7. பஞ்சஉபாஸகவத்து²

யோ பாணந்தி இமம் த⁴ம்மதே³ஸனம் ஸத்தா² ஜேதவனே விஹரந்தோ பஞ்ச உபாஸகே ஆரப்³ப⁴ கதே²ஸி.

தேஸு ஹி ஏகோ பாணாதிபாதாவேரமணிஸிக்கா²பத³மேவ ரக்க²தி, இதரே இதரானி. தே ஏகதி³வஸம் ‘‘அஹம் து³க்கரம் கரோமி, து³க்கரம் ரக்கா²மீ’’தி விவாதா³பன்னா ஸத்து² ஸந்திகம் க³ந்த்வா வந்தி³த்வா தமத்த²ம் ஆரோசேஸும். ஸத்தா² தேஸம் கத²ம் ஸுத்வா ஏகஸீலம்பி கனிட்ட²கம் அகத்வா ‘‘ஸப்³பா³னேவ து³ரக்கா²னீ’’தி வத்வா இமா கா³தா² அபா⁴ஸி –

246. ‘‘யோ பாணமதிபாதேதி, முஸாவாத³ஞ்ச பா⁴ஸதி;

லோகே அதி³ன்னமாதி³யதி, பரதா³ரஞ்ச க³ச்ச²தி.

247. ‘‘ஸுராமேரயபானஞ்ச, யோ நரோ அனுயுஞ்ஜதி;

இதே⁴வ மேஸோ லோகஸ்மிம், மூலம் க²ணதி அத்தனோ.

248. ‘‘ஏவம் போ⁴ புரிஸ ஜானாஹி, பாபத⁴ம்மா அஸஞ்ஞதா;

மா தம் லோபோ⁴ அத⁴ம்மோ ச, சிரம் து³க்கா²ய ரந்த⁴யு’’ந்தி.

தத்த² யோ பாணமதிபாதேதீதி யோ ஸாஹத்தி²காதீ³ஸு ச²ஸு பயோகே³ஸு ஏகபயோகே³னாபி பரஸ்ஸ ஜீவிதிந்த்³ரியம் உபச்சி²ந்த³தி. முஸாவாத³ந்தி பரேஸம் அத்த²ப⁴ஞ்ஜனகம் முஸாவாத³ஞ்ச பா⁴ஸதி. லோகே அதி³ன்னமாதி³யதீதி இமஸ்மிம் ஸத்தலோகே தே²ய்யாவஹாராதீ³ஸு ஏகேனபி அவஹாரேன பரபரிக்³க³ஹிதம் ஆதி³யதி. பரதா³ரஞ்ச க³ச்ச²தீதி பரஸ்ஸ ரக்கி²தகோ³பிதேஸு ப⁴ண்டே³ஸு அபரஜ்ஜ²ந்தோ உப்பத²சாரம் சரதி. ஸுராமேரயபானந்தி யஸ்ஸ கஸ்ஸசி ஸுராய சேவ மேரயஸ்ஸ ச பானம். அனுயுஞ்ஜதீதி ஸேவதி ப³ஹுலீகரோதி. மூலம் க²ணதீதி திட்ட²து பரலோகோ, ஸோ பன புக்³க³லோ இத⁴ லோகஸ்மிம்யேவ யேன கே²த்தவத்து²ஆதி³னா மூலேன பதிட்ட²பேய்ய, தம்பி அட்ட²பேத்வா வா விஸ்ஸஜ்ஜேத்வா வா ஸுரம் பிவந்தோ அத்தனோ மூலம் க²ணதி, அனாதோ² கபணோ ஹுத்வா விசரதி. ஏவம், போ⁴தி பஞ்சது³ஸ்ஸீல்யகம்மகாரகம் புக்³க³லம் ஆலபதி. பாபத⁴ம்மாதி லாமகத⁴ம்மா. அஸஞ்ஞதாதி காயஸஞ்ஞதாதி³ரஹிதா. அசேதஸாதிபி பாடோ², அசித்தகாதி அத்தோ². லோபோ⁴ அத⁴ம்மோ சாதி லோபோ⁴ சேவ தோ³ஸோ ச. உப⁴யம்பி ஹேதம் அகுஸலமேவ. சிரம் து³க்கா²ய ரந்த⁴யுந்தி சிரகாலம் நிரயது³க்கா²தீ³னம் அத்தா²ய தம் ஏதே த⁴ம்மா மா ரந்தே⁴ந்து மா மத்தே²ந்தூதி அத்தோ².

தே³ஸனாவஸானே தே பஞ்ச உபாஸகா ஸோதாபத்திப²லே பதிட்ட²ஹிம்ஸு, ஸம்பத்தானம்பி ஸாத்தி²கா த⁴ம்மதே³ஸனா அஹோஸீதி.

பஞ்சஉபாஸகவத்து² ஸத்தமம்.