9. ஸுமனமாலாகாரவத்து²

தஞ்ச கம்மம் கதம் ஸாதூ⁴தி இமம் த⁴ம்மதே³ஸனம் ஸத்தா² வேளுவனே விஹரந்தோ ஸுமனம் நாம மாலாகாரம் ஆரப்³ப⁴ கதே²ஸி.

ஸோ கிர தே³வஸிகம் பி³ம்பி³ஸாரராஜானம் பாதோவ அட்ட²ஹி ஸுமனபுப்ப²னாளீஹி உபட்ட²ஹந்தோ அட்ட² கஹாபணே லப⁴தி. அதே²கதி³வஸம் தஸ்மிம் புப்பா²னி க³ஹேத்வா நக³ரம் பவிட்ட²மத்தே ப⁴க³வா மஹாபி⁴க்கு²ஸங்க⁴பரிவுதோ ச²ப்³ப³ண்ணரம்ஸியோ விஸ்ஸஜ்ஜேத்வா மஹதா பு³த்³தா⁴னுபா⁴வேன மஹதியா பு³த்³த⁴லீளாய நக³ரம் பிண்டா³ய பாவிஸி. ப⁴க³வா ஹி ஏகதா³ ச²ப்³ப³ண்ணரம்ஸியோ சீவரேன படிச்சா²தே³த்வா அஞ்ஞதரோ பிண்ட³பாதிகோ விய சரதி திம்ஸயோஜனமக்³க³ம் அங்கு³லிமாலஸ்ஸ பச்சுக்³க³மனம் க³ச்ச²ந்தோ விய, ஏகதா³ ச²ப்³ப³ண்ணரம்ஸியோ விஸ்ஸஜ்ஜேத்வா கபிலவத்து²ப்பவேஸனாதீ³ஸு விய. தஸ்மிம்பி தி³வஸே ஸரீரதோ ச²ப்³ப³ண்ணரம்ஸியோ விஸ்ஸஜ்ஜேந்தோ மஹந்தேன பு³த்³தா⁴னுபா⁴வேன மஹதியா பு³த்³த⁴லீளாய ராஜக³ஹம் பாவிஸி. மாலாகாரோ ப⁴க³வதோ ரதனக்³கி⁴யஸதி³ஸம் அத்தபா⁴வம் தி³ஸ்வா த்³வத்திம்ஸமஹாபுரிஸலக்க²ணஅஸீதானுப்³யஞ்ஜனஸரீரஸோப⁴க்³க³ம் ஓலோகேத்வா பஸன்னசித்தோ ‘‘கிம் நு கோ² ஸத்து² அதி⁴காரம் கரோமீ’’தி சிந்தேத்வா அஞ்ஞம் அபஸ்ஸந்தோ ‘‘இமேஹி புப்பே²ஹி ப⁴க³வந்தம் பூஜேஸ்ஸாமீ’’தி சிந்தேத்வா புன சிந்தேஸி – ‘‘இமானி ரஞ்ஞோ நிப³த்³த⁴ம் உபட்டா²னபுப்பா²னி, ராஜா இமானி அலப⁴ந்தோ மம் ப³ந்தா⁴பேய்ய வா கா⁴தாபேய்ய வா ரட்ட²தோ வா பப்³பா³ஜேய்ய, கிம் நு கோ² கரோமீ’’தி? அத²ஸ்ஸ ஏதத³ஹோஸி ‘‘ராஜா மம் கா⁴தேது வா ப³ந்தா⁴பேது வா ரட்ட²தோ பப்³பா³ஜேது வா, ஸோ ஹி மய்ஹம் த³த³மானோபி இமஸ்மிம் அத்தபா⁴வே ஜீவிதமத்தம் த⁴னம் த³தே³ய்ய, ஸத்து²பூஜா பன மே அனேகாஸு கப்பகோடீஸு அலம் ஹிதாய சேவ ஸுகா²ய சா’’தி அத்தனோ ஜீவிதம் ததா²க³தஸ்ஸ பரிச்சஜி.

