8. அந்த⁴கரணஸுத்தவண்ணனா

87. அட்ட²மே அகுஸலவிதக்காதி அகோஸல்லஸம்பூ⁴தா விதக்கா. அந்த⁴கரணாதிஆதீ³ஸு யஸ்ஸ ஸயம் உப்பஜ்ஜந்தி, தம் யதா²பூ⁴தத³ஸ்ஸனனிவாரணேன அந்த⁴ம் கரோந்தீதி அந்த⁴கரணா. ந பஞ்ஞாசக்கு²ம் கரோந்தீதி அசக்கு²கரணா. அஞ்ஞாணம் கரோந்தீதி அஞ்ஞாணகரணா. பஞ்ஞானிரோதி⁴காதி கம்மஸ்ஸகதாபஞ்ஞா, ஜா²னபஞ்ஞா, விபஸ்ஸனாபஞ்ஞாதி இமா திஸ்ஸோ பஞ்ஞா அப்பவத்திகரணேன நிரோதே⁴ந்தீதி பஞ்ஞானிரோதி⁴கா. அனிட்ட²ப²லதா³யகத்தா து³க்க²ஸங்கா²தஸ்ஸ விகா⁴தஸ்ஸ பக்கே² வத்தந்தீதி விகா⁴தபக்கி²கா. கிலேஸனிப்³பா³னம் ந ஸம்வத்தயந்தீதி அனிப்³பா³னஸம்வத்தனிகா.

காமவிதக்கோதி காமபடிஸம்யுத்தோ விதக்கோ. ஸோ ஹி கிலேஸகாமஸஹிதோ ஹுத்வா வத்து²காமேஸு பவத்ததி. ப்³யாபாத³படிஸம்யுத்தோ விதக்கோ ப்³யாபாத³விதக்கோ. விஹிம்ஸாபடிஸம்யுத்தோ விதக்கோ விஹிம்ஸாவிதக்கோ. இமே த்³வே ச ஸத்தேஸுபி ஸங்கா²ரேஸுபி உப்பஜ்ஜந்தி. காமவிதக்கோ ஹி பியமனாபே ஸத்தே வா ஸங்கா²ரே வா விதக்கேந்தஸ்ஸ உப்பஜ்ஜதி, ப்³யாபாத³விதக்கோ அப்பியே அமனாபே ஸத்தே வா ஸங்கா²ரே வா குஜ்ஜி²த்வா ஓலோகனகாலதோ பட்டா²ய யாவ நாஸனா உப்பஜ்ஜதி, விஹிம்ஸாவிதக்கோ ஸங்கா²ரேஸு ந உப்பஜ்ஜதி, ஸங்கா²ரா து³க்கா²பேதப்³பா³ நாம நத்தி², ‘‘இமே ஸத்தா ஹஞ்ஞந்து வா ப³ஜ்ஜ²ந்து வா உச்சி²ஜ்ஜந்து வா வினஸ்ஸந்து வா மா வா அஹேஸு’’ந்தி சிந்தனகாலே பன ஸத்தேஸு உப்பஜ்ஜதி.

இமேயேவ பன காமஸங்கப்பாத³யோ. அத்த²தோ ஹி காமவிதக்காதீ³னம் காமஸங்கப்பாதீ³னஞ்ச நானாகரணம் நத்தி², தம்ஸம்பயுத்தா பன ஸஞ்ஞாத³யோ காமஸஞ்ஞாத³யோ. காமதா⁴துஆதீ³னம் பன யஸ்மா பாளியம் –

‘‘காமபடிஸம்யுத்தோ தக்கோ விதக்கோ…பே… மிச்சா²ஸங்கப்போ, அயம் வுச்சதி காமதா⁴து, ஸப்³பே³பி அகுஸலா த⁴ம்மா காமதா⁴து. ப்³யாபாத³படிஸம்யுத்தோ தக்கோ விதக்கோ…பே… மிச்சா²ஸங்கப்போ, அயம் வுச்சதி ப்³யாபாத³தா⁴து. த³ஸஸு ஆகா⁴தவத்தூ²ஸு சித்தஸ்ஸ ஆகா⁴தோ படிகா⁴தோ…பே… அனத்தமனதா சித்தஸ்ஸ, அயம் வுச்சதி ப்³யாபாத³தா⁴து. விஹிம்ஸாபடிஸம்யுத்தோ தக்கோ விதக்கோ மிச்சா²ஸங்கப்போ, அயம் வுச்சதி விஹிம்ஸாதா⁴து. இதே⁴கச்சோ பாணினா வா லேட்³டு³னா வா த³ண்டே³ன வா ஸத்தே²ன வா ரஜ்ஜுயா வா அஞ்ஞதரஞ்ஞதரேன ஸத்தே விஹேடே²தி, அயம் விஹிம்ஸாதா⁴தூ’’தி (விப⁴. 182, 910) –

ஆக³தத்தா விஸேஸோ லப்³ப⁴தி.

தத்த² த்³வே கதா² ஸப்³ப³ஸங்கா³ஹிகா ச அஸம்பி⁴ன்னா ச. தத்த² காமதா⁴துயா க³ஹிதாய இதரா த்³வேபி க³ஹிதா நாம ஹோந்தி. ததோ பன நீஹரித்வா அயம் ப்³யாபாத³தா⁴து, அயம் விஹிம்ஸாதா⁴தூதி த³ஸ்ஸேதீதி அயம் ஸப்³ப³ஸங்கா³ஹிகா நாம. காமதா⁴தும் கதே²ந்தோ பன ப⁴க³வா ப்³யாபாத³தா⁴தும் ப்³யாபாத³தா⁴துட்டா²னே, விஹிம்ஸாதா⁴தும் விஹிம்ஸாதா⁴துட்டா²னே ட²பேத்வாவ அவஸேஸம் காமதா⁴து நாமாதி கதே²ஸீதி அயம் அஸம்பி⁴ன்னகதா² நாம.

