2. ச²ப்³ப³க்³கி³யவத்து²

ந தேன பண்டி³தோ ஹோதீதி இமம் த⁴ம்மதே³ஸனம் ஸத்தா² ஜேதவனே விஹரந்தோ ச²ப்³ப³க்³கி³யே ஆரப்³ப⁴ கதே²ஸி.

தே கிர விஹாரேபி கா³மேபி ப⁴த்தக்³க³ம் ஆகுலம் கரோந்தா விசரந்தி. அதே²கதி³வஸே பி⁴க்கூ² கா³மே ப⁴த்தகிச்சம் கத்வா ஆக³தே த³ஹரே ஸாமணேரே ச புச்சி²ம்ஸு – ‘‘கீதி³ஸம், ஆவுஸோ, ப⁴த்தக்³க³’’ந்தி? ப⁴ந்தே, மா புச்ச²த², ச²ப்³ப³க்³கி³யா ‘‘மயமேவ வியத்தா, மயமேவ பண்டி³தா, இமே பஹரித்வா ஸீஸே கசவரம் ஆகிரித்வா நீஹரிஸ்ஸாமா’’தி வத்வா அம்ஹே பிட்டி²யம் க³ஹேத்வா கசவரம் ஓகிரந்தா ப⁴த்தக்³க³ம் ஆகுலம் அகம்ஸூதி. பி⁴க்கூ² ஸத்து² ஸந்திகம் க³ந்த்வா தமத்த²ம் ஆரோசேஸும். ஸத்தா² ‘‘நாஹம், பி⁴க்க²வே, ப³ஹும் பா⁴ஸித்வா பரே விஹேட²யமானம் ‘பண்டி³தோ’தி வதா³மி, கே²மினம் பன அவேரீனம் அப⁴யமேவ பண்டி³தோதி வதா³மீ’’தி வத்வா இமம் கா³த²மாஹ –

258. ‘‘ந தேன பண்டி³தோ ஹோதி, யாவதா ப³ஹு பா⁴ஸதி;

கே²மீ அவேரீ அப⁴யோ, பண்டி³தோதி பவுச்சதீ’’தி.

தத்த² யாவதாதி யத்தகேன காரணேன ஸங்க⁴மஜ்ஜா²தீ³ஸு ப³ஹும் கதே²தி, தேன பண்டி³தோ நாம ந ஹோதி. யோ பன ஸயம் கே²மீ பஞ்சன்னம் வேரானம் அபா⁴வேன அவேரீ நிப்³ப⁴யோ, யம் வா ஆக³ம்ம மஹாஜனஸ்ஸ ப⁴யம் ந ஹோதி, ஸோ பண்டி³தோ நாம ஹோதீதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

ச²ப்³ப³க்³கி³யவத்து² து³தியம்.