5. அஸஞ்ஞதபரிக்கா²ரபி⁴க்கு²வத்து²

மாவமஞ்ஞேத² பாபஸ்ஸாதி இமம் த⁴ம்மதே³ஸனம் ஸத்தா² ஜேதவனே விஹரந்தோ ஏகம் அஸஞ்ஞதபரிக்கா²ரம் பி⁴க்கு²ம் ஆரப்³ப⁴ கதே²ஸி.

ஸோ கிர யம் கிஞ்சி மஞ்சபீடா²தி³பே⁴த³ம் பரிக்கா²ரம் ப³ஹி பரிபு⁴ஞ்ஜித்வா தத்தே²வ ச²ட்³டே³தி. பரிக்கா²ரோ வஸ்ஸேனபி ஆதபேனபி உபசிகாதீ³ஹிபி வினஸ்ஸதி. ஸோ பி⁴க்கூ²ஹி ‘‘நனு, ஆவுஸோ, பரிக்கா²ரோ நாம படிஸாமிதப்³போ³’’தி வுத்தே ‘‘அப்பகம் மயா கதம், ஆவுஸோ, ஏதம், ந ஏதஸ்ஸ சித்தம் அத்தி², ந பித்த’’ந்தி வத்வா ததே²வ கரோதி. பி⁴க்கூ² தஸ்ஸ கிரியம் ஸத்து² ஆரோசேஸும். ஸத்தா² தம் பக்கோஸாபேத்வா ‘‘ஸச்சம் கிர த்வம் பி⁴க்கு² ஏவம் கரோஸீ’’தி புச்சி². ஸோ ஸத்தா²ரா புச்சி²தோபி ‘‘கிம் ஏதம் ப⁴க³வா அப்பகம் மயா கதம், ந தஸ்ஸ சித்தம் அத்தி², நாஸ்ஸ பித்த’’ந்தி ததே²வ அவமஞ்ஞந்தோ ஆஹ. அத² நம் ஸத்தா² ‘‘பி⁴க்கூ²ஹி ஏவம் காதும் ந வட்டதி, பாபகம்மம் நாம ‘அப்பக’ந்தி ந அவமஞ்ஞிதப்³ப³ம். அஜ்ஜோ²காஸே ட²பிதஞ்ஹி விவடமுக²ம் பா⁴ஜனம் தே³வே வஸ்ஸந்தே கிஞ்சாபி ஏகபி³ந்து³னா ந பூரதி, புனப்புனம் வஸ்ஸந்தே பன பூரதேவ, ஏவமேவம் பாபம் கரோந்தோ புக்³க³லோ அனுபுப்³பே³ன மஹந்தம் பாபராஸிம் கரோதீ’’தி வத்வா அனுஸந்தி⁴ம் க⁴டேத்வா த⁴ம்மம் தே³ஸேந்தோ இமம் கா³த²மாஹ –

121. ‘‘மாவமஞ்ஞேத² பாபஸ்ஸ, ந மந்த³ம் ஆக³மிஸ்ஸதி;

உத³பி³ந்து³னிபாதேன, உத³கும்போ⁴பி பூரதி;

பா³லோ பூரதி பாபஸ்ஸ, தோ²கம் தோ²கம்பி ஆசின’’ந்தி.

தத்த² மாவமஞ்ஞேதா²தி ந அவஜானேய்ய. பாபஸ்ஸாதி பாபம். ந மந்த³ம் ஆக³மிஸ்ஸதீதி ‘‘அப்பமத்தகம் மே பாபகம் கதம், கதா³ ஏதம் விபச்சிஸ்ஸதீ’’தி ஏவம் பாபம் நாவஜானேய்யாதி அத்தோ². உத³கும்போ⁴பீதி தே³வே வஸ்ஸந்தே முக²ம் விவரித்வா ட²பிதம் யம் கிஞ்சி குலாலபா⁴ஜனம் யதா² தம் ஏகேகஸ்ஸாபி உத³கபி³ந்து³னோ நிபாதேன அனுபுப்³பே³ன பூரதி, ஏவம் பா³லபுக்³க³லோ தோ²கம் தோ²கம்பி பாபம் ஆசினந்தோ கரோந்தோ வட்³டே⁴ந்தோ பாபஸ்ஸ பூரதியேவாதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸு. ஸத்தா²பி ‘‘அஜ்ஜோ²காஸே ஸேய்யம் ஸந்த²ரித்வா படிபாகதிகம் அகரோந்தோ இமம் நாம ஆபத்திமாபஜ்ஜதீ’’தி (பாசி. 108-110) ஸிக்கா²பத³ம் பஞ்ஞாபேஸீதி.

அஸஞ்ஞதபரிக்கா²ரபி⁴க்கு²வத்து² பஞ்சமம்.