ஸோ ‘‘யாவ மே பஸன்னம் சித்தம் ந பதிகுடதி, தம் தாவதே³வ பூஜம் கரிஸ்ஸாமீ’’தி ஹட்ட²துட்டோ² உத³க்³கு³த³க்³கோ³ ஸத்தா²ரம் பூஜேஸி. கத²ம்? பட²மம் தாவ த்³வேவ புப்ப²முட்டி²யோ ததா²க³தஸ்ஸ உபரி கி²பி, தா உபரிமத்த²கே விதானம் ஹுத்வா அட்ட²ம்ஸு. அபரா த்³வே முட்டி²யோ கி²பி, தா த³க்கி²ணஹத்த²பஸ்ஸேன மாலாபடச்ச²ன்னேன ஓதரித்வா அட்ட²ம்ஸு. அபரா த்³வே முட்டி²யோ கி²பி, தா பிட்டி²பஸ்ஸேன ஓதரித்வா ததே²வ அட்ட²ம்ஸு. அபரா த்³வே முட்டி²யோ கி²பி, தா வாமஹத்த²பஸ்ஸேன ஓதரித்வா ததே²வ அட்ட²ம்ஸு. ஏவம் அட்ட² நாளியோ அட்ட² முட்டி²யோ ஹுத்வா சதூஸு டா²னேஸு ததா²க³தம் பரிக்கி²பிம்ஸு. புரதோ க³மனத்³வாரமத்தமேவ அஹோஸி. புப்பா²னம் வண்டானி அந்தோ அஹேஸும், பத்தானி ப³ஹிமுகா²னி. ப⁴க³வா ரஜதபத்தபரிக்கி²த்தோ விய ஹுத்வா பாயாஸி. புப்பா²னி அசித்தகானிபி ஸசித்தகம் நிஸ்ஸாய ஸசித்தகானி விய அபி⁴ஜ்ஜித்வா அபதித்வா ஸத்தா²ரா ஸத்³தி⁴ம்யேவ க³ச்ச²ந்தி, டி²தடி²தட்டா²னே திட்ட²ந்தி. ஸத்து² ஸரீரதோ ஸதஸஹஸ்ஸவிஜ்ஜுலதா விய ரம்ஸியோ நிக்க²மிம்ஸு. புரதோ ச பச்ச²தோ ச த³க்கி²ணதோ ச வாமதோ ச ஸீஸமத்த²கதோ ச நிரந்தரம் நிக்க²ந்தரம்ஸீஸு ஏகாபி ஸம்முக²ஸம்முக²ட்டா²னேனேவ அபலாயித்வா ஸப்³பா³பி ஸத்தா²ரம் திக்க²த்தும் பத³க்கி²ணம் கத்வா தருணதாலக்க²ந்த⁴ப்பமாணா ஹுத்வா புரதோ ஏவ தா⁴வந்தி. ஸகலனக³ரம் ஸங்கு²பி⁴. அந்தோனக³ரே நவ கோடியோ, ப³ஹினக³ரே நவ கோடியோதி அட்டா²ரஸஸு கோடீஸு ஏகோபி புரிஸோ வா இத்தீ² வா பி⁴க்க²ம் க³ஹேத்வா அனிக்க²ந்தோ நாம நத்தி². மஹாஜனோ ஸீஹனாத³ம் நத³ந்தோ சேலுக்கே²பஸஹஸ்ஸானி கரோந்தோ ஸத்து² புரதோவ க³ச்ச²தி. ஸத்தா²பி மாலாகாரஸ்ஸ கு³ணம் பாகடம் காதும் திகா³வுதப்பமாணே நக³ரே பே⁴ரிசரணமக்³கே³னேவ அசரி. மாலாகாரஸ்ஸ ஸகலஸரீரம் பஞ்சவண்ணாய பீதியா பரிபூரி.

