5. பட²மஏஸனாஸுத்தவண்ணனா

54. பஞ்சமே ஏஸனாதி க³வேஸனா பரியேஸனா மக்³க³னா. தா விபா⁴க³தோ த³ஸ்ஸேதும் ‘‘காமேஸனா’’திஆதி³ வுத்தம். தத்த² காமேஸனாதி காமானம் ஏஸனா, காமஸங்கா²தா வா ஏஸனா காமேஸனா. வுத்தஞ்ஹேதம் –

‘‘தத்த² கதமா காமேஸனா? யோ காமேஸு காமச்ச²ந்தோ³, காமராகோ³, காமனந்தீ³, காமஸ்னேஹோ, காமபிபாஸா, காமமுச்சா², காமஜ்ஜோ²ஸானம், அயம் வுச்சதி காமேஸனா’’தி (விப⁴. 919).

தஸ்மா காமராகோ³ காமேஸனாதி வேதி³தப்³போ³. ப⁴வேஸனாயபி ஏஸேவ நயோ. வுத்தம்பி சேதம் –

‘‘தத்த² கதமா ப⁴வேஸனா? யோ ப⁴வேஸு ப⁴வச்ச²ந்தோ³…பே… ப⁴வஜ்ஜோ²ஸானம், அயம் வுச்சதி ப⁴வேஸனா’’தி (விப⁴. 919).

தஸ்மா ப⁴வேஸனராகோ³ ரூபாரூபப⁴வபத்த²னா ப⁴வேஸனாதி வேதி³தப்³பா³. ப்³ரஹ்மசரியஸ்ஸ ஏஸனா ப்³ரஹ்மசரியேஸனா. யதா²ஹ –

‘‘தத்த² கதமா ப்³ரஹ்மசரியேஸனா? ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தம் ஜீவம் தம் ஸரீரந்தி வா, அஞ்ஞம் ஜீவம் அஞ்ஞம் ஸரீரந்தி வா, ஹோதி ததா²க³தோ பரம் மரணாதி வா, ந ஹோதி ததா²க³தோ பரம் மரணாதி வா, ஹோதி ச ந ச ஹோதி ததா²க³தோ பரம் மரணாதி வா, நேவ ஹோதி ந ந ஹோதி ததா²க³தோ பரம் மரணாதி வா, யா ஏவரூபா தி³ட்டி² தி³ட்டி²க³தம் தி³ட்டி²க³ஹனம் தி³ட்டி²கந்தாரோ தி³ட்டி²விஸூகாயிகம் தி³ட்டி²விப்ப²ந்தி³தம் தி³ட்டி²ஸஞ்ஞோஜனம் கா³ஹோ பதிட்டா²ஹோ அபி⁴னிவேஸோ பராமாஸோ கும்மக்³கோ³ மிச்சா²பதோ² மிச்ச²த்தம் தித்தா²யதனம் விபரியேஸக்³கா³ஹோ, அயம் வுச்சதி ப்³ரஹ்மசரியேஸனா’’தி (விப⁴. 919).

தஸ்மா தி³ட்டி²க³தஸம்மதஸ்ஸ ப்³ரஹ்மசரியஸ்ஸ ஏஸனா தி³ட்டி²ப்³ரஹ்மசரியேஸனாதி வேதி³தப்³பா³தி. ஏத்தாவதா ராக³தி³ட்டி²யோ ஏஸனாதி த³ஸ்ஸிதா ஹோந்தி. ந கேவலஞ்ச ராக³தி³ட்டி²யோவ ஏஸனா, ததே³கட்ட²ம் கம்மம்பி. வுத்தம்பி சேதம் –

‘‘தத்த² கதமா காமேஸனா? காமராகோ³ ததே³கட்ட²ம் அகுஸலம் காயகம்மம் வசீகம்மம் மனோகம்மம், அயம் வுச்சதி காமேஸனா. தத்த² கதமா ப⁴வேஸனா? ப⁴வராகோ³ ததே³கட்ட²ம் அகுஸலம் காயகம்மம் வசீகம்மம் மனோகம்மம், அயம் வுச்சதி ப⁴வேஸனா. தத்த² கதமா ப்³ரஹ்மசரியேஸனா? அந்தக்³கா³ஹிகா தி³ட்டி² ததே³கட்ட²ம் அகுஸலம் காயகம்மம், வசீகம்மம், மனோகம்மம், அயம் வுச்சதி ப்³ரஹ்மசரியேஸனா’’தி (விப⁴. 919) –

ஏவமேதா திஸ்ஸோ ஏஸனா வேதி³தப்³பா³.

கா³தா²ஸு ஸம்ப⁴வந்தி ஏத்த² ஏஸனானம் உப்பத்திஹேதுபூ⁴தா அவிஜ்ஜாத³யோ தண்ஹா சாதி ஸம்ப⁴வோ, ஸமுத³யோதி அத்தோ². யத்த² சேதா நிருஜ்ஜ²ந்தீதி ப்³ரஹ்மசரியேஸனா பட²மமக்³கே³ன நிருஜ்ஜ²தி, காமேஸனா அனாகா³மிமக்³கே³ன, ப⁴வேஸனா அரஹத்தமக்³கே³ன நிருஜ்ஜ²தீதி வேதி³தப்³ப³ம். ஸேஸம் வுத்தனயமேவ.

பஞ்சமஸுத்தவண்ணனா நிட்டி²தா.