21. பப்³பா⁴ரவாஸீதிஸ்ஸத்தே²ரவத்து²

அஸம்ஸட்ட²ந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ பப்³பா⁴ரவாஸீதிஸ்ஸத்தே²ரம் ஆரப்³ப⁴ கதே²ஸி.

ஸோ கிர ஸத்து² ஸந்திகே கம்மட்டா²னம் க³ஹேத்வா அரஞ்ஞம் பவிஸித்வா ஸப்பாயம் ஸேனாஸனம் ஓலோகேந்தோ ஏகம் லேணபப்³பா⁴ரம் பாபுணி, ஸம்பத்தக்க²ணேயேவஸ்ஸ சித்தம் ஏகக்³க³தம் லபி⁴. ஸோ ‘‘அஹம் இத⁴ வஸந்தோ பப்³ப³ஜிதகிச்சம் நிப்பா²தே³தும் ஸக்கி²ஸ்ஸாமீ’’தி சிந்தேஸி. லேணேபி அதி⁴வத்தா² தே³வதா ‘‘ஸீலவா பி⁴க்கு² ஆக³தோ, இமினா ஸத்³தி⁴ம் ஏகட்டா²னே வஸிதும் து³க்க²ம். அயம் பன இத⁴ ஏகரத்திமேவ வஸித்வா பக்கமிஸ்ஸதீ’’தி சிந்தேத்வா புத்தே ஆதா³ய நிக்க²மி. தே²ரோ புனதி³வஸே பாதோவ கோ³சரகா³மம் பிண்டா³ய பாவிஸி. அத² நம் ஏகா உபாஸிகா தி³ஸ்வாவ புத்தஸினேஹம் படிலபி⁴த்வா கே³ஹே நிஸீதா³பேத்வா போ⁴ஜேத்வா அத்தானம் நிஸ்ஸாய தேமாஸம் வஸனத்தா²ய யாசி. ஸோபி ‘‘ஸக்கா மயா இமம் நிஸ்ஸாய ப⁴வனிஸ்ஸரணம் காது’’ந்தி அதி⁴வாஸேத்வா தமேவ லேணம் அக³மாஸி. தே³வதா தம் ஆக³ச்ச²ந்தம் தி³ஸ்வா ‘‘அத்³தா⁴ கேனசி நிமந்திதோ ப⁴விஸ்ஸதி, ஸ்வே வா பரஸுவே வா க³மிஸ்ஸதீ’’தி சிந்தேஸி.

