1. லோப⁴ஸுத்தவண்ணனா

1. இதா³னி ஏகத⁴ம்மம், பி⁴க்க²வே, பஜஹதா²திஆதி³னா நயேன ப⁴க³வதா நிக்கி²த்தஸ்ஸ ஸுத்தஸ்ஸ வண்ணனாய ஓகாஸோ அனுப்பத்தோ. ஸா பனேஸா அத்த²வண்ணனா யஸ்மா ஸுத்தனிக்கே²பம் விசாரேத்வா வுச்சமானா பாகடா ஹோதி, தஸ்மா ஸுத்தனிக்கே²பம் தாவ விசாரேஸ்ஸாம. சத்தாரோ ஹி ஸுத்தனிக்கே²பா – அத்தஜ்ஜா²ஸயோ, பரஜ்ஜா²ஸயோ, புச்சா²வஸிகோ, அட்டு²ப்பத்திகோதி. யதா² ஹி அனேகஸதஅனேகஸஹஸ்ஸபே⁴தா³னிபி ஸுத்தந்தானி ஸம்கிலேஸபா⁴கி³யாதி³பட்டா²னனயேன ஸோளஸவித⁴தம் நாதிவத்தந்தி, ஏவம் அத்தஜ்ஜா²ஸயாதி³ஸுத்தனிக்கே²பவஸேன சதுப்³பி³த⁴தம் நாதிவத்தந்தீதி. தத்த² யதா² அத்தஜ்ஜா²ஸயஸ்ஸ அட்டு²ப்பத்தியா ச பரஜ்ஜா²ஸயபுச்சா²வஸிகேஹி ஸத்³தி⁴ம் ஸம்ஸக்³க³பே⁴தோ³ ஸம்ப⁴வதி அத்தஜ்ஜா²ஸயோ ச பரஜ்ஜா²ஸயோ ச, அத்தஜ்ஜா²ஸயோ ச புச்சா²வஸிகோ ச, அட்டு²ப்பத்திகோ ச பரஜ்ஜா²ஸயோ ச, அட்டு²ப்பத்திகோ ச புச்சா²வஸிகோ சாதி அஜ்ஜா²ஸயபுச்சா²னுஸந்தி⁴ஸம்ப⁴வதோ; ஏவம் யதி³பி அட்டு²ப்பத்தியா அத்தஜ்ஜா²ஸயேனபி ஸம்ஸக்³க³பே⁴தோ³ ஸம்ப⁴வதி, அத்தஜ்ஜா²ஸயாதீ³ஹி பன புரதோ டி²தேஹி அட்டு²ப்பத்தியா ஸம்ஸக்³கோ³ நத்தீ²தி நிரவஸேஸோ பட்டா²னனயோ ந ஸம்ப⁴வதி. தத³ந்தோக³த⁴த்தா வா ஸம்ப⁴வந்தானம் ஸேஸனிக்கே²பானம் மூலனிக்கே²பவஸேன சத்தாரோ ஸுத்தனிக்கே²பா வுத்தாதி வேதி³தப்³ப³ம்.

தத்ராயம் வசனத்தோ² – நிக்கி²பீயதீதி நிக்கே²போ, ஸுத்தம் ஏவ நிக்கே²போ ஸுத்தனிக்கே²போ. அத² வா நிக்கி²பனம் நிக்கே²போ, ஸுத்தஸ்ஸ நிக்கே²போ ஸுத்தனிக்கே²போ, ஸுத்ததே³ஸனாதி அத்தோ². அத்தனோ அஜ்ஜா²ஸயோ அத்தஜ்ஜா²ஸயோ, ஸோ அஸ்ஸ அத்தி² காரணபூ⁴தோதி அத்தஜ்ஜா²ஸயோ, அத்தனோ அஜ்ஜா²ஸயோ ஏதஸ்ஸாதி வா அத்தஜ்ஜா²ஸயோ. பரஜ்ஜா²ஸயேபி ஏஸேவ நயோ. புச்சா²ய வஸோதி புச்சா²வஸோ. ஸோ ஏதஸ்ஸ அத்தீ²தி புச்சா²வஸிகோ. ஸுத்ததே³ஸனாய வத்து²பூ⁴தஸ்ஸ அத்த²ஸ்ஸ உப்பத்தி அத்து²ப்பத்தி, அத்து²ப்பத்தி ஏவ அட்டு²ப்பத்தி த²-காரஸ்ஸ ட²-காரம் கத்வா, ஸா ஏதஸ்ஸ அத்தீ²தி அட்டு²ப்பத்திகோ. அத² வா நிக்கி²பீயதி ஸுத்தம் ஏதேனாதி நிக்கே²போ, அத்தஜ்ஜா²ஸயாதி³ ஏவ. ஏதஸ்மிம் பன அத்த²விகப்பே அத்தனோ அஜ்ஜா²ஸயோ அத்தஜ்ஜா²ஸயோ. பரேஸம் அஜ்ஜா²ஸயோ பரஜ்ஜா²ஸயோ. புச்சீ²யதீதி புச்சா², புச்சி²தப்³போ³ அத்தோ², புச்சா²வஸேன பவத்தம் த⁴ம்மப்படிக்³கா³ஹகானம் வசனம் புச்சா²வஸம், ததே³வ நிக்கே²பஸத்³தா³பேக்கா²ய புச்சா²வஸிகோதி புல்லிங்க³வஸேன வுத்தம். ததா² அட்டு²ப்பத்தி ஏவ அட்டு²ப்பத்திகோதி ஏவமேத்த² அத்தோ² வேதி³தப்³போ³.