ஸோ தோ²கஞ்ஞேவ ததா²க³தேன ஸத்³தி⁴ம் சரித்வா மனோஸிலாரஸே நிமுக்³கோ³ விய பு³த்³த⁴ரஸ்மீனம் அந்தோ பவிட்டோ² ஸத்தா²ரம் தோ²மேத்வா வந்தி³த்வா துச்ச²பச்சி²மேவ க³ஹேத்வா கே³ஹம் அக³மாஸி. அத² நம் ப⁴ரியா புச்சி² ‘‘கஹம் புப்பா²னீ’’தி? ‘‘ஸத்தா² மே பூஜிதோ’’தி. ‘‘ரஞ்ஞோ தா³னி கிம் கரிஸ்ஸஸீ’’தி? ‘‘ராஜா மம் கா⁴தேது வா ரட்ட²தோ வா நீஹரது, அஹம் ஜீவிதம் பரிச்சஜித்வா ஸத்தா²ரம் பூஜேஸிம், ஸப்³ப³புப்பா²னி அட்ட² முட்டி²யோவ அஹேஸும், ஏவரூபா நாம பூஜா ஜாதா. மஹாஜனோ உக்குட்டி²ஸஹஸ்ஸானி கரோந்தோ ஸத்தா²ரா ஸத்³தி⁴ம் சரதி, யோ ஏஸ மஹாஜனஸ்ஸ உக்குட்டி²ஸத்³தோ³, தஸ்மிம் டா²னே ஏஸோ’’தி. அத²ஸ்ஸ ப⁴ரியா அந்த⁴பா³லதாய ஏவரூபே பாடிஹாரியே பஸாத³ம் நாம அஜனேத்வா தம் அக்கோஸித்வா பரிபா⁴ஸித்வா ‘‘ராஜானோ நாம சண்டா³, ஸகிம் குத்³தா⁴ ஹத்த²பாதா³தி³ச்சே²த³னேன ப³ஹும்பி அனத்த²ம் கரோந்தி, தயா கதகம்மேன மய்ஹம்பி அனத்தோ² ஸியா’’தி புத்தே ஆதா³ய ராஜகுலம் க³ந்த்வா ரஞ்ஞா பக்கோஸித்வா ‘‘கிம் ஏத’’ந்தி புச்சி²தா ஆஹ – ‘‘மம ஸாமிகோ தும்ஹாகம் உபட்டா²னபுப்பே²ஹி ஸத்தா²ரம் பூஜேத்வா துச்ச²ஹத்தோ² க⁴ரம் ஆக³ந்த்வா ‘கஹம் புப்பா²னீ’தி மயா புட்டோ² இத³ம் நாம வதே³ஸி, அஹம் தம் பரிபா⁴ஸித்வா ‘ராஜானோ நாம சண்டா³, ஸகிம் குத்³தா⁴ ஹத்த²பாதா³தி³ச்சே²த³னேன ப³ஹும்பி அனத்த²ம் கரோந்தி, தயா கதகம்மேன மய்ஹம்பி அனத்தோ² ஸியா’தி தம் ச²ட்³டே³த்வா இதா⁴க³தா, தேன கதம் கம்மம் ஸுகதம் வா ஹோது, து³க்கடம் வா, தஸ்ஸேவேதம், மயா தஸ்ஸ ச²ட்³டி³தபா⁴வம் ஜானாஹி, தே³வா’’தி. ராஜா பட²மத³ஸ்ஸனேனேவ ஸோதாபத்திப²லம் பத்தோ ஸத்³தோ⁴ பஸன்னோ அரியஸாவகோ சிந்தேஸி – ‘‘அஹோ அயம் இத்தீ² அந்த⁴பா³லா, ஏவரூபே கு³ணே பஸாத³ம் ந உப்பாதே³ஸீ’’தி. ஸோ குத்³தோ⁴ விய ஹுத்வா, ‘‘அம்ம, கிம் வதே³ஸி, மய்ஹம் உபட்டா²னபுப்பே²ஹி தேன பூஜா கதா’’தி? ‘‘ஆம, தே³வா’’தி. ‘‘ப⁴த்³த³கம் தே கதம் தம் ச²ட்³டே³ந்தியா, மம புப்பே²ஹி பூஜாகாரஸ்ஸ அஹம் கத்தப்³ப³யுத்தகம் ஜானிஸ்ஸாமீ’’தி தம் உய்யோஜேத்வா வேகே³ன ஸத்து² ஸந்திகம் க³ந்த்வா வந்தி³த்வா ஸத்தா²ரா ஸத்³தி⁴ம்யேவ விசரி.

