8. காஸாவவக்³கோ³

[221] 1. காஸாவஜாதகவண்ணனா

அனிக்கஸாவோ காஸாவந்தி இத³ம் ஸத்தா² ஜேதவனே விஹரந்தோ தே³வத³த்தம் ஆரப்³ப⁴ கதே²ஸி. வத்து² பன ராஜக³ஹே ஸமுட்டி²தம். ஏகஸ்மிம் ஸமயே த⁴ம்மஸேனாபதி பஞ்சஹி பி⁴க்கு²ஸதேஹி ஸத்³தி⁴ம் வேளுவனே விஹரதி. தே³வத³த்தோபி அத்தனோ அனுரூபாய து³ஸ்ஸீலபரிஸாய பரிவுதோ க³யாஸீஸே விஹரதி. தஸ்மிம் ஸமயே ராஜக³ஹவாஸினோ ச²ந்த³கம் ஸங்க⁴ரித்வா தா³னம் ஸஜ்ஜயிம்ஸு. அதே²கோ வோஹாரத்தா²ய ஆக³தவாணிஜோ இமம் ஸாடகம் விஸ்ஸஜ்ஜேத்வா ‘‘மம்பி பத்திகம் கரோதா²’’தி மஹக்³க⁴ம் க³ந்த⁴காஸாவம் அதா³ஸி. நாக³ரா மஹாதா³னம் பவத்தயிம்ஸு, ஸப்³ப³ம் ச²ந்த³கேன ஸங்கட்³டி⁴தம் கஹாபணேஹேவ நிட்டா²ஸி. ஸோ ஸாடகோ அதிரேகோ அஹோஸி. மஹாஜனோ ஸன்னிபதித்வா ‘‘அயம் க³ந்த⁴காஸாவஸாடகோ அதிரேகோ. கஸ்ஸ நம் தே³ம, கிம் ஸாரிபுத்தத்தே²ரஸ்ஸ, உதா³ஹு தே³வத³த்தஸ்ஸா’’தி மந்தயிம்ஸு.

தத்தே²கே ‘‘ஸாரிபுத்தத்தே²ரஸ்ஸா’’தி ஆஹம்ஸு. அபரே ‘‘ஸாரிபுத்தத்தே²ரோ கதிபாஹம் வஸித்வா யதா²ருசி பக்கமிஸ்ஸதி, தே³வத³த்தத்தே²ரோ பன நிப³த்³த⁴ம் அம்ஹாகம் நக³ரமேவ உபனிஸ்ஸாய விஹரதி, மங்க³லாமங்க³லேஸு அயமேவ அம்ஹாகம் அவஸ்ஸயோ, தே³வத³த்தஸ்ஸ த³ஸ்ஸாமா’’தி ஆஹம்ஸு. ஸம்ப³ஹுலிகம் கரோந்தேஸுபி ‘‘தே³வத³த்தஸ்ஸ த³ஸ்ஸாமா’’தி வத்தாரோ ப³ஹுதரா அஹேஸும், அத² நம் தே³வத³த்தஸ்ஸ அத³ம்ஸு. தே³வத³த்தோ தஸ்ஸ த³ஸா சி²ந்தா³பேத்வா ஓவட்டிகம் ஸிப்³பா³பேத்வா ரஜாபேத்வா ஸுவண்ணபட்டவண்ணம் கத்வா பாருபி. தஸ்மிம் காலே திம்ஸமத்தா பி⁴க்கூ² ராஜக³ஹா நிக்க²மித்வா ஸாவத்தி²ம் க³ந்த்வா ஸத்தா²ரம் வந்தி³த்வா கதபடிஸந்தா²ரா தம் பவத்திம் ஆரோசேத்வா ‘‘ஏவம், ப⁴ந்தே, அத்தனோ அனனுச்ச²விகம் அரஹத்³த⁴ஜம் பாருபீ’’தி ஆரோசேஸும். ஸத்தா² ‘‘ந, பி⁴க்க²வே, தே³வத³த்தோ இதா³னேவ அத்தனோ அனனுரூபம் அரஹத்³த⁴ஜம் பரித³ஹதி, புப்³பே³பி பரித³ஹியேவா’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஹிமவந்தபதே³ஸே ஹத்தி²குலே நிப்³ப³த்தித்வா வயப்பத்தோ அஸீதிஸஹஸ்ஸமத்தவாரணபரிவாரோ யூத²பதி ஹுத்வா அரஞ்ஞாயதனே வஸதி. அதே²கோ து³க்³க³தமனுஸ்ஸோ பா³ராணஸியம் விஹரந்தோ த³ந்தகாரவீதி²யம் த³ந்தகாரே த³ந்தவலயாதீ³னி கரோந்தே தி³ஸ்வா ‘‘ஹத்தி²த³ந்தே லபி⁴த்வா க³ண்ஹிஸ்ஸதா²’’தி புச்சி². தே ‘‘ஆம க³ண்ஹிஸ்ஸாமா’’தி ஆஹம்ஸு. ஸோ ஆவுத⁴ம் ஆதா³ய காஸாவவத்த²வஸனோ பச்சேகபு³த்³த⁴வேஸம் க³ண்ஹித்வா படிஸீஸகம் படிமுஞ்சித்வா ஹத்தி²வீதி²யம் ட²த்வா ஆவுதே⁴ன ஹத்தி²ம் மாரேத்வா த³ந்தே ஆதா³ய பா³ராணஸியம் விக்கிணந்தோ ஜீவிகம் கப்பேஸி. ஸோ அபரபா⁴கே³ போ³தி⁴ஸத்தஸ்ஸ பரிவாரஹத்தீ²னம் ஸப்³ப³பச்சி²மம் ஹத்தி²ம் மாரேதும் ஆரபி⁴. ஹத்தி²னோ தே³வஸிகம் ஹத்தீ²ஸு பரிஹாயந்தேஸு ‘‘கேன நு கோ² காரணேன ஹத்தி²னோ பரிஹாயந்தீ’’தி போ³தி⁴ஸத்தஸ்ஸ ஆரோசேஸும்.

போ³தி⁴ஸத்தோ பரிக்³க³ண்ஹந்தோ ‘‘பச்சேகபு³த்³த⁴வேஸம் க³ஹேத்வா ஹத்தி²வீதி²பரியந்தே ஏகோ புரிஸோ திட்ட²தி, கச்சி நு கோ² ஸோ மாரேதி, பரிக்³க³ண்ஹிஸ்ஸாமி ந’’ந்தி ஏகதி³வஸம் ஹத்தீ² புரதோ கத்வா ஸயம் பச்ச²தோ அஹோஸி. ஸோ போ³தி⁴ஸத்தம் தி³ஸ்வா ஆவுத⁴ம் ஆதா³ய பக்க²ந்தி³. போ³தி⁴ஸத்தோ நிவத்தித்வா டி²தோ ‘‘பூ⁴மியம் போதே²த்வா மாரேஸ்ஸாமி ந’’ந்தி ஸோண்ட³ம் பஸாரேத்வா தேன பரித³ஹிதானி காஸாவானி தி³ஸ்வா ‘‘இமம் அரஹத்³த⁴ஜம் மயா க³ரும் காதும் வட்டதீ’’தி ஸோண்ட³ம் படிஸம்ஹரித்வா ‘‘அம்போ⁴ புரிஸ, நனு ஏஸ அரஹத்³த⁴ஜோ அனனுச்ச²விகோ துய்ஹம், கஸ்மா ஏதம் பரித³ஹஸீ’’தி இமா கா³தா² அவோச –

141. ‘‘அனிக்கஸாவோ காஸாவம், யோ வத்த²ம் பரித³ஹிஸ்ஸதி;

அபேதோ த³மஸச்சேன, ந ஸோ காஸாவமரஹதி.

142. ‘‘யோ ச வந்தகஸாவஸ்ஸ, ஸீலேஸு ஸுஸமாஹிதோ;

உபேதோ த³மஸச்சேன, ஸ வே காஸாவமரஹதீ’’தி.

தத்த² அனிக்கஸாவோதி கஸாவோ வுச்சதி ராகோ³ தோ³ஸோ மோஹோ மக்கோ² பளாஸோ இஸ்ஸா மச்ச²ரியம் மாயா ஸாடே²ய்யம் த²ம்போ⁴ ஸாரம்போ⁴ மானோ அதிமானோ மதோ³ பமாதோ³, ஸப்³பே³ அகுஸலா த⁴ம்மா ஸப்³பே³ து³ச்சரிதா ஸப்³ப³ம் ப⁴வகா³மிகம்மம் தி³யட்³ட⁴கிலேஸஸஹஸ்ஸம், ஏஸோ கஸாவோ நாம. ஸோ யஸ்ஸ புக்³க³லஸ்ஸ அப்பஹீனோ ஸந்தானதோ அனிஸ்ஸட்டோ² அனிக்க²ந்தோ, ஸோ அனிக்கஸாவோ நாம. காஸாவந்தி கஸாயரஸபீதம் அரஹத்³த⁴ஜபூ⁴தம். யோ வத்த²ம் பரித³ஹிஸ்ஸதீதி யோ ஏவரூபோ ஹுத்வா ஏவரூபம் வத்த²ம் பரித³ஹிஸ்ஸதி நிவாஸேதி சேவ பாருபதி ச. அபேதோ த³மஸச்சேனாதி இந்த்³ரியத³மஸங்கா²தேன த³மேன ச நிப்³பா³னஸங்கா²தேன ச பரமத்த²ஸச்சேன அபேதோ பரிவஜ்ஜிதோ. நிஸ்ஸக்கத்தே² வா கரணவசனம், ஏதஸ்மா த³மஸச்சா அபேதோதி அத்தோ². ‘‘ஸச்ச’’ந்தி சேத்த² வசீஸச்சம் சதுஸச்சம்பி வட்டதியேவ. ந ஸோ காஸாவமரஹதீதி ஸோ புக்³க³லோ அனிக்கஸாவத்தா அரஹத்³த⁴ஜம் காஸாவம் ந அரஹதி அனனுச்ச²விகோ ஏதஸ்ஸ.

யோ ச வந்தகஸாவஸ்ஸாதி யோ பன புக்³க³லோ யதா²வுத்தஸ்ஸேவ கஸாவஸ்ஸ வந்தத்தா வந்தகஸாவோ அஸ்ஸ. ஸீலேஸு ஸுஸமாஹிதோதி மக்³க³ஸீலேஸு சேவ ப²லஸீலேஸு ச ஸம்மா ஆஹிதோ, ஆனேத்வா ட²பிதோ விய தேஸு பதிட்டி²தோ. தேஹி ஸீலேஹி ஸமங்கீ³பூ⁴தஸ்ஸேதம் அதி⁴வசனம். உபேதோதி ஸமன்னாக³தோ. த³மஸச்சேனாதி வுத்தப்பகாரேன த³மேன ச ஸச்சேன ச. ஸ வே காஸாவமரஹதீதி ஸோ ஏவரூபோ புக்³க³லோ இமம் அரஹத்³த⁴ஜம் காஸாவம் அரஹதி.

ஏவம் போ³தி⁴ஸத்தோ தஸ்ஸ புரிஸஸ்ஸ இமம் காரணம் கதே²த்வா ‘‘இதோ பட்டா²ய மா இத⁴ ஆக³மி, ஆக³ச்ச²ஸி சே, ஜீவிதம் தே நத்தீ²’’’தி தஜ்ஜேத்வா பலாபேஸி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ ஹத்தி²மாரகபுரிஸோ தே³வத³த்தோ அஹோஸி, யூத²பதி பன அஹமேவ அஹோஸி’’ந்தி.

காஸாவஜாதகவண்ணனா பட²மா.

