3. சித்தவக்³கோ³

1. மேகி⁴யத்தே²ரவத்து²

ப²ந்த³னம் சபலம் சித்தந்தி இமம் த⁴ம்மதே³ஸனம் ஸத்தா² சாலிகாய பப்³ப³தே விஹரந்தோ ஆயஸ்மந்தம் மேகி⁴யம் ஆரப்³ப⁴ கதே²ஸி.

தஸ்ஸ வத்து²ம் விபா⁴வனத்த²ம் ஸப்³ப³ம் மேகி⁴யஸுத்தந்தம் (உதா³. 31) வித்தா²ரேதப்³ப³ம். ஸத்தா² பன தீஹி விதக்கேஹி அன்வாஸத்ததாய தஸ்மிம் அம்ப³வனே பதா⁴னம் அனுயுஞ்ஜிதும் அஸக்குணித்வா ஆக³தம் மேகி⁴யத்தே²ரம் ஆமந்தேத்வா, ‘‘அதிபா⁴ரியம் தே, மேகி⁴ய, கதம் ‘ஆக³மேஹி தாவ, மேகி⁴ய, ஏககோம்ஹி யாவ அஞ்ஞோபி கோசி பி⁴க்கு² ஆக³ச்ச²தீ’தி மம் யாசந்தம் ஏககம் பஹாய க³ச்ச²ந்தேன பி⁴க்கு²னா நாம ஏவம் சித்தவஸிகேன ப⁴விதும் ந வட்டதி, சித்தம் நாமேதம் லஹுகம், தம் அத்தனோ வஸே வத்தேதும் வட்டதீ’’தி வத்வா இமா த்³வே கா³தா² அபா⁴ஸி –

33. ‘‘ப²ந்த³னம் சபலம் சித்தம், தூ³ரக்க²ம் து³ன்னிவாரயம்;

உஜும் கரோதி மேதா⁴வீ, உஸுகாரோவ தேஜனம்.

34. ‘‘வாரிஜோவ த²லே கி²த்தோ, ஓகமோகதஉப்³ப⁴தோ;

பரிப்ப²ந்த³தித³ம் சித்தம், மாரதே⁴ய்யம் பஹாதவே’’தி.

தத்த² ப²ந்த³னந்தி ரூபாதீ³ஸு ஆரம்மணேஸு விப்ப²ந்த³மானம். சபலந்தி ஏகஇரியாபதே²ன அஸண்ட²ஹந்தோ கா³மதா³ரகோ விய ஏகஸ்மிம் ஆரம்மணே அஸண்ட²ஹனதோ சபலம். சித்தந்தி விஞ்ஞாணம், பூ⁴மிவத்து²ஆரம்மணகிரியாதி³விசித்ததாய பனேதம் ‘‘சித்த’’ந்தி வுத்தம். தூ³ரக்க²ந்தி கிட்ட²ஸம்பா³தே⁴ டா²னே கிட்ட²கா²த³ககோ³ணம் விய ஏகேகஸ்மிம் ஸப்பாயாரம்மணேயேவ து³ட்ட²பனதோ தூ³ரக்க²ம். து³ன்னிவாரயந்தி விஸபா⁴கா³ரம்மணம் க³ச்ச²ந்தம் படிஸேதே⁴தும் து³க்க²த்தா து³ன்னிவாரயம். உஸுகாரோவ தேஜனந்தி யதா² நாம உஸுகாரோ அரஞ்ஞதோ ஏகம் வங்கத³ண்ட³கம் ஆஹரித்வா நித்தசம் கத்வா கஞ்ஜியதேலேன மக்கே²த்வா அங்கா³ரகபல்லே தாபேத்வா ருக்கா²லகே உப்பீளேத்வா நிவங்கம் உஜும் வாலவிஜ்ஜ²னயோக்³க³ம் கரோதி, கத்வா ச பன ராஜராஜமஹாமத்தானம் ஸிப்பம் த³ஸ்ஸேத்வா மஹந்தம் ஸக்காரஸம்மானம் லப⁴தி, ஏவமேவ மேதா⁴வீ பண்டி³தோ விஞ்ஞூ புரிஸோ ப²ந்த³னாதி³ஸபா⁴வமேதம் சித்தம் து⁴தங்கா³ரஞ்ஞாவாஸவஸேன, நித்தசம் அபக³தஓளாரிககிலேஸம் கத்வா ஸத்³தா⁴ஸினேஹேன தேமேத்வா காயிகசேதஸிகவீரியேன தாபேத்வா ஸமத²விபஸ்ஸனாலகே உப்பீளேத்வா உஜும் அகுடிலம் நிப்³பி³ஸேவனம் கரோதி, கத்வா ச பன ஸங்கா²ரே ஸம்மஸித்வா மஹந்தம் அவிஜ்ஜக்க²ந்த⁴ம் பதா³லேத்வா, ‘‘திஸ்ஸோ விஜ்ஜா, ச² அபி⁴ஞ்ஞா, நவ லோகுத்தரத⁴ம்மே’’தி இமம் விஸேஸம் ஹத்த²க³தமேவ கத்வா அக்³க³த³க்கி²ணேய்யபா⁴வம் லப⁴தி.

