14. சித்தக³ஹபதிவத்து²

அஸந்தம் பா⁴வனமிச்சே²ய்யாதி இமம் த⁴ம்மதே³ஸனம் ஸத்தா² ஜேதவனே விஹரந்தோ ஸுத⁴ம்மத்தே²ரம் ஆரப்³ப⁴ கதே²ஸி. தே³ஸனா மச்சி²காஸண்டே³ ஸமுட்டா²ய ஸாவத்தி²யம் நிட்டி²தா.

மச்சி²காஸண்ட³னக³ரஸ்மிஞ்ஹி சித்தோ நாம க³ஹபதி பஞ்சவக்³கி³யானம் அப்³ப⁴ந்தரம் மஹானாமத்தே²ரம் நாம பிண்டா³ய சரமானம் தி³ஸ்வா தஸ்ஸ இரியாபதே² பஸீதி³த்வா பத்தம் ஆதா³ய கே³ஹம் பவேஸேத்வா போ⁴ஜேத்வா ப⁴த்தகிச்சாவஸானே த⁴ம்மகத²ம் ஸுணந்தோ ஸோதாபத்திப²லம் பத்வா அசலஸத்³தோ⁴ ஹுத்வா அம்பா³டகவனம் நாம அத்தனோ உய்யானம் ஸங்கா⁴ராமம் கத்துகாமோ தே²ரஸ்ஸ ஹத்தே² உத³கம் பாதேத்வா நிய்யாதே³ஸி. தஸ்மிம் க²ணே ‘‘பதிட்டி²தம் பு³த்³த⁴ஸாஸன’’ந்தி உத³கபரியந்தம் கத்வா மஹாபத²வீ கம்பி. மஹாஸேட்டி² உய்யானே மஹாவிஹாரம் காரேத்வா ஸப்³ப³தி³ஸாஹி ஆக³தானம் பி⁴க்கூ²னம் விவடத்³வாரோ அஹோஸி. மச்சி²காஸண்டே³ ஸுத⁴ம்மத்தே²ரோ நாம நேவாஸிகோ அஹோஸி.

அபரேன ஸமயேன சித்தஸ்ஸ கு³ணகத²ம் ஸுத்வா த்³வே அக்³க³ஸாவகா தஸ்ஸ ஸங்க³ஹம் கத்துகாமா மச்சி²காஸண்ட³ம் அக³மம்ஸு. சித்தோ க³ஹபதி தேஸம் ஆக³மனம் ஸுத்வா அட்³ட⁴யோஜனமக்³க³ம் பச்சுக்³க³ந்த்வா தே ஆதா³ய அத்தனோ விஹாரம் பவேஸேத்வா ஆக³ந்துகவத்தம் கத்வா, ‘‘ப⁴ந்தே, தோ²கம் த⁴ம்மகத²ம் ஸோதுகாமோம்ஹீ’’தி த⁴ம்மஸேனாபதிம் யாசி. அத² நம் தே²ரோ, ‘‘உபாஸக, அத்³தா⁴னேன ஆக³தாம்ஹா கிலந்தரூபா. அபிச தோ²கம் ஸுணாஹீ’’தி தஸ்ஸ த⁴ம்மம் கதே²ஸி. ஸோ தே²ரஸ்ஸ த⁴ம்மம் ஸுணந்தோவ அனாகா³மிப²லம் பாபுணி. ஸோ த்³வே அக்³க³ஸாவகே வந்தி³த்வா, ‘‘ப⁴ந்தே, ஸ்வே பி⁴க்கு²ஸஹஸ்ஸேன ஸத்³தி⁴ம் மம கே³ஹே பி⁴க்க²ம் க³ண்ஹதா²’’தி நிமந்தேத்வா பச்சா² நேவாஸிகம் ஸுத⁴ம்மத்தே²ரம் ‘‘தும்ஹேபி, ப⁴ந்தே, ஸ்வே தே²ரேஹி ஸத்³தி⁴ம் ஆக³ச்சே²ய்யாதா²’’தி நிமந்தேஸி. ஸோ ‘‘அயம் மம் பச்சா² நிமந்தேதீ’’தி குத்³தோ⁴ படிக்கி²பித்வா புனப்புனம் யாசியமானோபி படிக்கி²பி ஏவ. உபாஸகோ ‘‘பஞ்ஞாயிஸ்ஸத², ப⁴ந்தே’’தி பக்கமித்வா புனதி³வஸே அத்தனோ நிவேஸனே மஹாதா³னம் ஸஜ்ஜேஸி. ஸுத⁴ம்மத்தே²ரோபி பச்சூஸகாலேயேவ ‘‘கீதி³ஸோ நு கோ² க³ஹபதினா அக்³க³ஸாவகானம் ஸக்காரோ ஸஜ்ஜிதோ, ஸ்வே க³ந்த்வா பஸ்ஸிஸ்ஸாமீ’’தி சிந்தேத்வா பாதோவ பத்தசீவரம் ஆதா³ய தஸ்ஸ கே³ஹம் அக³மாஸி.