அபிச பரேஸம் இந்த்³ரியபரிபாகாதி³காரணனிரபேக்க²த்தா அத்தஜ்ஜா²ஸயஸ்ஸ விஸும் ஸுத்தனிக்கே²பபா⁴வோ யுத்தோ, கேவலம் அத்தனோ அஜ்ஜா²ஸயேனேவ த⁴ம்மதந்திட²பனத்த²ம் பவத்திததே³ஸனத்தா. பரஜ்ஜா²ஸயபுச்சா²வஸிகானம் பன பரேஸம் அஜ்ஜா²ஸயபுச்சா²னம் தே³ஸனாபவத்திஹேதுபூ⁴தானம் உப்பத்தியம் பவத்திதானம் கத²ம் அட்டு²ப்பத்தியம் அனவரோதோ⁴, புச்சா²வஸிகட்டு²ப்பத்திகானம் வா பரஜ்ஜா²ஸயானுரோதே⁴ன பவத்திதானம் கத²ம் பரஜ்ஜா²ஸயே அனவரோதோ⁴தி? ந சோதே³தப்³ப³மேதம். பரேஸஞ்ஹி அபி⁴னீஹாரபரிபுச்சா²தி³வினிமுத்தஸ்ஸேவ ஸுத்ததே³ஸனாகாரணுப்பாத³ஸ்ஸ அட்டு²ப்பத்திபா⁴வேன க³ஹிதத்தா பரஜ்ஜா²ஸயபுச்சா²வஸிகானம் விஸும் க³ஹணம். ததா² ஹி ப்³ரஹ்மஜாலத⁴ம்மதா³யாத³ஸுத்தாதீ³னம் (தீ³. ந. 1.1 ஆத³யோ) வண்ணாவண்ணஆமிஸுப்பாதா³தி³தே³ஸனானிமித்தம் அட்டு²ப்பத்தி வுச்சதி. பரேஸம் புச்ச²ம் வினா அஜ்ஜா²ஸயமேவ நிமித்தம் கத்வா தே³ஸிதோ பரஜ்ஜா²ஸயோ, புச்சா²வஸேன தே³ஸிதோ புச்சா²வஸிகோதி பாகடோயமத்தோ²தி.

யானி ப⁴க³வா பரேஹி அனஜ்ஜி²ட்டோ² கேவலம் அத்தனோ அஜ்ஜா²ஸயேனேவ கதே²தி, ஸேய்யதி²த³ம் – ஆகங்கே²ய்யஸுத்தம், துவட்டகஸுத்தந்திஏவமாதீ³னி (ஸு. நி. 921 ஆத³யோ; ம. நி. 1.64 ஆத³யோ), தேஸம் அத்தஜ்ஜா²ஸயோ நிக்கே²போ.

யானி பன ‘‘பரிபக்கா கோ² ராஹுலஸ்ஸ விமுத்திபரிபாசனீயா த⁴ம்மா, யம்னூனாஹம் ராஹுலம் உத்தரிம் ஆஸவானம் க²யே வினேய்ய’’ந்தி ஏவம் பரேஸம் அஜ்ஜா²ஸயம் க²ந்திம் அபி⁴னீஹாரம் பு³ஜ்ஜ²னபா⁴வஞ்ச ஓலோகேத்வா பரஜ்ஜா²ஸயவஸேன கதி²தானி, ஸேய்யதி²த³ம் – ராஹுலோவாத³ஸுத்தம், த⁴ம்மசக்கப்பவத்தனஸுத்தந்திஏவமாதீ³னி (ம. நி. 2.107 ஆத³யோ; 3.416 ஆத³யோ; ஸம். நி. 3.59; மஹாவ. 19-20), தேஸம் பரஜ்ஜா²ஸயோ நிக்கே²போ.

ப⁴க³வந்தம் பன உபஸங்கமித்வா தே³வா மனுஸ்ஸா சதஸ்ஸோ பரிஸா சத்தாரோ வண்ணா ச ததா² ததா² பஞ்ஹம் புச்ச²ந்தி ‘‘போ³ஜ்ஜ²ங்கா³ போ³ஜ்ஜ²ங்கா³தி, ப⁴ந்தே, வுச்சந்தி, நீவரணா நீவரணாதி வுச்சந்தீ’’திஆதி³னா, ஏவம் புட்டே²ன ப⁴க³வதா யானி கதி²தானி போ³ஜ்ஜ²ங்க³ஸம்யுத்தாதீ³னி (ஸம். நி. 5.186) தேஸம் புச்சா²வஸிகோ நிக்கே²போ.

யானி பன தானி உப்பன்னம் காரணம் படிச்ச கதி²தானி, ஸேய்யதி²த³ம் – த⁴ம்மதா³யாத³ம், புத்தமம்ஸூபமம், தா³ருக்க²ந்தூ⁴பமந்திஏவமாதீ³னி (ம. நி. 1.29; ஸம். நி. 2.63), தேஸம் அட்டு²ப்பத்திகோ நிக்கே²போ.

ஏவமிமேஸு சதூஸு ஸுத்தனிக்கே²பேஸு இமஸ்ஸ ஸுத்தஸ்ஸ பரஜ்ஜா²ஸயோ நிக்கே²போ. பரஜ்ஜா²ஸயவஸேன ஹேதம் நிக்கி²த்தம். கேஸம் அஜ்ஜா²ஸயேன? லோபே⁴ ஆதீ³னவத³ஸ்ஸீனம் புக்³க³லானம். கேசி பன ‘‘அத்தஜ்ஜா²ஸயோ’’தி வத³ந்தி.

தத்த² ஏகத⁴ம்மம், பி⁴க்க²வேதிஆதீ³ஸு ஏகஸத்³தோ³ அத்தே²வ அஞ்ஞத்தே² ‘‘ஸஸ்ஸதோ அத்தா ச லோகோ ச, இத³மேவ ஸச்சம் மோக⁴மஞ்ஞந்தி இத்தே²கே அபி⁴வத³ந்தீ’’திஆதீ³ஸு (ம. நி. 3.27). அத்தி² ஸேட்டே² ‘‘சேதஸோ ஏகோதி³பா⁴வ’’ந்திஆதீ³ஸு (தீ³. நி. 1.228; பாரா. 11). அத்தி² அஸஹாயே ‘‘ஏகோ வூபகட்டோ²’’திஆதீ³ஸு (தீ³. நி. 1.405). அத்தி² ஸங்கா²யம் ‘‘ஏகோவ கோ², பி⁴க்க²வே, க²ணோ ச ஸமயோ ச ப்³ரஹ்மசரியவாஸாயா’’திஆதீ³ஸு (அ. நி. 8.29). இதா⁴பி ஸங்கா²யமேவ த³ட்ட²ப்³போ³.