வாரிஜோவாதி மச்சோ² விய, த²லே கி²த்தோதி ஹத்தே²ன வா பாதே³ன வா ஜாலாதீ³னம் வா அஞ்ஞதரேன த²லே ச²ட்³டி³தோ. ஓகமோகதஉப்³ப⁴தோதி ‘‘ஓகபுண்ணேஹி சீவரேஹீ’’தி ஏத்த² (மஹாவ. 306) உத³கம் ஓகம், ‘‘ஓகம் பஹாய அனிகேதஸாரீ’’தி ஏத்த² (ஸு. நி. 850) ஆலயோ, ஏத்த² உப⁴யம்பி லப்³ப⁴தி. ‘‘ஓகமோகதஉப்³ப⁴தோ’’தி ஹி ஏத்த² ஓகமோகதோதி உத³கஸங்கா²தா ஆலயாதி அயமத்தோ². உப்³ப⁴தோதி உத்³த⁴டோ. பரிப்ப²ந்த³தித³ம் சித்தந்தி யதா² ஸோ உத³காலயதோ உப்³ப⁴தோ த²லே கி²த்தோ மச்சோ² உத³கம் அலப⁴ந்தோ பரிப்ப²ந்த³தி, ஏவமித³ம் பஞ்சகாமகு³ணாலயாபி⁴ரதம் சித்தம் ததோ உத்³த⁴ரித்வா மாரதே⁴ய்யஸங்கா²தம் வட்டம் பஹாதும் விபஸ்ஸனாகம்மட்டா²னே கி²த்தம் காயிகசேதஸிகவீரியேன ஸந்தாபியமானம் பரிப்ப²ந்த³தி, ஸண்டா²தும் ந ஸக்கோதி. ஏவம் ஸந்தேபி து⁴ரம் அனிக்கி²பித்வா மேதா⁴வீ புக்³க³லோ தம் வுத்தனயேனேவ உஜும் கம்மனியம் கரோதீதி அத்தோ². அபரோ நயோ – இத³ம் மாரதே⁴ய்யம் கிலேஸவட்டம் அவிஜஹித்வா டி²தம் சித்தம் ஸோ வாரிஜோ விய பரிப்ப²ந்த³தி, தஸ்மா மாரதே⁴ய்யம் பஹாதவே, யேன கிலேஸவட்டஸங்கா²தேன மாரதே⁴ய்யேனேவ பரிப்ப²ந்த³தி, தம் பஹாதப்³ப³ந்தி.

கா³தா²பரியோஸானே மேகி⁴யத்தே²ரோ ஸோதாபத்திப²லே பதிட்டி²தோ, அஞ்ஞேபி ப³ஹூ ஸோதாபன்னாத³யோ ஜாதாதி.

மேகி⁴யத்தே²ரவத்து² பட²மம்.

