச வுத்த’’ந்தி. வுச்சதே – இத³ஞ்ஹி ப⁴க³வதா ஏவ வுத்தம், ந ஸாவகாதீ³ஹி. தஞ்ச யதா³ து³ப்³பி⁴க்கா²தீ³ஹி உபத்³த³வேஹி உபத்³து³தாய வேஸாலியா லிச்ச²வீஹி ராஜக³ஹதோ யாசித்வா ப⁴க³வா வேஸாலிம் ஆனீதோ, ததா³ வேஸாலியம் தேஸம் உபத்³த³வானம் படிகா⁴தத்தா²ய வுத்தந்தி. அயம் தேஸம் பஞ்ஹானம் ஸங்கே²பவிஸ்ஸஜ்ஜனா. வித்தா²ரதோ பன வேஸாலிவத்து²தோ பபு⁴தி போராணேஹி வண்ணீயதி.

தத்ராயம் வண்ணனா – பா³ராணஸிரஞ்ஞோ கிர அக்³க³மஹேஸியா குச்சி²ம்ஹி க³ப்³போ⁴ ஸண்டா²ஸி, ஸா தம் ஞத்வா ரஞ்ஞோ நிவேதே³ஸி, ராஜா க³ப்³ப⁴பரிஹாரம் அதா³ஸி. ஸா ஸம்மா பரிஹரியமானக³ப்³பா⁴ க³ப்³ப⁴பரிபாககாலே விஜாயனக⁴ரம் பாவிஸி. புஞ்ஞவதீனம் பச்சூஸஸமயே க³ப்³ப⁴வுட்டா²னம் ஹோதி. ஸா ச தாஸம் அஞ்ஞதரா, தேன பச்சூஸஸமயே அலத்தகபடலப³ந்து⁴ஜீவகபுப்ப²ஸதி³ஸம் மம்ஸபேஸிம் விஜாயி. ததோ ‘‘அஞ்ஞா தே³வியோ ஸுவண்ணபி³ம்ப³ஸதி³ஸே புத்தே விஜாயந்தி, அக்³க³மஹேஸீ மம்ஸபேஸிந்தி ரஞ்ஞோ புரதோ மம அவண்ணோ உப்பஜ்ஜேய்யா’’தி சிந்தேத்வா தேன அவண்ணப⁴யேன தம் மம்ஸபேஸிம் ஏகஸ்மிம் பா⁴ஜனே பக்கி²பித்வா அஞ்ஞதரேன படிகுஜ்ஜித்வா ராஜமுத்³தி³காய லஞ்சி²த்வா க³ங்கா³ய ஸோதே பக்கி²பாபேஸி. மனுஸ்ஸேஹி ச²ட்³டி³தமத்தே தே³வதா ஆரக்க²ம் ஸம்வித³ஹிம்ஸு. ஸுவண்ணபட்டகஞ்சேத்த² ஜாதிஹிங்கு³லகேன ‘‘பா³ராணஸிரஞ்ஞோ அக்³க³மஹேஸியா பஜா’’தி லிகி²த்வா ப³ந்தி⁴ம்ஸு. ததோ தம் பா⁴ஜனம் ஊமிப⁴யாதீ³ஹி அனுபத்³து³தம் க³ங்கா³ஸோதேன பாயாஸி.

தேன ச ஸமயேன அஞ்ஞதரோ தாபஸோ கோ³பாலகுலம் நிஸ்ஸாய க³ங்கா³தீரே விஹரதி. ஸோ பாதோவ க³ங்க³ம் ஓதரந்தோ பா⁴ஜனம் ஆக³ச்ச²ந்தம் தி³ஸ்வா பம்ஸுகூலஸஞ்ஞாய அக்³க³ஹேஸி. ததோ தத்த² தம் அக்க²ரபட்டகம் ராஜமுத்³தி³காலஞ்ச²னஞ்ச தி³ஸ்வா முஞ்சித்வா தம் மம்ஸபேஸிம் அத்³த³ஸ, தி³ஸ்வானஸ்ஸ ஏதத³ஹோஸி ‘‘ஸியா க³ப்³போ⁴, ததா² ஹிஸ்ஸ து³க்³க³ந்த⁴பூதிபா⁴வோ நத்தீ²’’தி. தம் அஸ்ஸமம் நேத்வா ஸுத்³தே⁴ ஓகாஸே ட²பேஸி. அத² அட்³ட⁴மாஸச்சயேன த்³வே மம்ஸபேஸியோ அஹேஸும். தாபஸோ தி³ஸ்வா ஸாது⁴தரம் ட²பேஸி, ததோ புன அட்³ட⁴மாஸச்சயேன ஏகமேகிஸ்ஸா பேஸியா ஹத்த²பாத³ஸீஸானமத்தா²ய பஞ்ச பஞ்ச பிளகா உட்ட²ஹிம்ஸு. தாபஸோ தி³ஸ்வா புன ஸாது⁴தரம் ட²பேஸி. அத² அட்³ட⁴மாஸச்சயேன ஏகா மம்ஸபேஸி ஸுவண்ணபி³ம்ப³ஸதி³ஸோ தா³ரகோ, ஏகா தா³ரிகா அஹோஸி. தேஸு தாபஸஸ்ஸ புத்தஸினேஹோ உப்பஜ்ஜி. அங்கு³ட்ட²கதோ சஸ்ஸ கீ²ரம் நிப்³ப³த்தி. ததோ பபு⁴தி ச கீ²ரப⁴த்தம் லப⁴தி, ஸோ ப⁴த்தம் பு⁴ஞ்ஜித்வா கீ²ரம் தா³ரகானம் முகே² ஆஸிஞ்சதி. தேஸம் யம் யம் உத³ரம் பவிட்ட²ம், தம் ஸப்³ப³ம் மணிபா⁴ஜனக³தம் விய தி³ஸ்ஸதி. ஏவம் லிச்ச²வீ அஹேஸும். அபரே பனாஹு ‘‘ஸிப்³பே³த்வா ட²பிதா விய நேஸம் அஞ்ஞமஞ்ஞம் லீனா ச²வி அஹோஸீ’’தி. ஏவம் தே நிச்ச²விதாய வா லீனச்ச²விதாய வா லிச்ச²வீதி பஞ்ஞாயிம்ஸு.

தாபஸோ தா³ரகே போஸேந்தோ உஸ்ஸூரே கா³மம் பிண்டா³ய பவிஸதி, அதிதி³வா படிக்கமதி. தஸ்ஸ தம் ப்³யாபாரம் ஞத்வா கோ³பாலகா ஆஹம்ஸு, ‘‘ப⁴ந்தே, பப்³ப³ஜிதானம் தா³ரகபோஸனம் பலிபோ³தோ⁴, அம்ஹாகம் தா³ரகே தே³த², மயம் போஸேஸ்ஸாம, தும்ஹே அத்தனோ கம்மம் கரோதா²’’தி. தாபஸோ ‘‘ஸாதூ⁴’’தி படிஸ்ஸுணி. கோ³பாலகா து³தியதி³வஸே மக்³க³ம் ஸமம் கத்வா புப்பே²ஹி ஓகிரித்வா த⁴ஜபடாகம் உஸ்ஸாபேத்வா தூரியேஹி வஜ்ஜமானேஹி அஸ்ஸமம் ஆக³தா. தாபஸோ ‘‘மஹாபுஞ்ஞா தா³ரகா, அப்பமாதே³ன வட்³டே⁴த², வட்³டே⁴த்வா ச அஞ்ஞமஞ்ஞம் ஆவாஹவிவாஹம் கரோத², பஞ்சகோ³ரஸேன ராஜானம் தோஸேத்வா பூ⁴மிபா⁴க³ம் க³ஹேத்வா நக³ரம் மாபேத², தத்த² குமாரம் அபி⁴ஸிஞ்சதா²’’தி வத்வா தா³ரகே அதா³ஸி. தே ‘‘ஸாதூ⁴’’தி படிஸ்ஸுணித்வா தா³ரகே நேத்வா போஸேஸும்.

தா³ரகா வுட்³டி⁴மன்வாய கீளந்தா விவாத³ட்டா²னேஸு அஞ்ஞே கோ³பாலதா³ரகே ஹத்தே²னபி பாதே³னபி பஹரந்தி, தே ரோத³ந்தி. ‘‘கிஸ்ஸ ரோத³தா²’’தி ச மாதாபிதூஹி வுத்தா ‘‘இமே நிம்மாதாபிதிகா தாபஸபோஸிதா அம்ஹே அதீவ பஹரந்தீ’’தி வத³ந்தி. ததோ தேஸம் மாதாபிதரோ ‘‘இமே தா³ரகா அஞ்ஞே தா³ரகே விஹேடே²ந்தி து³க்கா²பேந்தி, ந இமே ஸங்க³ஹேதப்³பா³, வஜ்ஜிதப்³பா³ இமே’’தி ஆஹம்ஸு. ததோ பபு⁴தி கிர ஸோ பதே³ஸோ ‘‘வஜ்ஜீ’’தி வுச்சதி, தியோஜனஸதம் பரிமாணேன. அத² தம் பதே³ஸம் கோ³பாலகா ராஜானம் தோஸேத்வா அக்³க³ஹேஸும். தத்தே²வ நக³ரம் மாபேத்வா ஸோளஸவஸ்ஸுத்³தே³ஸிகம் குமாரம் அபி⁴ஸிஞ்சித்வா ராஜானம் அகம்ஸு. தாய சஸ்ஸ தா³ரிகாய ஸத்³தி⁴ம் வாரேய்யம் கத்வா கதிகம் அகம்ஸு ‘‘ந பா³ஹிரதோ தா³ரிகா ஆனேதப்³பா³, இதோ தா³ரிகா ந கஸ்ஸசி தா³தப்³பா³’’தி. தேஸம் பட²மஸம்வாஸேன த்³வே தா³ரகா ஜாதா தீ⁴தா ச புத்தோ ச, ஏவம் ஸோளஸக்க²த்தும் த்³வே த்³வே ஜாதா. ததோ தேஸம் தா³ரகானம் யதா²க்கமம் வட்³ட⁴ந்தானம் ஆராமுய்யானனிவாஸட்டா²னபரிவாரஸம்பத்திம் க³ஹேதும் அப்பஹோந்தம் தம் நக³ரம் திக்க²த்தும் கா³வுதந்தரேன கா³வுதந்தரேன பாகாரேன பரிக்கி²பிம்ஸு, தஸ்ஸ புனப்புனம் விஸாலீகதத்தா வேஸாலீத்வேவ நாமம் ஜாதம். இத³ம் வேஸாலிவத்து².

ப⁴க³வதோ நிமந்தனம்

அயம் பன வேஸாலீ ப⁴க³வதோ உப்பன்னகாலே இத்³தா⁴ வேபுல்லப்பத்தா அஹோஸி. தத்த² ஹி ராஜூனம்யேவ ஸத்த ஸஹஸ்ஸானி ஸத்த ஸதானி ஸத்த ச ராஜானோ அஹேஸும். ததா² யுவராஜஸேனாபதிப⁴ண்டா³கா³ரிகப்பபு⁴தீனம். யதா²ஹ –

‘‘தேன கோ² பன ஸமயேன வேஸாலீ இத்³தா⁴ சேவ ஹோதி பீ²தா ச ப³ஹுஜனா ஆகிண்ணமனுஸ்ஸா ஸுபி⁴க்கா² ச, ஸத்த ச பாஸாத³ஸஹஸ்ஸானி ஸத்த ச பாஸாத³ஸதானி ஸத்த ச பாஸாதா³, ஸத்த ச கூடாகா³ரஸஹஸ்ஸானி ஸத்த ச கூடாகா³ரஸதானி ஸத்த ச கூடாகா³ரானி, ஸத்த ச ஆராமஸஹஸ்ஸானி ஸத்த ச ஆராமஸதானி ஸத்த ச ஆராமா, ஸத்த ச போக்க²ரணிஸஹஸ்ஸானி ஸத்த ச போக்க²ரணிஸதானி ஸத்த ச போக்க²ரணியோ’’தி (மஹாவ. 326).

ஸா அபரேன ஸமயேன து³ப்³பி⁴க்கா² அஹோஸி து³ப்³பு³ட்டி²கா து³ஸ்ஸஸ்ஸா. பட²மம் து³க்³க³தமனுஸ்ஸா மரந்தி, தே ப³ஹித்³தா⁴ ச²ட்³டே³ந்தி. மதமனுஸ்ஸானம் குணபக³ந்தே⁴ன அமனுஸ்ஸா நக³ரம் பவிஸிம்ஸு, ததோ ப³ஹுதரா மரந்தி. தாய படிகூலதாய ஸத்தானம் அஹிவாதரோகோ³ உப்பஜ்ஜி. இதி தீஹி து³ப்³பி⁴க்க²அமனுஸ்ஸரோக³ப⁴யேஹி உபத்³து³தா வேஸாலினக³ரவாஸினோ உபஸங்கமித்வா ராஜானம் ஆஹம்ஸு, ‘‘மஹாராஜ, இமஸ்மிம் நக³ரே திவித⁴ம் ப⁴யமுப்பன்னம், இதோ புப்³பே³ யாவ ஸத்தமா ராஜகுலபரிவட்டா ஏவரூபம் அனுப்பன்னபுப்³ப³ம், தும்ஹாகம் மஞ்ஞே அத⁴ம்மிகத்தேன தம் ஏதரஹி உப்பன்ன’’ந்தி. ராஜா ஸப்³பே³ ஸந்தா²கா³ரே ஸன்னிபாதாபேத்வா ‘‘மய்ஹம் அத⁴ம்மிகபா⁴வம் விசினதா²’’தி ஆஹ. தே ஸப்³ப³ம் பவேணிம் விசினந்தா ந கிஞ்சி அத்³த³ஸம்ஸு.

ததோ ரஞ்ஞோ தோ³ஸமதி³ஸ்வா ‘‘இத³ம் ப⁴யம் அம்ஹாகம் கத²ம் வூபஸமேய்யா’’தி சிந்தேஸும். தத்த² ஏகச்சே ச² ஸத்தா²ரே அபதி³ஸிம்ஸு ‘‘ஏதேஹி ஓக்கந்தமத்தே வூபஸமேஸ்ஸதீ’’தி. ஏகச்சே ஆஹம்ஸு – ‘‘பு³த்³தோ⁴ கிர லோகே உப்பன்னோ, ஸோ ப⁴க³வா ஸப்³ப³ஸத்தஹிதாய த⁴ம்மம் தே³ஸேதி மஹித்³தி⁴கோ மஹானுபா⁴வோ, தேன ஓக்கந்தமத்தே ஸப்³ப³ப⁴யானி வூபஸமேய்யு’’ந்தி. தேன தே அத்தமனா ஹுத்வா ‘‘கஹம் பன ஸோ ப⁴க³வா ஏதரஹி விஹரதி, அம்ஹேஹி பேஸிதோ ந ஆக³ச்சே²ய்யா’’தி ஆஹம்ஸு. அதா²பரே ஆஹம்ஸு – ‘‘பு³த்³தா⁴ நாம அனுகம்பகா, கிஸ்ஸ நாக³ச்சே²ய்யும், ஸோ பன ப⁴க³வா ஏதரஹி ராஜக³ஹே விஹரதி, ராஜா பி³ம்பி³ஸாரோ தம் உபட்ட²ஹதி, ஸோ ஆக³ந்தும் ந த³தே³ய்யா’’தி. ‘‘தேன ஹி ராஜானம் ஸஞ்ஞாபேத்வா ஆனேய்யாமா’’தி த்³வே லிச்ச²விராஜானோ மஹதா ப³லகாயேன பஹூதம் பண்ணாகாரம் த³த்வா ரஞ்ஞோ ஸந்திகம் பேஸிம்ஸு ‘‘பி³ம்பி³ஸாரம் ஸஞ்ஞாபேத்வா ப⁴க³வந்தம் ஆனேதா²’’தி. தே க³ந்த்வா ரஞ்ஞோ பண்ணாகாரம் த³த்வா தம் பவத்திம் நிவேதே³த்வா, ‘‘மஹாராஜ, ப⁴க³வந்தம் அம்ஹாகம் நக³ரம் பேஸேஹீ’’தி ஆஹம்ஸு. ராஜா ந ஸம்படிச்சி², ‘‘தும்ஹேயேவ ஜானாதா²’’தி ஆஹ. தே ப⁴க³வந்தம் உபஸங்கமித்வா வந்தி³த்வா ஏவமாஹம்ஸு – ‘‘ப⁴ந்தே, அம்ஹாகம் நக³ரே தீணி ப⁴யானி உப்பன்னானி, ஸசே ப⁴க³வா ஆக³ச்சே²ய்ய, ஸோத்தி² நோ ப⁴வேய்யா’’தி. ப⁴க³வா ஆவஜ்ஜேத்வா ‘‘வேஸாலியம் ரதனஸுத்தே வுத்தே ஸா ரக்கா² கோடிஸதஸஹஸ்ஸம் சக்கவாளானம் ப²ரிஸ்ஸதி, ஸுத்தபரியோஸானே சதுராஸீதியா பாணஸஹஸ்ஸானம் த⁴ம்மாபி⁴ஸமயோ ப⁴விஸ்ஸதீ’’தி அதி⁴வாஸேஸி. அத² ராஜா பி³ம்பி³ஸாரோ ப⁴க³வதோ அதி⁴வாஸனம் ஸுத்வா ‘‘ப⁴க³வதா வேஸாலிக³மனம் அதி⁴வாஸித’’ந்தி நக³ரே கோ⁴ஸனம் காராபேத்வா ப⁴க³வந்தம் உபஸங்கமித்வா ஆஹ – ‘‘கிம், ப⁴ந்தே, ஸம்படிச்ச²த² வேஸாலிக³மன’’ந்தி? ஆம, மஹாராஜாதி. தேன ஹி, ப⁴ந்தே, தாவ ஆக³மேத², யாவ மக்³க³ம் படியாதே³மீதி.

அத² கோ² ராஜா பி³ம்பி³ஸாரோ ராஜக³ஹஸ்ஸ ச க³ங்கா³ய ச அந்தரா பஞ்சயோஜனபூ⁴மிம் ஸமம் கத்வா யோஜனே யோஜனே விஹாரம் மாபேத்வா ப⁴க³வதோ க³மனகாலம் படிவேதே³ஸி. ப⁴க³வா பஞ்சஹி பி⁴க்கு²ஸதேஹி பரிவுதோ பாயாஸி. ராஜா பஞ்சயோஜனம் மக்³க³ம் பஞ்சவண்ணேஹி புப்பே²ஹி ஜாணுமத்தம் ஓகிராபேத்வா த⁴ஜபடாகபுண்ணக⁴டகத³லிஆதீ³னி உஸ்ஸாபேத்வா ப⁴க³வதோ த்³வே ஸேதச்ச²த்தானி ஏகமேகஸ்ஸ ச பி⁴க்கு²ஸ்ஸ ஏகமேகம் உக்கி²பாபேத்வா ஸத்³தி⁴ம் அத்தனோ பரிவாரேன புப்ப²க³ந்தா⁴தீ³ஹி பூஜம் கரோந்தோ ஏகேகஸ்மிம் விஹாரே ப⁴க³வந்தம் வஸாபேத்வா மஹாதா³னானி த³த்வா பஞ்சஹி தி³வஸேஹி க³ங்கா³தீரம் நேஸி. தத்த² ஸப்³பா³லங்காரேஹி நாவம் அலங்கரோந்தோ வேஸாலிகானம் ஸாஸனம் பேஸேஸி ‘‘ஆக³தோ ப⁴க³வா, மக்³க³ம் படியாதே³த்வா ஸப்³பே³ ப⁴க³வதோ பச்சுக்³க³மனம் கரோதா²’’தி. தே ‘‘தி³கு³ணம் பூஜம் கரிஸ்ஸாமா’’தி வேஸாலியா ச க³ங்கா³ய ச அந்தரா தியோஜனபூ⁴மிம் ஸமம் கத்வா ப⁴க³வதோ சத்தாரி ஏகமேகஸ்ஸ ச பி⁴க்கு²ஸ்ஸ த்³வே த்³வே ஸேதச்ச²த்தானி ஸஜ்ஜேத்வா பூஜம் குருமானா க³ங்கா³தீரம் ஆக³ந்த்வா அட்ட²ம்ஸு.