ஸோ க³ஹபதினா ‘‘நிஸீத³த², ப⁴ந்தே’’தி வுச்சமானோபி ‘‘நாஹம் நிஸீதா³மி, பிண்டா³ய சரிஸ்ஸாமீ’’தி வத்வா அக்³க³ஸாவகானம் படியாதி³தம் ஸக்காரம் ஓலோகேத்வா க³ஹபதிம் ஜாதியா க⁴ட்டேதுகாமோ ‘‘உளாரோ தே, க³ஹபதி, ஸக்காரோ, அபிசேத்த² ஏகஞ்ஞேவ நத்தீ²’’தி ஆஹ. ‘‘கிம், ப⁴ந்தே’’தி? ‘‘திலஸம்கு³ளிகா, க³ஹபதீ’’தி வத்வா க³ஹபதினா காகோபமாய அபஸாதி³தோ குஜ்ஜி²த்வா ‘‘ஏஸோ தே, க³ஹபதி, ஆவாஸோ, பக்கமிஸ்ஸாமஹ’’ந்தி வத்வா யாவததியம் வாரியமானோபி பக்கமித்வா ஸத்து² ஸந்திகம் க³ந்த்வா சித்தேன ச அத்தனா ச வுத்தவசனம் ஆரோசேஸி. ஸத்தா² ‘‘தயா உபாஸகோ ஸத்³தோ⁴ பஸன்னோ ஹீனேன கு²ம்ஸிதோ’’தி தஸ்ஸேவ தோ³ஸம் ஆரோபேத்வா படிஸாரணீயகம்மம் காராபேத்வா ‘‘க³ச்ச², சித்தக³ஹபதிம் க²மாபேஹீ’’தி பேஸேஸி. ஸோ தத்த² க³ந்த்வா, ‘‘க³ஹபதி, மய்ஹமேவ ஸோ தோ³ஸோ, க²மாஹி மே’’தி வத்வாபி ‘‘நாஹம் க²மாமீ’’தி தேன படிக்கி²த்தோ மங்குபூ⁴தோ தம் க²மாபேதும் நாஸக்கி². புனதே³வ ஸத்து² ஸந்திகம் பச்சாக³மாஸி. ஸத்தா² ‘‘நாஸ்ஸ உபாஸகோ க²மிஸ்ஸதீ’’தி ஜானந்தோபி ‘‘மானத²த்³தோ⁴ ஏஸ, திம்ஸயோஜனம் தாவ மக்³க³ம் க³ந்த்வா பச்சாக³ச்ச²தூ’’தி க²மனூபாயம் அனாசிக்கி²த்வாவ உய்யோஜேஸி. அத²ஸ்ஸ புனாக³தகாலே நிஹதமானஸ்ஸ அனுதூ³தம் த³த்வா ‘‘க³ச்ச², இமினா ஸத்³தி⁴ம் க³ந்த்வா உபாஸகம் க²மாபேஹீ’’தி வத்வா ‘‘ஸமணேன நாம ‘மய்ஹம் விஹாரோ, மய்ஹம் நிவாஸட்டா²னம், மய்ஹம் உபாஸகோ, மய்ஹம் உபாஸிகா’தி மானம் வா இஸ்ஸம் வா காதும் ந வட்டதி. ஏவம் கரோந்தஸ்ஸ ஹி இச்சா²மானாத³யோ கிலேஸா வட்³ட⁴ந்தீ’’தி அனுஸந்தி⁴ம் க⁴ட்டேத்வா த⁴ம்மம் தே³ஸேந்தோ இமா கா³தா² அபா⁴ஸி –

