1. மேகி⁴யத்தே²ரவத்து²

ப²ந்த³னம் சபலம் சித்தந்தி இமம் த⁴ம்மதே³ஸனம் ஸத்தா² சாலிகாய பப்³ப³தே விஹரந்தோ ஆயஸ்மந்தம் மேகி⁴யம் ஆரப்³ப⁴ கதே²ஸி.

தஸ்ஸ வத்து²ம் விபா⁴வனத்த²ம் ஸப்³ப³ம் மேகி⁴யஸுத்தந்தம் (உதா³. 31) வித்தா²ரேதப்³ப³ம். ஸத்தா² பன தீஹி விதக்கேஹி அன்வாஸத்ததாய தஸ்மிம் அம்ப³வனே பதா⁴னம் அனுயுஞ்ஜிதும் அஸக்குணித்வா ஆக³தம் மேகி⁴யத்தே²ரம் ஆமந்தேத்வா, ‘‘அதிபா⁴ரியம் தே, மேகி⁴ய, கதம் ‘ஆக³மேஹி தாவ, மேகி⁴ய, ஏககோம்ஹி யாவ அஞ்ஞோபி கோசி பி⁴க்கு² ஆக³ச்ச²தீ’தி மம் யாசந்தம் ஏககம் பஹாய க³ச்ச²ந்தேன பி⁴க்கு²னா நாம ஏவம் சித்தவஸிகேன ப⁴விதும் ந வட்டதி, சித்தம் நாமேதம் லஹுகம், தம் அத்தனோ வஸே வத்தேதும் வட்டதீ’’தி வத்வா இமா த்³வே கா³தா² அபா⁴ஸி –

33. ‘‘ப²ந்த³னம் சபலம் சித்தம், தூ³ரக்க²ம் து³ன்னிவாரயம்;

உஜும் கரோதி மேதா⁴வீ, உஸுகாரோவ தேஜனம்.

34. ‘‘வாரிஜோவ த²லே கி²த்தோ, ஓகமோகதஉப்³ப⁴தோ;

பரிப்ப²ந்த³தித³ம் சித்தம், மாரதே⁴ய்யம் பஹாதவே’’தி.

தத்த² ப²ந்த³னந்தி ரூபாதீ³ஸு ஆரம்மணேஸு விப்ப²ந்த³மானம். சபலந்தி ஏகஇரியாபதே²ன அஸண்ட²ஹந்தோ கா³மதா³ரகோ விய ஏகஸ்மிம் ஆரம்மணே அஸண்ட²ஹனதோ சபலம். சித்தந்தி விஞ்ஞாணம், பூ⁴மிவத்து²ஆரம்மணகிரியாதி³விசித்ததாய பனேதம் ‘‘சித்த’’ந்தி வுத்தம். தூ³ரக்க²ந்தி கிட்ட²ஸம்பா³தே⁴ டா²னே கிட்ட²கா²த³ககோ³ணம் விய ஏகேகஸ்மிம் ஸப்பாயாரம்மணேயேவ து³ட்ட²பனதோ தூ³ரக்க²ம். து³ன்னிவாரயந்தி விஸபா⁴கா³ரம்மணம் க³ச்ச²ந்தம் படிஸேதே⁴தும் து³க்க²த்தா து³ன்னிவாரயம். உஸுகாரோவ தேஜனந்தி யதா² நாம உஸுகாரோ அரஞ்ஞதோ ஏகம் வங்கத³ண்ட³கம் ஆஹரித்வா நித்தசம் கத்வா கஞ்ஜியதேலேன மக்கே²த்வா அங்கா³ரகபல்லே தாபேத்வா ருக்கா²லகே உப்பீளேத்வா நிவங்கம் உஜும் வாலவிஜ்ஜ²னயோக்³க³ம் கரோதி, கத்வா ச பன ராஜராஜமஹாமத்தானம் ஸிப்பம் த³ஸ்ஸேத்வா மஹந்தம் ஸக்காரஸம்மானம் லப⁴தி, ஏவமேவ மேதா⁴வீ பண்டி³தோ விஞ்ஞூ புரிஸோ ப²ந்த³னாதி³ஸபா⁴வமேதம் சித்தம் து⁴தங்கா³ரஞ்ஞாவாஸவஸேன, நித்தசம் அபக³தஓளாரிககிலேஸம் கத்வா ஸத்³தா⁴ஸினேஹேன தேமேத்வா காயிகசேதஸிகவீரியேன தாபேத்வா ஸமத²விபஸ்ஸனாலகே உப்பீளேத்வா உஜும் அகுடிலம் நிப்³பி³ஸேவனம் கரோதி, கத்வா ச பன ஸங்கா²ரே ஸம்மஸித்வா மஹந்தம் அவிஜ்ஜக்க²ந்த⁴ம் பதா³லேத்வா, ‘‘திஸ்ஸோ விஜ்ஜா, ச² அபி⁴ஞ்ஞா, நவ லோகுத்தரத⁴ம்மே’’தி இமம் விஸேஸம் ஹத்த²க³தமேவ கத்வா அக்³க³த³க்கி²ணேய்யபா⁴வம் லப⁴தி.

