4. புப்ப²வக்³கோ³

1. பத²விகதா²பஸுதபஞ்சஸதபி⁴க்கு²வத்து²

கோ இமம் பத²விம் விசேஸ்ஸதீதி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ பத²விகதா²பஸுதே பஞ்சஸதே பி⁴க்கூ² ஆரப்³ப⁴ கதே²ஸி.

தே கிர ப⁴க³வதா ஸத்³தி⁴ம் ஜனபத³சாரிகம் சரித்வா ஜேதவனம் ஆக³ந்த்வா ஸாயன்ஹஸமயே உபட்டா²னஸாலாயம் ஸன்னிஸின்னா அத்தனா க³தக³தட்டா²னேஸு ‘‘அஸுககா³மதோ அஸுககா³மக³மனட்டா²னே ஸமம் விஸமம் கத்³த³மப³ஹுலம் ஸக்க²ரப³ஹுலம் காளமத்திகம் தம்ப³மத்திக’’ந்தி பத²விகத²ம் கதே²ஸும். ஸத்தா² ஆக³ந்த்வா, ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா, ‘‘ப⁴ந்தே, அம்ஹேஹி விசரிதட்டா²னே பத²விகதா²யா’’தி வுத்தே, ‘‘பி⁴க்க²வே, ஏஸா பா³ஹிரபத²வீ நாம, தும்ஹேஹி அஜ்ஜு²த்திகபத²வியம் பரிகம்மம் காதும் வட்டதீ’’தி வத்வா இமா த்³வே கா³தா² அபா⁴ஸி –

44. ‘‘கோ இமம் பத²விம் விசேஸ்ஸதி,

யமலோகஞ்ச இமம் ஸதே³வகம்;

கோ த⁴ம்மபத³ம் ஸுதே³ஸிதம்,

குஸலோ புப்ப²மிவ பசேஸ்ஸதி.

45. ‘‘ஸேகோ² பத²விம் விசேஸ்ஸதி,

யமலோகஞ்ச இமம் ஸதே³வகம்;

ஸேகோ² த⁴ம்மபத³ம் ஸுதே³ஸிதம்,

குஸலோ புப்ப²மிவ பசேஸ்ஸதீ’’தி.

தத்த² கோ இமந்தி கோ இமம் அத்தபா⁴வஸங்கா²தம் பத²விம். விசேஸ்ஸதீதி அத்தனோ ஞாணேன விசினிஸ்ஸதி விஜானிஸ்ஸதி, படிவிஜ்ஜி²ஸ்ஸதி, ஸச்சி²கரிஸ்ஸதீதி அத்தோ². யமலோகஞ்சாதி சதுப்³பி³த⁴ம் அபாயலோகஞ்ச. இமம் ஸதே³வகந்தி இமம் மனுஸ்ஸலோகஞ்ச தே³வலோகேன ஸத்³தி⁴ம் கோ விசேஸ்ஸதி விசினிஸ்ஸதி விஜானிஸ்ஸதி படிவிஜ்ஜி²ஸ்ஸதி ஸச்சி²கரிஸ்ஸதீதி புச்சி². கோத⁴ம்மபத³ம் ஸுதே³ஸிதந்தி யதா²ஸபா⁴வதோ கதி²தத்தா ஸுதே³ஸிதம் ஸத்ததிம்ஸபோ³தி⁴பக்கி²யத⁴ம்மஸங்கா²தம் த⁴ம்மபத³ம் குஸலோ மாலாகாரோ புப்ப²ம் விசினந்தோ விய கோ பசேஸ்ஸதி விசினிஸ்ஸதி விஜானிஸ்ஸதி உபபரிக்கி²ஸ்ஸதி படிவிஜ்ஜி²ஸ்ஸதி, ஸச்சி²கரிஸ்ஸதீதி அத்தோ². ஸேகோ²தி அதி⁴ஸீலஸிக்கா², அதி⁴சித்தஸிக்கா², அதி⁴பஞ்ஞாஸிக்கா²தி இமா திஸ்ஸோ ஸிக்கா² ஸிக்க²னதோ ஸோதாபத்திமக்³க³ட்ட²ம் ஆதி³ம் கத்வா யாவ அரஹத்தமக்³க³ட்டா² ஸத்தவிதோ⁴ ஸேகோ² இமம் அத்தபா⁴வஸங்கா²தம் பத²விம் அரஹத்தமக்³கே³ன ததோ ச²ந்த³ராக³ம் அபகட்³ட⁴ந்தோ விசேஸ்ஸதி விசினிஸ்ஸதி விஜானிஸ்ஸதி படிவிஜ்ஜி²ஸ்ஸதி ஸச்சி²கரிஸ்ஸதி. யமலோகஞ்சாதி தம் யதா²வுத்தபகாரம் யமலோகஞ்ச இமம் மனுஸ்ஸலோகஞ்ச ஸஹ தே³வேஹி ஸதே³வகம் ஸ்வேவ விசேஸ்ஸதி விசினிஸ்ஸதி விஜானிஸ்ஸதி படிவிஜ்ஜி²ஸ்ஸதி ஸச்சி²கரிஸ்ஸதி. ஸேகோ²தி ஸ்வேவ ஸத்தவிதோ⁴ ஸேகோ², யதா² நாம குஸலோ மாலாகாரோ புப்பா²ராமம் பவிஸித்வா தருணமகுளானி ச பாணகவித்³தா⁴னி ச மிலாதானி ச க³ண்டி²கஜாதானி ச புப்பா²னி வஜ்ஜேத்வா ஸோப⁴னானி ஸுஜாதஸுஜாதானேவ புப்பா²னி விசினாதி, ஏவமேவ இமம் ஸுகதி²தம் ஸுனித்³தி³ட்ட²ம் போ³தி⁴பக்கி²யத⁴ம்மபத³ம்பி பஞ்ஞாய பசேஸ்ஸதி விசினிஸ்ஸதி உபபரிக்கி²ஸ்ஸதி படிவிஜ்ஜி²ஸ்ஸதி ஸச்சி²கரிஸ்ஸதீதி ஸத்தா² ஸயமேவ பஞ்ஹம் விஸ்ஸஜ்ஜேஸி.

தே³ஸனாவஸானே பஞ்சஸதாபி பி⁴க்கூ² ஸஹ படிஸம்பி⁴தா³ஹி அரஹத்தம் பாபுணிம்ஸு. ஸம்பத்தபரிஸாயபி ஸாத்தி²கா த⁴ம்மதே³ஸனா அஹோஸீதி.

பத²விகதா²பஸுதபஞ்சஸதபி⁴க்கு²வத்து² பட²மம்.

2. மரீசிகம்மட்டா²னிகத்தே²ரவத்து²

பே²ணூபமந்தி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ அஞ்ஞதரம் மரீசிகம்மட்டா²னிகம் பி⁴க்கு²ம் ஆரப்³ப⁴ கதே²ஸி.

ஸோ கிர பி⁴க்கு² ஸத்து² ஸந்திகே கம்மட்டா²னம் க³ஹேத்வா, ‘‘ஸமணத⁴ம்மம் கரிஸ்ஸாமீ’’தி அரஞ்ஞம் பவிஸித்வா க⁴டேத்வா வாயமித்வா அரஹத்தம் பத்தும் அஸக்கோந்தோ ‘‘விஸேஸேத்வா கம்மட்டா²னம் கதா²பேஸ்ஸாமீ’’தி ஸத்து² ஸந்திகம் ஆக³ச்ச²ந்தோ அந்தராமக்³கே³ மரீசிம் தி³ஸ்வா, ‘‘யதா² அயம் கி³ம்ஹஸமயே உட்டி²தா மரீசி தூ³ரே டி²தானம் ரூபக³தா விய பஞ்ஞாயதி, ஸந்திகம் ஆக³ச்ச²ந்தானம் நேவ பஞ்ஞாயதி, அயம் அத்தபா⁴வோபி உப்பாத³வயட்டே²ன ஏவரூபோ’’தி மரீசிகம்மட்டா²னம் பா⁴வேந்தோ ஆக³ந்த்வா மக்³க³கிலந்தோ அசிரவதியம் ந்ஹாயித்வா ஏகஸ்மிம் சண்ட³ஸோததீரே ருக்க²சா²யாய நிஸின்னோ உத³கவேகா³பி⁴கா⁴தேன உட்ட²ஹித்வா மஹந்தே மஹந்தே பே²ணபிண்டே³ பி⁴ஜ்ஜமானே தி³ஸ்வா, ‘‘அயம் அத்தபா⁴வோபி உப்பஜ்ஜித்வா பி⁴ஜ்ஜனட்டே²ன ஏவரூபோயேவா’’தி ஆரம்மணம் அக்³க³ஹேஸி. ஸத்தா² க³ந்த⁴குடியம் டி²தோவ தம் தே²ரம் தி³ஸ்வா, ‘‘ஏவமேவ, பி⁴க்கு², ஏவரூபோவாயம் அத்தபா⁴வோ பே²ணபிண்டோ³ விய மரீசி விய உப்பஜ்ஜனபி⁴ஜ்ஜனஸபா⁴வோயேவா’’தி வத்வா இமம் கா³த²மாஹ –

46. ‘‘பே²ணூபமம் காயமிமம் விதி³த்வா,

மரீசித⁴ம்மம் அபி⁴ஸம்பு³தா⁴னோ;

சே²த்வான மாரஸ்ஸ பபுப்ப²கானி,

அத³ஸ்ஸனம் மச்சுராஜஸ்ஸ க³ச்சே²’’தி.

தத்த² பே²ணூபமந்தி இமம் கேஸாதி³ஸமூஹஸங்கா²தம் காயம் அப³லது³ப்³ப³லட்டே²ன அனத்³த⁴னியதாவகாலிகட்டே²ன பே²ணபிண்ட³ஸரிக்க²கோதி விதி³த்வா. மரீசித⁴ம்மந்தி யதா² மரீசி தூ³ரே டி²தானம் ரூபக³தா விய க³ய்ஹூபகா³ விய ஹோதி, ஸந்திகே உபக³ச்ச²ந்தானம் ரித்தா துச்சா² அக³ய்ஹூபகா³ ஸம்பஜ்ஜதி, ஏவமேவ க²ணிகஇத்தரபச்சுபட்டா²னட்டே²ன அயம் காயோபி மரீசித⁴ம்மோதி அபி⁴ஸம்பு³தா⁴னோ பு³ஜ்ஜ²ந்தோ, ஜானந்தோதி அத்தோ². மாரஸ்ஸ பபுப்ப²கானீதி மாரஸ்ஸ பபுப்ப²கஸங்கா²தானி தேபூ⁴மகானி வட்டானி அரியமக்³கே³ன சி²ந்தி³த்வா கீ²ணாஸவோ பி⁴க்கு² மச்சுராஜஸ்ஸ அத³ஸ்ஸனம் அவிஸயம் அமதமஹானிப்³பா³னம் க³ச்சே²ய்யாதி.

கா³தா²பரியோஸானே தே²ரோ ஸஹ படிஸம்பி⁴தா³ஹி அரஹத்தம் பத்வா ஸத்து² ஸுவண்ணவண்ணம் ஸரீரம் தோ²மேந்தோ வண்ணேந்தோ வந்த³ந்தோவ ஆக³தோதி.

மரீசிகம்மட்டா²னிகத்தே²ரவத்து² து³தியம்.

3. விடடூப⁴வத்து²

புப்பா²னிஹேவ பசினந்தந்தி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ ஸபரிஸம் மஹோகே⁴ன அஜ்ஜோ²த்த²ரித்வா மாரிதம் விடடூப⁴ம் ஆரப்³ப⁴ கதே²ஸி.

தத்ராயம் அனுபுப்³பி³கதா² – ஸாவத்தி²யஞ்ஹி மஹாகோஸலரஞ்ஞோ புத்தோ பஸேனதி³குமாரோ நாம. வேஸாலியம் லிச்ச²விரஞ்ஞோ புத்தோ லிச்ச²விகுமாரோ மஹாலி நாம, குஸினாராயம் மல்லராஜபுத்தோ ப³ந்து⁴லோ நாமாதி இமே தயோ தி³ஸாபாமோக்க²ஸ்ஸாசரியஸ்ஸ ஸந்திகே ஸிப்புக்³க³ஹணத்த²ம் தக்கஸிலம் க³ந்த்வா ப³ஹினக³ரே ஸாலாய ஸமாக³தா அஞ்ஞமஞ்ஞஸ்ஸ ஆக³தகாரணஞ்ச குலஞ்ச நாமஞ்ச புச்சி²த்வா ஸஹாயகா ஹுத்வா ஏகதோவ ஆசரியம் உபஸங்கமித்வா ஸிப்பம் ஸிக்க²ந்தா ந சிரஸ்ஸேவ உக்³க³ஹிதஸிப்பா ஆசரியம் ஆபுச்சி²த்வா ஏகதோவ நிக்க²மித்வா ஸகஸகட்டா²னானி அக³மம்ஸு. தேஸு பஸேனதி³குமாரோ பிது ஸிப்பம் த³ஸ்ஸேத்வா பஸன்னேன பிதரா ரஜ்ஜே அபி⁴ஸித்தோ. மஹாலிகுமாரோ லிச்ச²வீனம் ஸிப்பம் த³ஸ்ஸேந்தோ மஹந்தேன உஸ்ஸாஹேன த³ஸ்ஸேஸி, தஸ்ஸ அக்கீ²னி பி⁴ஜ்ஜித்வா அக³மம்ஸு. லிச்ச²விராஜானோ ‘‘அஹோ வத அம்ஹாகம் ஆசரியோ அக்கி²வினாஸம் பத்தோ, ந நம் பரிச்சஜிஸ்ஸாம, உபட்ட²ஹிஸ்ஸாம ந’’ந்தி தஸ்ஸ ஸதஸஹஸ்ஸுட்டா²னகம் ஏகம் த்³வாரம் அத³ம்ஸு. ஸோ தம் நிஸ்ஸாய பஞ்சஸதே லிச்ச²விராஜபுத்தே ஸிப்பம் ஸிக்கா²பேந்தோ வஸி. ப³ந்து⁴லகுமாரோ ஸட்டி²ம் ஸட்டி²ம் வேளூ க³ஹேத்வா மஜ்ஜே² அயஸலாகம் பக்கி²பித்வா ஸட்டி²கலாபே உஸ்ஸாபேத்வா ட²பிதே மல்லராஜகுலேஹி ‘‘இமே கப்பேதூ’’தி வுத்தோ அஸீதிஹத்த²ம் ஆகாஸம் உல்லங்கி⁴த்வா அஸினா கப்பேந்தோ அக³மாஸி. ஸோ ஓஸானகலாபே அயஸலாகாய ‘‘கிரீ’’தி ஸத்³த³ம் ஸுத்வா, ‘‘கிம் ஏத’’ந்தி புச்சி²த்வா ஸப்³ப³கலாபேஸு அயஸலாகானம் ட²பிதபா⁴வம் ஞத்வா அஸிம் ச²ட்³டே³த்வா ரோத³மானோ ‘‘மய்ஹம் ஏத்தகேஸு ஞாதிஸுஹஜ்ஜேஸு ஏகோபி ஸஸினேஹோ ஹுத்வா இமம் காரணம் நாசிக்கி². ஸசே ஹி அஹம் ஜானேய்யம், அயஸலாகாய ஸத்³த³ம் அனுட்டா²பேந்தோவ சி²ந்தே³ய்ய’’ந்தி வத்வா, ‘‘ஸப்³பே³பிமே மாரேத்வா ரஜ்ஜம் கரேய்ய’’ந்தி மாதாபிதூனம் கதே²ஸி. தேஹி ‘‘பவேணிரஜ்ஜம் நாம, தாத, இத³ம் ந லப்³பா⁴ ஏவம் காது’’ந்தி நானப்பகாரேன வாரிதோ ‘‘தேன ஹி மம ஸஹாயகஸ்ஸ ஸந்திகம் க³மிஸ்ஸாமீ’’தி ஸாவத்தி²ம் அக³மாஸி.

பஸேனதி³ கோஸலோ ராஜா தஸ்ஸாக³மனம் ஸுத்வா பச்சுக்³க³ந்த்வா மஹந்தேன ஸக்காரேன தம் நக³ரம் பவேஸேத்வா ஸேனாபதிட்டா²னே ட²பேஸி. ஸோ மாதாபிதரோ பக்கோஸாபேத்வா தத்தே²வ வாஸம் கப்பேஸி. அதே²கதி³வஸம் ராஜா உபரிபாஸாதே³ டி²தோ அந்தரவீதி²ம் ஓலோகயமானோ ‘‘அனாத²பிண்டி³கஸ்ஸ சூளஅனாத²பிண்டி³கஸ்ஸ விஸாகா²ய ஸுப்பவாஸாயா’’தி ஏதேஸம் கே³ஹே நிச்சம் ப⁴த்தகிச்சத்தா²ய க³ச்ச²ந்தே அனேகஸஹஸ்ஸே பி⁴க்கூ² தி³ஸ்வா, ‘‘கஹம், அய்யா, க³ச்ச²ந்தீ’’தி புச்சி²த்வா, ‘‘தே³வ, அனாத²பிண்டி³கஸ்ஸ கே³ஹே நிச்சப⁴த்தஸலாகப⁴த்தகி³லானப⁴த்தாதீ³னம் அத்தா²ய தே³வஸிகம் த்³வே பி⁴க்கு²ஸஹஸ்ஸானி க³ச்ச²ந்தி, சூளஅனாத²பிண்டி³கஸ்ஸ கே³ஹே பஞ்சஸதானி, ததா² விஸாகா²ய ததா² ஸுப்பவாஸாயா’’தி வுத்தே ஸயம்பி பி⁴க்கு²ஸங்க⁴ம் உபட்ட²ஹிதுகாமோ விஹாரம் க³ந்த்வா பி⁴க்கு²ஸஹஸ்ஸேன ஸத்³தி⁴ம் ஸத்தா²ரம் நிமந்தேத்வா ஸத்தாஹம் ஸஹத்தா² தா³னம் த³த்வா ஸத்தமே தி³வஸே ஸத்தா²ரம் வந்தி³த்வா, ‘‘ப⁴ந்தே, பஞ்சஹி மே பி⁴க்கு²ஸதேஹி ஸத்³தி⁴ம் நிப³த்³த⁴ம் பி⁴க்க²ம் க³ண்ஹதா²’’தி ஆஹ. ‘‘மஹாராஜ பு³த்³தா⁴ நாம ஏகட்டா²னே நிப³த்³த⁴ம் பி⁴க்க²ம் ந க³ண்ஹந்தி, ப³ஹூ ஜனா பு³த்³தா⁴னம் ஆக³மனம் பச்சாஸீஸந்தீ’’தி. ‘‘தேன ஹி ஏகம் பி⁴க்கு²ம் நிப³த்³த⁴ம் பேஸேதா²’’தி ஆஹ. ஸத்தா² ஆனந்த³த்தே²ரஸ்ஸ பா⁴ரம் அகாஸி. ராஜா பி⁴க்கு²ஸங்கே⁴ ஆக³தே பத்தம் க³ஹேத்வா, ‘‘இமே நாம பரிவிஸந்தூ’’தி அவிசாரேத்வாவ ஸத்தாஹம் ஸயமேவ பரிவிஸித்வா அட்ட²மே தி³வஸே விக்கி²த்தசித்தோ பமஜ்ஜமகாஸி. ராஜகுலே நாம அனாணத்தா ஆஸனானி பஞ்ஞாபேத்வா பி⁴க்கூ² நிஸீதா³பேத்வா பரிவிஸிதும் ந லப⁴ந்தி ‘‘ந மயம் இத⁴ டா²தும் ஸக்கி²ஸ்ஸாமா’’தி ப³ஹூ பி⁴க்கூ² பக்கமிம்ஸு. ராஜா து³தியதி³வஸேபி பமஜ்ஜி, து³தியதி³வஸேபி ப³ஹூ பி⁴க்கூ² பக்கமிம்ஸு. ததியதி³வஸேபி பமஜ்ஜி, ததா³ ஆனந்த³த்தே²ரம் ஏககமேவ ட²பேத்வா அவஸேஸா பக்கமிம்ஸு. புஞ்ஞவந்தா நாம காரணவஸிகா ஹோந்தி, குலானம் பஸாத³ம் ரக்க²ந்தி. ததா²க³தஸ்ஸ ச ஸாரிபுத்தத்தே²ரோ மஹாமோக்³க³ல்லானத்தே²ரோதி த்³வே அக்³க³ஸாவகா, கே²மா உப்பலவண்ணாதி த்³வே அக்³க³ஸாவிகா, உபாஸகேஸு சித்தோ, க³ஹபதி, ஹத்த²கோ ஆளவகோதி த்³வே அக்³க³உபாஸகா, உபாஸிகாஸு வேளுகண்ட²கீ நந்த³மாதா, கு²ஜ்ஜுத்தராதி த்³வே அக்³க³உபாஸிகா, இதி இமே அட்ட² ஜனே ஆதி³ம் கத்வா டா²னந்தரபத்தா ஸப்³பே³பி ஸாவகா ஏகதே³ஸேன த³ஸன்னம் பாரமீனம் பூரிதத்தா மஹாபுஞ்ஞா அபி⁴னீஹாரஸம்பன்னா. ஆனந்த³த்தே²ரோபி கப்பஸதஸஹஸ்ஸம் பூரிதபாரமீ அபி⁴னீஹாரஸம்பன்னோ மஹாபுஞ்ஞோ அத்தனோ காரணவஸிகதாய குலஸ்ஸ பஸாத³ம் ரக்க²ந்தோ அட்டா²ஸி. தம் ஏககமேவ நிஸீதா³பேத்வா பரிவிஸிம்ஸு.

ராஜா பி⁴க்கூ²னம் க³தகாலே ஆக³ந்த்வா கா²த³னீயபோ⁴ஜனீயானி ததே²வ டி²தானி தி³ஸ்வா, ‘‘கிம், அய்யா, நாக³மிம்ஸூ’’தி புச்சி²த்வா, ‘‘ஆனந்த³த்தே²ரோ ஏககோவ ஆக³தோ தே³வா’’தி ஸுத்வா, ‘‘அத்³தா⁴ ஏத்தகம் மே ப⁴த்தச்சே²த³னமகம்ஸூ’’தி பி⁴க்கூ²னம் குத்³தோ⁴ ஸத்து² ஸந்திகம் க³ந்த்வா, ‘‘ப⁴ந்தே, மயா பஞ்சன்னம் பி⁴க்கு²ஸதானம் பி⁴க்கா² படியத்தா, ஆனந்த³த்தே²ரோ கிர ஏககோவாக³தோ, படியத்தா பி⁴க்கா² ததே²வ டி²தா, பஞ்சஸதா பி⁴க்கூ² மம கே³ஹே ஸஞ்ஞம் ந கரிம்ஸு, கிம் நு கோ² காரண’’ந்தி ஆஹ. ஸத்தா² பி⁴க்கூ²னம் தோ³ஸம் அவத்வா, ‘‘மஹாராஜ, மம ஸாவகானம் தும்ஹேஹி ஸத்³தி⁴ம் விஸ்ஸாஸோ நத்தி², தேன ந க³தா ப⁴விஸ்ஸந்தீ’’தி வத்வா குலானம் அனுபக³மனகாரணஞ்ச உபக³மனகாரணஞ்ச பகாஸேந்தோ பி⁴க்கூ² ஆமந்தேத்வா இமம் ஸுத்தமாஹ –

‘‘நவஹி, பி⁴க்க²வே, அங்கே³ஹி ஸமன்னாக³தம் குலம் அனுபக³ந்த்வா வா நாலம் உபக³ந்தும், உபக³ந்த்வா வா நாலம் உபனிஸீதி³தும். கதமேஹி நவஹி? ந மனாபேன பச்சுட்டே²ந்தி, ந மனாபேன அபி⁴வாதே³ந்தி, ந மனாபேன ஆஸனம் தே³ந்தி, ஸந்தமஸ்ஸ பரிகு³ஹந்தி, ப³ஹுகம்பி தோ²கம் தே³ந்தி, பணீதம்பி லூக²ம் தே³ந்தி, அஸக்கச்சம் தே³ந்தி நோ ஸக்கச்சம், ந உபனிஸீத³ந்தி த⁴ம்மஸ்ஸவனாய, பா⁴ஸிதமஸ்ஸ ந ஸுஸ்ஸூஸந்தி. இமேஹி கோ², பி⁴க்க²வே, நவஹங்கே³ஹி ஸமன்னாக³தம் குலம் அனுபக³ந்த்வா வா நாலம் உபக³ந்தும், உபக³ந்த்வா வா நாலம் உபனிஸீதி³தும்.

‘‘நவஹி, பி⁴க்க²வே, அங்கே³ஹி ஸமன்னாக³தம் குலம் அனுபக³ந்த்வா வா அலம் உபக³ந்தும், உபக³ந்த்வா வா அலம் உபனிஸீதி³தும். கதமேஹி நவஹி? மனாபேன பச்சுட்டே²ந்தி, மனாபேன அபி⁴வாதே³ந்தி, மனாபேன ஆஸனம் தே³ந்தி, ஸந்தமஸ்ஸ ந பரிகு³ஹந்தி, ப³ஹுகம்பி ப³ஹுகம் தே³ந்தி, பணீதம்பி பணீதம் தே³ந்தி, ஸக்கச்சம் தே³ந்தி நோ அஸக்கச்சம், உபனிஸீத³ந்தி த⁴ம்மஸ்ஸவனாய, பா⁴ஸிதமஸ்ஸ ஸுஸ்ஸூஸந்தி. இமேஹி கோ², பி⁴க்க²வே, நவஹங்கே³ஹி ஸமன்னாக³தம் குலம் அனுபக³ந்த்வா வா அலம் உபக³ந்தும், உபக³ந்த்வா வா அலம் உபனிஸீதி³து’’ந்தி (அ. நி. 9.17).

