7. ஸப்³ரஹ்மகஸுத்தவண்ணனா

106. ஸத்தமே ஸப்³ரஹ்மகானீதி ஸஸேட்ட²கானி. யேஸந்தி யேஸம் குலானம். புத்தானந்தி புத்தேஹி பூஜிதஸத்³த³யோகே³ன ஹி இத³ம் கரணத்தே² ஸாமிவசனம். அஜ்ஜா²கா³ரேதி ஸகே க⁴ரே. பூஜிதா ஹோந்தீதி யம் க⁴ரே அத்தி², தேன படிஜக்³கி³தா மனாபேன சேவ காயிகவாசஸிகேன ச பச்சுபட்டி²தா ஹோந்தி. இதி மாதாபிதுபூஜகானி குலானி ‘‘ஸப்³ரஹ்மகானீ’’தி பஸம்ஸித்வா உபரிபி நேஸம் பஸம்ஸனீயதம் த³ஸ்ஸேந்தோ ‘‘ஸபுப்³ப³தே³வதானீ’’திஆதி³மாஹ.

தத்த² ப்³ரஹ்மாதிஆதீ³னி தேஸம் ப்³ரஹ்மாதி³பா⁴வஸாத⁴னத்த²ம் வுத்தானி. தத்ராயமத்த²விபா⁴வனா – ப்³ரஹ்மாதி ஸேட்டா²தி⁴வசனம். யதா² ஹி ப்³ரஹ்முனோ சதஸ்ஸோ பா⁴வனா அவிஜஹிதா ஹோந்தி மேத்தா, கருணா, முதி³தா, உபேக்கா²தி, ஏவம் மாதாபிதூனம் புத்தேஸு சதஸ்ஸோ பா⁴வனா அவிஜஹிதா ஹோந்தி. தா தஸ்மிம் தஸ்மிம் காலே வேதி³தப்³பா³ – குச்சி²க³தஸ்மிஞ்ஹி தா³ரகே ‘‘கதா³ ந கோ² புத்தகம் அரோக³ம் பரிபுண்ணங்க³பச்சங்க³ம் பஸ்ஸிஸ்ஸாமா’’தி மாதாபிதூனம் மேத்தசித்தம் உப்பஜ்ஜதி. யதா³ பனேஸ மந்தோ³ உத்தானஸேய்யகோ ஊகாஹி வா மங்குலேஹி வா த³ட்டோ² து³க்க²ஸேய்யாய வா பீளிதோ பரோத³தி விரவதி, ததா³ஸ்ஸ ஸத்³த³ம் ஸுத்வா மாதாபிதூனம் காருஞ்ஞம் உப்பஜ்ஜதி. ஆதா⁴வித்வா விதா⁴வித்வா கீளனகாலே பன லோப⁴னீயவயஸ்மிம் வா டி²தகாலே தா³ரகம் ஓலோகேத்வா மாதாபிதூனம் சித்தம் ஸப்பிமண்டே³ பக்கி²த்தஸதவிஹதகப்பாஸபிசுபடலம் விய முது³கம் ஆமோதி³தம் பமோதி³தம், ததா³ நேஸம் முதி³தா லப்³ப⁴தி. யதா³ பன தேஸம் புத்தோ தா³ரப⁴ரணம் பச்சுபட்ட²பேத்வா பாடியேக்கம் அகா³ரம் அஜ்ஜா²வஸதி, ததா³ மாதாபிதூனம் ‘‘ஸக்கோதி தா³னி நோ புத்தகோ அத்தனோ த⁴ம்மதாய ஜீவிது’’ந்தி மஜ்ஜ²த்தபா⁴வோ உப்பஜ்ஜதி. ஏவம் தஸ்மிம் காலே உபேக்கா² லப்³ப⁴தி. ஏவம் மாதாபிதூனம் புத்தேஸு யதா²காலம் சதுப்³பி³த⁴ஸ்ஸபி ப்³ரஹ்மவிஹாரஸ்ஸ லப்³ப⁴னதோ ப்³ரஹ்மஸதி³ஸவுத்திதாய வுத்தம் ‘‘ப்³ரஹ்மாதி, பி⁴க்க²வே, மாதாபிதூனம் ஏதம் அதி⁴வசன’’ந்தி.