த⁴ம்ம-ஸத்³தோ³ பரியத்திஸச்சஸமாதி⁴பஞ்ஞாபகதிபுஞ்ஞாபத்திஸுஞ்ஞதாஞேய்யஸபா⁴வாதீ³ஸு தி³ஸ்ஸதி. ததா² ஹிஸ்ஸ ‘‘இத⁴ பி⁴க்கு² த⁴ம்மம் பரியாபுணாதீ’’திஆதீ³ஸு (அ. நி. 5.73) பரியத்தி அத்தோ². ‘‘தி³ட்ட²த⁴ம்மோ’’திஆதீ³ஸு (தீ³. நி. 1.299) ஸச்சானி. ‘‘ஏவம்த⁴ம்மா தே ப⁴க³வந்தோ அஹேஸு’’ந்திஆதீ³ஸு (தீ³. நி. 2.13; 3.142) ஸமாதி⁴. ‘‘ஸச்சம் த⁴ம்மோ தி⁴தி சாகோ³, ஸவே பேச்ச ந ஸோசதீ’’திஆதீ³ஸு (ஜா. 1.1.57) பஞ்ஞா. ‘‘ஜாதித⁴ம்மானம், பி⁴க்க²வே, ஸத்தானம் ஏவம் இச்சா² உப்பஜ்ஜதீ’’திஆதீ³ஸு (தீ³. நி. 2.398) பகதி. ‘‘த⁴ம்மோ ஹவே ரக்க²தி த⁴ம்மசாரி’’ந்திஆதீ³ஸு (ஜா. 1.10.102) புஞ்ஞம். ‘‘திண்ணம் த⁴ம்மானம் அஞ்ஞதரேன வதே³ய்ய பாராஜிகேன வா ஸங்கா⁴தி³ஸேஸேன வா பாசித்தியேன வா’’திஆதீ³ஸு (பாரா. 444) ஆபத்தி. ‘‘தஸ்மிம் கோ² பன ஸமயே த⁴ம்மா ஹோந்தீ’’திஆதீ³ஸு (த⁴. ஸ. 121) ஸுஞ்ஞதா. ‘‘ஸப்³பே³ த⁴ம்மா ஸப்³பா³காரேன பு³த்³த⁴ஸ்ஸ ப⁴க³வதோ ஞாணமுகே² ஆபாத²ம் ஆக³ச்ச²ந்தீ’’திஆதீ³ஸு (மஹானி. 156; சூளனி. மோக⁴ராஜமாணவபுச்சா²னித்³தே³ஸ 85) ஞேய்யோ. ‘‘குஸலா த⁴ம்மா அகுஸலா த⁴ம்மா’’திஆதீ³ஸு (த⁴. ஸ. திகமாதிகா 1) ஸபா⁴வோ அத்தோ². இதா⁴பி ஸபா⁴வோ. தஸ்மா ஏகத⁴ம்மந்தி ஏகம் ஸம்கிலேஸஸபா⁴வந்தி அதி⁴ப்பாயோ. ஏகோ ச ஸோ த⁴ம்மோ சாதி ஏகத⁴ம்மோ, தம் ஏகத⁴ம்மம்.

பி⁴க்க²வேதி பி⁴க்கூ² ஆலபதி. கிமத்த²ம் பன ப⁴க³வா த⁴ம்மம் தே³ஸேந்தோ பி⁴க்கூ² ஆலபதி, ந த⁴ம்மமேவ தே³ஸேதீதி? ஸதிஜனனத்த²ம். பி⁴க்கூ² ஹி அஞ்ஞம் சிந்தேந்தாபி த⁴ம்மம் பச்சவேக்க²ந்தாபி கம்மட்டா²னம் மனஸி கரோந்தாபி நிஸின்னா ஹோந்தி. தே பட²மம் அனாலபித்வா த⁴ம்மே தே³ஸியமானே ‘‘அயம் தே³ஸனா கிம்னிதா³னா, கிம்பச்சயா’’தி ஸல்லக்கே²தும் ந ஸக்கோந்தி. ஆலபிதே பன ஸதிம் உபட்ட²பேத்வா ஸல்லக்கே²தும் ஸக்கோந்தி, தஸ்மா ஸதிஜனனத்த²ம் ‘‘பி⁴க்க²வே’’தி ஆலபதி. தேன ச தேஸம் பி⁴க்க²னஸீலதாதி³கு³ணயோக³ஸித்³தே⁴ன வசனேன ஹீனாதி⁴கஜனஸேவிதம் வுத்திம் பகாஸேந்தோ உத்³த⁴ததீ³னபா⁴வனிக்³க³ஹம் கரோதி. ‘‘பி⁴க்க²வே’’தி இமினா கருணாவிப்பா²ரஸோம்மஹத³யனயனனிபாதபுப்³ப³ங்க³மேன வசனேன தே அத்தனோ முகா²பி⁴முகே² கரோந்தோ தேன ச கதே²துகம்யதாதீ³பகேன வசனேன நேஸம் ஸோதுகம்யதம் ஜனேதி. தேனேவ ச ஸம்போ³த⁴னத்தே²ன ஸாது⁴கம் ஸவனமனஸிகாரேபி நியோஜேதி. ஸாது⁴கம் ஸவனமனஸிகாராயத்தா ஹி ஸாஸனஸம்பத்தி.

அஞ்ஞேஸுபி தே³வமனுஸ்ஸேஸு பரிஸபரியாபன்னேஸு விஜ்ஜமானேஸு கஸ்மா பி⁴க்கூ² ஏவ ஆமந்தேஸீதி? ஜேட்ட²ஸேட்டா²ஸன்னஸதா³ஸன்னிஹிதபா⁴வதோ. ஸப்³ப³பரிஸஸாதா⁴ரணா ஹி ப⁴க³வதோ த⁴ம்மதே³ஸனா, பரிஸாய ச ஜேட்டா² பி⁴க்கூ² பட²முப்பன்னத்தா, ஸேட்டா² அனகா³ரியபா⁴வம் ஆதி³ம் கத்வா ஸத்து² சரியானுவிதா⁴யகத்தா ஸகலஸாஸனபடிக்³கா³ஹகத்தா ச, ஆஸன்னா தத்த² நிஸின்னேஸு ஸமீபவுத்தியா, ஸதா³ஸன்னிஹிதா ஸத்து²ஸந்திகாவசரத்தா. அபிச தே த⁴ம்மதே³ஸனாய பா⁴ஜனம் யதா²னுஸிட்ட²ம் படிபத்திஸப்³பா⁴வதோ, விஸேஸதோ ச ஏகச்சே பி⁴க்கூ² ஸந்தா⁴ய அயம் தே³ஸனாதி தே ஏவ ஆலபி.