இதி கோ², மஹாராஜ, மம ஸாவகா தும்ஹாகம் ஸந்திகா விஸ்ஸாஸம் அலப⁴ந்தா ந க³தா ப⁴விஸ்ஸந்தீதி. போராணகபண்டி³தாபி ஹி அவிஸ்ஸாஸிகட்டா²னே ஸக்கச்சம் உபட்டி²யமானாபி மாரணந்திகம் வேத³னம் பத்வா விஸ்ஸாஸிகட்டா²னமேவ அக³மிம்ஸூதி. ‘‘கதா³, ப⁴ந்தே’’தி ரஞ்ஞா புட்டோ² அதீதம் ஆஹரி –

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே கேஸவோ நாம ராஜா ரஜ்ஜம் பஹாய இஸிபப்³ப³ஜ்ஜம் பப்³ப³ஜி. தம் பஞ்ச புரிஸஸதானி அனுபப்³ப³ஜிம்ஸு. ஸோ கேஸவதாபஸோ நாம அஹோஸி. பஸாத⁴னகப்பகோ பனஸ்ஸ அனுபப்³ப³ஜித்வா கப்பகோ நாம அந்தேவாஸிகோ அஹோஸி. கேஸவதாபஸோ பரிஸாய ஸத்³தி⁴ம் அட்ட² மாஸே ஹிமவந்தே வஸித்வா வஸ்ஸாரத்தஸமயே லோணம்பி³லஸேவனத்தா²ய பா³ராணஸிம் பத்வா பி⁴க்கா²ய பாவிஸி. அத² நம் ராஜா தி³ஸ்வா பஸீதி³த்வா சதுமாஸம் அத்தனோ ஸந்திகே வஸனத்தா²ய படிஞ்ஞம் க³ஹேத்வா உய்யானேவ வஸாபேந்தோ ஸயம் ஸாயம்பாதம் அஸ்ஸ உபட்டா²னம் க³ச்ச²தி. அவஸேஸா தாபஸா கதிபாஹம் வஸித்வா ஹத்தி²ஸத்³தா³தீ³ஹி உப்³பா³ள்ஹா ஹுத்வா உக்கண்டி²த்வா, ‘‘ஆசரிய, உக்கண்டி²தம்ஹா, க³ச்சா²மா’’தி ஆஹம்ஸு. ‘‘கஹம், தாதா’’தி? ‘‘ஹிமவந்தம், ஆசரியா’’தி. ராஜா அம்ஹாகம் ஆக³ததி³வஸேயேவ சதுமாஸம் இத⁴ வஸனத்தா²ய படிஞ்ஞம் க³ண்ஹி. ‘‘கத²ம் க³மிஸ்ஸத², தாதா’’தி? ‘‘தும்ஹேஹி அம்ஹாகம் அனாசிக்கி²த்வாவ படிஞ்ஞா தி³ன்னா, மயம் இத⁴ ந ஸக்கோம வஸிதும், இதோ அவிதூ³ரே தும்ஹாகம் பவத்திஸ்ஸவனட்டா²னே வஸிஸ்ஸாமா’’தி வந்தி³த்வா பக்கமிம்ஸு. கப்பந்தேவாஸிகேன ஸத்³தி⁴ம் ஆசரியோ ஓஹீயி.

ராஜா உபட்டா²னம் ஆக³தோ, ‘‘கஹம், அய்யா’’தி புச்சி². ‘‘ஸப்³பே³ உக்கண்டி²தம்ஹாதி வத்வா ஹிமவந்தம் க³தா, மஹாராஜா’’தி ஆஹ. கப்பகோபி ந சிரஸ்ஸேவ உக்கண்டி²த்வா ஆசரியேன புனப்புனம் வாரியமானோபி ‘‘ந ஸக்கோமீ’’தி வத்வா பக்காமி. இதரேஸம் பன ஸந்திகம் அக³ந்த்வா ஆசரியஸ்ஸ பவத்திம் ஸுணந்தோ அவிதூ³ரே டா²னே வஸி. அபரபா⁴கே³ ஆசரியஸ்ஸ அந்தேவாஸிகே அனுஸ்ஸரந்தஸ்ஸ குச்சி²ரோகோ³ உப்பஜ்ஜி. ராஜா வேஜ்ஜேஹி திகிச்சா²பேஸி, ரோகோ³ ந வூபஸம்மதி. தாபஸோ ஆஹ – ‘‘கிம், மஹாராஜ, இச்ச²ஸி மே ரோக³வூபஸம’’ந்தி? ‘‘ப⁴ந்தே, ஸசாஹம் ஸக்குணேய்யம், இதா³னேவ வோ பா²ஸுகம் கரேய்ய’’ந்தி. ‘‘மஹாராஜ, ஸசே மே பா²ஸுகம் இச்ச²ஸி, மம் அந்தேவாஸிகானம் ஸந்திகம் பேஸேஹீ’’தி. ராஜா ‘‘ஸாது⁴, ப⁴ந்தே’’தி தம் மஞ்சகே நிபஜ்ஜாபேத்வா நாரத³அமச்சப்பமுகே² சத்தாரோ அமச்சே ‘‘மம அய்யஸ்ஸ பவத்திம் ஞத்வா, மய்ஹம் ஸாஸனம் பஹிணேய்யாதா²’’தி உய்யோஜேஸி. கப்பந்தேவாஸிகோ ஆசரியஸ்ஸ ஆக³மனம் ஸுத்வா பச்சுக்³க³மனம் கத்வா இதரே ‘‘கஹ’’ந்தி வுத்தே, ‘‘அஸுகட்டா²னே கிர வஸந்தீ’’தி ஆஹ. தேபி ஆசரியஸ்ஸாக³மனபா⁴வம் ஸுத்வா தத்தே²வ ஸமோஸரித்வா ஆசரியஸ்ஸ உண்ஹோத³கம் த³த்வா ப²லாப²லம் அத³ம்ஸு. தம் க²ணஞ்ஞேவ ரோகோ³ வூபஸம்மதி. ஸோ கதிபாஹேனேவ ஸுவண்ணவண்ணோ அஹோஸி. அத² நம் நாரதோ³ புச்சி² –

‘‘மனுஸ்ஸிந்த³ம் ஜஹித்வான, ஸப்³ப³காமஸமித்³தி⁴னம்;

கத²ம் நு ப⁴க³வா கேஸீ, கப்பஸ்ஸ ரமதி அஸ்ஸமே.

‘‘ஸாதூ³னி ரமணீயானி, ஸந்தி வக்கா² மனோரமா;

ஸுபா⁴ஸிதானி கப்பஸ்ஸ, நாரத³ ரமயந்தி மம்.

‘‘ஸாலீனம் ஓத³னம் பு⁴ஞ்ஜே, ஸுசிம் மம்ஸூபஸேசனம்;

கத²ம் ஸாமாகனீவாரம், அலோணம் சா²த³யந்தி தம்.

‘‘ஸாது³ம் வா யதி³ வாஸாது³ம், அப்பம் வா யதி³ வா ப³ஹும்;

விஸ்ஸத்தோ² யத்த² பு⁴ஞ்ஜேய்ய, விஸ்ஸாஸபரமா ரஸா’’தி. (ஜா. 1.4.181-184);

ஸத்தா² இமம் த⁴ம்மதே³ஸனம் ஆஹரித்வா ஜாதகம் ஸமோதா⁴னேந்தோ ‘‘ததா³ ராஜா மோக்³க³ல்லானோ அஹோஸி, நாரதோ³ ஸாரிபுத்தோ, கப்பந்தேவாஸிகோ ஆனந்தோ³, கேஸவதாபஸோ அஹமேவா’’தி வத்வா, ‘‘ஏவம், மஹாராஜ, புப்³பே³பி பண்டி³தா மாரணந்திகம் வேத³னம் பத்வா விஸ்ஸாஸிகட்டா²னம் க³மிம்ஸு, மம ஸாவகா தும்ஹாகம் ஸந்திகே விஸ்ஸாஸம் ந லப⁴ந்தி மஞ்ஞே’’தி ஆஹ. ராஜா ‘‘பி⁴க்கு²ஸங்கே⁴ன ஸத்³தி⁴ம் மயா விஸ்ஸாஸம் காதும் வட்டதி, கத²ம் நு கோ² கரிஸ்ஸாமீதி ஸம்மாஸம்பு³த்³த⁴ஸ்ஸ ஞாதிதீ⁴தரம் மம கே³ஹே காதும் வட்டதி, ஏவம் ஸந்தே ‘த³ஹரா ச ஸாமணேரா ச ஸம்மாஸம்பு³த்³த⁴ஸ்ஸ ஞாதிராஜா’தி மம ஸந்திகம் விஸ்ஸத்தா² நிப³த்³த⁴ம் ஆக³மிஸ்ஸந்தீ’’தி சிந்தேத்வா – ‘‘ஏகம் மே தீ⁴தரம் தே³ந்தூ’’தி ஸாகியானம் ஸந்திகம் ஸாஸனம் பேஸேஸி. ‘‘கதரஸ்ஸ ஸக்யஸ்ஸ தீ⁴தா’’தி ச புச்சி²த்வா, ‘‘ஞத்வா ஆக³ச்சே²ய்யாதா²’’தி வத்வா தூ³தே ஆணாபேஸி. தூ³தா க³ந்த்வா ஸாகியே தா³ரிகம் யாசிம்ஸு. தே ஸன்னிபதித்வா, ‘‘பக்க²ந்தரிகோ ராஜா, ஸசே ந த³ஸ்ஸாம, வினாஸேஸ்ஸதி நோ, ந கோ² பன அம்ஹேஹி குலேன ஸதி³ஸோ, கிம் நு கோ² காதப்³ப³’’ந்தி மந்தயிம்ஸு. மஹானாமோ ‘‘மம தா³ஸியா குச்சி²ம்ஹி ஜாதா வாஸப⁴க²த்தியா நாம தீ⁴தா ரூபஸோப⁴க்³க³ப்பத்தா அத்தி², தம் த³ஸ்ஸாமா’’தி வத்வா தூ³தே ஆஹ – ‘‘ஸாது⁴, ரஞ்ஞோ தா³ரிகம் த³ஸ்ஸாமா’’தி. ‘‘ஸா கஸ்ஸ, தீ⁴தா’’தி? ‘‘ஸம்மாஸம்பு³த்³த⁴ஸ்ஸ சூளபிதுபுத்தஸ்ஸ மஹானாமஸ்ஸ ஸக்கஸ்ஸ தீ⁴தா வாஸப⁴க²த்தியா நாமா’’தி.

தே க³ந்த்வா ரஞ்ஞோ ஆரோசயிம்ஸு. ராஜா ‘‘யதி³ ஏவம், ஸாது⁴, ஸீக⁴ம் ஆனேத², க²த்தியா ச நாம ப³ஹுமாயா, தா³ஸிதீ⁴தரம்பி பஹிணேய்யும், பிதரா ஸத்³தி⁴ம் ஏகபா⁴ஜனே பு⁴ஞ்ஜந்திம் ஆனேய்யாதா²’’தி பேஸேஸி. தே க³ந்த்வா, ‘‘தே³வ, தும்ஹேஹி ஸத்³தி⁴ம் ஏகதோ பு⁴ஞ்ஜந்திம் ராஜா இச்ச²தீ’’தி ஆஹம்ஸு. மஹானாமோ ‘‘ஸாது⁴, தாதா’’தி தம் அலங்காராபேத்வா அத்தனோ போ⁴ஜனகாலே பக்கோஸாபேத்வா தாய ஸத்³தி⁴ம் ஏகதோ பு⁴ஞ்ஜனாகாரம் த³ஸ்ஸேத்வா தூ³தானம் நிய்யாதே³ஸி. தே தம் ஆதா³ய ஸாவத்தி²ம் க³ந்த்வா தம் பவத்திம் ரஞ்ஞோ ஆரோசேஸும். ராஜா துட்ட²மானஸோ தம் பஞ்சன்னம் இத்தி²ஸதானம் ஜேட்டி²கம் கத்வா அக்³க³மஹேஸிட்டா²னே அபி⁴ஸிஞ்சி. ஸா ந சிரஸ்ஸேவ ஸுவண்ணவண்ணம் புத்தம் விஜாயி.

அத²ஸ்ஸ நாமக்³க³ஹணதி³வஸே ராஜா தா³ரகஸ்ஸ அய்யகஸ்ஸ ஸந்திகம் பேஸேஸி ‘‘ஸக்யராஜதீ⁴தா வாஸப⁴க²த்தியா புத்தம் விஜாதா, கிமஸ்ஸ நாமம் கரோமா’’தி? தம் பன ஸாஸனம் க³ஹேத்வா க³தோ அமச்சோ தோ²கம் ப³தி⁴ரதா⁴துகோ, ஸோ க³ந்த்வா ரஞ்ஞோ அய்யகஸ்ஸ ஆரோசேஸி, ஸோ தம் ஸுத்வா ‘‘வாஸப⁴க²த்தியா புத்தம் அவிஜாயித்வாபி ஸப்³ப³ஜனம் அபி⁴ப⁴வி, இதா³னி பன ரஞ்ஞோ அதிவிய வல்லபா⁴ ப⁴விஸ்ஸதீ’’தி ஆஹ. ப³தி⁴ரோ அமச்சோ ‘‘வல்லபா⁴’’தி வசனம் து³ஸ்ஸுதம் ஸுத்வா ‘‘விடடூபோ⁴’’தி ஸல்லக்கே²த்வா ராஜானம் உபக³ந்த்வா, ‘‘தே³வ, குமாரஸ்ஸ கிர ‘விடடூபோ⁴’தி நாமம் கரோதா²’’தி ஆஹ. ராஜா ‘‘போராணகம் நோ குலஸந்தகம் நாமம் ப⁴விஸ்ஸதீ’’தி சிந்தேத்வா தம் நாமம் அகாஸி. அத²ஸ்ஸ த³ஹரகாலேயேவ ராஜா ‘‘ஸத்து² பியம் கரோமீ’’தி ஸேனாபதிட்டா²னம் அதா³ஸி.

ஸோ குமாரபரிஹாரேன வட்³ட⁴ந்தோ ஸத்தவஸ்ஸிககாலே அஞ்ஞேஸம் குமாரானம் மாதாமஹகுலதோ ஹத்தி²ரூபகஅஸ்ஸரூபகாதீ³னி ஆஹரியமானானி தி³ஸ்வா மாதரம் புச்சி² – ‘‘அம்ம, அஞ்ஞேஸம் மாதாமஹகுலதோ பண்ணாகாரோ ஆஹரீயதி, மய்ஹம் கோசி கிஞ்சி ந பேஸேஸி, கிம் த்வம் நிமாதா நிபிதா’’தி? அத² நம் ஸா, ‘‘தாத, தவ ஸக்யராஜானோ மாதாமஹா தூ³ரே பன வஸந்தி, தேன தே கிஞ்சி ந பேஸேந்தீ’’தி வஞ்சேஸி. ஸோளஸவஸ்ஸிககாலே, ‘‘அம்ம, தவ மாதாமஹகுலம் பஸ்ஸிதுகாமோம்ஹீ’’தி வத்வா, ‘‘அலம், தாத, கிம் தத்த² க³ந்த்வா கரிஸ்ஸதீ’’தி வாரியமானோபி புனப்புனம் யாசி. அத²ஸ்ஸ மாதா ‘‘தேன ஹி க³ச்சா²’’தி ஸம்படிச்சி². ஸோ பிது ஆரோசேத்வா மஹந்தேன பரிவாரேன நிக்க²மி. வாஸப⁴க²த்தியா புரேதரம் பண்ணம் பேஸேஸி – ‘‘அஹம் இத⁴ ஸுக²ம் வஸாமி, மாஸ்ஸ கிஞ்சி ஸாமினோ அந்தரம் த³ஸ்ஸயிம்ஸூ’’தி. ஸாகியா விடடூப⁴ஸ்ஸ ஆக³மனம் ஞத்வா, ‘‘வந்தி³தும் ந ஸக்கோமா’’தி தஸ்ஸ த³ஹரத³ஹரே குமாரே ஜனபத³ம் பஹிணித்வா தஸ்மிம் கபிலபுரம் ஸம்பத்தே ஸந்தா²கா³ரே ஸன்னிபதிம்ஸு. குமாரோ தத்த² க³ந்த்வா அட்டா²ஸி.

அத² நம் ‘‘அயம் தே, தாத, மாதாமஹோ, அயம் மாதுலோ’’தி வத்வா வந்தா³பேஸும். ஸோ ஸப்³பே³ வந்த³மானோ விசரித்வா ஏகம்பி அத்தானம் வந்த³ந்தம் அதி³ஸ்வா ‘‘கிம் நு கோ² மம் வந்த³ந்தா நத்தீ²’’தி புச்சி². ஸாகியா, ‘‘தாத, தே கனிட்ட²குமாரா ஜனபத³ம் க³தா’’தி வத்வா தஸ்ஸ மஹந்தம் ஸக்காரம் கரிம்ஸு. ஸோ கதிபாஹம் வஸித்வா மஹந்தேன பரிவாரேன நிக்க²மி. அதே²கா தா³ஸீ ஸந்தா²கா³ரே தேன நிஸின்னப²லகம் ‘‘இத³ம் வாஸப⁴க²த்தியாய தா³ஸியா புத்தஸ்ஸ நிஸின்னப²லக’’ந்தி அக்கோஸித்வா பரிபா⁴ஸித்வா கீ²ரோத³கேன தோ⁴வி. ஏகோ புரிஸோ அத்தனோ ஆவுத⁴ம் பமுஸ்ஸித்வா நிவத்தோ தம் க³ண்ஹந்தோ விடடூப⁴குமாரஸ்ஸ அக்கோஸனஸத்³த³ம் ஸுத்வா தம் காரணம் புச்சி²த்வா, ‘‘வாஸப⁴க²த்தியா தா³ஸியா குச்சி²ம்ஹி மஹானாமஸக்கம் படிச்ச ஜாதா’’தி ஞத்வா ப³லகாயஸ்ஸ கதே²ஸி. ‘‘வாஸப⁴க²த்தியா கிர தா³ஸிதீ⁴தா’’தி மஹாகோலாஹலம் அஹோஸி. தம் ஸுத்வா விடடூபோ⁴ ‘‘ஏதே தாவ மம நிஸின்னப²லகம் கீ²ரோத³கேன தோ⁴வந்து, அஹம் பன ரஜ்ஜே பதிட்டி²தகாலே ஏதேஸம் க³லலோஹிதம் க³ஹேத்வா மம நிஸின்னப²லகம் தோ⁴விஸ்ஸாமீ’’தி சித்தம் பட்ட²பேஸி. தஸ்மிம் ஸாவத்தி²ம் க³தே அமச்சா தம் பவத்திம் ரஞ்ஞோ ஆரோசயிம்ஸு. ராஜா ‘‘மய்ஹம் தா³ஸிதீ⁴தரம் அத³ம்ஸூ’’தி ஸாகியானம் குஜ்ஜி²த்வா வாஸப⁴க²த்தியாய ச புத்தஸ்ஸ ச தி³ன்னபரிஹாரம் அச்சி²ந்தி³த்வா தா³ஸதா³ஸீஹி லத்³த⁴ப்³ப³மத்தமேவ தா³பேஸி.

ததோ கதிபாஹச்சயேன ஸத்தா² ராஜனிவேஸனம் க³ந்த்வா பஞ்ஞத்தாஸனே நிஸீதி³. ராஜா ஆக³ந்த்வா வந்தி³த்வா, ‘‘ப⁴ந்தே, தும்ஹாகம் கிர ஞாதகேஹி தா³ஸிதீ⁴தா மய்ஹம் தி³ன்னா, தேனஸ்ஸா அஹம் ஸபுத்தாய பரிஹாரம் அச்சி²ந்தி³த்வா தா³ஸதா³ஸீஹி லத்³த⁴ப்³ப³மத்தமேவ தா³பேஸி’’ந்தி ஆஹ. ஸத்தா² ‘‘அயுத்தம், மஹாராஜ, ஸாகியேஹி கதம், த³த³ந்தேஹி நாம ஸமானஜாதிகா தா³தப்³பா³ அஸ்ஸ, தம் பன, மஹாராஜ, வதா³மி, வாஸப⁴க²த்தியா க²த்தியராஜதீ⁴தா க²த்தியரஞ்ஞோ கே³ஹே அபி⁴ஸேகம் லபி⁴. விடடூபோ⁴பி க²த்தியராஜானமேவ படிச்ச ஜாதோ, மாதுகோ³த்தம் நாம கிம் கரிஸ்ஸதி, பிதுகோ³த்தமேவ பமாணந்தி. போராணகபண்டி³தா த³லித்³தி³த்தி²யா கட்ட²ஹாரிகாய அக்³க³மஹேஸிட்டா²னம் அத³ம்ஸு, தஸ்ஸா ச குச்சி²ம்ஹி ஜாதகுமாரோ த்³வாத³ஸயோஜனிகாய பா³ராணஸியா ரஜ்ஜம் பத்வா கட்ட²வாஹனராஜா நாம ஜாதோ’’தி கட்ட²ஹாரிஜாதகம் (ஜா. 1.1.7) கதே²ஸி. ராஜா த⁴ம்மகத²ம் ஸுத்வா ‘‘பிதுகோ³த்தமேவ கிர பமாண’’ந்தி துஸ்ஸித்வா வாஸப⁴க²த்தியாய ச புத்தஸ்ஸ ச பகதிபரிஹாரமேவ தா³பேஸி.

ப³ந்து⁴லஸேனாபதிஸ்ஸபி கோ² குஸினாராயம் மல்லராஜதீ⁴தா மல்லிகா நாம ப⁴ரியா தீ³க⁴ரத்தம் புத்தம் ந விஜாயி. அத² நம் ப³ந்து⁴லோ ‘‘அத்தனோ குலக⁴ரமேவ க³ச்சா²’’தி உய்யோஜேஸி. ஸா ‘‘ஸத்தா²ரம் தி³ஸ்வாவ க³மிஸ்ஸாமீ’’தி ஜேதவனம் பவிஸித்வா ததா²க³தம் வந்தி³த்வா டி²தா, ‘‘கஹம் க³ச்ச²ஸீ’’தி வுத்தா ‘‘ஸாமிகோ மம் ப⁴ந்தே, குலக⁴ரம் பேஸேதீ’’ ஆஹ. ‘‘கிம் காரணா’’தி? ‘‘வஞ்ஜா² கிரஸ்மி அபுத்திகா’’தி. ‘‘யதி³ ஏவம், க³மனகிச்சம் நத்தி², நிவத்தஸ்ஸூ’’தி. ஸா துட்ட²மானஸா ஸத்தா²ரம் வந்தி³த்வா நிவேஸனம் க³ந்த்வா ‘‘கஸ்மா நிவத்தாஸீ’’தி வுத்தா ‘‘த³ஸப³லேன நிவத்திதாம்ஹீ’’தி ஆஹ ப³ந்து⁴லோ ‘‘தி³ட்ட²ம் ப⁴விஸ்ஸதி தீ³க⁴த³ஸ்ஸினா காரண’’ந்தி ஸம்படிச்சி². ஸா ந சிரஸ்ஸேவ க³ப்³ப⁴ம் படிலபி⁴த்வா உப்பன்னதா³ஹளா ‘‘தோ³ஹளோ மே உப்பன்னோ’’தி ஆரோசேஸி. ‘‘கிம் தோ³ஹளோ’’தி? ‘‘வேஸாலினக³ரே க³ணராஜகுலானம் அபி⁴ஸேகமங்க³லபோக்க²ரணியம் ஓதரித்வா ந்ஹத்வா பானீயம் பாதுகாமாம்ஹி, ஸாமீ’’தி. ப³ந்து⁴லோ ‘‘ஸாதூ⁴’’தி வத்வா ஸஹஸ்ஸதா²மத⁴னும் க³ஹேத்வா தம் ரத²ம் ஆரோபேத்வா ஸாவத்தி²தோ நிக்க²மித்வா ரத²ம் பாஜேந்தோ மஹாலிலிச்ச²வினோ தி³ன்னத்³வாரேன வேஸாலிம் பாவிஸி. மஹாலிலிச்ச²வினோ ச த்³வாரஸமீபே ஏவ நிவேஸனம் ஹோதி. ஸோ ரத²ஸ்ஸ உம்மாரே பனிகா⁴தஸத்³த³ம் ஸுத்வாவ ‘‘ப³ந்து⁴லஸ்ஸ ரத²ஸத்³தோ³ ஏஸோ, அஜ்ஜ லிச்ச²வீனம் ப⁴யம் உப்பஜ்ஜிஸ்ஸதீ’’தி ஆஹ.

போக்க²ரணியா அந்தோ ச ப³ஹி ச ஆரக்கா² ப³லவதீ, உபரி லோஹஜாலம் பத்த²டம், ஸகுணானம்பி ஓகாஸோ நத்தி². ப³ந்து⁴லஸேனாபதி பன ரதா² ஓதரித்வா ஆரக்க²கே மனுஸ்ஸே வேத்தேன பஹரந்தோ பலாபேத்வா லோஹஜாலம் சி²ந்தி³த்வா அந்தோபோக்க²ரணீயம் ப⁴ரியம் ந்ஹாபேத்வா ஸயம்பி ந்ஹத்வா புன தம் ரத²ம் ஆரோபேத்வா நக³ரா நிக்க²மித்வா ஆக³தமக்³கே³னேவ பாயாஸி. தே ஆரக்க²மனுஸ்ஸா லிச்ச²விராஜூனம் ஆரோசேஸும். லிச்ச²விராஜானோ குஜ்ஜி²த்வா பஞ்ச ரத²ஸதானி ஆருய்ஹ ‘‘ப³ந்து⁴லமல்லம் க³ண்ஹிஸ்ஸாமா’’தி நிக்க²மிம்ஸு. தம் பவத்திம் மஹாலிஸ்ஸ ஆரோசேஸும். மஹாலி, ‘‘மா க³மித்த², ஸோ ஹி வோ ஸப்³பே³ கோ⁴தேஸ்ஸதீ’’தி ஆஹ. தேபி ‘‘மயம் க³மிஸ்ஸாம ஏவா’’தி வதி³ம்ஸு. ‘‘தேன ஹி தஸ்ஸ ரத²சக்கஸ்ஸ யாவ நாபி⁴தோ பத²விம் பவிட்ட²ட்டா²னம் தி³ஸ்வா நிவத்தேய்யாத², ததோ அனிவத்தந்தா புரதோ அஸனிஸத்³த³ம் விய ஸுணிஸ்ஸத², தம்ஹா டா²னா நிவத்தேய்யாத². ததோ அனிவத்தந்தா தும்ஹாகம் ரத²து⁴ரேஸு சி²த்³த³ம் பஸ்ஸிஸ்ஸத², தம்ஹா டா²னா நிவத்தேய்யாத², புரதோ மா க³மித்தா²’’தி. தே தஸ்ஸ வசனேன அனிவத்தித்வா தம் அனுப³ந்தி⁴ம்ஸு ஏவ. மல்லிகா தி³ஸ்வா, ‘‘ரதா², ஸாமி, பஞ்ஞாயந்தீ’’தி ஆஹ. ‘‘தேன ஹி ஏகஸ்ஸேவ ரத²ஸ்ஸ பஞ்ஞாயனகாலே மம் ஆரோசேய்யாஸீ’’தி. ஸா யதா³ ஸப்³பே³ ரதா² ஏகோ விய ஹுத்வா பஞ்ஞாயிம்ஸு, ததா³ ‘‘ஏகமேவ, ஸாமி, ரத²ஸீஸம் பஞ்ஞாயதீ’’தி ஆஹ. ப³ந்து⁴லோ ‘‘தேன ஹி இமா ரஸ்மியோ க³ண்ஹாஹீ’’தி தஸ்ஸா ரஸ்மியோ த³த்வா ரதே² டி²தோவ த⁴னும் ஆரோபேஸி, ரத²சக்கம் யாவ நாபி⁴தோ பத²விம் பாவிஸி.