அத² பி³ம்பி³ஸாரோ த்³வே நாவாயோ ஸங்க⁴டேத்வா மண்ட³பம் கத்வா புப்ப²தா³மாதீ³ஹி அலங்கரித்வா தத்த² ஸப்³ப³ரதனமயம் பு³த்³தா⁴ஸனம் பஞ்ஞபேஸி, ப⁴க³வா தத்த² நிஸீதி³. பஞ்ச ஸதா பி⁴க்கூ²பி நாவம் ஆருஹித்வா யதா²னுரூபம் நிஸீதி³ம்ஸு. ராஜா ப⁴க³வந்தம் அனுக³ச்ச²ந்தோ க³லப்பமாணம் உத³கம் ஓகா³ஹேத்வா ‘‘யாவ, ப⁴ந்தே, ப⁴க³வா ஆக³ச்ச²தி, தாவாஹம் இதே⁴வ க³ங்கா³தீரே வஸிஸ்ஸாமீ’’தி வத்வா நிவத்தோ. உபரி தே³வதா யாவ அகனிட்ட²ப⁴வனா பூஜம் அகம்ஸு. ஹேட்டா²க³ங்கா³னிவாஸினோ கம்ப³லஸ்ஸதராத³யோ நாக³ராஜானோ பூஜம் அகம்ஸு. ஏவம் மஹதியா பூஜாய ப⁴க³வா யோஜனமத்தம் அத்³தா⁴னம் க³ங்கா³ய க³ந்த்வா வேஸாலிகானம் ஸீமந்தரம் பவிட்டோ².

ததோ லிச்ச²விராஜானோ பி³ம்பி³ஸாரேன கதபூஜாய தி³கு³ணம் கரோந்தா க³லப்பமாணே உத³கே ப⁴க³வந்தம் பச்சுக்³க³ச்சி²ம்ஸு. தேனேவ க²ணேன தேன முஹுத்தேன விஜ்ஜுப்பபா⁴வினத்³த⁴ந்த⁴காரவிஸடகூடோ க³ளக³ளாயந்தோ சதூஸு தி³ஸாஸு மஹாமேகோ⁴ வுட்டா²ஸி. அத² ப⁴க³வதா பட²மபாதே³ க³ங்கா³தீரே நிக்கி²த்தமத்தே போக்க²ரவஸ்ஸம் வஸ்ஸி. யே தேமேதுகாமா, தே ஏவ தேமேந்தி, அதேமேதுகாமா ந தேமேந்தி. ஸப்³ப³த்த² ஜாணுமத்தம் ஊருமத்தம் கடிமத்தம் க³லப்பமாணம் உத³கம் வஹதி, ஸப்³ப³குணபானி உத³கேன க³ங்க³ம் பவேஸிதானி, பரிஸுத்³தோ⁴ பூ⁴மிபா⁴கோ³ அஹோஸி.

லிச்ச²விராஜானோ ப⁴க³வந்தம் அந்தரா யோஜனே யோஜனே வாஸாபேத்வா மஹாதா³னானி த³த்வா தீஹி தி³வஸேஹி தி³கு³ணம் பூஜம் கரோந்தா வேஸாலிம் நயிம்ஸு. வேஸாலிம் ஸம்பத்தே ப⁴க³வதி ஸக்கோ தே³வானமிந்தோ³ தே³வஸங்க⁴புரக்க²தோ ஆக³ச்சி². மஹேஸக்கா²னம் தே³வதானம் ஸன்னிபாதேன அமனுஸ்ஸா யேபு⁴ய்யேன பலாயிம்ஸு. ப⁴க³வா நக³ரத்³வாரே ட²த்வா ஆனந்த³த்தே²ரம் ஆமந்தேஸி – ‘‘இமம், ஆனந்த³, ரதனஸுத்தம் உக்³க³ஹேத்வா ப³லிகம்மூபகரணானி க³ஹேத்வா லிச்ச²விராஜகுமாரேஹி ஸத்³தி⁴ம் வேஸாலியா திபாகாரந்தரே விசரந்தோ பரித்தம் கரோஹீ’’தி ரதனஸுத்தம் அபா⁴ஸி. ‘‘ஏவம் கேன பனேதம் ஸுத்தம் வுத்தம், கதா³, கத்த², கஸ்மா ச வுத்த’’ந்தி ஏதேஸம் பஞ்ஹானம் விஸ்ஸஜ்ஜனா வித்தா²ரேன வேஸாலிவத்து²தோ பபு⁴தி போராணேஹி வண்ணீயதி.

ஏவம் ப⁴க³வதோ வேஸாலிம் அனுப்பத்ததி³வஸேயேவ வேஸாலினக³ரத்³வாரே தேஸம் உபத்³த³வானம் படிகா⁴தத்தா²ய வுத்தமித³ம் ரதனஸுத்தம் உக்³க³ஹேத்வா ஆயஸ்மா ஆனந்தோ³ பரித்தத்தா²ய பா⁴ஸமானோ ப⁴க³வதோ பத்தேன உத³கமாதா³ய ஸப்³ப³னக³ரம் அப்³பு⁴க்கிரந்தோ அனுவிசரி. யம் கிஞ்சீதி வுத்தமத்தே ஏவ தே²ரேன யே புப்³பே³ அபலாதா ஸங்காரகூடபி⁴த்திப்பதே³ஸாதி³னிஸ்ஸிதா அமனுஸ்ஸா, தே சதூஹி த்³வாரேஹி பலாயிம்ஸு, த்³வாரானி அனோகாஸானி அஹேஸும். ததோ ஏகச்சே த்³வாரேஸு ஓகாஸம் அலப⁴மானா பாகாரம் பி⁴ந்தி³த்வா பலாதா. அமனுஸ்ஸேஸு க³தமத்தேஸு மனுஸ்ஸானம் க³த்தேஸு ரோகோ³ வூபஸந்தோ. தே நிக்க²மித்வா ஸப்³ப³புப்ப²க³ந்தா⁴தீ³ஹி தே²ரம் பூஜேஸும். மஹாஜனோ நக³ரமஜ்ஜே² ஸந்தா²கா³ரம் ஸப்³ப³க³ந்தே⁴ஹி லிம்பித்வா விதானம் கத்வா ஸப்³பா³லங்காரேஹி அலங்கரித்வா தத்த² பு³த்³தா⁴ஸனம் பஞ்ஞபேத்வா ப⁴க³வந்தம் ஆனேஸி.

ப⁴க³வா ஸந்தா²கா³ரம் பவிஸித்வா பஞ்ஞத்தே ஆஸனே நிஸீதி³. பி⁴க்கு²ஸங்கோ⁴பி கோ² ராஜானோ மனுஸ்ஸா ச பதிரூபே பதிரூபே ஆஸனே நிஸீதி³ம்ஸு. ஸக்கோபி தே³வானமிந்தோ³ த்³வீஸு தே³வலோகேஸு தே³வபரிஸாய ஸத்³தி⁴ம் உபனிஸீதி³ அஞ்ஞே ச தே³வா, ஆனந்த³த்தே²ரோபி ஸப்³ப³ம் வேஸாலிம் அனுவிசரந்தோ ரக்க²ம் கத்வா வேஸாலினக³ரவாஸீஹி ஸத்³தி⁴ம் ஆக³ந்த்வா ஏகமந்தம் நிஸீதி³. தத்த² ப⁴க³வா ஸப்³பே³ஸம் ததே³வ ரதனஸுத்தம் அபா⁴ஸீதி.

ஏத்தாவதா ச யா ‘‘யேன வுத்தம் யதா³ யத்த², யஸ்மா சேதம் இமம் நயம். பகாஸேத்வானா’’தி மாதிகா நிக்கி²த்தா, ஸா ஸப்³ப³ப்பகாரேன வித்தா²ரிதா ஹோதி.

யானீதா⁴திகா³தா²வண்ணனா

1. இதா³னி ‘‘ஏதஸ்ஸ கரிஸ்ஸாமத்த²வண்ணன’’ந்தி வுத்தத்தா அத்த²வண்ணனா ஆரப்³ப⁴தே. அபரே பன வத³ந்தி ‘‘ஆதி³தோ பஞ்சேவ கா³தா² ப⁴க³வதா வுத்தா, ஸேஸா பரித்தகரணஸமயே ஆனந்த³த்தே²ரேனா’’தி. யதா² வா ததா² வா ஹோது, கிம் நோ இமாய பரிக்கா²ய, ஸப்³ப³தா²பி ஏதஸ்ஸ ரதனஸுத்தஸ்ஸ கரிஸ்ஸாமத்த²வண்ணனம்.

யானீத⁴ பூ⁴தானீதி பட²மகா³தா². தத்த² யானீதி யாதி³ஸானி அப்பேஸக்கா²னி வா மஹேஸக்கா²னி வா. இதா⁴தி இமஸ்மிம் பதே³ஸே, தஸ்மிம் க²ணே ஸன்னிபாதட்டா²னம் ஸந்தா⁴யாஹ. பூ⁴தானீதி கிஞ்சாபி பூ⁴தஸத்³தோ³ ‘‘பூ⁴தஸ்மிம் பாசித்திய’’ந்தி ஏவமாதீ³ஸு (பாசி. 69) விஜ்ஜமானே. ‘‘பூ⁴தமித³ந்தி, பி⁴க்க²வே, ஸமனுபஸ்ஸதா²’’தி ஏவமாதீ³ஸு (ம. நி. 1.401) க²ந்த⁴பஞ்சகே. ‘‘சத்தாரோ கோ², பி⁴க்கு², மஹாபூ⁴தா ஹேதூ’’தி ஏவமாதீ³ஸு (ம. நி. 3.86) சதுப்³பி³தே⁴ பத²வீதா⁴த்வாதி³ரூபே. ‘‘யோ ச காலக⁴ஸோ பூ⁴தோ’’தி ஏவமாதீ³ஸு (ஜா. 1.2.190) கீ²ணாஸவே. ‘‘ஸப்³பே³வ நிக்கி²பிஸ்ஸந்தி, பூ⁴தா லோகே ஸமுஸ்ஸய’’ந்தி ஏவமாதீ³ஸு (தீ³. நி. 2.220) ஸப்³ப³ஸத்தே. ‘‘பூ⁴தகா³மபாதப்³யதாயா’’தி ஏவமாதீ³ஸு (பாசி. 90) ருக்கா²தி³கே. ‘‘பூ⁴தம் பூ⁴ததோ ஸஞ்ஜானாதீ’’தி ஏவமாதீ³ஸு (ம. நி. 1.3) சாதுமஹாராஜிகானம் ஹேட்டா² ஸத்தனிகாயம் உபாதா³ய வத்ததி. இத⁴ பன அவிஸேஸதோ அமனுஸ்ஸேஸு த³ட்ட²ப்³போ³.

ஸமாக³தானீதி ஸன்னிபதிதானி. பு⁴ம்மானீதி பூ⁴மியம் நிப்³ப³த்தானி. வா-இதி விகப்பனே. தேன யானீத⁴ பு⁴ம்மானி வா பூ⁴தானி ஸமாக³தானீதி இமமேகம் விகப்பம் கத்வா புன து³தியவிகப்பம் காதும் ‘‘யானி வ அந்தலிக்கே²’’தி ஆஹ. அந்தலிக்கே² வா யானி பூ⁴தானி நிப்³ப³த்தானி, தானி ஸப்³பா³னி இத⁴ ஸமாக³தானீதி அத்தோ². ஏத்த² ச யாமதோ யாவ அகனிட்ட²ம், தாவ நிப்³ப³த்தானி பூ⁴தானி ஆகாஸே பாதுபூ⁴தவிமானேஸு நிப்³ப³த்தத்தா ‘‘அந்தலிக்கே² பூ⁴தானீ’’தி வேதி³தப்³பா³னி. ததோ ஹேட்டா² ஸினேருதோ பபு⁴தி யாவ பூ⁴மியம் ருக்க²லதாதீ³ஸு அதி⁴வத்தா²னி பத²வியஞ்ச நிப்³ப³த்தானி பூ⁴தானி, தானி ஸப்³பா³னி பூ⁴மியம் பூ⁴மிபடிப³த்³தே⁴ஸு ச ருக்க²லதாபப்³ப³தாதீ³ஸு நிப்³ப³த்தத்தா ‘‘பு⁴ம்மானி பூ⁴தானீ’’தி வேதி³தப்³பா³னி.

ஏவம் ப⁴க³வா ஸப்³பா³னேவ அமனுஸ்ஸபூ⁴தானி ‘‘பு⁴ம்மானி வா யானி வ அந்தலிக்கே²’’தி த்³வீஹி பதே³ஹி விகப்பேத்வா புன ஏகேன பதே³ன பரிக்³க³ஹேத்வா த³ஸ்ஸேதும் ‘‘ஸப்³பே³வ பூ⁴தா ஸுமனா ப⁴வந்தூ’’தி ஆஹ. ஸப்³பே³தி அனவஸேஸா. ஏவாதி அவதா⁴ரணே, ஏகம்பி அனபனேத்வாதி அதி⁴ப்பாயோ. பூ⁴தாதி அமனுஸ்ஸா. ஸுமனா ப⁴வந்தூதி ஸுகி²தமனா பீதிஸோமனஸ்ஸஜாதா ப⁴வந்து. அதோ²பீதி கிச்சந்தரஸன்னியோஜனத்த²ம் வாக்யோபாதா³னே நிபாதத்³வயம். ஸக்கச்ச ஸுணந்து பா⁴ஸிதந்தி அட்டி²ம் கத்வா மனஸிகத்வா ஸப்³ப³ம் சேதஸா ஸமன்னாஹரித்வா தி³ப்³ப³ஸம்பத்திலோகுத்தரஸுகா²வஹம் மம தே³ஸனம் ஸுணந்து.

ஏவமேத்த² ப⁴க³வா ‘‘யானீத⁴ பூ⁴தானி ஸமாக³தானீ’’தி அனியமிதவசனேன பூ⁴தானி பரிக்³க³ஹேத்வா புன ‘‘பு⁴ம்மானி வா யானி வ அந்தலிக்கே²’’தி த்³விதா⁴ விகப்பேத்வா ததோ ‘‘ஸப்³பே³வ பூ⁴தா’’தி புன ஏகஜ்ஜ²ம் கத்வா ‘‘ஸுமனா ப⁴வந்தூ’’தி இமினா வசனேன ஆஸயஸம்பத்தியம் நியோஜேந்தோ ‘‘ஸக்கச்ச ஸுணந்து பா⁴ஸித’’ந்தி பயோக³ஸம்பத்தியம், ததா² யோனிஸோமனஸிகாரஸம்பத்தியம் பரதோகோ⁴ஸஸம்பத்தியஞ்ச, ததா² அத்தஸம்மாபணிதி⁴ஸப்புரிஸூபனிஸ்ஸயஸம்பத்தீஸு ஸமாதி⁴பஞ்ஞாஹேதுஸம்பத்தீஸு ச நியோஜேந்தோ கா³த²ம் ஸமாபேஸி.

தஸ்மா ஹீதிகா³தா²வண்ணனா

2. தஸ்மா ஹி பூ⁴தாதி து³தியகா³தா². தத்த² தஸ்மாதி காரணவசனம். பூ⁴தாதி ஆமந்தனவசனம். நிஸாமேதா²தி ஸுணாத². ஸப்³பே³தி அனவஸேஸா. கிம் வுத்தம் ஹோதி? யஸ்மா தும்ஹே தி³ப்³ப³ட்டா²னானி தத்த² உபபோ⁴க³பரிபோ⁴க³ஸம்பத³ஞ்ச பஹாய த⁴ம்மஸ்ஸவனத்த²ம் இத⁴ ஸமாக³தா, ந நடனச்சனாதி³த³ஸ்ஸனத்த²ம், தஸ்மா ஹி பூ⁴தா நிஸாமேத² ஸப்³பே³தி. அத² வா ‘‘ஸுமனா ப⁴வந்து, ஸக்கச்ச ஸுணந்தூ’’தி வசனேன தேஸம் ஸுமனபா⁴வம் ஸக்கச்சம் ஸோதுகம்யதஞ்ச தி³ஸ்வா ஆஹ ‘‘யஸ்மா தும்ஹே ஸுமனபா⁴வேன அத்தஸம்மாபணிதி⁴யோனிஸோமனஸிகாராஸயஸுத்³தீ⁴ஹி ஸக்கச்சம் ஸோதுகம்யதாய ஸப்புரிஸூபனிஸ்ஸயபரதோகோ⁴ஸபத³ட்டா²னதோ பயோக³ஸுத்³தீ⁴ஹி ச யுத்தா, தஸ்மா ஹி பூ⁴தா நிஸாமேத² ஸப்³பே³’’தி. அத² வா யம் புரிமகா³தா²ய அந்தே ‘‘பா⁴ஸித’’ந்தி வுத்தம், தம் காரணபா⁴வேன அபதி³ஸந்தோ ஆஹ ‘‘யஸ்மா மம பா⁴ஸிதம் நாம அதிது³ல்லப⁴ம் அட்ட²க்க²ணபரிவஜ்ஜிதஸ்ஸ க²ணஸ்ஸ து³ல்லப⁴த்தா, அனேகானிஸம்ஸஞ்ச பஞ்ஞாகருணாகு³ணேன பவத்தத்தா, தஞ்சாஹம் வத்துகாமோ ‘ஸுணந்து பா⁴ஸித’ந்தி அவோசம், தஸ்மா ஹி பூ⁴தா நிஸாமேத² ஸப்³பே³’’தி. இத³ம் இமினா கா³தா²பதே³ன வுத்தம் ஹோதி.

ஏவமேதம் காரணம் நிரோபேந்தோ அத்தனோ பா⁴ஸிதனிஸாமனே நியோஜேத்வா நிஸாமேதப்³ப³ம் வத்துமாரத்³தோ⁴ ‘‘மேத்தம் கரோத² மானுஸியா பஜாயா’’தி. தஸ்ஸத்தோ² – யாயம் தீஹி உபத்³த³வேஹி உபத்³து³தா மானுஸீ பஜா, தஸ்ஸா மானுஸியா பஜாய மேத்தம் மித்தபா⁴வம் ஹிதஜ்ஜா²ஸயதம் பச்சுபட்ட²பேதா²தி. கேசி பன ‘‘மானுஸிகம் பஜ’’ந்தி பட²ந்தி, தம் பு⁴ம்மத்தா²ஸம்ப⁴வா ந யுஜ்ஜதி. யம்பி அஞ்ஞே அத்த²ம் வண்ணயந்தி, ஸோபி ந யுஜ்ஜதி. அதி⁴ப்பாயோ பனேத்த² – நாஹம் பு³த்³தோ⁴தி இஸ்ஸரியப³லேன வதா³மி, அபி து யம் தும்ஹாகஞ்ச இமிஸ்ஸா ச மானுஸியா பஜாய ஹிதத்த²ம் வதா³மி ‘‘மேத்தம் கரோத² மானுஸியா பஜாயா’’தி. ஏத்த² ச –

‘‘யே ஸத்தஸண்ட³ம் பத²விம் விஜேத்வா,

ராஜிஸயோ யஜமானானுபரியகா³;

அஸ்ஸமேத⁴ம் புரிஸமேத⁴ம்,

ஸம்மாபாஸம் வாஜபேய்யம் நிரக்³க³ளம்.

‘‘மேத்தஸ்ஸ சித்தஸ்ஸ ஸுபா⁴விதஸ்ஸ,

கலம்பி தே நானுப⁴வந்தி ஸோளஸிம்;

ஏகம்பி சே பாணமது³ட்ட²சித்தோ,

மேத்தாயதி குஸலோ தேன ஹோதி.

‘‘ஸப்³பே³ ச பாணே மனஸானுகம்பீ, பஹூதமரியோ பகரோதி புஞ்ஞ’’ந்தி. (இதிவு. 27; அ. நி. 8.1) –

ஏவமாதீ³னம் ஸுத்தானம் ஏகாத³ஸானிஸம்ஸானஞ்ச வஸேன யே மேத்தம் கரோந்தி, ஏதேஸம் மேத்தா ஹிதாதி வேதி³தப்³பா³.