2. அஞ்ஞதரபி⁴க்கு²வத்து²

து³ன்னிக்³க³ஹஸ்ஸ லஹுனோதி இமம் த⁴ம்மதே³ஸனம் ஸத்தா² ஸாவத்தி²யம் ஜேதவனே விஹரந்தோ அஞ்ஞதரம் பி⁴க்கு²ம் ஆரப்³ப⁴ கதே²ஸி.

கோஸலரஞ்ஞோ கிர விஜிதே பப்³ப³தபாதே³ மாதிககா³மோ நாம ஏகோ க⁴னவாஸோ கா³மோ அஹோஸி. அதே²கதி³வஸம் ஸட்டி²மத்தா பி⁴க்கூ² ஸத்து² ஸந்திகே யாவ அரஹத்தா கம்மட்டா²னம் கதா²பேத்வா தம் கா³மம் க³ந்த்வா பிண்டா³ய பவிஸிம்ஸு. அத² நே யோ தஸ்ஸ கா³மஸ்ஸ ஸாமிகோ மாதிகோ நாம, தஸ்ஸ மாதா தி³ஸ்வா கே³ஹே நிஸீதா³பேத்வா நானக்³க³ரஸேன யாகு³ப⁴த்தேன பரிவிஸித்வா, ‘‘ப⁴ந்தே, கத்த² க³ந்துகாமா’’தி புச்சி². ‘‘யதா² பா²ஸுகட்டா²னம் மஹாஉபாஸிகே’’தி. ஸா ‘‘வஸ்ஸாவாஸட்டா²னம், அய்யா, பரியேஸந்தி மஞ்ஞே’’தி ஞத்வா பாத³மூலே நிபஜ்ஜித்வா, ‘‘ஸசே, அய்யா, இமம் தேமாஸம் இத⁴ வஸிஸ்ஸந்தி, அஹம் தீணி ஸரணானி, பஞ்ச ஸீலானி க³ஹேத்வா உபோஸத²கம்மம் கரிஸ்ஸாமீ’’தி ஆஹ. பி⁴க்கூ² ‘‘மயம் இமம் நிஸ்ஸாய பி⁴க்கா²ய அகிலமந்தா ப⁴வனிஸ்ஸரணம் காதும் ஸக்கி²ஸ்ஸாமா’’தி அதி⁴வாஸயிம்ஸு. ஸா தேஸம் வஸனட்டா²னம் விஹாரம் படிஜக்³கி³த்வா அதா³ஸி.

தே தத்தே²வ வஸந்தா ஏகதி³வஸம் ஸன்னிபதித்வா அஞ்ஞமஞ்ஞம் ஓவதி³ம்ஸு, ‘‘ஆவுஸோ, அம்ஹேஹி பமாத³சாரம் சரிதும் ந வட்டதி. அம்ஹாகஞ்ஹி ஸககே³ஹம் விய அட்ட² மஹானிரயா விவடத்³வாராயேவ, த⁴ரமானகபு³த்³த⁴ஸ்ஸ கோ² பன ஸந்திகே கம்மட்டா²னம் க³ஹேத்வா மயம் ஆக³தா, பு³த்³தா⁴ ச நாம பதா³னுபதி³கம் விசரந்தேனாபி ஸடே²ன ஆராதே⁴தும் ந ஸக்கா, யதா²ஜ்ஜா²ஸயேனேவ ஆராதே⁴தும் ஸக்கா, அப்பமத்தா ஹோத², த்³வீஹி ஏகட்டா²னே ந டா²தப்³ப³ம், ந நிஸீதி³தப்³ப³ம், ஸாயம் கோ² பன தே²ரூபட்டா²னகாலே பாதோவ பி⁴க்கா²சாரகாலே ஏகதோ ப⁴விஸ்ஸாம, ஸேஸகாலே த்³வே ஏகதோ ந ப⁴விஸ்ஸாம, அபிச கோ² பன அபா²ஸுகேன பி⁴க்கு²னா ஆக³ந்த்வா விஹாரமஜ்ஜே² க⁴ண்டி³யா பஹதாய க⁴ண்டி³ஸஞ்ஞாய ஆக³ந்த்வா தஸ்ஸ பே⁴ஸஜ்ஜம் கரிஸ்ஸாமா’’தி.