73. ‘‘அஸந்தம் பா⁴வனமிச்சே²ய்ய, புரேக்கா²ரஞ்ச பி⁴க்கு²ஸு;

ஆவாஸேஸு இஸ்ஸரியம், பூஜா பரகுலேஸு ச.

74. ‘‘மமேவ கத மஞ்ஞந்து, கி³ஹீ பப்³ப³ஜிதா உபோ⁴.

மமேவாதிவஸா அஸ்ஸு, கிச்சாகிச்சேஸு கிஸ்மிசி;

இதி பா³லஸ்ஸ ஸங்கப்போ, இச்சா² மானோ ச வட்³ட⁴தீ’’தி.

தத்த² அஸந்தந்தி யோ பா³லோ பி⁴க்கு² அவிஜ்ஜமானம் ஸம்பா⁴வனம் இச்சே²ய்ய, ‘‘அஸ்ஸத்³தோ⁴வ ஸமானோ ‘ஸத்³தோ⁴தி மம் ஜனோ ஜானாதூ’தி இச்ச²தீ’’தி. பாபிச்ச²தாநித்³தே³ஸே (விப⁴. 851) வுத்தனயேனேவ பா³லோ ‘‘அஸத்³தோ⁴ து³ஸ்ஸீலோ அப்பஸ்ஸுதோ அப்பவிவித்தோ குஸீதோ அனுபட்டி²தஸ்ஸதி அஸமாஹிதோ து³ப்பஞ்ஞோ அகீ²ணாஸவோவ ஸமானோ ‘அஹோ வத மம் ஜனோ அயம் ஸத்³தோ⁴, ஸீலவா, ப³ஹுஸ்ஸுதோ, பவிவித்தோ, ஆரத்³த⁴வீரியோ, உபட்டி²தஸ்ஸதி, ஸமாஹிதோ, பஞ்ஞவா, கீ²ணாஸவோ’தி ஜானேய்யா’’தி இத³ம் அஸந்தஸம்பா⁴வனம் இச்ச²தி. புரேக்கா²ரந்தி பரிவாரம். ‘‘அஹோ வத மம் ஸகலவிஹாரே பி⁴க்கூ² பரிவாரேத்வா பஞ்ஹம் புச்ச²ந்தா விஹரேய்யு’’ந்தி ஏவம் இச்சா²சாரே ட²த்வா புரேக்கா²ரஞ்ச பி⁴க்கூ²ஸு இச்ச²தி. ஆவாஸேஸூதி ஸங்கி⁴கேஸு ச ஆவாஸேஸு யானி விஹாரமஜ்ஜே² பணீதஸேனாஸனானி, தானி அத்தனோ ஸந்தி³ட்ட²ஸம்ப⁴த்தாதீ³னம் பி⁴க்கூ²னம் ‘‘தும்ஹே இத⁴ வஸதா²’’தி விசாரேந்தோ ஸயம்பி வரதரம் ஸேனாஸனம் பலிபோ³தே⁴ந்தோ, ஸேஸானம் ஆக³ந்துகபி⁴க்கூ²னம் பச்சந்திமானி லாமகஸேனாஸனானி சேவ அமனுஸ்ஸபரிக்³க³ஹிதானி ச ‘‘தும்ஹே இத⁴ வஸதா²’’தி விசாரேந்தோ ஆவாஸேஸு இஸ்ஸரியம் இச்ச²தி. பூஜா பரகுலேஸு சாதி நேவ மாதாபிதூனம் ந ஞாதகானம் பரேஸுயேவ குலேஸு ‘‘அஹோ வதிமே மய்ஹமேவ த³தே³ய்யும், ந அஞ்ஞேஸ’’ந்தி ஏவம் சதுப்பச்சயேஹி பூஜம் இச்ச²தி.

