3. ஆனந்த³ஸேட்டி²வத்து²

புத்தா மத்தீ²தி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ ஆனந்த³ஸேட்டி²ம் ஆரப்³ப⁴ கதே²ஸி.

ஸாவத்தி²யம் கிர ஆனந்த³ஸேட்டி² நாம சத்தாலீஸகோடிவிப⁴வோ மஹாமச்ச²ரீ அஹோஸி. ஸோ அன்வட்³ட⁴மாஸம் ஞாதகே ஸன்னிபாதேத்வா புத்தம் மூலஸிரிம் நாம தீஸு வேலாஸு ஏவம் ஓவத³தி – ‘‘இத³ம் சத்தாலீஸகோடித⁴னம் ‘ப³ஹூ’’’தி மா ஸஞ்ஞம் கரி, விஜ்ஜமானம் த⁴னம் ந தா³தப்³ப³ம், நவம் த⁴னம் உப்பாதே³தப்³ப³ம். ஏகேகம்பி ஹி கஹாபணம் வயம் கரோந்தஸ்ஸ பன கீ²யதேவ. தஸ்மா –

‘‘அஞ்ஜனானம் க²யம் தி³ஸ்வா, உபசிகானஞ்ச ஆசயம்;

மதூ⁴னஞ்ச ஸமாஹாரம், பண்டி³தோ க⁴ரமாவஸே’’தி.

ஸோ அபரேன ஸமயேன அத்தனோ பஞ்ச மஹானிதி⁴யோ புத்தஸ்ஸ அனாசிக்கி²த்வா த⁴னனிஸ்ஸிதோ மச்சே²ரமலமலினோ காலம் கத்வா தஸ்ஸேவ நக³ரஸ்ஸ ஏகஸ்மிம் த்³வாரகா³மகே சண்டா³லானம் குலஸஹஸ்ஸம் படிவஸதி. தத்தே²கிஸ்ஸா சண்டா³லியா குச்சி²ஸ்மிம் படிஸந்தி⁴ம் க³ண்ஹி. ராஜா தஸ்ஸ காலகிரியம் ஸுத்வா புத்தமஸ்ஸ மூலஸிரிம் பக்கோஸாபேத்வா ஸேட்டி²ட்டா²னே ட²பேஸி. தம்பி சண்டா³லகுலஸஹஸ்ஸம் ஏகதோவ ப⁴தியா கம்மம் கத்வா ஜீவமானம் தஸ்ஸ படிஸந்தி⁴க்³க³ஹணதோ பட்டா²ய நேவ ப⁴திம் லப⁴தி, ந யாபனமத்ததோ பரம் ப⁴த்தபிண்ட³ம்பி. தே ‘‘மயம் ஏதரஹி கம்மம் கரோந்தாபி பிண்ட³ப⁴த்தம்பி ந லபா⁴ம, அம்ஹாகம் அந்தரே காளகண்ணியா ப⁴விதப்³ப³’’ந்தி த்³வே கோட்டா²ஸா ஹுத்வா யாவ தஸ்ஸ மாதாபிதரோ விஸும் ஹோந்தி, தாவ விப⁴ஜித்வா ‘‘இமஸ்மிம் குலே காளகண்ணீ உப்பன்னா’’தி தஸ்ஸ மாதரம் நீஹரிம்ஸு.

ஸாபி யாவஸ்ஸா ஸோ குச்சி²க³தோ, தாவ யாபனமத்தம்பி கிச்சே²ன லபி⁴த்வா புத்தம் விஜாயி. தஸ்ஸ ஹத்தா² ச பாதா³ ச அக்கீ²னி ச கண்ணா ச நாஸா ச முக²ஞ்ச யதா²டா²னே ந அஹேஸும். ஸோ ஏவரூபேன அங்க³வேகல்லேன ஸமன்னாக³தோ பம்ஸுபிஸாசகோ விய அதிவிரூபோ அஹோஸி. ஏவம் ஸந்தேபி தம் மாதா ந பரிச்சஜி. குச்சி²யம் வஸிதபுத்தஸ்மிஞ்ஹி ஸினேஹோ ப³லவா ஹோதி. ஸா தம் கிச்சே²ன போஸயமானா தம் ஆதா³ய க³ததி³வஸே கிஞ்சி அலபி⁴த்வா கே³ஹே கத்வா ஸயமேவ க³ததி³வஸே ப⁴திம் லப⁴தி. அத² நம் பிண்டா³ய சரித்வா ஜீவிதும் ஸமத்த²காலே ஸா கபாலகம் ஹத்தே² ட²பேத்வா, ‘‘தாத, மயம் தம் நிஸ்ஸாய மஹாது³க்க²ம் பத்தா, இதா³னி ந ஸக்கோமி தம் போஸேதும், இமஸ்மிம் நக³ரே கபணத்³தி⁴காதீ³னம் படியத்தப⁴த்தானி அத்தி², தத்த² பி⁴க்கா²ய சரித்வா ஜீவாஹீ’’தி தம் விஸ்ஸஜ்ஜேஸி. ஸோ க⁴ரபடிபாடியா சரந்தோ ஆனந்த³ஸேட்டி²காலே நிவுத்தட்டா²னம் க³ந்த்வா ஜாதிஸ்ஸரோ ஹுத்வா அத்தனோ கே³ஹம் பாவிஸி. தீஸு பன த்³வாரகோட்ட²கேஸு ந கோசி ஸல்லக்கே²ஸி. சதுத்தே² த்³வாரகோட்ட²கே மூலஸிரிஸேட்டி²னோ புத்தகா தி³ஸ்வா உப்³பி³க்³க³ஹத³யா பரோதி³ம்ஸு. அத² நம் ஸேட்டி²புரிஸா ‘‘நிக்க²ம காளகண்ணீ’’தி போதே²த்வா நீஹரித்வா ஸங்காரட்டா²னே கி²பிம்ஸு. ஸத்தா² ஆனந்த³த்தே²ரேன பச்சா²ஸமணேன பிண்டா³ய சரந்தோ தம் டா²னம் பத்தோ தே²ரம் ஓலோகேத்வா தேன புட்டோ² தம் பவத்திம் ஆசிக்கி². தே²ரோ மூலஸிரிம் பக்கோஸாபேஸி. அத² மஹாஜனகாயோ ஸன்னிபதி. ஸத்தா² மூலஸிரிம் ஆமந்தேத்வா ‘‘ஜானாஸி ஏத’’ந்தி புச்சி²த்வா ‘‘ந ஜானாமீ’’தி வுத்தே, ‘‘பிதா தே ஆனந்த³ஸேட்டீ²’’தி வத்வா அஸத்³த³ஹந்தம் ‘‘ஆனந்த³ஸேட்டி² புத்தஸ்ஸ தே பஞ்ச மஹானிதி⁴யோ ஆசிக்கா²ஹீ’’தி ஆசிக்கா²பேத்வா ஸத்³த³ஹாபேஸி. ஸோ ஸத்தா²ரம் ஸரணம் அக³மாஸி. தஸ்ஸ த⁴ம்மம் தே³ஸேந்தோ இமம் கா³த²மாஹ –