லிச்ச²வினோ தம் டா²னம் தி³ஸ்வாபி ந நிவத்திம்ஸு. இதரோ தோ²கம் க³ந்த்வா ஜியம் போதே²ஸி, அஸனிஸத்³தோ³ விய அஹோஸி. தே ததோபி ந நிவத்திம்ஸு, அனுப³ந்த⁴ந்தா க³ச்ச²ந்தேவ. ப³ந்து⁴லோ ரதே² டி²தகோவ ஏகஸரம் கி²பி, ஸோ பஞ்சன்னம் ரத²ஸதானம் ரத²ஸீஸே சி²த்³த³ம் கத்வா பஞ்ச ராஜஸதானி பரிகரப³ந்த⁴னட்டா²னே வினிவிஜ்ஜி²த்வா பத²விம் பாவிஸி. தே அத்தனோ பவித்³த⁴பா⁴வம் அஜானித்வா, ‘‘திட்ட², ரே, திட்ட², ரே’’தி வத³ந்தா அனுப³ந்தி⁴ம்ஸு ஏவ. ப³ந்து⁴லோ ரத²ம் ட²பேத்வா ‘‘தும்ஹே மதகா, மதகேஹி ஸத்³தி⁴ம் மய்ஹம் யுத்³த⁴ம் நாம நத்தீ²’’தி ஆஹ. ‘‘மதகா நாம அம்ஹாதி³ஸா ந ஹோந்தீ’’தி. ‘‘தேன ஹி ஸப்³ப³பச்சி²மஸ்ஸ பரிகரம் மோசேதா²’’தி. தே மோசயிம்ஸு. ஸோ முத்தமத்தே ஏவ மரித்வா பதிதோ. அத² தே ஸப்³பே³பி ‘‘தும்ஹே ஏவரூபா, அத்தனோ க⁴ரானி க³ந்த்வா ஸம்விதா⁴தப்³ப³ம் ஸம்வித³ஹித்வா புத்ததா³ரம் அனுஸாஸித்வா ஸன்னாஹம் மோசேதா²’’தி ஆஹ. தே ததா² கத்வா ஸப்³பே³பி ஜீவிதக்க²யம் பத்தா. ப³ந்து⁴லோபி மல்லிகம் ஸாவத்தி²ம் ஆனேஸி. ஸா ஸோளஸக்க²த்தும் யமகே யமகே புத்தே விஜாயி. ஸப்³பே³பி ஸூரா தா²மஸம்பன்னா அஹேஸும், ஸப்³ப³ஸிப்பானம் நிப்ப²த்திம் பாபுணிம்ஸு. ஏகேகஸ்ஸ புரிஸஸஹஸ்ஸம் பரிவாரோ அஹோஸி. பிதரா ஸத்³தி⁴ம் ராஜனிவேஸனம் க³ச்ச²ந்தேஹி தேஹேவ ராஜங்க³ணம் பரிபூரி.

அதே²கதி³வஸம் வினிச்ச²யே கூடட்டபராஜிதா மனுஸ்ஸா ப³ந்து⁴லம் ஆக³ச்ச²ந்தம் தி³ஸ்வா மஹாவிரவம் விரவந்தா வினிச்ச²யஅமச்சானம் கூடட்டகரணம் தஸ்ஸ ஆரோசேஸும். ஸோ வினிச்ச²யம் க³ந்த்வா தம் அட்டம் விசாரேத்வா ஸாமிகமேவ ஸாமிகம் அகாஸி. மஹாஜனோ மஹாஸத்³தே³ன ஸாது⁴காரம் பவத்தேதி. ராஜா ‘‘கிம் இத³’’ந்தி புச்சி²த்வா தமத்த²ம் ஸுத்வா துஸ்ஸித்வா ஸப்³பே³பி தே அமச்சே ஹாரேத்வா ப³ந்து⁴லஸ்ஸேவ வினிச்ச²யம் நிய்யாதே³ஸி. ஸோ ததோ பட்டா²ய ஸம்மா வினிச்ச²யி. ததோ தே போராணகவினிச்ச²யிகா அமச்சா கிஞ்சி லஞ்ஜம் அலப⁴ந்தா அப்பலாபா⁴ ஹுத்வா ‘‘ப³ந்து⁴லோ ரஜ்ஜம் பத்தே²தீ’’தி ராஜகுலே பரிபி⁴ந்தி³ம்ஸு. ராஜா தேஸம் கத²ம் ஸத்³த³ஹித்வா சித்தம் நிக்³க³ஹேதும் நாஸக்கி². ‘‘இமஸ்மிம் இதே⁴வ கா⁴தியமானே க³ரஹா மே உப்பஜ்ஜிஸ்ஸதீ’’தி புன சிந்தேத்வா பயுத்தபுரிஸேஹி பச்சந்தம் பஹாராபேத்வா ப³ந்து⁴லம் பக்கோஸாபேத்வா, ‘‘பச்சந்தோ கிர குபிதோ, தவ புத்தேஹி ஸத்³தி⁴ம் க³ந்த்வா, சோரே க³ண்ஹாஹீ’’தி பஹிணித்வா, ‘‘ஏத்தே²வஸ்ஸ த்³வத்திம்ஸாய புத்தேஹி ஸத்³தி⁴ம் ஸீஸம் சி²ந்தி³த்வா ஆஹரதா²’’தி தேஹி ஸத்³தி⁴ம் அஞ்ஞேபி ஸமத்தே² மஹாயோதே⁴ பேஸேஸி. தஸ்மிம் பச்சந்தம் க³ச்ச²ந்தேயேவ ‘‘ஸேனாபதி கிர ஆக³ச்ச²தீ’’தி பயுத்தசோரா பலாயிம்ஸு. ஸோ தம் பதே³ஸம் ஆவாஸாபேத்வா ஸண்டா²பேத்வா நிவத்தி.

அத²ஸ்ஸ நக³ரதோ அவிதூ³ரே டா²னே தே யோதா⁴ புத்தேஹி ஸத்³தி⁴ம் ஸீஸம் சி²ந்தி³ம்ஸு. தம் தி³வஸம் மல்லிகாய பஞ்சஹி பி⁴க்கு²ஸதேஹி ஸத்³தி⁴ம் த்³வே அக்³க³ஸாவகா நிமந்திதா ஹோந்தி. அத²ஸ்ஸா புப்³ப³ண்ஹே ஏவ ‘‘ஸாமிகஸ்ஸ தே ஸத்³தி⁴ம் புத்தேஹி ஸீஸம் சி²ன்ன’’ந்தி பண்ணம் ஆஹரித்வா அத³ம்ஸு. ஸா தம் பவத்திம் ஞத்வா கஸ்ஸசி கிஞ்சி அவத்வா பண்ணம் உச்ச²ங்கே³ ட²பேத்வா பி⁴க்கு²ஸங்க⁴மேவ பரிவிஸி. அத²ஸ்ஸா பரிசாரிகாயோ பி⁴க்கூ²னம் ப⁴த்தம் த³த்வா ஸப்பிசாடிம் ஆஹரந்தியோ தே²ரானம் புரதோ ஸப்பிசாடிம் பி⁴ந்தி³ம்ஸு. த⁴ம்மஸேனாபதி ‘‘பே⁴த³னத⁴ம்மம் பி⁴ன்னம், ந சிந்திதப்³ப³’’ந்தி ஆஹ. ஸா உச்ச²ங்க³தோ பண்ணம் நீஹரித்வா ‘‘த்³வத்திம்ஸாய புத்தேஹி ஸத்³தி⁴ம் பிதுஸீஸம் சி²ன்னந்தி மே இமம் பண்ணம் ஆஹரிம்ஸு, அஹம் இத³ம் ஸுத்வாபி ந சிந்தேமி, ஸப்பிசாடியா பி⁴ன்னாய கிம் சிந்தயிஸ்ஸாமி, ப⁴ந்தே’’தி ஆஹ. த⁴ம்மஸேனாபதி ‘‘அனிமித்தமனஞ்ஞாதம், மச்சானம் இத⁴ ஜீவித’’ந்திஆதீ³னி (ஸு. நி. 579) வத்வா த⁴ம்மம் தே³ஸேத்வா உட்டா²யாஸனா விஹாரம் அக³மாஸி. ஸாபி த்³வத்திம்ஸ ஸுணிஸாயோ பக்கோஸாபேத்வா, ‘‘தும்ஹாகம் ஸாமிகா நிரபராதா⁴ அத்தனோ புரிமகம்மப²லம் லபி⁴ம்ஸு, தும்ஹே மா ஸோசயித்த², மா பரிதே³வித்த², ரஞ்ஞோ உபரி மனோபதோ³ஸம் மா கரித்தா²’’தி ஓவதி³.

ரஞ்ஞோ சரபுரிஸா தம் கத²ம் ஸுத்வா க³ந்த்வா தேஸம் நித்³தோ³ஸபா⁴வம் ரஞ்ஞோ கத²யிம்ஸு. ராஜா ஸம்வேக³ப்பத்தோ தஸ்ஸா நிவேஸனம் க³ந்த்வா மல்லிகஞ்ச ஸுணிஸாயோ சஸ்ஸா க²மாபேத்வா மல்லிகாய வரம் அதா³ஸி. ஸா ‘‘வரோ க³ஹிதோ மே ஹோதூ’’தி வத்வா தஸ்மிம் க³தே மதகப⁴த்தம் த³த்வா ந்ஹத்வா ராஜானம் உபஸங்கமித்வா வந்தி³த்வா, ‘‘தே³வ, தும்ஹேஹி மய்ஹம் வரோ தி³ன்னோ, மய்ஹஞ்ச அஞ்ஞேன அத்தோ² நத்தி², த்³வத்திம்ஸாய மே ஸுணிஸானம் மமஞ்ச குலக⁴ரக³மனம் அனுஜானாதா²’’தி ஆஹ. ராஜா ஸம்படிச்சி². ஸா த்³வத்திம்ஸ ஸுணிஸாயோ யதா²ஸகானி குலானி பேஸேஸி, ஸயம்பி குஸினாரானக³ரே அத்தனோ குலக⁴ரம் அக³மாஸி.

ராஜாபி ப³ந்து⁴லஸேனாபதினோ பா⁴கி³னேய்யஸ்ஸ தீ³க⁴காராயனஸ்ஸ நாம ஸேனாபதிட்டா²னம் அதா³ஸி. ஸோ பன ‘‘மாதுலோ மே இமினா மாரிதோ’’தி ரஞ்ஞோ ஓதாரம் க³வேஸந்தோ விசரதி. ராஜாபி நிரபராத⁴ஸ்ஸ ப³ந்து⁴லஸ்ஸ மாரிதகாலதோ பட்டா²ய விப்படிஸாரீ ஹுத்வா சித்தஸ்ஸாத³ம் ந லப⁴தி, ரஜ்ஜஸுக²ம் நானுபோ⁴தி. ததா³ ஸத்தா² ஸக்யானம் மேதா³ளுபம் நாம நிக³மம் உபனிஸ்ஸாய விஹரதி. ராஜா தத்த² க³ந்த்வா ஆராமதோ அவிதூ³ரே க²ந்தா⁴வாரம் நிவாஸேத்வா, ‘‘மந்தே³ன பரிவாரேன ஸத்தா²ரம் வந்தி³ஸ்ஸாமீ’’தி விஹாரம் க³ந்த்வா பஞ்சராஜாககுத⁴ப⁴ண்டா³னி தீ³க⁴காராயனஸ்ஸ த³த்வா ஏககோவ க³ந்த⁴குடிம் பாவிஸி. ஸப்³ப³ம் த⁴ம்மசேதியஸுத்தநியாமேன (ம. நி. 2.364 ஆத³யோ) தீ³பேதப்³ப³ம். தஸ்மிம் க³ந்த⁴குடிம் பவிட்டே² தீ³க⁴காராயனோ தானி பஞ்ச ராஜககுத⁴ப⁴ண்டா³னி க³ஹேத்வா விடடூப⁴ம் ராஜானம் கத்வா ரஞ்ஞோ ஏகம் அஸ்ஸம் ஏகஞ்ச உபட்டா²னகாரிகம் மாதுகா³மம் ட²பேத்வா நிவத்தேத்வா ஸாவத்தி²ம் அக³மாஸி.

ராஜா ஸத்தா²ரா ஸத்³தி⁴ம் பியகத²ம் கதே²த்வா ஸத்தா²ரம் வந்தி³த்வா நிக்க²ந்தோ ஸேனம் அதி³ஸ்வா தம் மாதுகா³மம் புச்சி²த்வா தம் பவத்திம் ஸுத்வா, ‘‘அஹம் பா⁴கி³னேய்யம் ஆதா³ய க³ந்த்வா, விடடூப⁴ம் க³ஹேஸ்ஸாமீ’’தி ராஜக³ஹனக³ரம் க³ச்ச²ந்தோ விகாலே த்³வாரேஸு பித³ஹிதேஸு நக³ரம் பத்வா ஏகிஸ்ஸா ஸாலாய நிபஜ்ஜித்வா வாதாதபேஹி கிலந்தோ ரத்திபா⁴கே³ தத்தே²வ காலமகாஸி. விபா⁴தாய ரத்தியா, ‘‘தே³வ, கோஸலனரிந்த³ அனாதோ² ஜாதோஸீ’’தி விப்பலபந்தியா தஸ்ஸா இத்தி²யா ஸத்³த³ம் ஸுத்வா ரஞ்ஞோ ஆரோசேஸும். ஸோ மாதுலஸ்ஸ மஹந்தேன ஸக்காரேன ஸரீரகிச்சம் காரேஸி.

விடடூபோ⁴பி ரஜ்ஜம் லபி⁴த்வா தம் வேரம் ஸரித்வா ‘‘ஸப்³பே³பி ஸாகியே மாரேஸ்ஸாமீ’’தி மஹதியா ஸேனாய நிக்க²மி. தம் தி³வஸம் ஸத்தா² பச்சூஸகாலே லோகம் வோலோகேந்தோ ஞாதிஸங்க⁴ஸ்ஸ வினாஸம் தி³ஸ்வா, ‘‘ஞாதிஸங்க³ஹம் காதும் வட்டதீ’’தி சிந்தேத்வா புப்³ப³ண்ஹஸமயே பிண்டா³ய சரித்வா, பிண்ட³பாதபடிக்கந்தோ க³ந்த⁴குடியம் ஸீஹஸேய்யம் கப்பேத்வா, ஸாயன்ஹஸமயே ஆகாஸேன க³ந்த்வா, கபிலவத்து²ஸாமந்தே ஏகஸ்மிம் கப³ரச்சா²யே ருக்க²மூலே நிஸீதி³. ததோ விடடூப⁴ஸ்ஸ ரஜ்ஜஸீமாய மஹந்தோ ஸந்த³ச்சா²யோ நிக்³ரோதோ⁴ அத்தி². விடடூபோ⁴ ஸத்தா²ரம் தி³ஸ்வா உபஸங்கமித்வா வந்தி³த்வா, ‘‘ப⁴ந்தே, கிம் காரணா ஏவரூபாய உண்ஹவேலாய இமஸ்மிம் கப³ரச்சா²யே ருக்க²மூலே நிஸீத³த², ஏதஸ்மிம் ஸந்த³ச்சா²யே நிக்³ரோத⁴மூலே நிஸீத³த², ப⁴ந்தே’’தி வத்வா, ‘‘ஹோது, மஹாராஜ, ஞாதகானம் சா²யா நாம ஸீதலா’’தி வுத்தே, ‘‘ஞாதகானுரக்க²னத்தா²ய ஸத்தா² ஆக³தோ ப⁴விஸ்ஸதீ’’தி சிந்தேத்வா ஸத்தா²ரம் வந்தி³த்வா நிவத்தித்வா ஸாவத்தி²ம்யேவ பச்சாக³மி. ஸத்தா²பி உப்பதித்வா ஜேதவனமேவ க³தோ.

ராஜா ஸாகியானம் தோ³ஸம் ஸரித்வா து³தியம்பி நிக்க²மித்வா ததே²வ ஸத்தா²ரம் பஸ்ஸித்வா புன நிவத்தி. ததியவாரேபி நிக்க²மித்வா ததே²வ ஸத்தா²ரம் பஸ்ஸித்வா புன நிவத்தி. சதுத்த²வாரே பன தஸ்மிம் நிக்க²ந்தே ஸத்தா² ஸாகியானம் புப்³ப³கம்மம் ஓலோகேத்வா தேஸம் ஏகதி³வஸம் நதி³யம் விஸபக்கி²பனபாபகம்மஸ்ஸ அப்படிபா³ஹியபா⁴வம் ஞத்வா சதுத்த²வாரே நாக³மாஸி. விடடூபோ⁴ ‘‘ஸாகியே கா⁴தேஸ்ஸாமீ’’தி மஹந்தேன ப³லகாயேன நிக்க²மி. ஸம்மாஸம்பு³த்³த⁴ஸ்ஸ பன ஞாதகா அஸத்தகா⁴தகா நாம, அத்தனா மரந்தாபி பரேஸம் ஜீவிதம் ந வோரோபேந்தி. தே சிந்தயிம்ஸு – ‘‘மயம் ஸுஸிக்கி²தா கதஹத்தா² கதூபாஸனா மஹிஸ்ஸாஸா, ந கோ² பன ஸக்கா அம்ஹேஹி பரம் ஜீவிதா வோரோபேதும், அத்தனோ கம்மம் த³ஸ்ஸேத்வா பலாபேஸ்ஸாமா’’தி தே கதஸன்னாஹா நிக்க²மித்வா யுத்³த⁴ம் ஆரபி⁴ம்ஸு. தேஹி கி²த்தா ஸரா விடடூப⁴ஸ்ஸ புரிஸானம் அந்தரந்தரேன க³ச்ச²ந்தி, ப²லகந்தரகண்ணசி²த்³த³ந்தராதீ³ஹி நிக்க²மந்தி. விடடூபோ⁴ தி³ஸ்வா நனு ப⁴ணே ‘‘ஸாகியா அஸத்தகா⁴தகாம்ஹா’’தி வத³ந்தி, அத² ச பன மே புரிஸே நாஸேந்தீதி.

அத² நம் ஏகோ புரிஸோ ஆஹ – ‘‘கிம் ஸாமி, நிவத்தித்வா ஓலோகேஸீ’’தி? ‘‘ஸாகியா மே புரிஸே நாஸேந்தீ’’தி. ‘‘தும்ஹாகம் கோசி புரிஸோ மதோ நாம நத்தி². இங்க⁴ தே க³ணாபேதா²’’தி. க³ணாபேந்தோ ஏகஸ்ஸபி க²யம் ந பஸ்ஸி. ஸோ ததோ நிவத்தித்வா ‘‘யே யே பன ப⁴ணே ‘ஸாகியம்ஹா’தி ப⁴ணந்தி, ஸப்³பே³ மாரேத², மாதாமஹஸ்ஸ பன மஹானாமஸக்கஸ்ஸ ஸந்திகே டி²தானம் ஜீவிதம் தே³தா²’’தி ஆஹ. ஸாகியா க³ஹேதப்³ப³க³ஹணம் அபஸ்ஸந்தா ஏகச்சே திணம் ட³ம்ஸித்வா, ஏகச்சே நளம் க³ஹேத்வா அட்ட²ம்ஸு. ‘‘தும்ஹே ஸாகியா, நோ’’தி புச்சி²தா யஸ்மா தே மரந்தாபி முஸாவாத³ம் ந ப⁴ணந்தி, தஸ்மா திணம் ட³ம்ஸித்வா டி²தா ‘‘நோ ஸாகோ, திண’’ந்தி வத³ந்தி. நளம் க³ஹேத்வா டி²தா ‘‘நோ ஸாகோ, நளோ’’தி வத³ந்தி. யே ச மஹானாமஸ்ஸ ஸந்திகே டி²தா, தே ச ஜீவிதம் லபி⁴ம்ஸு. தேஸு திணம் ட³ம்ஸித்வா டி²தா திணஸாகியா நாம, நளம் க³ஹேத்வா டி²தா நளஸாகியா நாம ஜாதாதி, விடடூபோ⁴ அவஸேஸே கீ²ரபகேபி தா³ரகே அவிஸ்ஸஜ்ஜேத்வா கா⁴தாபேந்தோ லோஹிதனதி³ம் பவத்தேத்வா தேஸம் க³லலோஹிதேன ப²லகம் தோ⁴வாபேஸி. ஏவம் ஸாகியவம்ஸோ விடடூபே⁴ன உபச்சி²ன்னோ.

ஸோ மஹானாமஸக்கம் கா³ஹாபேத்வா நிவத்தோ ‘‘பாதராஸவேலாய பாதராஸம் கரிஸ்ஸாமீ’’தி ஏகஸ்மிம் டா²னே ஓதரித்வா போ⁴ஜனே உபனீதே ‘‘ஏகதோவ பு⁴ஞ்ஜிஸ்ஸாமா’’தி அய்யகம் பக்கோஸாபேஸி. க²த்தியா பன ஜீவிதம் சஜந்தாபி தா³ஸிபுத்தேஹி ஸத்³தி⁴ம் ந பு⁴ஞ்ஜந்தி. தஸ்மா மஹானாமோ ஏகம் ஸரம் ஓலோகேத்வா ‘‘கிலிட்ட²க³த்தோம்ஹி, ந்ஹாயிஸ்ஸாமி, தாதா’’தி ஆஹ. ‘‘ஸாது⁴, அய்யக, ந்ஹாயதா²’’தி. ஸோ ‘‘அயம் மம் ஏகதோ அபு⁴ஞ்ஜந்தம் கா⁴தேஸ்ஸதி, ஸயமேவ மே மதம் ஸேய்யோ’’தி கேஸே முஞ்சித்வா அக்³கே³ க³ண்டி²ம் கத்வா கேஸேஸு பாத³ங்கு³ட்ட²கே பவேஸேத்வா உத³கே நிமுஜ்ஜி. தஸ்ஸ கு³ணதேஜேன நாக³ப⁴வனம் உண்ஹாகாரம் த³ஸ்ஸேஸி. நாக³ராஜா ‘‘கிம் நு கோ²’’தி உபதா⁴ரேந்தோ தம் ஞத்வா தஸ்ஸ ஸந்திகம் ஆக³ந்த்வா தம் அத்தனோ ப²ணே நிஸீதா³பேத்வா நாக³ப⁴வனம் பவேஸேஸி. ஸோ த்³வாத³ஸ்ஸ வஸ்ஸானி தத்தே²வ வஸி. விடடூபோ⁴பி ‘‘மய்ஹம் அய்யகோ இதா³னி ஆக³மிஸ்ஸதி, இதா³னி ஆக³மிஸ்ஸதீ’’தி ஆக³மயமானோவ நிஸீதி³. தஸ்மிம் அதிசிராயந்தே ஸரம் விசினாபேத்வா தீ³பாலோகேன புரிஸப்³ப⁴ந்தரானிபி ஓலோகேத்வா அதி³ஸ்வா ‘‘க³தோ ப⁴விஸ்ஸதீ’’தி பக்காமி. ஸோ ரத்திபா⁴கே³ அசிரவதிம் பத்வா க²ந்தா⁴வாரம் நிவாஸேஸி. ஏகச்சே அந்தோனதி³யம் வாலுகாபுலினே நிபஜ்ஜிம்ஸு, ஏகச்சே ப³ஹித²லே, அந்தோனிபன்னேஸுபி புப்³பே³ அகதபாபகம்மா அத்தி², ப³ஹினிபன்னேஸுபி புப்³பே³ கதபாபகம்மா அத்தி², தேஸம் நிபன்னட்டா²னேஸு கிபில்லிகா உட்ட²ஹிம்ஸு. தே ‘‘மய்ஹம் நிபன்னட்டா²னே கிபில்லிகா, மய்ஹம் நிபன்னட்டா²னே கிபில்லிகா’’தி உட்ட²ஹித்வா அகதபாபகம்மா உத்தரித்வா த²லே நிபஜ்ஜிம்ஸு, கதபாபகம்மா ஓதரித்வா வாலுகாபுலினே நிபஜ்ஜிம்ஸு. தஸ்மிம் க²ணே மஹாமேகோ⁴ உட்ட²ஹித்வா க⁴னவஸ்ஸம் வஸ்ஸி. நதி³யா ஓகோ⁴ ஆக³ந்த்வா விடடூப⁴ம் ஸத்³தி⁴ம் பரிஸாய ஸமுத்³த³மேவ பாபேஸி. ஸப்³பே³ தத்த² மச்ச²கச்ச²பப⁴க்கா² அஹேஸும்.

மஹாஜனோ கத²ம் ஸமுட்டா²பேஸி ‘‘ஸாகியானம் மரணம் அயுத்தம், ‘ஏவம் நாம கோட்டேத்வா கோட்டேத்வா ஸாகியா மாரேதப்³பா³’தி அனனுச்ச²விகமேத’’ந்தி. ஸத்தா² தம் கத²ம் ஸுத்வா, ‘‘பி⁴க்க²வே, இமஸ்மிம் அத்தபா⁴வே கிஞ்சாபி ஸாகியானம் ஏவம் மரணம் அயுத்தம், புப்³பே³ கதபாபகம்மவஸேன பன யுத்தமேவேதேஹி லத்³த⁴’’ந்தி ஆஹ. ‘‘கிம் பன, ப⁴ந்தே, ஏதே புப்³பே³ அகம்ஸூ’’தி? ஸப்³பே³ ஏகதோ ஹுத்வா நதி³யம் விஸம் பக்கி²பிம்ஸூதி. புனேகதி³வஸம் த⁴ம்மஸபா⁴யம் பி⁴க்கூ² கத²ம் ஸமுட்டா²பேஸும் – ‘‘விடடூபோ⁴ ஏத்தகே ஸாகியே மாரேத்வா ஆக³ச்ச²ந்தோ அத்தனோ மனோரதே² மத்த²கம் அப்பத்தேயேவ ஏத்தகம் ஜனம் ஆதா³ய மஹாஸமுத்³தே³ மச்ச²கச்ச²பப⁴க்கோ² ஜாதோ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே, ‘‘இமேஸம் ஸத்தானம் மனோரதே² மத்த²கம் அப்பத்தேயேவ மச்சுராஜா ஸுத்தம் கா³மம் அஜ்ஜோ²த்த²ரந்தோ மஹோகோ⁴ விய ஜீவிதிந்த்³ரியம் சி²ந்தி³த்வா சதூஸு அபாயஸமுத்³தே³ஸு நிமுஜ்ஜாபேதீ’’தி வத்வா இமம் கா³த²மாஹ –

47. ‘‘புப்பா²னி ஹேவ பசினந்தம், ப்³யாஸத்தமனஸம் நரம்;

ஸுத்தம் கா³மம் மஹோகோ⁴வ, மச்சு ஆதா³ய க³ச்ச²தீ’’தி.

