2. மஹாகஸ்ஸபத்தே²ரவத்து²

உய்யுஞ்ஜந்தீதி இமம் த⁴ம்மதே³ஸனம் ஸத்தா² வேளுவனே விஹரந்தோ மஹாகஸ்ஸபத்தே²ரம் ஆரப்³ப⁴ கதே²ஸி.

ஏகஸ்மிஞ்ஹி ஸமயே ஸத்தா² ராஜக³ஹே வுட்ட²வஸ்ஸோ ‘‘அத்³த⁴மாஸச்சயேன சாரிகம் பக்கமிஸ்ஸாமீ’’தி பி⁴க்கூ²னம் ஆரோசாபேஸி. வத்தம் கிரேதம் பு³த்³தா⁴னம் பி⁴க்கூ²ஹி ஸத்³தி⁴ம் சாரிகம் சரிதுகாமானம் ‘‘ஏவம் பி⁴க்கூ² அத்தனோ பத்தபசனசீவரரஜனாதீ³னி கத்வா ஸுக²ம் க³மிஸ்ஸந்தீ’’தி ‘‘இதா³னி அத்³த⁴மாஸச்சயேன சாரிகம் பக்கமிஸ்ஸாமீ’’தி பி⁴க்கூ²னம் ஆரோசாபனம். பி⁴க்கூ²ஸு பன அத்தனோ பத்தசீவராதீ³னி கரோந்தேஸு மஹாகஸ்ஸபத்தே²ரோபி சீவரானி தோ⁴வி. பி⁴க்கூ² உஜ்ஜா²யிம்ஸு ‘‘தே²ரோ கஸ்மா சீவரானி தோ⁴வதி, இமஸ்மிம் நக³ரே அந்தோ ச ப³ஹி ச அட்டா²ரஸ மனுஸ்ஸகோடியோ வஸந்தி. தத்த² யே தே²ரஸ்ஸ ந ஞாதகா, தே உபட்டா²கா, யே ந உபட்டா²கா, தே ஞாதகா. தே தே²ரஸ்ஸ சதூஹி பச்சயேஹி ஸம்மானஸக்காரம் கரோந்தி. ஏத்தகம் உபகாரம் பஹாய ஏஸ கஹம் க³மிஸ்ஸதி? ஸசேபி க³ச்சே²ய்ய, மாபமாத³கந்த³ரதோ பரம் ந க³மிஸ்ஸதீ’’தி. ஸத்தா² கிர யம் கந்த³ரம் பத்வா நிவத்தேதப்³ப³யுத்தகே பி⁴க்கூ² ‘‘தும்ஹே இதோ நிவத்தத², மா பமஜ்ஜித்தா²’’தி வத³தி. தம் ‘‘மாபமாத³கந்த³ர’’ந்தி வுச்சதி, தம் ஸந்தா⁴யேதம் வுத்தம்.

ஸத்தா²பி சாரிகம் பக்கமந்தோ சிந்தேஸி – ‘‘இமஸ்மிம் நக³ரே அந்தோ ச ப³ஹி ச அட்டா²ரஸ மனுஸ்ஸகோடியோ வஸந்தி. மனுஸ்ஸானம் மங்க³லாமங்க³லட்டா²னேஸு பி⁴க்கூ²ஹி க³ந்தப்³ப³ம் ஹோதி, ந ஸக்கா விஹாரம் துச்ச²ம் காதும், கம் நு கோ² நிவத்தேஸ்ஸாமீ’’தி? அத²ஸ்ஸ ஏதத³ஹோஸி –‘‘கஸ்ஸபஸ்ஸ ஹேதே மனுஸ்ஸா ஞாதகா ச உபட்டா²கா ச, கஸ்ஸபம் நிவத்தேதும் வட்டதீ’’தி. ஸோ தே²ரம் ஆஹ – ‘‘கஸ்ஸப, ந ஸக்கா விஹாரம் துச்ச²ம் காதும், மனுஸ்ஸானம் மங்க³லாமங்க³லட்டா²னேஸு பி⁴க்கூ²ஹி அத்தோ² ஹோதி, த்வம் அத்தனோ பரிஸாய ஸத்³தி⁴ம் நிவத்தஸ்ஸூ’’தி. ‘‘ஸாது⁴, ப⁴ந்தே’’தி தே²ரோ பரிஸம் ஆதா³ய நிவத்தி. பி⁴க்கூ² உபஜ்ஜா²யிம்ஸு ‘‘தி³ட்ட²ம் வோ, ஆவுஸோ, நனு இதா³னேவ அம்ஹேஹி வுத்தம் ‘மஹாகஸ்ஸபோ கஸ்மா சீவரானி தோ⁴வதி, ந ஏஸோ ஸத்தா²ரா ஸத்³தி⁴ம் க³மிஸ்ஸதீ’தி, யம் அம்ஹேஹி வுத்தம், ததே³வ ஜாத’’ந்தி. ஸத்தா² பி⁴க்கூ²னம் கத²ம் ஸுத்வா நிவத்தித்வா டி²தோ ஆஹ – ‘‘பி⁴க்க²வே, கிம் நாமேதம் கதே²தா²’’தி? ‘‘மஹாகஸ்ஸபத்தே²ரம் ஆரப்³ப⁴ கதே²ம, ப⁴ந்தே’’தி அத்தனா கதி²தனியாமேனேவ ஸப்³ப³ம் ஆரோசேஸும். தம் ஸுத்வா ஸத்தா² ‘‘ந, பி⁴க்க²வே, தும்ஹே கஸ்ஸபம் ‘குலேஸு ச பச்சயேஸு ச லக்³கோ³’தி வதே³த², ஸோ ‘மம வசனம் கரிஸ்ஸாமீ’தி நிவத்தோ. ஏஸோ ஹி புப்³பே³ பத்த²னம் கரோந்தோயேவ ‘சதூஸு பச்சயேஸு அலக்³கோ³ சந்தூ³பமோ ஹுத்வா குலானி உபஸங்கமிதும் ஸமத்தோ² ப⁴வேய்ய’ந்தி பத்த²னம் அகாஸி. நத்தே²தஸ்ஸ குலே வா பச்சயே வா லக்³கோ³, அஹம் சந்தோ³பமப்படிபத³ஞ்சேவ (ஸம். நி. 2.146) அரியவம்ஸப்படிபத³ஞ்ச கதே²ந்தோ மம புத்தம் கஸ்ஸபம் ஆதி³ம் கத்வா கதே²ஸி’’ந்தி ஆஹ.