தேஸு ஏவம் கதிகம் கத்வா விஹரந்தேஸு ஏகதி³வஸம் ஸா உபாஸிகா ஸப்பிதேலபா²ணிதாதீ³னி கா³ஹாபேத்வா தா³ஸதா³ஸிகம்மகராதீ³ஹி பரிவுதா ஸாயன்ஹஸமயே தம் விஹாரம் க³ந்த்வா விஹாரமஜ்ஜே² பி⁴க்கூ² அதி³ஸ்வா, ‘‘கஹம் நு கோ², அய்யா, க³தா’’தி புரிஸே புச்சி²த்வா, ‘‘அத்தனோ அத்தனோ ரத்திட்டா²னதி³வாட்டா²னேஸு நிஸின்னா ப⁴விஸ்ஸந்தி, அய்யே’’தி வுத்தே, ‘‘கிம் நு கோ² கத்வா த³ட்டு²ம் ஸக்கி²ஸ்ஸாமீ’’தி ஆஹ. அத² நம் பி⁴க்கு²ஸங்க⁴ஸ்ஸ கதிகவத்தம் ஜானனமனுஸ்ஸா ஆஹம்ஸு – ‘‘க⁴ண்டி³யா பஹதாய ஸன்னிபதிஸ்ஸந்தி, அய்யே’’தி. ஸா ச க⁴ண்டி³ம் பஹராபேஸி. பி⁴க்கூ² க⁴ண்டி³ஸத்³த³ம் ஸுத்வா, ‘‘கஸ்ஸசி அபா²ஸுகம் ப⁴விஸ்ஸதீ’’தி ஸகஸகட்டா²னேஹி நிக்க²மித்வா விஹாரமஜ்ஜே² ஸன்னிபதிம்ஸு. த்³வேபி ஜனா ஏகமக்³கே³னாக³தா நாம நத்தி². உபாஸிகா ஏகேகட்டா²னதோ ஏகேகமேவ ஆக³ச்ச²ந்தம் தி³ஸ்வா, ‘‘மம புத்தேஹி அஞ்ஞமஞ்ஞம் கலஹோ கதோ ப⁴விஸ்ஸதீ’’தி சிந்தேத்வா பி⁴க்கு²ஸங்க⁴ம் வந்தி³த்வா புச்சி² – ‘‘கலஹம் நு கோ², ப⁴ந்தே, கரித்தா²’’தி? ‘‘ந கரோம, மஹாஉபாஸிகே’’தி. ‘‘ஸசே வோ, ப⁴ந்தே, கலஹோ நத்தி², அத² கஸ்மா யதா² அம்ஹாகம் கே³ஹம் ஆக³ச்ச²ந்தா ஸப்³பே³ ஏகதோவ ஆக³ச்ச²த², ஏவம் அனாக³ந்த்வா ஏகேகட்டா²னதோ ஏகேகாவ ஆக³தா’’தி? ‘‘மஹாஉபாஸிகே, ஏகேகஸ்மிம் டா²னே நிஸீதி³த்வா ஸமணத⁴ம்மம் கரிம்ஹா’’தி. ‘‘கோ ஏஸ, ப⁴ந்தே, ஸமணத⁴ம்மோ நாமா’’தி? ‘‘த்³வத்திம்ஸாகாரே ஸஜ்ஜா²யம் கரோம, அத்தபா⁴வே ச க²யவயம் பட்ட²பேம, மஹாஉபாஸிகே’’தி. ‘‘கிம் பன, ப⁴ந்தே, த்³வத்திம்ஸாகாரே ஸஜ்ஜா²யம் காதும், அத்தபா⁴வே ச க²யவயம் பட்ட²பேதும் தும்ஹாகமேவ வட்டதி, உதா³ஹு அம்ஹாகம்பீதி, கஸ்ஸசிபி அவாரிதோ ஏஸ த⁴ம்மோ, மஹாஉபாஸிகே’’தி. ‘‘தேன ஹி, ப⁴ந்தே, மய்ஹம்பி த்³வத்திம்ஸாகாரம் தே³த², அத்தபா⁴வே ச க²யவயபட்ட²பனம் ஆசிக்க²தா²’’தி. ‘‘தேன ஹி உக்³க³ண்ஹ, மஹாஉபாஸிகே’’தி ஸப்³ப³ம் உக்³க³ண்ஹாபேஸும்.