பஜஹதா²தி ஏத்த² பஹானம் நாம தத³ங்க³ப்பஹானம், விக்க²ம்ப⁴னப்பஹானம், ஸமுச்சே²த³ப்பஹானம், படிப்பஸ்ஸத்³தி⁴ப்பஹானம், நிஸ்ஸரணப்பஹானந்தி பஞ்சவித⁴ம். தத்த² யம் தீ³பாலோகேனேவ தமஸ்ஸ படிபக்க²பா⁴வதோ அலோபா⁴தீ³ஹி லோபா⁴தி³கஸ்ஸ, நாமரூபபரிச்சே²தா³தி³விபஸ்ஸனாஞாணேஹி தஸ்ஸ தஸ்ஸ அனத்த²ஸ்ஸ பஹானம். ஸேய்யதி²த³ம் – பரிச்சாகே³ன லோபா⁴தி³மலஸ்ஸ, ஸீலேன பாணாதிபாதாதி³து³ஸ்ஸீல்யஸ்ஸ, ஸத்³தா⁴தீ³ஹி அஸ்ஸத்³தி⁴யாதி³கஸ்ஸ, நாமரூபவவத்தா²னேன ஸக்காயதி³ட்டி²யா, பச்சயபரிக்³க³ஹேன அஹேதுவிஸமஹேதுதி³ட்டீ²னம், தஸ்ஸேவ அபரபா⁴கே³ன கங்கா²விதரணேன கத²ம்கதீ²பா⁴வஸ்ஸ, கலாபஸம்மஸனேன ‘‘அஹம் மமா’’தி கா³ஹஸ்ஸ, மக்³கா³மக்³க³வவத்தா²னேன அமக்³கே³ மக்³க³ஸஞ்ஞாய, உத³யத³ஸ்ஸனேன உச்சே²த³தி³ட்டி²யா, வயத³ஸ்ஸனேன ஸஸ்ஸததி³ட்டி²யா, ப⁴யத³ஸ்ஸனேன ஸப⁴யேஸு அப⁴யஸஞ்ஞாய, ஆதீ³னவத³ஸ்ஸனேன அஸ்ஸாத³ஸஞ்ஞாய, நிப்³பி³தா³னுபஸ்ஸனேன அபி⁴ரதிஸஞ்ஞாய, முச்சிதுகம்யதாஞாணேன அமுச்சிதுகம்யதாய உபேக்கா²ஞாணேன அனுபேக்கா²ய, அனுலோமேன த⁴ம்மட்டி²தியா, நிப்³பா³னேன படிலோமபா⁴வஸ்ஸ, கோ³த்ரபு⁴னா ஸங்கா²ரனிமித்தக்³கா³ஹஸ்ஸ பஹானம், ஏதம் தத³ங்க³ப்பஹானம் நாம.

யம் பன உபசாரப்பனாபே⁴தே³ன ஸமாதி⁴னா பவத்திபா⁴வனிவாரணதோ க⁴டப்பஹாரேனேவ உத³கபிட்டே² ஸேவாலஸ்ஸ தேஸம் தேஸம் நீவரணாதி³த⁴ம்மானம் பஹானம், ஏதம் விக்க²ம்ப⁴னப்பஹானம் நாம. யம் சதுன்னம் அரியமக்³கா³னம் பா⁴விதத்தா தம்தம்மக்³க³வதோ அத்தனோ ஸந்தானே ‘‘தி³ட்டி²க³தானம் பஹானாயா’’திஆதி³னா (த⁴. ஸ. 277; விப⁴. 628) நயேன வுத்தஸ்ஸ ஸமுத³யபக்கி²யஸ்ஸ கிலேஸக³ணஸ்ஸ அச்சந்தம் அப்பவத்திபா⁴வேன ஸமுச்சி²ந்த³னம், இத³ம் ஸமுச்சே²த³ப்பஹானம் நாம. யம் பன ப²லக்க²ணே படிப்பஸ்ஸத்³த⁴த்தம் கிலேஸானம், ஏதம் படிப்பஸ்ஸத்³தி⁴ப்பஹானம் நாம. யம் பன ஸப்³ப³ஸங்க²தனிஸ்ஸடத்தா பஹீனஸப்³ப³ஸங்க²தம் நிப்³பா³னம், ஏதம் நிஸ்ஸரணப்பஹானம் நாம. ஏவம் பஞ்சவிதே⁴ பஹானே அனாகா³மிகபா⁴வகரஸ்ஸ பஹானஸ்ஸ அதி⁴ப்பேதத்தா இத⁴ ஸமுச்சே²த³ப்பஹானந்தி வேதி³தப்³ப³ம். தஸ்மா பஜஹதா²தி பரிச்சஜத², ஸமுச்சி²ந்த³தா²தி அத்தோ².

அஹந்தி ப⁴க³வா அத்தானம் நித்³தி³ஸதி. வோதி அயம் வோஸத்³தோ³ பச்சத்தஉபயோக³கரணஸாமிவசனபத³பூரணஸம்பதா³னேஸு தி³ஸ்ஸதி. ததா² ஹி ‘‘கச்சி, பன வோ அனுருத்³தா⁴, ஸமக்³கா³ ஸம்மோத³மானா’’திஆதீ³ஸு (ம. நி. 1.326) பச்சத்தே ஆக³தோ. ‘‘க³ச்ச²த², பி⁴க்க²வே, பணாமேமி வோ’’திஆதீ³ஸு (ம. நி. 2.157) உபயோகே³. ‘‘ந வோ மம ஸந்திகே வத்த²ப்³ப³’’ந்திஆதீ³ஸு (ம. நி. 2.157) கரணே. ‘‘ஸப்³பே³ஸம் வோ, ஸாரிபுத்த, ஸுபா⁴ஸித’’ந்திஆதீ³ஸு (ம. நி. 1.345) ஸாமிவசனே. ‘‘யே ஹி வோ அரியா பரிஸுத்³த⁴காயகம்மந்தா’’திஆதீ³ஸு (ம. நி. 1.35) பத³பூரணே. ‘‘வனபத்த²பரியாயம் வோ, பி⁴க்க²வே, தே³ஸேஸ்ஸாமீ’’திஆதீ³ஸு (ம. நி. 1.190) ஸம்பதா³னே. இதா⁴பி ஸம்பதா³னே ஏவ த³ட்ட²ப்³போ³.

