9. ஸுவண்ணகாரத்தே²ரவத்து²

உச்சி²ந்தா³தி இமம் த⁴ம்மதே³ஸனம் ஸத்தா² ஜேதவனே விஹரந்தோ ஸாரிபுத்தத்தே²ரஸ்ஸ ஸத்³தி⁴விஹாரிகம் ஆரப்³ப⁴ கதே²ஸி.

ஏகோ கிர ஸுவண்ணகாரபுத்தோ அபி⁴ரூபோ ஸாரிபுத்தத்தே²ரஸ்ஸ ஸந்திகே பப்³ப³ஜி. தே²ரோ ‘‘தருணானம் ராகோ³ உஸ்ஸன்னோ ஹோதீ’’தி சிந்தேத்வா தஸ்ஸ ராக³படிகா⁴தாய அஸுப⁴கம்மட்டா²னம் அதா³ஸி. தஸ்ஸ பன தம் அஸப்பாயம். தஸ்மா அரஞ்ஞம் பவிஸித்வா தேமாஸம் வாயமந்தோ சித்தேகக்³க³மத்தம்பி அலபி⁴த்வா புன தே²ரஸ்ஸ ஸந்திகம் ஆக³ந்த்வா தே²ரேன ‘‘உபட்டி²தம் தே, ஆவுஸோ, கம்மட்டா²ன’’ந்தி வுத்தே தம் பவத்திம் ஆரோசேஸி. அத²ஸ்ஸ தே²ரோ ‘‘கம்மட்டா²னம் ந ஸம்பஜ்ஜதீதி வோஸானம் ஆபஜ்ஜிதும் ந வட்டதீ’’தி வத்வா புன ததே³வ கம்மட்டா²னம் ஸாது⁴கம் கதே²த்வா அதா³ஸி. ஸோ து³தியவாரேபி கிஞ்சி விஸேஸம் நிப்³ப³த்தேதும் அஸக்கோந்தோ ஆக³ந்த்வா தே²ரஸ்ஸ ஆரோசேஸி. அத²ஸ்ஸ தே²ரோபி ஸகாரணம் ஸஉபமம் கத்வா ததே³வ கம்மட்டா²னம் ஆசிக்கி². ஸோ புனபி ஆக³ந்த்வா கம்மட்டா²னஸ்ஸ அஸம்பஜ்ஜனபா⁴வம் கதே²ஸி. தே²ரோ சிந்தேஸி – ‘‘காரகோ பி⁴க்கு² அத்தனி விஜ்ஜமானே காமச்ச²ந்தா³த³யோ விஜ்ஜமானாதி அவிஜ்ஜமானே அவிஜ்ஜமானாதி பஜானாதி. அயம் பி⁴க்கு² காரகோ, நோ அகாரகோ, படிபன்னோ, நோ அப்படிபன்னோ, அஹம் பனேதஸ்ஸ அஜ்ஜா²ஸயம் ந ஜானாமி, பு³த்³த⁴வேனேய்யோ ஏஸோ ப⁴விஸ்ஸதீ’’தி தம் ஆதா³ய ஸாயன்ஹஸமயே ஸத்தா²ரம் உபஸங்கமித்வா ‘‘அயம், ப⁴ந்தே, மம ஸத்³தி⁴விஹாரிகோ, இமஸ்ஸ மயா இமினா காரணேன இத³ம் நாம கம்மட்டா²னம் தி³ன்ன’’ந்தி ஸப்³ப³ம் தம் பவத்திம் ஆரோசேஸி.