ஸா ததோ பட்டா²ய த்³வத்திம்ஸாகாரே ஸஜ்ஜா²யம் கத்வா அத்தனி க²யவயம் பட்ட²பேத்வா தேஹி பி⁴க்கூ²ஹி புரேதரமேவ தயோ மக்³கே³, தீணி ச ப²லானி பாபுணி. மக்³கே³னேவ சஸ்ஸா சதஸ்ஸோ படிஸம்பி⁴தா³ லோகியஅபி⁴ஞ்ஞா ச ஆக³மிம்ஸு. ஸா மக்³க³ப²லஸுக²தோ வுட்டா²ய தி³ப்³ப³சக்கு²னா ஓலோகேத்வா, ‘‘கதா³ நு கோ² மம புத்தேஹி அயம் த⁴ம்மோ அதி⁴க³தோ’’தி உபதா⁴ரேந்தீ ஸப்³பே³பிமே ஸராகா³ ஸதோ³ஸா ஸமோஹா ஜா²னவிபஸ்ஸனாமத்தம்பி தேஸம் நத்தி², ‘‘கிம் நு கோ² மய்ஹம் புத்தானம் அரஹத்தஸ்ஸ உபனிஸ்ஸயோ அத்தி², நத்தீ²’’தி ஆவஜ்ஜேத்வா, ‘‘அத்தீ²’’தி தி³ஸ்வா, ‘‘ஸேனாஸனஸப்பாயம் நு கோ² அத்தி², நத்தீ²’’தி ஆவஜ்ஜேத்வா தம்பி தி³ஸ்வா, ‘‘புக்³க³லஸப்பாயம் நு கோ² லப⁴ந்தி, ந லப⁴ந்தீ’’தி ஆவஜ்ஜேஸி, புக்³க³லஸப்பாயம்பி தி³ஸ்வா, ‘‘ஆஹாரஸப்பாயம் நு கோ² லப⁴ந்தி, ந லப⁴ந்தீ’’தி உபதா⁴ரேந்தீ ‘‘ஆஹாரஸப்பாயம் நேஸம் நத்தீ²’’தி தி³ஸ்வா ததோ பட்டா²ய நானாவித⁴ம் யாகு³ம், அனேகப்பகாரம் க²ஜ்ஜகம், நானக்³க³ரஸஞ்ச போ⁴ஜனம் ஸம்பாதே³த்வா கே³ஹே பி⁴க்கூ² நிஸீதா³பேத்வா த³க்கி²ணோத³கம் த³த்வா, ‘‘ப⁴ந்தே, தும்ஹாகம் யம் யம் ருச்சதி, தம் தம் க³ஹேத்வா பரிபு⁴ஞ்ஜதா²’’தி நிய்யாதே³ஸி. தே யதா²ருசி யாகு³ஆதீ³னி க³ஹேத்வா பரிபு⁴ஞ்ஜந்தி. தேஸம் ஸப்பாயாஹாரம் லப⁴ந்தானம் சித்தம் ஏகக்³க³ம் அஹோஸி.

