4. அஞ்ஞதரப்³ராஹ்மணவத்து²

ஜா²யிந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ அஞ்ஞதரம் ப்³ராஹ்மணம் ஆரப்³ப⁴ கதே²ஸி.

ஸோ கிர சிந்தேஸி – ‘‘ஸத்தா² அத்தனோ ஸாவகே, ‘ப்³ராஹ்மணா’தி வத³தி, அஹஞ்சம்ஹி ஜாதிகோ³த்தேன ப்³ராஹ்மணோ, மம்பி நு கோ² ஏவம் வத்தும் வட்டதீ’’தி. ஸோ ஸத்தா²ரம் உபஸங்கமித்வா தமத்த²ம் புச்சி². ஸத்தா² ‘‘நாஹம் ஜாதிகோ³த்தமத்தேன ப்³ராஹ்மணம் வதா³மி, உத்தமத்த²ம் அரஹத்தம் அனுப்பத்தமேவ பனேவம் வதா³மீ’’தி வத்வா இமம் கா³த²மாஹ –

386. ‘‘ஜா²யிம் விரஜமாஸீனம், கதகிச்சமனாஸவம்;

உத்தமத்த²மனுப்பத்தம், தமஹம் ப்³ரூமி ப்³ராஹ்மண’’ந்தி.

தத்த² ஜா²யிந்தி து³விதே⁴ன ஜா²னேன ஜா²யந்தம் காமரஜேன விரஜம் வனே ஏககமாஸீனம் சதூஹி மக்³கே³ஹி ஸோளஸன்னம் கிச்சானம் கதத்தா கதகிச்சம் ஆஸவானம் அபா⁴வேன அனாஸவம் உத்தமத்த²ம் அரஹத்தம் அனுப்பத்தம் அஹம் ப்³ராஹ்மணம் வதா³மீதி அத்தோ².

தே³ஸனாவஸானே ஸோ ப்³ராஹ்மணோ ஸோதாபத்திப²லே பதிட்ட²ஹி, ஸம்பத்தானம்பி ஸாத்தி²கா த⁴ம்மதே³ஸனா அஹோஸீதி.

அஞ்ஞதரப்³ராஹ்மணவத்து² சதுத்த²ம்.