6. பாவேய்யகாஜீவகவத்து²

ந பரேஸம் விலோமானீதி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ பாவேய்யம் நாம ஆஜீவகம் ஆரப்³ப⁴ கதே²ஸி.

ஸாவத்தி²யம் கிரேகா க³ஹபதானீ புத்தட்டா²னே ட²பேத்வா பாவேய்யம் நாம ஆஜீவகம் படிஜக்³கி³. தஸ்ஸானந்தரக⁴ரேஸு மனுஸ்ஸா ஸத்து² த⁴ம்மதே³ஸனம் ஸுத்வா ஆக³ந்த்வா, ‘‘அஹோ அச்ச²ரியா பு³த்³தா⁴னம் த⁴ம்மதே³ஸனா’’தி நானப்பகாரேஹி பு³த்³த⁴கு³ணே வண்ணேந்தி. ஸா பு³த்³தா⁴னம் கு³ணகத²ம் ஸுத்வா விஹாரம் க³ந்த்வா த⁴ம்மம் ஸோதுகாமா ஆஜீவகஸ்ஸ ஏதமத்த²ம் கதே²த்வா, ‘‘க³ச்சி²ஸ்ஸாமி அஹம் பு³த்³த⁴ஸந்திகம், அய்யா’’தி ஆஹ. ஸோ ‘‘மா க³ச்சா²ஹீ’’தி நிவாரேத்வா தம் புனப்புனம் யாசமானம்பி நிவாரேஸி ஏவ. ஸா ‘‘அயம் மம விஹாரம் க³ந்த்வா த⁴ம்மம் ஸோதும் ந தே³தி, ஸத்தா²ரம் நிமந்தேத்வா இதே⁴வ த⁴ம்மம் ஸுணிஸ்ஸாமீ’’தி ஸாயன்ஹஸமயே புத்தம் பக்கோஸித்வா, ‘‘க³ச்ச², தாத, ஸ்வாதனாய ஸத்தா²ரம் நிமந்தேஹீ’’தி பேஸேஸி. ஸோ க³ச்ச²ந்தோ பட²மதரம் ஆஜீவகஸ்ஸ வஸனட்டா²னம் க³ந்த்வா தம் வந்தி³த்வா நிஸீதி³. அத² நம் ஸோ ‘‘கஹம் க³ச்ச²ஸீ’’தி ஆஹ. ‘‘மாது வசனேன ஸத்தா²ரம் நிமந்தேதும் க³ச்சா²மீ’’தி ஆஹ. ‘‘மா தஸ்ஸ ஸந்திகம் க³ச்சா²ஹீ’’தி. ‘‘அலம், அய்ய, மம மாது பா⁴யாமி, க³ச்சி²ஸ்ஸாமஹ’’ந்தி. ‘‘ஏதஸ்ஸ கதஸக்காரம் உபோ⁴பி கா²தி³ஸ்ஸாம, மா க³ச்சா²ஹீ’’தி. ‘‘அலம், அய்ய, மாதா மே தஜ்ஜேஸ்ஸதீ’’தி. தேன ஹி க³ச்ச², க³ந்த்வா பன நிமந்தேத்வா, ‘‘அம்ஹாகம் கே³ஹம் அஸுகட்டா²னே வா அஸுகவீதி²யம் வா அஸுகமக்³கே³ன வா க³ந்தப்³ப³’’ந்தி மா ஆசிக்கி². ‘‘ஸந்திகே டி²தோ விய அஞ்ஞேன மக்³கே³ன க³ச்ச²ந்தோ விய பலாயித்வா ஏஹீ’’தி. ஸோ ஆஜீவகஸ்ஸ வசனம் ஸுத்வா ஸத்து² ஸந்திகம் க³ந்த்வா நிமந்தேத்வா ஆஜீவகேன வுத்தனியாமேனேவ ஸப்³ப³ம் கத்வா தஸ்ஸ ஸந்திகம் க³ந்த்வா, ‘‘கிம் தே கத’’ந்தி புட்டோ², ‘‘ஸப்³ப³ம் கதம், அய்யா’’தி ஆஹ. ‘‘ப⁴த்³த³கம் தே கதம், தஸ்ஸ ஸக்காரம் உபோ⁴பி கா²தி³ஸ்ஸாமா’’தி வத்வா புனதி³வஸே ஆஜீவகோ பாதோவ தம் கே³ஹம் அக³மாஸி. தம் க³ஹேத்வா பச்சா²க³ப்³பே⁴ நிஸீதா³பேஸும்.