தத்த² ப்³யாஸத்தமனஸம் நரந்தி ஸம்பத்தே வா அஸம்பத்தே வா லக்³க³மானஸம். இத³ம் வுத்தம் ஹோதி – யதா² மாலாகாரோ புப்பா²ராமம் பவிஸித்வா ‘‘புப்பா²னி பசினிஸ்ஸாமீ’’தி ததோ புப்பா²னி க³ஹேத்வா அஞ்ஞமஞ்ஞம் வா க³ச்ச²ம் பத்தே²ந்தோ ஸகலே புப்பா²ராமே மனம் பேஸேதி, ‘‘இதோ சிதோ ச புப்பா²னி பசினிஸ்ஸாமீ’’தி ததோ புப்பா²னி அக்³க³ஹேத்வா அஞ்ஞத்த² மனம் பேஸேஸி, தமேவ க³ச்ச²ம் பசினந்தோ பமாத³மாபஜ்ஜதி, ஏவமேவ ஏகச்சோ புப்பா²ராமஸதி³ஸம் பஞ்சகாமகு³ணமஜ்ஜ²ம் ஓதரித்வா மனோரமம் ரூபம் லபி⁴த்வா மனோரமானம் ஸத்³த³க³ந்த⁴ரஸபோ²ட்ட²ப்³பா³னம் அஞ்ஞதரம் பத்தே²தி. அஞ்ஞோ தேஸு வா அஞ்ஞதரம் லபி⁴த்வா அஞ்ஞதரம் பத்தே²தி, ரூபமேவ வா லபி⁴த்வா அஞ்ஞம் அபத்தே²ந்தோ தமேவ அஸ்ஸாதே³தி, ஸத்³தா³தீ³ஸு வா அஞ்ஞதரம். ஏஸேவ நயோ கோ³மஹிம்ஸதா³ஸிதா³ஸகே²த்தவத்து²கா³மனிக³மஜனபதா³தீ³ஸு, பப்³ப³ஜிதானம்பி பரிவேணவிஹாரபத்தசீவராதீ³ஸூதி ஏவம் பஞ்சகாமகு³ணஸங்கா²தானி புப்பா²னி ஏவ பசினந்தம் ஸம்பத்தே வா அஸம்பத்தே வா காமகு³ணே ப்³யாஸத்தமனஸம் நரம். ஸுத்தம் கா³மந்தி கா³மஸ்ஸ கே³ஹபி⁴த்திஆதீ³னம் பன ஸுபனவஸேன ஸுபனம் நாம நத்தி², ஸத்தானம் பன ஸுத்தபமத்ததம் உபாதா³ய ஸுத்தோ நாம ஹோதி. ஏவம் ஸுத்தம் கா³மம் த்³வே தீணி யோஜனானி ஆயதக³ம்பீ⁴ரோ மஹோகோ⁴வ மச்சு ஆதா³ய க³ச்ச²தி. யதா² ஸோ மஹோகோ⁴ இத்தி²புரிஸகோ³மஹிம்ஸகுக்குடாதீ³ஸு கிஞ்சி அனவஸேஸேத்வா ஸப்³ப³ம் தம் கா³மம் ஸமுத்³த³ம் பாபேத்வா மச்ச²கச்ச²பப⁴க்க²ம் கரோதி, ஏவமேவ ப்³யாஸத்தமனஸம் நரம் மச்சு ஆதா³ய ஜீவிதிந்த்³ரியமஸ்ஸ சி²ந்தி³த்வா சதூஸு அபாயஸமுத்³தே³ஸு நிமுஜ்ஜாபேதீதி.

தே³ஸனாவஸானே ப³ஹூ ஸோதாபத்திப²லாதீ³னி பத்தா. மஹாஜனஸ்ஸ ஸாத்தி²கா தே³ஸனா ஜாதாதி.

விடடூப⁴வத்து² ததியம்.

4. பதிபூஜிககுமாரிவத்து²

புப்பா²னி ஹேவாதி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ பதிபூஜிகம் நாம குமாரிகம் ஆரப்³ப⁴ கதே²ஸி. வத்து² தாவதிம்ஸதே³வலோகே ஸமுட்டி²தம்.

தத்த² கிர மாலபா⁴ரீ நாம தே³வபுத்தோ அச்ச²ராஸஹஸ்ஸபரிவுதோ உய்யானம் பாவிஸி. பஞ்சஸதா தே³வதீ⁴தரோ ருக்க²ம் ஆருய்ஹ புப்பா²னி பாதேந்தி, பஞ்சஸதா பதிதானி புப்பா²னி க³ஹேத்வா தே³வபுத்தம் அலங்கரோந்தி. தாஸு ஏகா தே³வதீ⁴தா ருக்க²ஸாகா²யமேவ சுதா, ஸரீரம் தீ³பஸிகா² விய நிப்³பா³யி. ஸா ஸாவத்தி²யம் ஏகஸ்மிம் குலகே³ஹே படிஸந்தி⁴ம் க³ஹேத்வா ஜாதகாலே ஜாதிஸ்ஸரா ஹுத்வா ‘‘மாலபா⁴ரீதே³வபுத்தஸ்ஸ ப⁴ரியாம்ஹீ’’தி அனுஸ்ஸரந்தீ வுட்³டி⁴மன்வாய க³ந்த⁴மாலாதீ³ஹி பூஜம் கத்வா ஸாமிகஸ்ஸ ஸந்திகே அபி⁴னிப்³ப³த்திம் பத்தே²ஸி. ஸா ஸோளஸவஸ்ஸகாலே பரகுலம் க³தாபி ஸலாகப⁴த்தபக்கி²கப⁴த்தவஸ்ஸாவாஸிகாதீ³னி த³த்வா, ‘‘அயம் மே ஸாமிகஸ்ஸ ஸந்திகே நிப்³ப³த்தனத்தா²ய பச்சயோ ஹோதூ’’தி வத³தி. அத²ஸ்ஸா பி⁴க்கூ² ‘‘அயம் குமாரிகா உட்டா²ய ஸமுட்டா²ய பதிமேவ பத்தே²தீதி பதிபூஜிகா’’தி நாமம் கரிம்ஸு. ஸாபி நிப³த்³த⁴ம் ஆஸனஸாலம் படிஜக்³க³தி, பானீயம் உபட்ட²பேதி, ஆஸனானி பஞ்ஞபேதி. அஞ்ஞேபி மனுஸ்ஸா ஸலாகப⁴த்தாதீ³னி தா³துகாமா, ‘‘அம்ம, இமானிபி பி⁴க்கு²ஸங்க⁴ஸ்ஸ படிபாதே³ய்யாஸீ’’தி வத்வா ஆஹரித்வா தே³ந்தி. ஸாபி ஏதேன நியாமேன ஆக³ச்ச²ந்தீ க³ச்ச²ந்தீ ஏகபத³வாரே ச²பஞ்ஞாஸ குஸலத⁴ம்மே (த⁴. ஸ. 1; த⁴. ஸ. அட்ட². 1 யேவாபனகவண்ணனா) படிலப⁴தி. தஸ்ஸா குச்சி²யம் க³ப்³போ⁴ பதிட்ட²ஹி. ஸா த³ஸமாஸச்சயேன புத்தம் விஜாயி. தஸ்ஸ பத³ஸா க³மனகாலே அஞ்ஞம்பி அஞ்ஞம்பீதி சத்தாரோ புத்தே படிலபி⁴.

ஸா ஏகதி³வஸம் தா³னம் த³த்வா பூஜம் கத்வா த⁴ம்மம் ஸுத்வா ஸிக்கா²பதா³னி ரக்கி²த்வா தி³வஸபரியோஸானே தம் க²ணம் நிப்³ப³த்தேன கேனசி ரோகே³ன காலம் கத்வா அத்தனோ ஸாமிகஸ்ஸேவ ஸந்திகே நிப்³ப³த்தி. இதராபி ஏத்தகம் காலம் தே³வபுத்தம் அலங்கரோந்தி ஏவ. தே³வபுத்தோ தம் தி³ஸ்வா ‘‘த்வம் பாதோவ பட்டா²ய ந தி³ஸ்ஸஸி, குஹிம் க³தாஸீ’’தி ஆஹ. ‘‘சுதாம்ஹி ஸாமீ’’தி. ‘‘கிம் வதே³ஸீ’’தி? ‘‘ஏவமேதம், ஸாமீ’’தி. ‘‘குஹிம் நிப்³ப³த்தாஸீ’’தி? ‘‘ஸாவத்தி²யம் குலகே³ஹே’’தி. ‘‘கித்தகம் காலம் தத்த² டி²தாஸீ’’தி? ‘‘த³ஸமாஸச்சயேன மாது குச்சி²தோ நிக்க²மித்வா ஸோளஸவஸ்ஸகாலே பரகுலம் க³ந்த்வா சத்தாரோ புத்தே விஜாயித்வா தா³னாதீ³னி புஞ்ஞானி கத்வா தும்ஹே பத்தே²த்வா ஆக³ந்த்வா தும்ஹாகமேவ ஸந்திகே நிப்³ப³த்தாம்ஹி, ஸாமீ’’தி. ‘‘மனுஸ்ஸானம் கித்தகம் ஆயூ’’தி? ‘‘வஸ்ஸஸதமத்த’’ந்தி. ‘‘ஏத்தகமேவா’’தி? ‘‘ஆம, ஸாமீ’’தி. ‘‘ஏத்தகம் ஆயும் க³ஹேத்வா நிப்³ப³த்தமனுஸ்ஸா கிம் நு கோ² ஸுத்தபமத்தா காலம் அதிக்காமேந்தி, உதா³ஹு தா³னாதீ³னி புஞ்ஞானி கரோந்தீ’’தி. ‘‘கிம் வதே³த², ஸாமி’’? ‘‘அஸங்க்²யேய்யம் ஆயும் க³ஹேத்வா நிப்³ப³த்தா விய அஜராமரா விய ச நிச்சம் பமத்தா, மனுஸ்ஸா’’தி. மாலபா⁴ரீதே³வபுத்தஸ்ஸ மஹாஸம்வேகோ³ உத³பாதி³ ‘‘வஸ்ஸஸதமத்தமாயும் க³ஹேத்வா நிப்³ப³த்தமனுஸ்ஸா கிர பமத்தா நிபஜ்ஜித்வா நித்³தா³யந்தி, கதா³ நு கோ² து³க்கா² முச்சிஸ்ஸந்தீ’’தி? மனுஸ்ஸானம் பன வஸ்ஸஸதம் தாவதிம்ஸானம் தே³வானம் ஏகோ ரத்திந்தி³வோ, தாய ரத்தியா திம்ஸரத்தியோ மாஸோ, தேன மாஸேன த்³வாத³ஸமாஸிகோ ஸம்வச்ச²ரோ, தேன ஸம்வச்ச²ரேன தி³ப்³ப³வஸ்ஸஸஹஸ்ஸம் ஆயுப்பமாணம், தம் மனுஸ்ஸக³ணனாய திஸ்ஸோ வஸ்ஸகோடியோ, ஸட்டி² ச வஸ்ஸஸதஸஹஸ்ஸானி ஹோந்தி. தஸ்மா தஸ்ஸ தே³வபுத்தஸ்ஸ ஏகதி³வஸோபி நாதிக்கந்தோ முஹுத்தஸதி³ஸோவ காலோ அஹோஸி. ஏவம் அப்பாயுகமனுஸ்ஸானம் பமாதோ³ நாம அதிவிய அயுத்தோதி.

புனதி³வஸே பி⁴க்கூ² கா³மம் பவிட்டா² ஆஸனஸாலம் அபடிஜக்³கி³தம், ஆஸனானி அபஞ்ஞத்தானி, பானீயம் அனுட்ட²பிதம் தி³ஸ்வா, ‘‘கஹம் பதிபூஜிகா’’தி ஆஹம்ஸு. ‘‘ப⁴ந்தே, கஹம் தும்ஹே தம் த³க்கி²ஸ்ஸத², ஹிய்யோ அய்யேஸு பு⁴ஞ்ஜித்வா க³தேஸு ஸாயன்ஹஸமயே மதா’’தி. தம் ஸுத்வா புது²ஜ்ஜனா பி⁴க்கூ² தஸ்ஸா உபகாரம் ஸரந்தா அஸ்ஸூனி ஸந்தா⁴ரேதும் நாஸக்கி²ம்ஸு. கீ²ணாஸவானம் த⁴ம்மஸம்வேகோ³ உத³பாதி³. தே ப⁴த்தகிச்சம் கத்வா விஹாரம் க³ந்த்வா ஸத்தா²ரம் வந்தி³த்வா புச்சி²ம்ஸு – ‘‘ப⁴ந்தே, பதிபூஜிகா நாம உபாஸிகா உட்டா²ய ஸமுட்டா²ய நானப்பகாரானி புஞ்ஞானி கத்வா ஸாமிகமேவ பத்தே²ஸி, ஸா இதா³னி மதா, கஹம் நு கோ² நிப்³ப³த்தா’’தி? ‘‘அத்தனோ ஸாமிகஸ்ஸேவ ஸந்திகே, பி⁴க்க²வே’’தி. ‘‘நத்தி², ப⁴ந்தே, ஸாமிகஸ்ஸ ஸந்திகே’’தி. ‘‘ந ஸா, பி⁴க்க²வே, ஏதம் ஸாமிகம் பத்தே²தி, தாவதிம்ஸப⁴வனே தஸ்ஸா மாலபா⁴ரீதே³வபுத்தோ நாம ஸாமிகோ, ஸா தஸ்ஸ புப்ப²பிலந்த⁴னட்டா²னதோ சவித்வா புன க³ந்த்வா தஸ்ஸேவ ஸந்திகே நிப்³ப³த்தா’’தி. ‘‘ஏவம் கிர, ப⁴ந்தே’’தி. ‘‘ஆம, பி⁴க்க²வே’’தி. ‘‘அஹோ பரித்தம், ப⁴ந்தே, ஸத்தானம் ஜீவிதம், பாதோவ அம்ஹே பரிவிஸித்வா ஸாயம் உப்பன்னப்³யாதி⁴னா மதா’’தி. ஸத்தா² ‘‘ஆம, பி⁴க்க²வே, பரித்தம் ஸத்தானம் ஜீவிதம் நாம, தேனேவ இமே ஸத்தே வத்து²காமேஹி சேவ கிலேஸகாமேஹி ச அதித்தே ஏவ அந்தகோ அத்தனோ வஸே வத்தேத்வா கந்த³ந்தே பரிதே³வந்தே க³ஹேத்வா க³ச்ச²தீ’’தி வத்வா இமம் கா³த²மாஹ –

48. ‘‘புப்பா²னி ஹேவ பசினந்தம், ப்³யாஸத்தமனஸம் நரம்;

அதித்தம்யேவ காமேஸு, அந்தகோ குருதே வஸ’’ந்தி.

தத்த² புப்பா²னி ஹேவ பசினந்தந்தி புப்பா²ராமே மாலாகாரோ நானாபுப்பா²னி விய அத்தபா⁴வபடிப³த்³தா⁴னி சேவ உபகரணபடிப³த்³தா⁴னி ச காமகு³ணபுப்பா²னி ஓசினந்தமேவ. ப்³யாஸத்தமனஸம் நரந்தி அஸம்பத்தேஸு பத்த²னாவஸேன, ஸம்பத்தேஸு கே³த⁴வஸேன விவிதே⁴னாகாரேன ஆஸத்தசித்தம். அதித்தம்யேவ காமேஸூதி வத்து²காமகிலேஸகாமேஸு பரியேஸனேனபி படிலாபே⁴னபி பரிபோ⁴கே³னபி நிதா⁴னேனபி அதித்தம் ஏவ ஸமானம். அந்தகோ குருதே வஸந்தி மரணஸங்கா²தோ அந்தகோ கந்த³ந்தம் பரிதே³வந்தம் க³ஹேத்வா க³ச்ச²ந்தோ அத்தனோ வஸம் பாபேதீதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பத்தா, தே³ஸனா மஹாஜனஸ்ஸ ஸாத்தி²கா ஜாதாதி.

பதிபூஜிககுமாரிவத்து² சதுத்த²ம்.

5. மச்ச²ரியகோஸியஸேட்டி²வத்து²

யதா²பி ப⁴மரோ புப்ப²ந்தி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ மச்ச²ரியகோஸியஸேட்டி²ம் ஆரப்³ப⁴ கதே²ஸி. தஸ்ஸ வத்து² ராஜக³ஹே ஸமுட்டி²தம்.

ராஜக³ஹனக³ரஸ்ஸ கிர அவிதூ³ரே ஸக்காரம் நாம நிக³மோ அஹோஸி. தத்தே²கோ மச்ச²ரியகோஸியோ நாம ஸேட்டி² அஸீதிகோடிவிப⁴வோ படிவஸதி. ஸோ திணக்³கே³ன தேலபி³ந்து³ம்பி பரேஸம் ந தே³தி, ந அத்தனா பரிபு⁴ஞ்ஜதி. இதிஸ்ஸ தம் விப⁴வஜாதம் நேவ புத்ததா³ராதீ³னம், ந ஸமணப்³ராஹ்மணானம் அத்த²ம் அனுபோ⁴தி, ரக்க²ஸபரிக்³க³ஹிதா போக்க²ரணீ விய அபரிபோ⁴க³ம் திட்ட²தி. ஸத்தா² ஏகதி³வஸம் பச்சூஸஸமயே மஹாகருணாஸமாபத்திதோ வுட்டா²ய ஸகலலோகதா⁴துயம் போ³த⁴னேய்யப³ந்த⁴வே ஓலோகேந்தோ பஞ்சசத்தாலீஸயோஜனமத்த²கே வஸந்தஸ்ஸ ஸேட்டி²னோ ஸபஜாபதிகஸ்ஸ ஸோதாபத்திப²லஸ்ஸ உபனிஸ்ஸயம் அத்³த³ஸ. ததோ புரிமதி³வஸே பன ஸோ ராஜானம் உபட்டா²தும் ராஜகே³ஹம் க³ந்த்வா ராஜூபட்டா²னம் கத்வா ஆக³ச்ச²ந்தோ ஏகம் சா²தஜ்ஜ²த்தம் ஜனபத³மனுஸ்ஸம் கும்மாஸபூரம் கபல்லகபூவம் கா²த³ந்தம் தி³ஸ்வா தத்த² பிபாஸம் உப்பாதே³த்வா அத்தனோ க⁴ரம் க³ந்த்வா சிந்தேஸி – ‘‘ஸசாஹம் கபல்லகபூவம் கா²தி³துகாமோம்ஹீதி வக்கா²மி, ப³ஹூ மனுஸ்ஸா மயா ஸத்³தி⁴ம் கா²தி³துகாமா ப⁴விஸ்ஸந்தி, ஏவம் மே ப³ஹூனி திலதண்டு³லஸப்பிபா²ணிதாதீ³னி பரிக்க²யம் க³மிஸ்ஸந்தி, ந கஸ்ஸசி கதே²ஸ்ஸாமீ’’தி தண்ஹம் அதி⁴வாஸேந்தோ சரதி. ஸோ க³ச்ச²ந்தே க³ச்ச²ந்தே காலே உப்பண்டு³ப்பண்டு³கஜாதோ த⁴மனிஸந்த²தக³த்தோ ஜாதோ. ததோ தண்ஹம் அதி⁴வாஸேதும் அஸக்கோந்தோ க³ப்³ப⁴ம் பவிஸித்வா மஞ்சகே உபகூ³ஹித்வா நிபஜ்ஜி. ஏவம் க³தோபி த⁴னஹானிப⁴யேன ந கஸ்ஸசி கிஞ்சி கதே²ஸி.

அத² நம் ப⁴ரியா உபஸங்கமித்வா பிட்டி²ம் பரிமஜ்ஜித்வா, ‘‘கிம் தே, ஸாமி, அபா²ஸுகம் ஜாத’’ந்தி புச்சி². ‘‘ந மே கிஞ்சி அபா²ஸுகம் அத்தீ²’’தி. ‘‘கிம் நு கோ² தே ராஜா குபிதோ’’தி? ‘‘ராஜாபி மே ந குப்பதீ’’தி. ‘‘அத² கிம் தே புத்ததீ⁴தாஹி வா தா³ஸகம்மகராதீ³ஹி வா கிஞ்சி அமனாபம் கதம் அத்தீ²’’தி? ‘‘ஏவரூபம்பி நத்தீ²’’தி. ‘‘கிஸ்மிஞ்சி பன தே தண்ஹா அத்தீ²’’தி? ஏவம் வுத்தேபி த⁴னஹானிப⁴யேன கிஞ்சி அவத்வா நிஸ்ஸத்³தோ³வ நிபஜ்ஜி, அத² நம் ப⁴ரியா ‘‘கதே²ஹி, ஸாமி கிஸ்மிஞ்சி தே தண்ஹா அத்தீ²’’தி ஆஹ. ஸோ வசனம் பரிகி³லந்தோ விய ‘‘அத்தி² மே தண்ஹா’’தி ஆஹ. ‘‘கிம் தண்ஹா, ஸாமீ’’தி? ‘‘கபல்லகபூவம் கா²தி³துகாமோம்ஹீ’’தி. ‘‘அத² கிமத்த²ம் மே ந கதே²ஸி, கிம் த்வம் த³லித்³தோ³ஸி, இதா³னி ஸகலனிக³மவாஸீனம் பஹோனகே கபல்லகபூவே பசிஸ்ஸாமீ’’தி. ‘‘கிம் தே ஏதேஹி, அத்தனோ கம்மம் கத்வா கா²தி³ஸ்ஸந்தீ’’தி? ‘‘தேன ஹி ஏகரச்ச²வாஸீனம் பஹோனகே பசிஸ்ஸாமீ’’தி. ‘‘ஜானாமஹம் தவ மஹத்³த⁴னபா⁴வ’’ந்தி. ‘‘இமஸ்மிம் கே³ஹஸாமந்தே ஸப்³பே³ஸம் பஹோனகம் கத்வா பசாமீ’’தி. ‘‘ஜானாமஹம் தவ மஹஜ்ஜா²ஸயபா⁴வ’’ந்தி. ‘‘தேன ஹி தே புத்ததா³ரமத்தஸ்ஸேவ பஹோனகம் கத்வா பசாமீ’’தி. ‘‘கிம் தே ஏதேஹீ’’தி? ‘‘கிம் பன துய்ஹஞ்ச மய்ஹஞ்ச பஹோனகம் கத்வா பசாமீ’’தி? ‘‘த்வம் கிம் கரிஸ்ஸஸீ’’தி? ‘‘தேன ஹி ஏககஸ்ஸேவ தே பஹோனகம் கத்வா பசாமீ’’தி. ‘‘இமஸ்மிம் டா²னே பசமானே ப³ஹூ பச்சாஸீஸந்தி. ஸகலதண்டு³லே ட²பேத்வா பி⁴ன்னதண்டு³லே ச உத்³த⁴னகபல்லானி ச ஆதா³ய தோ²கம் கீ²ரஸப்பிமது⁴பா²ணிதஞ்ச க³ஹேத்வா ஸத்தபூ⁴மிகஸ்ஸ பாஸாத³ஸ்ஸ உபரிமதலம் ஆருய்ஹ பச, தத்தா²ஹம் ஏககோவ நிஸீதி³த்வா கா²தி³ஸ்ஸாமீ’’தி. ஸா ‘‘ஸாதூ⁴’’தி படிஸ்ஸுணித்வா க³ஹேதப்³ப³ம் கா³ஹாபேத்வா பாஸாத³ம் அபி⁴ருய்ஹ தா³ஸியோ விஸ்ஸஜ்ஜேத்வா ஸேட்டி²ம் பக்கோஸாபேஸி, ஸோ ஆதி³தோ பட்டா²ய த்³வாரானி பித³ஹந்தோ ஸப்³ப³த்³வாரேஸு ஸூசிக⁴டிகம் த³த்வா ஸத்தமதலம் அபி⁴ருஹித்வா தத்த²பி த்³வாரம் பித³ஹித்வா நிஸீதி³. ப⁴ரியாபிஸ்ஸ உத்³த⁴னே அக்³கி³ம் ஜாலேத்வா கபல்லம் ஆரோபேத்வா பூவே பசிதும் ஆரபி⁴.

அத² ஸத்தா² பாதோவ மஹாமோக்³க³ல்லானத்தே²ரம் ஆமந்தேஸி – ‘‘ஏஸோ, மோக்³க³ல்லான, ராஜக³ஹஸ்ஸ அவிதூ³ரே ஸக்காரனிக³மே மச்ச²ரியஸேட்டி² ‘கபல்லகபூவே கா²தி³ஸ்ஸாமீ’தி அஞ்ஞேஸம் த³ஸ்ஸனப⁴யேன ஸத்தபூ⁴மிகே பாஸாதே³ கபல்லகபூவே பசாபேதி, த்வம் தத்த² க³ந்த்வா ஸேட்டி²ம் த³மேத்வா நிப்³பி³ஸேவனம் கத்வா உபோ⁴பி ஜாயம்பதிகே பூவே ச கீ²ரஸப்பிமது⁴பா²ணிதானி ச கா³ஹாபேத்வா அத்தனோ ப³லேன ஜேதவனம் ஆனேஹி, அஜ்ஜாஹம் பஞ்சஹி பி⁴க்கு²ஸதேஹி ஸத்³தி⁴ம் விஹாரே ஏவ நிஸீதி³ஸ்ஸாமி, பூவேஹேவ ப⁴த்தகிச்சம் கரிஸ்ஸாமீ’’தி.

தே²ரோ ‘‘ஸாது⁴, ப⁴ந்தே’’தி ஸத்து² வசனம் ஸம்படிச்சி²த்வா தாவதே³வ இத்³தி⁴ப³லேன தம் நிக³மம் க³ந்த்வா தஸ்ஸ பாஸாத³ஸ்ஸ ஸீஹபஞ்ஜரத்³வாரே ஸுனிவத்தோ² ஸுபாருதோ ஆகாஸே ஏவ மணிரூபகம் விய அட்டா²ஸி. மஹாஸேட்டி²னோ தே²ரம் தி³ஸ்வாவ ஹத³யமம்ஸம் கம்பி. ஸோ அஹம் ஏவரூபானம்யேவ த³ஸ்ஸனப⁴யேன இமம் டா²னமாக³தோ, அயஞ்ச பி⁴க்கு² ஆகாஸேனாக³ந்த்வா வாதபானத்³வாரே டி²தோதி. ஸோ க³ஹேதப்³ப³க³ஹணம் அபஸ்ஸந்தோ அக்³கி³ம்ஹி பக்கி²த்தலோணஸக்க²ரா விய தோ³ஸேன தடதடாயந்தோ ஏவமாஹ – ‘‘ஸமண, ஆகாஸே ட²த்வாபி கிம் லபி⁴ஸ்ஸஸி, ஆகாஸே அபதே³ பத³ம் த³ஸ்ஸேத்வா சங்கமந்தோபி நேவ லபி⁴ஸ்ஸஸீ’’தி. தே²ரோ தஸ்மிம் ஏவ டா²னே அபராபரம் சங்கமி. ஸேட்டி² ‘‘சங்கமந்தோ கிம் லபி⁴ஸ்ஸஸி, ஆகாஸே பல்லங்கேன நிஸீத³ந்தோபி ந லபி⁴ஸ்ஸஸியேவா’’தி ஆஹ. தே²ரோ பல்லங்கம் ஆபு⁴ஜித்வா நிஸீதி³. அத² நம் ‘‘ஆகாஸே நிஸின்னோ கிம் லபி⁴ஸ்ஸஸி, ஆக³ந்த்வா வாதபானஸ்ஸ உம்மாரே டி²தோபி ந லபி⁴ஸ்ஸஸீ’’தி ஆஹ. தே²ரோ உம்மாரே டி²தோ. ‘‘உம்மாரே டி²தோபி கிம் லபி⁴ஸ்ஸஸி, தூ⁴மாயந்தோபி ந லபி⁴ஸ்ஸஸி ஏவா’’தி ஆஹ. தே²ரோபி தூ⁴மாயி. ஸகலபாஸாதோ³ ஏகதூ⁴மோ அஹோஸி. ஸேட்டி²னோ அக்கீ²னம் ஸூசியா விஜ்ஜ²னகாலோ விய அஹோஸி, கே³ஹஜ்ஜா²யனப⁴யேன பன ‘‘த்வம் பஜ்ஜலந்தோபி ந லபி⁴ஸ்ஸஸீ’’தி அவத்வா ‘‘அயம் ஸமணோ ஸுட்டு² லக்³கோ³, அலத்³தா⁴ ந க³மிஸ்ஸதி, ஏகமஸ்ஸ பூவம் தா³பேஸ்ஸாமீ’’தி ப⁴ரியம் ஆஹ – ‘‘ப⁴த்³தே³ ஏகம் கு²த்³த³கபூவம் பசித்வா ஸமணஸ்ஸ த³த்வா உய்யோஜேஹி ந’’ந்தி. ஸா தோ²கம் ஏவ பிட்ட²ம் கபல்லபாதியம் பக்கி²பி, மஹாபூவோ ஹுத்வா ஸகலபாதிம் பூரேத்வா உத்³து⁴மாதோ ஹுத்வா அட்டா²ஸி.