தே ஏகக்³கே³ன சித்தேன விபஸ்ஸனம் வட்³டே⁴த்வா ந சிரஸ்ஸேவ ஸஹ படிஸம்பி⁴தா³ஹி அரஹத்தம் பத்வா சிந்தயிம்ஸு – ‘‘அஹோ மஹாஉபாஸிகா அம்ஹாகம் பதிட்டா² ஜாதா, ஸசே மயம் ஸப்பாயாஹாரம் ந லபி⁴ம்ஹ, ந நோ மக்³க³ப²லபடிவேதோ⁴ அப⁴விஸ்ஸ, இதா³னி வுட்ட²வஸ்ஸா பவாரேத்வா ஸத்து² ஸந்திகம் க³மிஸ்ஸாமா’’தி. தே ‘‘ஸத்தா²ரம் த³ட்டு²காமம்ஹா’’தி மஹாஉபாஸிகம் ஆபுச்சி²ம்ஸு. ‘‘மஹாஉபாஸிகா ஸாது⁴, அய்யா’’தி. தே அனுக³ந்த்வா புனபி, ‘‘ப⁴ந்தே, அம்ஹே ஓலோகேய்யாதா²’’தி ப³ஹூனி பியவசனானி வத்வா படினிவத்தி. தேபி கோ² பி⁴க்கூ² ஸாவத்தி²ம் க³ந்த்வா ஸத்தா²ரம் வந்தி³த்வா ஏகமந்தம் நிஸின்னா ‘‘கச்சி, பி⁴க்க²வே, க²மனீயம், கச்சி யாபனீயம், ந ச பிண்ட³கேன கிலமித்தா²’’தி வுத்தே ‘‘க²மனீயம், ப⁴ந்தே, யாபனீயம், ப⁴ந்தே, பிண்ட³கேன பன நேவ கிலமிம்ஹ. அம்ஹாகஞ்ஹி மாதிகமாதா நாமேகா உபாஸிகா சித்தாசாரம் ஞத்வா, ‘அஹோ வத நோ ஏவரூபம் நாம ஆஹாரம் படியாதே³ய்யா’தி சிந்திதே யதா²சிந்திதம் ஆஹாரம் படியாதே³த்வா அதா³ஸீ’’தி தஸ்ஸா கு³ணகத²ம் கத²யிம்ஸு.