படிவிஸ்ஸகமனுஸ்ஸா தம் கே³ஹம் அல்லகோ³மயேன உபலிம்பித்வா லாஜபஞ்சமானி புப்பா²னி விகிரித்வா ஸத்து² நிஸீத³னத்தா²ய மஹாரஹம் ஆஸனம் பஞ்ஞாபேஸும். பு³த்³தே⁴ஹி ஸத்³தி⁴ம் அபரிசிதமனுஸ்ஸா ஹி ஆஸனபஞ்ஞத்திம் ந ஜானந்தி, பு³த்³தா⁴னஞ்ச மக்³க³தே³ஸகேன கிச்சம் நாம நத்தி², போ³தி⁴மூலே த³ஸஸஹஸ்ஸிஸோகதா⁴தும் கம்பேத்வா ஸம்போ³தி⁴ம் பத்ததி³வஸேயேவ ஹி நேஸம் ‘‘அயம் மக்³கோ³ நிரயம் க³ச்ச²தி, அயம் திரச்சா²னயோனிம், அயம் பேத்திவிஸயம், அயம் மனுஸ்ஸலோகம், அயம் தே³வலோகம், அயம் அமதமஹானிப்³பா³ன’’ந்தி ஸப்³பே³ மக்³கா³ ஆவிபூ⁴தா. கா³மனிக³மாதீ³னம் பன மக்³கே³ வத்தப்³ப³மேவ நத்தி². தஸ்மா ஸத்தா² பாதோவ பத்தசீவரமாதா³ய மஹாஉபாஸிகாய கே³ஹத்³வாரம் க³தோ. ஸா கே³ஹா நிக்க²மித்வா ஸத்தா²ரம் பஞ்சபதிட்டி²தேன வந்தி³த்வா அந்தோனிவேஸனம் பவேஸேத்வா ஆஸனே நிஸீதா³பேத்வா த³க்கி²ணோத³கம் த³த்வா பணீதேன கா²த³னீயேன போ⁴ஜனீயேன பரிவிஸி. உபாஸிகா கதப⁴த்தகிச்சஸ்ஸ ஸத்து²னோ அனுமோத³னம் காரேதுகாமா பத்தம் க³ண்ஹி. ஸத்தா² மது⁴ரஸ்ஸரேன அனுமோத³னத⁴ம்மகத²ம் ஆரபி⁴. உபாஸிகா ‘‘ஸாது⁴, ஸாதூ⁴’’தி ஸாது⁴காரம் த³த³மானா த⁴ம்மம் ஸுணி. ஆஜீவகோபி பச்சா²க³ப்³பே⁴ நிஸின்னோவ தஸ்ஸா ஸாது⁴காரம் த³த்வா த⁴ம்மம் ஸுணந்தியா ஸத்³த³ம் ஸுத்வா ஸந்தா⁴ரேதும் நாஸக்கி². ‘‘ந இதா³னேஸா மய்ஹ’’ந்தி நிக்க²மித்வா ‘‘நட்டா²ஸி காளகண்ணி, ஏதஸ்ஸ ஏவம் ஸக்காரம் கரோதீ’’தி நானப்பகாரேன உபாஸிகஞ்ச ஸத்தா²ரஞ்ச அக்கோஸந்தோ பலாயி. உபாஸிகா தஸ்ஸ கதா²ய லஜ்ஜிதா அஞ்ஞத²த்தம் க³தம் சித்தம் தே³ஸனானுஸாரேன ஞாணம் பேஸேதும் நாஸக்கி². அத² நம் ஸத்தா² ‘‘கிம் உபாஸிகே சித்தம் தே³ஸனானுக³தம் காதும் ந ஸக்கோஸீ’’தி? ‘‘ப⁴ந்தே, ஏதஸ்ஸ மே கதா²ய சித்தம் அஞ்ஞத²த்தம் உபக³த’’ந்தி. ஸத்தா² ‘‘ஏவரூபஸ்ஸ விஸபா⁴க³ஜனஸ்ஸ கதி²தம் கத²ம் நாம ஆவஜ்ஜிதும் ந வட்டதி, ஏவரூபம் அஸமன்னாஹரித்வா அத்தனோ கதாகதமேவ ஓலோகேதும் வட்டதீ’’தி வத்வா இமம் கா³த²மாஹ –