[222] 2. சூளனந்தி³யஜாதகவண்ணனா

இத³ம் ததா³சரியவசோதி இத³ம் ஸத்தா² வேளுவனே விஹரந்தோ தே³வத³த்தம் ஆரப்³ப⁴ கதே²ஸி. ஏகதி³வஸஞ்ஹி பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் – ‘‘ஆவுஸோ, தே³வத³த்தோ நாம கக்க²ளோ ப²ருஸோ ஸாஹஸிகோ ஸம்மாஸம்பு³த்³தே⁴ அபி⁴மாரே பயோஜேஸி, ஸிலம் பவிஜ்ஜி², நாளாகி³ரிம் பயோஜேஸி, க²ந்திமேத்தானுத்³த³யமத்தம்பிஸ்ஸ ததா²க³தே நத்தீ²’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவ, புப்³பே³பி தே³வத³த்தோ கக்க²ளோ ப²ருஸோ நிக்காருணிகோயேவா’’தி வத்வா அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ ஹிமவந்தபதே³ஸே மஹானந்தி³யோ நாம வானரோ அஹோஸி, கனிட்ட²பா⁴திகோ பனஸ்ஸ சூளனந்தி³யோ நாம. தே உபோ⁴பி அஸீதிஸஹஸ்ஸவானரபரிவாரா ஹிமவந்தபதே³ஸே அந்த⁴மாதரம் படிஜக்³க³ந்தா வாஸம் கப்பேஸும். தே மாதரம் ஸயனகு³ம்பே³ ட²பேத்வா அரஞ்ஞம் பவிஸித்வா மது⁴ரானி ப²லாப²லானி மாதுயா பேஸேந்தி. ஆஹரணகவானரா தஸ்ஸா ந தே³ந்தி, ஸா கு²தா³பீளிதா அட்டி²சம்மாவஸேஸா கிஸா அஹோஸி. அத² நம் போ³தி⁴ஸத்தோ ஆஹ – ‘‘மயம், அம்ம, தும்ஹாகம் மது⁴ரப²லாப²லானி பேஸேம, தும்ஹே கஸ்மா மிலாயதா²’’தி. ‘‘தாத, நாஹம் லபா⁴மீ’’தி. போ³தி⁴ஸத்தோ சிந்தேஸி – ‘‘மயி யூத²ம் பரிஹரந்தே மாதா மே நஸ்ஸிஸ்ஸதி, யூத²ம் பஹாய மாதரம்யேவ படிஜக்³கி³ஸ்ஸாமீ’’தி. ஸோ சூளனந்தி³யம் பக்கோஸித்வா ‘‘தாத, த்வம் யூத²ம் பரிஹர, அஹம் மாதரம் படிஜக்³கி³ஸ்ஸாமீ’’தி ஆஹ. ஸோபி நம் ‘‘பா⁴திக, மய்ஹம் யூத²பரிஹரணேன கம்மம் நத்தி², அஹம்பி மாதரமேவ படிஜக்³கி³ஸ்ஸாமீ’’தி ஆஹ. இதி தே உபோ⁴பி ஏகச்ச²ந்தா³ ஹுத்வா யூத²ம் பஹாய மாதரம் க³ஹேத்வா ஹிமவந்தா ஓருய்ஹ பச்சந்தே நிக்³ரோத⁴ருக்கே² வாஸம் கப்பேத்வா மாதரம் படிஜக்³கி³ம்ஸு.

அதே²கோ பா³ராணஸிவாஸீ ப்³ராஹ்மணமாணவோ தக்கஸிலாயம் தி³ஸாபாமோக்க²ஸ்ஸ ஆசரியஸ்ஸ ஸந்திகே ஸப்³ப³ஸிப்பானி உக்³க³ண்ஹித்வா ‘‘க³மிஸ்ஸாமீ’’தி ஆசரியம் ஆபுச்சி². ஆசரியோ அங்க³விஜ்ஜானுபா⁴வேன தஸ்ஸ கக்க²ளப²ருஸஸாஹஸிகபா⁴வம் ஞத்வா ‘‘தாத, த்வம் கக்க²ளோ ப²ருஸோ ஸாஹஸிகோ, ஏவரூபானம் ந ஸப்³ப³காலம் ஏகஸதி³ஸமேவ இஜ்ஜ²தி, மஹாவினாஸம் மஹாது³க்க²ம் பாபுணிஸ்ஸஸி, மா த்வம் கக்க²ளோ ஹோஹி, பச்சா²னுதாபனகாரணம் கம்மம் மா கரீ’’தி ஓவதி³த்வா உய்யோஜேஸி. ஸோ ஆசரியம் வந்தி³த்வா பா³ராணஸிம் க³ந்த்வா க⁴ராவாஸம் க³ஹேத்வா அஞ்ஞேஹி ஸிப்பேஹி ஜீவிகம் கப்பேதும் அஸக்கோந்தோ ‘‘த⁴னுகோடிம் நிஸ்ஸாய ஜீவிஸ்ஸாமி, லுத்³த³கம்மம் கத்வா ஜீவிகம் கப்பேஸ்ஸாமீ’’தி பா³ராணஸிதோ நிக்க²மித்வா பச்சந்தகா³மகே வஸந்தோ த⁴னுகலாபஸன்னத்³தோ⁴ அரஞ்ஞம் பவிஸித்வா நானாமிகே³ மாரேத்வா மம்ஸவிக்கயேன ஜீவிகம் கப்பேஸி. ஸோ ஏகதி³வஸம் அரஞ்ஞே கிஞ்சி அலபி⁴த்வா ஆக³ச்ச²ந்தோ அங்க³ணபரியந்தே டி²தம் நிக்³ரோத⁴ருக்க²ம் தி³ஸ்வா ‘‘அபி நாமேத்த² கிஞ்சி ப⁴வேய்யா’’தி நிக்³ரோத⁴ருக்கா²பி⁴முகோ² பாயாஸி.

தஸ்மிம் க²ணே உபோ⁴பி தே பா⁴தரோ மாதரம் ப²லானி கா²தா³பேத்வா புரதோ கத்வா விடபப்³ப⁴ந்தரே நிஸின்னா தம் ஆக³ச்ச²ந்தம் தி³ஸ்வா ‘‘கிம் நோ மாதரம் கரிஸ்ஸதீ’’தி ஸாக²ந்தரே நிலீயிம்ஸு. ஸோபி கோ² ஸாஹஸிகபுரிஸோ ருக்க²மூலம் ஆக³ந்த்வா தம் தேஸம் மாதரம் ஜராது³ப்³ப³லம் அந்த⁴ம் தி³ஸ்வா சிந்தேஸி – ‘‘கிம் மே துச்ச²ஹத்த²க³மனேன இமம் மக்கடிம் விஜ்ஜி²த்வா க³ஹேத்வா க³மிஸ்ஸாமீ’’தி. ஸோ தஸ்ஸா விஜ்ஜ²னத்தா²ய த⁴னும் க³ண்ஹி. தம் தி³ஸ்வா போ³தி⁴ஸத்தோ ‘‘தாத சூளனந்தி³ய, ஏஸோ மே புரிஸோ மாதரம் விஜ்ஜி²துகாமோ, அஹமஸ்ஸா ஜீவிததா³னம் த³ஸ்ஸாமி, த்வம் மமச்சயேன மாதரம் படிஜக்³கே³ய்யாஸீ’’தி வத்வா ஸாக²ந்தரா நிக்க²மித்வா ‘‘போ⁴ புரிஸ, மா மே மாதரம் விஜ்ஜி², ஏஸா அந்தா⁴ ஜராது³ப்³ப³லா, அஹமஸ்ஸா ஜீவிததா³னம் தே³மி, த்வம் ஏதம் அமாரேத்வா மம் மாரேஹீ’’தி தஸ்ஸ படிஞ்ஞம் க³ஹேத்வா ஸரஸ்ஸ ஆஸன்னட்டா²னே நிஸீதி³. ஸோ நிக்கருணோ போ³தி⁴ஸத்தம் விஜ்ஜி²த்வா பாதேத்வா மாதரம்பிஸ்ஸ விஜ்ஜி²தும் புன த⁴னும் ஸன்னய்ஹி. தம் தி³ஸ்வா சூளனந்தி³யோ ‘‘அயம் மே மாதரம் விஜ்ஜி²துகாமோ, ஏகதி³வஸம்பி கோ² மே மாதா ஜீவமானா லத்³த⁴ஜீவிதாயேவ நாம ஹோதி, ஜீவிததா³னமஸ்ஸா த³ஸ்ஸாமீ’’தி ஸாக²ந்தரா நிக்க²மித்வா ‘‘போ⁴ புரிஸ, மா மே மாதரம் விஜ்ஜி², அஹமஸ்ஸா ஜீவிததா³னம் த³ம்மி, த்வம் மம் விஜ்ஜி²த்வா அம்ஹே த்³வே பா⁴திகே க³ஹேத்வா அம்ஹாகம் மாது ஜீவிததா³னம் தே³ஹீ’’தி தஸ்ஸ படிஞ்ஞம் க³ஹேத்வா ஸரஸ்ஸ ஆஸன்னட்டா²னே நிஸீதி³. ஸோ தம்பி விஜ்ஜி²த்வா பாதேத்வா ‘‘அயம் மக்கடீ க⁴ரே தா³ரகானம் ப⁴விஸ்ஸதீ’’தி மாதரம்பி தேஸம் விஜ்ஜி²த்வா பாதேத்வா தயோபி காஜேனாதா³ய கே³ஹாபி⁴முகோ² பாயாஸி.

அத²ஸ்ஸ பாபபுரிஸஸ்ஸ கே³ஹே அஸனி பதித்வா ப⁴ரியஞ்ச த்³வே தா³ரகே ச கே³ஹேனேவ ஸத்³தி⁴ம் ஜா²பேஸி, பிட்டி²வம்ஸதூ²ணமத்தம் அவஸிஸ்ஸி. அத²ஸ்ஸ நம் கா³மத்³வாரேயேவ ஏகோ புரிஸோ தி³ஸ்வா தம் பவத்திம் ஆரோசேஸி. ஸோ புத்ததா³ரஸோகேன அபி⁴பூ⁴தோ தஸ்மிம்யேவ டா²னே மம்ஸகாஜஞ்ஜ த⁴னுஞ்ச ச²ட்³டே³த்வா வத்த²ம் பஹாய நக்³கோ³ பா³ஹா பக்³க³ய்ஹ பரிதே³வமானோ க³ந்த்வா க⁴ரம் பாவிஸி. அத²ஸ்ஸ ஸா தூ²ணா பி⁴ஜ்ஜித்வா ஸீஸே பதித்வா ஸீஸம் பி⁴ந்தி³, பத²வீ விவரம் அதா³ஸி, அவீசிதோ ஜாலா உட்ட²ஹி. ஸோ பத²வியா கி³லியமானோ ஆசரியஸ்ஸ ஓவாத³ம் ஸரித்வா ‘‘இமம் வத காரணம் தி³ஸ்வா பாராஸரியப்³ராஹ்மணோ மய்ஹம் ஓவாத³மதா³ஸீ’’தி பரிதே³வமானோ இமம் கா³தா²த்³வயமாஹ –

143. ‘‘இத³ம் ததா³சரியவசோ, பாராஸரியோ யத³ப்³ரவி;

மாஸு த்வம் அகரி பாபம், யம் த்வம் பச்சா² கதம் தபே.

144. ‘‘யானி கரோதி புரிஸோ, தானி அத்தனி பஸ்ஸதி;

கல்யாணகாரீ கல்யாணம், பாபகாரீ ச பாபகம்;

யாதி³ஸம் வபதே பீ³ஜம், தாதி³ஸம் ஹரதே ப²ல’’ந்தி.

தஸ்ஸத்தோ² – யம் பாராஸரியோ ப்³ராஹ்மணோ அப்³ரவி – ‘‘மாஸு த்வம் பாபம் அகரீ, யம் கதம் பச்சா² த்வஞ்ஞேவ தபேய்யா’’தி, இத³ம் தம் ஆசரியஸ்ஸ வசனம். யானி காயவசீமனோத்³வாரேஹி கம்மானி புரிஸோ கரோதி, தேஸம் விபாகம் படிலப⁴ந்தோ தானியேவ அத்தனி பஸ்ஸதி. கல்யாணகம்மகாரீ கல்யாணம் ப²லமனுபோ⁴தி, பாபகாரீ ச பாபகமேவ ஹீனம் லாமகம் அனிட்ட²ப²லம் அனுபோ⁴தி. லோகஸ்மிம்பி ஹி யாதி³ஸம் வபதே பீ³ஜம், தாதி³ஸம் ஹரதே ப²லம், பீ³ஜானுரூபம் பீ³ஜானுச்ச²விகமேவ ப²லம் ஹரதி க³ண்ஹாதி அனுப⁴வதீதி. இதி ஸோ பரிதே³வந்தோ பத²விம் பவிஸித்வா அவீசிமஹானிரயே நிப்³ப³த்தி.

