4. ஸமணப்³ராஹ்மணஸுத்தவண்ணனா

103. சதுத்தே² யே ஹி கேசீதி யே கேசி. இத³ம் து³க்க²ந்தி யதா²பூ⁴தம் நப்பஜானந்தீதி ‘‘இத³ம் து³க்க²ம், ஏத்தகம் து³க்க²ம், ந இதோ பி⁴ய்யோ’’தி அவிபரீதம் ஸபா⁴வஸரஸலக்க²ணதோ விபஸ்ஸனாபஞ்ஞாஸஹிதாய மக்³க³பஞ்ஞாய து³க்க²ஸச்சம் ந ஜானந்தி ந படிவிஜ்ஜ²ந்தி. ஸேஸேஸுபி ஏஸேவ நயோ. ந மே தே, பி⁴க்க²வேதிஆதீ³ஸு அயம் ஸங்கே²பத்தோ² – பி⁴க்க²வே, சதுஸச்சகம்மட்டா²னம் அனனுயுத்தா பப்³ப³ஜ்ஜாமத்தஸமணா சேவ ஜாதிமத்தப்³ராஹ்மணா ச ந மயா தே ஸமிதபாபஸமணேஸு ஸமணோதி, பா³ஹிதபாபப்³ராஹ்மணேஸு ப்³ராஹ்மணோதி ச ஸம்மதா அனுஞ்ஞாதா. கஸ்மா? ஸமணகரணானம் ப்³ராஹ்மணகரணானஞ்ச த⁴ம்மானம் அபா⁴வதோதி. தேனேவாஹ ‘‘ந ச பன தே ஆயஸ்மந்தோ’’திஆதி³. தத்த² ஸாமஞ்ஞத்த²ந்தி ஸாமஞ்ஞஸங்கா²தம் அத்த²ம், சத்தாரி ஸாமஞ்ஞப²லானீதி அத்தோ². ப்³ரஹ்மஞ்ஞத்த²ந்தி தஸ்ஸேவ வேவசனம். அபரே பன ‘‘ஸாமஞ்ஞத்த²ந்தி சத்தாரோ அரியமக்³கா³, ப்³ரஹ்மஞ்ஞத்த²ந்தி சத்தாரி அரியப²லானீ’’தி வத³ந்தி. ஸேஸம் வுத்தனயமேவ. ஸுக்கபக்கோ² வுத்தவிபரியாயேன வேதி³தப்³போ³. கா³தா²ஸு அபுப்³ப³ம் நத்தி².

சதுத்த²ஸுத்தவண்ணனா நிட்டி²தா.