3. விஸாகா²வத்து²

பேமதோ ஜாயதீதி இமம் த⁴ம்மதே³ஸனம் ஸத்தா² ஜேதவனே விஹரந்தோ விஸாக²ம் உபாஸிகம் ஆரப்³ப⁴ கதே²ஸி.

ஸா கிர புத்தஸ்ஸ தீ⁴தரம் ஸுத³த்தம் நாம குமாரிகம் அத்தனோ டா²னே ட²பேத்வா கே³ஹே பி⁴க்கு²ஸங்க⁴ஸ்ஸ வேய்யாவச்சம் காரேஸி. ஸா அபரேன ஸமயேன காலமகாஸி. ஸா தஸ்ஸா ஸரீரனிக்கே²பம் காரேத்வா ஸோகம் ஸந்தா⁴ரேதும் அஸக்கோந்தீ து³க்கி²னீ து³ம்மனா ஸத்து² ஸந்திகம் க³ந்த்வா வந்தி³த்வா ஏகமந்தம் நிஸீதி³. அத² நம் ஸத்தா² ‘‘கிம் நு கோ² த்வம், விஸாகே², து³க்கி²னீ து³ம்மனா அஸ்ஸுமுகா² ரோத³மானா நிஸின்னா’’தி ஆஹ. ஸா தமத்த²ம் ஆரோசேத்வா ‘‘பியா மே, ப⁴ந்தே, ஸா குமாரிகா வத்தஸம்பன்னா, இதா³னி ததா²ரூபம் ந பஸ்ஸாமீ’’தி ஆஹ. ‘‘கித்தகா பன, விஸாகே², ஸாவத்தி²யம் மனுஸ்ஸா’’தி? ‘‘ப⁴ந்தே, தும்ஹேஹியேவ மே கதி²தம் ஸத்த ஜனகோடியோ’’தி. ‘‘ஸசே பனாயம் ஏத்தகோ ஜனோ தவ நத்தாய ஸதி³ஸோ ப⁴வேய்ய, இச்சே²ய்யாஸி ந’’ந்தி? ‘‘ஆம, ப⁴ந்தே’’தி. ‘‘கதி பன ஜனா ஸாவத்தி²யம் தே³வஸிகம் காலம் கரோந்தீ’’தி? ‘‘ப³ஹூ, ப⁴ந்தே’’தி. ‘‘நனு ஏவம், ப⁴ந்தே, தவ அஸோசனகாலோ ந ப⁴வேய்ய, ரத்திந்தி³வம் ரோத³ந்தீயேவ விசரேய்யாஸீ’’தி. ‘‘ஹோது, ப⁴ந்தே, ஞாதம் மயா’’தி. அத² நம் ஸத்தா² ‘‘தேன ஹி மா ஸோசி, ஸோகோ வா ப⁴யம் வா பேமதோவ ஜாயதீ’’தி வத்வா இமம் கா³த²மாஹ –

213. ‘‘பேமதோ ஜாயதீ ஸோகோ, பேமதோ ஜாயதீ ப⁴யம்;

பேமதோ விப்பமுத்தஸ்ஸ, நத்தி² ஸோகோ குதோ ப⁴ய’’ந்தி.

தத்த² பேமதோதி புத்ததீ⁴தாதீ³ஸு கதம் பேமமேவ நிஸ்ஸாய ஸோகோ ஜாயதீதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

விஸாகா²வத்து² ததியம்.