ஸத்தா² ‘‘ந, பி⁴க்க²வே, தே³வத³த்தோ இதா³னேவ, புப்³பே³பி கக்க²ளோ ப²ருஸோ நிக்காருணிகோயேவா’’தி வத்வா இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ லுத்³த³கபுரிஸோ தே³வத³த்தோ அஹோஸி, தி³ஸாபாமோக்கோ² ஆசரியோ ஸாரிபுத்தோ, சூளனந்தி³யோ ஆனந்தோ³, மாதா மஹாபஜாபதிகோ³தமீ, மஹானந்தி³யோ பன அஹமேவ அஹோஸி’’ந்தி.

சூளனந்தி³யஜாதகவண்ணனா து³தியா.

[223] 3. புடப⁴த்தஜாதகவண்ணனா

நமே நமந்தஸ்ஸ ப⁴ஜே ப⁴ஜந்தந்தி இத³ம் ஸத்தா² ஜேதவனே விஹரந்தோ ஏகம் குடும்பி³கம் ஆரப்³ப⁴ கதே²ஸி. ஸாவத்தி²னக³ரவாஸீ கிரேகோ குடும்பி³கோ ஏகேன ஜனபத³குடும்பி³கேன ஸத்³தி⁴ம் வோஹாரம் அகாஸி. ஸோ அத்தனோ ப⁴ரியம் ஆதா³ய தஸ்ஸ தா⁴ரணகஸ்ஸ ஸந்திகம் அக³மாஸி. தா⁴ரணகோ ‘‘தா³தும் ந ஸக்கோமீ’’தி ந கிஞ்சி அதா³ஸி, இதரோ குஜ்ஜி²த்வா ப⁴த்தம் அபு⁴ஞ்ஜித்வாவ நிக்க²மி. அத² நம் அந்தராமக்³கே³ சா²தஜ்ஜ²த்தம் தி³ஸ்வா மக்³க³படிபன்னா புரிஸா ‘‘ப⁴ரியாயபி த³த்வா பு⁴ஞ்ஜாஹீ’’தி ப⁴த்தபுடம் அத³ம்ஸு. ஸோ தம் க³ஹேத்வா தஸ்ஸா அதா³துகாமோ ஹுத்வா ‘‘ப⁴த்³தே³, இத³ம் சோரானம் திட்ட²னட்டா²னம், த்வம் புரதோ யாஹீ’’தி உய்யோஜேத்வா ஸப்³ப³ம் ப⁴த்தம் பு⁴ஞ்ஜித்வா துச்ச²புடம் த³ஸ்ஸேத்வா ‘‘ப⁴த்³தே³, அப⁴த்தகம் துச்ச²புடமேவ அத³ம்ஸூ’’தி ஆஹ. ஸா தேன ஏககேனேவ பு⁴த்தபா⁴வம் ஞத்வா தோ³மனஸ்ஸப்பத்தா அஹோஸி. தே உபோ⁴பி ஜேதவனபிட்டி²விஹாரேன க³ச்ச²ந்தா ‘‘பானீயம் பிவிஸ்ஸாமா’’தி ஜேதவனம் பவிஸிம்ஸு.

ஸத்தா²பி தேஸஞ்ஞேவ ஆக³மனம் ஓலோகேந்தோ மக்³க³ம் க³ஹேத்வா டி²தலுத்³த³கோ விய க³ந்த⁴குடிசா²யாய நிஸீதி³, தே ஸத்தா²ரம் தி³ஸ்வா உபஸங்கமித்வா வந்தி³த்வா நிஸீதி³ம்ஸு. ஸத்தா² தேஹி ஸத்³தி⁴ம் படிஸந்தா²ரம் கத்வா ‘‘கிம், உபாஸிகே, அயம் தே ப⁴த்தா ஹிதகாமோ ஸஸ்னேஹோ’’தி புச்சி². ‘‘ப⁴ந்தே, அஹம் ஏதஸ்ஸ ஸஸ்னேஹா, அயம் பன மய்ஹம் நிஸ்னேஹோ, திட்ட²ந்து அஞ்ஞேபி தி³வஸா, அஜ்ஜேவேஸ அந்தராமக்³கே³ புடப⁴த்தம் லபி⁴த்வா மய்ஹம் அத³த்வா அத்தனாவ பு⁴ஞ்ஜீ’’தி. ‘‘உபாஸிகே, நிச்சகாலம்பி த்வம் ஏதஸ்ஸ ஹிதகாமா ஸஸ்னேஹா, அயம் பன நிஸ்னேஹோவ. யதா³ பன பண்டி³தே நிஸ்ஸாய தவ கு³ணே ஜானாதி, ததா³ தே ஸப்³பி³ஸ்ஸரியம் நிய்யாதே³தீ’’தி வத்வா தாய யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே போ³தி⁴ஸத்தோ அமச்சகுலே நிப்³ப³த்தித்வா வயப்பத்தோ தஸ்ஸ அத்த²த⁴ம்மானுஸாஸகோ அஹோஸி. அத² ராஜா ‘‘பது³ப்³பே⁴ய்யாபி மே அய’’ந்தி அத்தனோ புத்தம் ஆஸங்கந்தோ நீஹரி. ஸோ அத்தனோ ப⁴ரியம் க³ஹேத்வா நக³ரா நிக்க²ம்ம ஏகஸ்மிம் காஸிககா³மகே வாஸம் கப்பேஸி. ஸோ அபரபா⁴கே³ பிது காலகதபா⁴வம் ஸுத்வா ‘‘குலஸந்தகம் ரஜ்ஜம் க³ண்ஹிஸ்ஸாமீ’’தி பா³ராணஸிம் பச்சாக³ச்ச²ந்தோ அந்தராமக்³கே³ ‘‘ப⁴ரியாயபி த³த்வா பு⁴ஞ்ஜாஹீ’’தி ப⁴த்தபுடம் லபி⁴த்வா தஸ்ஸா அத³த்வா ஸயமேவ தம் பு⁴ஞ்ஜி. ஸா ‘‘கக்க²ளோ வதாயம் புரிஸோ’’தி தோ³மனஸ்ஸப்பத்தா அஹோஸி. ஸோ பா³ராணஸியம் ரஜ்ஜம் க³ஹேத்வா தம் அக்³க³மஹேஸிட்டா²னே ட²பேத்வா ‘‘ஏத்தகமேவ ஏதிஸ்ஸா அல’’ந்தி ந அஞ்ஞம் ஸக்காரம் வா ஸம்மானம் வா கரோதி, ‘‘கத²ம் யாபேஸீ’’திபி நம் ந புச்ச²தி.

போ³தி⁴ஸத்தோ சிந்தேஸி – ‘‘அயம் தே³வீ ரஞ்ஞோ ப³ஹூபகாரா ஸஸ்னேஹா, ராஜா பனேதம் கிஸ்மிஞ்சி ந மஞ்ஞதி, ஸக்காரஸம்மானமஸ்ஸா காரேஸ்ஸாமீ’’தி தம் உபஸங்கமித்வா உபசாரம் கத்வா ஏகமந்தம் ட²த்வா ‘‘கிம், தாதா’’தி வுத்தே ‘‘கத²ம் ஸமுட்டா²பேதும் மயம், தே³வி, தும்ஹே உபட்ட²ஹாம, கிம் நாம மஹல்லகானம் பிதூனம் வத்த²க²ண்ட³ம் வா ப⁴த்தபிண்ட³ம் வா தா³தும் ந வட்டதீ’’தி ஆஹ. ‘‘தாத, அஹம் அத்தனாவ கிஞ்சி ந லபா⁴மி, தும்ஹாகம் கிம் த³ஸ்ஸாமி, நனு லப⁴னகாலே அதா³ஸிம், இதா³னி பன மே ராஜா ந கிஞ்சி தே³தி. திட்ட²து அஞ்ஞம் தா³னம், ரஜ்ஜம் க³ண்ஹிதும் ஆக³ச்ச²ந்தோ அந்தராமக்³கே³ ப⁴த்தபுடம் லபி⁴த்வா ப⁴த்தமத்தம்பி மே அத³த்வா அத்தனாவ பு⁴ஞ்ஜீ’’தி. ‘‘கிம் பன, அம்ம, ரஞ்ஞோ ஸந்திகே ஏவம் கதே²தும் ஸக்கி²ஸ்ஸதா²’’தி? ‘‘ஸக்கி²ஸ்ஸாமி, தாதா’’தி. ‘‘தேன ஹி அஜ்ஜேவ மம ரஞ்ஞோ ஸந்திகே டி²தகாலே மயி புச்ச²ந்தே ஏவம் கதே²த² அஜ்ஜேவ வோ கு³ணம் ஜானாபேஸ்ஸாமீ’’தி ஏவம் வத்வா போ³தி⁴ஸத்தோ புரிமதரம் க³ந்த்வா ரஞ்ஞோ ஸந்திகே அட்டா²ஸி. ஸாபி க³ந்த்வா ரஞ்ஞோ ஸமீபே அட்டா²ஸி.

அத² நம் போ³தி⁴ஸத்தோ ‘‘அம்ம, தும்ஹே அதிவிய கக்க²ளா, கிம் நாம பிதூனம் வத்த²க²ண்ட³ம் வா ப⁴த்தபிண்ட³மத்தம் வா தா³தும் ந வட்டதீ’’தி ஆஹ. ‘‘தாத, அஹமேவ ரஞ்ஞோ ஸந்திகா கிஞ்சி ந லபா⁴மி, தும்ஹாகம் கிம் த³ஸ்ஸாமீ’’தி? ‘‘நனு அக்³க³மஹேஸிட்டா²னம் தே லத்³த⁴’’ந்தி? ‘‘தாத, கிஸ்மிஞ்சி ஸம்மானே அஸதி அக்³க³மஹேஸிட்டா²னம் கிம் கரிஸ்ஸதி, இதா³னி மே தும்ஹாகம் ராஜா கிம் த³ஸ்ஸதி, ஸோ அந்தராமக்³கே³ ப⁴த்தபுடம் லபி⁴த்வா ததோ கிஞ்சி அத³த்வா ஸயமேவ பு⁴ஞ்ஜீ’’தி. போ³தி⁴ஸத்தோ ‘‘ஏவம் கிர, மஹாராஜா’’தி புச்சி². ராஜா அதி⁴வாஸேஸி. போ³தி⁴ஸத்தோ தஸ்ஸ அதி⁴வாஸனம் விதி³த்வா ‘‘தேன ஹி, அம்ம, ரஞ்ஞோ அப்பியகாலதோ பட்டா²ய கிம் தும்ஹாகம் இத⁴ வாஸேன. லோகஸ்மிஞ்ஹி அப்பியஸம்பயோகோ³ ச து³க்கோ², தும்ஹாகம் இத⁴ வாஸே ஸதி ரஞ்ஞோ அப்பியஸம்பயோகோ³வ து³க்க²ம் ப⁴விஸ்ஸதி, இமே ஸத்தா நாம ப⁴ஜந்தே ப⁴ஜந்தி, அப⁴ஜனபா⁴வம் ஞத்வா அஞ்ஞத்த² க³ந்தப்³ப³ம், மஹந்தோ லோகஸன்னிவாஸோ’’தி வத்வா இமா கா³தா² அவோச –

145. ‘‘நமே நமந்தஸ்ஸ ப⁴ஜே ப⁴ஜந்தம், கிச்சானுகுப்³ப³ஸ்ஸ கரேய்ய கிச்சம்;

நானத்த²காமஸ்ஸ கரேய்ய அத்த²ம், அஸம்ப⁴ஜந்தம்பி ந ஸம்ப⁴ஜேய்ய.

146. ‘‘சஜே சஜந்தம் வனத²ம் ந கயிரா, அபேதசித்தேன ந ஸம்ப⁴ஜேய்ய;

தி³ஜோ து³மம் கீ²ணப²லந்தி ஞத்வா, அஞ்ஞம் ஸமேக்கே²ய்ய மஹா ஹி லோகோ’’தி.