ஸேட்டி² தம் தி³ஸ்வா ‘‘ப³ஹும் தயா பிட்ட²ம் க³ஹிதம் ப⁴விஸ்ஸதீ’’தி ஸயமேவ த³ப்³பி³கண்ணேன தோ²கம் பிட்ட²ம் க³ஹேத்வா பக்கி²பி, பூவோ புரிமபூவதோ மஹந்ததரோ ஜாதோ. ஏவம் யம் யம் பசதி, ஸோ ஸோ மஹந்தமஹந்தோவ ஹோதி. ஸோ நிப்³பி³ன்னோ ப⁴ரியம் ஆஹ – ‘‘ப⁴த்³தே³, இமஸ்ஸ ஏகம் பூவம் தே³ஹீ’’தி. தஸ்ஸா பச்சி²தோ ஏகம் பூவம் க³ண்ஹந்தியா ஸப்³பே³ ஏகாப³த்³தா⁴ அல்லீயிம்ஸு. ஸா ஸேட்டி²ம் ஆஹ – ‘‘ஸாமி, ஸப்³பே³ பூவா ஏகதோ லக்³கா³, விஸும் காதும் ந ஸக்கோமீ’’தி. ‘‘அஹம் கரிஸ்ஸாமீ’’தி ஸோபி காதும் நாஸக்கி². உபோ⁴பி ஜனா கோடியம் க³ஹேத்வா கட்³ட⁴ந்தாபி வியோஜேதும் நாஸக்கி²ம்ஸு ஏவ. அத²ஸ்ஸ பூவேஹி ஸத்³தி⁴ம் வாயமந்தஸ்ஸேவ ஸரீரதோ ஸேதா³ முச்சிம்ஸு, பிபாஸா உபச்சி²ஜ்ஜி. ததோ ப⁴ரியம் ஆஹ – ‘‘ப⁴த்³தே³, ந மே பூவேஹி அத்தோ², பச்சி²யா ஸத்³தி⁴ம்யேவ இமஸ்ஸ தே³ஹீ’’தி. ஸா பச்சி²ம் ஆதா³ய தே²ரம் உபஸங்கமித்வா அதா³ஸி. தே²ரோ உபி⁴ன்னம்பி த⁴ம்மம் தே³ஸேஸி, திண்ணம் ரதனானம் கு³ணம் கதே²ஸி, ‘‘அத்தி² தி³ன்னம், அத்தி² யிட்ட²’’ந்தி தி³ன்னதா³னாதீ³னம் ப²லம் க³க³னதலே புண்ணசந்த³ம் விய த³ஸ்ஸேஸி.

தம் ஸுத்வா பஸன்னசித்தோ ஹுத்வா ஸேட்டி² ‘‘ப⁴ந்தே, ஆக³ந்த்வா இமஸ்மிம் பல்லங்கே நிஸீதி³த்வா பரிபு⁴ஞ்ஜதா²’’தி ஆஹ. தே²ரோ, ‘‘மஹாஸேட்டி², ஸம்மாஸம்பு³த்³தோ⁴ ‘பூவே கா²தி³ஸ்ஸாமீ’தி பஞ்சஹி பி⁴க்கு²ஸதேஹி ஸத்³தி⁴ம் விஹாரே நிஸின்னோ, தும்ஹாகம் ருசியா ஸதி அஹம் வோ நேஸ்ஸாமி, ஸேட்டி²ப⁴ரியம் பூவே ச கீ²ராதீ³னி ச க³ண்ஹாபேத², ஸத்து² ஸந்திகம் க³மிஸ்ஸாமா’’தி ஆஹ. ‘‘கஹம் பன, ப⁴ந்தே, ஏதரஹி ஸத்தா²’’தி? ‘‘இதோ பஞ்சசத்தாலீஸயோஜனமத்த²கே ஜேதவனவிஹாரே, மஹாஸேட்டீ²’’தி. ‘‘ப⁴ந்தே, காலம் அனதிக்கமித்வா ஏத்தகம் அத்³தா⁴னம் கத²ம் க³மிஸ்ஸாமா’’தி. ‘‘மஹாஸேட்டி², தும்ஹாகம் ருசியா ஸதி அஹம் வோ அத்தனோ இத்³தி⁴ப³லேன நேஸ்ஸாமி, தும்ஹாகம் பாஸாதே³ ஸோபானஸீஸம் அத்தனோ டா²னே ஏவ ப⁴விஸ்ஸதி, ஸோபானபரியோஸானம் பன வோ ஜேதவனத்³வாரகோட்ட²கே ப⁴விஸ்ஸதி, உபரிபாஸாதா³ ஹேட்டா²பாஸாத³ம் ஓதரணகாலமத்தேனேவ ஜேதவனம் நேஸ்ஸாமீ’’தி. ஸோ ‘‘ஸாது⁴, ப⁴ந்தே’’தி ஸம்படிச்சி².

தே²ரோ ஸோபானஸீஸம் தத்தே²வ கத்வா ‘‘ஸோபானபாத³மூலம் ஜேதவனத்³வாரகோட்ட²கே ஹோதூ’’தி அதி⁴ட்டா²ஸி. ததே²வ அஹோஸி. இதி தே²ரோ ஸேட்டி²ஞ்ச ஸேட்டி²ப⁴ரியஞ்ச உபரிபாஸாதா³ ஹேட்டா²பாஸாத³ம் ஓதரணகாலதோ கி²ப்பதரம் ஜேதவனம் ஸம்பாபேஸி. தே உபோ⁴பி ஸத்தா²ரம் உபஸங்கமித்வா காலம் ஆரோசேஸும். ஸத்தா² ப⁴த்தக்³க³ம் பவிஸித்வா பஞ்ஞத்தவரபு³த்³தா⁴ஸனே நிஸீதி³ ஸத்³தி⁴ம் பி⁴க்கு²ஸங்கே⁴ன. மஹாஸேட்டி² பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ த³க்கி²ணோத³கம் அதா³ஸி. ப⁴ரியாபிஸ்ஸ ததா²க³தஸ்ஸ பத்தே பூவம் பதிட்டா²பேஸி. ஸத்தா² அத்தனோ யாபனமத்தம் க³ண்ஹி, பஞ்சஸதா பி⁴க்கூ²பி யாபனமத்தம் க³ண்ஹிம்ஸு. ஸேட்டி² கீ²ரஸப்பிமது⁴ஸக்க²ராதீ³னி த³த³மானோ ந க²யம் அக³மாஸி. ஸத்தா² பஞ்சஹி பி⁴க்கு²ஸதேஹி ஸத்³தி⁴ம் ப⁴த்தகிச்சம் நிட்டா²பேஸி. மஹாஸேட்டி²பி ஸத்³தி⁴ம் ப⁴ரியாய யாவத³த்த²ம் கா²தி³. பூவானம் பரியோஸானமேவ ந பஞ்ஞாயதி. ஸகலவிஹாரே பி⁴க்கூ²னஞ்ச விகா⁴ஸாதா³னஞ்ச தி³ன்னேஸுபி பரியந்தோ ந பஞ்ஞாயதேவ. ‘‘ப⁴ந்தே, பூவா பரிக்க²யம் ந க³ச்ச²ந்தீ’’தி ப⁴க³வதோ ஆரோசேஸும். ‘‘தேன ஹி ஜேதவனத்³வாரகோட்ட²கே ச²ட்³டே³தா²’’தி. அத² நே த்³வாரகோட்ட²கஸ்ஸ அவிதூ³ரே பப்³பா⁴ரட்டா²னே ச²ட்³ட³யிம்ஸு. யாவஜ்ஜதனாபி தம் டா²னம் கபல்லகபூவபப்³பா⁴ரந்தேவ பஞ்ஞாயதி. மஹாஸேட்டி² ஸஹ ப⁴ரியாய ப⁴க³வந்தம் உபஸங்கமித்வா வந்தி³த்வா ஏகமந்தம் அட்டா²ஸி. ப⁴க³வா அனுமோத³னமகாஸி. அனுமோத³னாவஸானே உபோ⁴பி ஸோதாபத்திப²லே பதிட்டா²ய ஸத்தா²ரம் வந்தி³த்வா த்³வாரகோட்ட²கே ஸோபானம் ஆருய்ஹ அத்தனோ பாஸாதே³யேவ பதிட்ட²ஹிம்ஸு.

ததோ பட்டா²ய ஸேட்டி² அஸீதிகோடித⁴னம் பு³த்³த⁴ஸாஸனேயேவ விக்கிரி. புனதி³வஸே ஸாயன்ஹஸமயே த⁴ம்மஸபா⁴யம் ஸன்னிஸின்னா பி⁴க்கூ² ‘‘பஸ்ஸதா²வுஸோ, மஹாமோக்³க³ல்லானத்தே²ரஸ்ஸ ஆனுபா⁴வம், அனுபஹச்ச நாம ஸத்³த⁴ம், அனுபஹச்ச போ⁴கே³ மச்ச²ரியஸேட்டி²ம் முஹுத்தேனேவ த³மேத்வா நிப்³பி³ஸேவனம் கத்வா பூவே கா³ஹாபேத்வா ஜேதவனம் ஆனேத்வா ஸத்து² ஸம்முக²ம் கத்வா ஸோதாபத்திப²லே பதிட்டா²பேஸி, அஹோ மஹானுபா⁴வோ தே²ரோ’’தி தே²ரஸ்ஸ கு³ணம் கதே²ந்தா நிஸீதி³ம்ஸு. ஸத்தா² தி³ப்³பா³ய ஸோததா⁴துயா கத²ம் ஸுத்வா ஆக³ந்த்வா, ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா, ‘‘இமாய நாமா’’தி வுத்தே, ‘‘பி⁴க்க²வே, குலத³மகேன நாம பி⁴க்கு²னா அனுபஹச்ச ஸத்³த⁴ம், அனுபஹச்ச போ⁴கே³, குலம் அகிலமேத்வா அவிஹேடே²த்வா புப்ப²தோ ரேணும் க³ண்ஹந்தேன ப⁴மரேன விய உபஸங்கமித்வா பு³த்³த⁴கு³ணம் ஜானாபேதப்³ப³ம், தாதி³ஸோ மம புத்தோ மோக்³க³ல்லானோ’’தி தே²ரம் பஸம்ஸித்வா இமம் கா³த²மாஹ –

49. ‘‘யதா²பி ப⁴மரோ புப்ப²ம், வண்ணக³ந்த⁴மஹேட²யம்;

பலேதி ரஸமாதா³ய, ஏவம் கா³மே முனீ சரே’’தி.

தத்த² ப⁴மரோதி யா காசி மது⁴கரஜாதி. புப்ப²ந்தி புப்பா²ராமே சரந்தோ புப்ப²ஞ்ச வண்ணஞ்ச க³ந்த⁴ஞ்ச அஹேட²யந்தோ அவினாஸேந்தோ விசரதீதி அத்தோ². பலேதீதி ஏவம் சரித்வா யாவத³த்த²ம் ரஸம் பிவித்வா அபரம்பி மது⁴கரணத்தா²ய ஆதா³ய பலேதி, ஸோ ஏவம் வனக³ஹனம் அஜ்ஜோ²கா³ஹேத்வா ஏகஸ்மிம் ருக்க²ஸுஸிரே தம் ரஜமிஸ்ஸகம் ரஸம் ட²பேத்வா அனுபுப்³பே³ன மது⁴ரரஸம் மது⁴ம் கரோதி, ந தஸ்ஸ புப்பா²ராமே விசரிதபச்சயா புப்ப²ம் வா வண்ணக³ந்த⁴ம் வாஸ்ஸ விக³ச்ச²தி, அத² கோ² ஸப்³ப³ம் பாகதிகமேவ ஹோதி. ஏவம் கா³மே முனீ சரேதி ஏவம் ஸேகா²ஸேக²பே⁴தோ³ அனாகா³ரியமுனி குலபடிபாடியா கா³மே பி⁴க்க²ம் க³ண்ஹந்தோ விசரதீதி அத்தோ². ந ஹி தஸ்ஸ கா³மே சரணபச்சயா குலானம் ஸத்³தா⁴ஹானி வா போ⁴க³ஹானி வா ஹோந்தி. ஸத்³தா⁴பி போ⁴கா³பி பாகதிகாவ ஹோந்தி. ஏவம் சரித்வா ச பன நிக்க²மித்வா ஸேக²முனி தாவ ப³ஹிகா³மே உத³கபா²ஸுகட்டா²னே ஸங்கா⁴டிம் பஞ்ஞாபேத்வா நிஸின்னோ அக்க²ப⁴ஞ்ஜனவணபடிச்சா²த³னபுத்தமம்ஸூபமாதி³வஸேன பச்சவேக்க²ந்தோ பிண்ட³பாதம் பரிபு⁴ஞ்ஜித்வா ததா²ரூபம் வனஸண்ட³ம் அனுபவிஸித்வா அஜ்ஜ²த்திககம்மட்டா²னம் ஸம்மஸந்தோ சத்தாரோ மக்³கே³, சத்தாரி ச ஸாமஞ்ஞப²லானி ஹத்த²க³தானேவ கரோதி. அஸேக²முனி பன தி³ட்ட²த⁴ம்மஸுக²விஹாரமனுயுஞ்ஜதி. அயமஸ்ஸ ப⁴மரேன ஸத்³தி⁴ம் மது⁴கரணஸரிக்க²தா வேதி³தப்³பா³. இத⁴ பன கீ²ணாஸவோவ அதி⁴ப்பேதோ.

தே³ஸனாவஸானே ப³ஹூ ஸோதாபத்திப²லாதீ³னி பாபுணிம்ஸூதி.

ஸத்தா² இமம் த⁴ம்மதே³ஸனம் வத்வா உத்தரிபி தே²ரஸ்ஸ கு³ணம் பகாஸேதும் ‘‘ந, பி⁴க்க²வே, இதா³னேவ மோக்³க³ல்லானேன மச்ச²ரியஸேட்டி² த³மிதோ, புப்³பே³பி நம் த³மேத்வா கம்மப²லஸம்ப³ந்த⁴ம் ஜானாபேஸி ஏவா’’தி வத்வா இமமத்த²ம் பகாஸேந்தோ அதீதம் ஆஹரித்வா –

‘‘உபோ⁴ க²ஞ்ஜா உபோ⁴ குணீ, உபோ⁴ விஸமசக்கு²கா;

உபி⁴ன்னம் பிளகா ஜாதா, நாஹம் பஸ்ஸாமி இல்லிஸ’’ந்தி. (ஜா. 1.1.78) –

இமம் இல்லிஸஜாதகம் கதே²ஸீதி.

மச்ச²ரியகோஸியஸேட்டி²வத்து² பஞ்சமம்.

6. பாவேய்யகாஜீவகவத்து²

ந பரேஸம் விலோமானீதி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ பாவேய்யம் நாம ஆஜீவகம் ஆரப்³ப⁴ கதே²ஸி.

ஸாவத்தி²யம் கிரேகா க³ஹபதானீ புத்தட்டா²னே ட²பேத்வா பாவேய்யம் நாம ஆஜீவகம் படிஜக்³கி³. தஸ்ஸானந்தரக⁴ரேஸு மனுஸ்ஸா ஸத்து² த⁴ம்மதே³ஸனம் ஸுத்வா ஆக³ந்த்வா, ‘‘அஹோ அச்ச²ரியா பு³த்³தா⁴னம் த⁴ம்மதே³ஸனா’’தி நானப்பகாரேஹி பு³த்³த⁴கு³ணே வண்ணேந்தி. ஸா பு³த்³தா⁴னம் கு³ணகத²ம் ஸுத்வா விஹாரம் க³ந்த்வா த⁴ம்மம் ஸோதுகாமா ஆஜீவகஸ்ஸ ஏதமத்த²ம் கதே²த்வா, ‘‘க³ச்சி²ஸ்ஸாமி அஹம் பு³த்³த⁴ஸந்திகம், அய்யா’’தி ஆஹ. ஸோ ‘‘மா க³ச்சா²ஹீ’’தி நிவாரேத்வா தம் புனப்புனம் யாசமானம்பி நிவாரேஸி ஏவ. ஸா ‘‘அயம் மம விஹாரம் க³ந்த்வா த⁴ம்மம் ஸோதும் ந தே³தி, ஸத்தா²ரம் நிமந்தேத்வா இதே⁴வ த⁴ம்மம் ஸுணிஸ்ஸாமீ’’தி ஸாயன்ஹஸமயே புத்தம் பக்கோஸித்வா, ‘‘க³ச்ச², தாத, ஸ்வாதனாய ஸத்தா²ரம் நிமந்தேஹீ’’தி பேஸேஸி. ஸோ க³ச்ச²ந்தோ பட²மதரம் ஆஜீவகஸ்ஸ வஸனட்டா²னம் க³ந்த்வா தம் வந்தி³த்வா நிஸீதி³. அத² நம் ஸோ ‘‘கஹம் க³ச்ச²ஸீ’’தி ஆஹ. ‘‘மாது வசனேன ஸத்தா²ரம் நிமந்தேதும் க³ச்சா²மீ’’தி ஆஹ. ‘‘மா தஸ்ஸ ஸந்திகம் க³ச்சா²ஹீ’’தி. ‘‘அலம், அய்ய, மம மாது பா⁴யாமி, க³ச்சி²ஸ்ஸாமஹ’’ந்தி. ‘‘ஏதஸ்ஸ கதஸக்காரம் உபோ⁴பி கா²தி³ஸ்ஸாம, மா க³ச்சா²ஹீ’’தி. ‘‘அலம், அய்ய, மாதா மே தஜ்ஜேஸ்ஸதீ’’தி. தேன ஹி க³ச்ச², க³ந்த்வா பன நிமந்தேத்வா, ‘‘அம்ஹாகம் கே³ஹம் அஸுகட்டா²னே வா அஸுகவீதி²யம் வா அஸுகமக்³கே³ன வா க³ந்தப்³ப³’’ந்தி மா ஆசிக்கி². ‘‘ஸந்திகே டி²தோ விய அஞ்ஞேன மக்³கே³ன க³ச்ச²ந்தோ விய பலாயித்வா ஏஹீ’’தி. ஸோ ஆஜீவகஸ்ஸ வசனம் ஸுத்வா ஸத்து² ஸந்திகம் க³ந்த்வா நிமந்தேத்வா ஆஜீவகேன வுத்தனியாமேனேவ ஸப்³ப³ம் கத்வா தஸ்ஸ ஸந்திகம் க³ந்த்வா, ‘‘கிம் தே கத’’ந்தி புட்டோ², ‘‘ஸப்³ப³ம் கதம், அய்யா’’தி ஆஹ. ‘‘ப⁴த்³த³கம் தே கதம், தஸ்ஸ ஸக்காரம் உபோ⁴பி கா²தி³ஸ்ஸாமா’’தி வத்வா புனதி³வஸே ஆஜீவகோ பாதோவ தம் கே³ஹம் அக³மாஸி. தம் க³ஹேத்வா பச்சா²க³ப்³பே⁴ நிஸீதா³பேஸும்.

படிவிஸ்ஸகமனுஸ்ஸா தம் கே³ஹம் அல்லகோ³மயேன உபலிம்பித்வா லாஜபஞ்சமானி புப்பா²னி விகிரித்வா ஸத்து² நிஸீத³னத்தா²ய மஹாரஹம் ஆஸனம் பஞ்ஞாபேஸும். பு³த்³தே⁴ஹி ஸத்³தி⁴ம் அபரிசிதமனுஸ்ஸா ஹி ஆஸனபஞ்ஞத்திம் ந ஜானந்தி, பு³த்³தா⁴னஞ்ச மக்³க³தே³ஸகேன கிச்சம் நாம நத்தி², போ³தி⁴மூலே த³ஸஸஹஸ்ஸிஸோகதா⁴தும் கம்பேத்வா ஸம்போ³தி⁴ம் பத்ததி³வஸேயேவ ஹி நேஸம் ‘‘அயம் மக்³கோ³ நிரயம் க³ச்ச²தி, அயம் திரச்சா²னயோனிம், அயம் பேத்திவிஸயம், அயம் மனுஸ்ஸலோகம், அயம் தே³வலோகம், அயம் அமதமஹானிப்³பா³ன’’ந்தி ஸப்³பே³ மக்³கா³ ஆவிபூ⁴தா. கா³மனிக³மாதீ³னம் பன மக்³கே³ வத்தப்³ப³மேவ நத்தி². தஸ்மா ஸத்தா² பாதோவ பத்தசீவரமாதா³ய மஹாஉபாஸிகாய கே³ஹத்³வாரம் க³தோ. ஸா கே³ஹா நிக்க²மித்வா ஸத்தா²ரம் பஞ்சபதிட்டி²தேன வந்தி³த்வா அந்தோனிவேஸனம் பவேஸேத்வா ஆஸனே நிஸீதா³பேத்வா த³க்கி²ணோத³கம் த³த்வா பணீதேன கா²த³னீயேன போ⁴ஜனீயேன பரிவிஸி. உபாஸிகா கதப⁴த்தகிச்சஸ்ஸ ஸத்து²னோ அனுமோத³னம் காரேதுகாமா பத்தம் க³ண்ஹி. ஸத்தா² மது⁴ரஸ்ஸரேன அனுமோத³னத⁴ம்மகத²ம் ஆரபி⁴. உபாஸிகா ‘‘ஸாது⁴, ஸாதூ⁴’’தி ஸாது⁴காரம் த³த³மானா த⁴ம்மம் ஸுணி. ஆஜீவகோபி பச்சா²க³ப்³பே⁴ நிஸின்னோவ தஸ்ஸா ஸாது⁴காரம் த³த்வா த⁴ம்மம் ஸுணந்தியா ஸத்³த³ம் ஸுத்வா ஸந்தா⁴ரேதும் நாஸக்கி². ‘‘ந இதா³னேஸா மய்ஹ’’ந்தி நிக்க²மித்வா ‘‘நட்டா²ஸி காளகண்ணி, ஏதஸ்ஸ ஏவம் ஸக்காரம் கரோதீ’’தி நானப்பகாரேன உபாஸிகஞ்ச ஸத்தா²ரஞ்ச அக்கோஸந்தோ பலாயி. உபாஸிகா தஸ்ஸ கதா²ய லஜ்ஜிதா அஞ்ஞத²த்தம் க³தம் சித்தம் தே³ஸனானுஸாரேன ஞாணம் பேஸேதும் நாஸக்கி². அத² நம் ஸத்தா² ‘‘கிம் உபாஸிகே சித்தம் தே³ஸனானுக³தம் காதும் ந ஸக்கோஸீ’’தி? ‘‘ப⁴ந்தே, ஏதஸ்ஸ மே கதா²ய சித்தம் அஞ்ஞத²த்தம் உபக³த’’ந்தி. ஸத்தா² ‘‘ஏவரூபஸ்ஸ விஸபா⁴க³ஜனஸ்ஸ கதி²தம் கத²ம் நாம ஆவஜ்ஜிதும் ந வட்டதி, ஏவரூபம் அஸமன்னாஹரித்வா அத்தனோ கதாகதமேவ ஓலோகேதும் வட்டதீ’’தி வத்வா இமம் கா³த²மாஹ –

50. ‘‘ந பரேஸம் விலோமானி, ந பரேஸம் கதாகதம்;

அத்தனோவ அவேக்கே²ய்ய, கதானி அகதானி சா’’தி.

தத்த² ந பரேஸம் விலோமானீதி பரேஸம் விலோமானி ப²ருஸானி மம்மச்சே²த³கவசனானி ந மனஸிகாதப்³பா³னி. ந பரேஸம் கதாகதந்தி ‘‘அஸுகோ உபாஸகோ அஸ்ஸத்³தோ⁴ அப்பஸன்னோ, நாபிஸ்ஸ கே³ஹே கடச்சு²பி⁴க்கா²தீ³னி தி³ய்யந்தி, ந ஸலாகப⁴த்தாதீ³னி, ந சீவராதி³பச்சயதா³னம் ஏதஸ்ஸ அத்தி², ததா² அஸுகா உபாஸிகா அஸ்ஸத்³தா⁴ அப்பஸன்னா, நாபிஸ்ஸா கே³ஹே கடச்சு²பி⁴க்கா²தீ³னி தி³ய்யந்தி, ந ஸலாகப⁴த்தாதீ³னி, ந சீவராதி³பச்சயதா³னம் ஏதிஸ்ஸா அத்தி², ததா² அஸுகோ பி⁴க்கு² அஸ்ஸத்³தோ⁴ அப்பஸன்னோ, நாபி உபஜ்ஜா²யவத்தம் கரோதி, ந ஆசரியவத்தம், ந ஆக³ந்துகவத்தம், ந க³மிகவத்தம், ந சேதியங்க³ணவத்தம், ந உபோஸதா²கா³ரவத்தம், ந போ⁴ஜனஸாலாவத்தம், ந ஜந்தாக⁴ரவத்தாதீ³னி, நாபிஸ்ஸ கிஞ்சி து⁴தங்க³ம் அத்தி², ந பா⁴வனாராமதாய உஸ்ஸாஹமத்தம்பீ’’தி ஏவம் பரேஸம் கதாகதம் நாம ந ஓலோகேதப்³ப³ம். அத்தனோவ அவேக்கே²ய்யாதி ‘‘கத²ம் பூ⁴தஸ்ஸ மே ரத்திந்தி³வா வீதிவத்தந்தீதி பப்³ப³ஜிதேன அபி⁴ண்ஹம் பச்சவேக்கி²தப்³ப³’’ந்தி (அ. நி. 10.48) இமம் ஓவாத³ம் அனுஸ்ஸரந்தோ ஸத்³தா⁴பப்³ப³ஜிதோ குலபுத்தோ ‘‘கிம் நு கோ² அஹம் ‘அனிச்சம் து³க்க²ம் அனத்தா’தி திலக்க²ணம் ஆரோபேத்வா யோகே³ கம்மம் காதும் ஸக்கி²ம், நாஸக்கி²’’ந்தி ஏவம் அத்தனோ கதாகதானி ஓலோகேய்யாதி.

தே³ஸனாவஸானே ஸா உபாஸிகா ஸோதாபத்திப²லே பதிட்டி²தா, தே³ஸனா மஹாஜனஸ்ஸ ஸாத்தி²கா ஜாதாதி.

பாவேய்யகாஜீவகவத்து² ச²ட்ட²ம்.

7. ச²த்தபாணிஉபாஸகவத்து²

யதா²பி ருசிரம் புப்ப²ந்தி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ ச²த்தபாணிஉபாஸகம் ஆரப்³ப⁴ கதே²ஸி.