பாடிபோ⁴கோ³தி படிபூ⁴. ஸோ ஹி தா⁴ரணகம் படிச்ச த⁴னிகஸ்ஸ, த⁴னிகம் படிச்ச தா⁴ரணகஸ்ஸ படினிதி⁴பூ⁴தோ த⁴னிகஸந்தகஸ்ஸ ததோ ஹரணாதி³ஸங்கா²தேன பு⁴ஞ்ஜனேன போ⁴கோ³தி படிபோ⁴கோ³, படிபோ⁴கோ³ ஏவ பாடிபோ⁴கோ³. அனாகா³மிதாயாதி அனாகா³மிபா⁴வத்தா²ய. படிஸந்தி⁴க்³க³ஹணவஸேன ஹி காமப⁴வஸ்ஸ அனாக³மனதோ அனாகா³மீ. யோ யஸ்ஸ த⁴ம்மஸ்ஸ அதி⁴க³மேன அனாகா³மீதி வுச்சதி, ஸப²லோ ஸோ ததியமக்³கோ³ அனாகா³மிதா நாம. இதி ப⁴க³வா வேனேய்யத³மனகுஸலோ வேனேய்யஜ்ஜா²ஸயானுகூலம் ததியமக்³கா³தி⁴க³மம் லஹுனா உபாயேன ஏகத⁴ம்மபூரணதாமத்தேன தி²ரம் கத்வா த³ஸ்ஸேஸி யதா² தம் ஸம்மாஸம்பு³த்³தோ⁴. பி⁴ன்னபூ⁴மிகாபி ஹி படிக⁴ஸம்யோஜனாத³யோ ததியமக்³க³வஜ்ஜா² கிலேஸா காமராக³ப்பஹானம் நாதிவத்தந்தீதி.

கஸ்மா பனேத்த² ப⁴க³வா அத்தானம் பாடிபோ⁴க³பா⁴வே ட²பேஸி? தேஸம் பி⁴க்கூ²னம் அனாகா³மிமக்³கா³தி⁴க³மாய உஸ்ஸாஹஜனனத்த²ம். பஸ்ஸதி ஹி ப⁴க³வா ‘‘மயா ‘ஏகத⁴ம்மம், பி⁴க்க²வே, பஜஹத², அஹம் வோ பாடிபோ⁴கோ³ அனாகா³மிதாயா’தி வுத்தே இமே பி⁴க்கூ² அத்³தா⁴ தம் ஏகத⁴ம்மம் பஹாய ஸக்கா ததியபூ⁴மிம் ஸமதி⁴க³ந்தும், யதோ த⁴ம்மஸ்ஸாமி பட²மமாஹ ‘அஹம் பாடிபோ⁴கோ³’தி உஸ்ஸாஹஜாதா தத³த்தா²ய படிபஜ்ஜிதப்³ப³ம் மஞ்ஞிஸ்ஸந்தீ’’தி. தஸ்மா உஸ்ஸாஹஜனனத்த²ம் அனாகா³மிதாய தேஸம் பி⁴க்கூ²னம் அத்தானம் பாடிபோ⁴க³பா⁴வே ட²பேஸி.

கதமம் ஏகத⁴ம்மந்தி ஏத்த² கதமந்தி புச்சா²வசனம். புச்சா² ச நாமேஸா பஞ்சவிதா⁴ – அதி³ட்ட²ஜோதனாபுச்சா², தி³ட்ட²ஸம்ஸந்த³னாபுச்சா², விமதிச்சே²த³னாபுச்சா², அனுமதிபுச்சா², கதே²துகம்யதாபுச்சா²தி. தத்த² பகதியா லக்க²ணம் அஞ்ஞாதம் ஹோதி அதி³ட்ட²ம் அதுலிதம் அதீரிதம் அவிபூ⁴தம் அவிபா⁴விதம், தஸ்ஸ ஞாணாய த³ஸ்ஸனாய துலனாய தீரணாய விபூ⁴தத்தா²ய விபா⁴வனத்தா²ய பஞ்ஹம் புச்ச²தி, அயம் அதி³ட்ட²ஜோதனாபுச்சா². பகதியா லக்க²ணம் ஞாதம் ஹோதி தி³ட்ட²ம் துலிதம் தீரிதம் விபூ⁴தம் விபா⁴விதம். ஸோ அஞ்ஞேஹி பண்டி³தேஹி ஸத்³தி⁴ம் ஸம்ஸந்த³னத்தா²ய பஞ்ஹம் புச்ச²தி, அயம் தி³ட்ட²ஸம்ஸந்த³னாபுச்சா². பகதியா ஸம்ஸயபக்க²ந்தோ³ ஹோதி விமதிபக்க²ந்தோ³ த்³வேள்ஹகஜாதோ – ‘‘ஏவம் நு கோ², ந நு கோ², கிம் நு கோ², கத²ம் நு கோ²’’தி, ஸோ விமதிச்சே²த³னத்தா²ய பஞ்ஹம் புச்ச²தி, அயம் விமதிச்சே²த³னாபுச்சா². ப⁴க³வா ஹி அனுமதிக்³க³ஹணத்த²ம் பஞ்ஹம் புச்ச²தி – ‘‘தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’திஆதி³னா (ஸம். நி. 3.59; மஹாவ. 21), அயம் அனுமதிபுச்சா². ப⁴க³வா பி⁴க்கூ²னம் கதே²துகம்யதாய பஞ்ஹம் புச்ச²தி – ‘‘சத்தாரோமே, பி⁴க்க²வே, ஆஹாரா பூ⁴தானம் வா ஸத்தானம் டி²தியா ஸம்ப⁴வேஸீனம் வா அனுக்³க³ஹாய. கதமே சத்தாரோ’’தி (ஸம். நி. 2.11) அயம் கதே²துகம்யதாபுச்சா².

தத்த² புரிமா திஸ்ஸோ புச்சா² பு³த்³தா⁴னம் நத்தி². கஸ்மா? தீஸு ஹி அத்³தா⁴ஸு கிஞ்சி ஸங்க²தம் அத்³தா⁴விமுத்தம் வா அஸங்க²தம் ஸம்மாஸம்பு³த்³தா⁴னம் அதி³ட்ட²ம் அதுலிதம் அதீரிதம் அவிபூ⁴தம் அவிபா⁴விதம் நாம நத்தி². தேன நேஸம் அதி³ட்ட²ஜோதனாபுச்சா² நத்தி². யம் பன தேஹி அத்தனோ ஞாணேன படிவித்³த⁴ம், தஸ்ஸ அஞ்ஞேன ஸமணேன வா ப்³ராஹ்மணேன வா தே³வேன வா மாரேன வா ப்³ரஹ்முனா வா ஸத்³தி⁴ம் ஸம்ஸந்த³னகிச்சம் நத்தி², தேன நேஸம் தி³ட்ட²ஸம்ஸந்த³னாபுச்சா²பி நத்தி². யஸ்மா பன பு³த்³தா⁴ ப⁴க³வந்தோ அகத²ம்கதீ² திண்ணவிசிகிச்சா² ஸப்³ப³த⁴ம்மேஸு விக³தஸம்ஸயா, தேன நேஸம் விமதிச்சே²த³னாபுச்சா²பி நத்தி². இதரா பன த்³வே புச்சா² அத்தி², தாஸு அயம் கதே²துகம்யதாபுச்சா²தி வேதி³தப்³பா³.