ஸத்தா² ரஞ்ஞோ சித்தப்பஸாத³ம் ஞத்வா பே⁴ரிசரணவீதி²யா நக³ரம் சரித்வா ரஞ்ஞோ க⁴ரத்³வாரம் அக³மாஸி. ராஜா பத்தம் க³ஹேத்வா ஸத்தா²ரம் கே³ஹம் பவேஸேதுகாமோ அஹோஸி. ஸத்தா² பன ராஜங்க³ணேயேவ நிஸீத³னாகாரம் த³ஸ்ஸேஸி. ராஜா தம் ஞத்வா ‘‘ஸீக⁴ம் மண்ட³பம் கரோதா²’’தி தங்க²ணஞ்ஞேவ மண்ட³பம் காராபேஸி. நிஸீதி³ ஸத்தா² ஸத்³தி⁴ம் பி⁴க்கு²ஸங்கே⁴ன. கஸ்மா பன ஸத்தா² ராஜகே³ஹம் ந பாவிஸி?

ஏவம் கிரஸ்ஸ அஹோஸி – ‘‘ஸசாஹம் அந்தோ பவிஸித்வா நிஸீதே³ய்யம், மஹாஜனோ மம் த³ட்டு²ம் ந லபே⁴ய்ய, மாலாகாரஸ்ஸ கு³ணோ பாகடோ ந ப⁴வேய்ய, ராஜங்க³ணே பன மம் நிஸின்னம் மஹாஜனோ த³ட்டு²ம் லபி⁴ஸ்ஸதி, மாலாகாரஸ்ஸ கு³ணோ பாகடோ ப⁴விஸ்ஸதீ’’தி. கு³ணவந்தானஞ்ஹி கு³ணம் பு³த்³தா⁴ ஏவ பாகடம் காதும் ஸக்கோந்தி, அவஸேஸஜனோ கு³ணவந்தானம் கு³ணம் கதே²ந்தோ மச்ச²ராயதி. சத்தாரோ புப்ப²படா சதுத்³தி³ஸம் அட்ட²ம்ஸு. மஹாஜனோ ஸத்தா²ரம் பரிவாரேஸி. ராஜா பு³த்³த⁴ப்பமுக²ம் பி⁴க்கு²ஸங்க⁴ம் பணீதேனாஹாரேன பரிவிஸி. ஸத்தா² ப⁴த்தகிச்சாவஸானே அனுமோத³னம் கத்வா புரிமனயேனேவ சதூஹி புப்ப²படேஹி பரிக்கி²த்தோ ஸீஹனாத³ம் நத³ந்தோ மஹாஜனேன பரிவுதோ விஹாரம் அக³மாஸி. ராஜா ஸத்தா²ரம் அனுக³ந்த்வா நிவத்தோ மாலாகாரம் பக்கோஸாபேத்வா ‘‘மம ஆஹரிதபுப்பே²ஹி கிந்தி கத்வா ஸத்தா²ரம் பூஜேஸீ’’தி புச்சி². மாலாகாரோ ‘‘ராஜா மம் கா⁴தேது வா ரட்ட²தோ வா பப்³பா³ஜேதூதி ஜீவிதம் பரிச்சஜித்வா பூஜேஸிம் தே³வா’’தி ஆஹ. ராஜா ‘‘த்வம் மஹாபுரிஸோ நாமா’’தி வத்வா அட்ட² ஹத்தீ² ச அஸ்ஸே ச தா³ஸே ச தா³ஸியோ ச மஹாபஸாத⁴னானி ச அட்ட² கஹாபணஸஹஸ்ஸானி ச ராஜகுலதோ நீஹரித்வா ஸப்³பா³லங்காரப்படிமண்டி³தா அட்ட² நாரியோ ச அட்ட² கா³மவரே சாதி இத³ம் ஸப்³ப³ட்ட²கம் நாம தா³னம் அதா³ஸி.