ஸாவத்தி²யஞ்ஹி ச²த்தபாணி நாம உபாஸகோ திபிடகத⁴ரோ அனாகா³மீ. ஸோ பாதோவ உபோஸதி²கோ ஹுத்வா ஸத்து² உபட்டா²னம் அக³மாஸி. அனாகா³மிஅரியஸாவகானஞ்ஹி ஸமாதா³னவஸேன உபோஸத²கம்மம் நாம நத்தி², மக்³கே³னேவ தேஸம் ப்³ரஹ்மசரியஞ்ச ஏகப⁴த்திகஞ்ச ஆக³தம். தேனேவாஹ – ‘‘க⁴டிகாரோ கோ², மஹாராஜ, கும்ப⁴காரோ ஏகப⁴த்திகோ ப்³ரஹ்மசாரீ ஸீலவா கல்யாணத⁴ம்மோ’’தி (ம. நி. 2.288). ஏவம் அனாகா³மினோ பகதியாவ ஏகப⁴த்திகா ச ப்³ரஹ்மசாரினோ ச ஹோந்தி. ஸோபி ததே²வ உபோஸதி²கோ ஹுத்வா ஸத்தா²ரம் உபஸங்கமித்வா வந்தி³த்வா த⁴ம்மகத²ம் ஸுணந்தோ நிஸீதி³. தஸ்மிம் ஸமயே ராஜா பஸேனதி³ கோஸலோ ஸத்து² உபட்டா²னம் அக³மாஸி. ச²த்தபாணி உபாஸகோ தம் ஆக³ச்ச²ந்தம் தி³ஸ்வா ‘‘உட்டா²தப்³ப³ம் நு கோ², நோ’’தி சிந்தேத்வா – ‘‘அஹம் அக்³க³ராஜஸ்ஸ ஸந்திகே நிஸின்னோ, தஸ்ஸ மே பதே³ஸராஜானம் தி³ஸ்வா உட்டா²தும் ந யுத்தம், ராஜா கோ² பன மே அனுட்ட²ஹந்தஸ்ஸ குஜ்ஜி²ஸ்ஸதி, ஏதஸ்மிம் குஜ்ஜ²ந்தேபி நேவ உட்ட²ஹிஸ்ஸாமி. ராஜானம் தி³ஸ்வா உட்ட²ஹந்தேன ஹி ராஜா க³ருகதோ ஹோதி, நோ ஸத்தா², தஸ்மா நேவ உட்ட²ஹிஸ்ஸாமீ’’தி ந உட்ட²ஹி. பண்டி³தபுரிஸா நாம க³ருதரானம் ஸந்திகே நிஸீதி³த்வா அனுட்ட²ஹந்தம் தி³ஸ்வா ந குஜ்ஜ²ந்தி. ராஜா பன தம் அனுட்ட²ஹந்தம் தி³ஸ்வா குபிதமானஸோ ஸத்தா²ரம் வந்தி³த்வா ஏகமந்தம் நிஸீதி³. ஸத்தா² குபிதபா⁴வம் ஞத்வா, ‘‘மஹாராஜ, அயம் ச²த்தபாணி உபாஸகோ பண்டி³தோ தி³ட்ட²த⁴ம்மோ திபிடகத⁴ரோ அத்தா²னத்த²குஸலோ’’தி உபாஸகஸ்ஸ கு³ணம் கதே²ஸி. ரஞ்ஞோ தஸ்ஸ கு³ணகத²ம் ஸுணந்தஸ்ஸேவ சித்தம் முது³கம் ஜாதம்.

அதே²கதி³வஸம் ராஜா உபரிபாஸாதே³ டி²தோ ச²த்தபாணிம் உபாஸகம் கதப⁴த்தகிச்சம் ச²த்தமாதா³ய உபாஹனமாருய்ஹ ராஜங்க³ணேன க³ச்ச²ந்தம் தி³ஸ்வா பக்கோஸாபேஸி. ஸோ ச²த்துபாஹனம் அபனேத்வா ராஜானமுபஸங்கமித்வா வந்தி³த்வா ஏகமந்தம் அட்டா²ஸி. அத² நம் ராஜா ஆஹ – ‘‘போ⁴ உபாஸக, கிந்தே ச²த்துபாஹனம் அபனீத’’ந்தி. ‘‘‘ராஜா பக்கோஸதீ’தி ஸுத்வா அபனேத்வா ஆக³தோம்ஹீ’’தி. ‘‘அஜ்ஜ அம்ஹாகம் ராஜபா⁴வோ தும்ஹேஹி ஞாதோ ப⁴விஸ்ஸதீ’’தி. ‘‘ஸதா³பி மயம், தே³வ, தும்ஹாகம் ராஜபா⁴வம் ஜானாமா’’தி. ‘‘யதி³ ஏவம் கஸ்மா புரிமதி³வஸே ஸத்து² ஸந்திகே நிஸின்னோ மம் தி³ஸ்வா ந உட்ட²ஹீ’’தி? ‘‘மஹாராஜ, அஹம் அக்³க³ராஜஸ்ஸ ஸந்திகே நிஸின்னோ, பதே³ஸராஜானம் தி³ஸ்வா உட்ட²ஹந்தோ ஸத்த²ரி அகா³ரவம் பவேதே³ய்யம், தஸ்மா ந உட்ட²ஹி’’ந்தி. ‘‘ஹோது, போ⁴, திட்ட²தேதம்’’. ‘‘தும்ஹே கிர தி³ட்ட²த⁴ம்மிகஸம்பராயிகானம் அத்தா²னத்தா²னம் குஸலா திபிடகத⁴ரா அம்ஹாகம் அந்தேபுரே த⁴ம்மம் வாசேதா²’’தி. ‘‘ந ஸக்கோமி, தே³வா’’தி. ‘‘கிம் காரணா’’தி? ‘‘ராஜகே³ஹம் நாம மஹாஸாவஜ்ஜம், து³யுத்தஸுயுத்தகானி க³ருகானேத்த², தே³வா’’தி. ‘‘மா ஏவம் வதே³த², ‘புரிமதி³வஸே மம் தி³ஸ்வா ந உட்டி²தோம்ஹீ’தி மா குக்குச்சம் கரோதா²’’தி. ‘‘தே³வ, கி³ஹீனம் விசரணட்டா²னம் நாம மஹாஸாவஜ்ஜம், ஏகம் பப்³ப³ஜிதம் பக்கோஸாபேத்வா த⁴ம்மம் வாசாபேதா²’’தி. ராஜா ‘‘ஸாது⁴, போ⁴, க³ச்ச²த² தும்ஹே’’தி தம் உய்யோஜேத்வா ஸத்து² ஸந்திகம் க³ந்த்வா ஸத்தா²ரம் யாசி, ‘‘ப⁴ந்தே, மல்லிகா ச தே³வீ வாஸப⁴க²த்தியா ச த⁴ம்மம் பரியாபுணிஸ்ஸாமாதி வத³ந்தி, பஞ்சஹி பி⁴க்கு²ஸதேஹி ஸத்³தி⁴ம் நிப³த்³த⁴ம் மம கே³ஹம் க³ந்த்வா தாஸம் த⁴ம்மம் உத்³தி³ஸதா²’’தி. ‘‘பு³த்³தா⁴னம் நிப³த்³த⁴ம் ஏகட்டா²னக³மனம் நாம நத்தி², மஹாராஜா’’தி. ‘‘தேன ஹி, ப⁴ந்தே, அஞ்ஞம் ஏகம் பி⁴க்கு²ம் தே³தா²’’தி. ஸத்தா² ஆனந்த³த்தே²ரஸ்ஸ பா⁴ரமகாஸி. தே²ரோ நிப³த்³த⁴ம் க³ந்த்வா தாஸம் உத்³தே³ஸம் உத்³தி³ஸதி. தாஸு மல்லிகா ஸக்கச்சம் க³ஹேத்வா ஸஜ்ஜா²யித்வா உத்³தே³ஸம் படிச்சா²பேஸி. வாஸப⁴க²த்தியா பன நேவ ஸக்கச்சம் க³ண்ஹாதி, ந ஸஜ்ஜா²யதி, ந உத்³தே³ஸம் படிச்சா²பேதும் ஸக்கோதி.

அதே²கதி³வஸம் ஸத்தா² தே²ரம் புச்சி² – ‘‘கிமானந்த³, உபாஸிகா த⁴ம்மம் பரியாபுணந்தீ’’தி? ‘‘ஆம, ப⁴ந்தே’’தி. ‘‘கா ஸக்கச்சம் க³ண்ஹாதீ’’தி? ‘‘மல்லிகா, ப⁴ந்தே, ஸக்கச்சம் க³ண்ஹாதி, ஸக்கச்சம் ஸஜ்ஜா²யதி, ஸக்கச்சம் உத்³தே³ஸம் படிச்சா²பேதும் ஸக்கோதி. தும்ஹாகம் பன ஞாதிதீ⁴தா நேவ ஸக்கச்சம் க³ண்ஹாதி, ந ஸஜ்ஜா²யதி, ந உத்³தே³ஸம் படிச்சா²பேதும் ஸக்கோதீ’’தி. ஸத்தா² தே²ரஸ்ஸ வசனம் ஸுத்வா, ‘‘ஆனந்த³, மயா கதி²தத⁴ம்மோ நாம ஸக்கச்சமஸுணந்தஸ்ஸ அக்³க³ண்ஹந்தஸ்ஸ அஸஜ்ஜா²யந்தஸ்ஸ அதே³ஸேந்தஸ்ஸ வண்ணஸம்பன்னம் அக³ந்த⁴கபுப்ப²ம் விய அப²லோ ஹோதி, ஸக்கச்சம் பன ஸவனாதீ³னி கரோந்தஸ்ஸ மஹப்ப²லோ ஹோதி மஹானிஸம்ஸோ’’தி வத்வா இமா த்³வே கா³தா² அபா⁴ஸி –

51. ‘‘யதா²பி ருசிரம் புப்ப²ம், வண்ணவந்தம் அக³ந்த⁴கம்;

ஏவம் ஸுபா⁴ஸிதா வாசா, அப²லா ஹோதி அகுப்³ப³தோ.

52. ‘‘யதா²பி ருசிரம் புப்ப²ம், வண்ணவந்தம் ஸக³ந்த⁴கம்;

ஏவம் ஸுபா⁴ஸிதா வாசா, ஸப²லா ஹோதி குப்³ப³தோ’’தி.

தத்த² ருசிரந்தி ஸோப⁴னம். வண்ணவந்தந்தி வண்ணஸண்டா²னஸம்பன்னம், அக³ந்த⁴கந்தி க³ந்த⁴விரஹிதம் பாலிப⁴த்³த³ககி³ரிகண்ணிகஜயஸுமனாதி³பே⁴த³ம். ஏவம் ஸுபா⁴ஸிதா வாசாதி ஸுபா⁴ஸிதா வாசா நாம தேபிடகம் பு³த்³த⁴வசனம். தம் வண்ணஸண்டா²னஸம்பன்னம் அக³ந்த⁴கபுப்ப²ஸதி³ஸம். யதா² பன அக³ந்த⁴கபுப்ப²ம் யோ நம் தா⁴ரேதி, தஸ்ஸ ஸரீரே க³ந்த⁴ம் ந ப²ரதி, ஏவம் ஏதம்பி யோ நம் ஸக்கச்சம் ஸவனாதீ³ஹி ந ஸமாசரதி, தஸ்ஸ ஸக்கச்சம் அஸமாசரந்தஸ்ஸ யம் தத்த² கத்தப்³ப³ம், தம் அகுப்³ப³தோ ஸுதக³ந்த⁴ஞ்ச வாசாக³ந்த⁴ஞ்ச படிபத்திக³ந்த⁴ஞ்ச ந ஆவஹதி அப²லா ஹோதி. தேன வுத்தம் – ‘‘ஏவம் ஸுபா⁴ஸிதா வாசா, அப²லா ஹோதி அகுப்³ப³தோ’’தி. ஸக³ந்த⁴கந்தி சம்பகனீலுப்பலாதி³பே⁴த³ம். ஏவந்தி யதா² தம் புப்ப²ம் தா⁴ரேந்தஸ்ஸ ஸரீரே க³ந்தோ⁴ ப²ரதி, ஏவம் தேபிடகபு³த்³த⁴வசனஸங்கா²தா ஸுபா⁴ஸிதா வாசாபி. குப்³ப³தோதி யோ ஸக்கச்சம் ஸவனாதீ³ஹி தத்த² கத்தப்³ப³ம் கரோதி, ஸா அஸ்ஸ புக்³க³லஸ்ஸ ஸப²லா ஹோதி, ஸுதக³ந்த⁴வாசாக³ந்த⁴படிபத்திக³ந்தா⁴னம் ஆவஹனதோ மஹப்ப²லா ஹோதி, மஹானிஸம்ஸாதி அத்தோ².

தே³ஸனாவஸானே ப³ஹூ ஸோதாபத்திப²லாதீ³னி பத்தா. தே³ஸனா மஹாஜனஸ்ஸ ஸாத்தி²கா ஜாதாதி.

ச²த்தபாணிஉபாஸகவத்து² ஸத்தமம்.

8. விஸாகா²வத்து²

யதா²பி புப்ப²ராஸிம்ஹாதி இமம் த⁴ம்மதே³ஸனம் ஸத்தா² ஸாவத்தி²யம் உபனிஸ்ஸாய புப்³பா³ராமே விஹரந்தோ விஸாக²ம் உபாஸிகம் ஆரப்³ப⁴ கதே²ஸி.

ஸா கிர அங்க³ரட்டே² ப⁴த்³தி³யனக³ரே மேண்ட³கஸேட்டி²புத்தஸ்ஸ த⁴னஞ்சயஸேட்டி²னோ அக்³க³மஹேஸியா ஸுமனதே³வியா குச்சி²ஸ்மிம் நிப்³ப³த்தி. தஸ்ஸா ஸத்தவஸ்ஸிககாலே ஸத்தா² ஸேலப்³ராஹ்மணாதீ³னம் போ³த⁴னேய்யப³ந்த⁴வானம் உபனிஸ்ஸயஸம்பத³ம் தி³ஸ்வா மஹாபி⁴க்கு²ஸங்க⁴பரிவாரோ சாரிகம் சரமானோ தம் நக³ரம் பாபுணி.

தஸ்மிஞ்ச ஸமயே மேண்ட³கோ, க³ஹபதி, தஸ்மிம் நக³ரே பஞ்சன்னம் மஹாபுஞ்ஞானம் ஜேட்ட²கோ ஹுத்வா ஸேட்டி²ட்டா²னம் கரோதி. பஞ்ச மஹாபுஞ்ஞா நாம மேண்ட³கோ ஸேட்டி², சந்த³பது³மா நாம தஸ்ஸேவ ஜேட்ட²கப⁴ரியா, தஸ்ஸேவ ஜேட்ட²கபுத்தோ த⁴னஞ்சயோ நாம, தஸ்ஸ ப⁴ரியா ஸுமனதே³வீ நாம, மேண்ட³கஸேட்டி²னோ தா³ஸோ புண்ணோ நாமாதி. ந கேவலஞ்ச மேண்ட³கஸேட்டி²யேவ, பி³ம்பி³ஸாரரஞ்ஞோ பன விஜிதே பஞ்ச அமிதபோ⁴கா³ நாம அஹேஸும் – ஜோதிகோ, ஜடிலோ, மேண்ட³கோ, புண்ணகோ, காகவலியோதி. தேஸு அயம் மேண்ட³கஸேட்டி² த³ஸப³லஸ்ஸ அத்தனோ நக³ரம் ஸம்பத்தபா⁴வம் ஞத்வா புத்தஸ்ஸ த⁴னஞ்சயஸேட்டி²னோ தீ⁴தரம் விஸாக²ம் தா³ரிகம் பக்கோஸாபேத்வா ஆஹ – ‘‘அம்ம, துய்ஹம்பி மங்க³லம், அம்ஹாகம்பி மங்க³லம், தவ பரிவாரேஹி பஞ்சஹி தா³ரிகாஸதேஹி ஸத்³தி⁴ம் பஞ்ச ரத²ஸதானி ஆருய்ஹ பஞ்சஹி தா³ஸிஸதேஹி பரிவுதா த³ஸப³லஸ்ஸ பச்சுக்³க³மனம் கரோஹீ’’தி. ஸா ‘‘ஸாதூ⁴’’தி படிஸ்ஸுணித்வா ததா² அகாஸி. காரணாகாரணேஸு பன குஸலத்தா யாவதிகா யானஸ்ஸ பூ⁴மி, யானேன க³ந்த்வா யானா பச்சோரோஹித்வா பத்திகாவ ஸத்தா²ரம் உபஸங்கமித்வா வந்தி³த்வா ஏகமந்தம் அட்டா²ஸி. அத²ஸ்ஸா சரியாவஸேன ஸத்தா² த⁴ம்மம் தே³ஸேஸி. ஸா தே³ஸனாவஸானே பஞ்சஹி தா³ரிகாஸதேஹி ஸத்³தி⁴ம் ஸோதாபத்திப²லே பதிட்ட²ஹி. மேண்ட³கஸேட்டி²பி கோ² ஸத்தா²ரமுபஸங்கமித்வா த⁴ம்மகத²ம் ஸுத்வா ஸோதாபத்திப²லே பதிட்டா²ய ஸ்வாதனாய நிமந்தேத்வா புனதி³வஸே அத்தனோ நிவேஸனே பணீதேன கா²த³னீயேன போ⁴ஜனீயேன பு³த்³த⁴ப்பமுக²ம் பி⁴க்கு²ஸங்க⁴ம் பரிவிஸித்வா ஏதேனேவ உபாயேன அட்³ட⁴மாஸம் மஹாதா³னமதா³ஸி. ஸத்தா² ப⁴த்³தி³யனக³ரே யதா²பி⁴ரந்தம் விஹரித்வா பக்காமி.

தேன கோ² பன ஸமயேன பி³ம்பி³ஸாரோ ச பஸேனதி³ கோஸலோ ச அஞ்ஞமஞ்ஞம் ப⁴கி³னிபதிகா ஹோந்தி. அதே²கதி³வஸம் கோஸலராஜா சிந்தேஸி – ‘‘பி³ம்பி³ஸாரஸ்ஸ விஜிதே பஞ்ச அமிதபோ⁴கா³ மஹாபுஞ்ஞா வஸந்தி, மய்ஹம் விஜிதே ஏகோபி தாதி³ஸோ நத்தி², யம்னூனாஹம் பி³ம்பி³ஸாரஸ்ஸ ஸந்திகம் க³ந்த்வா ஏகம் மஹாபுஞ்ஞம் யாசேய்ய’’ந்தி. ஸோ தத்த² க³ந்த்வா ரஞ்ஞா கதபடிஸந்தா²ரோ ‘‘கிம் காரணா ஆக³தோஸீ’’தி புட்டோ² ‘‘‘தும்ஹாகம் விஜிதே பஞ்ச அமிதபோ⁴கா³ மஹாபுஞ்ஞா வஸந்தி, ததோ ஏகம் க³ஹேத்வா க³மிஸ்ஸாமீ’தி ஆக³தோம்ஹி, தேஸு மே ஏகம் தே³தா²’’தி ஆஹ. ‘‘மஹாகுலானி அம்ஹேஹி சாலேதும் ந ஸக்கா’’தி ஆஹ. ‘‘அஹம் அலத்³தா⁴ ந க³மிஸ்ஸாமீ’’தி ஆஹ. ராஜா அமச்சேஹி ஸத்³தி⁴ம் மந்தேத்வா ‘‘ஜோதிகாதீ³னம் மஹாகுலானம் சாலனம் நாம மஹாபத²வியா சாலனஸதி³ஸம், மேண்ட³கமஹாஸேட்டி²ஸ்ஸ புத்தோ த⁴னஞ்சயஸேட்டி² நாம அத்தி², தேன ஸத்³தி⁴ம் மந்தேத்வா படிவசனம் தே த³ஸ்ஸாமீ’’தி வத்வா தம் பக்கோஸாபேத்வா, தாத, கோஸலராஜா ‘‘‘ஏகம் த⁴னஸேட்டி²ம் க³ஹேத்வா க³மிஸ்ஸாமீ’தி வத³தி, த்வம் தேன ஸத்³தி⁴ம் க³ச்சா²ஹீ’’தி. ‘‘தும்ஹேஸு பஹிணந்தேஸு க³மிஸ்ஸாமி, தே³வா’’தி. ‘‘தேன ஹி பரிவச்ச²ம் கத்வா க³ச்ச², தாதா’’தி. ஸோ அத்தனோ கத்தப்³ப³யுத்தகமகாஸி. ராஜாபிஸ்ஸ மஹந்தம் ஸக்காரம் கத்வா, ‘‘இமம் ஆதா³ய க³ச்ச²தா²’’தி பஸேனதி³ராஜானம் உய்யோஜேஸி. ஸோ தம் ஆதா³ய ஸப்³ப³த்த² ஏகரத்திவாஸேன க³ச்ச²ந்தோ ஏகம் பா²ஸுகட்டா²னம் பத்வா நிவாஸம் க³ண்ஹி, அத² நம் த⁴னஞ்சயஸேட்டி² புச்சி² – ‘‘இத³ம் கஸ்ஸ விஜித’’ந்தி? ‘‘மய்ஹம், ஸேட்டீ²’’தி. ‘‘கீவ தூ³ரோ இதோ ஸாவத்தீ²’’தி? ‘‘ஸத்தயோஜனமத்த²கே’’தி. ‘‘அந்தோனக³ரம் ஸம்பா³த⁴ம், அம்ஹாகம் பரிஜனோ மஹந்தோ, ஸசே ரோசேத², இதே⁴வ வஸேய்யாம, தே³வா’’தி. ராஜா ‘‘ஸாதூ⁴’’தி ஸம்படிச்சி²த்வா தஸ்மிம் டா²னே நக³ரம் மாபேத்வா தஸ்ஸ த³த்வா அக³மாஸி. தஸ்மிம் பதே³ஸே ஸயம் வஸனட்டா²னஸ்ஸ க³ஹிதத்தா நக³ரஸ்ஸ ஸாகேதந்த்வேவ நாமம் அஹோஸி.

ஸாவத்தி²யம்பி கோ² மிகா³ரஸேட்டி²னோ புத்தோ புண்ணவட்³ட⁴னகுமாரோ நாம வயப்பத்தோ அஹோஸி. அத² நம் மாதாபிதரோ வதி³ம்ஸு – ‘‘தாத, தவ ருச்சனட்டா²னே ஏகம் தா³ரிகம் உபதா⁴ரேஹீ’’தி. ‘‘‘மய்ஹம் ஏவரூபாய ப⁴ரியாய கிச்சம் நத்தீ²’தி, புத்த, மா ஏவம் கரி, குலம் நாம அபுத்தகம் ந திட்ட²தீ’’தி. ஸோ புனப்புனம் வுச்சமானோ ‘‘தேன ஹி பஞ்சகல்யாணஸமன்னாக³தம் தா³ரிகம் லப⁴மானோ தும்ஹாகம் வசனம் கரிஸ்ஸாமீ’’தி ஆஹ. ‘‘கானி பனேதானி பஞ்ச கல்யாணானி நாம, தாதா’’தி. கேஸகல்யாணம், மம்ஸகல்யாணம், அட்டி²கல்யாணம், ச²விகல்யாணம், வயகல்யாணந்தி. மஹாபுஞ்ஞாய ஹி இத்தி²யா கேஸா மோரகலாபஸதி³ஸா ஹுத்வா முஞ்சித்வா விஸ்ஸட்டா² நிவாஸனந்தம் பஹரித்வா நிவத்தித்வா உத்³த⁴க்³கா³ திட்ட²ந்தி, இத³ம் கேஸகல்யாணம் நாம, த³ந்தாவரணம் பி³ம்ப³ப²லஸதி³ஸம் வண்ணஸம்பன்னம் ஸமம் ஸுபு²ஸிதம் ஹோதி, இத³ம் மம்ஸகல்யாணம் நாம, த³ந்தா ஸுக்கா ஸமா அவிரளா உஸ்ஸாபேத்வா ட²பிதவஜிரபந்தி விய ஸமச்சி²ன்னஸங்க²பந்தி விய ச ஸோப⁴ந்தி, இத³ம் அட்டி²கல்யாணம் நாம, காளியா சுண்ணகாதீ³ஹி அவிலித்தோ ஏவ ச²விவண்ணோ ஸினித்³தோ⁴ நீலுப்பலதா³மஸதி³ஸோ ஹோதி, ஓதா³தாய ச கணிகாரபுப்ப²தா³மஸதி³ஸோ ஹோதி, இத³ம் ச²விகல்யாணம் நாம, த³ஸக்க²த்தும் விஜாதாபி கோ² பன ஸகிம் விஜாதா விய அவிக³தயோப்³ப³னாயேவ ஹோதி, இத³ம் வயகல்யாணம் நாம ஹோதி. அத²ஸ்ஸ மாதாபிதரோ அட்டு²த்தரஸதப்³ராஹ்மணே நிமந்தேத்வா போ⁴ஜேத்வா ‘‘பஞ்சகல்யாணஸமன்னாக³தா இத்தி²யோ நாம ஹோந்தீ’’தி புச்சி²ம்ஸு. ‘‘ஆம, ஹோந்தீ’’தி. ‘‘தேன ஹி ஏவரூபம் தா³ரிகம் பரியேஸிதும் அட்ட² ஜனா க³ச்ச²ந்தூ’’தி ப³ஹும் த⁴னம் த³த்வா ‘‘ஆக³தகாலே வோ கத்தப்³ப³ம் ஜானிஸ்ஸாம, க³ச்ச²த², ஏவரூபம் தா³ரிகம் பரியேஸத², தி³ட்ட²காலே ச இமம் பிலந்த⁴னம் த³தே³ய்யாதா²’’தி ஸதஸஹஸ்ஸக்³க⁴னிகம் ஸுவண்ணமாலம் த³த்வா உய்யோஜேஸும்.