புப்³ப³தே³வதாதி ஏத்த² தே³வா நாம திவிதா⁴ – ஸம்முதிதே³வா, உபபத்திதே³வா, விஸுத்³தி⁴தே³வாதி. தேஸு ஸம்முதிதே³வா நாம ராஜானோ க²த்தியா. தே ஹி ‘‘தே³வோ, தே³வீ’’தி லோகே வோஹரீயந்தி, தே³வா விய லோகஸ்ஸ நிக்³க³ஹானுக்³க³ஹஸமத்தா² ச ஹோந்தி. உபபத்திதே³வா நாம சாதுமஹாராஜிகதோ பட்டா²ய யாவ ப⁴வக்³கா³ உப்பன்னா ஸத்தா. விஸுத்³தி⁴தே³வா நாம கீ²ணாஸவா ஸப்³ப³கிலேஸவிஸுத்³தி⁴தோ. தத்ராயம் வசனத்தோ² – தி³ப்³ப³ந்தி, கீளந்தி, லளந்தி, ஜோதந்தி படிபக்க²ம் ஜயந்தி வாதி தே³வா. தேஸு ஸப்³ப³ஸேட்டா² விஸுத்³தி⁴தே³வா. யதா² தே பா³லஜனேஹி கதம் அபராத⁴ம் அக³ணேத்வா ஏகந்தேனேவ தேஸம் அனத்த²ஹானிம் அத்து²ப்பத்திஞ்ச ஆகங்க²ந்தாவ யதா²வுத்தப்³ரஹ்மவிஹாரயோகே³ன அத்தா²ய ஹிதாய ஸுகா²ய படிபஜ்ஜந்தி, த³க்கி²ணேய்யதாய ச தேஸம் காரானம் மஹப்ப²லதம் மஹானிஸம்ஸதஞ்ச ஆவஹந்தி; ஏவமேவ மாதாபிதரோபி புத்தானம் அபராத⁴ம் அக³ணேத்வா ஏகந்தேனேவ தேஸம் அனத்த²ஹானிம் அத்து²ப்பத்திஞ்ச ஆகங்க²ந்தா வுத்தனயேனேவ சதுப்³பி³த⁴ஸ்ஸபி ப்³ரஹ்மவிஹாரஸ்ஸ லப்³ப⁴னதோ அத்தா²ய ஹிதாய ஸுகா²ய படிபஜ்ஜந்தா பரமத³க்கி²ணேய்யா ஹுத்வா அத்தனி கதானம் காரானம் மஹப்ப²லதம் மஹானிஸம்ஸதஞ்ச ஆவஹந்தி. ஸப்³ப³தே³வேஹி ச பட²மம் தேஸம் உபகாரவந்ததாய தே ஆதி³தோயேவ தே³வா. தேஸஞ்ஹி வஸேன தே பட²மம் அஞ்ஞே தே³வே ‘‘தே³வா’’தி ஜானந்தி ஆராதே⁴ந்தி பயிருபாஸந்தி, ஆராத⁴னவிதி⁴ம் ஞத்வா ததா² படிபஜ்ஜந்தா தஸ்ஸா படிபத்தியா ப²லம் அதி⁴க³ச்ச²ந்தி, தஸ்மா தே பச்சா²தே³வா நாம. தேன வுத்தம் ‘‘புப்³ப³தே³வதாதி, பி⁴க்க²வே, மாதாபிதூனம் ஏதம் அதி⁴வசன’’ந்தி.

புப்³பா³சரியாதி பட²மஆசரியா. மாதாபிதரோ ஹி புத்தே ஸிக்கா²பேந்தா அதிதருணகாலதோ பட்டா²ய ‘‘ஏவம் நிஸீத³, ஏவம் க³ச்ச², ஏவம் திட்ட², ஏவம் ஸய, ஏவம் கா²த³, ஏவம் பு⁴ஞ்ஜ, அயம் தே ‘தாதா’தி வத்தப்³போ³, அயம் ‘பா⁴திகா’தி, அயம் ‘ப⁴கி³னீ’தி, இத³ம் நாம காதும் வட்டதி, இத³ம் ந வட்டதி, அஸுகம் நாம உபஸங்கமிதும் வட்டதி, அஸுகம் நாம ந வட்டதீ’’தி கா³ஹேந்தி ஸிக்கா²பேந்தி. அபரபா⁴கே³ அஞ்ஞே ஆசரியாபி ஸிப்பம் முத்³த³ம் க³ணனந்தி ஏவமாதி³ம் ஸிக்கா²பேந்தி, அஞ்ஞே ஸரணானி தே³ந்தி, ஸீலேஸு பதிட்டா²பேந்தி, பப்³பா³ஜேந்தி, த⁴ம்மம் உக்³க³ண்ஹாபேந்தி, உபஸம்பாதே³ந்தி, ஸோதாபத்திமக்³கா³தீ³னி பாபேந்தி. இதி ஸப்³பே³பி தே பச்சா²ஆசரியா நாம. மாதாபிதரோ பன ஸப்³ப³பட²மம். தேனாஹ ‘‘புப்³பா³சரியாதி, பி⁴க்க²வே, மாதாபிதூனம் ஏதம் அதி⁴வசன’’ந்தி.