தத்த² நமே நமந்தஸ்ஸ ப⁴ஜே ப⁴ஜந்தந்தி யோ அத்தனோ நமதி, தஸ்ஸேவ படினமேய்ய. யோ ச ப⁴ஜதி, தமேவ ப⁴ஜேய்ய. கிச்சானுகுப்³ப³ஸ்ஸ கரேய்ய கிச்சந்தி அத்தனோ உப்பன்னகிச்சம் அனுகுப்³ப³ந்தஸ்ஸேவ தஸ்ஸபி உப்பன்னகிச்சம் படிகரேய்ய. சஜே சஜந்தம் வனத²ம் ந கயிராதி அத்தானம் ஜஹந்தம் ஜஹேய்யேவ, தஸ்மிம் தண்ஹாஸங்கா²தம் வனத²ம் ந கரேய்ய. அபேதசித்தேனாதி விக³தசித்தேன விபல்லத்த²சித்தேன. ந ஸம்ப⁴ஜேய்யாதி ததா²ரூபேன ஸத்³தி⁴ம் ந ஸமாக³ச்சே²ய்ய. தி³ஜோ து³மந்தி யதா² ஸகுணோ புப்³பே³ ப²லிதம்பி ருக்க²ம் ப²லே கீ²ணே ‘‘கீ²ணப²லோ அய’’ந்தி ஞத்வா தம் ச²ட்³டே³த்வா அஞ்ஞம் ஸமேக்க²தி பரியேஸதி, ஏவம் அஞ்ஞம் ஸமேக்கே²ய்ய. மஹா ஹி ஏஸ லோகோ, அத² தும்ஹே ஸஸ்னேஹம் ஏகம் புரிஸம் லபி⁴ஸ்ஸதா²தி.

தம் ஸுத்வா பா³ராணஸிராஜா தே³வியா ஸப்³பி³ஸ்ஸரியம் அதா³ஸி. ததோ பட்டா²ய ஸமக்³கா³ ஸம்மோத³மானா வஸிம்ஸு.

ஸத்தா² இமம் த⁴ம்மதே³ஸனம் ஆஹரித்வா ஸச்சானி பகாஸேத்வா ஜாதகம் ஸமோதா⁴னேஸி, ஸச்சபரியோஸானே த்³வே ஜயம்பதிகா ஸோதாபத்திப²லே பதிட்ட²ஹிம்ஸு. ‘‘ததா³ ஜயம்பதிகா இமே த்³வே ஜயம்பதிகா அஹேஸும், பண்டி³தாமச்சோ பன அஹமேவ அஹோஸி’’ந்தி.

புடப⁴த்தஜாதகவண்ணனா ததியா.

[224] 4. கும்பி⁴லஜாதகவண்ணனா

யஸ்ஸேதே சதுரோ த⁴ம்மாதி இத³ம் ஸத்தா² வேளுவனே விஹரந்தோ தே³வத³த்தம் ஆரப்³ப⁴ கதே²ஸி.

147. ‘‘யஸ்ஸேதே சதுரோ த⁴ம்மா, வானரிந்த³ யதா² தவ;

ஸச்சம் த⁴ம்மோ தி⁴தி சாகோ³, தி³ட்ட²ம் ஸோ அதிவத்ததி.

148. ‘‘யஸ்ஸ சேதே ந விஜ்ஜந்தி, கு³ணா பரமப⁴த்³த³கா;

ஸச்சம் த⁴ம்மோ தி⁴தி சாகோ³, தி³ட்ட²ம் ஸோ நாதிவத்ததீ’’தி.

தத்த² கு³ணா பரமப⁴த்³த³காதி யஸ்ஸ ஏதே பரமப⁴த்³த³கா சத்தாரோ ராஸட்டே²ன பிண்ட³ட்டே²ன கு³ணா ந விஜ்ஜந்தி, ஸோ பச்சாமித்தம் அதிக்கமிதும் ந ஸக்கோதீதி. ஸேஸமேத்த² ஸப்³ப³ம் ஹேட்டா² கும்பி⁴லஜாதகே வுத்தனயமேவ ஸத்³தி⁴ம் ஸமோதா⁴னேனாதி.

கும்பி⁴லஜாதகவண்ணனா சதுத்தா².

[225] 5. க²ந்திவண்ணஜாதகவண்ணனா

அத்தி² மே புரிஸோ, தே³வாதி இத³ம் ஸத்தா² ஜேதவனே விஹரந்தோ கோஸலராஜானம் ஆரப்³ப⁴ கதே²ஸி. தஸ்ஸ கிரேகோ ப³ஹூபகாரோ அமச்சோ அந்தேபுரே பது³ஸ்ஸி. ராஜா ‘‘உபகாரகோ மே’’தி ஞத்வாபி அதி⁴வாஸேத்வா ஸத்து² ஆரோசேஸி. ஸத்தா² ‘‘போராணகராஜானோபி, மஹாராஜ, ஏவம் அதி⁴வாஸேஸும்யேவா’’தி வத்வா தேன யாசிதோ அதீதம் ஆஹரி.

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே ஏகோ அமச்சோ தஸ்ஸ அந்தேபுரே பது³ஸ்ஸி, அமச்சஸ்ஸாபி ஸேவகோ தஸ்ஸ கே³ஹே பது³ஸ்ஸி. ஸோ தஸ்ஸ அபராத⁴ம் அதி⁴வாஸேதும் அஸக்கோந்தோ தம் ஆதா³ய ரஞ்ஞோ ஸந்திகம் க³ந்த்வா ‘‘தே³வ, ஏகோ மே உபட்டா²கோ ஸப்³ப³கிச்சகாரகோ, ஸோ மய்ஹம் கே³ஹே பது³ஸ்ஸி, தஸ்ஸ கிம் காதும் வட்டதீ’’தி புச்ச²ந்தோ பட²மம் கா³த²மாஹ –

149. ‘‘அத்தி² மே புரிஸோ தே³வ, ஸப்³ப³கிச்சேஸு ப்³யாவடோ;

தஸ்ஸ சேகோபராத⁴த்தி², தத்த² த்வம் கிந்தி மஞ்ஞஸீ’’தி.

தத்த² தஸ்ஸ சேகோபராத⁴த்தீ²தி தஸ்ஸ ச புரிஸஸ்ஸ ஏகோ அபராதோ⁴ அத்தி². தத்த² த்வம் கிந்தி மஞ்ஞஸீதி தத்த² தஸ்ஸ புரிஸஸ்ஸ அபராதே⁴ த்வம் ‘‘கிம் காதப்³ப³’’ந்தி மஞ்ஞஸி, யதா² தே சித்தம் உப்பஜ்ஜதி, தத³னுரூபமஸ்ஸ த³ண்ட³ம் பணேஹீதி தீ³பேதி.

தம் ஸுத்வா ராஜா து³தியம் கா³த²மாஹ –

150. ‘‘அம்ஹாகம்பத்தி² புரிஸோ, ஏதி³ஸோ இத⁴ விஜ்ஜதி;

து³ல்லபோ⁴ அங்க³ஸம்பன்னோ, க²ந்திரஸ்மாக ருச்சதீ’’தி.

தஸ்ஸத்தோ² – அம்ஹாகம்பி ராஜூனம் ஸதம் ஏதி³ஸோ ப³ஹூபகாரோ அகா³ரே து³ஸ்ஸனகபுரிஸோ அத்தி², ஸோ ச கோ² இத⁴ விஜ்ஜதி, இதா³னிபி இதே⁴வ ஸம்விஜ்ஜதி, மயம் ராஜானோபி ஸமானா தஸ்ஸ ப³ஹூபகாரதம் ஸந்தா⁴ய அதி⁴வாஸேம, துய்ஹம் பன அரஞ்ஞோபி ஸதோ அதி⁴வாஸனபா⁴ரோ ஜாதோ. அங்க³ஸம்பன்னோ ஹி ஸப்³பே³ஹி கு³ணகோட்டா²ஸேஹி ஸமன்னாக³தோ புரிஸோ நாம து³ல்லபோ⁴, தேன காரணேன அஸ்மாகம் ஏவரூபேஸு டா²னேஸு அதி⁴வாஸனக²ந்தியேவ ருச்சதீதி.

அமச்சோ அத்தானம் ஸந்தா⁴ய ரஞ்ஞோ வுத்தபா⁴வம் ஞத்வா ததோ பட்டா²ய அந்தேபுரே பது³ஸ்ஸிதும் ந விஸஹி, ஸோபிஸ்ஸ ஸேவகோ ரஞ்ஞோ ஆரோசிதபா⁴வம் ஞத்வா ததோ பட்டா²ய தம் கம்மம் காதும் ந விஸஹி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ அஹமேவ பா³ராணஸிராஜா அஹோஸி’’ந்தி. ஸோபி அமச்சோ ரஞ்ஞோ ஸத்து² கதி²தபா⁴வம் ஞத்வா ததோ பட்டா²ய தம் கம்மம் காதும் நாஸக்கீ²தி.

க²ந்திவண்ணஜாதகவண்ணனா பஞ்சமா.

[226] 6. கோஸியஜாதகவண்ணனா

காலே நிக்க²மனா ஸாதூ⁴தி இத³ம் ஸத்தா² ஜேதவனே விஹரந்தோ கோஸலராஜானம் ஆரப்³ப⁴ கதே²ஸி. கோஸலராஜா பச்சந்தவூபஸமனத்தா²ய அகாலே நிக்க²மி. வத்து² ஹேட்டா² வுத்தனயமேவ.

ஸத்தா² பன அதீதம் ஆஹரித்வா ஆஹ – ‘‘மஹாராஜ, அதீதே பா³ராணஸிராஜா அகாலே நிக்க²மித்வா உய்யானே க²ந்தா⁴வாரம் நிவேஸயி. தஸ்மிம் காலே ஏகோ உலூகஸகுணோ வேளுகு³ம்ப³ம் பவிஸித்வா நிலீயி. காகஸேனா ஆக³ந்த்வா ‘நிக்க²ந்தமேவ தம் க³ண்ஹிஸ்ஸாமா’’’தி பரிவாரேஸி. ஸோ ஸூரியத்த²ங்க³மனம் அனோலோகேத்வா அகாலேயேவ நிக்க²மித்வா பலாயிதும் ஆரபி⁴. அத² நம் காகா பரிவாரேத்வா துண்டே³ஹி கோட்டேந்தா பரிபாதேஸும். ராஜா போ³தி⁴ஸத்தம் ஆமந்தேத்வா ‘‘கிம் நு கோ², பண்டி³த, இமே காகா கோஸியம் பரிபாதேந்தீ’’தி புச்சி². போ³தி⁴ஸத்தோ ‘‘அகாலே, மஹாராஜ, அத்தனோ வஸனட்டா²னா நிக்க²மந்தா ஏவரூபம் து³க்க²ம் படிலப⁴ந்தியேவ, தஸ்மா அகாலே அத்தனோ வஸனட்டா²னா நிக்க²மிதும் ந வட்டதீ’’தி இமமத்த²ம் பகாஸேந்தோ இமம் கா³தா²த்³வயமாஹ –

151. ‘‘காலே நிக்க²மனா ஸாது⁴, நாகாலே ஸாது⁴ நிக்க²மோ;

அகாலேன ஹி நிக்க²ம்ம, ஏககம்பி ப³ஹுஜ்ஜனோ;

ந கிஞ்சி அத்த²ம் ஜோதேதி, த⁴ங்கஸேனாவ கோஸியம்.

152. ‘‘தீ⁴ரோ ச விதி⁴விதா⁴னஞ்ஞூ, பரேஸம் விவரானுகூ³;

ஸப்³பா³மித்தே வஸீகத்வா, கோஸியோவ ஸுகீ² ஸியா’’தி.