தே மஹந்தமஹந்தானி நக³ரானி க³ந்த்வா பரியேஸமானா பஞ்சகல்யாணஸமன்னாக³தம் தா³ரிகம் அதி³ஸ்வா நிவத்தித்வா ஆக³ச்ச²ந்தா விவடனக்க²த்ததி³வஸே ஸாகேதம் அனுப்பத்தா – ‘‘அஜ்ஜ அம்ஹாகம் கம்மம் நிப்ப²ஜ்ஜிஸ்ஸதீ’’தி சிந்தயிம்ஸு. தஸ்மிம் பன நக³ரே அனுஸம்வச்ச²ரம் விவடனக்க²த்தம் நாம ஹோதி. ததா³ ப³ஹி அனிக்க²மனகுலானிபி பரிவாரேன ஸத்³தி⁴ம் கே³ஹா நிக்க²மித்வா அப்படிச்ச²ன்னேன ஸரீரேன பத³ஸாவ நதீ³தீரம் க³ச்ச²ந்தி. தஸ்மிம் தி³வஸே க²த்தியமஹாஸாலாதீ³னம் புத்தாபி ‘‘அத்தனோ ஸமானஜாதிகம் மனாபம் குலதா³ரிகம் தி³ஸ்வா மாலாகு³ளேன பரிக்கி²பிஸ்ஸாமா’’தி தம் தம் மக்³க³ம் நிஸ்ஸாய திட்ட²ந்தி. தேபி கோ² ப்³ராஹ்மணா நதீ³தீரே ஏகம் ஸாலம் பவிஸித்வா அட்ட²ம்ஸு. ‘‘தஸ்மிம் க²ணே விஸாகா² பன்னரஸஸோளஸவஸ்ஸுத்³தே³ஸிகா ஹுத்வா ஸப்³பா³ப⁴ரணபடிமண்டி³தா பஞ்சஹி குமாரிகாஸதேஹி பரிவுதா நதி³ம் க³ந்த்வா ந்ஹாயிஸ்ஸாமீ’’தி தம் பதே³ஸம் பத்தா, அத² கோ² மேகோ⁴ உட்ட²ஹித்வா பாவஸ்ஸி. பஞ்சஸதா குமாரிகாயோ வேகே³ன க³ந்த்வா ஸாலம் பவிஸிம்ஸு. ப்³ராஹ்மணா ஓலோகேந்தா தாஸு ஏகம்பி பஞ்சகல்யாணஸமன்னாக³தம் ந பஸ்ஸிம்ஸு. அத² விஸாகா² பகதிக³மனேனேவ ஸாலம் பாவிஸி, வத்தா²ப⁴ரணானி தேமிம்ஸு. ப்³ராஹ்மணா தஸ்ஸா சத்தாரி கல்யாணானி தி³ஸ்வா த³ந்தே பஸ்ஸிதுகாமா ‘‘அலஸஜாதிகா அம்ஹாகம் தீ⁴தா, ஏதிஸ்ஸா ஸாமிகோ கஞ்ஜிகமத்தம்பி ந லபி⁴ஸ்ஸதி மஞ்ஞே’’தி அஞ்ஞமஞ்ஞம் கத²யிம்ஸு. அத² நே விஸாகா² ஆஹ – ‘‘கம் வதே³த² தும்ஹே’’தி? ‘‘தம் கதே²ம, அம்மா’’தி. மது⁴ரோ ஹி தஸ்ஸா ஸத்³தோ³ கம்ஸதாளஸரோ விய நிச்ச²ரதி. அத² நே புன மது⁴ரஸத்³தே³ன ‘‘கிம் காரணா ப⁴ணதா²’’தி புச்சி². ‘‘தவ பரிவாரித்தி²யோ வத்தா²லங்காரே அதேமேத்வா வேகே³ன ஸாலம் பவிட்டா², துய்ஹம் ஏத்தகம் டா²னம் வேகே³ன ஆக³மனமத்தம்பி நத்தி², வத்தா²ப⁴ரணானி தேமேத்வா ஆக³தாஸி. தஸ்மா கதே²ம, அம்மா’’தி.

‘‘தாதா, ஏவம் மா வதே³த², அஹம் ஏதாஹி ப³லவதரா, காரணம் பன ஸல்லக்கே²த்வா ஜவேன நாக³தாம்ஹீ’’தி. ‘‘கிம், அம்மா’’தி? ‘‘தாதா, சத்தாரோ ஜனா ஜவமானா ந ஸோப⁴ந்தி, அபரம்பி காரணம் அத்தீ²’’தி. ‘‘கதமே சத்தாரோ ஜனா ஜவமானா ந ஸோப⁴ந்தி, அம்மா’’தி? தாதா, அபி⁴ஸித்தராஜா தாவ ஸப்³பா³ப⁴ரணபடிமண்டி³தோ கச்ச²ம் ப³ந்தி⁴த்வா ராஜங்க³ணே ஜவமானோ ந ஸோப⁴தி, ‘‘கிம் அயம் ராஜா க³ஹபதிகோ விய தா⁴வதீ’’தி அஞ்ஞத³த்து² க³ரஹம் லப⁴தி, ஸணிகம் க³ச்ச²ந்தோவ ஸோப⁴தி. ரஞ்ஞோ மங்க³லஹத்தீ²பி அலங்கதோ ஜவமானோ ந ஸோப⁴தி, வாரணலீளாய க³ச்ச²ந்தோவ ஸோப⁴தி. பப்³ப³ஜிதோ ஜவமானோ ந ஸோப⁴தி, ‘‘கிம் அயம் ஸமணோ கி³ஹீ விய தா⁴வதீ’’தி கேவலம் க³ரஹமேவ லப⁴தி, ஸமிதக³மனேன பன ஸோப⁴தி. இத்தீ² ஜவமானா ந ஸோப⁴தி, ‘‘கிம் ஏஸா இத்தீ² புரிஸோ விய தா⁴வதீ’’தி க³ரஹிதப்³பா³வ ஹோதி, ‘‘இமே சத்தாரோ ஜனா ஜவமானா ந ஸோப⁴ந்தி, தாதா’’தி. ‘‘கதமம் பன அபரம் காரணம், அம்மா’’தி? ‘‘தாதா, மாதாபிதரோ நாம தீ⁴தரம் அங்க³பச்சங்கா³னி ஸண்டா²பேத்வா போஸேந்தி. மயஞ்ஹி விக்கிணேய்யப⁴ண்ட³ம் நாம, அம்ஹே பரகுலபேஸனத்தா²ய போஸேந்தி. ஸசே ஜவமானானம் நிவத்த²து³ஸ்ஸகண்ணே வா அக்கமித்வா பூ⁴மியம் வா பக்க²லித்வா பதிதகாலே ஹத்தோ² வா பாதோ³ வா பி⁴ஜ்ஜேய்ய, குலஸ்ஸேவ பா⁴ரோ ப⁴வேய்ய, பஸாத⁴னப⁴ண்ட³ம் பன மே தேமேத்வா ஸுஸ்ஸிஸ்ஸதி. இமம் காரணம் ஸல்லக்கே²த்வா ந தா⁴விதாம்ஹி, தாதா’’தி.

ப்³ராஹ்மணா தஸ்ஸா கத²னகாலே த³ந்தஸம்பத்திம் தி³ஸ்வா ‘‘ஏவரூபா நோ த³ந்தஸம்பத்தி தி³ட்ட²புப்³பா³’’தி தஸ்ஸா ஸாது⁴காரம் த³த்வா, ‘‘அம்ம, துய்ஹமேவேஸா அனுச்ச²விகா’’தி வத்வா தம் ஸுவண்ணமாலம் பிலந்த⁴யிம்ஸு. அத² நே புச்சி² – ‘‘கதரனக³ரதோ ஆக³தாத்த², தாதா’’தி? ‘‘ஸாவத்தி²தோ, அம்மா’’தி. ‘‘ஸேட்டி²குலம் கதரம் நாமா’’தி? ‘‘மிகா³ரஸேட்டி² நாம, அம்மா’’தி. ‘‘அய்யபுத்தோ கோ நாமா’’தி? ‘‘புண்ணவட்³ட⁴னகுமாரோ நாம, அம்மா’’தி. ஸா ‘‘ஸமானஜாதிகம் நோ குல’’ந்தி அதி⁴வாஸேத்வா பிது ஸாஸனம் பஹிணி ‘‘அம்ஹாகம் ரத²ம் பேஸேதூ’’தி. கிஞ்சாபி ஹி ஸா ஆக³மனகாலே பத³ஸா ஆக³தா, ஸுவண்ணமாலாய பன பிலந்த⁴னகாலதோ பட்டா²ய ததா² க³ந்தும் ந லப⁴தி, இஸ்ஸரதா³ரிகா ரதா²தீ³ஹி க³ச்ச²ந்தி, இதரா பகதியானகம் வா அபி⁴ருஹந்தி, ச²த்தம் வா தாலபண்ணம் வா உபரி கரோந்தி, தஸ்மிம்பி அஸதி நிவத்த²ஸாடகஸ்ஸ த³ஸந்தம் உக்கி²பித்வா அம்ஸே கி²பந்தா க³ச்ச²ந்தி ஏவ. தஸ்ஸா பன பிதா பஞ்ச ரத²ஸதானி பேஸேஸி. ஸா ஸபரிவாரா ரத²ம் ஆருய்ஹ க³தா. ப்³ராஹ்மணாபி ஏகதோவ அக³மம்ஸு. அத² நே ஸேட்டி² புச்சி² – ‘‘குதோ ஆக³தாத்தா²’’தி? ‘‘ஸாவத்தி²தோ மஹாஸேட்டீ²’’தி. ‘‘ஸேட்டி² கதரோ நாமா’’தி? ‘‘மிகா³ரஸேட்டி² நாமா’’தி. ‘‘புத்தோ கோ நாமா’’தி? ‘‘புண்ணவட்³ட⁴னகுமாரோ நாம மஹாஸேட்டீ²’’தி. ‘‘த⁴னம் கித்தக’’ந்தி? ‘‘சத்தாலீஸகோடியோ மஹாஸேட்டீ²’’தி. ‘‘த⁴னம் தாவ அம்ஹாகம் த⁴னம் உபாதா³ய காகணிகமத்தம், தா³ரிகாய பன ஆரக்க²மத்தாய லத்³த⁴காலதோ பட்டா²ய கிம் அஞ்ஞேன காரணேனா’’தி அதி⁴வாஸேஸி. ஸோ தேஸம் ஸக்காரம் கத்வா ஏகாஹத்³வீஹம் வஸாபேத்வா உய்யோஜேஸி.

தே ஸாவத்தி²ம் க³ந்த்வா மிகா³ரஸேட்டி²ஸ்ஸ ‘‘லத்³தா⁴ நோ தா³ரிகா’’தி ஆரோசயிம்ஸு. ‘‘கஸ்ஸ தீ⁴தா’’தி? ‘‘த⁴னஞ்சயஸேட்டி²னோ’’தி. ஸோ ‘‘மஹாகுலஸ்ஸ மே தா³ரிகா லத்³தா⁴, கி²ப்பமேவ நம் ஆனேதும் வட்டதீ’’தி தத்த² க³மனத்த²ம் ரஞ்ஞோ ஆரோசேஸி. ராஜா ‘‘‘மஹாகுலம் ஏதம் மயா பி³ம்பி³ஸாரஸ்ஸ ஸந்திகா ஆனேத்வா ஸாகேதே நிவேஸிதம், தஸ்ஸ ஸம்மானம் காதும் வட்டதீ’தி அஹம்பி ஆக³மிஸ்ஸாமீ’’தி ஆஹ, ஸோ ‘‘ஸாது⁴, தே³வா’’தி வத்வா த⁴னஞ்சயஸேட்டி²னோ ஸாஸனம் பேஸேஸி – ‘‘மயி ஆக³ச்ச²ந்தே ராஜாபி ஆக³மிஸ்ஸதி, மஹந்தம் ராஜப³லம் ஏத்தகஸ்ஸ ஜனஸ்ஸ கத்தப்³ப³யுத்தகம் காதும் ஸக்கி²ஸ்ஸஸி, ந ஸக்கி²ஸ்ஸஸீ’’தி? இதரோபி ‘‘ஸசேபி த³ஸ ராஜானோ ஆக³ச்ச²ந்தி, ஆக³ச்ச²ந்தூ’’தி படிஸாஸனம் பேஸேஸி. மிகா³ரஸேட்டி² தாவ மஹந்தே நக³ரே கே³ஹகோ³பகமத்தம் ட²பேத்வா ஸேஸஜனம் ஆதா³ய க³ந்த்வா அட்³ட⁴யோஜனமத்தே டா²னே ட²த்வா ‘‘ஆக³தாம்ஹா’’தி ஸாஸனம் பஹிணி. த⁴னஞ்சயஸேட்டி² ப³ஹுபண்ணாகாரம் பேஸேத்வா தீ⁴தரா ஸத்³தி⁴ம் மந்தேஸி, ‘‘அம்ம, ஸஸுரோ கிர தே கோஸலரஞ்ஞா ஸத்³தி⁴ம் ஆக³தோ, தஸ்ஸ கதரம் கே³ஹம் படிஜக்³கி³தப்³ப³ம், ரஞ்ஞோ கதரம், உபராஜாதீ³னம் கதரானீ’’தி? பண்டி³தா ஸேட்டி²தீ⁴தா வஜிரக்³க³திகி²ணஞாணா கப்பஸதஸஹஸ்ஸம் பத்தி²தபத்த²னா அபி⁴னீஹாரஸம்பன்னா ‘‘ஸஸுரஸ்ஸ மே அஸுககே³ஹம் படிஜக்³க³த², ரஞ்ஞோ அஸுககே³ஹம், உபராஜாதீ³னம் அஸுகானீ’’தி ஸம்வித³ஹித்வா தா³ஸகம்மகரே பக்கோஸாபேத்வா ‘‘ஏத்தகா ரஞ்ஞோ கத்தப்³ப³கிச்சம் கரோத², ஏத்தகா உபராஜாதீ³னம், ஹத்தி²அஸ்ஸாத³யோபி தும்ஹேயேவ படிஜக்³க³த², அஸ்ஸப³ந்தா⁴த³யோபி ஆக³ந்த்வா மங்க³லச²ணம் அனுப⁴விஸ்ஸந்தீ’’தி ஸம்வித³ஹி. ‘‘கிம் காரணா’’? ‘‘‘மயம் விஸாகா²ய மங்க³லட்டா²னம் க³ந்த்வா ந கிஞ்சி லபி⁴ம்ஹ, அஸ்ஸரக்க²ணாதீ³னி கரோந்தா ஸுக²ம் ந விசரிம்ஹா’தி கேசி வத்தும் மா லபி⁴ம்ஸூ’’தி.

தம் தி³வஸமேவ விஸாகா²ய பிதா பஞ்சஸதே ஸுவண்ணகாரே பக்கோஸாபேத்வா ‘‘தீ⁴து மே மஹாலதாபஸாத⁴னம் நாம கரோதா²’’தி ரத்தஸுவண்ணஸ்ஸ நிக்க²ஸஹஸ்ஸம், தத³னுரூபானி ச ரஜதமணிமுத்தாபவாளவஜிராதீ³னி தா³பேஸி. ராஜா கதிபாஹம் வஸித்வாவ த⁴னஞ்சயஸேட்டி²ஸ்ஸ ஸாஸனம் பஹிணி ‘‘ந ஸக்கா ஸேட்டி²னா அம்ஹாகம் சிரம் போஸனம் நாம காதும், தா³னி தா³ரிகாய க³மனகாலம் ஜானாதூ’’தி. ஸோபி ரஞ்ஞோ ஸாஸனம் பேஸேஸி – ‘‘இதா³னி வஸ்ஸகாலோ ஆக³தோ, ந ஸக்கா சதுமாஸம் விசரிதும், தும்ஹாகம் ப³லகாயஸ்ஸ யம் யம் லத்³து⁴ம் வட்டதி, ஸப்³ப³ம் தம் மம பா⁴ரோ, மயா பேஸிதகாலே தே³வோ க³மிஸ்ஸதீ’’தி. ததோ பட்டா²ய ஸாகேதனக³ரம் நிச்சனக்க²த்தம் விய அஹோஸி. ராஜானம் ஆதி³ம் கத்வா ஸப்³பே³ஸம் மாலாக³ந்த⁴வத்தா²தீ³னி படியத்தானேவ ஹோந்தி. ததோ தே ஜனா சிந்தயிம்ஸு – ‘‘ஸேட்டி² அம்ஹாகமேவ ஸக்காரம் கரோதீ’’தி, ஏவம் தயோ மாஸா அதிக்கந்தா, பஸாத⁴னம் பன தாவ ந நிட்டா²தி. கம்மந்தாதி⁴ட்டா²யகா ஆக³ந்த்வா ஸேட்டி²னோ ஆரோசேஸும் – ‘‘அஞ்ஞம் அஸந்தம் நாம நத்தி², ப³லகாயஸ்ஸ பன ப⁴த்தபசனதா³ரூனி நப்பஹோந்தீ’’தி. ‘‘க³ச்ச²த², தாதா, இமஸ்மிம் நக³ரே பரிஜிண்ணா ஹத்தி²ஸாலாத³யோ சேவ பரிஜிண்ணகானி ச கே³ஹானி க³ஹேத்வா பசதா²’’தி. ஏவம் பசந்தானம்பி அட்³ட⁴மாஸோ அதிக்கந்தோ. ததோ புனபி ‘‘தா³ரூனி நத்தீ²’’தி ஆரோசயிம்ஸு. ‘‘இமஸ்மிம் காலே ந ஸக்கா தா³ரூனி லத்³து⁴ம், து³ஸ்ஸகோட்டா²கா³ரானி விவரித்வா தூ²லஸாடகேஹி வட்டியோ கத்வா தேலசாடீஸு தேமேத்வா ப⁴த்தம் பசதா²’’தி. தே அட்³ட⁴மாஸம் ததா² அகம்ஸு. ஏவம் சத்தாரோ மாஸா அதிக்கந்தா, பஸாத⁴னம்பி நிட்டி²தம்.

தஸ்மிம் பஸாத⁴னே சதஸ்ஸோ வஜிரனாளியோ உபயோக³ம் அக³மம்ஸு, முத்தானம் ஏகாத³ஸ நாளியோ, பவாளஸ்ஸ பா³வீஸதி நாளியோ, மணீனம் தேத்திம்ஸ நாளியோ. இதி ஏதேஹி ச அஞ்ஞேஹி ச ரதனேஹி நிட்டா²னம் அக³மாஸி. அஸுத்தமயம் பஸாத⁴னம் ரஜதேன ஸுத்தகிச்சம் கரிம்ஸு. தம் ஸீஸே படிமுக்கம் பாத³பிட்டி²ம் க³ச்ச²தி. தஸ்மிம் தஸ்மிம் டா²னே முத்³தி³கா யோஜேத்வா கதா ஸுவண்ணமயா க³ண்டி²கா ஹோந்தி, ரஜதமயா பாஸகா, மத்த²கமஜ்ஜே² ஏகா முத்³தி³கா, த்³வீஸு கண்ணபிட்டீ²ஸு த்³வே, க³லவாடகே ஏகா, த்³வீஸு ஜத்தூஸு த்³வே, த்³வீஸு கப்பரேஸு த்³வே, த்³வீஸு கடிபஸ்ஸேஸு த்³வேதி. தஸ்மிம் கோ² பன பஸாத⁴னே ஏகம் மோரம் கரிம்ஸு, தஸ்ஸ த³க்கி²ணபக்கே² ரத்தஸுவண்ணமயானி பஞ்ச பத்தஸதானி அஹேஸும், வாமபக்கே² பஞ்ச பத்தஸதானி, துண்ட³ம் பவாளமயம், அக்கீ²னி மணிமயானி, ததா² கீ³வா ச பிஞ்சா²னி ச, பத்தனாளியோ ரஜதமயா, ததா² ஜங்கா⁴யோ. ஸோ விஸாகா²ய மத்த²கமஜ்ஜே² பப்³ப³தகூடே ட²த்வா நச்சனமயூரோ விய கா²யதி. பத்தனாளிஸஹஸ்ஸஸ்ஸ ஸத்³தோ³ தி³ப்³ப³ஸங்கீ³தம் விய பஞ்சங்கி³கதூரியகோ⁴ஸோ விய ச பவத்ததி. ஸந்திகம் உபக³தாயேவ தஸ்ஸா அமோரபா⁴வம் ஜானந்தி. பஸாத⁴னம் நவகோடிஅக்³க⁴னகம் அஹோஸி, ஸதஸஹஸ்ஸம் ஹத்த²கம்மமூலம் தீ³யித்த².

‘‘கிஸ்ஸ பன நிஸ்ஸந்தே³ன தாயேதம் பஸாத⁴னம் லத்³த⁴’’ந்தி? ஸா கிர கஸ்ஸபஸம்மாஸம்பு³த்³த⁴காலே வீஸதியா பி⁴க்கு²ஸஹஸ்ஸானம் சீவரஸாடகம் த³த்வா ஸுத்தம்பி ஸூசியோபி ரஜனம்பி அத்தனோ ஸந்தகமேவ அதா³ஸி. தஸ்ஸ சீவரதா³னஸ்ஸ நிஸ்ஸந்தே³ன இமம் மஹாலதாபஸாத⁴னம் லபி⁴. இத்தீ²னஞ்ஹி சீவரதா³னம் மஹாலதாபஸாத⁴னப⁴ண்டே³ன மத்த²கம் பப்போதி, புரிஸானம் இத்³தி⁴மயபத்தசீவரேனாதி. ஏவம் மஹாஸேட்டி² சதூஹி மாஸேஹி தீ⁴து பரிவச்ச²ம் கத்வா தஸ்ஸா தே³ய்யத⁴ம்மம் த³த³மானோ கஹாபணபூரானி பஞ்ச ஸகடஸதானி அதா³ஸி, ஸுவண்ணபா⁴ஜனபூரானி பஞ்ச, ரஜதபா⁴ஜனபூரானி பஞ்ச, தம்ப³பா⁴ஜனபூரானி பஞ்ச, பத்துண்ணவத்த²கோஸேய்யவத்த²பூரானி பஞ்ச, ஸப்பிபூரானி பஞ்ச, தேலபூரானி பஞ்ச, ஸாலிதண்டு³லபூரானி பஞ்ச, நங்க³லபா²லாதி³உபகரணபூரானி பஞ்சஸகடஸதானி அதா³ஸி. ஏவம் கிரஸ்ஸ அஹோஸி – ‘‘மம தீ⁴து க³தட்டா²னே ‘அஸுகேன நாம மே அத்தோ²’தி மா பரஸ்ஸ கே³ஹத்³வாரம் பஹிணீ’’தி. தஸ்மா ஸப்³பூ³பகரணானி தா³பேஸி. ஏகேகஸ்மிம் ரதே² ஸப்³பா³லங்காரபடிமண்டி³தா திஸ்ஸோ திஸ்ஸோ வண்ணதா³ஸியோ ட²பேத்வா பஞ்ச ரத²ஸதானி அதா³ஸி. ‘‘ஏதம் ந்ஹாபேந்தியோ போ⁴ஜேந்தியோ அலங்கரோந்தியோ விசரதா²’’தி தி³யட்³ட⁴ஸஹஸ்ஸபரிசாரிகாயோ அதா³ஸி. அத²ஸ்ஸ ஏதத³ஹோஸி – ‘‘மம தீ⁴து கா³வோ த³ஸ்ஸாமீ’’தி. ஸோ புரிஸே ஆணாபேஸி – ‘‘க³ச்ச²த² ப⁴ணே சூளவஜஸ்ஸ த்³வாரம் விவரித்வா தீஸு கா³வுதேஸு திஸ்ஸோ பே⁴ரியோ க³ஹேத்வா திட்ட²த², புது²லதோ உஸப⁴மத்தே டா²னே உபோ⁴ஸு பஸ்ஸேஸு திட்ட²த². கா³வீனம் ததோ பரம் க³ந்தும் மா அத³த்த². ஏவம் டி²தகாலே பே⁴ரிஸஞ்ஞம் கரேய்யாதா²’’தி. தே ததா² அகம்ஸு. தே கா³வீனம் வஜதோ நிக்க²மித்வா கா³வுதம் க³தகாலே பே⁴ரிஸஞ்ஞம் அகம்ஸு, புன அட்³ட⁴யோஜனம் க³தகாலே அகம்ஸு. புனபி திகா³வுதம் க³தகாலே பே⁴ரிஸஞ்ஞம் அகம்ஸு, புது²லதோ க³மனஞ்ச நிவாரேஸும். ஏவம் தீ³க⁴தோ திகா³வுதே, புது²லதோ உஸப⁴மத்தே டா²னே கா³வியோ அஞ்ஞமஞ்ஞம் நிக⁴ம்ஸந்தியோ அட்ட²ம்ஸு.

மஹாஸேட்டி² ‘‘மம தீ⁴து ஏத்தகா கா³வோ அலம், த்³வாரம் பித³ஹதா²’’தி வஜத்³வாரம் பித³ஹாபேஸி. த்³வாரஸ்மிம் பித³ஹிதே விஸாகா²ய புஞ்ஞப³லேன ப³லவகா³வோ ச தே⁴னுயோ ச உப்பதித்வா உப்பதித்வா நிக்க²மிம்ஸு. மனுஸ்ஸானம் வாரேந்தானம் வாரேந்தானமேவ ஸட்டி²ஸஹஸ்ஸா ப³லவகா³வோ ச ஸட்டி²ஸஹஸ்ஸா தே⁴னுயோ ச நிக்க²ந்தா, தத்தகா ப³லவவச்சா² தாஸம் தே⁴னூனம் உஸபா⁴ உப்பதித்வா அனுப³ந்தா⁴ அஹேஸும். ‘‘கிஸ்ஸ பன நிஸ்ஸந்தே³ன ஏவம் கா³வோ க³தா’’தி? நிவாரேந்தானம் நிவாரேந்தானம் தி³ன்னதா³னஸ்ஸ. ஸா கிர கஸ்ஸபஸம்மாஸம்பு³த்³த⁴காலே கிகிஸ்ஸ ரஞ்ஞோ ஸத்தன்னம் தீ⁴தானம் கனிட்டா² ஸங்க⁴தா³ஸீ நாம ஹுத்வா வீஸதியா பி⁴க்கு²ஸஹஸ்ஸானம் பஞ்சகோ³ரஸதா³னம் த³த³மானா தே²ரானஞ்ச த³ஹரானஞ்ச ஸாமணேரானஞ்ச பத்தம் பித³ஹித்வா, ‘‘அலம், அல’’ந்தி நிவாரேந்தானம்பி ‘‘இத³ம் மது⁴ரம், இத³ம் மனாப’’ந்தி அதா³ஸி. ஏவம் தஸ்ஸ நிஸ்ஸந்தே³ன வாரியமானாபி கா³வோ நிக்க²மிம்ஸு. ஸேட்டி²னா ஏத்தகஸ்ஸ த⁴னஸ்ஸ தி³ன்னகாலே ஸேட்டி²ப⁴ரியா ஆஹ – ‘‘தும்ஹேஹி மய்ஹம் தீ⁴து ஸப்³ப³ம் ஸம்வித³ஹிதம், வேய்யாவச்சகரா பன தா³ஸதா³ஸியோ ந ஸம்வித³ஹிதா, கிம் காரணா’’தி? ‘‘மம தீ⁴தரி ஸஸினேஹனிஸ்ஸினேஹானம் ஜானனத்த²ம். அஹஞ்ஹி தாய ஸத்³தி⁴ம் ஆக³ச்ச²மானகே கீ³வாய க³ஹேத்வா ந பஹிணாமி, யானம் ஆருய்ஹ க³மனகாலேயேவ ஏதாய ஸத்³தி⁴ம் க³ந்துகாமா க³ச்ச²ந்து, மா அக³ந்துகாமாதி வக்கா²மீ’’தி ஆஹ.

அத² ‘‘ஸ்வே மம தீ⁴தா க³மிஸ்ஸதீ’’தி க³ப்³பே⁴ நிஸின்னோ தீ⁴தரம் ஸமீபே நிஸீதா³பேத்வா, ‘‘அம்ம, பதிகுலே வஸந்தியா நாம இமஞ்ச இமஞ்ச ஆசாரம் ரக்கி²தும் வட்டதீ’’தி ஓவாத³மதா³ஸி. அயம்பி மிகா³ரஸேட்டி² அனந்தரக³ப்³பே⁴ நிஸின்னோ த⁴னஞ்சயஸேட்டி²னோ ஓவாத³ம் அஸ்ஸோஸி. ஸோபி ஸேட்டி² தீ⁴தரம் ஏவம் ஓவதி³ –

‘‘அம்ம, ஸஸுரகுலே வஸந்தியா நாம அந்தோஅக்³கி³ ப³ஹி ந நீஹரிதப்³போ³, ப³ஹிஅக்³கி³ அந்தோ ந பவேஸேதப்³போ³, த³த³ந்தஸ்ஸேவ தா³தப்³ப³ம், அத³த³ந்தஸ்ஸ ந தா³தப்³ப³ம், த³த³ந்தஸ்ஸாபி அத³த³ந்தஸ்ஸாபி தா³தப்³ப³ம், ஸுக²ம் நிஸீதி³தப்³ப³ம், ஸுக²ம் பு⁴ஞ்ஜிதப்³ப³ம், ஸுக²ம் நிபஜ்ஜிதப்³ப³ம், அக்³கி³ பரிசரிதப்³போ³, அந்தோதே³வதா நமஸ்ஸிதப்³பா³’’தி.

