3. ஆஸவக்க²யஸுத்தவண்ணனா

102. ததியே ஜானதோதி ஜானந்தஸ்ஸ. பஸ்ஸதோதி பஸ்ஸந்தஸ்ஸ. யதி³பி இமானி த்³வேபி பதா³னி ஏகத்தா²னி, ப்³யஞ்ஜனமேவ நானம், ஏவம் ஸந்தேபி ‘‘ஜானதோ’’தி ஞாணலக்க²ணம் உபாதா³ய புக்³க³லம் நித்³தி³ஸதி. ஜானனலக்க²ணஞ்ஹி ஞாணம். ‘‘பஸ்ஸதோ’’தி ஞாணப்பபா⁴வம் உபாதா³ய. த³ஸ்ஸனப்பபா⁴வஞ்ஹி உபாதா³ய ஞாணஸமங்கீ³ புக்³க³லோ சக்கு²மா விய புக்³க³லோ சக்கு²னா ரூபானி, ஞாணேன விவடே த⁴ம்மே பஸ்ஸதி. அத² வா ஜானதோதி அனுபோ³த⁴ஞாணேன ஜானதோ. பஸ்ஸதோதி படிவேத⁴ஞாணேன பஸ்ஸதோ. படிலோமதோ வா த³ஸ்ஸனமக்³கே³ன பஸ்ஸதோ, பா⁴வனாமக்³கே³ன ஜானதோ. கேசி பன ‘‘ஞாததீரணபஹானபரிஞ்ஞாஹி ஜானதோ, ஸிகா²ப்பத்தவிபஸ்ஸனாய பஸ்ஸதோ’’தி வத³ந்தி. அத² வா து³க்க²ம் பரிஞ்ஞாபி⁴ஸமயேன ஜானதோ, நிரோத⁴ம் ஸச்சி²கிரியாபி⁴ஸமயேன பஸ்ஸதோ. தது³ப⁴யே ச ஸதி பஹானபா⁴வனாபி⁴ஸமயா ஸித்³தா⁴ ஏவ ஹோந்தீதி சதுஸச்சாபி⁴ஸமயோ வுத்தோ ஹோதி. யதா³ சேத்த² விபஸ்ஸனாஞாணம் அதி⁴ப்பேதம், ததா³ ‘‘ஜானதோ பஸ்ஸதோ’’தி பதா³னம் ஹேதுஅத்த²தீ³பனதா த³ட்ட²ப்³பா³. யதா³ பன மக்³க³ஞாணம் அதி⁴ப்பேதம், ததா³ மக்³க³கிச்சத்த²தீ³பனதா.

ஆஸவானம் க²யந்தி ‘‘ஜானதோ, அஹம் பி⁴க்க²வே, பஸ்ஸதோ ஆஸவானம் க²யம் வதா³மீ’’தி (ம. நி. 1.15; ஸம். நி. 3.101; 5.1095) ஏவமாக³தே ஸப்³பா³ஸவஸம்வரபரியாயே ‘‘ஆஸவானம் க²யா அனாஸவம் சேதோவிமுத்தி’’ந்திஆதீ³ஸு (ம. நி. 1.438) ச ஸுத்தபதே³ஸு ஆஸவானம் பஹானம் அச்சந்தக்க²யோ அஸமுப்பாதோ³ கீ²ணாகாரோ நத்தி²பா⁴வோ ‘‘ஆஸவக்க²யோ’’தி வுத்தோ. ‘‘ஆஸவானம் க²யா ஸமணோ ஹோதீ’’திஆதீ³ஸு (ம. நி. 1.438) ப²லம்.

‘‘பரவஜ்ஜானுபஸ்ஸிஸ்ஸ, நிச்சம் உஜ்ஜா²னஸஞ்ஞினோ;

ஆஸவா தஸ்ஸ வட்³ட⁴ந்தி, ஆரா ஸோ ஆஸவக்க²யா’’தி. (த⁴. ப. 253); –

ஆதீ³ஸு நிப்³பா³னம்.

