6. தண்ஹுப்பாத³ஸுத்தவண்ணனா

105. ச²ட்டே² தண்ஹுப்பாதா³தி ஏத்த² உப்பஜ்ஜதி ஏதேஸூதி உப்பாதா³. கா உப்பஜ்ஜதி? தண்ஹா. தண்ஹாய உப்பாதா³ தண்ஹுப்பாதா³, தண்ஹாவத்தூ²னி தண்ஹாகாரணானீதி அத்தோ². யத்தா²தி யேஸு நிமித்தபூ⁴தேஸு. உப்பஜ்ஜமானாதி உப்பஜ்ஜனஸீலா. சீவரஹேதூதி ‘‘கத்த² மனாபம் சீவரம் லபி⁴ஸ்ஸாமீ’’தி சீவரகாரணா உப்பஜ்ஜதி. ஸேஸபதே³ஸுபி ஏஸேவ நயோ. இதிப⁴வாப⁴வஹேதூதி ஏத்த² பன இதீதி நித³ஸ்ஸனத்தே² நிபாதோ. யதா² சீவராதி³ஹேது, ஏவம் ப⁴வாப⁴வஹேதுபீதி அத்தோ². ப⁴வாப⁴வாதி சேத்த² பணீதப்பணீதானி ஸப்பினவனீதாதீ³னி அதி⁴ப்பேதானி ப⁴வதி ஆரோக்³யம் ஏதேனாதி கத்வா. ‘‘ஸம்பத்திப⁴வேஸு பணீதப்பணீததரோ ப⁴வாப⁴வோ’’திபி வத³ந்தி. ப⁴வோதி வா ஸம்பத்தி, அப⁴வோதி விபத்தி. ப⁴வோதி வுட்³டி⁴, அப⁴வோதி ஹானி. தம் நிமித்தஞ்ச தண்ஹா உப்பஜ்ஜதீதி வுத்தம் ‘‘ப⁴வாப⁴வஹேது வா’’தி.

கா³தா² ஹேட்டா² வுத்தத்தா² ஏவ. அபிச தண்ஹாது³தியோதி தண்ஹாஸஹாயோ. அயஞ்ஹி ஸத்தோ அனமதக்³கே³ ஸம்ஸாரவட்டே ஸம்ஸரந்தோ ந ஏககோவ ஸம்ஸரதி, தண்ஹம் பன து³தியிகம் ஸஹாயிகம் லபி⁴த்வாவ ஸம்ஸரதி. ததா² ஹி தம் பபாதபாதம் அசிந்தேத்வா மது⁴க³ண்ஹனகலுத்³த³கம் விய அனேகாதீ³னவாகுலேஸுபி ப⁴வேஸு ஆனிஸம்ஸமேவ த³ஸ்ஸேந்தீ அனத்த²ஜாலே ஸா பரிப்³ப⁴மாபேதி. ஏதமாதீ³னவம் ஞத்வாதி ஏதம் அதீதானாக³தபச்சுப்பன்னேஸு க²ந்தே⁴ஸு இத்த²பா⁴வஞ்ஞதா²பா⁴வஸஞ்ஞிதம் ஆதீ³னவம் ஜானித்வா. தண்ஹம் து³க்க²ஸ்ஸ ஸம்ப⁴வந்தி ‘‘தண்ஹா சாயம் வட்டது³க்க²ஸ்ஸ ஸம்ப⁴வோ பப⁴வோ காரண’’ந்தி ஜானித்வா. ஏத்தாவதா ச ஏகஸ்ஸ பி⁴க்கு²னோ விபஸ்ஸனம் வட்³டே⁴த்வா அரஹத்துப்பத்தி த³ஸ்ஸிதா. இதா³னி தம் கீ²ணாஸவம் தோ²மேந்தோ ‘‘வீததண்ஹோ’’திஆதி³மாஹ. யம் பனேத்த² அவுத்தம், தம் ஹேட்டா² வுத்தனயமேவ.

ச²ட்ட²ஸுத்தவண்ணனா நிட்டி²தா.