மமேவ கத மஞ்ஞந்தூதி யஸ்ஸ ச பா³லஸ்ஸ ‘‘யம்கிஞ்சி விஹாரே உபோஸதா²கா³ராதி³கரணவஸேன கதம் நவகம்மம், தம் ஸப்³ப³ம் அம்ஹாகம் தே²ரேன கதந்தி ஏவம் கி³ஹீ ச பப்³ப³ஜிதா ச உபோ⁴பி மமேவ நிஸ்ஸாய கதம் பரிகம்மம் நிட்டி²தம் மஞ்ஞந்தூ’’தி ஸங்கப்போ உப்பஜ்ஜதி. மமேவாதிவஸா அஸ்ஸூதி ‘‘கி³ஹீ ச பப்³ப³ஜிதா ச ஸப்³பே³பி மமேவ வஸே வத்தந்து, ஸகடகோ³ணவாஸிப²ரஸுஆதீ³னி வா லத்³த⁴ப்³பா³னி ஹோந்து, அந்தமஸோ யாகு³மத்தம்பி தாபேத்வா பிவனாதீ³னி வா, ஏவரூபேஸு கிச்சாகிச்சேஸு கு²த்³த³கமஹந்தேஸு கரணீயேஸு கிஸ்மிஞ்சி ஏககிச்சேபி மமேவ வஸே வத்தந்து, மமேவ ஆபுச்சி²த்வா கரோந்தூ’’தி ஸங்கப்போ உப்பஜ்ஜதி. இதி பா³லஸ்ஸாதி யஸ்ஸ பா³லஸ்ஸ ஸா ச இச்சா² அயஞ்ச ஏவரூபோ ஸங்கப்போ உப்பஜ்ஜதி, தஸ்ஸ நேவ விபஸ்ஸனா, ந மக்³க³ப²லானி வட்³ட⁴ந்தி. கேவலம் பனஸ்ஸ சந்தோ³த³யே ஸமுத்³த³ஸ்ஸ உத³கம் விய ச²ஸு த்³வாரேஸு உப்பஜ்ஜமானா தண்ஹா சேவ நவவித⁴மானோ ச வட்³ட⁴தீதி.