தத்த² காலே நிக்க²மனா ஸாதூ⁴தி, மஹாராஜ, நிக்க²மனா நாம நிக்க²மனம் வா பரக்கமனம் வா யுத்தபயுத்தகாலே ஸாது⁴. நாகாலே ஸாது⁴ நிக்க²மோதி அகாலே பன அத்தனோ வஸனட்டா²னதோ அஞ்ஞத்த² க³ந்தும் நிக்க²மோ நாம நிக்க²மனம் வா பரக்கமனம் வா ந ஸாது⁴. ‘‘அகாலேன ஹீ’’திஆதீ³ஸு சதூஸு பதே³ஸு பட²மேன ஸத்³தி⁴ம் ததியம், து³தியேன சதுத்த²ம் யோஜேத்வா ஏவம் அத்தோ² வேதி³தப்³போ³. அத்தனோ வஸனட்டா²னதோ ஹி கோசி புரிஸோ அகாலேன நிக்க²மித்வா வா பரக்கமித்வா வா ந கிஞ்சி அத்த²ம் ஜோதேதி, அத்தனோ அப்பமத்தகம்பி வுட்³டி⁴ம் உப்பாதே³தும் ந ஸக்கோதி, அத² கோ² ஏககம்பி ப³ஹுஜ்ஜனோ ப³ஹுபி ஸோ பச்சத்தி²கஜனோ ஏதம் அகாலே நிக்க²மந்தம் வா பரக்கமந்தம் வா ஏககம் பரிவாரேத்வா மஹாவினாஸம் பாபேதி. தத்ராயம் உபமா – த⁴ங்கஸேனாவ கோஸியம், யதா² அயம் த⁴ங்கஸேனா இமம் அகாலே நிக்க²மந்தஞ்ச பரக்கமந்தஞ்ச கோஸியம் துண்டே³ஹி விதுத³ந்தி மஹாவினாஸம் பாபேந்தி, ததா² தஸ்மா திரச்சா²னக³தே ஆதி³ம் கத்வா கேனசி அகாலே அத்தனோ வஸனட்டா²னதோ ந நிக்க²மிதப்³ப³ம் ந பரக்கமிதப்³ப³ந்தி.

து³தியகா³தா²ய தீ⁴ரோதி பண்டி³தோ. விதீ⁴தி போராணகபண்டி³தேஹி ட²பிதபவேணீ. விதா⁴னந்தி கோட்டா²ஸோ வா ஸம்வித³ஹனம் வா. விவரானுகூ³தி விவரம் அனுக³ச்ச²ந்தோ ஜானந்தோ. ஸப்³பா³மித்தேதி ஸப்³பே³ அமித்தே. வஸீகத்வாதி அத்தனோ வஸே கத்வா. கோஸியோவாதி இமம்ஹா பா³லகோஸியா அஞ்ஞோ பண்டி³தகோஸியோ விய. இத³ம் வுத்தம் ஹோதி – யோ ச கோ² பண்டி³தோ ‘‘இமஸ்மிம் காலே நிக்க²மிதப்³ப³ம் பரக்கமிதப்³ப³ம், இமஸ்மிம் ந நிக்க²மிதப்³ப³ம் ந பரக்கமிதப்³ப³’’ந்தி போராணகபண்டி³தேஹி ட²பிதஸ்ஸ பவேணிஸங்கா²தஸ்ஸ விதி⁴னோ கோட்டா²ஸஸங்கா²தம் விதா⁴னம் வா தஸ்ஸ வா விதி⁴னோ விதா⁴னம் ஸம்வித³ஹனம் அனுட்டா²னம் ஜானாதி, ஸோ விதி⁴விதா⁴னஞ்ஞூ பரேஸம் அத்தனோ பச்சாமித்தானம் விவரம் ஞத்வா யதா² நாம பண்டி³தோ கோஸியோ ரத்திஸங்கா²தே அத்தனோ காலே நிக்க²மித்வா ச பரக்கமித்வா ச தத்த² தத்த² ஸயிதானஞ்ஞேவ காகானம் ஸீஸானி சி²ந்த³மானோ தே ஸப்³பே³ அமித்தே வஸீகத்வா ஸுகீ² ஸியா, ஏவம் தீ⁴ரோபி காலே நிக்க²மித்வா பரக்கமித்வா அத்தனோ பச்சாமித்தே வஸீகத்வா ஸுகீ² நித்³து³க்கோ² ப⁴வேய்யாதி. ராஜா போ³தி⁴ஸத்தஸ்ஸ வசனம் ஸுத்வா நிவத்தி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ ராஜா ஆனந்தோ³ அஹோஸி, பண்டி³தாமச்சோ பன அஹமேவ அஹோஸி’’ந்தி.

கோஸியஜாதகவண்ணனா ச²ட்டா².

[227] 7. கூ³த²பாணஜாதகவண்ணனா

ஸூரோ ஸூரேன ஸங்க³ம்மாதி இத³ம் ஸத்தா² ஜேதவனே விஹரந்தோ அஞ்ஞதரம் பி⁴க்கு²ம் ஆரப்³ப⁴ கதே²ஸி. தஸ்மிம் கிர காலே ஜேதவனதோ திகா³வுதட்³ட⁴யோஜனமத்தே ஏகோ நிக³மகா³மோ, தத்த² ப³ஹூனி ஸலாகப⁴த்தபக்கி²யப⁴த்தானி அத்தி². தத்ரேகோ பஞ்ஹபுச்ச²கோ கோண்டோ³ வஸதி. ஸோ ஸலாகப⁴த்தபக்கி²யப⁴த்தானம் அத்தா²ய ஆக³தே த³ஹரே ச ஸாமணேரே ச ‘‘கே கா²த³ந்தி, கே பிவந்தி, கே பு⁴ஞ்ஜந்தீ’’தி பஞ்ஹம் புச்சி²த்வா கதே²தும் அஸக்கோந்தே லஜ்ஜாபேஸி. தே தஸ்ஸ ப⁴யேன ஸலாகப⁴த்தபக்கி²யப⁴த்தத்தா²ய தம் கா³மம் ந க³ச்ச²ந்தி. அதே²கதி³வஸம் ஏகோ பி⁴க்கு² ஸலாகக்³க³ம் க³ந்த்வா ‘‘ப⁴ந்தே, அஸுககா³மே ஸலாகப⁴த்தம் வா பக்கி²யப⁴த்தம் வா அத்தீ²’’தி புச்சி²த்வா ‘‘அத்தா²வுஸோ, தத்த² பனேகோ கோண்டோ³ பஞ்ஹம் புச்ச²தி, தம் கதே²தும் அஸக்கோந்தே அக்கோஸதி பரிபா⁴ஸதி, தஸ்ஸ ப⁴யேன கோசி க³ந்தும் ந ஸக்கோதீ’’தி வுத்தே ‘‘ப⁴ந்தே, தத்த² ப⁴த்தானி மய்ஹம் பாபேத², அஹம் தம் த³மேத்வா நிப்³பி³ஸேவனம் கத்வா ததோ பட்டா²ய தும்ஹே தி³ஸ்வா பலாயனகம் கரிஸ்ஸாமீ’’தி ஆஹ. பி⁴க்கூ² ‘‘ஸாதூ⁴’’தி ஸம்படிச்சி²த்வா தஸ்ஸ தத்த² ப⁴த்தானி பாபேஸும்.

ஸோ தத்த² க³ந்த்வா கா³மத்³வாரே சீவரம் பாருபி. தம் தி³ஸ்வா கோண்டோ³ சண்ட³மேண்ட³கோ விய வேகே³ன உபக³ந்த்வா ‘‘பஞ்ஹம் மே, ஸமண, கதே²ஹீ’’தி ஆஹ. ‘‘உபாஸக, கா³மே சரித்வா யாகு³ம் ஆதா³ய ஆஸனஸாலம் தாவ மே ஆக³ந்தும் தே³ஹீ’’தி. ஸோ யாகு³ம் ஆதா³ய ஆஸனஸாலம் ஆக³தேபி தஸ்மிம் ததே²வ ஆஹ. ஸோபி நம் பி⁴க்கு² ‘‘யாகு³ம் தாவ மே பாதும் தே³ஹி, ஆஸனஸாலம் தாவ ஸம்மஜ்ஜிதும் தே³ஹி, ஸலாகப⁴த்தம் தாவ மே ஆஹரிதும் தே³ஹீ’’தி வத்வா ஸலாகப⁴த்தம் ஆஹரித்வா தமேவ பத்தம் கா³ஹாபேத்வா ‘‘ஏஹி, பஞ்ஹம் தே கதே²ஸ்ஸாமீ’’தி ப³ஹிகா³மம் நேத்வா சீவரம் ஸம்ஹரித்வா அம்ஸே ட²பேத்வா தஸ்ஸ ஹத்த²தோ பத்தம் க³ஹேத்வா அட்டா²ஸி. தத்ராபி நம் ஸோ ‘‘ஸமண, பஞ்ஹம் மே கதே²ஹீ’’தி ஆஹ. அத² நம் ‘‘கதே²மி தே பஞ்ஹ’’ந்தி ஏகப்பஹாரேனேவ பாதேத்வா அட்டீ²னி ஸம்சுண்ணேந்தோ விய போதே²த்வா கூ³த²ம் முகே² பக்கி²பித்வா ‘‘இதோ தா³னி பட்டா²ய இமம் கா³மம் ஆக³தம் கஞ்சி பி⁴க்கு²ம் பஞ்ஹம் புச்சி²தகாலே ஜானிஸ்ஸாமீ’’தி ஸந்தஜ்ஜேத்வா பக்காமி. ஸோ ததோ பட்டா²ய பி⁴க்கூ² தி³ஸ்வாவ பலாயதி. அபரபா⁴கே³ தஸ்ஸ பி⁴க்கு²னோ ஸா கிரியா பி⁴க்கு²ஸங்கே⁴ பாகடா ஜாதா. அதே²கதி³வஸம் த⁴ம்மஸபா⁴யம் பி⁴க்கூ² கத²ம் ஸமுட்டா²பேஸும் – ‘‘ஆவுஸோ, அஸுகபி⁴க்கு² கிர கோண்ட³ஸ்ஸ முகே² கூ³த²ம் பக்கி²பித்வா க³தோ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, ஸோ பி⁴க்கு² இதா³னேவ தம் மீள்ஹேன ஆஸாதே³தி, புப்³பே³பி ஆஸாதே³ஸியேவா’’தி வத்வா அதீதம் ஆஹரி.

அதீதே அங்க³மக³த⁴வாஸினோ அஞ்ஞமஞ்ஞஸ்ஸ ரட்ட²ம் க³ச்ச²ந்தா ஏகதி³வஸம் த்³வின்னம் ரட்டா²னம் ஸீமந்தரே ஏகம் ஸரம் நிஸ்ஸாய வஸித்வா ஸுரம் பிவித்வா மச்ச²மம்ஸம் கா²தி³த்வா பாதோவ யானானி யோஜேத்வா பக்கமிம்ஸு. தேஸம் க³தகாலே ஏகோ கூ³த²கா²த³கோ பாணகோ கூ³த²க³ந்தே⁴ன ஆக³ந்த்வா தேஸம் பீதட்டா²னே ச²ட்³டி³தம் ஸுரம் தி³ஸ்வா பிபாஸாய பிவித்வா மத்தோ ஹுத்வா கூ³த²புஞ்ஜம் அபி⁴ருஹி, அல்லகூ³த²ம் தஸ்மிம் ஆருள்ஹே தோ²கம் ஓனமி. ஸோ ‘‘பத²வீ மம் தா⁴ரேதும் ந ஸக்கோதீ’’தி விரவி. தஸ்மிஞ்ஞேவ க²ணே ஏகோ மத்தவரவாரணோ தம் பதே³ஸம் பத்வா கூ³த²க³ந்த⁴ம் கா⁴யித்வா ஜிகு³ச்ச²ந்தோ படிக்கமி. ஸோ தம் தி³ஸ்வா ‘‘ஏஸ மம ப⁴யேன பலாயதீ’’தி ஸஞ்ஞீ ஹுத்வா ‘‘இமினா மே ஸத்³தி⁴ம் ஸங்கா³மம் காதும் வட்டதீ’’தி தம் அவ்ஹயந்தோ பட²மம் கா³த²மாஹ –

153. ‘‘ஸூரோ ஸூரேன ஸங்க³ம்ம, விக்கந்தேன பஹாரினா;

ஏஹி நாக³ நிவத்தஸ்ஸு, கிம் நு பீ⁴தோ பலாயஸி;

பஸ்ஸந்து அங்க³மக³தா⁴, மம துய்ஹஞ்ச விக்கம’’ந்தி.