50. ‘‘ந பரேஸம் விலோமானி, ந பரேஸம் கதாகதம்;

அத்தனோவ அவேக்கே²ய்ய, கதானி அகதானி சா’’தி.

தத்த² ந பரேஸம் விலோமானீதி பரேஸம் விலோமானி ப²ருஸானி மம்மச்சே²த³கவசனானி ந மனஸிகாதப்³பா³னி. ந பரேஸம் கதாகதந்தி ‘‘அஸுகோ உபாஸகோ அஸ்ஸத்³தோ⁴ அப்பஸன்னோ, நாபிஸ்ஸ கே³ஹே கடச்சு²பி⁴க்கா²தீ³னி தி³ய்யந்தி, ந ஸலாகப⁴த்தாதீ³னி, ந சீவராதி³பச்சயதா³னம் ஏதஸ்ஸ அத்தி², ததா² அஸுகா உபாஸிகா அஸ்ஸத்³தா⁴ அப்பஸன்னா, நாபிஸ்ஸா கே³ஹே கடச்சு²பி⁴க்கா²தீ³னி தி³ய்யந்தி, ந ஸலாகப⁴த்தாதீ³னி, ந சீவராதி³பச்சயதா³னம் ஏதிஸ்ஸா அத்தி², ததா² அஸுகோ பி⁴க்கு² அஸ்ஸத்³தோ⁴ அப்பஸன்னோ, நாபி உபஜ்ஜா²யவத்தம் கரோதி, ந ஆசரியவத்தம், ந ஆக³ந்துகவத்தம், ந க³மிகவத்தம், ந சேதியங்க³ணவத்தம், ந உபோஸதா²கா³ரவத்தம், ந போ⁴ஜனஸாலாவத்தம், ந ஜந்தாக⁴ரவத்தாதீ³னி, நாபிஸ்ஸ கிஞ்சி து⁴தங்க³ம் அத்தி², ந பா⁴வனாராமதாய உஸ்ஸாஹமத்தம்பீ’’தி ஏவம் பரேஸம் கதாகதம் நாம ந ஓலோகேதப்³ப³ம். அத்தனோவ அவேக்கே²ய்யாதி ‘‘கத²ம் பூ⁴தஸ்ஸ மே ரத்திந்தி³வா வீதிவத்தந்தீதி பப்³ப³ஜிதேன அபி⁴ண்ஹம் பச்சவேக்கி²தப்³ப³’’ந்தி (அ. நி. 10.48) இமம் ஓவாத³ம் அனுஸ்ஸரந்தோ ஸத்³தா⁴பப்³ப³ஜிதோ குலபுத்தோ ‘‘கிம் நு கோ² அஹம் ‘அனிச்சம் து³க்க²ம் அனத்தா’தி திலக்க²ணம் ஆரோபேத்வா யோகே³ கம்மம் காதும் ஸக்கி²ம், நாஸக்கி²’’ந்தி ஏவம் அத்தனோ கதாகதானி ஓலோகேய்யாதி.

தே³ஸனாவஸானே ஸா உபாஸிகா ஸோதாபத்திப²லே பதிட்டி²தா, தே³ஸனா மஹாஜனஸ்ஸ ஸாத்தி²கா ஜாதாதி.

பாவேய்யகாஜீவகவத்து² ச²ட்ட²ம்.