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

ஸுத⁴ம்மத்தே²ரோபி இமம் ஓவாத³ம் ஸுத்வா ஸத்தா²ரம் வந்தி³த்வா உட்டா²யாஸனா பத³க்கி²ணம் கத்வா தேன அனுதூ³தேன பி⁴க்கு²னா ஸத்³தி⁴ம் க³ந்த்வா உபாஸகஸ்ஸ சக்கு²பதே² ஆபத்திம் படிகரித்வா உபாஸகம் க²மாபேஸி. ஸோ உபாஸகேன ‘‘க²மாமஹம், ப⁴ந்தே, ஸசே மய்ஹம் தோ³ஸோ அத்தி², க²மத² மே’’தி படிக²மாபிதோ ஸத்தா²ரா தி³ன்னே ஓவாதே³ ட²த்வா கதிபாஹேனேவ ஸஹ படிஸம்பி⁴தா³ஹி அரஹத்தம் பாபுணி. உபாஸகோபி சிந்தேஸி – ‘‘மயா ஸத்தா²ரம் அதி³ஸ்வாவ ஸோதாபத்திப²லம் பத்தம், அதி³ஸ்வா ஏவ அனாகா³மிப²லே பதிட்டி²தோ, ஸத்தா²ரம் மே த³ட்டு²ம் வட்டதீ’’தி. ஸோ திலதண்டு³லஸப்பிபா²ணிதவத்த²ச்சா²த³னாதீ³ஹி பரிபூரானி பஞ்ச ஸகடஸதானி யோஜாபேத்வா ‘‘ஸத்தா²ரம் த³ட்டு²காமா ஆக³ச்ச²ந்து, பிண்ட³பாதாதீ³ஹி ந கிலமிஸ்ஸந்தீ’’தி பி⁴க்கு²ஸங்க⁴ஸ்ஸ ஆரோசாபேத்வா பி⁴க்கு²னீஸங்க⁴ஸ்ஸாபி உபாஸகானம்பி உபாஸிகானம்பி ஆரோசாபேஸி. தேன ஸத்³தி⁴ம் பஞ்சஸதா பஞ்சஸதா பி⁴க்கூ² ச பி⁴க்கு²னியோ ச உபாஸகா ச உபாஸிகாயோ ச நிக்க²மிம்ஸு. ஸோ தேஸஞ்சேவ அத்தனோ பரிஸாய சாதி திண்ணம் ஜனஸஹஸ்ஸானம் யதா² திம்ஸயோஜனே மக்³கே³ யாகு³ப⁴த்தாதீ³ஹி கிஞ்சி வேகல்லம் ந ஹோதி, ததா² ஸம்வித³ஹி. தஸ்ஸ பன நிக்க²ந்தபா⁴வம் ஞத்வா யோஜனே யோஜனே தே³வதா க²ந்தா⁴வாரம் ப³ந்தி⁴த்வா தி³ப்³பே³ஹி யாகு³க²ஜ்ஜகப⁴த்தபானகாதீ³ஹி தம் மஹாஜனம் உபட்ட²ஹிம்ஸு, கஸ்ஸசி கேனசி வேகல்லம் ந ஹோதி. ஏவம் தே³வதாஹி உபட்டி²யமானோ தே³வஸிகம் யோஜனம் க³ச்ச²ந்தோ மாஸேன ஸாவத்தி²ம் பாபுணி, பஞ்ச ஸகடஸதானி யதா²பூரிதானேவ அஹேஸும். தே³வதாஹி சேவ மனுஸ்ஸேஹி ச அபி⁴ஹடம் பண்ணாகாரம் விஸ்ஸஜ்ஜேந்தோவ அக³மாஸி.