இதா³னி தாய புச்சா²ய புட்ட²மத்த²ம் ஸரூபதோ த³ஸ்ஸேந்தோ ‘‘லோப⁴ம், பி⁴க்க²வே, ஏகத⁴ம்ம’’ந்திஆதி³மாஹ. தத்த² லுப்³ப⁴ந்தி தேன, ஸயம் வா லுப்³ப⁴தி, லுப்³ப⁴னமத்தமேவ வா தந்தி லோபோ⁴. ஸ்வாயம் ஆரம்மணக்³க³ஹணலக்க²ணோ மக்கடாலேபோ விய, அபி⁴ஸங்க³ரஸோ தத்தகபாலே பக்கி²த்தமம்ஸபேஸி விய, அபரிச்சாக³பச்சுபட்டா²னோ தேலஞ்ஜனராகோ³ விய, ஸம்யோஜனியேஸு த⁴ம்மேஸு அஸ்ஸாத³த³ஸ்ஸனபத³ட்டா²னோ, தண்ஹானதி³பா⁴வேன வட்³ட⁴மானோ யத்த² ஸமுப்பன்னோ, ஸீக⁴ஸோதா நதீ³ விய மஹாஸமுத்³த³ம் அபாயமேவ தம் ஸத்தம் க³ஹேத்வா க³ச்ச²தீதி த³ட்ட²ப்³போ³. கிஞ்சாபி அயம் லோப⁴ஸத்³தோ³ ஸப்³ப³லோப⁴ஸாமஞ்ஞவசனோ, இத⁴ பன காமராக³வசனோதி வேதி³தப்³போ³. ஸோ ஹி அனாகா³மிமக்³க³வஜ்ஜோ².

புன பி⁴க்க²வேதி ஆலபனம் த⁴ம்மஸ்ஸ படிக்³கா³ஹகபா⁴வேன அபி⁴முகீ²பூ⁴தானம் தத்த² ஆத³ரஜனனத்த²ம். பஜஹதா²தி இமினா பஹானாபி⁴ஸமயோ விஹிதோ, ஸோ ச பரிஞ்ஞாஸச்சி²கிரியாபா⁴வனாபி⁴ஸமயேஹி ஸத்³தி⁴ம் ஏவ பவத்ததி, ந விஸுந்தி சதுஸச்சாதி⁴ட்டா²னானி சத்தாரிபி ஸம்மாதி³ட்டி²யா கிச்சானி விஹிதானேவ ஹோந்தி. யதா² ச ‘‘லோப⁴ம் பஜஹதா²’’தி வுத்தே பஹானேகட்ட²பா⁴வதோ தோ³ஸாதீ³னம்பி பஹானம் அத்த²தோ வுத்தமேவ ஹோதி, ஏவம் ஸமுத³யஸச்சவிஸயே ஸம்மாதி³ட்டி²கிச்சே பஹானாபி⁴ஸமயே வுத்தே தஸ்ஸா ஸஹகாரீகாரணபூ⁴தானம் ஸம்மாஸங்கப்பாதீ³னம் ஸேஸமக்³க³ங்கா³னம்பி ஸமுத³யஸச்சவிஸயகிச்சம் அத்த²தோ வுத்தமேவ ஹோதீதி பரிபுண்ணோ அரியமக்³க³ப்³யாபாரோ இத⁴ கதி²தோதி த³ட்ட²ப்³போ³. இமினா நயேன ஸதிபட்டா²னாதீ³னம்பி போ³தி⁴பக்கி²யத⁴ம்மானம் ப்³யாபாரஸ்ஸ இத⁴ வுத்தபா⁴வோ யதா²ரஹம் வித்தா²ரேதப்³போ³.

அபிசேத்த² லோப⁴ம் பஜஹதா²தி ஏதேன பஹானபரிஞ்ஞா வுத்தா. ஸா ச தீரணபரிஞ்ஞாதி⁴ட்டா²னா, தீரணபரிஞ்ஞா ச ஞாதபரிஞ்ஞாதி⁴ட்டா²னாதி அவினாபா⁴வேன திஸ்ஸோபி பரிஞ்ஞா போ³தி⁴தா ஹோந்தி. ஏவமேத்த² ஸஹ ப²லேன சதுஸச்சகம்மட்டா²னம் பரிபுண்ணம் கத்வா பகாஸிதந்தி த³ட்ட²ப்³ப³ம். அத² வா லோப⁴ம் பஜஹதா²தி ஸஹ ப²லேன ஞாணத³ஸ்ஸனவிஸுத்³தி⁴ தே³ஸிதா. ஸா ச படிபதா³ஞாணத³ஸ்ஸனவிஸுத்³தி⁴ஸன்னிஸ்ஸயா…பே… சித்தவிஸுத்³தி⁴ஸீலவிஸுத்³தி⁴ஸன்னிஸ்ஸயா சாதி நானந்தரிகபா⁴வேன ஸஹ ப²லேன ஸப்³பா³பி ஸத்த விஸுத்³தி⁴யோ விபா⁴விதாதி வேதி³தப்³ப³ம்.

ஏவமேதாய விஸுத்³தி⁴க்கமபா⁴வனாய பரிஞ்ஞாத்தயஸம்பாத³னேன லோப⁴ம் பஜஹிதுகாமேன –

‘‘அனத்த²ஜனனோ லோபோ⁴, லோபோ⁴ சித்தப்பகோபனோ;

ப⁴யமந்தரதோ ஜாதம், தம் ஜனோ நாவபு³ஜ்ஜ²தி.

‘‘லுத்³தோ⁴ அத்த²ம் ந ஜானாதி, லுத்³தோ⁴ த⁴ம்மம் ந பஸ்ஸதி;

அந்த⁴தமம் ததா³ ஹோதி, யம் லோபோ⁴ ஸஹதே நரம்’’. (இதிவு. 88);

ரத்தோ கோ², ஆவுஸோ, ராகே³ன அபி⁴பூ⁴தோ பரியாதி³ன்னசித்தோ பாணம்பி ஹனதி, அதி³ன்னம்பி ஆதி³யதி, ஸந்தி⁴ம்பி சி²ந்த³தி, நில்லோபம்பி ஹரதி, ஏகாகா³ரிகம்பி கரோதி, பரிபந்தே²பி திட்ட²தி, பரதா³ரம்பி க³ச்ச²தி, முஸாபி ப⁴ணதி. தத³பி தேஸம் ப⁴வதம் ஸமணப்³ராஹ்மணானம் அஜானதம் அபஸ்ஸதம் அவேத³யதம் தண்ஹானுக³தானம் பரிதஸ்ஸிதம் விப்ப²ந்தி³தமேவ (அ. நி. 3.54).