ஆஹுனேய்யாதி ஆனேத்வா ஹுனிதப்³ப³ந்தி ஆஹுனம், தூ³ரதோபி ஆனேத்வா ப²லவிஸேஸம் ஆகங்க²ந்தேன கு³ணவந்தேஸு தா³தப்³பா³னம் அன்னபானவத்த²ச்சா²த³னாதீ³னம் ஏதம் நாமம், உபகாரகே²த்ததாய தம் ஆஹுனம் அரஹந்தீதி ஆஹுனேய்யா. தேன வுத்தம் ‘‘ஆஹுனேய்யாதி, பி⁴க்க²வே, மாதாபிதூனம் ஏதம் அதி⁴வசன’’ந்தி.

இதா³னி தேஸம் ப்³ரஹ்மாதி³பா⁴வே காரணம் த³ஸ்ஸேதும் ‘‘தம் கிஸ்ஸ ஹேது? ப³ஹுகாரா’’திஆதி³ வுத்தம். தம் கிஸ்ஸ ஹேதூதி தம் மாதாபிதூனம் ப்³ரஹ்மாதி³அதி⁴வசனம் கேன காரணேனாதி சேதி அத்தோ². ப³ஹுகாராதி ப³ஹூபகாரா. ஆபாத³காதி ஜீவிதஸ்ஸ ஆபாத³கா, பாலகா. புத்தானஞ்ஹி மாதாபிதூஹி ஜீவிதம் ஆபாதி³தம் பாலிதம் க⁴டிதம் அனுப்பப³ந்தே⁴ன பவத்திதம் ஸம்பாதி³தம். போஸகாதி ஹத்த²பாதே³ வட்³டே⁴த்வா ஹத³யலோஹிதம் பாயேத்வா போஸேதாரோ. இமஸ்ஸ லோகஸ்ஸ த³ஸ்ஸேதாரோதி புத்தானம் இமஸ்மிம் லோகே இட்டா²னிட்டா²ரம்மணத³ஸ்ஸனம் நாம மாதாபிதரோ நிஸ்ஸாய ஜாதந்தி தே நேஸம் இமஸ்ஸ லோகஸ்ஸ த³ஸ்ஸேதாரோ நாம. இதி தேஸம் ப³ஹுகாரத்தம் ப்³ரஹ்மாதி³பா⁴வஸ்ஸ காரணம் த³ஸ்ஸிதம், யேன புத்தோ மாதாபிதூனம் லோகியேன உபகாரேன கேனசி பரியாயேன பரியந்தம் படிகாரம் காதும் ந ஸமத்தோ²யேவ. ஸசே ஹி புத்தோ ‘‘மாதாபிதூனம் உபகாரஸ்ஸ பச்சுபகாரம் கரிஸ்ஸாமீ’’தி உட்டா²ய ஸமுட்டா²ய வாயமந்தோ த³க்கி²ணே அம்ஸகூடே மாதரம், இதரஸ்மிம் பிதரம் ட²பேத்வா வஸ்ஸஸதாயுகோ ஸகலம் வஸ்ஸஸதம்பி பரிஹரேய்ய சதூஹி பச்சயேஹி உச்சா²த³னபரிமத்³த³னன்ஹாபனஸம்பா³ஹனாதீ³ஹி ச யதா²ருசி உபட்ட²ஹந்தோ தேஸம் முத்தகரீஸம்பி அஜிகு³ச்ச²ந்தோ, ந ஏத்தாவதா புத்தேன மாதாபிதூனம் படிகாரோ கதோ ஹோதி அஞ்ஞத்ர ஸத்³தா⁴தி³கு³ணவிஸேஸே பதிட்டா²பனா. வுத்தஞ்ஹேதம் ப⁴க³வதா –