ஸத்தா² ஆனந்த³த்தே²ரம் ஆஹ – ‘‘ஆனந்த³, அஜ்ஜ வட்³ட⁴மானகச்சா²யாய சித்தோ க³ஹபதி பஞ்சஹி உபாஸகஸதேஹி பரிவுதோ ஆக³ந்த்வா மம் வந்தி³ஸ்ஸதீ’’தி. ‘‘கிம் பன, ப⁴ந்தே, தஸ்ஸ தும்ஹாகம் வந்த³னகாலே கிஞ்சி பாடிஹாரியம் ப⁴விஸ்ஸதீ’’தி? ‘‘ப⁴விஸ்ஸதி, ஆனந்தா³’’தி. ‘‘கிம், ப⁴ந்தே’’தி? தஸ்ஸ ஆக³ந்த்வா ‘‘மம் வந்த³னகாலே ராஜமானேன அட்ட²கரீஸமத்தே பதே³ஸே ஜண்ணுகமத்தேன ஓதி⁴னா பஞ்சவண்ணானம் தி³ப்³ப³புப்பா²னம் க⁴னவஸ்ஸம் வஸ்ஸிஸ்ஸதீ’’தி. தம் கத²ம் ஸுத்வா நக³ரவாஸினோ ‘‘ஏவம் மஹாபுஞ்ஞோ கிர சித்தோ நாம க³ஹபதி ஆக³ந்த்வா அஜ்ஜ ஸத்தா²ரம் வந்தி³ஸ்ஸதி, ஏவரூபம் கிர பாடிஹாரியம் ப⁴விஸ்ஸதி, மயம்பி தம் மஹாபுஞ்ஞம் த³ட்டு²ம் லபி⁴ஸ்ஸாமா’’தி பண்ணாகாரம் ஆதா³ய மக்³க³ஸ்ஸ உபோ⁴ஸு பஸ்ஸேஸு அட்ட²ம்ஸு. விஹாரஸமீபே ஆக³தகாலே பஞ்ச பி⁴க்கு²ஸதானி பட²மம் ஆக³மிம்ஸு. சித்தோ க³ஹபதி, ‘‘அம்மா, தும்ஹே பச்ச²தோ ஆக³ச்ச²தா²’’தி மஹாஉபாஸிகாயோ ட²பேத்வா பஞ்சஹி உபாஸகஸதேஹி பரிவுதோ ஸத்து² ஸந்திகம் அக³மாஸி. பு³த்³தா⁴னம் ஸம்முக²ட்டா²னே பன டி²தா வா நிஸின்னா வா இதோ வா ஏத்தோ வா ந ஹோந்தி, பு³த்³த⁴வீதி²யா த்³வீஸு பஸ்ஸேஸு நிச்சலாவ திட்ட²ந்தி. சித்தோ க³ஹபதி மஹந்தம் பு³த்³த⁴வீதி²ம் ஓக்கமி. தீணி ப²லானி பத்தேன அரியஸாவகேன ஓலோகிதோலோகிதட்டா²னம் கம்பி. ‘‘ஏஸோ கிர சித்தோ க³ஹபதீ’’தி மஹாஜனோ ஓலோகேஸி. ஸோ ஸத்தா²ரம் உபஸங்கமித்வா ச²ப்³ப³ண்ணானம் பு³த்³த⁴ரஸ்மீனம் அந்தோ பவிஸித்வா த்³வீஸு கோ³ப்ப²கேஸு ஸத்து² பாதே³ க³ஹேத்வா வந்தி³. தம் க²ணஞ்ஞேவ வுத்தப்பகாரம் புப்ப²வஸ்ஸம் வஸ்ஸி, ஸாது⁴காரஸஹஸ்ஸானி பவத்தயிம்ஸு. ஸோ ஏகமாஸம் ஸத்து² ஸந்திகே வஸி, வஸமானோ ச ஸகலம் பு³த்³த⁴ப்பமுக²ம் பி⁴க்கு²ஸங்க⁴ம் விஹாரேயேவ நிஸீதா³பேத்வா மஹாதா³னம் அதா³ஸி, அத்தனா ஸத்³தி⁴ம் ஆக³தேபி அந்தோவிஹாரேயேவ கத்வா படிஜக்³கி³. ஏகதி³வஸம்பி அத்தனோ ஸகடேஸு கிஞ்சி க³ஹேதப்³ப³ம் நாஹோஸி, தே³வமனுஸ்ஸேஹி ஆப⁴தபண்ணாகாரேனேவ தா³னம் அதா³ஸி, ஸப்³ப³கிச்சானி அகாஸி. ஸோ ஸத்தா²ரம் வந்தி³த்வா ஆஹ – ‘‘ப⁴ந்தே, அஹம் ‘தும்ஹாகம் தா³னம் த³ஸ்ஸாமீ’தி ஆக³ச்ச²ந்தோ மாஸம் அந்தராமக்³கே³ அஹோஸிம். இதே⁴வ மே மாஸோ வீதிவத்தோ, மயா ஆப⁴தம் பண்ணாகாரம் கிஞ்சி க³ஹேதும் ந லபா⁴மி, ஏத்தகம் காலம் தே³வமனுஸ்ஸேஹி ஆப⁴தபண்ணாகாரேனேவ தா³னம் அதா³ஸிம், ஸோஹம் ஸசேபி இத⁴ ஸம்வச்ச²ரம் வஸிஸ்ஸாமி, நேவ மம தே³ய்யத⁴ம்மம் தா³தும் லபி⁴ஸ்ஸாமி. அஹம் ஸகடானி ஓதாரேத்வா க³ந்தும் இச்சா²மி, படிஸாமனட்டா²னம் மே ஆரோசாபேதா²’’தி.

