8. பஞ்சஸதபி⁴க்கு²வத்து²

வஸ்ஸிகா விய புப்பா²னீதி இமம் த⁴ம்மதே³ஸனம் ஸத்தா² ஜேதவனே விஹரந்தோ பஞ்சஸதே பி⁴க்கூ² ஆரப்³ப⁴ கதே²ஸி.

தே கிர ஸத்து² ஸந்திகே கம்மட்டா²னம் க³ஹேத்வா அரஞ்ஞே ஸமணத⁴ம்மம் கரோந்தா பாதோவ புப்பி²தானி வஸ்ஸிகபுப்பா²னி ஸாயம் வண்டதோ முச்சந்தானி தி³ஸ்வா ‘‘புப்பா²னம் வண்டேஹி முச்சனதோ மயம் பட²மதரம் ராகா³தீ³ஹி முச்சிஸ்ஸாமா’’தி வாயமிம்ஸு. ஸத்தா² தே பி⁴க்கூ² ஓலோகேத்வா, ‘‘பி⁴க்க²வே, பி⁴க்கு²னா நாம வண்டதோ முச்சனபுப்பே²ன விய து³க்க²தோ முச்சிதும் வாயமிதப்³ப³மேவா’’தி வத்வா க³ந்த⁴குடியம் நிஸின்னோவ ஆலோகம் ப²ரித்வா இமம் கா³த²மாஹ –

377. ‘‘வஸ்ஸிகா விய புப்பா²னி, மத்³த³வானி பமுஞ்சதி;

ஏவம் ராக³ஞ்ச தோ³ஸஞ்ச, விப்பமுஞ்சேத² பி⁴க்க²வோ’’தி.

தத்த² வஸ்ஸிகாதி ஸுமனா. மத்³த³வானீதி மிலாதானி. இத³ம் வுத்தம் ஹோதி – யதா² வஸ்ஸிகா ஹிய்யோ புப்பி²தபுப்பா²னி புனதி³வஸே புராணபூ⁴தானி முஞ்சதி, வண்டதோ விஸ்ஸஜ்ஜேதி, ஏவம் தும்ஹேபி ராகா³த³யோ தோ³ஸே விப்பமுஞ்சேதா²தி.

தே³ஸனாவஸானே ஸப்³பே³பி தே பி⁴க்கூ² அரஹத்தே பதிட்ட²ஹிம்ஸூதி.

பஞ்சஸதபி⁴க்கு²வத்து² அட்ட²மம்.