5. முஸாவாத³ஸுத்தவண்ணனா

25. பஞ்சமே ஏகத⁴ம்மம் அதீதஸ்ஸாதி கா உப்பத்தி? ப⁴க³வதோ பி⁴க்கு²ஸங்க⁴ஸ்ஸ ச மஹாலாப⁴ஸக்காரோ உப்பஜ்ஜி, தித்தி²யானம் பரிஹாயி. தே ஹதலாப⁴ஸக்காரா நிப்பபா⁴ நித்தேஜா இஸ்ஸாபகதா சிஞ்சமாணவிகம் நாம பரிப்³பா³ஜிகம் உய்யோஜேஸும் – ‘‘ஏஹி, த்வம் ப⁴கி³னி, ஸமணம் கோ³தமம் அபூ⁴தேன அப்³பா⁴சிக்க²ஸ்ஸூ’’தி. ஸா ப⁴க³வந்தம் சதுபரிஸமஜ்ஜே² த⁴ம்மம் தே³ஸேந்தம் உபக³ந்த்வா அபூ⁴தேன அப்³பா⁴சிக்கி²த்வா ஸக்கேனஸ்ஸா அபூ⁴தபா⁴வே பகாஸிதே மஹாஜனேன ‘‘தீ⁴ காளகண்ணீ’’தி விஹாரதோ நிக்கட்³டா⁴பிதா பத²வியா விவரே தி³ன்னே அவீசிஜாலானம் இந்த⁴னம் ஹுத்வாவ அவீசினிரயே நிப்³ப³த்தி, பி⁴ய்யோஸோமத்தாய தித்தி²யானம் லாப⁴ஸக்காரோ பரிஹாயி. பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் ‘‘ஆவுஸோ, சிஞ்சமாணவிகா ஏவம் உளாரகு³ணம் அக்³க³த³க்கி²ணேய்யம் ஸம்மாஸம்பு³த்³த⁴ம் அபூ⁴தேன அக்கோஸித்வா மஹாவினாஸம் பத்தா’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவ, புப்³பே³பி ஸா மம் அபூ⁴தேன அக்கோஸித்வா மஹாவினாஸம் பத்தாயேவா’’தி மஹாபது³மஜாதகம்பி வித்தா²ரேத்வா உபரி த⁴ம்மம் தே³ஸேந்தோ இமிஸ்ஸா அட்டு²ப்பத்தியா ‘‘ஏகத⁴ம்மம் அதீதஸ்ஸா’’தி இத³ம் ஸுத்தம் தே³ஸேஸி.

தத்த² ஏகத⁴ம்மந்தி ஏகம் வசீஸச்சஸங்கா²தம் த⁴ம்மம். அதீதஸ்ஸாதி யா ஸா அட்ட² அனரியவோஹாரே வஜ்ஜேத்வா அட்ட²ஸு அரியவோஹாரேஸு பதிட்டா²பனத்த²ம் ‘‘ஸச்சம், ப⁴ணே, நாலிக’’ந்தி அரியேஹி ட²பிதா மரியாதா³, தம் அதிக்கமித்வா டி²தஸ்ஸ. புரிஸோ ஏவ புக்³க³லோதி புரிஸபுக்³க³லோ, தஸ்ஸ. அகரணீயந்தி காதும் அஸக்குணேய்யம். ஸம்பஜானமுஸாவாதீ³ ஹி புக்³க³லோ கிஞ்சி பாபகம்மம் கத்வா ‘‘இத³ம் நாம தயா கத’’ந்தி வுத்தே ‘‘ந மயா கத’’ந்தி முஸாவாதே³னேவ பரிஹரிஸ்ஸதி. ஏவஞ்ச படிபஜ்ஜந்தோ கிஞ்சி பாபகம்மம் கரோதியேவ, ந தத்த² லஜ்ஜதி ஸச்சமரியாதா³ய ஸமதிக்கந்தத்தா. தேன வுத்தம் ‘‘கதமம் ஏகத⁴ம்மம், யதி³த³ம், பி⁴க்க²வே, ஸம்பஜானமுஸாவாதோ³’’தி.

கா³தா²யம் முஸாவாதி³ஸ்ஸாதி முஸா அபூ⁴தம் அதச்ச²ம் பரேஸம் விஞ்ஞாபனவஸேன வத³னஸீலஸ்ஸ. யஸ்ஸ த³ஸஸு வசனேஸு ஏகம்பி ஸச்சம் நத்தி², ஏவரூபே வத்தப்³ப³மேவ நத்தி². ஜந்துனோதி ஸத்தஸ்ஸ. ஸத்தோ ஹி ஜாயனட்டே²ன ‘‘ஜந்தூ’’தி வுச்சதி. விதிண்ணபரலோகஸ்ஸாதி விஸ்ஸட்ட²பரலோகஸ்ஸ. ஈதி³ஸோ ஹி மனுஸ்ஸஸம்பத்தி தே³வலோகஸம்பத்தி அவஸானே நிப்³பா³னஸம்பத்தீதி இமா திஸ்ஸோபி ஸம்பத்தியோ ந பஸ்ஸதி. நத்தி² பாபந்தி தஸ்ஸ தாதி³ஸஸ்ஸ இத³ம் நாம பாபம் ந கத்தப்³ப³ந்தி நத்தீ²தி.

பஞ்சமஸுத்தவண்ணனா நிட்டி²தா.