இமம் த³ஸவித⁴ம் ஓவாத³ம் த³த்வா புனதி³வஸே ஸப்³பா³ ஸேனியோ ஸன்னிபாதேத்வா ராஜஸேனாய மஜ்ஜே² அட்ட² குடும்பி³கே பாடிபோ⁴கே³ க³ஹேத்வா, ‘‘ஸசே மே க³தட்டா²னே தீ⁴து தோ³ஸோ உப்பஜ்ஜதி, தும்ஹேஹி ஸோதே⁴தப்³போ³’’தி வத்வா நவகோடிஅக்³க⁴னகேன மஹாலதாபஸாத⁴னேன தீ⁴தரம் பஸாதே⁴த்வா ந்ஹானசுண்ணமூலகம் சதுபண்ணாஸகோடித⁴னம் த³த்வா யானம் ஆரோபேத்வா ஸாகேதஸ்ஸ ஸாமந்தா அத்தனோ ஸந்தகேஸு அனுராத⁴புரமத்தேஸு சுத்³த³ஸஸு ப⁴த்தகா³மேஸு பே⁴ரிம் சராபேஸி – ‘‘மம தீ⁴தரா ஸத்³தி⁴ம் க³ந்துகாமா க³ச்ச²ந்தூ’’தி. தே ஸத்³த³ம் ஸுத்வாவ – ‘‘அம்ஹாகம் அய்யாய க³மனகாலே கிம் அம்ஹாகம் இதா⁴’’தி சுத்³த³ஸ கா³மகா கிஞ்சி அஸேஸேத்வா நிக்க²மிம்ஸு? த⁴னஞ்சயஸேட்டி²பி ரஞ்ஞோ ச மிகா³ரஸேட்டி²னோ ச ஸக்காரம் கத்வா தோ²கம் அனுக³ந்த்வா தேஹி ஸத்³தி⁴ம் தீ⁴தரம் உய்யோஜேஸி.

மிகா³ரஸேட்டி²பி ஸப்³ப³பச்ச²தோ யானகே நிஸீதி³த்வா க³ச்ச²ந்தோ ப³லகாயம் தி³ஸ்வா, ‘‘கே நாமேதே’’தி புச்சி². ‘‘ஸுணிஸாய வோ வேய்யாவச்சகரா தா³ஸிதா³ஸா’’தி. ‘‘ஏத்தகே கோ போஸேஸ்ஸ’’தி? ‘‘போதே²த்வா தே பலாபேத², அபலாயந்தே இதோ த³ண்ட³ம் கரோதா²’’தி. விஸாகா² பன ‘‘அபேத², மா வாரேத², ப³லமேவ ப³லஸ்ஸ ப⁴த்தம் த³ஸ்ஸதீ’’தி ஆஹ. ஸேட்டி² ஏவம் வுத்தேபி, ‘‘அம்ம, நத்தி² அம்ஹாகம் ஏதேஹி அத்தோ², கோ ஏதே போஸேஸ்ஸதீ’’தி லேட்³டு³த³ண்டா³தீ³ஹி போதே²த்வா பலாபேத்வா ஸேஸகே ‘‘அலம் அம்ஹாகம் ஏத்தகேஹீ’’தி க³ஹேத்வா பாயாஸி. அத² விஸாகா² ஸாவத்தி²னக³ரத்³வாரம் ஸம்பத்தகாலே சிந்தேஸி – ‘‘படிச்ச²ன்னயானஸ்மிம் நு கோ² நிஸீதி³த்வா பவிஸிஸ்ஸாமி, உதா³ஹு ரதே² ட²த்வா’’தி. அத²ஸ்ஸா ஏதத³ஹோஸி – ‘‘படிச்ச²ன்னயானேன மே பவிஸந்தியா மஹாலதாபஸாத⁴னஸ்ஸ விஸேஸோ ந பஞ்ஞாயிஸ்ஸதீ’’தி. ஸா ஸகலனக³ரஸ்ஸ அத்தானம் த³ஸ்ஸேந்தீ ரதே² ட²த்வா நக³ரம் பாவிஸி. ஸாவத்தி²வாஸினோ விஸாகா²ய ஸம்பத்திம் தி³ஸ்வா, ‘‘ஏஸா கிர விஸாகா² நாம, ஏவரூபா அயம் ஸம்பத்தி ஏதிஸ்ஸாவ அனுச்ச²விகா’’தி ஆஹம்ஸு. இதி ஸா மஹாஸம்பத்தியா ஸேட்டி²னோ கே³ஹம் பாவிஸி. க³ததி³வஸே சஸ்ஸா ஸகலனக³ரவாஸினோ ‘‘அம்ஹாகம் த⁴னஞ்சயஸேட்டி² அத்தனோ நக³ரம் ஸம்பத்தானம் மஹாஸக்காரம் அகாஸீ’’தி யதா²ஸத்தி யதா²ப³லம் பண்ணாகாரம் பஹிணிம்ஸு. விஸாகா² பஹிதபஹிதம் பண்ணாகாரம் தஸ்மிம்யேவ நக³ரே அஞ்ஞமஞ்ஞேஸு குலேஸு ஸப்³ப³த்த²கமேவ தா³பேஸி. இதி ஸா ‘‘இத³ம் மய்ஹம் மாது தே³த², இத³ம் மய்ஹம் பிது தே³த², இத³ம் மய்ஹம் பா⁴து தே³த², இத³ம் மய்ஹம் ப⁴கி³னியா தே³தா²’’தி தேஸம் தேஸம் வயானுரூபம் பியவசனம் வத்வா பண்ணாகாரம் பேஸேந்தீ ஸகலனக³ரவாஸினோ ஞாதகே விய அகாஸி. அத²ஸ்ஸா ரத்திபா⁴க³ஸமனந்தரே ஆஜஞ்ஞவளவாய க³ப்³ப⁴வுட்டா²னம் அஹோஸி. ஸா தா³ஸீஹி த³ண்ட³தீ³பிகா கா³ஹாபேத்வா தத்த² க³ந்த்வா வளவம் உண்ஹோத³கேன ந்ஹாபேத்வா தேலேன மக்கா²பேத்வா அத்தனோ வஸனட்டா²னமேவ அக³மாஸி.

மிகா³ரஸேட்டி²பி புத்தஸ்ஸ ஆவாஹமங்க³லம் கரோந்தோ து⁴ரவிஹாரே வஸந்தம்பி ததா²க³தம் அமனஸிகரித்வா தீ³க⁴ரத்தம் நக்³க³ஸமணகேஸு பதிட்டி²தேன பேமேன சோதி³யமானோ ‘‘மய்ஹம் அய்யானம்பி ஸக்காரம் கரிஸ்ஸாமீ’’தி ஏகதி³வஸம் அனேகஸதேஸு நவபா⁴ஜனேஸு நிருத³கபாயாஸம் பசாபேத்வா பஞ்சஸதே அசேலகே நிமந்தாபேத்வா அந்தோகே³ஹம் பவேஸேத்வா, ‘‘ஆக³ச்ச²து மே ஸுணிஸா, அரஹந்தே வந்த³தூ’’தி விஸாகா²ய ஸாஸனம் பஹிணி. ஸா ‘‘அரஹந்தோ’’தி வசனம் ஸுத்வா ஸோதாபன்னா அரியஸாவிகா ஹட்ட²துட்டா² ஹுத்வா தேஸம் போ⁴ஜனட்டா²னம் ஆக³ந்த்வா தே ஓலோகேத்வா, ‘‘ஏவரூபா ஹிரோத்தப்பவிரஹிதா அரஹந்தா நாம ந ஹோந்தி, கஸ்மா மம் ஸஸுரோ பக்கோஸாபேஸீ’’தி, ‘‘தீ⁴, தீ⁴’’தி ஸேட்டி²ம் க³ரஹித்வா அத்தனோ வஸனட்டா²னமேவ க³தா. அசேலகா தம் தி³ஸ்வா ஸப்³பே³ ஏகப்பஹாரேனேவ ஸேட்டி²ம் க³ரஹிம்ஸு – ‘‘கிம் த்வம், க³ஹபதி, அஞ்ஞம் நாலத்த², ஸமணஸ்ஸ கோ³தமஸ்ஸ ஸாவிகம் மஹாகாளகண்ணிம் இத⁴ பவேஸேஸி, வேகே³ன நம் இமஸ்மா கே³ஹா நிக்கட்³டா⁴பேஹீ’’தி. ஸோ ‘‘ந ஸக்கா மயா இமேஸம் வசனமத்தேனேவ நிக்கட்³டா⁴பேதும், மஹாகுலஸ்ஸ ஸா தீ⁴தா’’தி சிந்தேத்வா, ‘‘அய்யா, த³ஹரா நாம ஜானித்வா வா அஜானித்வா வா கரேய்யும், தும்ஹே துண்ஹீ ஹோதா²’’தி தே உய்யோஜேத்வா ஸயம் மஹாரஹே ஆஸனே நிஸீதி³த்வா ஸுவண்ணபாதியம் நிருத³கம் மது⁴பாயாஸம் பரிபு⁴ஞ்ஜி.

தஸ்மிம் ஸமயே ஏகோ பிண்ட³பாதிகத்தே²ரோ பிண்டா³ய சரந்தோ தம் நிவேஸனம் பாவிஸி. விஸாகா² ஸஸுரம் பீ³ஜயமானா டி²தா தம் தி³ஸ்வா ‘‘ஸஸுரஸ்ஸ ஆசிக்கி²தும் அயுத்த’’ந்தி யதா² ஸோ தே²ரம் பஸ்ஸதி, ஏவம் அபக³ந்த்வா அட்டா²ஸி. ஸோ பன பா³லோ தே²ரம் தி³ஸ்வாபி அபஸ்ஸந்தோ விய ஹுத்வா அதோ⁴முகோ² பு⁴ஞ்ஜதேவ. விஸாகா² ‘‘தே²ரம் தி³ஸ்வாபி மே ஸஸுரோ ஸஞ்ஞம் ந கரோதீ’’தி ஞத்வா, ‘‘அதிச்ச²த², ப⁴ந்தே, மய்ஹம் ஸஸுரோ புராணம் கா²த³தீ’’தி ஆஹ. ஸோ நிக³ண்டே²ஹி கதி²தகாலே அதி⁴வாஸேத்வாபி ‘‘புராணம் கா²த³தீ’’தி வுத்தக்க²ணேயேவ ஹத்த²ம் அபனேத்வா, ‘‘இமம் பாயாஸம் இதோ நீஹரத², ஏதம் இமஸ்மா கே³ஹா நிக்கட்³ட⁴த², அயம் மம் ஏவரூபே மங்க³லகாலே அஸுசிகா²த³கம் நாம கரோதீ’’தி ஆஹ. தஸ்மிம் கோ² பன நிவேஸனே ஸப்³பே³பி தா³ஸகம்மகரா விஸாகா²ய ஸந்தகாவ, கோ நம் ஹத்தே² வா பாதே³ வா க³ண்ஹிஸ்ஸதி, முகே²ன கதே²தும் ஸமத்தோ²பி நத்தி². விஸாகா² ஸஸுரஸ்ஸ கத²ம் ஸுத்வா ஆஹ – ‘‘தாத, ந ஏத்தகேனேவ மயம் நிக்க²மாம, நாஹம் தும்ஹேஹி உத³கதித்த²தோ கும்ப⁴தா³ஸீ விய ஆனீதா, த⁴ரமானகமாதாபிதூனம் தீ⁴தரோ நாம ந ஏத்தகேனேவ நிக்க²மந்தி, ஏதேனேவ மே காரணேன பிதா இதா⁴க³மனகாலே அட்ட² குடும்பி³கே பக்கோஸாபேத்வா ‘ஸசே மே தீ⁴து தோ³ஸோ உப்பஜ்ஜதி, ஸோதே⁴ய்யாதா²’தி வத்வா மம் தேஸம் ஹத்தே² ட²பேஸி, தே பக்கோஸாபேத்வா மய்ஹம் தோ³ஸாதோ³ஸம் ஸோதா⁴பேதா²’’தி.

ஸேட்டி² ‘‘கல்யாணம் ஏஸா கதே²தீ’’தி அட்ட² குடும்பி³கே பக்கோஸாபேத்வா, ‘‘அயம் தா³ரிகா மங்க³லகாலே நிஸீதி³த்வா ஸுவண்ணபாதியம் நிருத³கபாயாஸம் பரிபு⁴ஞ்ஜந்தம் மம் ‘அஸுசிகா²த³கோ’தி வத³தீ’’தி ஆஹ, ‘‘இமிஸ்ஸா தோ³ஸம் ஆரோபேத்வா இமம் கே³ஹதோ நிக்கட்³ட⁴தா²’’தி. ‘‘ஏவம் கிர, அம்மா’’தி. நாஹம் ஏவம் வதா³மி, ஏகஸ்மிம் பன பிண்ட³பாதிகத்தே²ரே க⁴ரத்³வாரே டி²தே ஸஸுரோ மே அப்போத³கம் மது⁴பாயாஸம் பரிபு⁴ஞ்ஜந்தோ தம் ந மனஸிகரோதி, அஹம் ‘‘மய்ஹம் ஸஸுரோ இமஸ்மிம் அத்தபா⁴வே புஞ்ஞம் ந கரோதி, புராணபுஞ்ஞமேவ கா²த³தீ’’தி சிந்தேத்வா, ‘‘அதிச்ச²த², ப⁴ந்தே, மய்ஹம் ஸஸுரோ புராணம் கா²த³தீ’’தி அவசம், ‘‘ஏத்த² மே கோ தோ³ஸோ’’தி? ‘‘அய்ய, இத⁴ தோ³ஸோ நத்தி², அம்ஹாகம் தீ⁴தா யுத்தம் கதே²தி, த்வம் கஸ்மா குஜ்ஜ²ஸீ’’தி? ‘‘அய்யா, ஏஸ தாவ தோ³ஸோ மா ஹோது, அயம் பன ஏகதி³வஸம் மஜ்ஜி²மயாமே தா³ஸீபரிவுதா பச்சா²கே³ஹம் அக³மாஸீ’’தி. ‘‘ஏவம் கிர, அம்மா’’தி. ‘‘தாதா, நாஹம் அஞ்ஞேன காரணேன க³தா, இமஸ்மிம் பன கே³ஹே ஆஜானேய்யவளவாய விஜாதாய ஸஞ்ஞம்பி அகத்வா நிஸீதி³தும் நாம அயுத்த’’ந்தி த³ண்ட³தீ³பிகா கா³ஹாபேத்வா உண்ஹோத³காதீ³னிபி கா³ஹாபேத்வா தா³ஸீஹி ஸத்³தி⁴ம் க³ந்த்வா வளவாய விஜாதபரிஹாரம் காராபேஸிம், ‘‘ஏத்த² மே கோ தோ³ஸோ’’தி? ‘‘அய்ய, இத⁴ தோ³ஸோ நத்தி², அம்ஹாகம் தீ⁴தா தவ கே³ஹே தா³ஸீஹிபி அகத்தப்³ப³யுத்தகம் கம்மம் கரோதி, த்வம் கிம் ஏத்த² தோ³ஸம் பஸ்ஸஸீ’’தி?

அய்யா, இதா⁴பி தாவ தோ³ஸோ மா ஹோது, இமிஸ்ஸா பன பிதா இதா⁴க³மனகாலே இமம் ஓவத³ந்தோ கு³ய்ஹே படிச்ச²ன்னே த³ஸ ஓவாதே³ அதா³ஸி, தேஸம் அத்த²ம் ந ஜானாமி, தேஸம் மே அத்த²ம் கதே²து. இமிஸ்ஸா பன பிதா ‘‘அந்தோஅக்³கி³ ப³ஹி ந நீஹரிதப்³போ³’’தி ஆஹ, ‘‘ஸக்கா நு கோ² அம்ஹேஹி உப⁴தோ படிவிஸ்ஸககே³ஹானம் அக்³கி³ம் அத³த்வா வஸிது’’ந்தி? ‘‘ஏவம் கிர, அம்மா’’தி. ‘‘தாதா, மய்ஹம் பிதா ந ஏதம் ஸந்தா⁴ய கதே²ஸி. இத³ம் பன ஸந்தா⁴ய கதே²ஸி – ‘அம்ம, தவ ஸஸ்ஸுஸஸுரஸாமிகானம் அகு³ணம் தி³ஸ்வா ப³ஹி தஸ்மிம் தஸ்மிம் கே³ஹே ட²த்வா மா கதே²ஸி. ஏவரூபோ ஹி அக்³கி³ஸதி³ஸோ அக்³கி³ நாம நத்தீ²’’’தி.

அய்யா, ஏதம் தாவ ஏவம் ஹோது, இமிஸ்ஸா பன பிதா ‘‘பா³ஹிரதோ அக்³கி³ ந அந்தோ பவேஸேதப்³போ³’’தி ஆஹ, ‘‘கிம் ஸக்கா அம்ஹேஹி அந்தோ அக்³கி³ம்ஹி நிப்³பு³தே பா³ஹிரதோ அக்³கி³ம் அனாஹரிது’’ந்தி? ‘‘ஏவம் கிர, அம்மா’’தி. தாதா, மய்ஹம் பிதா ந ஏதம் ஸந்தா⁴ய கதே²ஸி, இத³ம் பன ஸந்தா⁴ய கதே²ஸி – ஸசே படிவிஸ்ஸககே³ஹேஸு இத்தி²யோ வா புரிஸா வா ஸஸ்ஸுஸஸுரஸாமிகானம் அகு³ணம் கதே²ந்தி, தேஹி கதி²தம் ஆஹரித்வா ‘‘அஸுகோ நாம தும்ஹாகம் ஏவஞ்ச ஏவஞ்ச அகு³ணம் கதே²தீ’’தி புன மா கதே²ய்யாஸி. ‘‘ஏதேன ஹி அக்³கி³னா ஸதி³ஸோ அக்³கி³ நாம நத்தீ²’’தி. ஏவம் இமஸ்மிம்பி காரணே ஸா நித்³தோ³ஸாவ அஹோஸி. யதா² ச ஏத்த², ஏவம் ஸேஸேஸுபி.

தேஸு பன அயமதி⁴ப்பாயோ – யம்பி ஹி தஸ்ஸா பிதரா ‘‘யே த³த³ந்தி, தேஸம்யேவ தா³தப்³ப³’’ந்தி வுத்தம். தம் ‘‘யாசிதகம் உபகரணம் க³ஹேத்வா யே படிதே³ந்தி, தேஸஞ்ஞேவ தா³தப்³ப³’’ந்தி ஸந்தா⁴ய வுத்தம்.

‘‘யே ந தே³ந்தி, தேஸம் ந தா³தப்³ப³’’ந்தி இத³ம்பி யே யாசிதகம் க³ஹேத்வா ந படிதே³ந்தி, தேஸம் ந தா³தப்³ப³ந்தி ஸந்தா⁴ய வுத்தம்.

‘‘த³த³ந்தஸ்ஸாபி அத³த³ந்தஸ்ஸாபி தா³தப்³ப³’’ந்தி இத³ம் பன த³லித்³தே³ஸு ஞாதிமித்தேஸு ஸம்பத்தேஸு தே படிதா³தும் ஸக்கோந்து வா மா வா, தேஸம் தா³துமேவ வட்டதீதி ஸந்தா⁴ய வுத்தம்.

‘‘ஸுக²ம் நிஸீதி³தப்³ப³’’ந்தி இத³ம்பி ஸஸ்ஸுஸஸுரஸாமிகே தி³ஸ்வா வுட்டா²தப்³ப³ட்டா²னே நிஸீதி³தும் ந வட்டதீதி ஸந்தா⁴ய வுத்தம்.

‘‘ஸுக²ம் பு⁴ஞ்ஜிதப்³ப³’’ந்தி இத³ம் பன ஸஸ்ஸுஸஸுரஸாமிகேஹி புரேதரம் அபு⁴ஞ்ஜித்வா தே பரிவிஸித்வா ஸப்³பே³ஹி லத்³தா⁴லத்³த⁴ம் ஞத்வா பச்சா² ஸயம் பு⁴ஞ்ஜிதும் வட்டதீதி ஸந்தா⁴ய வுத்தம்.

‘‘ஸுக²ம் நிபஜ்ஜிதப்³ப³’’ந்தி இத³ம்பி ஸஸ்ஸுஸஸுரஸாமிகேஹி புரேதரம் ஸயனம் ஆருய்ஹ ந நிபஜ்ஜிதப்³ப³ம், தேஸம் கத்தப்³ப³யுத்தகம் வத்தபடிவத்தம் கத்வா பச்சா² ஸயம் நிபஜ்ஜிதும் யுத்தந்தி ஸந்தா⁴ய வுத்தம்.

‘‘அக்³கி³ பரிசரிதப்³போ³’’தி இத³ம் பன ஸஸ்ஸும்பி ஸஸுரம்பி ஸாமிகம்பி அக்³கி³க்க²ந்த⁴ம் விய உரக³ராஜானம் விய ச கத்வா பஸ்ஸிதும் வட்டதீதி ஸந்தா⁴ய வுத்தம்.

‘‘அந்தோதே³வதா நமஸ்ஸிதப்³பா³’’தி இத³ம்பி ஸஸ்ஸுஞ்ச ஸஸுரஞ்ச ஸாமிகஞ்ச தே³வதா விய கத்வா த³ட்டு²ம் வட்டதீதி ஸந்தா⁴ய வுத்தம். ஏவம் ஸேட்டி² இமேஸம் த³ஸஓவாதா³னம் அத்த²ம் ஸுத்வா படிவசனம் அபஸ்ஸந்தோ அதோ⁴முகோ² நிஸீதி³.

அத² நம் குடும்பி³கா ‘‘கிம் ஸேட்டி² அஞ்ஞோபி அம்ஹாகம் தீ⁴து தோ³ஸோ அத்தீ²’’தி புச்சி²ம்ஸு. ‘‘நத்தி², அய்யா’’தி. ‘‘அத² கஸ்மா நம் நித்³தோ³ஸம் அகாரணேன கே³ஹா நிக்கட்³டா⁴பேஸீ’’தி ஏவம் வுத்தே விஸாகா² ஆஹ – ‘‘தாதா, கிஞ்சாபி மய்ஹம் ஸஸுரஸ்ஸ வசனேன பட²மமேவ க³மனம் ந யுத்தம், பிதா பன மே ஆக³மனகாலே மம தோ³ஸஸோத⁴னத்தா²ய மம் தும்ஹாகம் ஹத்தே² ட²பேஸி, தும்ஹேஹி ச மே நித்³தோ³ஸபா⁴வோ ஞாதோ, இதா³னி ச மய்ஹம் க³ந்தும் யுத்த’’ந்தி தா³ஸிதா³ஸே ‘‘யானாதீ³ஹி ஸஜ்ஜாபேதா²’’தி ஆணாபேஸி. அத² நம் ஸேட்டி² குடும்பி³கே க³ஹேத்வா ‘‘அம்ம, மயா அஜானித்வாவ கதி²தம், க²மாஹி மே’’தி ஆஹ. ‘‘தாத, தும்ஹாகம் க²மிதப்³ப³ம் தாவ க²மாமி, அஹம் பன பு³த்³த⁴ஸாஸனே அவேச்சப்பஸன்னஸ்ஸ குலஸ்ஸ தீ⁴தா, ந மயம் வினா பி⁴க்கு²ஸங்கே⁴ன வத்தாம, ஸசே மம ருசியா பி⁴க்கு²ஸங்க⁴ம் படிஜக்³கி³தும் லபா⁴மி, வஸிஸ்ஸாமீ’’தி. ‘‘அம்ம, த்வம் யதா²ருசியா தவ ஸமணே படிஜக்³கா³’’தி ஆஹ.

விஸாகா² த³ஸப³லம் நிமந்தாபேத்வா புனதி³வஸே நிவேஸனம் பவேஸேஸி. நக்³க³ஸமணாபி ஸத்து² மிகா³ரஸேட்டி²னோ கே³ஹம் க³மனபா⁴வம் ஸுத்வா க³ந்த்வா கே³ஹம் பரிவாரேத்வா நிஸீதி³ம்ஸு. விஸாகா² த³க்கி²ணோத³கம் த³த்வா ‘‘ஸப்³போ³ ஸக்காரோ படியாதி³தோ, ஸஸுரோ மே ஆக³ந்த்வா த³ஸப³லம் பரிவிஸதூ’’தி ஸாஸனம் பேஸேஸி. அத² நம் க³ந்துகாமம் ஆஜீவகா ‘‘மா கோ² த்வம், க³ஹபதி, ஸமணஸ்ஸ கோ³தமஸ்ஸ ஸந்திகம் க³ச்சா²’’தி நிவாரேஸும். ஸோ ‘‘ஸுண்ஹா மே ஸயமேவ பரிவிஸதூ’’தி ஸாஸனம் பஹிணி. ஸா பு³த்³த⁴ப்பமுக²ம் பி⁴க்கு²ஸங்க⁴ம் பரிவிஸித்வா நிட்டி²தே ப⁴த்தகிச்சே புன ஸாஸனம் பேஸேஸி – ‘‘ஸஸுரோ மே ஆக³ந்த்வா த⁴ம்மகத²ம் ஸுணாதூ’’தி. அத² நம் ‘‘இதா³னி அக³மனம் நாம அதிவிய அயுத்த’’ந்தி த⁴ம்மம் ஸோதுகாமதாய க³ச்ச²ந்தம் புன தே ஆஹம்ஸு – ‘‘தேன ஹி ஸமணஸ்ஸ கோ³தமஸ்ஸ த⁴ம்மம் ஸுணந்தோ ப³ஹிஸாணியா நிஸீதி³த்வா ஸுணாஹீ’’தி. புரேதரமேவஸ்ஸ க³ந்த்வா ஸாணிம் பரிக்கி²பிம்ஸு. ஸோ க³ந்த்வா ப³ஹிஸாணியம் நிஸீதி³. ஸத்தா² ‘‘த்வம் ப³ஹிஸாணியம் வா நிஸீத³, பரகுட்டே வா பரஸேலே வா பரசக்கவாளே வா பன நிஸீத³, அஹம் பு³த்³தோ⁴ நாம ஸக்கோமி தம் மம ஸத்³த³ம் ஸாவேது’’ந்தி மஹாஜம்பு³ம் க²ந்தே⁴ க³ஹேத்வா சாலேந்தோ விய அமதவஸ்ஸம் வஸ்ஸேந்தோ விய ச த⁴ம்மம் தே³ஸேதும் அனுபுப்³பி³ம் கத²ம் ஆரபி⁴.