அஞ்ஞதரோ பி⁴க்கு² தஸ்ஸா கு³ணகத²ம் ஸுத்வா தத்த² க³ந்துகாமோ ஹுத்வா ஸத்து² ஸந்திகே கம்மட்டா²னம் க³ஹேத்வா, ‘‘ப⁴ந்தே, தம் கா³மம் க³மிஸ்ஸாமீ’’தி ஸத்தா²ரம் ஆபுச்சி²த்வா ஜேதவனதோ நிக்க²மித்வா அனுபுப்³பே³ன தம் கா³மம் பத்வா விஹாரம் பவிஸனதி³வஸேயேவ சிந்தேஸி – ‘‘அயம் கிர உபாஸிகா சிந்திதசிந்திதம் ஜானாதி, அஹஞ்ச மக்³க³கிலந்தோ விஹாரம் படிஜக்³கி³தும் ந ஸக்கி²ஸ்ஸாமி, அஹோ வத மே விஹாரபடிஜக்³க³கம் மனுஸ்ஸம் பேஸேய்யா’’தி. உபாஸிகா கே³ஹே நிஸின்னாவ ஆவஜ்ஜேந்தீ தமத்த²ம் ஞத்வா, ‘‘க³ச்ச², விஹாரம் படிஜக்³கி³த்வா ஏஹீ’’தி மனுஸ்ஸம் பேஸேஸி. இதரோபி பானீயம் பிவிதுகாமோ ‘‘அஹோ வத மே ஸக்க²ரபானகம் கத்வா பேஸேய்யா’’தி சிந்தேஸி. உபாஸிகா தம்பி பேஸேஸி. ஸோ புனதி³வஸே ‘‘பாதோவ ஸினித்³த⁴யாகு³ம் மே ஸஉத்தரிப⁴ங்க³ம் பேஸேதூ’’தி சிந்தேஸி. உபாஸிகா ததா² அகாஸி. ஸோ யாகு³ம் பிவித்வா, ‘‘அஹோ வத மே ஏவரூபம் க²ஜ்ஜகம் பேஸேய்யா’’தி சிந்தேஸி. உபாஸிகா தம்பி பேஸேஸி. ஸோ சிந்தேஸி – ‘‘அயம் உபாஸிகா மயா ஸப்³ப³ம் சிந்திதசிந்திதம் பேஸேஸி, அஹம் ஏதம் த³ட்டு²காமோ, அஹோ வத மே நானக்³க³ரஸபோ⁴ஜனம் கா³ஹாபேத்வா ஸயமேவ ஆக³ச்சே²ய்யா’’தி. உபாஸிகா ‘‘மம புத்தோ மம் த³ட்டு²காமோ, ஆக³மனம் மே பச்சாஸீஸதீ’’தி போ⁴ஜனம் கா³ஹாபேத்வா விஹாரம் க³ந்த்வா தஸ்ஸ அதா³ஸி. ஸோ கதப⁴த்தகிச்சோ ‘‘மாதிகமாதா நாம த்வம், மஹாஉபாஸிகே’’தி புச்சி². ‘‘ஆம, தாதா’’தி. ‘‘த்வம் பரசித்தம் ஜானாஸீ’’தி? ‘‘கிம் மம் புச்ச²ஸி, தாதா’’தி? ‘‘மயா சிந்திதசிந்திதம் ஸப்³ப³மகாஸி, தேன தம் புச்சா²மீ’’தி. ‘‘பரசித்தஜானனகபி⁴க்கூ² ப³ஹூ, தாதா’’தி? ‘‘நாஹம் அஞ்ஞே புச்சா²மி, துவம் புச்சா²மி, உபாஸிகே’’தி. ஏவம் ஸந்தேபி உபாஸிகா ‘‘பரசித்தம் ஜானாமீ’’தி அவத்வா ‘‘பரசித்தம் ஜானந்தா நாம ஏவம் கரோந்தி புத்தா’’தி ஆஹ. ஸோ ‘‘பா⁴ரியம் வதித³ம் கம்மம், புது²ஜ்ஜனா நாம ஸோப⁴னம்பி அஸோப⁴னம்பி சிந்தேந்தி, ஸசாஹம் கிஞ்சி அயுத்தம் சிந்தயிஸ்ஸாமி, ஸஹ ப⁴ண்ட³கேன சோரம் சூளாய க³ண்ஹந்தீ விய மம் விப்பகாரம் பாபேய்ய, மயா இதோ பலாயிதும் வட்டதீ’’தி சிந்தேத்வா, ‘‘உபாஸிகே, அஹம் க³மிஸ்ஸாமீ’’தி ஆஹ. ‘‘கஹம், அய்யா’’தி? ‘‘ஸத்து² ஸந்திகம், உபாஸிகே’’தி. ‘‘வஸத² தாவ, ப⁴ந்தே, இதா⁴’’தி. ‘‘ந வஸிஸ்ஸாமி, உபாஸிகே, க³மிஸ்ஸாமேவா’’தி நிக்க²மித்வா ஸத்து² ஸந்திகம் அக³மாஸி. அத² நம் ஸத்தா² ‘‘கிம் பி⁴க்கு² ந த்வம் தத்த² வஸஸீ’’தி புச்சி². ‘‘ஆம, ப⁴ந்தே, ந ஸக்கா தத்த² வஸிது’’ந்தி. ‘‘கிம் காரணா பி⁴க்கூ²’’தி? ‘‘ப⁴ந்தே, ஸா உபாஸிகா சிந்திதசிந்திதம் ஸப்³ப³ம் ஜானாதி, புது²ஜ்ஜனா ச நாம ஸோப⁴னம்பி அஸோப⁴னம்பி சிந்தேந்தி, ஸசாஹம் கிஞ்சி அயுத்தம் சிந்தேஸ்ஸாமி, ஸஹ ப⁴ண்ட³கேன சோரம் சூளாய க³ண்ஹந்தீ விய மம் விப்பகாரம் பாபேஸ்ஸதீ’’தி சிந்தேத்வா ஆக³தோம்ஹீதி. ‘‘பி⁴க்கு², தத்தே²வ தயா வஸிதும் வட்டதீ’’தி, ‘‘ந ஸக்கோமி, ப⁴ந்தே, நாஹம் தத்த² வஸிஸ்ஸாமீ’’தி. ‘‘தேன ஹி த்வம், பி⁴க்கு², ஏகமேவ ரக்கி²தும் ஸக்கி²ஸ்ஸஸீ’’தி. ‘‘கிம், ப⁴ந்தே’’தி? ‘‘தவ சித்தமேவ ரக்க², சித்தம் நாமேதம் து³ரக்க²ம், த்வம் அத்தனோ சித்தமேவ நிக்³க³ண்ஹ, மா அஞ்ஞம் கிஞ்சி சிந்தயி, சித்தம் நாமேதம் து³ன்னிக்³க³ஹ’’ந்தி வத்வா இமம் கா³த²மாஹ –