ஸத்தா² ஆனந்த³த்தே²ரம் ஆஹ – ‘‘ஆனந்த³, உபாஸகஸ்ஸ ஏகம் பதே³ஸம் துச்ச²ம் காரேத்வா தே³ஹீ’’தி. தே²ரோ ததா² அகாஸி. கப்பியபூ⁴மி (மஹாவ. 295) கிர சித்தஸ்ஸ க³ஹபதினோ அனுஞ்ஞாதா. உபாஸகோபி அத்தனா ஸத்³தி⁴ம் ஆக³தேஹி தீஹி ஜனஸஹஸ்ஸேஹி ஸத்³தி⁴ம் துச்ச²ஸகடேஹி புன மக்³க³ம் படிபஜ்ஜி. தே³வமனுஸ்ஸா உட்டா²ய, ‘‘அய்ய, தயா துச்ச²ஸகடேஹி க³மனகம்மம் கத’’ந்தி ஸத்தஹி ரதனேஹி ஸகடானி பூரயிம்ஸு. ஸோ அத்தனோ ஆப⁴தபண்ணாகாரேனேவ மஹாஜனம் படிஜக்³க³ந்தோ அக³மாஸி. ஆனந்த³த்தே²ரோ ஸத்தா²ரம் வந்தி³த்வா ஆஹ – ‘‘ப⁴ந்தே, தும்ஹாகம் ஸந்திகம் ஆக³ச்ச²ந்தோபி மாஸேன ஆக³தோ, இதா⁴பி மாஸமேவ வுட்டோ², ஏத்தகம் காலம் தே³வமனுஸ்ஸேஹி அபி⁴ஹடபண்ணாகாரேனேவ மஹாவதா³னம் அதா³ஸி, இதா³னி பஞ்ச ஸகடஸதானி துச்சா²னி கத்வா மாஸேனேவ கிர க³மிஸ்ஸதி, தே³வமனுஸ்ஸா பனஸ்ஸ உட்டா²ய, ‘அய்ய, தயா துச்ச²ஸகடேஹி க³மனகம்மம் கத’ந்தி பஞ்ச ஸகடஸதானி ஸத்தரதனேஹி பூரயிம்ஸு. ஸோ புன அத்தனோ ஆப⁴தபண்ணாகாரேனேவ கிர மஹாஜனம் படிஜக்³க³ந்தோ க³மிஸ்ஸதீ’’தி. ‘‘கிம் பன, ப⁴ந்தே, ஏதஸ்ஸ தும்ஹாகம் ஸந்திகம் ஆக³ச்ச²ந்தஸ்ஸேவாயம் ஸக்காரோ உப்பஜ்ஜதி, உதா³ஹு அஞ்ஞத்த² க³ச்ச²ந்தஸ்ஸாபி உப்பஜ்ஜதீ’’தி? ‘‘ஆனந்த³, மம ஸந்திகம் ஆக³ச்ச²ந்தஸ்ஸாபி அஞ்ஞத்த² க³ச்ச²ந்தஸ்ஸாபி ஏதஸ்ஸ உப்பஜ்ஜதேவ. அயஞ்ஹி உபாஸகோ ஸத்³தோ⁴ பஸன்னோ ஸம்பன்னஸீலோ, ஏவரூபோ புக்³க³லோ யம் யம் பதே³ஸம் ப⁴ஜதி, தத்த² தத்தே²வஸ்ஸ லாப⁴ஸக்காரோ நிப்³ப³த்ததீ’’தி வத்வா ஸத்தா² இமம் பகிண்ணகவக்³கே³ கா³த²மாஹ –

‘‘ஸத்³தோ⁴ ஸீலேன ஸம்பன்னோ, யஸோ போ⁴க³ஸமப்பிதோ;

யம் யம் பதே³ஸம் ப⁴ஜதி, தத்த² தத்தே²வ பூஜிதோ’’தி. (த⁴. ப. 303);

அத்தோ² பனஸ்ஸா தத்தே²வ ஆவிப⁴விஸ்ஸதி.

