2. அஞ்ஞதரப்³ராஹ்மணவத்து²

அனுபுப்³பே³னாதி இமம் த⁴ம்மதே³ஸனம் ஸத்தா² ஜேதவனே விஹரந்தோ அஞ்ஞதரப்³ராஹ்மணம் ஆரப்³ப⁴ கதே²ஸி.

ஸோ கிர ஏகதி³வஸம் பாதோவ நிக்க²மித்வா பி⁴க்கூ²னம் சீவரபாருபனட்டா²னே பி⁴க்கூ² சீவரம் பாருபந்தே ஓலோகேந்தோ அட்டா²ஸி. தம் பன டா²னம் விரூள்ஹதிணம் ஹோதி. அதே²கஸ்ஸ பி⁴க்கு²னோ சீவரம் பாருபந்தஸ்ஸ சீவரகண்ணோ திணேஸு பவட்டேந்தோ உஸ்ஸாவபி³ந்தூ³ஹி தேமி. ப்³ராஹ்மணோ ‘‘இமம் டா²னம் அப்பஹரிதம் காதும் வட்டதீ’’தி புனதி³வஸே குத்³தா³லம் ஆதா³ய க³ந்த்வா தம் டா²னம் தச்சே²த்வா க²லமண்ட³லஸதி³ஸம் அகாஸி. புனதி³வஸேபி தம் டா²னம் ஆக³ந்த்வா பி⁴க்கூ²ஸு சீவரம் பாருபந்தேஸு ஏகஸ்ஸ சீவரகண்ணம் பூ⁴மியம் பதித்வா பம்ஸும்ஹி பவட்டமானம் தி³ஸ்வா ‘‘இத⁴ வாலுகம் ஓகிரிதும் வட்டதீ’’தி சிந்தேத்வா வாலுகம் ஆஹரித்வா ஓகிரி.

அதே²கதி³வஸம் புரேப⁴த்தம் சண்டோ³ ஆதபோ அஹோஸி, ததா³பி பி⁴க்கூ²னம் சீவரம் பாருபந்தானம் க³த்ததோ ஸேதே³ முச்சந்தே தி³ஸ்வா ‘‘இத⁴ மயா மண்ட³பம் காரேதும் வட்டதீ’’தி சிந்தேத்வா மண்ட³பம் காரேஸி. புனதி³வஸே பாதோவ வஸ்ஸம் வஸ்ஸி, வத்³த³லிகம் அஹோஸி. ததா³பி ப்³ராஹ்மணோ பி⁴க்கூ² ஓலோகேந்தோவ டி²தோ திந்தசீவரகே பி⁴க்கூ² தி³ஸ்வா ‘‘ஏத்த² மயா ஸாலம் காரேதும் வட்டதீ’’தி ஸாலம் காரேத்வா ‘‘இதா³னி ஸாலமஹம் கரிஸ்ஸாமீ’’தி சிந்தேத்வா பு³த்³த⁴ப்பமுக²ம் பி⁴க்கு²ஸங்க⁴ம் நிமந்தேத்வா அந்தோ ச ப³ஹி ச பி⁴க்கூ² நிஸீதா³பேத்வா ப⁴த்தகிச்சாவஸானே அனுமோத³னத்தா²ய ஸத்து² பத்தம் க³ஹேத்வா, ‘‘ப⁴ந்தே, அஹம் பி⁴க்கூ²னம் சீவரபாருபனகாலே இமஸ்மிம் டா²னே ஓலோகேந்தோ டி²தோ இத³ஞ்சித³ஞ்ச தி³ஸ்வா இத³ஞ்சித³ஞ்ச காரேஸி’’ந்தி ஆதி³தோ பட்டா²ய ஸப்³ப³ம் தம் பவத்திம் ஆரோசேஸி. ஸத்தா² தஸ்ஸ வசனம் ஸுத்வா, ‘‘ப்³ராஹ்மண, பண்டி³தா நாம க²ணே க²ணே தோ²கம் குஸலம் கரோந்தா அனுபுப்³பே³ன அத்தனோ அகுஸலமலம் நீஹரந்தியேவா’’தி வத்வா இமம் கா³த²மாஹ –

239. ‘‘அனுபுப்³பே³ன மேதா⁴வீ, தோ²கம் தோ²கம் க²ணே க²ணே;

கம்மாரோ ரஜதஸ்ஸேவ, நித்³த⁴மே மலமத்தனோ’’தி.

தத்த² அனுபுப்³பே³னாதி அனுபடிபாடியா. மேதா⁴வீதி த⁴ம்மோஜபஞ்ஞாய ஸமன்னாக³தோ. க²ணே க²ணேதி ஓகாஸே ஓகாஸே குஸலம் கரோந்தோ. கம்மாரோ ரஜதஸ்ஸேவாதி யதா² ஸுவண்ணகாரோ ஏகவாரமேவ ஸுவண்ணம் தாபேத்வா கோட்டேத்வா மலம் நீஹரித்வா பிலந்த⁴னவிகதிம் காதும் ந ஸக்கோதி, புனப்புனம் தாபேந்தோ கோட்டேந்தோ பன மலம் நீஹரதி, ததோ அனேகவித⁴ம் பிலந்த⁴னவிகதிம் கரோதி, ஏவமேவ புனப்புனம் குஸலம் கரோந்தோ பண்டி³தோ அத்தனோ ராகா³தி³மலம் நித்³த⁴மேய்ய, ஏவம் நித்³த⁴ந்தமலோ நிக்கிலேஸோவ ஹோதீதி அத்தோ².

தே³ஸனாவஸானே ப்³ராஹ்மணோ ஸோதாபத்திப²லே பதிட்ட²தி, மஹாஜனஸ்ஸாபி ஸாத்தி²கா த⁴ம்மதே³ஸனா அஹோஸீதி.

அஞ்ஞதரப்³ராஹ்மணவத்து² து³தியம்.