1. ஞாஆதிகலஹவூபஸமனவத்து²

ஸுஸுக²ம் வதாதி இமம் த⁴ம்மதே³ஸனம் ஸத்தா² ஸக்கேஸு விஹரந்தோ கலஹவூபஸமனத்த²ம் ஞாதகே ஆரப்³ப⁴ கதே²ஸி.

ஸாகியகோலியா கிர கபிலவத்து²னக³ரஸ்ஸ ச கோலியனக³ரஸ்ஸ ச அந்தரே ரோஹிணிம் நாம நதி³ம் ஏகேனேவ ஆவரணேன ப³ந்தா⁴பேத்வா ஸஸ்ஸானி கரோந்தி. அத² ஜேட்ட²மூலமாஸே ஸஸ்ஸேஸு மிலாயந்தேஸு உப⁴யனக³ரவாஸிகானம்பி கம்மகாரா ஸன்னிபதிம்ஸு. தத்த² கோலியனக³ரவாஸினோ ஆஹம்ஸு – ‘‘இத³ம் உத³கம் உப⁴யதோ ஹரியமானம் நேவ தும்ஹாகம், ந அம்ஹாகம் பஹோஸ்ஸதி, அம்ஹாகம் பன ஸஸ்ஸம் ஏகஉத³கேனேவ நிப்ப²ஜ்ஜிஸ்ஸதி, இத³ம் உத³கம் அம்ஹாகம் தே³தா²’’தி. இதரேபி ஆஹம்ஸு – ‘‘தும்ஹேஸு கோட்ட²கே பூரேத்வா டி²தேஸு மயம் ரத்தஸுவண்ணனீலமணிகாளகஹாபணே ச க³ஹேத்வா பச்சி²பஸிப்³ப³காதி³ஹத்தா² ந ஸக்கி²ஸ்ஸாம தும்ஹாகம் க⁴ரத்³வாரே விசரிதும், அம்ஹாகம்பி ஸஸ்ஸம் ஏகஉத³கேனேவ நிப்ப²ஜ்ஜிஸ்ஸதி, இத³ம் உத³கம் அம்ஹாகம் தே³தா²’’தி. ந மயம் த³ஸ்ஸாமாதி. மயம்பி ந த³ஸ்ஸாமாதி ஏவம் கத²ம் வட்³டே⁴த்வா ஏகோ உட்டா²ய ஏகஸ்ஸ பஹாரம் அதா³ஸி, ஸோபி அஞ்ஞஸ்ஸாதி ஏவம் அஞ்ஞமஞ்ஞம் பஹரித்வா ராஜகுலானம் ஜாதிம் க⁴ட்டேத்வா கலஹம் வட்³ட⁴யிம்ஸு.

கோலியகம்மகாரா வத³ந்தி – ‘‘தும்ஹே கபிலவத்து²வாஸிகே க³ஹேத்வா க³ஜ்ஜத², யே ஸோணஸிங்கா³லாத³யோ விய அத்தனோ ப⁴கி³னீஹி ஸத்³தி⁴ம் ஸம்வஸிம்ஸு, ஏதேஸம் ஹத்தி²னோ சேவ அஸ்ஸா ச ப²லகாவுதா⁴னி ச அம்ஹாகம் கிம் கரிஸ்ஸந்தீ’’தி. ஸாகியகம்மகாராபி வத³ந்தி ‘‘தும்ஹே இதா³னி குட்டி²னோ தா³ரகே க³ஹேத்வா க³ஜ்ஜத², யே அனாதா² நிக்³க³திகா திரச்சா²னா விய கோலருக்கே² வஸிம்ஸு, ஏதேஸம் ஹத்தி²னோ ச அஸ்ஸா ச ப²லகாவுதா⁴னி ச அம்ஹாகம் கிம் கரிஸ்ஸந்தீ’’தி. தே க³ந்த்வா தஸ்மிம் கம்மே நியுத்தானம் அமச்சானம் கத²யிம்ஸு, அமச்சா ராஜகுலானம் கதே²ஸும். ததோ ஸாகியா ‘‘ப⁴கி³னீஹி ஸத்³தி⁴ம் ஸம்வஸிதகானம் தா²மஞ்ச ப³லஞ்ச த³ஸ்ஸேஸ்ஸாமா’’தி யுத்³த⁴ஸஜ்ஜா நிக்க²மிம்ஸு. கோலியாபி ‘‘கோலருக்க²வாஸீனம் தா²மஞ்ச ப³லஞ்ச த³ஸ்ஸேஸ்ஸாமா’’தி யுத்³த⁴ஸஜ்ஜா நிக்க²மிம்ஸு.