‘‘தே³வதானுகம்பிதோ போஸோ, ஸதா³ ப⁴த்³ரானி பஸ்ஸதீ’’தி. (உதா³. 76; மஹாவ. 286) –

ஏவமாதீ³னம் ஸுத்தானம் வஸேன யேஸு கயிரதி, தேஸம்பி ஹிதாதி வேதி³தப்³பா³.

ஏவம் உப⁴யேஸம்பி ஹிதபா⁴வம் த³ஸ்ஸேந்தோ ‘‘மேத்தம் கரோத² மானுஸியா’’தி வத்வா இதா³னி உபகாரம்பி த³ஸ்ஸேந்தோ ஆஹ ‘‘தி³வா ச ரத்தோ ச ஹரந்தி யே ப³லிம், தஸ்மா ஹி நே ரக்க²த² அப்பமத்தா’’தி. தஸ்ஸத்தோ² – யே மனுஸ்ஸா சித்தகம்மகட்ட²கம்மாதீ³ஹிபி தே³வதா கத்வா சேதியருக்கா²தீ³னி ச உபஸங்கமித்வா தே³வதா உத்³தி³ஸ்ஸ தி³வா ப³லிம் கரோந்தி, காலபக்கா²தீ³ஸு ச ரத்திம் ப³லிம் கரோந்தி, ஸலாகப⁴த்தாதீ³னி வா த³த்வா ஆரக்க²தே³வதா உபாதா³ய யாவ ப்³ரஹ்மதே³வதானம் பத்திதா³னனிய்யாதனேன தி³வா ப³லிம் கரோந்தி, ச²த்தாரோபனதீ³பமாலாய ஸப்³ப³ரத்திகத⁴ம்மஸ்ஸவனாதீ³னி காராபேத்வா பத்திதா³னனிய்யாதனேன ச ரத்திம் ப³லிம் கரோந்தி, தே கத²ம் ந ரக்கி²தப்³பா³? யதோ ஏவம் தி³வா ச ரத்தோ ச தும்ஹே உத்³தி³ஸ்ஸ கரோந்தி யே ப³லிம், தஸ்மா ஹி நே ரக்க²த²; தஸ்மா ப³லிகம்மகரணாபி தே மனுஸ்ஸே ரக்க²த² கோ³பயத², அஹிதம் நேஸம் அபனேத², ஹிதம் உபனேத² அப்பமத்தா ஹுத்வா தம் கதஞ்ஞுபா⁴வம் ஹத³யே கத்வா நிச்சமனுஸ்ஸரந்தாதி.

யம்கிஞ்சீதிகா³தா²வண்ணனா

3. ஏவம் தே³வதாஸு மனுஸ்ஸானம் உபகாரகபா⁴வம் த³ஸ்ஸேத்வா தேஸம் உபத்³த³வவூபஸமனத்த²ம் பு³த்³தா⁴தி³கு³ணப்பகாஸனேன ச தே³வமனுஸ்ஸானம் த⁴ம்மஸ்ஸவனத்த²ம் ‘‘யம்கிஞ்சி வித்த’’ந்திஆதி³னா நயேன ஸச்சவசனம் பயுஞ்ஜிதுமாரத்³தோ⁴. தத்த² யம்கிஞ்சீதி அனியமிதவஸேன அனவஸேஸம் பரியாதி³யதி யம்கிஞ்சி தத்த² தத்த² வோஹாரூபக³ம். வித்தந்தி த⁴னம். தஞ்ஹி வித்திம் ஜனேதீதி வித்தம். இத⁴ வாதி மனுஸ்ஸலோகம் நித்³தி³ஸதி. ஹுரம் வாதி ததோ பரம் அவஸேஸலோகம், தேன ச ட²பேத்வா மனுஸ்ஸே ஸப்³ப³லோகக்³க³ஹணே பத்தே ‘‘ஸக்³கே³ஸு வா’’தி பரதோ வுத்தத்தா ட²பேத்வா மனுஸ்ஸே ச ஸக்³கே³ ச அவஸேஸானம் நாக³ஸுபண்ணாதீ³னம் க³ஹணம் வேதி³தப்³ப³ம்.

ஏவம் இமேஹி த்³வீஹி பதே³ஹி யம் மனுஸ்ஸானம் வோஹாரூபக³ம் அலங்காரபரிபோ⁴கூ³பக³ஞ்ச ஜாதரூபரஜதமுத்தாமணிவேளுரியபவாளலோஹிதங்கமஸாரக³ல்லாதி³கம், யஞ்ச முத்தாமணிவாலுகத்த²தாய பூ⁴மியா ரதனமயவிமானேஸு அனேகயோஜனஸதவித்த²தேஸு ப⁴வனேஸு உப்பன்னானம் நாக³ஸுபண்ணாதீ³னம் வித்தம், தம் நித்³தி³ட்ட²ம் ஹோதி. ஸக்³கே³ஸு வாதி காமாவசரரூபாவசரதே³வலோகேஸு. தே ஹி ஸோப⁴னேன கம்மேன அஜீயந்தீதி ஸக்³கா³. ஸுட்டு² அக்³கா³திபி ஸக்³கா³. யந்தி யம் ஸஸாமிகம் வா அஸாமிகம் வா. ரதனந்தி ரதிம் நயதி வஹதி ஜனயதி வட்³டே⁴தீதி ரதனம். யம்கிஞ்சி சித்தீகதம் மஹக்³க⁴ம் அதுலம் து³ல்லப⁴த³ஸ்ஸனம் அனோமஸத்தபரிபோ⁴க³ஞ்ச, தஸ்ஸேதம் அதி⁴வசனம். யதா²ஹ –

‘‘சித்தீகதம் மஹக்³க⁴ஞ்ச, அதுலம் து³ல்லப⁴த³ஸ்ஸனம்;

அனோமஸத்தபரிபோ⁴க³ம், ரதனம் தேன வுச்சதீ’’தி.

பணீதந்தி உத்தமம் ஸேட்ட²ம் அதப்பகம். ஏவம் இமினா கா³தா²பதே³ன யம் ஸக்³கே³ஸு அனேகயோஜனஸதப்பமாணஸப்³ப³ரதனமயவிமானஸுத⁴ம்மவேஜயந்தப்பபு⁴தீஸு ஸஸாமிகம், யஞ்ச பு³த்³து⁴ப்பாத³விரஹேன அபாயமேவ பரிபூரேந்தேஸு ஸத்தேஸு ஸுஞ்ஞவிமானப்படிப³த்³த⁴ம் அஸாமிகம், யம் வா பனஞ்ஞம்பி பத²விமஹாஸமுத்³த³ஹிமவந்தாதி³னிஸ்ஸிதமஸாமிகம் ரதனம், தம் நித்³தி³ட்ட²ம் ஹோதி.

ந நோ ஸமம் அத்தி² ததா²க³தேனாதி ந-இதி படிஸேதே⁴. நோ-இதி அவதா⁴ரணே. ஸமந்தி துல்யம். அத்தீ²தி விஜ்ஜதி. ததா²க³தேனாதி பு³த்³தே⁴ன. கிம் வுத்தம் ஹோதி? யம் ஏதம் வித்தஞ்ச ரதனஞ்ச பகாஸிதம், ஏத்த² ஏகம்பி பு³த்³த⁴ரதனேன ஸதி³ஸம் ரதனம் நேவத்தி². யம்பி ஹி தம் சித்தீகதட்டே²ன ரதனம், ஸேய்யதி²த³ம் – ரஞ்ஞோ சக்கவத்திஸ்ஸ சக்கரதனம் மணிரதனஞ்ச, யம்ஹி உப்பன்னே மஹாஜனோ ந அஞ்ஞத்த² சித்தீகாரம் கரோதி, ந கோசி புப்ப²க³ந்தா⁴தீ³னி க³ஹேத்வா யக்க²ட்டா²னம் வா பூ⁴தட்டா²னம் வா க³ச்ச²தி, ஸப்³போ³பி ஜனோ சக்கரதனமணிரதனமேவ சித்தீகாரம் கரோதி பூஜேதி, தம் தம் வரம் பத்தே²தி, பத்தி²தபத்தி²தஞ்சஸ்ஸ ஏகச்சம் ஸமிஜ்ஜ²தி, தம்பி ரதனம் பு³த்³த⁴ரதனேன ஸமம் நத்தி². யதி³ ஹி சித்தீகதட்டே²ன ரதனம், ததா²க³தோவ ரதனம். ததா²க³தே ஹி உப்பன்னே யே கேசி மஹேஸக்கா² தே³வமனுஸ்ஸா ந தே அஞ்ஞத்ர சித்தீகாரம் கரோந்தி, ந கஞ்சி அஞ்ஞம் பூஜேந்தி. ததா² ஹி ப்³ரஹ்மா ஸஹம்பதி ஸினேருமத்தேன ரதனதா³மேன ததா²க³தம் பூஜேஸி, யதா²ப³லஞ்ச அஞ்ஞே தே³வா மனுஸ்ஸா ச பி³ம்பி³ஸாரகோஸலராஜஅனாத²பிண்டி³காத³யோ. பரினிப்³பு³தம்பி ப⁴க³வந்தம் உத்³தி³ஸ்ஸ ச²ன்னவுதிகோடித⁴னம் விஸ்ஸஜ்ஜேத்வா அஸோகமஹாராஜா ஸகலஜம்பு³தீ³பே சதுராஸீதி விஹாரஸஹஸ்ஸானி பதிட்டா²பேஸி, கோ பன வாதோ³ அஞ்ஞேஸம் சித்தீகாரானம். அபிச கஸ்ஸஞ்ஞஸ்ஸ பரினிப்³பு³தஸ்ஸாபி ஜாதிபோ³தி⁴த⁴ம்மசக்கப்பவத்தனபரினிப்³பா³னட்டா²னானி படிமாசேதியாதீ³னி வா உத்³தி³ஸ்ஸ ஏவம் சித்தீகாரக³ருகாரோ பவத்ததி யதா² ப⁴க³வதோ. ஏவம்சித்தீகதட்டே²னாபி ததா²க³தஸமம் ரதனம் நத்தி².

ததா² யம்பி தம் மஹக்³க⁴ட்டே²ன ரதனம். ஸேய்யதி²த³ம் – காஸிகம் வத்த²ம். யதா²ஹ – ‘‘ஜிண்ணம்பி, பி⁴க்க²வே, காஸிகம் வத்த²ம் வண்ணவந்தஞ்சேவ ஹோதி ஸுக²ஸம்ப²ஸ்ஸஞ்ச மஹக்³க⁴ஞ்சா’’தி (அ. நி. 3.100), தம்பி பு³த்³த⁴ரதனேன ஸமம் நத்தி². யதி³ ஹி மஹக்³க⁴ட்டே²ன ரதனம், ததா²க³தோவ ரதனம். ததா²க³தோ ஹி யேஸம் பம்ஸுகம்பி படிக்³க³ண்ஹாதி, தேஸம் தம் மஹப்ப²லம் ஹோதி மஹானிஸம்ஸம் ஸேய்யதா²பி அஸோகரஞ்ஞோ, இத³மஸ்ஸ மஹக்³க⁴தாய. ஏவம் மஹக்³க⁴தாவசனேன சேத்த² தோ³ஸாபா⁴வஸாத⁴கம் இத³ம் ஸுத்தபத³ம் வேதி³தப்³ப³ம் –

‘‘யேஸம் கோ² பன ஸோ படிக்³க³ண்ஹாதி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம், தேஸம் தம் மஹப்ப²லம் ஹோதி மஹானிஸம்ஸம். இத³மஸ்ஸ மஹக்³க⁴தாய வதா³மி. ஸேய்யதா²பி தம், பி⁴க்க²வே, காஸிகம் வத்த²ம் மஹக்³க⁴ம், ததூ²பமாஹம், பி⁴க்க²வே, இமம் புக்³க³லம் வதா³மீ’’தி (அ. நி. 3.100).

ஏவம் மஹக்³க⁴ட்டே²னபி ததா²க³தஸமம் ரதனம் நத்தி².

ததா² யம்பி தம் அதுலட்டே²ன ரதனம். ஸேய்யதி²த³ம் – ரஞ்ஞோ சக்கவத்திஸ்ஸ சக்கரதனம் உப்பஜ்ஜதி இந்த³னீலமணிமயனாபி⁴ ஸத்தரதனமயஸஹஸ்ஸாரம் பவாளமயனேமி ரத்தஸுவண்ணமயஸந்தி⁴, யஸ்ஸ த³ஸன்னம் த³ஸன்னம் அரானமுபரி ஏகம் முண்டா³ரம் ஹோதி வாதம் க³ஹேத்வா ஸத்³த³கரணத்த²ம், யேன கதோ ஸத்³தோ³ ஸுகுஸலப்பதாளிதபஞ்சங்கி³கதூரியஸத்³தோ³ விய ஹோதி, யஸ்ஸ நாபி⁴யா உபோ⁴ஸு பஸ்ஸேஸு த்³வே ஸீஹமுகா²னி ஹோந்தி, அப்³ப⁴ந்தரம் ஸகடசக்கஸ்ஸேவ ஸுஸிரம். தஸ்ஸ கத்தா வா காரேதா வா நத்தி², கம்மபச்சயேன உதுதோ ஸமுட்டா²தி. யம் ராஜா த³ஸவித⁴ம் சக்கவத்திவத்தம் பூரேத்வா தத³ஹுபோஸதே² புண்ணமதி³வஸே ஸீஸம்ன்ஹாதோ உபோஸதி²கோ உபரிபாஸாத³வரக³தோ ஸீலானி ஸோதே⁴ந்தோ நிஸின்னோ புண்ணசந்த³ம் விய ஸூரியம் விய ச உட்டே²ந்தம் பஸ்ஸதி, யஸ்ஸ த்³வாத³ஸயோஜனதோ ஸத்³தோ³ ஸுய்யதி, யோஜனதோ வண்ணோ தி³ஸ்ஸதி, யம் மஹாஜனேன ‘‘து³தியோ மஞ்ஞே சந்தோ³ ஸூரியோ வா உட்டி²தோ’’தி அதிவிய கோதூஹலஜாதேன தி³ஸ்ஸமானம் நக³ரஸ்ஸ உபரி ஆக³ந்த்வா ரஞ்ஞோ அந்தேபுரஸ்ஸ பாசீனபஸ்ஸே நாதிஉச்சம் நாதினீசம் ஹுத்வா மஹாஜனஸ்ஸ க³ந்த⁴புப்பா²தீ³ஹி பூஜேதும், யுத்தட்டா²னே அக்கா²ஹதம் விய திட்ட²தி.

ததே³வ அனுப³ந்த⁴மானம் ஹத்தி²ரதனம் உப்பஜ்ஜதி, ஸப்³ப³ஸேதோ ரத்தபாதோ³ ஸத்தப்பதிட்டோ² இத்³தி⁴மா வேஹாஸங்க³மோ உபோஸத²குலா வா ச²த்³த³ந்தகுலா வா ஆக³ச்ச²தி, உபோஸத²குலா ச ஆக³ச்ச²ந்தோ ஸப்³ப³ஜேட்டோ² ஆக³ச்ச²தி, ச²த்³த³ந்தகுலா ஸப்³ப³கனிட்டோ² ஸிக்கி²தஸிக்கோ² த³மதூ²பேதோ, ஸோ த்³வாத³ஸயோஜனம் பரிஸம் க³ஹேத்வா ஸகலஜம்பு³தீ³பம் அனுஸம்யாயித்வா புரேபாதராஸமேவ ஸகம் ராஜதா⁴னிம் ஆக³ச்ச²தி.

தம்பி அனுப³ந்த⁴மானம் அஸ்ஸரதனம் உப்பஜ்ஜதி, ஸப்³ப³ஸேதோ ரத்தபாதோ³ காளஸீஸோ முஞ்ஜகேஸோ வலாஹகஸ்ஸராஜகுலா ஆக³ச்ச²தி. ஸேஸமேத்த² ஹத்தி²ரதனஸதி³ஸமேவ.

தம்பி அனுப³ந்த⁴மானம் மணிரதனம் உப்பஜ்ஜதி. ஸோ ஹோதி மணி வேளுரியோ ஸுபோ⁴ ஜாதிமா அட்ட²ம்ஸோ ஸுபரிகம்மகதோ ஆயாமதோ சக்கனாபி⁴ஸதி³ஸோ, வேபுல்லபப்³ப³தா ஆக³ச்ச²தி. ஸோ சதுரங்க³ஸமன்னாக³தேபி அந்த⁴காரே ரஞ்ஞோ த⁴ஜக்³க³ம் க³தோ யோஜனம் ஓபா⁴ஸேதி, யஸ்ஸோபா⁴ஸேன மனுஸ்ஸா ‘‘தி³வா’’தி மஞ்ஞமானா கம்மந்தே பயோஜேந்தி, அந்தமஸோ குந்த²கிபில்லிகம் உபாதா³ய பஸ்ஸந்தி.

தம்பி அனுப³ந்த⁴மானம் இத்தி²ரதனம் உப்பஜ்ஜதி, பகதிஅக்³க³மஹேஸீ வா ஹோதி, உத்தரகுருதோ வா ஆக³ச்ச²தி மத்³த³ராஜகுலதோ வா, அதிதீ³க⁴தாதி³ச²தோ³ஸவிவஜ்ஜிதா அதிக்கந்தா மானுஸவண்ணம் அப்பத்தா தி³ப்³ப³வண்ணம், யஸ்ஸா ரஞ்ஞோ ஸீதகாலே உண்ஹானி க³த்தானி ஹோந்தி, உண்ஹகாலே ஸீதானி, ஸததா⁴ போ²டித தூலபிசுனோ விய ஸம்ப²ஸ்ஸோ ஹோதி, காயதோ சந்த³னக³ந்தோ⁴ வாயதி, முக²தோ உப்பலக³ந்தோ⁴, புப்³பு³ட்டா²யினிதாதி³அனேககு³ணஸமன்னாக³தா ச ஹோதி.

தம்பி அனுப³ந்த⁴மானம் க³ஹபதிரதனம் உப்பஜ்ஜதி ரஞ்ஞோ பகதிகம்மகாரோ ஸேட்டி², யஸ்ஸ சக்கரதனே உப்பன்னமத்தே தி³ப்³ப³ம் சக்கு² பாதுப⁴வதி, யேன ஸமந்ததோ யோஜனமத்தே நிதி⁴ம் பஸ்ஸதி அஸாமிகம்பி ஸஸாமிகம்பி, ஸோ ராஜானம் உபஸங்கமித்வா பவாரேதி ‘‘அப்போஸ்ஸுக்கோ த்வம், தே³வ, ஹோஹி, அஹம் தே த⁴னேன த⁴னகரணீயம் கரிஸ்ஸாமீ’’தி.

தம்பி அனுப³ந்த⁴மானம் பரிணாயகரதனம் உப்பஜ்ஜதி ரஞ்ஞோ பகதிஜேட்ட²புத்தோ. சக்கரதனே உப்பன்னமத்தே அதிரேகபஞ்ஞாவேய்யத்தியேன ஸமன்னாக³தோ ஹோதி, த்³வாத³ஸயோஜனாய பரிஸாய சேதஸா சித்தம் பரிஜானித்வா நிக்³க³ஹபக்³க³ஹஸமத்தோ² ஹோதி, ஸோ ராஜானம் உபஸங்கமித்வா பவாரேதி ‘‘அப்போஸ்ஸுக்கோ த்வம், தே³வ, ஹோஹி, அஹம் தே ரஜ்ஜம் அனுஸாஸிஸ்ஸாமீ’’தி. யம் வா பனஞ்ஞம்பி ஏவரூபம் அதுலட்டே²ன ரதனம், யஸ்ஸ ந ஸக்கா துலயித்வா தீரயித்வா அக்³கோ⁴ காதும் ‘‘ஸதம் வா ஸஹஸ்ஸம் வா அக்³க⁴தி கோடிம் வா’’தி. தத்த² ஏகரதனம்பி பு³த்³த⁴ரதனேன ஸமம் நத்தி². யதி³ ஹி அதுலட்டே²ன ரதனம், ததா²க³தோவ ரதனம். ததா²க³தோ ஹி ந ஸக்கா ஸீலதோ வா ஸமாதி⁴தோ வா பஞ்ஞாதீ³னம் வா அஞ்ஞதரதோ கேனசி துலயித்வா தீரயித்வா ‘‘ஏத்தககு³ணோ வா இமினா ஸமோ வா ஸப்படிபா⁴கோ³ வா’’தி பரிச்சி²ந்தி³தும். ஏவம் அதுலட்டே²னபி ததா²க³தஸமம் ரதனம் நத்தி².