தஸ்ஸத்தோ² – த்வம் ஸூரோ மயா ஸூரேன ஸத்³தி⁴ம் ஸமாக³ந்த்வா வீரியவிக்கமேன விக்கந்தேன பஹாரதா³னஸமத்த²தாய பஹாரினா கிம்காரணா அஸங்கா³மேத்வாவ க³ச்ச²ஸி, நனு நாம ஏகஸம்பஹாரோபி தா³தப்³போ³ ஸியா, தஸ்மா ஏஹி நாக³ நிவத்தஸ்ஸு, ஏத்தகேனேவ மரணப⁴யதஜ்ஜிதோ ஹுத்வா கிம் நு பீ⁴தோ பலாயஸி, இமே இமம் ஸீமம் அந்தரம் கத்வா வஸந்தா பஸ்ஸந்து, அங்க³மக³தா⁴ மம துய்ஹஞ்ச விக்கமம் உபி⁴ன்னம்பி அம்ஹாகம் பரக்கமம் பஸ்ஸந்தூதி.

ஸோ ஹத்தீ² கண்ணம் த³த்வா தஸ்ஸ வசனம் ஸுத்வா நிவத்தித்வா தஸ்ஸ ஸந்திகம் க³ந்த்வா தம் அபஸாதே³ந்தோ து³தியம் கா³த²மாஹ –

154. ‘‘ந தம் பாதா³ வதி⁴ஸ்ஸாமி, ந த³ந்தேஹி ந ஸோண்டி³யா;

மீள்ஹேன தம் வதி⁴ஸ்ஸாமி, பூதி ஹஞ்ஞது பூதினா’’தி.

தஸ்ஸத்தோ² – ந தம் பாதா³தீ³ஹி வதி⁴ஸ்ஸாமி, துய்ஹம் பன அனுச்ச²விகேன மீள்ஹேன தம் வதி⁴ஸ்ஸாமீதி.

ஏவஞ்ச பன வத்வா ‘‘பூதிகூ³த²பாணகோ பூதினாவ ஹஞ்ஞதூ’’தி தஸ்ஸ மத்த²கே மஹந்தம் லண்ட³ம் பாதேத்வா உத³கம் விஸ்ஸஜ்ஜேத்வா தத்தே²வ தம் ஜீவிதக்க²யம் பாபேத்வா கோஞ்சனாத³ம் நத³ந்தோ அரஞ்ஞமேவ பாவிஸி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ கூ³த²பாணகோ கோண்டோ³ அஹோஸி, வாரணோ ஸோ பி⁴க்கு², தம் காரணம் பச்சக்க²தோ தி³ஸ்வா தஸ்மிம் வனஸண்டே³ நிவுத்த²தே³வதா பன அஹமேவ அஹோஸி’’ந்தி.

கூ³த²பாணஜாதகவண்ணனா ஸத்தமா.

[228] 8. காமனீதஜாதகவண்ணனா

தயோ கி³ரிந்தி இத³ம் ஸத்தா² ஜேதவனே விஹரந்தோ காமனீதப்³ராஹ்மணம் நாம ஆரப்³ப⁴ கதே²ஸி. வத்து² பச்சுப்பன்னஞ்ச அதீதஞ்ச த்³வாத³ஸகனிபாதே காமஜாதகே (ஜா. 1.12.37 ஆத³யோ) ஆவிப⁴விஸ்ஸதி. தேஸு பன த்³வீஸு ராஜபுத்தேஸு ஜேட்ட²கோ ஆக³ந்த்வா பா³ராணஸியம் ராஜா அஹோஸி, கனிட்டோ² உபராஜா. தேஸு ராஜா வத்து²காமகிலேஸகாமேஸு அதித்தோ த⁴னலோலோ அஹோஸி. ததா³ போ³தி⁴ஸத்தோ ஸக்கோ தே³வராஜா ஹுத்வா ஜம்பு³தீ³பம் ஓலோகேந்தோ தஸ்ஸ ரஞ்ஞோ த்³வீஸுபி காமேஸு அதித்தபா⁴வம் ஞத்வா ‘‘இமம் ராஜானம் நிக்³க³ண்ஹித்வா லஜ்ஜாபேஸ்ஸாமீ’’தி ப்³ராஹ்மணமாணவவண்ணேன ஆக³ந்த்வா ராஜானம் பஸ்ஸி, ரஞ்ஞா ச ‘‘கேனத்தே²ன ஆக³தோஸி மாணவா’’தி வுத்தே ‘‘அஹம், மஹாராஜ, தீணி நக³ரானி பஸ்ஸாமி கே²மானி ஸுபி⁴க்கா²னி பஹூதஹத்தி²அஸ்ஸரத²பத்தீனி ஹிரஞ்ஞஸுவண்ணாலங்காரப⁴ரிதானி, ஸக்கா ச பன தானி அப்பகேனேவ ப³லேன க³ண்ஹிதும், அஹம் தே தானி க³ஹேத்வா தா³தும் ஆக³தோ’’தி ஆஹ. ‘‘கதா³ க³ச்சா²ம, மாணவா’’தி வுத்தே ‘‘ஸ்வே மஹாராஜா’’தி. ‘‘தேன ஹி க³ச்ச², பாதோவ ஆக³ச்சே²ய்யாஸீ’’தி. ‘‘ஸாது⁴, மஹாராஜ, வேகே³ன ப³லம் ஸஜ்ஜேஹீ’’தி வத்வா ஸக்கோ ஸகட்டா²னமேவ க³தோ.

ராஜா புனதி³வஸே பே⁴ரிம் சராபேத்வா ப³லஸஜ்ஜம் காரேத்வா அமச்சே பக்கோஸாபேத்வா ஹிய்யோ ஏகோ ப்³ராஹ்மணமாணவோ ‘‘உத்தரபஞ்சாலே இந்த³பத்தே கேககேதி இமேஸு தீஸு நக³ரேஸு ரஜ்ஜம் க³ஹேத்வா த³ஸ்ஸாமீ’’தி ஆஹ, தம் மாணவம் ஆதா³ய தீஸு நக³ரேஸு ரஜ்ஜம் க³ண்ஹிஸ்ஸாம, வேகே³ன நம் பக்கோஸதா²தி. ‘‘கத்த²ஸ்ஸ, தே³வ, நிவாஸோ தா³பிதோ’’தி? ‘‘ந மே தஸ்ஸ நிவாஸகே³ஹம் தா³பித’’ந்தி. ‘‘நிவாஸபரிப்³ப³யோ பன தி³ன்னோ’’தி? ‘‘ஸோபி ந தி³ன்னோ’’தி. அத² ‘‘கஹம் நம் பஸ்ஸிஸ்ஸாமா’’தி? ‘‘நக³ரவீதீ²ஸு ஓலோகேதா²’’தி. தே ஓலோகேந்தா அதி³ஸ்வா ‘‘ந பஸ்ஸாம, மஹாராஜா’’தி ஆஹம்ஸு. ரஞ்ஞோ மாணவம் அபஸ்ஸந்தஸ்ஸ ‘‘ஏவம் மஹந்தா நாம இஸ்ஸரியா பரிஹீனோம்ஹீ’’தி மஹாஸோகோ உத³பாதி³, ஹத³யவத்து² உண்ஹம் அஹோஸி, வத்து²லோஹிதம் குப்பி, லோஹிதபக்க²ந்தி³கா உத³பாதி³, வேஜ்ஜா திகிச்சி²தும் நாஸக்கி²ம்ஸு.

ததோ தீஹசதூஹச்சயேன ஸக்கோ ஆவஜ்ஜமானோ தஸ்ஸ தம் ஆபா³த⁴ம் ஞத்வா ‘‘திகிச்சி²ஸ்ஸாமி ந’’ந்தி ப்³ராஹ்மணவண்ணேன ஆக³ந்த்வா த்³வாரே ட²த்வா ‘‘வேஜ்ஜப்³ராஹ்மணோ தும்ஹாகம் திகிச்ச²னத்தா²ய ஆக³தோ’’தி ஆரோசாபேஸி. ராஜா தம் ஸுத்வா ‘‘மஹந்தமஹந்தா ராஜவேஜ்ஜா மம் திகிச்சி²தும் நாஸக்கி²ம்ஸு, பரிப்³ப³யமஸ்ஸ தா³பேத்வா உய்யோஜேதா²’’தி ஆஹ. ஸக்கோ தம் ஸுத்வா ‘‘மய்ஹம் நேவ நிவாஸபரிப்³ப³யேன அத்தோ², வேஜ்ஜலாப⁴ம்பி ந க³ண்ஹிஸ்ஸாமி, திகிச்சி²ஸ்ஸாமி நம், புன ராஜா மம் பஸ்ஸதூ’’தி ஆஹ. ராஜா தம் ஸுத்வா ‘‘தேன ஹி ஆக³ச்ச²தூ’’தி ஆஹ. ஸக்கோ பவிஸித்வா ஜயாபேத்வா ஏகமந்தம் அட்டா²ஸி, ராஜா ‘‘த்வம் மம் திகிச்ச²ஸீ’’தி ஆஹ. ‘‘ஆம, தே³வா’’தி. ‘‘தேன ஹி திகிச்ச²ஸ்ஸூ’’தி. ‘‘ஸாது⁴, மஹாராஜ, ப்³யாதி⁴னோ மே லக்க²ணம் கதே²த², கேன காரணேன உப்பன்னோ, கிம் கா²தி³தம் வா பீதம் வா நிஸ்ஸாய, உதா³ஹு தி³ட்ட²ம் வா ஸுதம் வா’’தி? ‘‘தாத, மய்ஹம் ப்³யாதி⁴ ஸுதம் நிஸ்ஸாய உப்பன்னோ’’தி. ‘‘கிம் தே ஸுத’’ந்தி. ‘‘தாத ஏகோ மாணவோ ஆக³ந்த்வா மய்ஹம் ‘தீஸு நக³ரேஸு ரஜ்ஜம் க³ண்ஹித்வா த³ஸ்ஸாமீ’தி ஆஹ, அஹம் தஸ்ஸ நிவாஸட்டா²னம் வா நிவாஸபரிப்³ப³யம் வா ந தா³பேஸிம், ஸோ மய்ஹம் குஜ்ஜி²த்வா அஞ்ஞஸ்ஸ ரஞ்ஞோ ஸந்திகம் க³தோ ப⁴விஸ்ஸதி. அத² மே ‘ஏவம் மஹந்தா நாம இஸ்ஸரியா பரிஹீனோம்ஹீ’தி சிந்தேந்தஸ்ஸ அயம் ப்³யாதி⁴ உப்பன்னோ. ஸசே ஸக்கோஸி த்வம் மே காமசித்தம் நிஸ்ஸாய உப்பன்னம் ப்³யாதி⁴ம் திகிச்சி²தும், திகிச்சா²ஹீ’’தி ஏதமத்த²ம் பகாஸேந்தோ பட²மம் கா³த²மாஹ –

155. ‘‘தயோ கி³ரிம் அந்தரம் காமயாமி, பஞ்சாலா குருயோ கேககே ச;

ததுத்தரிம் ப்³ராஹ்மண காமயாமி, திகிச்ச² மம் ப்³ராஹ்மண காமனீத’’ந்தி.