‘‘தண்ஹாது³தியோ புரிஸோ, தீ³க⁴மத்³தா⁴ன ஸம்ஸரம்;

இத்த²பா⁴வஞ்ஞதா²பா⁴வம், ஸம்ஸாரம் நாதிவத்ததி’’. (இதிவு. 15, 105);

‘‘நத்தி² ராக³ஸமோ அக்³கி³, நத்தி² தோ³ஸஸமோ கலி’’. (த⁴. ப. 202, 251);

‘‘காமராகே³ன ட³ய்ஹாமி, சித்தம் மே பரிட³ய்ஹதி’’. (ஸம். நி. 1.212);

‘‘யே ராக³ரத்தானுபதந்தி ஸோதம், ஸயம்கதம் மக்கடகோவ ஜால’’ந்தி. (த⁴. ப. 347) ச –

ஏவமாதி³ஸுத்தபதா³னுஸாரேன நானானயேஹி லோப⁴ஸ்ஸ ஆதீ³னவம் பச்சவேக்கி²த்வா தஸ்ஸ பஹானாய படிபஜ்ஜிதப்³ப³ம்.

அபிச ச² த⁴ம்மா காமராக³ஸ்ஸ பஹானாய ஸம்வத்தந்தி, அஸுப⁴னிமித்தஸ்ஸ உக்³க³ஹோ, அஸுப⁴பா⁴வனானுயோகோ³, இந்த்³ரியேஸு கு³த்தத்³வாரதா, போ⁴ஜனே மத்தஞ்ஞுதா, கல்யாணமித்ததா, ஸப்பாயகதா²தி. த³ஸவித⁴ஞ்ஹி அஸுப⁴னிமித்தம் உக்³க³ண்ஹந்தஸ்ஸாபி காமராகோ³ பஹீயதி, காயக³தாஸதிபா⁴வனாவஸேன ஸவிஞ்ஞாணகே உத்³து⁴மாதகாதி³வஸேன அவிஞ்ஞாணகே அஸுபே⁴ அஸுப⁴பா⁴வனானுயோக³மனுயுத்தஸ்ஸாபி, மனச்ச²ட்டே²ஸு இந்த்³ரியேஸு ஸம்வரணவஸேன ஸதிகவாடேன பிஹிதத்³வாரஸ்ஸாபி, சதுன்னம் பஞ்சன்னம் வா ஆலோபானம் ஓகாஸே ஸதி உத³கம் பிவித்வா யாபனஸீலதாய போ⁴ஜனே மத்தஞ்ஞுனோபி. தேனேவாஹ –

‘‘சத்தாரோ பஞ்ச ஆலோபே, அபு⁴த்வா உத³கம் பிவே;

அலம் பா²ஸுவிஹாராய, பஹிதத்தஸ்ஸ பி⁴க்கு²னோ’’தி. (தே²ரகா³. 983);

அஸுப⁴கம்மட்டா²னபா⁴வனாரதே கல்யாணமித்தே ஸேவந்தஸ்ஸாபி, டா²னனிஸஜ்ஜாதீ³ஸு த³ஸஅஸுப⁴னிஸ்ஸிதஸப்பாயகதா²யபி பஹீயதி. தேனேவாஹ –

‘‘அத்தி², பி⁴க்க²வே, அஸுப⁴னிமித்தம், தத்த² யோனிஸோமனஸிகாரப³ஹுலீகாரோ, அயமாஹாரோ அனுப்பன்னஸ்ஸ வா காமச்ச²ந்த³ஸ்ஸ அனுப்பாதா³ய உப்பன்னஸ்ஸ வா காமச்ச²ந்த³ஸ்ஸ பஹானாயா’’தி.

ஏவம் புப்³ப³பா⁴கே³ காமராக³ஸங்கா²தஸ்ஸ லோப⁴ஸ்ஸ பஹானாய படிபன்னோ விபஸ்ஸனம் உஸ்ஸுக்காபேத்வா ததியமக்³கே³ன தம் அனவஸேஸதோ ஸமுச்சி²ந்த³தி. தேன வுத்தம் ‘‘லோப⁴ம், பி⁴க்க²வே, ஏகத⁴ம்மம் பஜஹத², அஹம் வோ பாடிபோ⁴கோ³ அனாகா³மிதாயா’’தி.

ஏத்தா²ஹ ‘‘கோ பனேத்த² லோபோ⁴ பஹீயதி, கிம் அதீதோ, அத² அனாக³தோ, உதா³ஹு பச்சுப்பன்னோ’’தி? கிஞ்சேத்த² – ந தாவ அதீதோ லோபோ⁴ பஹீயேய்ய, ந அனாக³தோ வா தேஸம் அபா⁴வதோ. ந ஹி நிருத்³த⁴ம் அனுப்பன்னம் வா அத்தீ²தி வுச்சதி, வாயாமோ ச அப²லோ ஆபஜ்ஜதி. அத² பச்சுப்பன்னோ, ஏவம்பி அப²லோ வாயாமோ தஸ்ஸ ஸரஸப⁴ங்க³த்தா, ஸம்கிலிட்டா² ச மக்³க³பா⁴வனா ஆபஜ்ஜதி, சித்தவிப்பயுத்தோ வா லோபோ⁴ ஸியா, ந சாயம் நயோ இச்சி²தோதி. வுச்சதே – ந வுத்தனயேன அதீதானாக³தபச்சுப்பன்னோ லோபோ⁴ பஹீயதி. ஸேய்யதா²பி இத⁴ தருணருக்கோ² அஸஞ்ஜாதப²லோ, தம் புரிஸோ குடா²ரியா மூலே சி²ந்தே³ய்ய, தஸ்ஸ ருக்க²ஸ்ஸ சே²தே³ அஸதி யானி ப²லானி நிப்³ப³த்தேய்யும், தானி ருக்க²ஸ்ஸ சி²ன்னத்தா அஜாதானி ஏவ ந ஜாயேய்யும், ஏவமேவ அரியமக்³கா³தி⁴க³மே அஸதி உப்பஜ்ஜனாரஹோ லோபோ⁴ அரியமக்³கா³தி⁴க³மேன பச்சயகா⁴தஸ்ஸ கதத்தா ந உப்பஜ்ஜதி. அயஞ்ஹி அட்ட²கதா²ஸு ‘‘பூ⁴மிலத்³து⁴ப்பன்னோ’’தி வுச்சதி. விபஸ்ஸனாய ஹி ஆரம்மணபூ⁴தா பஞ்சக்க²ந்தா⁴ தஸ்ஸ உப்பஜ்ஜனட்டா²னதாய பூ⁴மி நாம. ஸா பூ⁴மி தேன லத்³தா⁴தி கத்வா பூ⁴மிலத்³து⁴ப்பன்னோ. ஆரம்மணாதி⁴க்³க³ஹிதுப்பன்னோ அவிக்க²ம்பி⁴துப்பன்னோ அஸமூஹதுப்பன்னோதி ச அயமேவ வுச்சதி.