ததா² யம்பி தம் து³ல்லப⁴த³ஸ்ஸனட்டே²ன ரதனம், ஸேய்யதி²த³ம் து³ல்லப⁴பாதுபா⁴வோ ராஜா சக்கவத்தி, சக்காதீ³னி ச தஸ்ஸ ரதனானி, தம்பி பு³த்³த⁴ரதனேன ஸமம் நத்தி². யதி³ ஹி து³ல்லப⁴த³ஸ்ஸனட்டே²ன ரதனம், ததா²க³தோவ ரதனம், குதோ சக்கவத்திஆதீ³னம் ரதனத்தம். தானி ஹி ஏகஸ்மிம்யேவ கப்பே அனேகானி உப்பஜ்ஜந்தி. யஸ்மா பன அஸங்க்²யேய்யேபி கப்பே ததா²க³தஸுஞ்ஞோ லோகோ ஹோதி, தஸ்மா ததா²க³தோவ கதா³சி கரஹசி உப்பஜ்ஜனதோ து³ல்லப⁴த³ஸ்ஸனோ. வுத்தம்பி சேதம் ப⁴க³வதா பரினிப்³பா³னஸமயே –

‘‘தே³வதா, ஆனந்த³, உஜ்ஜா²யந்தி ‘தூ³ரா ச வதம்ஹ ஆக³தா ததா²க³தம் த³ஸ்ஸனாய, கதா³சி கரஹசி ததா²க³தா லோகே உப்பஜ்ஜந்தி அரஹந்தோ ஸம்மாஸம்பு³த்³தா⁴, அஜ்ஜேவ ரத்தியா பச்சி²மே யாமே ததா²க³தஸ்ஸ பரினிப்³பா³னம் ப⁴விஸ்ஸதி, அயஞ்ச மஹேஸக்கோ² பி⁴க்கு² ப⁴க³வதோ புரதோ டி²தோ ஓவாரேந்தோ, ந மயம் லபா⁴ம பச்சி²மே காலே ததா²க³தம் த³ஸ்ஸனாயா’’’தி (தீ³. நி. 2.200).

ஏவம் து³ல்லப⁴த³ஸ்ஸனட்டே²னாபி ததா²க³தஸமம் ரதனம் நத்தி².

ததா² யம்பி தம் அனோமஸத்தபரிபோ⁴க³ட்டே²ன ரதனம். ஸேய்யதி²த³ம் – ரஞ்ஞோ சக்கவத்திஸ்ஸ சக்கரதனாதி³ தஞ்ஹி கோடிஸதஸஹஸ்ஸத⁴னானம்பி ஸத்தபூ⁴மிகபாஸாத³வரதலே வஸந்தானம்பி சண்டா³லவேனனேஸாத³ரத²காரபுக்குஸாதீ³னம் நீசகுலிகானம் ஓமகபுரிஸானம் ஸுபினந்தேபி பரிபோ⁴க³த்தா²ய ந நிப்³ப³த்ததி. உப⁴தோ ஸுஜாதஸ்ஸ பன ரஞ்ஞோ க²த்தியஸ்ஸேவ பரிபூரிதத³ஸவித⁴சக்கவத்திவத்தஸ்ஸ பரிபோ⁴க³த்தா²ய நிப்³ப³த்தனதோ அனோமஸத்தபரிபோ⁴க³ம்யேவ ஹோதி, தம்பி பு³த்³த⁴ரதனஸமம் நத்தி². யதி³ ஹி அனோமஸத்தபரிபோ⁴க³ட்டே²ன ரதனம், ததா²க³தோவ ரதனம். ததா²க³தோ ஹி லோகே ஓமகஸத்தஸம்மதானம் அனுபனிஸ்ஸயஸம்பன்னானம் விபரீதத³ஸ்ஸனானம் பூரணகஸ்ஸபாதீ³னம் ச²ன்னம் ஸத்தா²ரானம் அஞ்ஞேஸஞ்ச ஏவரூபானம் ஸுபினந்தேபி அபரிபோ⁴கோ³. உபனிஸ்ஸயஸம்பன்னானம் பன சதுப்பதா³யபி கா³தா²ய பரியோஸானே அரஹத்தமதி⁴க³ந்தும் ஸமத்தா²னம் நிப்³பே³தி⁴கஞாணத³ஸ்ஸனானம் பா³ஹியதா³ருசீரியப்பபு⁴தீனம் அஞ்ஞேஸஞ்ச மஹாகுலப்பஸுதானம் மஹாஸாவகானம் பரிபோ⁴கோ³, தே ஹி தம் த³ஸ்ஸனானுத்தரியஸவனானுத்தரியபாரிசரியானுத்தரியாதீ³னி ஸாதே⁴ந்தா ததா²க³தம் பரிபு⁴ஞ்ஜந்தி. ஏவம் அனோமஸத்தபரிபோ⁴க³ட்டே²னாபி ததா²க³தஸமம் ரதனம் நத்தி².

யம்பி தம் அவிஸேஸதோ ரதிஜனனட்டே²ன ரதனம். ஸேய்யதி²த³ம் – ரஞ்ஞோ சக்கவத்திஸ்ஸ சக்கரதனம். தஞ்ஹி தி³ஸ்வாவ ராஜா சக்கவத்தி அத்தமனோ ஹோதி, ஏவம்பி தம் ரஞ்ஞோ ரதிம் ஜனேதி. புன சபரம் ராஜா சக்கவத்தி வாமேன ஹத்தே²ன ஸுவண்ணபி⁴ங்காரம் க³ஹேத்வா த³க்கி²ணேன ஹத்தே²ன சக்கரதனம் அப்³பு⁴க்கிரதி ‘‘பவத்தது ப⁴வம் சக்கரதனம், அபி⁴விஜினாது ப⁴வம் சக்கரதன’’ந்தி. ததோ சக்கரதனம் பஞ்சங்கி³கம் விய தூரியம் மது⁴ரஸ்ஸரம் நிச்ச²ரந்தம் ஆகாஸேன புரத்தி²மம் தி³ஸம் க³ச்ச²தி, அன்வதே³வ ராஜா, சக்கவத்தி சக்கானுபா⁴வேன த்³வாத³ஸயோஜனவித்தி²ண்ணாய சதுரங்கி³னியா ஸேனாய நாதிஉச்சம் நாதினீசம் உச்சருக்கா²னம் ஹேட்டா²பா⁴கே³ன, நீசருக்கா²னம் உபரிபா⁴கே³ன, ருக்கே²ஸு புப்ப²ப²லபல்லவாதி³பண்ணாகாரம் க³ஹேத்வா ஆக³தானம் ஹத்த²தோ பண்ணாகாரஞ்ச க³ண்ஹந்தோ ‘‘ஏஹி கோ², மஹாராஜா’’தி ஏவமாதி³னா பரமனிபச்சகாரேன ஆக³தே படிராஜானோ ‘‘பாணோ ந ஹந்தப்³போ³’’திஆதி³னா நயேன அனுஸாஸந்தோ க³ச்ச²தி. யத்த² பன ராஜா பு⁴ஞ்ஜிதுகாமோ வா தி³வாஸேய்யம் வா கப்பேதுகாமோ ஹோதி, தத்த² சக்கரதனம் ஆகாஸா ஓரோஹித்வா உத³காதி³ஸப்³ப³கிச்சக்க²மே ஸமே பூ⁴மிபா⁴கே³ அக்கா²ஹதம் விய திட்ட²தி. புன ரஞ்ஞோ க³மனசித்தே உப்பன்னே புரிமனயேனேவ ஸத்³த³ம் கரோந்தம் க³ச்ச²தி, தம் ஸுத்வா த்³வாத³ஸயோஜனிகாபி பரிஸா ஆகாஸேன க³ச்ச²தி. சக்கரதனம் அனுபுப்³பே³ன புரத்தி²மம் ஸமுத்³த³ம் அஜ்ஜோ²கா³ஹதி, தஸ்மிம் அஜ்ஜோ²கா³ஹந்தே உத³கம் யோஜனப்பமாணம் அபக³ந்த்வா பி⁴த்தீகதம் விய திட்ட²தி. மஹாஜனோ யதா²காமம் ஸத்த ரதனானி க³ண்ஹாதி. புன ராஜா ஸுவண்ணபி⁴ங்காரம் க³ஹேத்வா ‘‘இதோ பட்டா²ய மம ரஜ்ஜ’’ந்தி உத³கேன அப்³பு⁴க்கிரித்வா நிவத்ததி. ஸேனா புரதோ ஹோதி, சக்கரதனம் பச்ச²தோ, ராஜா மஜ்ஜே². சக்கரதனேன ஓஸக்கிதோஸக்கிதட்டா²னம் உத³கம் பரிபூரதி. ஏதேனேவ உபாயேன த³க்கி²ணபச்சி²முத்தரேபி ஸமுத்³தே³ க³ச்ச²தி.

ஏவம் சதுத்³தி³ஸம் அனுஸம்யாயித்வா சக்கரதனம் தியோஜனப்பமாணம் ஆகாஸம் ஆரோஹதி. தத்த² டி²தோ ராஜா சக்கரதனானுபா⁴வேன விஜிதவிஜயோ பஞ்சஸதபரித்ததீ³பபடிமண்டி³தம் ஸத்தயோஜனஸஹஸ்ஸபரிமண்ட³லம் புப்³ப³விதே³ஹம், ததா² அட்ட²யோஜனஸஹஸ்ஸபரிமண்ட³லம் உத்தரகுரும், ஸத்தயோஜனஸஹஸ்ஸபரிமண்ட³லம்யேவ அபரகோ³யானம், த³ஸயோஜனஸஹஸ்ஸபரிமண்ட³லம் ஜம்பு³தீ³பஞ்சாதி ஏவம் சதுமஹாதீ³பத்³விஸஹஸ்ஸபரித்ததீ³பபடிமண்டி³தம் ஏகம் சக்கவாளம் ஸுபு²ல்லபுண்ட³ரீகவனம் விய ஓலோகேதி. ஏவம் ஓலோகயதோ சஸ்ஸ அனப்பகா ரதி உப்பஜ்ஜதி. ஏவம்பி தம் சக்கரதனம் ரஞ்ஞோ ரதிம் ஜனேதி, தம்பி பு³த்³த⁴ரதனஸமம் நத்தி². யதி³ ஹி ரதிஜனனட்டே²ன ரதனம், ததா²க³தோவ ரதனம், கிம் கரிஸ்ஸதி ஏதம் சக்கரதனம்? ததா²க³தோ ஹி யஸ்ஸா தி³ப்³பா³ய ரதியா சக்கரதனாதீ³ஹி ஸப்³பே³ஹிபி ஜனிதா சக்கவத்திரதி ஸங்க²ம்பி கலம்பி கலபா⁴க³ம்பி ந உபேதி, ததோபி ரதிதோ உத்தரிதரஞ்ச பணீததரஞ்ச அத்தனோ ஓவாத³ப்படிகரானம் அஸங்க்²யேய்யானம்பி தே³வமனுஸ்ஸானம் பட²மஜ்ஜா²னரதிம் து³தியததியசதுத்த²பஞ்சமஜ்ஜா²னரதிம், ஆகாஸானஞ்சாயதனரதிம், விஞ்ஞாணஞ்சாயதனஆகிஞ்சஞ்ஞாயதனனேவஸஞ்ஞானாஸஞ்ஞாயதனரதிம், ஸோதாபத்திமக்³க³ரதிம், ஸோதாபத்திப²லரதிம், ஸகதா³கா³மிஅனாகா³மிஅரஹத்தமக்³க³ப²லரதிஞ்ச ஜனேதி. ஏவம் ரதிஜனனட்டே²னாபி ததா²க³தஸமம் ரதனம் நத்தீ²தி.

அபிச ரதனம் நாமேதம் து³வித⁴ம் ஹோதி ஸவிஞ்ஞாணகமவிஞ்ஞாணகஞ்ச. தத்த² அவிஞ்ஞாணகம் சக்கரதனம் மணிரதனஞ்ச, யம் வா பனஞ்ஞம்பி அனிந்த்³ரியப³த்³த⁴ஸுவண்ணரஜதாதி³, ஸவிஞ்ஞாணகம் ஹத்தி²ரதனாதி³பரிணாயகரதனபரியோஸானம், யம் வா பனஞ்ஞம்பி ஏவரூபம் இந்த்³ரியப³த்³த⁴ம். ஏவம் து³விதே⁴ சேத்த² ஸவிஞ்ஞாணகரதனம் அக்³க³மக்கா²யதி. கஸ்மா? யஸ்மா அவிஞ்ஞாணகம் ஸுவண்ணரஜதமணிமுத்தாதி³ரதனம் ஸவிஞ்ஞாணகானம் ஹத்தி²ரதனாதீ³னம் அலங்காரத்தா²ய உபனீயதி.

ஸவிஞ்ஞாணகரதனம்பி து³வித⁴ம் திரச்சா²னக³தரதனம், மனுஸ்ஸரதனஞ்ச. தத்த² மனுஸ்ஸரதனம் அக்³க³மக்கா²யதி. கஸ்மா? யஸ்மா திரச்சா²னக³தரதனம் மனுஸ்ஸரதனஸ்ஸ ஓபவய்ஹம் ஹோதி. மனுஸ்ஸரதனம்பி து³வித⁴ம் இத்தி²ரதனம், புரிஸரதனஞ்ச. தத்த² புரிஸரதனம் அக்³க³மக்கா²யதி. கஸ்மா? யஸ்மா இத்தி²ரதனம் புரிஸரதனஸ்ஸ பரிசாரிகத்தம் ஆபஜ்ஜதி. புரிஸரதனம்பி து³வித⁴ம் அகா³ரிகரதனம், அனகா³ரிகரதனஞ்ச. தத்த² அனகா³ரிகரதனம் அக்³க³மக்கா²யதி. கஸ்மா? யஸ்மா அகா³ரிகரதனேஸு அக்³கோ³ சக்கவத்திபி ஸீலாதி³கு³ணயுத்தம் அனகா³ரிகரதனம் பஞ்சபதிட்டி²தேன வந்தி³த்வா உபட்ட²ஹித்வா பயிருபாஸித்வா தி³ப்³ப³மானுஸிகா ஸம்பத்தியோ பாபுணித்வா அந்தே நிப்³பா³னஸம்பத்திம் பாபுணாதி.

ஏவம் அனகா³ரிகரதனம்பி து³வித⁴ம் அரியபுது²ஜ்ஜனவஸேன. அரியரதனம்பி து³வித⁴ம் ஸேகா²ஸேக²வஸேன. அஸேக²ரதனம்பி து³வித⁴ம் ஸுக்க²விபஸ்ஸகஸமத²யானிகவஸேன. ஸமத²யானிகரதனம்பி து³வித⁴ம் ஸாவகபாரமிப்பத்தமப்பத்தஞ்ச. தத்த² ஸாவகபாரமிப்பத்தம் அக்³க³மக்கா²யதி. கஸ்மா? கு³ணமஹந்ததாய. ஸாவகபாரமிப்பத்தரதனதோபி பச்சேகபு³த்³த⁴ரதனம் அக்³க³மக்கா²யதி. கஸ்மா? கு³ணமஹந்ததாய. ஸாரிபுத்தமோக்³க³ல்லானஸதி³ஸாபி ஹி அனேகஸதா ஸாவகா ஏகஸ்ஸ பச்சேகபு³த்³த⁴ஸ்ஸ கு³ணானம் ஸதபா⁴க³ம்பி ந உபேந்தி. பச்சேகபு³த்³த⁴ரதனதோபி ஸம்மாஸம்பு³த்³த⁴ரதனம் அக்³க³மக்கா²யதி. கஸ்மா? கு³ணமஹந்ததாய. ஸகலம்பி ஹி ஜம்பு³தீ³பம் பூரேத்வா பல்லங்கேன பல்லங்கம் க⁴டேந்தா நிஸின்னா பச்சேகபு³த்³தா⁴ ஏகஸ்ஸ ஸம்மாஸம்பு³த்³த⁴ஸ்ஸ கு³ணானம் நேவ ஸங்க²ம் ந கலம் ந கலபா⁴க³ம் உபேந்தி. வுத்தஞ்ஹேதம் ப⁴க³வதா – ‘‘யாவதா, பி⁴க்க²வே, ஸத்தா அபதா³ வா…பே… ததா²க³தோ தேஸம் அக்³க³மக்கா²யதீ’’திஆதி³ (அ. நி. 4.34; 5.32; இதிவு. 90). ஏவம் கேனசி பரியாயேன ததா²க³தஸமம் ரதனம் நத்தி². தேனாஹ ப⁴க³வா – ‘‘ந நோ ஸமம் அத்தி² ததா²க³தேனா’’தி.

ஏவம் ப⁴க³வா பு³த்³த⁴ரதனஸ்ஸ அஞ்ஞேஹி ரதனேஹி அஸமதம் வத்வா இதா³னி தேஸம் ஸத்தானம் உப்பன்னஉபத்³த³வவூபஸமத்த²ம் நேவ ஜாதிம் ந கோ³த்தம் ந கோலபுத்தியம் ந வண்ணபோக்க²ரதாதி³ம் நிஸ்ஸாய, அபிச கோ² அவீசிமுபாதா³ய ப⁴வக்³க³பரியந்தே லோகே ஸீலஸமாதி⁴க்க²ந்தா⁴தீ³ஹி கு³ணேஹி பு³த்³த⁴ரதனஸ்ஸ அஸதி³ஸபா⁴வம் நிஸ்ஸாய ஸச்சவசனம் பயுஞ்ஜதி ‘‘இத³ம்பி பு³த்³தே⁴ ரதனம் பணீதம், ஏதேன ஸச்சேன ஸுவத்தி² ஹோதூ’’தி.