ஏவம் வுத்தே ஆனந்த³த்தே²ரோ சித்தஸ்ஸ புப்³ப³கம்மம் புச்சி². அத²ஸ்ஸ ஸத்தா² ஆசிக்க²ந்தோ ஆஹ –

ஆனந்த³, அயம் பது³முத்தரஸ்ஸ ப⁴க³வதோ பாத³மூலே கதாபி⁴னீஹாரோ கப்பஸதஸஹஸ்ஸம் தே³வமனுஸ்ஸேஸு ஸம்ஸரித்வா கஸ்ஸபபு³த்³த⁴காலே மிக³லுத்³த³ககுலே நிப்³ப³த்தோ வுத்³தி⁴மன்வாய ஏகதி³வஸம் தே³வே வஸ்ஸந்தே மிகா³னம் மாரணத்தாய ஸத்திம் ஆதா³ய அரஞ்ஞம் க³ந்த்வா மிகே³ ஓலோகேந்தோ ஏகஸ்மிம் அகடபப்³பா⁴ரே ஸஸீஸம் பாருபித்வா ஏகம் பி⁴க்கு²ம் நிஸின்னம் தி³ஸ்வா ‘‘ஏகோ, அய்யோ, ஸமணத⁴ம்மம் கரோந்தோ நிஸின்னோ ப⁴விஸ்ஸதி, ப⁴த்தமஸ்ஸ ஆஹரிஸ்ஸாமீ’’தி வேகே³ன கே³ஹம் க³ந்த்வா ஏகஸ்மிம் உத்³த⁴னே ஹிய்யோ, ஆப⁴தமம்ஸம், ஏகஸ்மிம் ப⁴த்தம் பசாபேத்வா அஞ்ஞே பிண்ட³பாதசாரிகே பி⁴க்கூ² தி³ஸ்வா தேஸம்பி பத்தே ஆதா³ய பஞ்ஞத்தாஸனே நிஸீதா³பேத்வா பி⁴க்க²ம் ஸம்பாதே³த்வா, ‘‘அய்யே, பரிவிஸதா²’’தி அஞ்ஞம் ஆணாபேத்வா தம் ப⁴த்தம் புடகே பக்கி²பித்வா ஆதா³ய க³ச்ச²ந்தோ அந்தராமக்³கே³ நானாபுப்பா²னி ஓசினித்வா பத்தபுடே கத்வா தே²ரஸ்ஸ நிஸின்னட்டா²னம் க³ந்த்வா ‘‘மய்ஹம், ப⁴ந்தே, ஸங்க³ஹம் கரோதா²’’தி வத்வா பத்தம் ஆதா³ய பூரேத்வா தே²ரஸ்ஸ ஹத்தே² ட²பேத்வா தேஹி புப்பே²ஹி பூஜம் கத்வா ‘‘யதா² மே அயம் ரஸபிண்ட³பாதோ புப்ப²பூஜாய ஸத்³தி⁴ம் சித்தம் தோஸேஸி, ஏவம் நிப்³ப³த்தனிப்³ப³த்தட்டா²னே பண்ணாகாரஸஹஸ்ஸானி ஆதா³ய ஆக³ந்த்வா மய்ஹம் சித்தம் தோஸேந்து, பஞ்சவண்ணகுஸுமவஸ்ஸஞ்ச வஸ்ஸதூ’’தி பத்த²னம் பட்ட²பேஸி. ஸோ யாவஜீவம் குஸலம் கத்வா தே³வலோகே நிப்³ப³த்தி, நிப்³ப³த்தட்டா²னே ஜண்ணுகமத்தேன ஓதி⁴னா தி³ப்³ப³புப்ப²வஸ்ஸம் வஸ்ஸி. இதா³னிபிஸ்ஸ ஜாததி³வஸே சேவ இத⁴ ச ஆக³தஸ்ஸ புப்ப²வஸ்ஸவஸ்ஸனஞ்ச பண்ணாகாராபி⁴ஹாரோ ச ஸத்தஹி ரதனேஹி ஸகடபூரணஞ்ச தஸ்ஸேவ கம்மஸ்ஸ நிஸ்ஸந்தோ³தி.

சித்தக³ஹபதிவத்து² சுத்³த³ஸமம்.