வாரிஜோவாதி மச்சோ² விய, த²லே கி²த்தோதி ஹத்தே²ன வா பாதே³ன வா ஜாலாதீ³னம் வா அஞ்ஞதரேன த²லே ச²ட்³டி³தோ. ஓகமோகதஉப்³ப⁴தோதி ‘‘ஓகபுண்ணேஹி சீவரேஹீ’’தி ஏத்த² (மஹாவ. 306) உத³கம் ஓகம், ‘‘ஓகம் பஹாய அனிகேதஸாரீ’’தி ஏத்த² (ஸு. நி. 850) ஆலயோ, ஏத்த² உப⁴யம்பி லப்³ப⁴தி. ‘‘ஓகமோகதஉப்³ப⁴தோ’’தி ஹி ஏத்த² ஓகமோகதோதி உத³கஸங்கா²தா ஆலயாதி அயமத்தோ². உப்³ப⁴தோதி உத்³த⁴டோ. பரிப்ப²ந்த³தித³ம் சித்தந்தி யதா² ஸோ உத³காலயதோ உப்³ப⁴தோ த²லே கி²த்தோ மச்சோ² உத³கம் அலப⁴ந்தோ பரிப்ப²ந்த³தி, ஏவமித³ம் பஞ்சகாமகு³ணாலயாபி⁴ரதம் சித்தம் ததோ உத்³த⁴ரித்வா மாரதே⁴ய்யஸங்கா²தம் வட்டம் பஹாதும் விபஸ்ஸனாகம்மட்டா²னே கி²த்தம் காயிகசேதஸிகவீரியேன ஸந்தாபியமானம் பரிப்ப²ந்த³தி, ஸண்டா²தும் ந ஸக்கோதி. ஏவம் ஸந்தேபி து⁴ரம் அனிக்கி²பித்வா மேதா⁴வீ புக்³க³லோ தம் வுத்தனயேனேவ உஜும் கம்மனியம் கரோதீதி அத்தோ². அபரோ நயோ – இத³ம் மாரதே⁴ய்யம் கிலேஸவட்டம் அவிஜஹித்வா டி²தம் சித்தம் ஸோ வாரிஜோ விய பரிப்ப²ந்த³தி, தஸ்மா மாரதே⁴ய்யம் பஹாதவே, யேன கிலேஸவட்டஸங்கா²தேன மாரதே⁴ய்யேனேவ பரிப்ப²ந்த³தி, தம் பஹாதப்³ப³ந்தி.

கா³தா²பரியோஸானே மேகி⁴யத்தே²ரோ ஸோதாபத்திப²லே பதிட்டி²தோ, அஞ்ஞேபி ப³ஹூ ஸோதாபன்னாத³யோ ஜாதாதி.

மேகி⁴யத்தே²ரவத்து² பட²மம்.