62. ‘‘புத்தா மத்தி² த⁴னம்மத்தி², இதி பா³லோ விஹஞ்ஞதி;

அத்தா ஹி அத்தனோ நத்தி², குதோ புத்தா குதோ த⁴ன’’ந்தி.

தஸ்ஸத்தோ² – புத்தா மே அத்தி², த⁴னம் மே அத்தி², இதி பா³லோ புத்ததண்ஹாய சேவ த⁴னதண்ஹாய ச ஹஞ்ஞதி விஹஞ்ஞதி து³க்க²யதி, ‘‘புத்தா மே நஸ்ஸிம்ஸூ’’தி விஹஞ்ஞதி, ‘‘நஸ்ஸந்தீ’’தி விஹஞ்ஞதி, ‘‘நஸ்ஸிஸ்ஸந்தீ’’தி விஹஞ்ஞதி. த⁴னேபி ஏஸேவ நயோ. இதி ச²ஹாகாரேஹி விஹஞ்ஞதி. ‘‘புத்தே போஸேஸ்ஸாமீ’’தி ரத்திஞ்ச தி³வா ச த²லஜலபதா²தீ³ஸு நானப்பகாரதோ வாயமந்தோபி விஹஞ்ஞதி, ‘‘த⁴னம் உப்பாதே³ஸ்ஸாமீ’’தி கஸிவாணிஜ்ஜாதீ³னி கரோந்தோபி விஹஞ்ஞதேவ. ஏவம் விஹஞ்ஞஸ்ஸ ச அத்தா ஹி அத்தனோ நத்தி² தேன விகா⁴தேன து³க்கி²தம் அத்தானம் ஸுகி²தம் காதும் அஸக்கோந்தஸ்ஸ பவத்தியம்பிஸ்ஸ அத்தா ஹி அத்தனோ நத்தி², மரணமஞ்சே நிபன்னஸ்ஸ மாரணந்திகாஹி வேத³னாஹி அக்³கி³ஜாலாஹி விய பரிட³ய்ஹமானஸ்ஸ சி²ஜ்ஜமானேஸு ஸந்தி⁴ப³ந்த⁴னேஸு, பி⁴ஜ்ஜமானேஸு அட்டி²ஸங்கா⁴டேஸு நிமீலேத்வா பரலோகம் உம்மீலேத்வா இத⁴லோகம் பஸ்ஸந்தஸ்ஸாபி தி³வஸே தி³வஸே த்³விக்க²த்தும் ந்ஹாபேத்வா திக்க²த்தும் போ⁴ஜேத்வா க³ந்த⁴மாலாதீ³ஹி அலங்கரித்வா யாவஜீவம் போஸிதோபி ஸஹாயபா⁴வேன து³க்க²பரித்தாணம் காதும் அஸமத்த²தாய அத்தா ஹி அத்தனோ நத்தி². குதோ புத்தா குதோ த⁴னம் புத்தா வா த⁴னம் வா தஸ்மிம் ஸமயே கிமேவ கரிஸ்ஸந்தி, ஆனந்த³ஸேட்டி²னோபி கஸ்ஸசி கிஞ்சி அத³த்வா புத்தஸ்ஸத்தா²ய த⁴னம் ஸண்ட²பேத்வா புப்³பே³ வா மரணமஞ்சே நிபன்னஸ்ஸ, இதா³னி வா இமம் து³க்க²ம் பத்தஸ்ஸ குதோ புத்தா குதோ த⁴னம். புத்தா வா த⁴னம் வா தஸ்மிம் ஸமயே கிம் து³க்க²ம் ஹரிம்ஸு, கிம் வா ஸுக²ம் உப்பாத³யிம்ஸூதி.

தே³ஸனாவஸானே சதுராஸீதியா பாணஸஹஸ்ஸானம் த⁴ம்மாபி⁴ஸமயோ அஹோஸி. தே³ஸனா மஹாஜனஸ்ஸ ஸாத்தி²கா அஹோஸீதி.

ஆனந்த³ஸேட்டி²வத்து² ததியம்.