தஸ்ஸத்தோ² – இத³ம்பி இத⁴ வா ஹுரம் வா ஸக்³கே³ஸு வா யம்கிஞ்சி அத்தி² வித்தம் வா ரதனம் வா, தேன ஸத்³தி⁴ம் தேஹி தேஹி கு³ணேஹி அஸமத்தா பு³த்³தே⁴ ரதனம் பணீதம். யதி³ ஹி ஏதம் ஸச்சம், அத² ஏதேன ஸச்சேன இமேஸம் பாணீனம் ஸுவத்தி² ஹோது, ஸோப⁴னானம் அத்தி²தா ஹோது அரோக³தா நிருபத்³த³வதாதி. ஏத்த² ச யதா² ‘‘சக்கு² கோ², ஆனந்த³, ஸுஞ்ஞம் அத்தேன வா அத்தனியேன வா’’தி ஏவமாதீ³ஸு (ஸம். நி. 4.85) அத்தபா⁴வேன வா அத்தனியபா⁴வேன வாதி அத்தோ². இதரதா² ஹி சக்கு² அத்தா வா அத்தனியம் வாதி அப்படிஸித்³த⁴மேவ ஸியா. ஏவம் ரதனம் பணீதந்தி ரதனத்தம் பணீதம், ரதனபா⁴வோ பணீதோதி அயமத்தோ² வேதி³தப்³போ³. இதரதா² ஹி பு³த்³தோ⁴ நேவ ரதனந்தி ஸிஜ்ஜே²ய்ய. ந ஹி யத்த² ரதனம் அத்தி², தம் ரதனந்தி ந ஸிஜ்ஜ²தி. யத்த² பன சித்தீகதாதி³அத்த²ஸங்கா²தம் யேன வா தேன வா விதி⁴னா ஸம்ப³ந்த⁴க³தம் ரதனம் அத்தி², யஸ்மா தம் ரதனத்தமுபாதா³ய ரதனந்தி பஞ்ஞாபீயதி, தஸ்மா தஸ்ஸ ரதனஸ்ஸ அத்தி²தாய ரதனந்தி ஸிஜ்ஜ²தி. அத² வா இத³ம்பி பு³த்³தே⁴ ரதனந்தி இமினாபி பகாரேன பு³த்³தோ⁴வ ரதனந்தி ஏவமத்தோ² வேதி³தப்³போ³. வுத்தமத்தாய ச ப⁴க³வதா இமாய கா³தா²ய ராஜகுலஸ்ஸ ஸோத்தி² ஜாதா, ப⁴யம் வூபஸந்தம். இமிஸ்ஸா கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

க²யம் விராக³ந்திகா³தா²வண்ணனா

4. ஏவம் பு³த்³த⁴கு³ணேன ஸச்சம் வத்வா இதா³னி நிப்³பா³னத⁴ம்மகு³ணேன வத்துமாரத்³தோ⁴ ‘‘க²யம் விராக³’’ந்தி. தத்த² யஸ்மா நிப்³பா³னஸச்சி²கிரியாய ராகா³த³யோ கீ²ணா ஹோந்தி பரிக்கீ²ணா, யஸ்மா வா தம் தேஸம் அனுப்பாத³னிரோத⁴க்க²யமத்தம், யஸ்மா ச தம் ராகா³தி³விப்பயுத்தம் ஸம்பயோக³தோ ச ஆரம்மணதோ ச, யஸ்மா வா தம்ஹி ஸச்சி²கதே ராகா³த³யோ அச்சந்தம் விரத்தா ஹோந்தி விக³தா வித்³த⁴ஸ்தா, தஸ்மா க²யந்தி ச விராக³ந்தி ச வுச்சதி. யஸ்மா பனஸ்ஸ ந உப்பாதோ³ பஞ்ஞாயதி, ந வயோ, ந டி²தஸ்ஸ அஞ்ஞத²த்தம் தஸ்மா தம் ந ஜாயதி ந ஜீயதி ந மீயதீதி கத்வா அமதந்தி வுச்சதி. உத்தமத்தே²ன பன அதப்பகட்டே²ன ச பணீதந்தி. யத³ஜ்ஜ²கா³தி யம் அஜ்ஜ²கா³ விந்தி³ படிலபி⁴, அத்தனோ ஞாணப³லேன ஸச்சா²காஸி. ஸக்யமுனீதி ஸக்யகுலப்பஸுதத்தா ஸக்யோ, மோனேய்யத⁴ம்மஸமன்னாக³தத்தா முனி, ஸக்யோ ஏவ முனி ஸக்யமுனி. ஸமாஹிதோதி அரியமக்³க³ஸமாதி⁴னா ஸமாஹிதசித்தோ. ந தேன த⁴ம்மேன ஸமத்தி² கிஞ்சீதி தேன க²யாதி³னாமகேன ஸக்யமுனினா அதி⁴க³தேன த⁴ம்மேன ஸமம் கிஞ்சி த⁴ம்மஜாதம் நத்தி². தஸ்மா ஸுத்தந்தரேபி வுத்தம் – ‘‘யாவதா, பி⁴க்க²வே, த⁴ம்மா ஸங்க²தா வா அஸங்க²தா வா, விராகோ³ தேஸம் அக்³க³மக்கா²யதீ’’திஆதி³ (அ. நி. 4.34; இதிவு. 90).

ஏவம் ப⁴க³வா நிப்³பா³னத⁴ம்மஸ்ஸ அஞ்ஞேஹி த⁴ம்மேஹி அஸமதம் வத்வா இதா³னி தேஸம் ஸத்தானம் உப்பன்னஉபத்³த³வவூபஸமத்த²ம் க²யவிராகா³மதபணீததாகு³ணேஹி நிப்³பா³னத⁴ம்மரதனஸ்ஸ அஸதி³ஸபா⁴வம் நிஸ்ஸாய ஸச்சவசனம் பயுஞ்ஜதி ‘‘இத³ம்பி த⁴ம்மே ரதனம் பணீதம், ஏதேன ஸச்சேன ஸுவத்தி² ஹோதூ’’தி. தஸ்ஸத்தோ² புரிமகா³தா²ய வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

யம் பு³த்³த⁴ஸேட்டோ²திகா³தா²வண்ணனா

5. ஏவம் நிப்³பா³னத⁴ம்மகு³ணேன ஸச்சம் வத்வா இதா³னி மக்³க³த⁴ம்மகு³ணேன வத்துமாரத்³தோ⁴ ‘‘யம் பு³த்³த⁴ஸேட்டோ²’’தி. தத்த² ‘‘பு³ஜ்ஜி²தா ஸச்சானீ’’திஆதி³னா நயேன பு³த்³தோ⁴, உத்தமோ பஸம்ஸனீயோ சாதி ஸேட்டோ², பு³த்³தோ⁴ ச ஸோ ஸேட்டோ² சாதி பு³த்³த⁴ஸேட்டோ², அனுபு³த்³த⁴பச்சேகபு³த்³த⁴ஸுதபு³த்³த⁴க்²யேஸு வா பு³த்³தே⁴ஸு ஸேட்டோ²தி பு³த்³த⁴ஸேட்டோ². ஸோ பு³த்³த⁴ஸேட்டோ² யம் பரிவண்ணயீ ‘‘அட்ட²ங்கி³கோவ மக்³கா³னம், கே²மம் நிப்³பா³னபத்தியா’’தி (ம. நி. 2.215) ச ‘‘அரியம் வோ, பி⁴க்க²வே, ஸம்மாஸமாதி⁴ம் தே³ஸிஸ்ஸாமி ஸஉபனிஸம் ஸபரிக்கா²ர’’ந்தி (ம. நி. 3.136) ச ஏவமாதி³னா நயேன தத்த² தத்த² பஸம்ஸி பகாஸயி. ஸுசிந்தி கிலேஸமலஸமுச்சே²த³கரணதோ அச்சந்தவோதா³னம். ஸமாதி⁴மானந்தரிகஞ்ஞமாஹூதி யஞ்ச அத்தனோ பவத்திஸமனந்தரம் நியமேனேவ ப²லபதா³னதோ ‘‘ஆனந்தரிகஸமாதீ⁴’’தி ஆஹு. ந ஹி மக்³க³ஸமாதி⁴ம்ஹி உப்பன்னே தஸ்ஸ ப²லுப்பத்தினிஸேத⁴கோ கோசி அந்தராயோ அத்தி². யதா²ஹ –

‘‘அயஞ்ச புக்³க³லோ ஸோதாபத்திப²லஸச்சி²கிரியாய படிபன்னோ அஸ்ஸ, கப்பஸ்ஸ ச உட்³ட³ய்ஹனவேலா அஸ்ஸ, நேவ தாவ கப்போ உட்³ட³ய்ஹேய்ய, யாவாயம் புக்³க³லோ ந ஸோதாபத்திப²லம் ஸச்சி²கரோதி, அயம் வுச்சதி புக்³க³லோ டி²தகப்பீ. ஸப்³பே³பி மக்³க³ஸமங்கி³னோ புக்³க³லா டி²தகப்பினோ’’தி (பு. ப. 17).

ஸமாதி⁴னா தேன ஸமோ ந விஜ்ஜதீதி தேன பு³த்³த⁴ஸேட்ட²பரிவண்ணிதேன ஸுசினா ஆனந்தரிகஸமாதி⁴னா ஸமோ ரூபாவசரஸமாதி⁴ வா அரூபாவசரஸமாதி⁴ வா கோசி ந விஜ்ஜதி. கஸ்மா? தேஸம் பா⁴விதத்தா தத்த² தத்த² ப்³ரஹ்மலோகே உபபன்னஸ்ஸாபி புன நிரயாதீ³ஸுபி உபபத்திஸம்ப⁴வதோ, இமஸ்ஸ ச அரஹத்தஸமாதி⁴ஸ்ஸ பா⁴விதத்தா அரியபுக்³க³லஸ்ஸ ஸப்³பூ³பபத்திஸமுக்³கா⁴தஸம்ப⁴வதோ. தஸ்மா ஸுத்தந்தரேபி வுத்தம் – ‘‘யாவதா, பி⁴க்க²வே, த⁴ம்மா ஸங்க²தா…பே… அரியோ அட்ட²ங்கி³கோ மக்³கோ³, தேஸம் அக்³க³மக்கா²யதீ’’திஆதி³ (அ. நி. 4.34; இதிவு. 90).

ஏவம் ப⁴க³வா ஆனந்தரிகஸமாதி⁴ஸ்ஸ அஞ்ஞேஹி ஸமாதீ⁴ஹி அஸமதம் வத்வா இதா³னி புரிமனயேனேவ மக்³க³த⁴ம்மரதனஸ்ஸ அஸதி³ஸபா⁴வம் நிஸ்ஸாய ஸச்சவசனம் பயுஞ்ஜதி ‘‘இத³ம்பி த⁴ம்மே…பே… ஹோதூ’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

யே புக்³க³லாதிகா³தா²வண்ணனா

6. ஏவம் மக்³க³த⁴ம்மகு³ணேனாபி ஸச்சம் வத்வா இதா³னி ஸங்க⁴கு³ணேனாபி வத்துமாரத்³தோ⁴ ‘‘யே புக்³க³லா’’தி. தத்த² யேதி அனியமேத்வா உத்³தே³ஸோ. புக்³க³லாதி ஸத்தா. அட்டா²தி தேஸம் க³ணனபரிச்சே²தோ³. தே ஹி சத்தாரோ ச படிபன்னா சத்தாரோ ச ப²லே டி²தாதி அட்ட² ஹோந்தி. ஸதம் பஸத்தா²தி ஸப்புரிஸேஹி பு³த்³த⁴பச்சேகபு³த்³த⁴பு³த்³த⁴ஸாவகேஹி அஞ்ஞேஹி ச தே³வமனுஸ்ஸேஹி பஸத்தா². கஸ்மா? ஸஹஜாதஸீலாதி³கு³ணயோகா³. தேஸஞ்ஹி சம்பகவகுலகுஸுமாதீ³னம் ஸஹஜாதவண்ணக³ந்தா⁴த³யோ விய ஸஹஜாதா ஸீலஸமாதி⁴ஆத³யோ கு³ணா, தேன தே வண்ணக³ந்தா⁴தி³ஸம்பன்னானி விய புப்பா²னி தே³வமனுஸ்ஸானம் ஸதம் பியா மனாபா பஸம்ஸனீயா ச ஹோந்தி. தேன வுத்தம் ‘‘யே புக்³க³லா அட்ட²ஸதம் பஸத்தா²’’தி.

அத² வா யேதி அனியமேத்வா உத்³தே³ஸோ. புக்³க³லாதி ஸத்தா. அட்ட²ஸதந்தி தேஸம் க³ணனபரிச்சே²தோ³. தே ஹி ஏகபீ³ஜீ கோலம்கோலோ ஸத்தக்க²த்துபரமோதி தயோ ஸோதாபன்னா. காமரூபாரூபப⁴வேஸு அதி⁴க³தப²லா தயோ ஸகதா³கா³மினோ. தே ஸப்³பே³பி சதுன்னம் படிபதா³னம் வஸேன சதுவீஸதி. அந்தராபரினிப்³பா³யீ, உபஹச்சபரினிப்³பா³யீ, ஸஸங்கா²ரபரினிப்³பா³யீ, அஸங்கா²ரபரினிப்³பா³யீ, உத்³த⁴ம்ஸோதோ, அகனிட்ட²கா³மீதி அவிஹேஸு பஞ்ச. ததா² அதப்பஸுத³ஸ்ஸஸுத³ஸ்ஸீஸு. அகனிட்டே²ஸு பன உத்³த⁴ம்ஸோதவஜ்ஜா சத்தாரோதி சதுவீஸதி அனாகா³மினோ. ஸுக்க²விபஸ்ஸகோ ஸமத²யானிகோதி த்³வே அரஹந்தோ. சத்தாரோ மக்³க³ட்டா²தி சதுபஞ்ஞாஸ. தே ஸப்³பே³பி ஸத்³தா⁴து⁴ரபஞ்ஞாது⁴ரானம் வஸேன தி³கு³ணா ஹுத்வா அட்ட²ஸதம் ஹோந்தி. ஸேஸம் வுத்தனயமேவ.

சத்தாரி ஏதானி யுகா³னி ஹோந்தீதி தே ஸப்³பே³பி அட்ட² வா அட்ட²ஸதம் வாதி வித்தா²ரவஸேன உத்³தி³ட்ட²புக்³க³லா ஸங்கே²பவஸேன ஸோதாபத்திமக்³க³ட்டோ² ப²லட்டோ²தி ஏகம் யுக³ம், ஏவம் யாவ அரஹத்தமக்³க³ட்டோ² ப²லட்டோ²தி ஏகம் யுக³ந்தி சத்தாரி யுகா³னி ஹோந்தி. தே த³க்கி²ணேய்யாதி ஏத்த² தேதி புப்³பே³ அனியமேத்வா உத்³தி³ட்டா²னம் நியமேத்வா நித்³தே³ஸோ. யே புக்³க³லா வித்தா²ரவஸேன அட்ட² வா, அட்ட²ஸதம் வா, ஸங்கே²பவஸேன சத்தாரி யுகா³னி ஹோந்தீதி வுத்தா, ஸப்³பே³பி தே த³க்கி²ணம் அரஹந்தீதி த³க்கி²ணேய்யா. த³க்கி²ணா நாம கம்மஞ்ச கம்மவிபாகஞ்ச ஸத்³த³ஹித்வா ‘‘ஏஸ மே இத³ம் வேஜ்ஜகம்மம் வா ஜங்க⁴பேஸனிகம் வா கரிஸ்ஸதீ’’தி ஏவமாதீ³னி அனபேக்கி²த்வா தி³ய்யமானோ தே³ய்யத⁴ம்மோ, தம் அரஹந்தி நாம ஸீலாதி³கு³ணயுத்தா புக்³க³லா, இமே ச தாதி³ஸா, தேன வுச்சந்தி ‘‘தே த³க்கி²ணேய்யா’’தி.

ஸுக³தஸ்ஸ ஸாவகாதி ப⁴க³வா ஸோப⁴னேன க³மனேன யுத்தத்தா, ஸோப⁴னஞ்ச டா²னம் க³தத்தா, ஸுட்டு² ச க³தத்தா, ஸுட்டு² ஏவ ச க³த³த்தா ஸுக³தோ, தஸ்ஸ ஸுக³தஸ்ஸ. ஸப்³பே³பி தே வசனம் ஸுணந்தீதி ஸாவகா. காமஞ்ச அஞ்ஞேபி ஸுணந்தி, ந பன ஸுத்வா கத்தப்³ப³கிச்சம் கரோந்தி, இமே பன ஸுத்வா கத்தப்³ப³ம் த⁴ம்மானுத⁴ம்மப்படிபத்திம் கத்வா மக்³க³ப²லானி பத்தா, தஸ்மா ‘‘ஸாவகா’’தி வுச்சந்தி. ஏதேஸு தி³ன்னானி மஹப்ப²லானீதி ஏதேஸு ஸுக³தஸாவகேஸு அப்பகானிபி தா³னானி தி³ன்னானி படிக்³கா³ஹகதோ த³க்கி²ணாவிஸுத்³தி⁴பா⁴வம் உபக³தத்தா மஹப்ப²லானி ஹோந்தி. தஸ்மா ஸுத்தந்தரேபி வுத்தம் –

‘‘யாவதா, பி⁴க்க²வே, ஸங்கா⁴ வா க³ணா வா ததா²க³தஸாவகஸங்கோ⁴, தேஸம் அக்³க³மக்கா²யதி, யதி³த³ம் சத்தாரி புரிஸயுகா³னி அட்ட² புரிஸபுக்³க³லா, ஏஸ ப⁴க³வதோ ஸாவகஸங்கோ⁴…பே… அக்³கோ³ விபாகோ ஹோதீ’’தி (அ. நி. 4.34; 5.32; இதிவு. 90).

ஏவம் ப⁴க³வா ஸப்³பே³ஸம்பி மக்³க³ட்ட²ப²லட்டா²னம் வஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

யே ஸுப்பயுத்தாதிகா³தா²வண்ணனா

7. ஏவம் மக்³க³ட்ட²ப²லட்டா²னம் வஸேன ஸங்க⁴கு³ணேன ஸச்சம் வத்வா இதா³னி ததோ ஏகச்சானம் ப²லஸமாபத்திஸுக²மனுப⁴வந்தானம் கீ²ணாஸவபுக்³க³லானம்யேவ கு³ணேன வத்துமாரத்³தோ⁴ ‘‘யே ஸுப்பயுத்தா’’தி. தத்த² யேதி அனியமிதுத்³தே³ஸவசனம். ஸுப்பயுத்தாதி ஸுட்டு² பயுத்தா, அனேகவிஹிதம் அனேஸனம் பஹாய ஸுத்³தா⁴ஜீவிதம் நிஸ்ஸாய விபஸ்ஸனாய அத்தானம் பயுஞ்ஜிதுமாரத்³தா⁴தி அத்தோ². அத² வா ஸுப்பயுத்தாதி ஸுவிஸுத்³த⁴காயவசீபயோக³ஸமன்னாக³தா, தேன தேஸம் ஸீலக்க²ந்த⁴ம் த³ஸ்ஸேதி. மனஸா த³ள்ஹேனாதி த³ள்ஹேன மனஸா, தி²ரஸமாதி⁴யுத்தேன சேதஸாதி அத்தோ². தேன தேஸம் ஸமாதி⁴க்க²ந்த⁴ம் த³ஸ்ஸேதி. நிக்காமினோதி காயே ச ஜீவிதே ச அனபேக்கா² ஹுத்வா பஞ்ஞாது⁴ரேன வீரியேன ஸப்³ப³கிலேஸேஹி கதனிக்கமனா. தேன தேஸம் வீரியஸம்பன்னம் பஞ்ஞக்க²ந்த⁴ம் த³ஸ்ஸேதி.

கோ³தமஸாஸனம்ஹீதி கோ³த்ததோ கோ³தமஸ்ஸ ததா²க³தஸ்ஸேவ ஸாஸனம்ஹி. தேன இதோ ப³ஹித்³தா⁴ நானப்பகாரம்பி அமரதபம் கரோந்தானம் ஸுப்பயோகா³தி³கு³ணாபா⁴வதோ கிலேஸேஹி நிக்கமனாபா⁴வம் த³ஸ்ஸேதி. தேதி புப்³பே³ உத்³தி³ட்டா²னம் நித்³தே³ஸவசனம். பத்திபத்தாதி ஏத்த² பத்தப்³பா³தி பத்தி, பத்தப்³பா³ நாம பத்தும் அரஹா, யம் பத்வா அச்சந்தயோக³க்கே²மினோ ஹோந்தி, அரஹத்தப²லஸ்ஸேதம் அதி⁴வசனம், தம் பத்திம் பத்தாதி பத்திபத்தா. அமதந்தி நிப்³பா³னம். விக³ய்ஹாதி ஆரம்மணவஸேன விகா³ஹித்வா. லத்³தா⁴தி லபி⁴த்வா. முதா⁴தி அப்³யயேன காகணிகமத்தம்பி ப்³யயம் அகத்வா. நிப்³பு³திந்தி படிப்பஸ்ஸத்³த⁴கிலேஸத³ரத²ம் ப²லஸமாபத்திம். பு⁴ஞ்ஜமானாதி அனுப⁴வமானா. கிம் வுத்தம் ஹோதி? யே இமஸ்மிம் கோ³தமஸாஸனம்ஹி ஸீலஸம்பன்னத்தா ஸுப்பயுத்தா, ஸமாதி⁴ஸம்பன்னத்தா மனஸா த³ள்ஹேன, பஞ்ஞாஸம்பன்னத்தா நிக்காமினோ, தே இமாய ஸம்மாபடிபதா³ய அமதம் விக³ய்ஹ முதா⁴ லத்³தா⁴ ப²லஸமாபத்திஸஞ்ஞிதம் நிப்³பு³திம் பு⁴ஞ்ஜமானா பத்திபத்தா நாம ஹோந்தீதி.

