2. ஸக்காரஸுத்தவண்ணனா

81. து³தியே ஸக்காரேனாதி ஸக்காரேன ஹேதுபூ⁴தேன, அத² வா ஸக்காரேனாதி ஸக்காரஹேதுனா, ஸக்காரஹேதுகேன வா. ஸக்காரஞ்ஹி நிஸ்ஸாய இதே⁴கச்சே புக்³க³லா பாபிச்சா² இச்சா²பகதா இச்சா²சாரே ட²த்வா ‘‘ஸக்காரம் நிப்³ப³த்தேஸ்ஸாமா’’தி அனேகவிஹிதம் அனேஸனம் அப்பதிரூபம் ஆபஜ்ஜித்வா இதோ சுதா அபாயேஸு நிப்³ப³த்தந்தி, அபரே யதா²ஸக்காரம் லபி⁴த்வா தன்னிமித்தம் மானமத³மச்ச²ரியாதி³வஸேன பமாத³ம் ஆபஜ்ஜித்வா இதோ சுதா அபாயேஸு நிப்³ப³த்தந்தி. யம் ஸந்தா⁴ய வுத்தம் – ‘‘ஸக்காரேன அபி⁴பூ⁴தா பரியாதி³ன்னசித்தா’’தி. தத்த² அபி⁴பூ⁴தாதி அஜ்ஜோ²த்த²டா. பரியாதி³ன்னசித்தாதி கே²பிதசித்தா, இச்சா²சாரேன மானமதா³தி³னா ச க²யம் பாபிதகுஸலசித்தா. அத² வா பரியாதி³ன்னசித்தாதி பரிதோ ஆதி³ன்னசித்தா, வுத்தப்பகாரேன அகுஸலகோட்டா²ஸேன யதா² குஸலசித்தஸ்ஸ உப்பத்திவாரோ ந ஹோதி, ஏவம் ஸமந்ததோ க³ஹிதசித்தஸந்தானாதி அத்தோ². அஸக்காரேனாதி ஹீளேத்வா பரிப⁴வித்வா பரேஹி அத்தனி பவத்திதேன அஸக்காரேன ஹேதுனா, அஸக்காரஹேதுகேன வா மானாதி³னா. ஸக்காரேன ச அஸக்காரேன சாதி கேஹிசி பவத்திதேன ஸக்காரேன கேஹிசி பவத்திதேன அஸக்காரேன ச. யே ஹி கேஹிசி பட²மம் ஸக்கதா ஹுத்வா தேஹியேவ அஸாரபா⁴வம் ஞத்வா பச்சா² அஸக்கதா ஹோந்தி, தாதி³ஸே ஸந்தா⁴ய வுத்தம் ‘‘ஸக்காரேன ச அஸக்காரேன சா’’தி.

ஏத்த² ஸக்காரேன அபி⁴பூ⁴தா தே³வத³த்தாத³யோ நித³ஸ்ஸேதப்³பா³. வுத்தம்பி சேதம் –

‘‘ப²லம் வே கத³லிம் ஹந்தி, ப²லம் வேளும் ப²லம் நளம்;

ஸக்காரோ காபுரிஸம் ஹந்தி, க³ப்³போ⁴ அஸ்ஸதரிம் யதா²’’தி. (ஸம். நி. 1.183; அ. நி. 4.68; சூளவ. 335);

ஸாதூ⁴னம் உபரி கதேன அஸக்காரேன அபி⁴பூ⁴தா த³ண்ட³கீராஜகாலிங்க³ராஜமஜ்ஜ²ராஜாத³யோ நித³ஸ்ஸேதப்³பா³. வுத்தம்பி சேதம் –

‘‘கிஸஞ்ஹி வச்ச²ம் அவகிரிய த³ண்ட³கீ,

உச்சி²ன்னமூலோ ஸஜனோ ஸரட்டோ²;

குக்குளனாமே நிரயம்ஹி பச்சதி,

தஸ்ஸ பு²லிங்கா³னி பதந்தி காயே.

‘‘யோ ஸஞ்ஞதே பப்³ப³ஜிதே அவஞ்சயி,

த⁴ம்மம் ப⁴ணந்தே ஸமணே அதூ³ஸகே;

தம் நாளிகேரம் ஸுனகா² பரத்த²,

ஸங்க³ம்ம கா²த³ந்தி விப²ந்த³மானம்’’. (ஜா. 2.17.70-71);

‘‘உபஹச்ச மனம் மஜ்ஜோ², மாதங்க³ஸ்மிம் யஸஸ்ஸினே;

ஸபாரிஸஜ்ஜோ உச்சி²ன்னோ, மஜ்ஜா²ரஞ்ஞம் ததா³ அஹூ’’தி. (ஜா. 2.19.96);

ஸக்காரேன ச அஸக்காரேன ச அபி⁴பூ⁴தா அஞ்ஞதித்தி²யா நாடபுத்தாத³யோ நித³ஸ்ஸேதப்³பா³.

கா³தா²ஸு உப⁴யந்தி உப⁴யேன ஸக்காரேன ச அஸக்காரேன ச. ஸமாதி⁴ ந விகம்பதீதி ந சலதி, ஏகக்³க³பா⁴வேன திட்ட²தி. கஸ்ஸ பன ந சலதீதி ஆஹ ‘‘அப்பமாத³விஹாரினோ’’தி. யோ பமாத³கரத⁴ம்மானம் ராகா³தீ³னம் ஸுட்டு² பஹீனத்தா அப்பமாத³விஹாரீ அரஹா, தஸ்ஸ. ஸோ ஹி லோகத⁴ம்மேஹி ந விகம்பதி. ஸுகு²மதி³ட்டி²விபஸ்ஸகந்தி ப²லஸமாபத்திஅத்த²ம் ஸுகு²மாய தி³ட்டி²யா பஞ்ஞாய அபி⁴ண்ஹம் பவத்தவிபஸ்ஸனத்தா ஸுகு²மதி³ட்டி²விபஸ்ஸகம். உபாதா³னக்க²யாராமந்தி சதுன்னம் உபாதா³னானம் க²யம் பரியோஸானபூ⁴தம் அரஹத்தப²லம் ஆரமிதப்³ப³ம் ஏதஸ்ஸாதி உபாதா³னக்க²யாராமம். ஸேஸம் வுத்தனயமேவ.

து³தியஸுத்தவண்ணனா நிட்டி²தா.