தத்த² தயோ கி³ரிந்தி தயோ கி³ரீ, அயமேவ வா பாடோ². யதா² ‘‘ஸுத³ஸ்ஸனஸ்ஸ கி³ரினோ, த்³வாரஞ்ஹேதம் பகாஸதீ’’தி ஏத்த² ஸுத³ஸ்ஸனம் தே³வனக³ரம் யுஜ்ஜி²த்வா து³க்³க³ண்ஹதாய து³ச்சலனதாய ‘‘ஸுத³ஸ்ஸனகி³ரீ’’தி வுத்தம், ஏவமிதா⁴பி தீணி நக³ரானி ‘‘தயோ கி³ரி’’ந்தி அதி⁴ப்பேதானி. தஸ்மா அயமேத்த² அத்தோ² – தீணி ச நக³ரானி தேஸஞ்ச அந்தரம் திவித⁴ம்பி ரட்ட²ம் காமயாமி. ‘‘பஞ்சாலா குருயோ கேககே சா’’தி இமானி தேஸம் ரட்டா²னம் நாமானி. தேஸு பஞ்சாலாதி உத்தரபஞ்சாலா, தத்த² கபிலம் நாம நக³ரம். குருயோதி குருரட்ட²ம், தத்த² இந்த³பத்தம் நாம நக³ரம். கேககே சாதி பச்சத்தே உபயோக³வசனம், தேன கேககரட்ட²ம் த³ஸ்ஸேதி. தத்த² கேககராஜதா⁴னீயேவ நக³ரம். ததுத்தரிந்தி தம் அஹம் இதோ படிலத்³தா⁴ பா³ராணஸிரஜ்ஜா ததுத்தரிம் திவித⁴ம் ரஜ்ஜம் காமயாமி. திகிச்ச² மம், ப்³ராஹ்மண, காமனீதந்தி இமேஹி வத்து²காமேஹி ச கிலேஸகாமேஹி ச நீதம் ஹதம் பஹதம் ஸசே ஸக்கோஸி, திகிச்ச² மம் ப்³ராஹ்மணாதி.

அத² நம் ஸக்கோ ‘‘மஹாராஜ, த்வம் மூலோஸதா⁴தீ³ஹி அதேகிச்சோ². ஞாணோஸதே⁴னேவ திகிச்சி²தப்³போ³’’தி வத்வா து³தியம் கா³த²மாஹ –

156. ‘‘கண்ஹாஹித³ட்ட²ஸ்ஸ கரோந்தி ஹேகே, அமனுஸ்ஸபவிட்ட²ஸ்ஸ கரோந்தி பண்டி³தா;

ந காமனீதஸ்ஸ கரோதி கோசி, ஓக்கந்தஸுக்கஸ்ஸ ஹி கா திகிச்சா²’’தி.

தத்த² கண்ஹாஹித³ட்ட²ஸ்ஸ கரோந்தி ஹேகேதி ஏகச்சே ஹி திகிச்ச²கா கோ⁴ரவிஸேன காளஸப்பேன த³ட்ட²ஸ்ஸ மந்தேஹி சேவ ஓஸதே⁴ஹி ச திகிச்ச²ம் கரோந்தி. அமனுஸ்ஸபவிட்ட²ஸ்ஸ கரோந்தி பண்டி³தாதி அபரே பண்டி³தா பூ⁴தவேஜ்ஜா பூ⁴தயக்கா²தீ³ஹி அமனுஸ்ஸேஹி பவிட்ட²ஸ்ஸ அபி⁴பூ⁴தஸ்ஸ க³ஹிதஸ்ஸ ப³லிகம்மபரித்தகரணஓஸத⁴பரிபா⁴விதாதீ³ஹி திகிச்ச²ம் கரோந்தி. ந காமனீதஸ்ஸ கரோதி கோசீதி காமேஹி பன நீதஸ்ஸ காமவஸிகஸ்ஸ புக்³க³லஸ்ஸ அஞ்ஞத்ர பண்டி³தேஹி அஞ்ஞோ கோசி திகிச்ச²ம் ந கரோதி, கரோந்தோபி காதும் ஸமத்தோ² நாம நத்தி². கிம்காரணா? ஓக்கந்தஸுக்கஸ்ஸ ஹி கா திகிச்சா²தி, ஓக்கந்தஸுக்கஸ்ஸ அவக்கந்தஸ்ஸ குஸலத⁴ம்மமரியாத³ம் அதிக்கந்தஸ்ஸ அகுஸலத⁴ம்மே பதிட்டி²தஸ்ஸ புக்³க³லஸ்ஸ மந்தோஸதா⁴தீ³ஹி கா நாம திகிச்சா², ந ஸக்கா ஓஸதே⁴ஹி திகிச்சி²துந்தி.

இதிஸ்ஸ மஹாஸத்தோ இமம் காரணம் த³ஸ்ஸேத்வா உத்தரி ஏவமாஹ – ‘‘மஹாராஜ, ஸசே த்வம் தானி தீணி ரஜ்ஜானி லச்ச²ஸி, அபி நு கோ² இமேஸு சதூஸு நக³ரேஸு ரஜ்ஜம் கரோந்தோ ஏகப்பஹாரேனேவ சத்தாரி ஸாடகயுகா³னி பரித³ஹேய்யாஸி, சதூஸு வா ஸுவண்ணபாதீஸு பு⁴ஞ்ஜேய்யாஸி, சதூஸு வா ஸயனேஸு ஸயேய்யாஸி, மஹாராஜ, தண்ஹாவஸிகேன நாம ப⁴விதும் ந வட்டதி, தண்ஹா ஹி நாமேஸா விபத்திமூலா. ஸா வட்³ட⁴மானா யோ தம் வட்³டே⁴தி, தம் புக்³க³லம் அட்ட²ஸு மஹானிரயேஸு ஸோளஸஸு உஸ்ஸத³னிரயேஸு நானப்பகாரபே⁴தே³ஸு ச அவஸேஸேஸு அபாயேஸு கி²பதீ’’தி. ஏவம் ராஜானம் நிரயாதி³ப⁴யேன தஜ்ஜேத்வா மஹாஸத்தோ த⁴ம்மம் தே³ஸேஸி. ராஜாபிஸ்ஸ த⁴ம்மம் ஸுத்வா விக³தஸோகோ ஹுத்வா தாவதே³வ நிப்³யாதி⁴தம் பாபுணி. ஸக்கோபிஸ்ஸ ஓவாத³ம் த³த்வா ஸீலேஸு பதிட்டா²பேத்வா தே³வலோகமேவ க³தோ. ஸோபி ததோ பட்டா²ய தா³னாதீ³னி புஞ்ஞானி கத்வா யதா²கம்மம் க³தோ.

ஸத்தா² இமம் த⁴ம்மதே³ஸனம் ஆஹரித்வா ஸச்சானி பகாஸேத்வா ஜாதகம் ஸமோதா⁴னேஸி – ‘‘ததா³ ராஜா காமனீதப்³ராஹ்மணோ அஹோஸி, ஸக்கோ பன அஹமேவ அஹோஸி’’ந்தி.

காமனீதஜாதகவண்ணனா அட்ட²மா.

[229] 9. பலாயிதஜாதகவண்ணனா

க³ஜக்³க³மேகே⁴ஹீதி இத³ம் ஸத்தா² ஜேதவனே விஹரந்தோ பலாயிதபரிப்³பா³ஜகம் ஆரப்³ப⁴ கதே²ஸி. ஸோ கிர வாத³த்தா²ய ஸகலஜம்பு³தீ³பம் விசரித்வா கஞ்சி படிவாதி³ம் அலபி⁴த்வா அனுபுப்³பே³ன ஸாவத்தி²ம் க³ந்த்வா ‘‘அத்தி² நு கோ² கோசி மயா ஸத்³தி⁴ம் வாத³ம் காதும் ஸமத்தோ²’’தி மனுஸ்ஸே புச்சி². மனுஸ்ஸா ‘‘தாதி³ஸானம் ஸஹஸ்ஸேனபி ஸத்³தி⁴ம் வாத³ம் காதும் ஸமத்தோ² ஸப்³ப³ஞ்ஞூ த்³விபதா³னம் அக்³கோ³ மஹாகோ³தமோ த⁴ம்மிஸ்ஸரோ பரப்பவாத³மத்³த³னோ, ஸகலேபி ஜம்பு³தீ³பே உப்பன்னோ பரப்பவாதோ³ தம் ப⁴க³வந்தம் அதிக்கமிதும் ஸமத்தோ² நாம நத்தி². வேலந்தம் பத்வா ஸமுத்³த³ஊமியோ விய ஹி ஸப்³ப³வாதா³ தஸ்ஸ பாத³மூலம் பத்வா சுண்ணவிசுண்ணா ஹோந்தீ’’தி பு³த்³த⁴கு³ணே கதே²ஸும். பரிப்³பா³ஜகோ ‘‘கஹம் பன ஸோ ஏதரஹீ’’தி புச்சி²த்வா ‘‘ஜேதவனே’’தி ஸுத்வா ‘‘இதா³னிஸ்ஸ வாத³ம் ஆரோபேஸ்ஸாமீ’’தி மஹாஜனபரிவுதோ ஜேதவனம் க³ச்ச²ந்தோ ஜேதேன ராஜகுமாரேன நவகோடித⁴னம் விஸ்ஸஜ்ஜேத்வா காரிதம் ஜேதவனத்³வாரகோட்ட²கம் தி³ஸ்வா ‘‘அயம் ஸமணஸ்ஸ கோ³தமஸ்ஸ வஸனபாஸாதோ³’’தி புச்சி²த்வா ‘‘த்³வாரகோட்ட²கோ அய’’ந்தி ஸுத்வா ‘‘த்³வாரகோட்ட²கோ தாவ ஏவரூபோ, வஸனகே³ஹம் கீதி³ஸம் ப⁴விஸ்ஸதீ’’தி வத்வா ‘‘க³ந்த⁴குடி நாம அப்பமேய்யா’’தி வுத்தே ‘‘ஏவரூபேன ஸமணேன ஸத்³தி⁴ம் கோ வாத³ம் கரிஸ்ஸதீ’’தி ததோவ பலாயி. மனுஸ்ஸா உன்னாதி³னோ ஹுத்வா ஜேதவனம் பவிஸித்வா ஸத்தா²ரா ‘‘கிம் அகாலே ஆக³தத்தா²’’தி வுத்தா தம் பவத்திம் கத²யிம்ஸு. ஸத்தா² ‘‘ந கோ² உபாஸகா இதா³னேவ, புப்³பே³பேஸ மம வஸனட்டா²னஸ்ஸ த்³வாரகோட்ட²கம் தி³ஸ்வா பலாயதேவா’’தி வத்வா தேஹி யாசிதோ அதீதம் ஆஹரி.

அதீதே க³ந்தா⁴ரரட்டே² தக்கஸிலாயம் போ³தி⁴ஸத்தோ ரஜ்ஜம் காரேஸி, பா³ராணஸியம் ப்³ரஹ்மத³த்தோ. ஸோ ‘‘தக்கஸிலம் க³ண்ஹிஸ்ஸாமீ’’தி மஹந்தேன ப³லகாயேன க³ந்த்வா நக³ரதோ அவிதூ³ரே ட²த்வா ‘‘இமினா நியாமேன ஹத்தீ² பேஸேத², இமினா அஸ்ஸே, இமினா ரதே², இமினா பத்தீ, ஏவம் தா⁴வித்வா ஆவுதே⁴ஹி பஹரத², ஏவம் க⁴னவஸ்ஸவலாஹகா விய ஸரவஸ்ஸம் வஸ்ஸதா²’’தி தேனம் விசாரேந்தோ இமம் கா³தா²த்³வயமாஹ –

157. ‘‘க³ஜக்³க³மேகே⁴ஹி ஹயக்³க³மாலிபி⁴, ரதூ²மிஜாதேஹி ஸராபி⁴வஸ்ஸேபி⁴;

த²ருக்³க³ஹாவட்டத³ள்ஹப்பஹாரிபி⁴, பரிவாரிதா தக்கஸிலா ஸமந்ததோ.

158. ‘‘அபி⁴தா⁴வத² சூபதா⁴வத² ச, விவிதா⁴ வினாதி³தா வத³ந்திபி⁴;

வத்ததஜ்ஜ துமுலோ கோ⁴ஸோ யதா², விஜ்ஜுலதா ஜலத⁴ரஸ்ஸ க³ஜ்ஜதோ’’தி.