ஏவம் அட்³ட⁴மாஸமத்தே அதிக்கந்தே ‘‘அயம் இதே⁴வ மஞ்ஞே அந்தோவஸ்ஸம் வஸிஸ்ஸதி, ஸீலவதா பன ஸத்³தி⁴ம் ஏகட்டா²னே புத்தகேஹி ஸத்³தி⁴ம் வஸிதும் து³க்கரம், இமஞ்ச ‘நிக்க²மா’தி வத்தும் ந ஸக்கா, அத்தி² நு கோ² இமஸ்ஸ ஸீலே க²லித’’ந்தி தி³ப்³பே³ன சக்கு²னா ஓலோகேந்தீ உபஸம்பத³மாளகதோ பட்டா²ய தஸ்ஸ ஸீலே க²லிதம் அதி³ஸ்வா ‘‘பரிஸுத்³த⁴மஸ்ஸ ஸீலம், கிஞ்சிதே³வஸ்ஸ கத்வா அயஸம் உப்பாதே³ஸ்ஸாமீ’’தி தஸ்ஸ உபட்டா²ககுலே உபாஸிகாய ஜேட்ட²புத்தஸ்ஸ ஸரீரே அதி⁴முச்சித்வா கீ³வம் பரிவத்தேஸி. தஸ்ஸ அக்கீ²னி நிக்க²மிம்ஸு, முக²தோ கே²ளோ பக்³க⁴ரி. உபாஸிகா தம் தி³ஸ்வா ‘‘கிம் இத³’’ந்தி விரவி. அத² நம் தே³வதா அதி³ஸ்ஸமானரூபா ஏவமாஹ – ‘‘மயா ஏஸ க³ஹிதோ, ப³லிகம்மேனபி மே அத்தோ² நத்தி², தும்ஹாகம் பன குலூபகம் தே²ரம் லட்டி²மது⁴கம் யாசித்வா தேன தேலம் பசித்வா இமஸ்ஸ நத்து²கம்மம் தே³த², ஏவாஹம் இமம் முஞ்சிஸ்ஸாமீ’’தி. நஸ்ஸது வா ஏஸ மரது வா, ந ஸக்கி²ஸ்ஸாமஹம் அய்யம் லட்டி²மது⁴கம் யாசிதுந்தி. ஸசே லட்டி²மது⁴கம் யாசிதும் ந ஸக்கோத², நாஸிகாயஸ்ஸ ஹிங்கு³சுண்ணம் பக்கி²பிதும் வதே³தா²தி. இத³ம்பி வத்தும் ந ஸக்கோமாதி. தேன ஹிஸ்ஸ பாத³தோ⁴வனஉத³கம் ஆதா³ய ஸீஸே ஆஸிஞ்சதா²தி. உபாஸிகா ‘‘ஸக்கா இத³ம் காது’’ந்தி வேலாய ஆக³தம் தே²ரம் நிஸீதா³பேத்வா யாகு³க²ஜ்ஜகம் த³த்வா அந்தரப⁴த்தே நிஸின்னஸ்ஸ பாதே³ தோ⁴வித்வா உத³கம் க³ஹேத்வா, ‘‘ப⁴ந்தே, இத³ம் உத³கம் தா³ரகஸ்ஸ ஸீஸே ஆஸிஞ்சாமா’’தி ஆபுச்சி²த்வா ‘‘தேன ஹி ஆஸிஞ்சதா²’’தி வுத்தே ததா² அகாஸி. ஸா தே³வதா தாவதே³வ தம் முஞ்சித்வா க³ந்த்வா லேணத்³வாரே அட்டா²ஸி.

தே²ரோபி ப⁴த்தகிச்சாவஸானே உட்டா²யாஸனா அவிஸ்ஸட்ட²கம்மட்டா²னதாய த்³வத்திம்ஸாகாரம் ஸஜ்ஜா²யந்தோவ பக்காமி. அத² நம் லேணத்³வாரம் பத்தகாலே ஸா தே³வதா ‘‘மஹாவேஜ்ஜ மா இத⁴ பவிஸா’’தி ஆஹ. ஸோ தத்தே²வ ட²த்வா ‘‘காஸி த்வ’’ந்தி ஆஹ. அஹம் இத⁴ அதி⁴வத்தா² தே³வதாதி. தே²ரோ ‘‘அத்தி² நு கோ² மயா வேஜ்ஜகம்மஸ்ஸ கதட்டா²ன’’ந்தி உபஸம்பத³மாளகதோ பட்டா²ய ஓலோகேந்தோ அத்தனோ ஸீலே திலகம் வா காளகம் வா அதி³ஸ்வா ‘‘அஹம் மயா வேஜ்ஜகம்மஸ்ஸ கதட்டா²னம் ந பஸ்ஸாமி, கஸ்மா ஏவம் வதே³ஸீ’’தி ஆஹ. ந பஸ்ஸஸீதி. ஆம, ந பஸ்ஸாமீதி? ஆசிக்கா²மி தேதி. ஆம, ஆசிக்கா²ஹீதி. திட்ட²து தாவ தூ³ரே கதம், அஜ்ஜேவ தயா அமனுஸ்ஸக³ஹிதஸ்ஸ உபட்டா²கபுத்தஸ்ஸ பாத³தோ⁴வனஉத³கம் ஸீஸே ஆஸித்தம், நாஸித்தந்தி? ஆம, ஆஸித்தந்தி. கிம் ஏதம் ந பஸ்ஸஸீதி? ஏதம் ஸந்தா⁴ய த்வம் வதே³ஸீதி? ஆம, ஏதம் ஸந்தா⁴ய வதா³மீதி. தே²ரோ சிந்தேஸி – ‘‘அஹோ வத மே ஸம்மா பணிஹிதோ அத்தா, ஸாஸனஸ்ஸ அனுரூபம் வத மே சரிதம், தே³வதாபி மம சதுபாரிஸுத்³தி⁴ஸீலே திலகம் வா காளகம் வா அதி³ஸ்வா தா³ரகஸ்ஸ ஸீஸே ஆஸித்தபாத³தோ⁴வனமத்தம் அத்³த³ஸா’’தி தஸ்ஸ ஸீலம் ஆரப்³ப⁴ ப³லவபீதி உப்பஜ்ஜி. ஸோ தம் விக்க²ம்பே⁴த்வா பாது³த்³தா⁴ரம்பி அகத்வா தத்தே²வ அரஹத்தம் பத்வா ‘‘மாதி³ஸம் பரிஸுத்³த⁴ம் ஸமணம் தூ³ஸேத்வா மா இத⁴ வனஸண்டே³ வஸி, த்வமேவ நிக்க²மாஹீ’’தி தே³வதம் ஓவத³ந்தோ இமம் உதா³னம் உதா³னேஸி –