ஆனந்த³த்தே²ரோ சிந்தேஸி – ‘‘அஜ்ஜ பாதோவ பட்டா²ய ஸீஹனாத³ஸஹஸ்ஸானி சேவ சேலுக்கே²பஸஹஸ்ஸானி ச பவத்தந்தி, கோ நு கோ² மாலாகாரஸ்ஸ விபாகோ’’தி? ஸோ ஸத்தா²ரம் புச்சி². அத² நம் ஸத்தா² ஆஹ – ‘‘ஆனந்த³, இமினா மாலாகாரேன அப்பமத்தகம் கம்மம் கத’’ந்தி மா ஸல்லக்கே²ஸி, அயஞ்ஹி மய்ஹம் ஜீவிதம் பரிச்சஜித்வா பூஜம் அகாஸி. ஸோ ஏவம் மயி சித்தம் பஸாதே³த்வா –

‘‘கப்பானம் ஸதஸஹஸ்ஸம், து³க்³க³திம் ந க³மிஸ்ஸதி;

ட²த்வா தே³வமனுஸ்ஸேஸு, ப²லம் ஏதஸ்ஸ கம்முனோ;

பச்சா² பச்சேகஸம்பு³த்³தோ⁴, ஸுமனோ நாம ப⁴விஸ்ஸதீ’’தி. –

ஆஹ. ஸத்து² பன விஹாரம் க³ந்த்வா க³ந்த⁴குடிபவிஸனகாலே தானி புப்பா²னி த்³வாரகோட்ட²கே பதிம்ஸு. ஸாயன்ஹஸமயே பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் – ‘‘அஹோ அச்ச²ரியம் மாலாகாரஸ்ஸ கம்மம், த⁴ரமானகபு³த்³த⁴ஸ்ஸ ஜீவிதம் பரிச்சஜித்வா புப்ப²பூஜம் கத்வா தங்க²ணஞ்ஞேவ ஸப்³ப³ட்ட²கம் நாம லப⁴தீ’’தி. ஸத்தா² க³ந்த⁴குடிதோ நிக்க²மித்வா திண்ணம் க³மனானம் அஞ்ஞதரேன க³மனேன த⁴ம்மஸப⁴ம் க³ந்த்வா பு³த்³தா⁴ஸனே நிஸீதி³த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே, ‘‘ஆம, பி⁴க்க²வே, யஸ்ஸ கம்மஸ்ஸ கதத்தா பச்சா²னுதப்பம் ந ஹோதி, அனுஸ்ஸரிதானுஸ்ஸரிதக்க²ணே ஸோமனஸ்ஸமேவ உப்பஜ்ஜதி, ஏவரூபம் கம்மம் கத்தப்³ப³மேவா’’தி அனுஸந்தி⁴ம் க⁴டேத்வா த⁴ம்மம் தே³ஸேந்தோ இமம் கா³த²மாஹ –

68. ‘‘தஞ்ச கம்மம் கதம் ஸாது⁴, யம் கத்வா நானுதப்பதி;

யஸ்ஸ பதீதோ ஸுமனோ, விபாகம் படிஸேவதீ’’தி.

தத்த² யம் கத்வாதி யம் தே³வமனுஸ்ஸஸம்பத்தீனஞ்சேவ நிப்³பா³னஸம்பத்தியா ச நிப்³ப³த்தனஸமத்த²ம் ஸுகு²த்³ரயம் கம்மம் கத்வா நானுதப்பதி, அத² கோ² தி³ட்ட²த⁴ம்மேயேவ அனுஸ்ஸரிதானுஸ்ஸரிதக்க²ணேயேவ பீதிவேகே³ன பதீதோ ஸோமனஸ்ஸவேகே³ன ச ஸுமனோ ஹுத்வா ஆயதிம் பீதிஸோமனஸ்ஸஜாதோ ஹுத்வா விபாகம் படிஸேவதி, தம் கம்மம் கதம் ஸாது⁴ ப⁴த்³த³கந்தி.

தே³ஸனாவஸானே சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸீதி.

ஸுமனமாலாகாரவத்து² நவமம்.