தத்த² க³ஜக்³க³மேகே⁴ஹீதி அக்³க³க³ஜமேகே⁴ஹி, கோஞ்சனாத³ம் க³ஜ்ஜந்தேஹி மத்தவரவாரணவலாஹகேஹீதி அத்தோ². ஹயக்³க³மாலிபீ⁴தி அக்³க³ஹயமாலீஹி, வரஸிந்த⁴வவலாஹககுலேஹி அஸ்ஸானீகேஹீதி அத்தோ². ரதூ²மிஜாதேஹீதி ஸஞ்ஜாதஊமிவேகே³ஹி ஸாக³ரஸலிலேஹி விய ஸஞ்ஜாதரதூ²மீஹி, ரதா²னீகேஹீதி அத்தோ². ஸராபி⁴வஸ்ஸேபீ⁴தி தேஹியேவ ரதா²னீகேஹி க⁴னவஸ்ஸமேகோ⁴ விய ஸரவஸ்ஸம் வஸ்ஸந்தேஹி. த²ருக்³க³ஹாவட்டத³ள்ஹப்பஹாரிபீ⁴தி த²ருக்³க³ஹேஹி ஆவட்டத³ள்ஹப்பஹாரீஹி, இதோ சிதோ ச ஆவத்தித்வா பரிவத்தித்வா த³ள்ஹம் பஹரந்தேஹி க³ஹிதக²க்³க³ரதனத²ருத³ண்டே³ஹி பத்தியோதே⁴ஹி சாதி அத்தோ². பரிவாரிதா தக்கஸிலா ஸமந்ததோதி யதா² அயம் தக்கஸிலா பரிவாரிதா ஹோதி, ஸீக⁴ம் ததா² கரோதா²தி அத்தோ².

அபி⁴தா⁴வத² சூபதா⁴வத² சாதி வேகே³ன தா⁴வத² சேவ உபதா⁴வத² ச. விவிதா⁴ வினாதி³தா வத³ந்திபீ⁴தி வரவாரணேஹி ஸத்³தி⁴ம் விவிதா⁴ வினதி³தா ப⁴வத², ஸேலிதக³ஜ்ஜிதவாதி³தேஹி நானாவிரவா ஹோதா²தி அத்தோ². வத்ததஜ்ஜ துமுலோ கோ⁴ஸோதி வத்தது அஜ்ஜ துமுலோ மஹந்தோ அஸனிஸத்³த³ஸதி³ஸோ கோ⁴ஸோ. யதா² விஜ்ஜுலதா ஜலத⁴ரஸ்ஸ க³ஜ்ஜதோதி யதா² க³ஜ்ஜந்தஸ்ஸ ஜலத⁴ரஸ்ஸ முக²தோ நிக்³க³தா விஜ்ஜுலதா சரந்தி, ஏவம் விசரந்தா நக³ரம் பரிவாரேத்வா ரஜ்ஜம் க³ண்ஹதா²தி வத³தி.

இதி ஸோ ராஜா க³ஜ்ஜித்வா ஸேனம் விசாரேத்வா நக³ரத்³வாரஸமீபம் க³ந்த்வா த்³வாரகோட்ட²கம் தி³ஸ்வா ‘‘இத³ம் ரஞ்ஞோ வஸனகே³ஹ’’ந்தி புச்சி²த்வா ‘‘அயம் நக³ரத்³வாரகோட்ட²கோ’’தி வுத்தே ‘‘நக³ரத்³வாரகோட்ட²கோ தாவ ஏவரூபோ, ரஞ்ஞோ நிவேஸனம் கீதி³ஸம் ப⁴விஸ்ஸதீ’’தி வத்வா ‘‘வேஜயந்தபாஸாத³ஸதி³ஸ’’ந்தி ஸுத்வா ‘‘ஏவம் யஸஸம்பன்னேன ரஞ்ஞா ஸத்³தி⁴ம் யுஜ்ஜி²தும் ந ஸக்கி²ஸ்ஸாமா’’தி த்³வாரகோட்ட²கம் தி³ஸ்வாவ நிவத்தித்வா பலாயித்வா பா³ராணஸிமேவ அக³மாஸி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ பா³ராணஸிராஜா பலாயிதபரிப்³பா³ஜகோ அஹோஸி, தக்கஸிலராஜா பன அஹமேவ அஹோஸி’’ந்தி.

பலாயிதஜாதகவண்ணனா நவமா.

[230] 10. து³தியபலாயிதஜாதகவண்ணனா

த⁴ஜமபரிமிதந்தி இத³ம் ஸத்தா² ஜேதவனே விஹரந்தோ ஏகம் பலாயிதபரிப்³பா³ஜகமேவ ஆரப்³ப⁴ கதே²ஸி. இமஸ்மிம் பன வத்து²ஸ்மிம் ஸோ பரிப்³பா³ஜகோ ஜேதவனம் பாவிஸி. தஸ்மிம் க²ணே ஸத்தா² மஹாஜனபரிவுதோ அலங்கதத⁴ம்மாஸனே நிஸின்னோ மனோஸிலாதலே ஸீஹனாத³ம் நத³ந்தோ ஸீஹபோதகோ விய த⁴ம்மம் தே³ஸேதி. பரிப்³பா³ஜகோ த³ஸப³லஸ்ஸ ப்³ரஹ்மஸரீரபடிபா⁴க³ம் ரூபம் புண்ணசந்த³ஸஸ்ஸிரிகம் முக²ம் ஸுவண்ணபட்டஸதி³ஸம் நலாடஞ்ச தி³ஸ்வா ‘‘கோ ஏவரூபம் புரிஸுத்தமம் ஜினிதும் ஸக்கி²ஸ்ஸதீ’’தி நிவத்தித்வா பரிஸந்தரம் பவிஸித்வா பலாயி. மஹாஜனோ தம் அனுப³ந்தி⁴த்வா நிவத்தித்வா ஸத்து²ஸ்ஸ தம் பவத்திம் ஆரோசேஸி. ஸத்தா² ‘‘ந ஸோ பரிப்³பா³ஜகோ இதா³னேவ, புப்³பே³பி மம ஸுவண்ணவண்ணம் முக²ம் தி³ஸ்வா பலாதோயேவா’’தி வத்வா அதீதம் ஆஹரி.

அதீதே போ³தி⁴ஸத்தோ பா³ராணஸியம் ரஜ்ஜம் காரேஸி, தக்கஸிலாயம் ஏகோ க³ந்தா⁴ரராஜா. ஸோ ‘‘பா³ராணஸிம் க³ஹேஸ்ஸாமீ’’தி சதுரங்கி³னியா ஸேனாய ஆக³ந்த்வா நக³ரம் பரிவாரேத்வா நக³ரத்³வாரே டி²தோ அத்தனோ ப³லவாஹனம் ஓலோகேத்வா ‘‘கோ ஏத்தகம் ப³லவாஹனம் ஜினிதும் ஸக்கி²ஸ்ஸதீ’’தி அத்தனோ ஸேனம் ஸம்வண்ணேத்வா பட²மம் கா³த²மாஹ –

159. ‘‘த⁴ஜமபரிமிதம் அனந்தபாரம், து³ப்பஸஹம் த⁴ங்கேஹி ஸாக³ரம்வ;

கி³ரிமிவ அனிலேன து³ப்பஸய்ஹோ, து³ப்பஸஹோ அஹமஜ்ஜ தாதி³ஸேனா’’தி.

தத்த² த⁴ஜமபரிமிதந்தி இத³ம் தாவ மே ரதே²ஸு மோரச²தே³ ட²பேத்வா உஸ்ஸாபிதத⁴ஜமேவ அபரிமிதம் ப³ஹும் அனேகஸதஸங்க்²யம். அனந்தபாரந்தி ப³லவாஹனம்பி மே ‘‘ஏத்தகா ஹத்தீ² ஏத்தகா அஸ்ஸா ஏத்தகா ரதா² ஏத்தகா பத்தீ’’தி க³ணனபரிச்சே²த³ரஹிதம் அனந்தபாரம். து³ப்பஸஹந்தி ந ஸக்கா படிஸத்தூஹி ஸஹிதும் அபி⁴ப⁴விதும். யதா² கிம்? த⁴ங்கேஹி ஸாக³ரம்வ, யதா² ஸாக³ரோ ப³ஹூஹி காகேஹி வேக³விக்க²ம்ப⁴னவஸேன வா அதிக்கமனவஸேன வா து³ப்பஸஹோ, ஏவம் து³ப்பஸஹம். கி³ரிமிவ அனிலேன து³ப்பஸய்ஹோதி அபிச மே அயம் ப³லகாயோ யதா² பப்³ப³தோ வாதேன அகம்பனீயதோ து³ப்பஸஹோ, ததா² அஞ்ஞேன ப³லகாயேன து³ப்பஸஹோ. து³ப்பஸஹோ அஹமஜ்ஜ தாதி³ஸேனாதி ஸ்வாஹம் இமினா ப³லேன ஸமன்னாக³தோ அஜ்ஜ தாதி³ஸேன து³ப்பஸஹோதி அட்டாலகே டி²தம் போ³தி⁴ஸத்தம் ஸந்தா⁴ய வத³தி.

அத²ஸ்ஸ ஸோ புண்ணசந்த³ஸஸ்ஸிரிகம் அத்தனோ முக²ம் த³ஸ்ஸேத்வா ‘‘பா³ல, மா விப்பலபஸி, இதா³னி தே ப³லவாஹனம் மத்தவாரணோ விய நளவனம் வித்³த⁴ம்ஸேஸ்ஸாமீ’’தி ஸந்தஜ்ஜேத்வா து³தியம் கா³த²மாஹ –

160. ‘‘மா பா³லியம் விலபி ந ஹிஸ்ஸ தாதி³ஸம், விட³ய்ஹஸே ந ஹி லப⁴ஸே நிஸேத⁴கம்;

ஆஸஜ்ஜஸி க³ஜமிவ ஏகசாரினம், யோ தம் பதா³ நளமிவ போத²யிஸ்ஸதீ’’தி.

தத்த² மா பா³லியம் விலபீதி மா அத்தனோ பா³லபா⁴வம் விப்பலபஸி. ந ஹிஸ்ஸ தாதி³ஸந்தி ந ஹி அஸ்ஸ தாதி³ஸோ, அயமேவ வா பாடோ². தாதி³ஸோ ‘‘அனந்தபாரம் மே ப³லவாஹன’’ந்தி ஏவரூபம் தக்கேந்தோ ரஜ்ஜஞ்ச க³ஹேதும் ஸமத்தோ² நாம ந ஹி அஸ்ஸ, ந ஹோதீதி அத்தோ². விட³ய்ஹஸேதி த்வம் பா³ல, கேவலம் ராக³தோ³ஸமோஹமானபரிளாஹேன விட³ய்ஹஸியேவ. ந ஹி லப⁴ஸே நிஸேத⁴கந்தி மாதி³ஸம் பன பஸய்ஹ அபி⁴ப⁴வித்வா நிஸேத⁴கம் ந தாவ லப⁴ஸி, அஜ்ஜ தம் ஆக³தமக்³கே³னேவ பலாபேஸ்ஸாமி. ஆஸஜ்ஜஸீதி உபக³ச்ச²ஸி. க³ஜமிவ ஏகசாரினந்தி ஏகசாரினம் மத்தவரவாரணம் விய. யோ தம் பதா³ நளமிவ போத²யிஸ்ஸதீதி யோ தம் யதா² நாம மத்தவரவாரணோ பாதா³ நளம் போதே²தி ஸம்சுண்ணேதி, ஏவம் போத²யிஸ்ஸதி, தம் த்வம் ஆஸஜ்ஜஸீதி அத்தானம் ஸந்தா⁴யாஹ.

ஏவம் தஜ்ஜேந்தஸ்ஸ பனஸ்ஸ கத²ம் ஸுத்வா க³ந்தா⁴ரராஜா உல்லோகேந்தோ கஞ்சனபட்டஸதி³ஸம் மஹானலாடம் தி³ஸ்வா அத்தனோ க³ஹணபீ⁴தோ நிவத்தித்வா பலாயந்தோ ஸகனக³ரமேவ அக³மாஸி.

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேஸி – ‘‘ததா³ க³ந்தா⁴ரராஜா பலாயிதபரிப்³பா³ஜகோ அஹோஸி, பா³ராணஸிராஜா பன அஹமேவ அஹோஸி’’ந்தி.

து³தியபலாயிதஜாதகவண்ணனா த³ஸமா.

காஸாவவக்³கோ³ அட்ட²மோ.

தஸ்ஸுத்³தா³னம் –

காஸாவம் சூளனந்தி³யம், புடப⁴த்தஞ்ச கும்பி⁴லம்;

க²ந்திவண்ணம் கோஸியஞ்ச, கூ³த²பாணம் காமனீதம்;

பலாயிதத்³வயம்பி ச.