பி⁴க்கூ² ஸத்தா²ரம் புச்சி²ம்ஸு – ‘‘ப⁴ந்தே, கதா³ பன தே²ரேன பத்த²னா ட²பிதா’’தி? ‘‘ஸோதுகாமாத்த², பி⁴க்க²வே’’தி? ‘‘ஆம, ப⁴ந்தே’’தி. ஸத்தா² தேஸம், ‘‘பி⁴க்க²வே, இதோ கப்பஸதஸஹஸ்ஸமத்த²கே பது³முத்தரோ நாம பு³த்³தோ⁴ லோகே உத³பாதீ³’’தி வத்வா பது³முத்தரபாத³மூலே தேன ட²பிதபத்த²னம் ஆதி³ம் கத்வா ஸப்³ப³ம் தே²ரஸ்ஸ புப்³ப³சரிதம் கதே²ஸி. தம் தே²ரபாளியம் (தே²ரகா³. 1054 ஆத³யோ) வித்தா²ரிதமேவ. ஸத்தா² பன இமம் தே²ரஸ்ஸ புப்³ப³சரிதம் வித்தா²ரேத்வா ‘‘இதி கோ², பி⁴க்க²வே, அஹம் சந்தோ³பமப்படிபத³ஞ்சேவ அரியவம்ஸப்படிபத³ஞ்ச மம புத்தம் கஸ்ஸபம் ஆதி³ம் கத்வா கதே²ஸிம், மம புத்தஸ்ஸ கஸ்ஸபஸ்ஸ பச்சயேஸு வா குலேஸு வா விஹாரேஸு வா பரிவேணேஸு வா லக்³கோ³ நாம நத்தி², பல்லலே ஓதரித்வா தத்த² சரித்வா க³ச்ச²ந்தோ ராஜஹம்ஸோ விய கத்த²சி அலக்³கோ³யேவ மம புத்தோ’’தி அனுஸந்தி⁴ம் க⁴டேத்வா த⁴ம்மம் தே³ஸேந்தோ இமம் கா³த²மாஹ –

91. ‘‘உய்யுஞ்ஜந்தி ஸதீமந்தோ, ந நிகேதே ரமந்தி தே;

ஹம்ஸாவ பல்லலம் ஹித்வா, ஓகமோகம் ஜஹந்தி தே’’தி.

தத்த² உய்யுஞ்ஜந்தி ஸதீமந்தோதி ஸதிவேபுல்லப்பத்தா கீ²ணாஸவா அத்தனா படிவித்³த⁴கு³ணேஸு ஜா²னவிபஸ்ஸனாதீ³ஸு ஆவஜ்ஜனஸமாபஜ்ஜனவுட்டா²னாதி⁴ட்டா²னபச்சவேக்க²ணாஹி யுஞ்ஜந்தி க⁴டேந்தி. ந நிகேதே ரமந்தி தேதி தேஸம் ஆலயே ரதி நாம நத்தி². ஹம்ஸாவாதி தே³ஸனாஸீஸமேதம், அயம் பனேத்த² அத்தோ² – யதா² கோ³சரஸம்பன்னே பல்லலே ஸகுணா அத்தனோ கோ³சரம் க³ஹேத்வா க³மனகாலே ‘‘மம உத³கம், மம பது³மம், மம உப்பலம், மம கண்ணிகா’’தி தஸ்மிம் டா²னே கஞ்சி ஆலயம் அகத்வா அனபேக்கா²வ தம் டா²னம் பஹாய உப்பதித்வா ஆகாஸே கீளமானா க³ச்ச²ந்தி; ஏவமேவம் கீ²ணாஸவா யத்த² கத்த²சி விஹரந்தாபி குலாதீ³ஸு அலக்³கா³ ஏவ விஹரித்வா க³மனஸமயேபி தம் டா²னம் பஹாய க³ச்ச²ந்தா ‘‘மம விஹாரோ, மம பரிவேணம், மமூபட்டா²கா’’தி அனாலயா அனுபேக்கா²வ க³ச்ச²ந்தி. ஓகமோகந்தி ஆலயாலயம், ஸப்³பா³லயே பரிச்சஜந்தீதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

மஹாகஸ்ஸபத்தே²ரவத்து² து³தியம்.