ஏவம் ப⁴க³வா ப²லஸமாபத்திஸுக²மனுப⁴வந்தானம் கீ²ணாஸவபுக்³க³லானமேவ வஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

யதி²ந்த³கீ²லோதிகா³தா²வண்ணனா

8. ஏவம் கீ²ணாஸவபுக்³க³லானம் கு³ணேன ஸங்கா⁴தி⁴ட்டா²னம் ஸச்சம் வத்வா இதா³னி ப³ஹுஜனபச்சக்கே²ன ஸோதாபன்னஸ்ஸேவ கு³ணேன வத்துமாரத்³தோ⁴ ‘‘யதி²ந்த³கீ²லோ’’தி. தத்த² யதா²தி உபமாவசனம். இந்த³கீ²லோதி நக³ரத்³வாரவினிவாரணத்த²ம் உம்மாரப்³ப⁴ந்தரே அட்ட² வா த³ஸ வா ஹத்தே² பத²விம் க²ணித்வா ஆகோடிதஸ்ஸ ஸாரதா³ருமயத²ம்ப⁴ஸ்ஸேதம் அதி⁴வசனம். பத²விந்தி பூ⁴மிம். ஸிதோதி அந்தோ பவிஸித்வா நிஸ்ஸிதோ. ஸியாதி ப⁴வேய்ய. சதுப்³பி⁴ வாதேஹீதி சதூஹி தி³ஸாஹி ஆக³தேஹி வாதேஹி. அஸம்பகம்பியோதி கம்பேதும் வா சாலேதும் வா அஸக்குணேய்யோ. ததூ²பமந்தி ததா²வித⁴ம். ஸப்புரிஸந்தி உத்தமபுரிஸம். வதா³மீதி ப⁴ணாமி. யோ அரியஸச்சானி அவேச்ச பஸ்ஸதீதி யோ சத்தாரி அரியஸச்சானி பஞ்ஞாய அஜ்ஜோ²கா³ஹேத்வா பஸ்ஸதி. தத்த² அரியஸச்சானி குமாரபஞ்ஹே வுத்தனயேனேவ வேதி³தப்³பா³னி.

அயம் பனேத்த² ஸங்கே²பத்தோ² – யதா² ஹி இந்த³கீ²லோ க³ம்பீ⁴ரனேமதாய பத²விஸ்ஸிதோ சதுப்³பி⁴ வாதேஹி அஸம்பகம்பியோ ஸியா, இமம்பி ஸப்புரிஸம் ததூ²பமமேவ வதா³மி, யோ அரியஸச்சானி அவேச்ச பஸ்ஸதி. கஸ்மா? யஸ்மா ஸோபி இந்த³கீ²லோ விய சதூஹி வாதேஹி ஸப்³ப³தித்தி²யவாத³வாதேஹி அஸம்பகம்பியோ ஹோதி, தம்ஹா த³ஸ்ஸனா கேனசி கம்பேதும் வா சாலேதும் வா அஸக்குணேய்யோ. தஸ்மா ஸுத்தந்தரேபி வுத்தம் –

‘‘ஸேய்யதா²பி, பி⁴க்க²வே, அயோகீ²லோ வா இந்த³கீ²லோ வா க³ம்பீ⁴ரனேமோ ஸுனிகா²தோ அசலோ அஸம்பகம்பீ, புரத்தி²மாய சேபி தி³ஸாய ஆக³ச்சே²ய்ய பு⁴ஸா வாதவுட்டி², நேவ நம் ஸங்கம்பேய்ய ந ஸம்பகம்பேய்ய ந ஸம்பசாலேய்ய. பச்சி²மாய…பே… த³க்கி²ணாய, உத்தராயபி சே…பே… ந ஸம்பசாலேய்ய. தம் கிஸ்ஸ ஹேது? க³ம்பீ⁴ரத்தா, பி⁴க்க²வே, நேமஸ்ஸ, ஸுனிகா²தத்தா இந்த³கீ²லஸ்ஸ. ஏவமேவ கோ², பி⁴க்க²வே, யே ச கோ² கேசி ஸமணா வா ப்³ராஹ்மணா வா ‘இத³ம் து³க்க²ந்தி…பே… படிபதா³’தி யதா²பூ⁴தம் பஜானந்தி, தே ந அஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா முக²ம் ஓலோகேந்தி ‘அயம் நூன ப⁴வம் ஜானம் ஜானாதி, பஸ்ஸம் பஸ்ஸதீ’தி. தம் கிஸ்ஸ ஹேது? ஸுதி³ட்ட²த்தா, பி⁴க்க²வே, சதுன்னம் அரியஸச்சான’’ந்தி (ஸம். நி. 5.1109).

ஏவம் ப⁴க³வா ப³ஹுஜனபச்சக்க²ஸ்ஸ ஸோதாபன்னஸ்ஸேவ வஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

யே அரியஸச்சானீதிகா³தா²வண்ணனா

9. ஏவம் அவிஸேஸதோ ஸோதாபன்னஸ்ஸ கு³ணேன ஸங்கா⁴தி⁴ட்டா²னம் ஸச்சம் வத்வா இதா³னி யே தே தயோ ஸோதாபன்னா ஏகபீ³ஜீ கோலம்கோலோ ஸத்தக்க²த்துபரமோதி. யதா²ஹ –

‘‘இதே⁴கச்சோ புக்³க³லோ திண்ணம் ஸம்யோஜனானம் பரிக்க²யா ஸோதாபன்னோ ஹோதி…பே… ஸோ ஏகம்யேவ ப⁴வம் நிப்³ப³த்தித்வா து³க்க²ஸ்ஸந்தம் கரோதி, அயம் ஏகபீ³ஜீ. ததா² த்³வே வா தீணி வா குலானி ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி, அயம் கோலம்கோலோ. ததா² ஸத்தக்க²த்தும் தே³வேஸு ச மனுஸ்ஸேஸு ச ஸந்தா⁴வித்வா ஸம்ஸரித்வா து³க்க²ஸ்ஸந்தம் கரோதி, அயம் ஸத்தக்க²த்துபரமோ’’தி (பு. ப. 31-33).

தேஸம் ஸப்³ப³கனிட்ட²ஸ்ஸ ஸத்தக்க²த்துபரமஸ்ஸ கு³ணேன வத்துமாரத்³தோ⁴ ‘‘யே அரியஸச்சானீ’’தி. தத்த² யே அரியஸச்சானீதி ஏதம் வுத்தனயமேவ. விபா⁴வயந்தீதி பஞ்ஞாஓபா⁴ஸேன ஸச்சப்படிச்சா²த³கம் கிலேஸந்த⁴காரம் வித⁴மித்வா அத்தனோ பகாஸானி பாகடானி கரோந்தி. க³ம்பீ⁴ரபஞ்ஞேனாதி அப்பமேய்யபஞ்ஞதாய ஸதே³வகஸ்ஸ லோகஸ்ஸ ஞாணேன அலப்³ப⁴னேய்யப்பதிட்ட²பஞ்ஞேன, ஸப்³ப³ஞ்ஞுனாதி வுத்தம் ஹோதி. ஸுதே³ஸிதானீதி ஸமாஸப்³யாஸஸாகல்யவேகல்யாதீ³ஹி தேஹி தேஹி நயேஹி ஸுட்டு² தே³ஸிதானி. கிஞ்சாபி தே ஹோந்தி பு⁴ஸம் பமத்தாதி தே விபா⁴விதஅரியஸச்சா புக்³க³லா கிஞ்சாபி தே³வரஜ்ஜசக்கவத்திரஜ்ஜாதி³ப்பமாத³ட்டா²னம் ஆக³ம்ம பு⁴ஸம் பமத்தா ஹோந்தி, ததா²பி ஸோதாபத்திமக்³க³ஞாணேன அபி⁴ஸங்கா²ரவிஞ்ஞாணஸ்ஸ நிரோதே⁴ன ட²பேத்வா ஸத்த ப⁴வே அனமதக்³கே³ ஸம்ஸாரே யே உப்பஜ்ஜேய்யும் நாமஞ்ச ரூபஞ்ச, தேஸம் நிருத்³த⁴த்தா அத்த²ங்க³தத்தா ந அட்ட²மம் ப⁴வம் ஆதி³யந்தி, ஸத்தமப⁴வே ஏவ பன விபஸ்ஸனம் ஆரபி⁴த்வா அரஹத்தம் பாபுணந்தி.

ஏவம் ப⁴க³வா ஸத்தக்க²த்துபரமவஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

ஸஹாவஸ்ஸாதிகா³தா²வண்ணனா

10. ஏவம் ஸத்தக்க²த்துபரமஸ்ஸ அட்ட²மம் ப⁴வம் அனாதி³யனகு³ணேன ஸங்கா⁴தி⁴ட்டா²னம் ஸச்சம் வத்வா இதா³னி தஸ்ஸேவ ஸத்த ப⁴வே ஆதி³யதோபி அஞ்ஞேஹி அப்பஹீனப⁴வாதா³னேஹி புக்³க³லேஹி விஸிட்டே²ன கு³ணேன வத்துமாரத்³தோ⁴ ‘‘ஸஹாவஸ்ஸா’’தி. தத்த² ஸஹாவாதி ஸத்³தி⁴ம்யேவ. அஸ்ஸாதி ‘‘ந தே ப⁴வம் அட்ட²மமாதி³யந்தீ’’தி வுத்தேஸு அஞ்ஞதரஸ்ஸ. த³ஸ்ஸனஸம்பதா³யாதி ஸோதாபத்திமக்³க³ஸம்பத்தியா. ஸோதாபத்திமக்³கோ³ ஹி நிப்³பா³னம் தி³ஸ்வா கத்தப்³ப³கிச்சஸம்பதா³ய ஸப்³ப³பட²மம் நிப்³பா³னத³ஸ்ஸனதோ ‘‘த³ஸ்ஸன’’ந்தி வுச்சதி, தஸ்ஸ அத்தனி பாதுபா⁴வோ த³ஸ்ஸனஸம்பதா³, தாய த³ஸ்ஸனஸம்பதா³ய ஸஹ ஏவ. தயஸ்ஸு த⁴ம்மா ஜஹிதா ப⁴வந்தீதி ஏத்த² அஸ்ஸு-இதி பத³பூரணமத்தே நிபாதோ ‘‘இத³ம் ஸு மே, ஸாரிபுத்த, மஹாவிகடபோ⁴ஜனஸ்மிம் ஹோதீ’’திஆதீ³ஸு (ம. நி. 1.156) விய. யதோ ஸஹாவஸ்ஸ த³ஸ்ஸனஸம்பதா³ய தயோ த⁴ம்மா ஜஹிதா ப⁴வந்தி பஹீனா ஹோந்தீதி அயமேத்த² அத்தோ².

இதா³னி ஜஹிதத⁴ம்மத³ஸ்ஸனத்த²மாஹ ‘‘ஸக்காயதி³ட்டீ² விசிகிச்சி²தஞ்ச, ஸீலப்³ப³தம் வாபி யத³த்தி² கிஞ்சீ’’தி. தத்த² ஸதி காயே விஜ்ஜமானே உபாதா³னக்க²ந்த⁴பஞ்சகாக்²யே காயே வீஸதிவத்து²கா தி³ட்டி² ஸக்காயதி³ட்டி², ஸதீ வா தத்த² காயே தி³ட்டீ²திபி ஸக்காயதி³ட்டி², யதா²வுத்தப்பகாரே காயே விஜ்ஜமானா தி³ட்டீ²தி அத்தோ². ஸதியேவ வா காயே தி³ட்டீ²திபி ஸக்காயதி³ட்டி², யதா²வுத்தப்பகாரே காயே விஜ்ஜமானே ரூபாதி³ஸங்கா²தோ அத்தாதி ஏவம் பவத்தா தி³ட்டீ²தி அத்தோ². தஸ்ஸா ச பஹீனத்தா ஸப்³ப³தி³ட்டி²க³தானி பஹீனானேவ ஹோந்தி. ஸா ஹி நேஸம் மூலம். ஸப்³ப³கிலேஸப்³யாதி⁴வூபஸமனதோ பஞ்ஞா‘‘சிகிச்சி²த’’ந்தி வுச்சதி, தம் பஞ்ஞாசிகிச்சி²தம் இதோ விக³தம், ததோ வா பஞ்ஞாசிகிச்சி²தா இத³ம் விக³தந்தி விசிகிச்சி²தம். ‘‘ஸத்த²ரி கங்க²தீ’’திஆதி³னா (த⁴. ஸ. 1008; விப⁴. 915) நயேன வுத்தாய அட்ட²வத்து²காய விமதியா ஏதம் அதி⁴வசனம். தஸ்ஸா பஹீனத்தா ஸப்³பா³னிபி விசிகிச்சி²தானி பஹீனானி ஹோந்தி. தஞ்ஹி நேஸம் மூலம். ‘‘இதோ ப³ஹித்³தா⁴ ஸமணப்³ராஹ்மணானம் ஸீலேன ஸுத்³தி⁴ வதேன ஸுத்³தீ⁴’’தி ஏவமாதீ³ஸு (த⁴. ஸ. 1222; விப⁴. 938) ஆக³தம் கோ³ஸீலகுக்குரஸீலாதி³கம் ஸீலம் கோ³வதகுக்குரவதாதி³கஞ்ச வதம் ஸீலப்³ப³தந்தி வுச்சதி, தஸ்ஸ பஹீனத்தா ஸப்³ப³ம்பி நக்³கி³யமுண்டி³காதி³அமரதபம் பஹீனம் ஹோதி. தஞ்ஹி தஸ்ஸ மூலம், தேனேவ ஸப்³பா³வஸானே வுத்தம் ‘‘யத³த்தி² கிஞ்சீ’’தி. து³க்க²த³ஸ்ஸனஸம்பதா³ய சேத்த² ஸக்காயதி³ட்டி² ஸமுத³யத³ஸ்ஸனஸம்பதா³ய விசிகிச்சி²தம், மக்³க³த³ஸ்ஸனனிப்³பா³னத³ஸ்ஸனஸம்பதா³ய ஸீலப்³ப³தம் பஹீயதீதி விஞ்ஞாதப்³ப³ம்.

சதூஹபாயேஹீதிகா³தா²வண்ணனா

11. ஏவமஸ்ஸ கிலேஸவட்டப்பஹானம் த³ஸ்ஸேத்வா இதா³னி தஸ்மிம் கிலேஸவட்டே ஸதி யேன விபாகவட்டேன ப⁴விதப்³ப³ம், தப்பஹானா தஸ்ஸாபி பஹானம் தீ³பேந்தோ ஆஹ ‘‘சதூஹபாயேஹி ச விப்பமுத்தோ’’தி. தத்த² சத்தாரோ அபாயா நாம நிரயதிரச்சா²னபேத்திவிஸயஅஸுரகாயா. தேஹி ஏஸ ஸத்த ப⁴வே ஆதி³யந்தோபி விப்பமுத்தோதி அத்தோ².

ஏவமஸ்ஸ விபாகவட்டப்பஹானம் த³ஸ்ஸேத்வா இதா³னி யமஸ்ஸ விபாகவட்டஸ்ஸ மூலபூ⁴தம் கம்மவட்டம், தஸ்ஸாபி பஹானம் த³ஸ்ஸேந்தோ ஆஹ ‘‘ச²ச்சாபி⁴டா²னானி அப⁴ப்³ப³ காது’’ந்தி. தத்த² அபி⁴டா²னானீதி ஓளாரிகட்டா²னானி, தானி ஏஸ ச² அப⁴ப்³போ³ காதும். தானி ச ‘‘அட்டா²னமேதம், பி⁴க்க²வே, அனவகாஸோ, யம் தி³ட்டி²ஸம்பன்னோ புக்³க³லோ மாதரம் ஜீவிதா வோரோபேய்யா’’திஆதி³னா (அ. நி. 1.271; ம. நி. 3.128; விப⁴. 809) நயேன ஏககனிபாதே வுத்தானி மாதுகா⁴தபிதுகா⁴தஅரஹந்தகா⁴தலோஹிதுப்பாத³ஸங்க⁴பே⁴த³அஞ்ஞஸத்தா²ருத்³தே³ஸகம்மானீதி வேதி³தப்³பா³னி. தானி ஹி கிஞ்சாபி தி³ட்டி²ஸம்பன்னோ அரியஸாவகோ குந்த²கிபில்லிகம்பி ஜீவிதா ந வோரோபேதி, அபிச கோ² பன புது²ஜ்ஜனபா⁴வஸ்ஸ விக³ரஹணத்த²ம் வுத்தானி. புது²ஜ்ஜனோ ஹி அதி³ட்டி²ஸம்பன்னத்தா ஏவம்மஹாஸாவஜ்ஜானி அபி⁴டா²னானிபி கரோதி, த³ஸ்ஸனஸம்பன்னோ பன அப⁴ப்³போ³ தானி காதுந்தி. அப⁴ப்³ப³க்³க³ஹணஞ்சேத்த² ப⁴வந்தரேபி அகரணத³ஸ்ஸனத்த²ம். ப⁴வந்தரேபி ஹி ஏஸ அத்தனோ அரியஸாவகபா⁴வம் அஜானந்தோபி த⁴ம்மதாய ஏவ ஏதானி வா ச² பகதிபாணாதிபாதாதீ³னி வா பஞ்ச வேரானி அஞ்ஞஸத்தா²ருத்³தே³ஸேன ஸஹ ச² டா²னானி ந கரோதி, யானி ஸந்தா⁴ய ஏகச்சே ‘‘ச² சா²பி⁴டா²னானீ’’திபி பட²ந்தி. மதமச்ச²க்³கா³ஹாத³யோ சேத்த² அரியஸாவககா³மதா³ரகானம் நித³ஸ்ஸனம்.

ஏவம் ப⁴க³வா ஸத்த ப⁴வே ஆதி³யதோபி அரியஸாவகஸ்ஸ அஞ்ஞேஹி அப்பஹீனப⁴வாதா³னேஹி புக்³க³லேஹி விஸிட்ட²கு³ணவஸேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

கிஞ்சாபி ஸோதிகா³தா²வண்ணனா

12. ஏவம் ஸத்த ப⁴வே ஆதி³யதோபி அஞ்ஞேஹி அப்பஹீனப⁴வாதா³னேஹி புக்³க³லேஹி விஸிட்ட²கு³ணேன ஸங்கா⁴தி⁴ட்டா²னம் ஸச்சம் வத்வா இதா³னி ந கேவலம் த³ஸ்ஸனஸம்பன்னோ ச² அபி⁴டா²னானி அப⁴ப்³போ³ காதும், கிந்து அப்பமத்தகம்பி பாபகம்மம் கத்வா தஸ்ஸ படிச்சா²த³னாயபி அப⁴ப்³போ³தி பமாத³விஹாரினோபி த³ஸ்ஸனஸம்பன்னஸ்ஸ கதப்படிச்சா²த³னாபா⁴வகு³ணேன வத்துமாரத்³தோ⁴ ‘‘கிஞ்சாபி ஸோ கம்ம கரோதி பாபக’’ந்தி.