‘‘த்³வின்னாஹம், பி⁴க்க²வே, ந ஸுப்படிகாரம் வதா³மி. கதமேஸம் த்³வின்னம்? மாது ச பிது ச. ஏகேன, பி⁴க்க²வே, அம்ஸேன மாதரம் பரிஹரேய்ய, ஏகேன அம்ஸேன பிதரம் பரிஹரேய்ய வஸ்ஸஸதாயுகோ வஸ்ஸஸதஜீவீ, ஸோ ச நேஸம் உச்சா²த³னபரிமத்³த³னன்ஹாபனஸம்பா³ஹனேன, தே ச தத்தே²வ முத்தகரீஸம் சஜேய்யும், ந த்வேவ, பி⁴க்க²வே, மாதாபிதூனம் கதம் வா ஹோதி படிகதம் வா. இமிஸ்ஸா ச, பி⁴க்க²வே, மஹாபத²வியா பஹூதரத்தரதனாய மாதாபிதரோ இஸ்ஸரியாதி⁴பச்சே ரஜ்ஜே பதிட்டா²பேய்ய, ந த்வேவ, பி⁴க்க²வே, மாதாபிதூனம் கதம் வா ஹோதி படிகதம் வா. தம் கிஸ்ஸ ஹேது? ப³ஹுகாரா, பி⁴க்க²வே, மாதாபிதரோ புத்தானம் ஆபாத³கா போஸகா இமஸ்ஸ லோகஸ்ஸ த³ஸ்ஸேதாரோ.

‘‘யோ ச கோ², பி⁴க்க²வே, மாதாபிதரோ அஸ்ஸத்³தே⁴ ஸத்³தா⁴ஸம்பதா³ய ஸமாத³பேதி நிவேஸேதி பதிட்டா²பேதி. து³ஸ்ஸீலே ஸீலஸம்பதா³ய, மச்ச²ரினோ சாக³ஸம்பதா³ய, து³ப்பஞ்ஞே பஞ்ஞாஸம்பதா³ய ஸமாத³பேதி நிவேஸேதி பதிட்டா²பேதி. ஏத்தாவதா கோ², பி⁴க்க²வே, மாதாபிதூனம் கதஞ்ச ஹோதி படிகதஞ்சா’’தி (அ. நி. 2.34).

ததா² –

‘‘மாதாபிதுஉபட்டா²னம், புத்ததா³ரஸ்ஸ ஸங்க³ஹோ’’தி; (கு². பா. 5.6);

‘‘மாதாபிதுஉபட்டா²னம், பி⁴க்க²வே, பண்டி³தபஞ்ஞத்த’’ந்தி ச –

ஏவமாதீ³னி மாதாபிதூனம் புத்தஸ்ஸ ப³ஹூபகாரபா⁴வஸாத⁴கானி ஸுத்தானி த³ட்ட²ப்³பா³னி.

கா³தா²ஸு வுச்சரேதி வுச்சந்தி கதீ²யந்தி. பஜாய அனுகம்பகாதி பரேஸம் பாணம் சி²ந்தி³த்வாபி அத்தனோ ஸந்தகம் யம்கிஞ்சி சஜித்வாபி அத்தனோ பஜம் படிஜக்³க³ந்தி கோ³பயந்தி, தஸ்மா பஜாய அத்தனோ புத்தானம் அனுகம்பகா அனுக்³கா³ஹகா.