அத² நம் ஸத்தா² ‘‘ஆஸயானுஸயஞாணம் நாமேதம் பாரமியோ பூரேத்வா த³ஸஸஹஸ்ஸிலோகதா⁴தும் உன்னாதே³த்வா ஸப்³ப³ஞ்ஞுதம் பத்தானம் பு³த்³தா⁴னம்யேவ விஸயோ’’தி வத்வா ‘‘கதரகுலா நு கோ² ஏஸ பப்³ப³ஜிதோ’’தி ஆவஜ்ஜேந்தோ ‘‘ஸுவண்ணகாரகுலா’’தி ஞத்வா அதீதே அத்தபா⁴வே ஓலோகேந்தோ தஸ்ஸ ஸுவண்ணகாரகுலேயேவ படிபாடியா நிப்³ப³த்தானி பஞ்ச அத்தபா⁴வஸதானி தி³ஸ்வா ‘‘இமினா த³ஹரேன தீ³க⁴ரத்தம் ஸுவண்ணகாரகம்மம் கரோந்தேன கணிகாரபுப்ப²பது³மபுப்பா²தீ³னி கரிஸ்ஸாமீதி ரத்தஸுவண்ணமேவ ஸம்பரிவத்திதம், தஸ்மா இமஸ்ஸ அஸுப⁴படிகூலகம்மட்டா²னம் ந வட்டதி, மனாபமேவஸ்ஸ கம்மட்டா²னம் ஸப்பாய’’ந்தி சிந்தேத்வா, ‘‘ஸாரிபுத்த, தயா கம்மட்டா²னம் த³த்வா சத்தாரோ மாஸே கிலமிதம் பி⁴க்கு²ம் அஜ்ஜ பச்சா²ப⁴த்தேயேவ அரஹத்தம் பத்தம் பஸ்ஸிஸ்ஸஸி, க³ச்ச² த்வ’’ந்தி தே²ரம் உய்யோஜேத்வா இத்³தி⁴யா சக்கமத்தம் ஸுவண்ணபது³மம் மாபேத்வா பத்தேஹி சேவ நாலேஹி ச உத³கபி³ந்தூ³னி முஞ்சந்தம் விய கத்வா ‘‘பி⁴க்கு² இமம் பது³மம் ஆதா³ய விஹாரபச்சந்தே வாலுகராஸிம்ஹி ட²பேத்வா ஸம்முக²ட்டா²னே பல்லங்கேன நிஸீதி³த்வா ‘லோஹிதகம் லோஹிதக’ந்தி பரிகம்மம் கரோஹீ’’தி அதா³ஸி. தஸ்ஸ ஸத்து²ஹத்த²தோ பது³மம் க³ண்ஹந்தஸ்ஸேவ சித்தம் பஸீதி³. ஸோ விஹாரபச்சந்தம் க³ந்த்வா வாலுகம் உஸ்ஸாபேத்வா தத்த² பது³மனாலம் பவேஸேத்வா ஸம்முகே² பல்லங்கேன நிஸின்னோ ‘‘லோஹிதகம் லோஹிதக’’ந்தி பரிகம்மம் ஆரபி⁴. அத²ஸ்ஸ தங்க²ணஞ்ஞேவ நீவரணானி விக்க²ம்பி⁴ம்ஸு, உபசாரஜ்ஜா²னம் உப்பஜ்ஜி. தத³னந்தரம் பட²மஜ்ஜா²னம் நிப்³ப³த்தேத்வா பஞ்சஹாகாரேஹி வஸீபா⁴வம் பாபேத்வா யதா²னிஸின்னோவ து³தியஜ்ஜா²னாதீ³னிபி பத்வா வஸீபூ⁴தோ சதுத்த²ஜ்ஜா²னேன ஜா²னகீளம் கீளந்தோ நிஸீதி³.