‘‘விஸுத்³தோ⁴ வத மே வாஸோ, நிம்மலம் மம் தபஸ்ஸினம்;

மா த்வம் விஸுத்³த⁴ம் தூ³ஸேஸி, நிக்க²ம பவனா துவ’’ந்தி.

ஸோ தத்தே²வ தேமாஸம் வஸித்வா வுத்த²வஸ்ஸோ ஸத்து² ஸந்திகம் க³ந்த்வா பி⁴க்கூ²ஹி ‘‘கிம், ஆவுஸோ, பப்³ப³ஜிதகிச்சம் தே மத்த²கம் பாபித’’ந்தி புட்டோ² தஸ்மிம் லேணே வஸ்ஸூபக³மனதோ பட்டா²ய ஸப்³ப³ம் தம் பவத்திம் பி⁴க்கூ²னம் ஆரோசேத்வா, ‘‘ஆவுஸோ, த்வம் தே³வதாய ஏவம் வுச்சமானோ ந குஜ்ஜீ²’’தி வுத்தே ‘‘ந குஜ்ஜி²’’ந்தி ஆஹ. பி⁴க்கூ² ததா²க³தஸ்ஸ ஆரோசேஸும், ‘‘ப⁴ந்தே, அயம் பி⁴க்கு² அஞ்ஞம் ப்³யாகரோதி, தே³வதாய இத³ம் நாம வுச்சமானோபி ந குஜ்ஜி²ந்தி வத³தீ’’தி. ஸத்தா² தேஸம் கத²ம் ஸுத்வா ‘‘நேவ, பி⁴க்க²வே, மம புத்தோ குஜ்ஜ²தி, ஏதஸ்ஸ கி³ஹீஹி வா பப்³ப³ஜிதேஹி வா ஸம்ஸக்³கோ³ நாம நத்தி², அஸம்ஸட்டோ² ஏஸ அப்பிச்சோ² ஸந்துட்டோ²’’தி வத்வா த⁴ம்மம் தே³ஸேந்தோ இமம் கா³த²மாஹ –

404. ‘‘அஸம்ஸட்ட²ம் க³ஹட்டே²ஹி, அனாகா³ரேஹி சூப⁴யம்;

அனோகஸாரிமப்பிச்ச²ம், தமஹம் ப்³ரூமி ப்³ராஹ்மண’’ந்தி.

தத்த² அஸம்ஸட்ட²ந்தி த³ஸ்ஸனஸவனஸமுல்லபனபரிபோ⁴க³காயஸம்ஸக்³கா³னம் அபா⁴வேன அஸம்ஸட்ட²ம். உப⁴யந்தி கி³ஹீஹி ச அனாகா³ரேஹி சாதி உப⁴யேஹிபி அஸம்ஸட்ட²ம். அனோகஸாரிந்தி அனாலயசாரிம் தம் ஏவரூபம் அஹம் ப்³ராஹ்மணம் வதா³மீதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

பப்³பா⁴ரவாஸீதிஸ்ஸத்தே²ரவத்து² ஏகவீஸதிமம்.