ஸத்தா²பி பச்சூஸஸமயே லோகம் வோலோகேந்தோ ஞாதகே தி³ஸ்வா ‘‘மயி அக³ச்ச²ந்தே இமே நஸ்ஸிஸ்ஸந்தி, மயா க³ந்தும் வட்டதீ’’தி சிந்தேத்வா ஏககோவ ஆகாஸேன க³ந்த்வா ரோஹிணினதி³யா மஜ்ஜே² ஆகாஸே பல்லங்கேன நிஸீதி³. ஞாதகா ஸத்தா²ரம் தி³ஸ்வா ஆவுதா⁴னி ச²ட்³டே³த்வா வந்தி³ம்ஸு. அத² நே ஸத்தா² ஆஹ – ‘‘கிம் கலஹோ நாமேஸ, மஹாராஜா’’தி? ‘‘ந ஜானாம, ப⁴ந்தே’’தி. ‘‘கோ தா³னி ஜானிஸ்ஸதீ’’தி? தே ‘‘உபராஜா ஜானிஸ்ஸதி, ஸேனாபதி ஜானிஸ்ஸதீ’’தி இமினா உபாயேன யாவ தா³ஸகம்மகரே புச்சி²த்வா, ‘‘ப⁴ந்தே, உத³ககலஹோ’’தி ஆஹம்ஸு. ‘‘உத³கம் கிம் அக்³க⁴தி, மஹாராஜா’’தி? ‘‘அப்பக்³க⁴ம், ப⁴ந்தே’’தி. ‘‘க²த்தியா கிம் அக்³க⁴ந்தி மஹாராஜா’’தி? ‘‘க²த்தியா நாம அனக்³கா⁴, ப⁴ந்தே’’தி. ‘‘அயுத்தம் தும்ஹாகம் அப்பமத்ததம் உத³கம் நிஸ்ஸாய அனக்³கே⁴ க²த்தியே நாஸேது’’ந்தி. தே துண்ஹீ அஹேஸும். அத² தே ஸத்தா² ஆமந்தேத்வா ‘‘கஸ்மா மஹாராஜா ஏவரூபம் கரோத², மயி அஸந்தே அஜ்ஜ லோஹிதனதீ³ பவத்திஸ்ஸதி, அயுத்தம் வோ கதம், தும்ஹே பஞ்சஹி வேரேஹி ஸவேரா விஹரத², அஹம் அவேரோ விஹராமி. தும்ஹே கிலேஸாதுரா ஹுத்வா விஹரத², அஹம் அனாதுரோ. தும்ஹே காமகு³ணபரியேஸனுஸ்ஸுக்கா ஹுத்வா விஹரத², அஹம் அனுஸ்ஸுக்கோ விஹராமீ’’தி வத்வா இமா கா³தா² அபா⁴ஸி –

197. ‘‘ஸுஸுக²ம் வத ஜீவாம, வேரினேஸு அவேரினோ,

வேரினேஸு மனுஸ்ஸேஸு, விஹராம அவேரினோ.

198. ‘‘ஸுஸுக²ம் வத ஜீவாம, ஆதுரேஸு அனாதுரா;

ஆதுரேஸு மனுஸ்ஸேஸு, விஹராம அனாதுரா.

199. ‘‘ஸுஸுக²ம் வத ஜீவாம, உஸ்ஸுகேஸு அனுஸ்ஸுகா;

உஸ்ஸுகேஸு மனுஸ்ஸேஸு, விஹராம அனுஸ்ஸுகா’’தி.

தத்த² ஸுஸுக²ந்தி ஸுட்டு² ஸுக²ம். இத³ம் வுத்தம் ஹோதி – யே கி³ஹினோ ஸந்தி⁴ச்சே²தா³தி³வஸேன, பப்³ப³ஜிதா வா பன வேஜ்ஜகம்மாதி³வஸேன ஜீவிதவுத்திம் உப்பாதே³த்வா ‘‘ஸுகே²ன ஜீவாமா’’தி வத³ந்தி, தேஹி மயமேவ ஸுஸுக²ம் வத ஜீவாம, யே மயம் பஞ்சஹி வேரீஹி வேரினேஸு மனுஸ்ஸேஸு அவேரினோ, கிலேஸாதுரேஸு மனுஸ்ஸேஸு நிக்கிலேஸதாய அனாதுரா, பஞ்சகாமகு³ணபரியேஸனே உஸ்ஸுகேஸு தாய பரியேஸனாய அபா⁴வேன அனுஸ்ஸுகாதி. ஸேஸம் உத்தானத்த²மேவ.

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

ஞாதிகலஹவூபஸமனவத்து² பட²மம்.