7. ஆனந்த³த்தே²ரபஞ்ஹவத்து²

து³ல்லபோ⁴தி இமம் த⁴ம்மதே³ஸனம் ஸத்தா² ஜேதவனே விஹரந்தோ ஆனந்த³த்தே²ரஸ்ஸ பஞ்ஹம் ஆரப்³ப⁴ கதே²ஸி.

தே²ரோ ஹி ஏகதி³வஸம் தி³வாட்டா²னே நிஸின்னோ சிந்தேஸி – ‘‘ஹத்தா²ஜானீயோ ச²த்³த³ந்தகுலே வா உபோஸத²குலே வா உப்பஜ்ஜதி, அஸ்ஸாஜானீயோ ஸிந்த⁴வகுலே வா வலாஹகஸ்ஸராஜகுலே வா, உஸபோ⁴ கோ³ஆஜனீயோ த³க்கி²ணபதே²திஆதீ³னி வத³ந்தேன ஸத்தா²ரா ஹத்தி²ஆஜானீயாதீ³னம் உப்பத்திட்டா²னாதீ³னி கதி²தானி, புரிஸாஜானீயோ பன கஹம் நு கோ² உப்பஜ்ஜதீ’’தி. ஸோ ஸத்தா²ரம் உபஸங்கமித்வா வந்தி³த்வா ஏகமந்தம் நிஸீதி³த்வா ஏதமத்த²ம் புச்சி². ஸத்தா², ‘‘ஆனந்த³, புரிஸாஜானீயோ நாம ஸப்³ப³த்த² நுப்பஜ்ஜதி, உஜுகதோ பன தியோஜனஸதாயாமே வித்தா²ரதோ அட்³ட⁴தேய்யஸதே ஆவட்டதோ நவயோஜனஸதப்பமாணே மஜ்ஜி²மபதே³ஸட்டா²னே உப்பஜ்ஜதி. உப்பஜ்ஜந்தோ ச பன ந யஸ்மிம் வா தஸ்மிம் வா குலே உப்பஜ்ஜதி, க²த்தியமஹாஸாலப்³ராஹ்மணமஹாஸாலகுலானம் பன அஞ்ஞதரஸ்மிம்யேவ உப்பஜ்ஜதீ’’தி வத்வா இமம் கா³த²மாஹ –

193. ‘‘து³ல்லபோ⁴ புரிஸாஜஞ்ஞோ, ந ஸோ ஸப்³ப³த்த² ஜாயதி;

யத்த² ஸோ ஜாயதீ தீ⁴ரோ, தம் குலம் ஸுக²மேத⁴தீ’’தி.

தத்த² து³ல்லபோ⁴தி புரிஸாஜஞ்ஞோ ஹி து³ல்லபோ⁴, ந ஹத்தி²ஆஜானீயாத³யோ விய ஸுலபோ⁴, ஸோ ஸப்³ப³த்த² பச்சந்ததே³ஸே வா நீசகுலே வா ந ஜாயதி, மஜ்ஜி²மதே³ஸேபி மஹாஜனஸ்ஸ அபி⁴வாத³னாதி³ஸக்காரகரணட்டா²னே க²த்தியப்³ராஹ்மணகுலானம் அஞ்ஞதரஸ்மிம் குலே ஜாயதி. ஏவம் ஜாயமானோ யத்த² ஸோ ஜாயதி தீ⁴ரோ உத்தமபஞ்ஞோ ஸம்மாஸம்பு³த்³தோ⁴, தம் குலம் ஸுக²மேத⁴தீதி ஸுக²ப்பத்தமேவ ஹோதீதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

ஆனந்த³த்தே²ரபஞ்ஹவத்து² ஸத்தமம்.