ஸுக்கபக்கே² வுத்தவிபரியாயேன அத்தோ² வேதி³தப்³போ³. நேக்க²ம்மபடிஸம்யுத்தோ விதக்கோ நேக்க²ம்மவிதக்கோ. ஸோ அஸுப⁴புப்³ப³பா⁴கே³ காமாவசரோ ஹோதி, அஸுப⁴ஜ்ஜா²னே ரூபாவசரோ, தம் ஜா²னம் பாத³கம் கத்வா உப்பன்னமக்³க³ப²லகாலே லோகுத்தரோ. அப்³யாபாத³படிஸம்யுத்தோ விதக்கோ அப்³யாபாத³விதக்கோ. ஸோ மேத்தாபுப்³ப³பா⁴கே³ காமாவசரோ ஹோதி, மேத்தாஜா²னே ரூபாவசரோ, தம் ஜா²னம் பாத³கம் கத்வா உப்பன்னமக்³க³ப²லகாலே லோகுத்தரோ. அவிஹிம்ஸாபடிஸம்யுத்தோ விதக்கோ அவிஹிம்ஸாவிதக்கோ. ஸோ கருணாபுப்³ப³பா⁴கே³ காமாவசரோ, கருணாஜ்ஜா²னே ரூபாவசரோ, தம் ஜா²னம் பாத³கம் கத்வா உப்பன்னமக்³க³ப²லகாலே லோகுத்தரோ. யதா³ பன அலோபோ⁴ ஸீஸம் ஹோதி, ததா³ இதரே த்³வே தத³ன்வாயிகா ஹோந்தி. யதா³ மேத்தா ஸீஸம் ஹோதி, ததா³ இதரே த்³வே தத³ன்வாயிகா ஹோந்தி. யதா³ கருணா ஸீஸம் ஹோதி, ததா³ இதரே த்³வே தத³ன்வாயிகா ஹோந்தி.

இமேயேவ பன நேக்க²ம்மஸங்கப்பாத³யோ. அத்த²தோ ஹி நேக்க²ம்மவிதக்காதீ³னம் நேக்க²ம்மஸங்கப்பாதீ³னஞ்ச நானாகரணம் நத்தி², தம்ஸம்பயுத்தா பன ஸஞ்ஞாத³யோ நேக்க²ம்மஸஞ்ஞாத³யோ. நேக்க²ம்மதா⁴துஆதீ³னம் பன யஸ்மா பாளியம் –

‘‘நேக்க²ம்மபடிஸம்யுத்தோ தக்கோ விதக்கோ ஸங்கப்போ, அயம் வுச்சதி நேக்க²ம்மதா⁴து, ஸப்³பே³பி குஸலா த⁴ம்மா நேக்க²ம்மதா⁴து. அப்³யாபாத³படிஸம்யுத்தோ தக்கோ விதக்கோ ஸங்கப்போ, அயம் வுச்சதி அப்³யாபாத³தா⁴து. யா ஸத்தேஸு மேத்தி மேத்தாயனா மேத்தாசேதோவிமுத்தி, அயம் வுச்சதி அப்³யாபாத³தா⁴து. அவிஹிம்ஸாபடிஸம்யுத்தோ தக்கோ விதக்கோ ஸங்கப்போ – அயம் வுச்சதி அவிஹிம்ஸாதா⁴து. யா ஸத்தேஸு கருணா கருணாயனா கருணாசேதோவிமுத்தி – அயம் வுச்சதி அவிஹிம்ஸாதா⁴தூ’’தி. (விப⁴. 182) –

ஆக³தத்தா விஸேஸோ லப்³ப⁴தி. இதா⁴பி ஸப்³ப³ஸங்கா³ஹிகா, அஸம்பி⁴ன்னாதி த்³வே கதா² வுத்தனயேனேவ வேதி³தப்³பா³. ஸேஸம் ஸுவிஞ்ஞேய்யமேவ.

கா³தா²ஸு விதக்கயேதி விதக்கேய்ய. நிராகரேதி அத்தனோ ஸந்தானதோ நீஹரேய்ய வினோதே³ய்ய, பஜஹேய்யாதி அத்தோ². ஸவே விதக்கானி விசாரிதானி, ஸமேதி வுட்டீ²வ ரஜம் ஸமூஹதந்தி யதா² நாம கி³ம்ஹானம் பச்சி²மே மாஸே பத²வியம் ஸமூஹதம் ஸமந்ததோ உட்டி²தம் ரஜம் மஹதோ அகாலமேக⁴ஸ்ஸ வஸ்ஸதோ வுட்டி² டா²னஸோ வூபஸமேதி, ஏவமேவ ஸோ யோகா³வசரோ விதக்கானி மிச்சா²விதக்கே ச விசாரிதானி தம்ஸம்பயுத்தவிசாரே ச ஸமேதி வூபஸமேதி ஸமுச்சி²ந்த³தி. ததா²பூ⁴தோ ச விதக்கூபஸமேன சேதஸா ஸப்³பே³ஸம் மிச்சா²விதக்கானம் உபஸமனதோ விதக்கூபஸமேன அரியமக்³க³சித்தேன. இதே⁴வ தி³ட்டே²வ த⁴ம்மே, ஸந்திபத³ம் நிப்³பா³னம், ஸமஜ்ஜ²கா³ ஸமதி⁴க³தோ ஹோதீதி.

அட்ட²மஸுத்தவண்ணனா நிட்டி²தா.