தத்தா²தி தஸ்மிம் ஸுத்தே. ஏதந்தி ஏதம் அத்த²ஜாதம். இதா³னி கா³தா²ப³ந்த⁴வஸேன வுச்சமானம். இதி வுச்சதீதி கேன பன வுச்சதி? ப⁴க³வதா வ. அஞ்ஞேஸு ஹி தாதி³ஸேஸு டா²னேஸு ஸங்கீ³திகாரேஹி உபனிப³ந்த⁴கா³தா² ஹோந்தி, இத⁴ பன ப⁴க³வதா வ கா³தா²ருசிகானம் புக்³க³லானம் அஜ்ஜா²ஸயவஸேன வுத்தமேவத்த²ம் ஸங்க³ஹேத்வா கா³தா² பா⁴ஸிதா.

தத்த² யேன லோபே⁴ன லுத்³தா⁴ஸே, ஸத்தா க³ச்ச²ந்தி து³க்³க³திந்தி யேன ஆரம்மணக்³க³ஹணலக்க²ணேன ததோ ஏவ அபி⁴ஸங்க³ரஸேன லோபே⁴ன லுத்³தா⁴ அஜ்ஜ²த்திகபா³ஹிரேஸு ஆயதனேஸு கி³த்³தா⁴ க³தி⁴தா. ஸேதி ஹி நிபாதமத்தம். அக்க²ரசிந்தகா பன ஈதி³ஸேஸு டா²னேஸு ஸே-காராக³மம் இச்ச²ந்தி. ததா² லுத்³த⁴த்தா ஏவ காயஸுசரிதாதீ³ஸு கிஞ்சி ஸுசரிதம் அகத்வா காயது³ச்சரிதாதீ³னி ச உபசினித்வா ரூபாதீ³ஸு ஸத்தவிஸத்ததாய ஸத்தாதி லத்³த⁴னாமா பாணினோ து³க்க²ஸ்ஸ நிப்³ப³த்திட்டா²னதாய து³க்³க³தீதி ஸங்க²ம் க³தம் நிரயம் திரச்சா²னயோனிம் பேத்திவிஸயஞ்ச படிஸந்தி⁴க்³க³ஹணவஸேன க³ச்ச²ந்தி உபபஜ்ஜந்தி.

தம் லோப⁴ம் ஸம்மத³ஞ்ஞாய, பஜஹந்தி விபஸ்ஸினோதி தம் யதா²வுத்தம் லோப⁴ம் ஸபா⁴வதோ ஸமுத³யதோ அத்த²ங்க³மதோ அஸ்ஸாத³தோ ஆதீ³னவதோ நிஸ்ஸரணதோதி இமேஹி ஆகாரேஹி ஸம்மா அவிபரீதம் ஹேதுனா ஞாயேன அஞ்ஞாய ஞாததீரணபரிஞ்ஞாஸங்கா²தாய பஞ்ஞாய ஜானித்வா ரூபாதி³கே பஞ்சுபாதா³னக்க²ந்தே⁴ அனிச்சாதீ³ஹி விவிதே⁴ஹி ஆகாரேஹி பஸ்ஸனதோ விபஸ்ஸினோ அவஸிட்ட²கிலேஸே விபஸ்ஸனாபஞ்ஞாபுப்³ப³ங்க³மாய மக்³க³பஞ்ஞாய ஸமுச்சே²த³ப்பஹானவஸேன பஜஹந்தி, ந புன அத்தனோ ஸந்தானே உப்பஜ்ஜிதும் தே³ந்தி. பஹாய ந புனாயந்தி, இமம் லோகம் குதா³சனந்தி ஏவம் ஸஹஜேகட்ட²பஹானேகட்டே²ஹி அவஸிட்ட²கிலேஸேஹி ஸத்³தி⁴ம் தம் லோப⁴ம் அனாகா³மிமக்³கே³ன பஜஹித்வா புன பச்சா² இமம் காமதா⁴துஸங்கா²தம் லோகம் படிஸந்தி⁴க்³க³ஹணவஸேன கதா³சிபி ந ஆக³ச்ச²ந்தி ஓரம்பா⁴கி³யானம் ஸம்யோஜனானம் ஸுப்பஹீனத்தா. இதி ப⁴க³வா அனாகா³மிப²லேன தே³ஸனம் நிட்டா²பேஸி.

அயம்பி அத்தோ²தி நிதா³னாவஸானதோ பபு⁴தி யாவ கா³தா²பரியோஸானா இமினா ஸுத்தேன பகாஸிதோ அத்தோ². அபி-ஸத்³தோ³ இதா³னி வக்க²மானஸுத்தத்த²ஸம்பிண்ட³னோ. ஸேஸம் வுத்தனயமேவ. இமஸ்மிம் ஸுத்தே ஸமுத³யஸச்சம் ஸரூபேனேவ ஆக³தம், பஹானாபதே³ஸேன மக்³க³ஸச்சம். இதரம் ஸச்சத்³வயஞ்ச தது³ப⁴யஹேதுதாய நித்³தா⁴ரேதப்³ப³ம். கா³தா²ய பன து³க்க²ஸமுத³யமக்³க³ஸச்சானி யதா²ருதவஸேனேவ ஞாயந்தி, இதரம் நித்³தா⁴ரேதப்³ப³ம். ஏஸேவ நயோ இதோ பரேஸுபி ஸுத்தேஸு.

பரமத்த²தீ³பனியா கு²த்³த³கனிகாய-அட்ட²கதா²ய

இதிவுத்தகவண்ணனாய பட²மஸுத்தவண்ணனா நிட்டி²தா.