ஸத்தா² தஸ்ஸ ஜா²னானம் உப்பன்னபா⁴வம் ஞத்வா ‘‘ஸக்கி²ஸ்ஸதி நு கோ² ஏஸ அத்தனோ த⁴ம்மதாய உத்தரி விஸேஸம் நிப்³ப³த்தேது’’ந்தி ஓலோகேந்தோ ‘‘ந ஸக்கி²ஸ்ஸதீ’’தி ஞத்வா ‘‘தம் பது³மம் மிலாயதூ’’தி அதி⁴ட்ட²ஹி. தம் ஹத்தே²ஹி மத்³தி³தபது³மம் மிலாயந்தம் விய காளவண்ணம் அஹோஸி. ஸோ ஜா²னா வுட்டா²ய தம் ஓலோகேத்வா ‘‘கிம் நு கோ² இமம் பது³மம் ஜராய பஹடம் பஞ்ஞாயதி, அனுபாதி³ண்ணகேபி ஏவம் ஜராய அபி⁴பு⁴ய்யமானே உபாதி³ண்ணகே கதா²வ நத்தி². இத³ம்பி ஹி ஜரா அபி⁴ப⁴விஸ்ஸதீ’’தி அனிச்சலக்க²ணம் பஸ்ஸி. தஸ்மிம் பன தி³ட்டே² து³க்க²லக்க²ணஞ்ச அனத்தலக்க²ணஞ்ச தி³ட்ட²மேவ ஹோதி. தஸ்ஸ தயோ ப⁴வா ஆதி³த்தா விய கண்டே³ ப³த்³த⁴குணபா விய ச கா²யிம்ஸு. தஸ்மிம் க²ணே தஸ்ஸ அவிதூ³ரே குமாரகா ஏகம் ஸரம் ஓதரித்வா குமுதா³னி ப⁴ஞ்ஜித்வா த²லே ராஸிம் கரோந்தி. ஸோ ஜலே ச த²லே ச குமுதா³னி ஓலோகேஸி. அத²ஸ்ஸ ஜலே குமுதா³னி அபி⁴ரூபானி உத³கபக்³க⁴ரந்தானி விய உபட்ட²ஹிம்ஸு, இதரானி அக்³க³க்³கே³ஸு பரிமிலாதானி. ஸோ ‘‘அனுபாதி³ண்ணகம் ஜரா ஏவம் பஹரதி, உபாதி³ண்ணகம் கிம் பன ந பஹரிஸ்ஸதீ’’தி ஸுட்டு²தரம் அனிச்சலக்க²ணாதீ³னி அத்³த³ஸ. ஸத்தா² ‘‘பாகடீபூ⁴தம் இதா³னி இமஸ்ஸ பி⁴க்கு²னோ கம்மட்டா²ன’’ந்தி ஞத்வா க³ந்த⁴குடியம் நிஸின்னகோவ ஓபா⁴ஸம் முஞ்சி, ஸோ தஸ்ஸ முக²ம் பஹரி. அத²ஸ்ஸ ‘‘கிம் நு கோ² ஏத’’ந்தி ஓலோகேந்தஸ்ஸ ஸத்தா² ஆக³ந்த்வா ஸம்முகே² டி²தோ விய அஹோஸி. ஸோ உட்டா²ய அஞ்ஜலிம் பக்³க³ண்ஹி. அத²ஸ்ஸ ஸத்தா² ஸப்பாயம் ஸல்லக்கே²த்வா இமம் கா³த²மாஹ –

285. ‘‘உச்சி²ந்த³ ஸினேஹமத்தனோ, குமுத³ம் ஸாரதி³கம்வ பாணினா;

ஸந்திமக்³க³மேவ ப்³ரூஹய, நிப்³பா³னம் ஸுக³தேன தே³ஸித’’ந்தி.

தத்த² உச்சி²ந்தா³தி அரஹத்தமக்³கே³ன உச்சி²ந்த³. ஸாரதி³கந்தி ஸரத³காலே நிப்³ப³த்தம். ஸந்திமக்³க³ந்தி நிப்³பா³னகா³மிம் அட்ட²ங்கி³கம் மக்³க³ம். ப்³ரூஹயாதி வட்³ட⁴ய. நிப்³பா³னஞ்ஹி ஸுக³தேன தே³ஸிதம், தஸ்மா தஸ்ஸ மக்³க³ம் பா⁴வேஹீதி அத்தோ².

தே³ஸனாவஸானே ஸோ பி⁴க்கு² அரஹத்தே பதிட்ட²ஹி.

ஸுவண்ணகாரத்தே²ரவத்து² நவமம்.