தஸ்ஸத்தோ² – ஸோ த³ஸ்ஸனஸம்பன்னோ கிஞ்சாபி ஸதிஸம்மோஸேன பமாத³விஹாரம் ஆக³ம்ம யம் தம் ப⁴க³வதா லோகவஜ்ஜம் ஸஞ்சிச்சாதிக்கமனம் ஸந்தா⁴ய வுத்தம் ‘‘யம் மயா ஸாவகானம் ஸிக்கா²பத³ம் பஞ்ஞத்தம், தம் மம ஸாவகா ஜீவிதஹேதுபி நாதிக்கமந்தீ’’தி (சூளவ. 385; உதா³. 45) தம் ட²பேத்வா அஞ்ஞம் குடிகாரஸஹஸேய்யாதி³ம் பண்ணத்திவஜ்ஜவீதிக்கமஸங்கா²தம் பு³த்³த⁴ப்பதிகுட்ட²ம் காயேன பாபகம்மம் கரோதி, பத³ஸோத⁴ம்மஉத்தரிச²ப்பஞ்சவாசாத⁴ம்மதே³ஸனஸம்ப²ப்பலாபப²ருஸவசனாதி³ம் வா வாசாய , உத³ சேதஸா வா கத்த²சி லோப⁴தோ³ஸுப்பாத³னம் ஜாதரூபாதி³ஸாதி³யனம் சீவராதி³பரிபோ⁴கே³ஸு அபச்சவேக்க²ணாதி³ம் வா பாபகம்மம் கரோதி. அப⁴ப்³போ³ ஸோ தஸ்ஸ படிச்ச²தா³ய ந ஸோ தம் ‘‘இத³ம் அகப்பியமகரணீய’’ந்தி ஜானித்வா முஹுத்தம்பி படிச்சா²தே³தி, தம்க²ணம் ஏவ பன ஸத்த²ரி வா விஞ்ஞூஸு வா ஸப்³ரஹ்மசாரீஸு ஆவி கத்வா யதா²த⁴ம்மம் படிகரோதி, ‘‘ந புன கரிஸ்ஸாமீ’’தி ஏவம் ஸம்வரிதப்³ப³ம் வா ஸம்வரதி. கஸ்மா? யஸ்மா அப⁴ப்³ப³தா தி³ட்ட²பத³ஸ்ஸ வுத்தா, ஏவரூபம்பி பாபகம்மம் கத்வா தஸ்ஸ படிச்சா²தா³ய தி³ட்ட²னிப்³பா³னபத³ஸ்ஸ த³ஸ்ஸனஸம்பன்னஸ்ஸ புக்³க³லஸ்ஸ அப⁴ப்³ப³தா வுத்தாதி அத்தோ².

கத²ம்?

‘‘ஸேய்யதா²பி, பி⁴க்க²வே, த³ஹரோ குமாரோ மந்தோ³ உத்தானஸேய்யகோ ஹத்தே²ன வா பாதே³ன வா அங்கா³ரம் அக்கமித்வா கி²ப்பமேவ படிஸம்ஹரதி, ஏவமேவ கோ², பி⁴க்க²வே, த⁴ம்மதா ஏஸா தி³ட்டி²ஸம்பன்னஸ்ஸ புக்³க³லஸ்ஸ, கிஞ்சாபி ததா²ரூபிம் ஆபத்திம் ஆபஜ்ஜதி, யதா²ரூபாய ஆபத்தியா வுட்டா²னம் பஞ்ஞாயதி. அத² கோ² நம் கி²ப்பமேவ ஸத்த²ரி வா விஞ்ஞூஸு வா ஸப்³ரஹ்மசாரீஸு தே³ஸேதி விவரதி உத்தானீகரோதி, தே³ஸேத்வா விவரித்வா உத்தானீகத்வா ஆயதிம் ஸம்வரம் ஆபஜ்ஜதீ’’தி (ம. நி. 1.496).

ஏவம் ப⁴க³வா பமாத³விஹாரினோபி த³ஸ்ஸனஸம்பன்னஸ்ஸ கதப்படிச்சா²த³னாபா⁴வகு³ணேன ஸங்க⁴ரதனஸ்ஸ கு³ணம் வத்வா இதா³னி தமேவ கு³ணம் நிஸ்ஸாய ஸச்சவசனம் பயுஞ்ஜதி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

வனப்பகு³ம்பே³திகா³தா²வண்ணனா

13. ஏவம் ஸங்க⁴பரியாபன்னானம் புக்³க³லானம் தேன தேன கு³ணப்பகாரேன ஸங்கா⁴தி⁴ட்டா²னம் ஸச்சம் வத்வா இதா³னி ய்வாயம் ப⁴க³வதா ரதனத்தயகு³ணம் தீ³பேந்தேன இத⁴ ஸங்கே²பேன அஞ்ஞத்ர ச வித்தா²ரேன பரியத்தித⁴ம்மோ தே³ஸிதோ, தம்பி நிஸ்ஸாய புன பு³த்³தா⁴தி⁴ட்டா²னம் ஸச்சம் வத்துமாரத்³தோ⁴ ‘‘வனப்பகு³ம்பே³ யதா² பு²ஸ்ஸிதக்³கே³’’தி. தத்த² ஆஸன்னஸன்னிவேஸவவத்தி²தானம் ருக்கா²னம் ஸமூஹோ வனம், மூலஸாரபே²க்³கு³தசஸாகா²பலாஸேஹி பவுத்³தோ⁴ கு³ம்போ³ பகு³ம்போ³, வனஸ்ஸ, வனே வா பகு³ம்போ³ வனப்பகு³ம்போ³. ஸ்வாயம் ‘‘வனப்பகு³ம்பே³’’தி வுத்தோ, ஏவம்பி ஹி வத்தும் லப்³ப⁴தி ‘‘அத்தி² ஸவிதக்கஸவிசாரே, அத்தி² அவிதக்கவிசாரமத்தே, ஸுகே² து³க்கே² ஜீவே’’திஆதீ³ஸு (தீ³. நி. 1.174; ம. நி. 2.228) விய. யதா²தி உபமாவசனம். பு²ஸ்ஸிதானி அக்³கா³னி அஸ்ஸாதி பு²ஸ்ஸிதக்³கோ³, ஸப்³ப³ஸாகா²பஸாகா²ஸு ஸஞ்ஜாதபுப்போ²தி அத்தோ². ஸோ புப்³பே³ வுத்தனயேனேவ ‘‘பு²ஸ்ஸிதக்³கே³’’தி வுத்தோ. கி³ம்ஹானமாஸே பட²மஸ்மிம் கி³ம்ஹேதி யே சத்தாரோ கி³ம்ஹானம் மாஸா, தேஸம் சதுன்னம் கி³ம்ஹமாஸானம் ஏகஸ்மிம் மாஸே. கதரஸ்மிம் மாஸே இதி சே? பட²மஸ்மிம் கி³ம்ஹே, சித்ரமாஸேதி அத்தோ². ஸோ ஹி ‘‘பட²மகி³ம்ஹோ’’தி ச ‘‘பா³லவஸந்தோ’’தி ச வுச்சதி. ததோ பரம் பத³த்த²தோ பாகடமேவ.

அயம் பனேத்த² பிண்ட³த்தோ² – யதா² பட²மகி³ம்ஹனாமகே பா³லவஸந்தே நானாவித⁴ருக்க²க³ஹனே வனே ஸுபுப்பி²தக்³க³ஸாகோ² தருணருக்க²க³ச்ச²பரியாயனாமோ பகு³ம்போ³ அதிவிய ஸஸ்ஸிரிகோ ஹோதி, ஏவமேவ க²ந்தா⁴யதனாதீ³ஹி ஸதிபட்டா²னஸம்மப்பதா⁴னாதீ³ஹி ஸீலஸமாதி⁴க்க²ந்தா⁴தீ³ஹி வா நானப்பகாரேஹி அத்த²ப்பபே⁴த³புப்பே²ஹி அதிவிய ஸஸ்ஸிரிகத்தா ததூ²பமம் நிப்³பா³னகா³மிமக்³க³தீ³பனதோ நிப்³பா³னகா³மிம் பரியத்தித⁴ம்மவரம் நேவ லாப⁴ஹேது ந ஸக்காராதி³ஹேது, கேவலந்து மஹாகருணாய அப்³பு⁴ஸ்ஸாஹிதஹத³யோ ஸத்தானம் பரமஹிதாய அதே³ஸயீதி. பரமம் ஹிதாயாதி ஏத்த² ச கா³தா²ப³ந்த⁴ஸுக²த்த²ம் அனுனாஸிகோ. அயம் பனத்தோ² – பரமஹிதாய நிப்³பா³னாய அதே³ஸயீதி.

ஏவம் ப⁴க³வா இமம் ஸுபுப்பி²தக்³க³வனப்பகு³ம்ப³ஸதி³ஸம் பரியத்தித⁴ம்மம் வத்வா இதா³னி தமேவ நிஸ்ஸாய பு³த்³தா⁴தி⁴ட்டா²னம் ஸச்சவசனம் பயுஞ்ஜதி ‘‘இத³ம்பி பு³த்³தே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. கேவலம் பன இத³ம்பி யதா²வுத்தபகாரபரியத்தித⁴ம்மஸங்கா²தம் பு³த்³தே⁴ ரதனம் பணீதந்தி ஏவம் யோஜேதப்³ப³ம். இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

வரோ வரஞ்ஞூதிகா³தா²வண்ணனா

14. ஏவம் ப⁴க³வா பரியத்தித⁴ம்மேன பு³த்³தா⁴தி⁴ட்டா²னம் ஸச்சம் வத்வா இதா³னி லோகுத்தரத⁴ம்மேன வத்துமாரத்³தோ⁴ ‘‘வரோ வரஞ்ஞூ’’தி. தத்த² வரோதி பணீதாதி⁴முத்திகேஹி இச்சி²தோ ‘‘அஹோ வத மயம்பி ஏவரூபா அஸ்ஸாமா’’தி, வரகு³ணயோக³தோ வா வரோ உத்தமோ ஸேட்டோ²தி அத்தோ². வரஞ்ஞூதி நிப்³பா³னஞ்ஞூ. நிப்³பா³னஞ்ஹி ஸப்³ப³த⁴ம்மானம் உத்தமட்டே²ன வரம், தஞ்சேஸ போ³தி⁴மூலே ஸயம் படிவிஜ்ஜி²த்வா அஞ்ஞாஸி. வரதோ³தி பஞ்சவக்³கி³யப⁴த்³த³வக்³கி³யஜடிலாதீ³னம் அஞ்ஞேஸஞ்ச தே³வமனுஸ்ஸானம் நிப்³பே³த⁴பா⁴கி³யவாஸனாபா⁴கி³யவரத⁴ம்மதா³யீதி அத்தோ². வராஹரோதி வரஸ்ஸ மக்³க³ஸ்ஸ ஆஹடத்தா வராஹரோதி வுச்சதி. ஸோ ஹி ப⁴க³வா தீ³பங்கரதோ பபு⁴தி ஸமதிம்ஸ பாரமியோ பூரேந்தோ புப்³ப³கேஹி ஸம்மாஸம்பு³த்³தே⁴ஹி அனுயாதம் புராணமக்³க³வரமாஹரி, தேன ‘‘வராஹரோ’’தி வுச்சதி.

அபிச ஸப்³ப³ஞ்ஞுதஞ்ஞாணப்படிலாபே⁴ன வரோ, நிப்³பா³னஸச்சி²கிரியாய வரஞ்ஞூ, ஸத்தானம் விமுத்திஸுக²தா³னேன வரதோ³, உத்தமபடிபதா³ஹரணேன வராஹரோ. ஏதேஹி லோகுத்தரகு³ணேஹி அதி⁴கஸ்ஸ கஸ்ஸசி கு³ணஸ்ஸ அபா⁴வதோ அனுத்தரோ.

அபரோ நயோ – வரோ உபஸமாதி⁴ட்டா²னபரிபூரணேன, வரஞ்ஞூ பஞ்ஞாதி⁴ட்டா²னபரிபூரணேன, வரதோ³ சாகா³தி⁴ட்டா²னபரிபூரணேன, வராஹரோ ஸச்சாதி⁴ட்டா²னபரிபூரணேன, வரம் மக்³க³ஸச்சமாஹரீதி. ததா² வரோ புஞ்ஞுஸ்ஸயேன, வரஞ்ஞூ பஞ்ஞுஸ்ஸயேன, வரதோ³ பு³த்³த⁴பா⁴வத்தி²கானம் தது³பாயஸம்பதா³னேன, வராஹரோ பச்சேகபு³த்³த⁴பா⁴வத்தி²கானம் தது³பாயாஹரணேன, அனுத்தரோ தத்த² தத்த² அஸதி³ஸதாய, அத்தனா வா அனாசரியகோ ஹுத்வா பரேஸம் ஆசரியபா⁴வேன, த⁴ம்மவரம் அதே³ஸயி ஸாவகபா⁴வத்தி²கானம் தத³த்தா²ய ஸ்வாக்கா²ததாதி³கு³ணயுத்தஸ்ஸ த⁴ம்மவரஸ்ஸ தே³ஸனதோ. ஸேஸம் வுத்தனயமேவாதி.

ஏவம் ப⁴க³வா நவவிதே⁴ன லோகுத்தரத⁴ம்மேன அத்தனோ கு³ணம் வத்வா இதா³னி தமேவ கு³ணம் நிஸ்ஸாய பு³த்³தா⁴தி⁴ட்டா²னம் ஸச்சவசனம் பயுஞ்ஜதி ‘‘இத³ம்பி பு³த்³தே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. கேவலம் பன யம் வரம் லோகுத்தரத⁴ம்மம் ஏஸ அஞ்ஞாஸி, யஞ்ச அதா³ஸி, யஞ்ச ஆஹரி, யஞ்ச தே³ஸேஸி, இத³ம்பி பு³த்³தே⁴ ரதனம் பணீதந்தி ஏவம் யோஜேதப்³ப³ம். இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

கீ²ணந்திகா³தா²வண்ணனா

15. ஏவம் ப⁴க³வா பரியத்தித⁴ம்மஞ்ச நவலோகுத்தரத⁴ம்மஞ்ச நிஸ்ஸாய த்³வீஹி கா³தா²ஹி பு³த்³தா⁴தி⁴ட்டா²னம் ஸச்சம் வத்வா இதா³னி யே தம் பரியத்தித⁴ம்மம் அஸ்ஸோஸும், ஸுதானுஸாரேன ச படிபஜ்ஜித்வா நவப்பகாரம்பி லோகுத்தரத⁴ம்மம் அதி⁴க³மிம்ஸு, தேஸம் அனுபாதி³ஸேஸனிப்³பா³னபத்திகு³ணம் நிஸ்ஸாய புன ஸங்கா⁴தி⁴ட்டா²னம் ஸச்சம் வத்துமாரத்³தோ⁴ ‘‘கீ²ணம் புராண’’ந்தி. தத்த² கீ²ணந்தி ஸமுச்சி²ன்னம். புராணந்தி புராதனம். நவந்தி ஸம்பதி வத்தமானம். நத்தி² ஸம்ப⁴வந்தி அவிஜ்ஜமானபாதுபா⁴வம். விரத்தசித்தாதி வீதராக³சித்தா. ஆயதிகே ப⁴வஸ்மிந்தி அனாக³தமத்³தா⁴னம் புனப்³ப⁴வே. தேதி யேஸம் கீ²ணம் புராணம் நவம் நத்தி² ஸம்ப⁴வம், யே ச ஆயதிகே ப⁴வஸ்மிம் விரத்தசித்தா, தே கீ²ணாஸவா பி⁴க்கூ². கீ²ணபீ³ஜாதி உச்சி²ன்னபீ³ஜா. அவிரூள்ஹிச²ந்தா³தி விரூள்ஹிச²ந்த³விரஹிதா. நிப்³ப³ந்தீதி விஜ்ஜா²யந்தி. தீ⁴ராதி தி⁴திஸம்பன்னா. யதா²யம் பதீ³போதி அயம் பதீ³போ விய.

கிம் வுத்தம் ஹோதி? யம் தம் ஸத்தானம் உப்பஜ்ஜித்வா நிருத்³த⁴ம்பி புராணம் அதீதகாலிகம் கம்மம் தண்ஹாஸினேஹஸ்ஸ அப்பஹீனத்தா படிஸந்தி⁴ஆஹரணஸமத்த²தாய அகீ²ணம்யேவ ஹோதி, தம் புராணம் கம்மம் யேஸம் அரஹத்தமக்³கே³ன தண்ஹாஸினேஹஸ்ஸ ஸோஸிதத்தா அக்³கி³னா த³ட்³ட⁴பீ³ஜமிவ ஆயதிம் விபாகதா³னாஸமத்த²தாய கீ²ணம். யஞ்ச நேஸம் பு³த்³த⁴பூஜாதி³வஸேன இதா³னி பவத்தமானம் கம்மம் நவந்தி வுச்சதி, தஞ்ச தண்ஹாபஹானேனேவ சி²ன்னமூலபாத³பபுப்ப²மிவ ஆயதிம் ப²லதா³னாஸமத்த²தாய யேஸம் நத்தி² ஸம்ப⁴வம், யே ச தண்ஹாபஹானேனேவ ஆயதிகே ப⁴வஸ்மிம் விரத்தசித்தா, தே கீ²ணாஸவா பி⁴க்கூ² ‘‘கம்மம் கே²த்தம் விஞ்ஞாணம் பீ³ஜ’’ந்தி (அ. நி. 3.77) ஏத்த² வுத்தஸ்ஸ படிஸந்தி⁴விஞ்ஞாணஸ்ஸ கம்மக்க²யேனேவ கீ²ணத்தா கீ²ணபீ³ஜா. யோபி புப்³பே³ புனப்³ப⁴வஸங்கா²தாய விரூள்ஹியா ச²ந்தோ³ அஹோஸி. தஸ்ஸபி ஸமுத³யப்பஹானேனேவ பஹீனத்தா புப்³பே³ விய சுதிகாலே அஸம்ப⁴வேன அவிரூள்ஹிச²ந்தா³ தி⁴திஸம்பன்னத்தா தீ⁴ரா சரிமவிஞ்ஞாணனிரோதே⁴ன யதா²யம் பதீ³போ நிப்³பு³தோ, ஏவம் நிப்³ப³ந்தி, புன ‘‘ரூபினோ வா அரூபினோ வா’’தி ஏவமாதி³ம் பஞ்ஞத்திபத²ம் அச்சேந்தீதி. தஸ்மிம் கிர ஸமயே நக³ரதே³வதானம் பூஜனத்தா²ய ஜாலிதேஸு பதீ³பேஸு ஏகோ பதீ³போ விஜ்ஜா²யி, தம் த³ஸ்ஸேந்தோ ஆஹ ‘‘யதா²யம் பதீ³போ’’தி.

ஏவம் ப⁴க³வா யே தம் புரிமாஹி த்³வீஹி கா³தா²ஹி வுத்தம் பரியத்தித⁴ம்மம் அஸ்ஸோஸும், ஸுதானுஸாரேன ச படிபஜ்ஜித்வா நவப்பகாரம்பி லோகுத்தரத⁴ம்மம் அதி⁴க³மிம்ஸு, தேஸம் அனுபாதி³ஸேஸனிப்³பா³னபத்திகு³ணம் வத்வா இதா³னி தமேவ கு³ணம் நிஸ்ஸாய ஸங்கா⁴தி⁴ட்டா²னம் ஸச்சவசனம் பயுஞ்ஜந்தோ தே³ஸனம் ஸமாபேஸி ‘‘இத³ம்பி ஸங்கே⁴’’தி. தஸ்ஸத்தோ² புப்³பே³ வுத்தனயேனேவ வேதி³தப்³போ³. கேவலம் பன இத³ம்பி யதா²வுத்தேன பகாரேன கீ²ணாஸவபி⁴க்கூ²னம் நிப்³பா³னஸங்கா²தம் ஸங்கே⁴ ரதனம் பணீதந்தி ஏவம் யோஜேதப்³ப³ம். இமிஸ்ஸாபி கா³தா²ய ஆணா கோடிஸதஸஹஸ்ஸசக்கவாளேஸு அமனுஸ்ஸேஹி படிக்³க³ஹிதாதி.

தே³ஸனாபரியோஸானே ராஜகுலஸ்ஸ ஸோத்தி² அஹோஸி, ஸப்³பூ³பத்³த³வா வூபஸமிம்ஸு, சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி.