நமஸ்ஸேய்யாதி ஸாயம் பாதம் உபட்டா²னம் க³ந்த்வா ‘‘இத³ம் மய்ஹம் உத்தமம் புஞ்ஞக்கே²த்த’’ந்தி நமக்காரம் கரேய்ய. ஸக்கரேய்யாதி ஸக்காரேன படிமானேய்ய. இதா³னி தம் ஸக்காரம் த³ஸ்ஸேந்தோ ‘‘அன்னேனா’’திஆதி³மாஹ. தத்த² அன்னேனாதி யாகு³ப⁴த்தகா²த³னீயேன. பானேனாதி அட்ட²வித⁴பானேன. வத்தே²னாதி நிவாஸனபாருபனேன. ஸயனேனாதி மஞ்சபீட²பி⁴ஸிபி³ம்போ³ஹனாதி³னா ஸயனேன. உச்சா²த³னேனாதி து³க்³க³ந்த⁴ம் படிவினோதே³த்வா ஸுக³ந்த⁴கரணுச்சா²த³னேன. ந்ஹானேனாதி ஸீதகாலே உண்ஹோத³கேன, உண்ஹகாலே ஸீதோத³கேன க³த்தானி பரிஸிஞ்சித்வா ந்ஹாபனேன. பாதா³னம் தோ⁴வனேன சாதி உண்ஹோத³கஸீதோத³கேஹி பாத³தோ⁴வனேன சேவ தேலமக்க²னேன ச.

தாய நம் பாரிசரியாயாதி ஏத்த² நந்தி நிபாதமத்தம், யதா²வுத்தபரிசரணேன. அத² வா பாரிசரியாயாதி ப⁴ரணகிச்சகரணகுலவம்ஸபதிட்டா²பனாதி³னா பஞ்சவித⁴உபட்டா²னேன. வுத்தஞ்ஹேதம் –

‘‘பஞ்சஹி கோ², க³ஹபதிபுத்த, டா²னேஹி புத்தேன புரத்தி²மா தி³ஸா மாதாபிதரோ பச்சுபட்டா²தப்³பா³ ‘ப⁴தோ நே ப⁴ரிஸ்ஸாமி, கிச்சம் நேஸம் கரிஸ்ஸாமி, குலவம்ஸம் ட²பேஸ்ஸாமி, தா³யஜ்ஜம் படிபஜ்ஜிஸ்ஸாமி. அத² வா பன நேஸம் பேதானம் காலகதானம் த³க்கி²ணமனுப்பத³ஸ்ஸாமீ’தி. இமேஹி கோ², க³ஹபதிபுத்த, பஞ்சஹி டா²னேஹி புத்தேன புரத்தி²மா தி³ஸா மாதாபிதரோ பச்சுபட்டி²தா பஞ்சஹி டா²னேஹி புத்தம் அனுகம்பந்தி – பாபா நிவாரேந்தி, கல்யாணே நிவேஸேந்தி, ஸிப்பம் ஸிக்கா²பேந்தி, பதிரூபேன தா³ரேன ஸம்யோஜேந்தி, ஸமயே தா³யஜ்ஜம் நிய்யாதே³ந்தீ’’தி (தீ³. நி. 3.267).

அபிச யோ மாதாபிதரோ தீஸு வத்தூ²ஸு அபி⁴ப்பஸன்னே கத்வா ஸீலேஸு வா பதிட்டா²பேத்வா பப்³ப³ஜ்ஜாய வா நியோஜேத்வா உபட்ட²ஹதி, அயம் மாதாபிதுஉபட்டா²கானம் அக்³கோ³தி வேதி³தப்³போ³. ஸா பனாயம் பாரிசரியா புத்தஸ்ஸ உப⁴யலோகஹிதஸுகா²வஹாதி த³ஸ்ஸேந்தோ ‘‘இதே⁴வ நம் பஸம்ஸந்தி, பேச்ச ஸக்³கே³ பமோத³தீ’’தி ஆஹ. தத்த² இதா⁴தி இமஸ்மிம் லோகே. மாதாபிதுஉபட்டா²கஞ்ஹி புக்³க³லம் பண்டி³தமனுஸ்ஸா தத்த² பாரிசரியாய பஸம்ஸந்தி வண்ணேந்தி தோ²மேந்தி, தஸ்ஸ ச தி³ட்டா²னுக³திம் ஆபஜ்ஜந்தா ஸயம்பி அத்தனோ மாதாபிதூஸு ததா² படிபஜ்ஜித்வா மஹந்தம் புஞ்ஞம் பஸவந்தி. பேச்சாதி பரலோகம் க³ந்த்வா ஸக்³கே³ டி²தோ மாதாபிதுபட்டா²கோ தி³ப்³ப³ஸம்பத்தீஹி மோத³தி பமோத³தி அபி⁴னந்த³தீதி.

ஸத்தமஸுத்தவண்ணனா நிட்டி²தா.