‘‘ஸேக²ஸ்ஸ ஸிக்க²மானஸ்ஸ, உஜுமக்³கா³னுஸாரினோ;

க²யஸ்மிம் பட²மம் ஞாணம், ததோ அஞ்ஞா அனந்தரா;

ததோ அஞ்ஞாவிமுத்தஸ்ஸ, ஞாணம் வே ஹோதி தாதி³னோ’’தி. (அ. நி. 3.86; இதிவு. 62) –

ஏவமாக³தே இந்த்³ரியஸுத்தே இத⁴ ச மக்³கோ³ ‘‘ஆஸவக்க²யோ’’தி வுத்தோ. தஸ்மா யதா²வுத்தனயேன ஜானந்தஸ்ஸ பஸ்ஸந்தஸ்ஸ அஹம் அரியமக்³கா³தி⁴க³மம் வதா³மீதி வுத்தம் ஹோதி. நோ அஜானதோ நோ அபஸ்ஸதோதி யோ பன ந ஜானாதி ந பஸ்ஸதி, தஸ்ஸ நோ வதா³மீதி அத்தோ². ஏதேன யே அஜானதோ அபஸ்ஸதோபி ஸம்ஸாரஸுத்³தி⁴ம் வத³ந்தி, தே படிக்கி²பதி. புரிமேன வா பத³த்³வயேன உபாயோ வுத்தோ, இமினா அனுபாயபடிஸேதோ⁴. ஸங்கே²பேன சேத்த² ஞாணம் ஆஸவக்க²யகரம், ஸேஸம் தஸ்ஸ பரிக்கா²ரோதி த³ஸ்ஸேதி.

இதா³னி யம் ஜானதோ யம் பஸ்ஸதோ ஆஸவக்க²யோ ஹோதி, தம் த³ஸ்ஸேதும் ‘‘கிஞ்ச, பி⁴க்க²வே, ஜானதோ’’தி புச்ச²ம் ஆரபி⁴. தத்த² ஜானனா ப³ஹுவிதா⁴. த³ப்³ப³ஜாதிகோ ஏவ ஹி கோசி பி⁴க்கு² ச²த்தம் காதும் ஜானாதி, கோசி சீவராதீ³னம் அஞ்ஞதரம், தஸ்ஸ ஈதி³ஸானி கம்மானி வத்தஸீஸே ட²த்வா கரோந்தஸ்ஸ ஸா ஜானனா ‘‘மக்³க³ப²லானம் பத³ட்டா²னம் ந ஹோதீ’’தி ந வத்தப்³பா³. யோ பன ஸாஸனே பப்³ப³ஜித்வா வேஜ்ஜகம்மாதீ³னி காதும் ஜானாதி, தஸ்ஸேவம் ஜானதோ ஆஸவா வட்³ட⁴ந்தியேவ. தஸ்மா யம் ஜானதோ யம் பஸ்ஸதோ ஆஸவானம் க²யோ ஹோதி, ததே³வ த³ஸ்ஸேந்தோ ஆஹ ‘‘இத³ம் து³க்க²’’ந்திஆதி³. தத்த² யம் வத்தப்³ப³ம் சதுஸச்சகம்மட்டா²னம், தம் ஹேட்டா² யோனிஸோமனஸிகாரஸுத்தே ஸங்கே²பதோ வுத்தமேவ.

தத்த² பன ‘‘யோனிஸோ, பி⁴க்க²வே, பி⁴க்கு² மனஸி கரோந்தோ அகுஸலம் பஜஹதி, குஸலம் பா⁴வேதீ’’தி (இதிவு. 16) ஆக³தத்தா ‘‘இத³ம் து³க்க²ந்தி யோனிஸோ மனஸி கரோதீ’’திஆதி³னா அத்த²விபா⁴வனா கதா. இத⁴ ‘‘இத³ம் து³க்க²ந்தி, பி⁴க்க²வே, ஜானதோ பஸ்ஸதோ ஆஸவானம் க²யோ ஹோதீ’’தி (ம. நி. 1.15; ஸம். நி. 3.101; 5.1095) ஆக³தத்தா ‘‘இத³ம் து³க்க²ந்தி பரிஞ்ஞாபடிவேத⁴வஸேன பரிஞ்ஞாபி⁴ஸமயவஸேன மக்³க³ஞாணேன ஜானதோ பஸ்ஸதோ ஆஸவானம் க²யோ ஹோதீ’’திஆதி³னா நயேன யோஜேதப்³ப³ம். ஆஸவேஸு ச பட²மமக்³கே³ன தி³ட்டா²ஸவோ கீ²யதி, ததியமக்³கே³ன காமாஸவோ, சதுத்த²மக்³கே³ன ப⁴வாஸவோ அவிஜ்ஜாஸவோ ச கீ²யதீதி வேதி³தப்³போ³.