யானீதா⁴திகா³தா²த்தயவண்ணனா

16. அத² ஸக்கோ தே³வானமிந்தோ³ ‘‘ப⁴க³வதா ரதனத்தயகு³ணம் நிஸ்ஸாய ஸச்சவசனம் பயுஞ்ஜமானேன நாக³ரஸ்ஸ ஸோத்தி² கதா, மயாபி நாக³ரஸ்ஸ ஸோத்தி²த்த²ம் ரதனத்தயகு³ணம் நிஸ்ஸாய கிஞ்சி வத்தப்³ப³’’ந்தி சிந்தேத்வா அவஸானே கா³தா²த்தயம் அபா⁴ஸி ‘‘யானீத⁴ பூ⁴தானீ’’தி தத்த² யஸ்மா பு³த்³தோ⁴ யதா² லோகஹிதத்தா²ய உஸ்ஸுக்கம் ஆபன்னேஹி ஆக³ந்தப்³ப³ம், ததா² ஆக³ததோ யதா² ச தேஹி க³ந்தப்³ப³ம், ததா² க³ததோ யதா² ச தேஹி ஆஜானிதப்³ப³ம், ததா² ஆஜானனதோ, யதா² ச ஜானிதப்³ப³ம், ததா² ஜானனதோ, யஞ்ச ததே²வ ஹோதி, தஸ்ஸ க³த³னதோ ச ‘‘ததா²க³தோ’’தி வுச்சதி. யஸ்மா ச ஸோ தே³வமனுஸ்ஸேஹி புப்ப²க³ந்தா⁴தி³னா ப³ஹி நிப்³ப³த்தேன உபகாரகேன, த⁴ம்மானுத⁴ம்மபடிபத்தாதி³னா ச அத்தனி நிப்³ப³த்தேன அதிவிய பூஜிதோ, தஸ்மா ஸக்கோ தே³வானமிந்தோ³ ஸப்³ப³ம் தே³வபரிஸம் அத்தனா ஸத்³தி⁴ம் ஸம்பிண்டே³த்வா ஆஹ ‘‘ததா²க³தம் தே³வமனுஸ்ஸபூஜிதம், பு³த்³த⁴ம் நமஸ்ஸாம ஸுவத்தி² ஹோதூ’’தி.

17. யஸ்மா பன த⁴ம்மே மக்³க³த⁴ம்மோ யதா² யுக³னத்³த⁴ஸமத²விபஸ்ஸனாப³லேன க³ந்தப்³ப³ம் கிலேஸபக்க²ம் ஸமுச்சி²ந்த³ந்தேன, ததா² க³தோதி ததா²க³தோ. நிப்³பா³னத⁴ம்மோபி யதா² க³தோ பஞ்ஞாய படிவித்³தோ⁴ ஸப்³ப³து³க்க²ப்படிவிகா⁴தாய ஸம்பஜ்ஜதி, பு³த்³தா⁴தீ³ஹி ததா² அவக³தோ, தஸ்மா ‘‘ததா²க³தோ’’த்வேவ வுச்சதி. யஸ்மா ச ஸங்கோ⁴பி யதா² அத்தஹிதாய படிபன்னேஹி க³ந்தப்³ப³ம் தேன தேன மக்³கே³ன, ததா² க³தோதி ‘‘ததா²க³தோ’’த்வேவ வுச்சதி. தஸ்மா அவஸேஸகா³தா²த்³வயேபி ததா²க³தம் த⁴ம்மம் நமஸ்ஸாம ஸுவத்தி² ஹோது, ததா²க³தம் ஸங்க⁴ம் நமஸ்ஸாம ஸுவத்தி² ஹோதூதி வுத்தம். ஸேஸம் வுத்தனயமேவாதி.

ஏவம் ஸக்கோ தே³வானமிந்தோ³ இமம் கா³தா²த்தயம் பா⁴ஸித்வா ப⁴க³வந்தம் பத³க்கி²ணம் கத்வா தே³வபுரமேவ க³தோ ஸத்³தி⁴ம் தே³வபரிஸாய. ப⁴க³வா பன ததே³வ ரதனஸுத்தம் து³தியதி³வஸேபி தே³ஸேஸி, புன சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி, ஏவம் யாவ ஸத்தமதி³வஸம் தே³ஸேஸி, தி³வஸே தி³வஸே ததே²வ த⁴ம்மாபி⁴ஸமயோ அஹோஸி. ப⁴க³வா அட்³ட⁴மாஸமேவ வேஸாலியம் விஹரித்வா ராஜூனம் ‘‘க³ச்சா²மா’’தி படிவேதே³ஸி. ததோ ராஜானோ தி³கு³ணேன ஸக்காரேன புன தீஹி தி³வஸேஹி ப⁴க³வந்தம் க³ங்கா³தீரம் நயிம்ஸு. க³ங்கா³ய நிப்³ப³த்தா நாக³ராஜானோ சிந்தேஸும் ‘‘மனுஸ்ஸா ததா²க³தஸ்ஸ ஸக்காரம் கரோந்தி, மயம் கிம் ந கரிஸ்ஸாமா’’தி ஸுவண்ணரஜதமணிமயா நாவாயோ மாபேத்வா ஸுவண்ணரஜதமணிமயே ஏவ பல்லங்கே பஞ்ஞபேத்வா பஞ்சவண்ணபது³மஸஞ்ச²ன்னம் உத³கம் கரித்வா ‘‘அம்ஹாகம் அனுக்³க³ஹம் கரோதா²’’தி ப⁴க³வந்தம் யாசிம்ஸு. ப⁴க³வா அதி⁴வாஸேத்வா ரதனனாவமாரூள்ஹோ, பஞ்ச ச பி⁴க்கு²ஸதானி பஞ்சஸதம் நாவாயோ அபி⁴ரூள்ஹா. நாக³ராஜானோ ப⁴க³வந்தம் ஸத்³தி⁴ம் பி⁴க்கு²ஸங்கே⁴ன நாக³ப⁴வனம் பவேஸேஸும். தத்ர ஸுத³ம் ப⁴க³வா ஸப்³ப³ரத்திம் நாக³பரிஸாய த⁴ம்மம் தே³ஸேஸி. து³தியதி³வஸே தி³ப்³பே³ஹி கா²த³னீயபோ⁴ஜனீயேஹி மஹாதா³னம் அகம்ஸு, ப⁴க³வா அனுமோதி³த்வா நாக³ப⁴வனா நிக்க²மி.

பூ⁴மட்டா² தே³வா ‘‘மனுஸ்ஸா ச நாகா³ ச ததா²க³தஸ்ஸ ஸக்காரம் கரோந்தி, மயம் கிம் ந கரிஸ்ஸாமா’’தி சிந்தேத்வா வனப்பகு³ம்ப³ருக்க²பப்³ப³தாதீ³ஸு ச²த்தாதிச²த்தானி உக்கி²பிம்ஸு. ஏதேனேவ உபாயேன யாவ அகனிட்ட²ப்³ரஹ்மப⁴வனம், தாவ மஹாஸக்காரவிஸேஸோ நிப்³ப³த்தி. பி³ம்பி³ஸாரோபி லிச்ச²வீஹி ஆக³தகாலே கதஸக்காரதோ தி³கு³ணமகாஸி. புப்³பே³ வுத்தனயேனேவ பஞ்சஹி தி³வஸேஹி ப⁴க³வந்தம் ராஜக³ஹம் ஆனேஸி.

ராஜக³ஹமனுப்பத்தே ப⁴க³வதி பச்சா²ப⁴த்தம் மண்ட³லமாளே ஸன்னிபதிதானம் பி⁴க்கூ²னம் அயமந்தரகதா² உத³பாதி³ ‘‘அஹோ பு³த்³த⁴ஸ்ஸ ப⁴க³வதோ ஆனுபா⁴வோ, யம் உத்³தி³ஸ்ஸ க³ங்கா³ய ஓரதோ ச பாரதோ ச அட்ட²யோஜனோ பூ⁴மிபா⁴கோ³ நின்னஞ்ச த²லஞ்ச ஸமம் கத்வா வாலுகாய ஓகிரித்வா புப்பே²ஹி ஸஞ்ச²ன்னோ, யோஜனப்பமாணம் க³ங்கா³ய உத³கம் நானாவண்ணேஹி பது³மேஹி ஸஞ்ச²ன்னம், யாவ அகனிட்ட²ப⁴வனம், தாவ ச²த்தாதிச²த்தானி உஸ்ஸிதானீ’’தி. ப⁴க³வா தம் பவத்திம் ஞத்வா க³ந்த⁴குடிதோ நிக்க²மித்வா தங்க²ணானுரூபேன பாடிஹாரியேன க³ந்த்வா மண்ட³லமாளே பஞ்ஞத்தவரபு³த்³தா⁴ஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி. பி⁴க்கூ² ஸப்³ப³ம் ஆரோசேஸும் ப⁴க³வா ஏதத³வோச – ‘‘ந, பி⁴க்க²வே, அயம் பூஜாவிஸேஸோ மய்ஹம் பு³த்³தா⁴னுபா⁴வேன நிப்³ப³த்தோ, ந நாக³தே³வப்³ரஹ்மானுபா⁴வேன, அபிச கோ² புப்³பே³ அப்பமத்தகபரிச்சாகா³னுபா⁴வேன நிப்³ப³த்தோ’’தி. பி⁴க்கூ² ஆஹம்ஸு ‘‘ந மயம், ப⁴ந்தே, தம் அப்பமத்தகம் பரிச்சாக³ம் ஜானாம, ஸாது⁴ நோ ப⁴க³வா ததா² கதே²து, யதா² மயம் தம் ஜானேய்யாமா’’தி.

ப⁴க³வா ஆஹ – பூ⁴தபுப்³ப³ம், பி⁴க்க²வே, தக்கஸிலாயம் ஸங்கோ² நாம ப்³ராஹ்மணோ அஹோஸி. தஸ்ஸ புத்தோ ஸுஸீமோ நாம மாணவோ ஸோளஸவஸ்ஸுத்³தே³ஸிகோ வயேன. ஸோ ஏகதி³வஸம் பிதரம் உபஸங்கமித்வா அபி⁴வாதே³த்வா ஏகமந்தம் அட்டா²ஸி. அத² தம் பிதா ஆஹ ‘‘கிம், தாத, ஸுஸீமா’’தி? ஸோ ஆஹ ‘‘இச்சா²மஹம், தாத, பா³ராணஸிம் க³ந்த்வா ஸிப்பம் உக்³க³ஹேது’’ந்தி. ‘‘தேன ஹி, தாத, ஸுஸீம, அஸுகோ நாம ப்³ராஹ்மணோ மம ஸஹாயகோ, தஸ்ஸ ஸந்திகம் க³ந்த்வா உக்³க³ண்ஹாஹீ’’தி கஹாபணஸஹஸ்ஸம் அதா³ஸி. ஸோ தம் க³ஹேத்வா மாதாபிதரோ அபி⁴வாதே³த்வா அனுபுப்³பே³ன பா³ராணஸிம் க³ந்த்வா உபசாரயுத்தேன விதி⁴னா ஆசரியம் உபஸங்கமித்வா அபி⁴வாதே³த்வா அத்தானம் நிவேதே³ஸி. ஆசரியோ ‘‘மம ஸஹாயகஸ்ஸ புத்தோ’’தி மாணவம் ஸம்படிச்சி²த்வா ஸப்³ப³ம் பாஹுனேய்யவத்தமகாஸி. ஸோ அத்³தா⁴னகிலமத²ம் வினோதே³த்வா தம் கஹாபணஸஹஸ்ஸம் ஆசரியஸ்ஸ பாத³மூலே ட²பேத்வா ஸிப்பம் உக்³க³ஹேதும் ஓகாஸம் யாசி. ஆசரியோ ஓகாஸம் கத்வா உக்³க³ண்ஹாபேஸி.

ஸோ லஹுஞ்ச க³ண்ஹந்தோ, ப³ஹுஞ்ச க³ண்ஹந்தோ, க³ஹிதக³ஹிதஞ்ச ஸுவண்ணபா⁴ஜனே பக்கி²த்ததேலமிவ அவினஸ்ஸமானம் தா⁴ரேந்தோ, த்³வாத³ஸவஸ்ஸிகம் ஸிப்பம் கதிபயமாஸேனேவ பரியோஸாபேஸி. ஸோ ஸஜ்ஜா²யம் கரோந்தோ ஆதி³மஜ்ஜ²ம்யேவ பஸ்ஸதி, நோ பரியோஸானம். அத² ஆசரியம் உபஸங்கமித்வா ஆஹ ‘‘இமஸ்ஸ ஸிப்பஸ்ஸ ஆதி³மஜ்ஜ²மேவ பஸ்ஸாமி, நோ பரியோஸான’’ந்தி. ஆசரியோ ஆஹ ‘‘அஹம்பி, தாத, ஏவமேவா’’தி. அத² கோ, ஆசரிய, இமஸ்ஸ ஸிப்பஸ்ஸ பரியோஸானம் ஜானாதீதி? இஸிபதனே, தாத, இஸயோ அத்தி², தே ஜானேய்யுந்தி. தே உபஸங்கமித்வா புச்சா²மி, ஆசரியாதி? புச்ச², தாத, யதா²ஸுக²ந்தி. ஸோ இஸிபதனம் க³ந்த்வா பச்சேகபு³த்³தே⁴ உபஸங்கமித்வா புச்சி² ‘‘அபி, ப⁴ந்தே, பரியோஸானம் ஜானாதா²’’தி? ஆம, ஆவுஸோ, ஜானாமாதி. தம் மம்பி ஸிக்கா²பேதா²தி. தேன ஹாவுஸோ, பப்³ப³ஜாஹி, ந ஸக்கா அபப்³ப³ஜிதேன ஸிக்கா²பேதுந்தி. ஸாது⁴, ப⁴ந்தே, பப்³பா³ஜேத² வா மம், யம் வா இச்ச²த², தம் கத்வா பரியோஸானம் ஜானாபேதா²தி. தே தம் பப்³பா³ஜேத்வா கம்மட்டா²னே நியோஜேதும் அஸமத்தா² ‘‘ஏவம் தே நிவாஸேதப்³ப³ம், ஏவம் பாருபிதப்³ப³’’ந்திஆதி³னா நயேன ஆபி⁴ஸமாசாரிகம் ஸிக்கா²பேஸும். ஸோ தத்த² ஸிக்க²ந்தோ உபனிஸ்ஸயஸம்பன்னத்தா ந சிரேனேவ பச்சேகபோ³தி⁴ம் அபி⁴ஸம்பு³ஜ்ஜி². ஸகலபா³ராணஸியம் ‘‘ஸுஸீமபச்சேகபு³த்³தோ⁴’’தி பாகடோ அஹோஸி லாப⁴க்³க³யஸக்³க³ப்பத்தோ ஸம்பன்னபரிவாரோ. ஸோ அப்பாயுகஸம்வத்தனிகஸ்ஸ கம்மஸ்ஸ கதத்தா ந சிரேனேவ பரினிப்³பா³யி. தஸ்ஸ பச்சேகபு³த்³தா⁴ ச மஹாஜனகாயோ ச ஸரீரகிச்சம் கத்வா தா⁴துயோ க³ஹேத்வா நக³ரத்³வாரே தூ²பம் பதிட்டா²பேஸும்.

அத² கோ² ஸங்கோ² ப்³ராஹ்மணோ ‘‘புத்தோ மே சிரக³தோ, ந சஸ்ஸ பவத்திம் ஜானாமீ’’தி புத்தம் த³ட்டு²காமோ தக்கஸிலாய நிக்க²மித்வா அனுபுப்³பே³ன பா³ராணஸிம் க³ந்த்வா மஹாஜனகாயம் ஸன்னிபதிதம் தி³ஸ்வா ‘‘அத்³தா⁴ ப³ஹூஸு ஏகோபி மே புத்தஸ்ஸ பவத்திம் ஜானிஸ்ஸதீ’’தி சிந்தேந்தோ உபஸங்கமித்வா புச்சி² ‘‘ஸுஸீமோ நாம மாணவோ இத⁴ ஆக³தோ அத்தி², அபி நு தஸ்ஸ பவத்திம் ஜானாதா²’’தி? தே ‘‘ஆம, ப்³ராஹ்மண, ஜானாம, இமஸ்மிம் நக³ரே ப்³ராஹ்மணஸ்ஸ ஸந்திகே திண்ணம் வேதா³னம் பாரகூ³ ஹுத்வா பச்சேகபு³த்³தா⁴னம் ஸந்திகே பப்³ப³ஜித்வா பச்சேகபு³த்³தோ⁴ ஹுத்வா அனுபாதி³ஸேஸாய நிப்³பா³னதா⁴துயா பரினிப்³பா³யி, அயமஸ்ஸ தூ²போ பதிட்டா²பிதோ’’தி ஆஹம்ஸு. ஸோ பூ⁴மிம் ஹத்தே²ன பஹரித்வா ரோதி³த்வா ச பரிதே³வித்வா ச தம் சேதியங்க³ணம் க³ந்த்வா திணானி உத்³த⁴ரித்வா உத்தரஸாடகேன வாலுகம் ஆனேத்வா பச்சேகபு³த்³த⁴சேதியங்க³ணே ஓகிரித்வா கமண்ட³லுதோ உத³கேன ஸமந்ததோ பூ⁴மிம் பரிப்போ²ஸித்வா வனபுப்பே²ஹி பூஜம் கத்வா உத்தரஸாடகேன படாகம் ஆரோபேத்வா தூ²பஸ்ஸ உபரி அத்தனோ ச²த்தம் ப³ந்தி⁴த்வா பக்காமீதி.

ஏவம் அதீதம் தே³ஸேத்வா ஜாதகம் பச்சுப்பன்னேன அனுஸந்தே⁴ந்தோ பி⁴க்கூ²னம் த⁴ம்மகத²ம் கதே²ஸி. ‘‘ஸியா கோ² பன வோ, பி⁴க்க²வே, ஏவமஸ்ஸ ‘அஞ்ஞோ நூன தேன ஸமயேன ஸங்கோ² ப்³ராஹ்மணோ அஹோஸீ’தி, ந கோ² பனேதம் ஏவம் த³ட்ட²ப்³ப³ம், அஹம் தேன ஸமயேன ஸங்கோ² ப்³ராஹ்மணோ அஹோஸிம், மயா ஸுஸீமஸ்ஸ பச்சேகபு³த்³த⁴ஸ்ஸ சேதியங்க³ணே திணானி உத்³த⁴டானி, தஸ்ஸ மே கம்மஸ்ஸ நிஸ்ஸந்தே³ன அட்ட²யோஜனமக்³க³ம் விக³தகா²ணுகண்டகம் கத்வா ஸமம் ஸுத்³த⁴மகம்ஸு. மயா தத்த² வாலுகா ஓகிண்ணா, தஸ்ஸ மே நிஸ்ஸந்தே³ன அட்ட²யோஜனமக்³கே³ வாலுகம் ஓகிரிம்ஸு. மயா தத்த² வனகுஸுமேஹி பூஜா கதா, தஸ்ஸ மே நிஸ்ஸந்தே³ன நவயோஜனே மக்³கே³ த²லே ச உத³கே ச நானாபுப்பே²ஹி புப்ப²ஸந்த²ரமகம்ஸு. மயா தத்த² கமண்ட³லுத³கேன பூ⁴மி பரிப்போ²ஸிதா, தஸ்ஸ மே நிஸ்ஸந்தே³ன வேஸாலியம் போக்க²ரவஸ்ஸம் வஸ்ஸி. மயா தஸ்மிம் சேதியே படாகா ஆரோபிதா, ச²த்தஞ்ச ப³த்³த⁴ம், தஸ்ஸ மே நிஸ்ஸந்தே³ன யாவ அகனிட்ட²ப⁴வனா படாகா ச ஆரோபிதா, ச²த்தாதிச²த்தானி ச உஸ்ஸிதானி. இதி கோ², பி⁴க்க²வே, அயம் மய்ஹம் பூஜாவிஸேஸோ நேவ பு³த்³தா⁴னுபா⁴வேன நிப்³ப³த்தோ, ந நாக³தே³வப்³ரஹ்மானுபா⁴வேன, அபிச கோ² அப்பமத்தகபரிச்சாகா³னுபா⁴வேன நிப்³ப³த்தோ’’தி. த⁴ம்மகதா²பரியோஸானே இமம் கா³த²மபா⁴ஸி –

‘‘மத்தாஸுக²பரிச்சாகா³, பஸ்ஸே சே விபுலம் ஸுக²ம்;

சஜே மத்தாஸுக²ம் தீ⁴ரோ, ஸம்பஸ்ஸம் விபுலம் ஸுக²’’ந்தி. (த⁴. ப. 290);

பரமத்த²ஜோதிகாய கு²த்³த³கபாட²-அட்ட²கதா²ய

ரதனஸுத்தவண்ணனா நிட்டி²தா.