கா³தா²ஸு விமுத்திஞாணந்தி விமுத்தியம் நிப்³பா³னே ப²லே ச பச்சவேக்க²ணஞாணம். உத்தமந்தி உத்தமத⁴ம்மாரம்மணத்தா உத்தமம். க²யே ஞாணந்தி ஆஸவானம் ஸம்யோஜனானஞ்ச க²யே க²யகரே அரியமக்³கே³ ஞாணம். ‘‘கீ²ணா ஸம்யோஜனா இதி ஞாண’’ந்தி இதா⁴பி ஆனேத்வா ஸம்ப³ந்தி⁴தப்³ப³ம். தேன பஹீனகிலேஸபச்சவேக்க²ணம் த³ஸ்ஸேதி. ஏவமேத்த² சத்தாரிபி பச்சவேக்க²ணஞாணானி வுத்தானி ஹோந்தி. அவஸிட்ட²கிலேஸபச்சவேக்க²ணா ஹி இத⁴ நத்தி² அரஹத்தப²லாதி⁴க³மஸ்ஸ அதி⁴ப்பேதத்தா. யதா² சேத்த² ஜானதோ பஸ்ஸதோதி நிப்³பா³னாதி⁴க³மேன ஸம்மாதி³ட்டி²கிச்சம் அதி⁴கம் கத்வா வுத்தம், ஏவம் ஸம்மப்பதா⁴னகிச்சம்பி அதி⁴கமேவ இச்சி²தப்³ப³ந்தி த³ஸ்ஸேந்தோ ‘‘ந த்வேவித³ம் குஸீதேனா’’தி ஓஸானகா³த²மாஹ.

தத்த² ந த்வேவித³ந்தி ந து ஏவ இத³ம். துஸத்³தோ³ நிபாதமத்தம். பா³லேனமவிஜானதாதி மகாரோ பத³ஸந்தி⁴கரோ. அயஞ்ஹேத்த² ஸங்கே²பத்தோ² – இத³ம் ஸேக்க²மக்³கே³ன அஸேக்க²மக்³கே³ன ச பத்தப்³ப³ம் அபி⁴ஜ்ஜா²காயக³ந்தா²தி³ஸப்³ப³க³ந்தா²னம் பமோசனம் பமோசனஸ்ஸ நிமித்தபூ⁴தம் நிப்³பா³னம் ‘‘இத³ம் து³க்க²’’ந்திஆதி³னா சத்தாரி ஸச்சானி யதா²பூ⁴தம் அவிஜானதா ததோ ஏவ பா³லேன அவித்³த³ஸுனா யதா² அதி⁴க³ந்தும் ந ஸக்கா, ஏவம் குஸீதேன நிப்³பீ³ரியேனாபி, தஸ்மா தத³தி⁴க³மாய ஆரத்³த⁴வீரியேன ப⁴விதப்³ப³ந்தி. தேனாஹ ப⁴க³வா ‘‘ஆரத்³த⁴வீரியஸ்ஸாயம் த⁴ம்மோ, நோ குஸீதஸ்ஸ’’ (தீ³. நி. 3.358).

‘‘ஆரம்ப⁴த² நிக்கமத², யுஞ்ஜத² பு³த்³த⁴ஸாஸனே;

து⁴னாத² மச்சுனோ ஸேனம், நளாகா³ரம்வ குஞ்ஜரோ’’தி. (ஸம். நி. 1.185; நேத்தி. 29; மி. ப. 5.1.4);

ததியஸுத்தவண்ணனா நிட்டி²தா.