35. ‘‘து³ன்னிக்³க³ஹஸ்ஸ லஹுனோ, யத்த²காமனிபாதினோ;

சித்தஸ்ஸ த³மதோ² ஸாது⁴, சித்தம் த³ந்தம் ஸுகா²வஹ’’ந்தி.

தத்த² சித்தம் நாமேதம் து³க்கே²ன நிக்³க³ய்ஹதீதி து³ன்னிக்³க³ஹம். லஹும் உப்பஜ்ஜதி ச நிருஜ்ஜ²தி சாதி லஹு. தஸ்ஸ து³ன்னிக்³க³ஹஸ்ஸ லஹுனோ. யத்த²காமனிபாதினோதி யத்த² கத்த²சிதே³வ நிபதனஸீலஸ்ஸ. ஏதஞ்ஹி லபி⁴தப்³ப³ட்டா²னம் வா அலபி⁴தப்³ப³ட்டா²னம் வா யுத்தட்டா²னம் வா அயுத்தட்டா²னம் வா ந ஜானாதி, நேவ ஜாதிம் ஓலோகேதி, ந கோ³த்தம், ந வயம். யத்த² யத்த² இச்ச²தி, தத்த² தத்தே²வ நிபததீதி ‘‘யத்த²காமனிபாதீ’’தி வுச்சதி. தஸ்ஸ ஏவரூபஸ்ஸ சித்தஸ்ஸ த³மதோ² ஸாது⁴ சதூஹி அரியமக்³கே³ஹி த³ந்தபா⁴வோ யதா² நிப்³பி³ஸேவனம் ஹோதி, ததா² கதபா⁴வோ ஸாது⁴. கிம் காரணா? இத³ஞ்ஹி சித்தம் த³ந்தம் ஸுகா²வஹம் நிப்³பி³ஸேவனம் கதம் மக்³க³ப²லஸுக²ம் பரமத்த²னிப்³பா³னஸுக²ஞ்ச ஆவஹதீதி.

தே³ஸனாபரியோஸானே ஸம்பத்தபரிஸாய ப³ஹூ ஸோதாபன்னாத³யோ அஹேஸும், மஹாஜனஸ்ஸ ஸாத்தி²கா த⁴ம்மதே³ஸனா ஜாதாதி.

ஸத்தா² தஸ்ஸ பி⁴க்கு²னோ இமம் ஓவாத³ம் த³த்வா, ‘‘க³ச்ச², பி⁴க்கு², அஞ்ஞம் கிஞ்சி அசிந்தயித்வா தத்தே²வ வஸாஹீ’’தி பஹிணி. ஸோ பி⁴க்கு² ஸத்து² ஸந்திகா ஓவாத³ம் லபி⁴த்வா தத்த² அக³மாஸி. கிஞ்சி ப³ஹித்³தா⁴ சிந்தனம் நாம ந சிந்தேஸி. மஹாஉபாஸிகாபி தி³ப்³பே³ன சக்கு²னா ஓலோகேந்தீ தே²ரம் தி³ஸ்வா, ‘‘இதா³னி ஓவாத³தா³யகம் ஆசரியம் லபி⁴த்வா புனாக³தோ மம புத்தோ’’தி அத்தனோ ஞாணேனேவ பரிச்சி²ந்தி³த்வா தஸ்ஸ ஸப்பாயாஹாரம் படியாதே³த்வா அதா³ஸி. ஸோ ஸப்பாயபோ⁴ஜனம் ஸேவித்வா கதிபாஹேனேவ அரஹத்தம் பத்வா மக்³க³ப²லஸுகே²ன வீதினாமேந்தோ ‘‘அஹோ மஹாஉபாஸிகா மய்ஹம் பதிட்டா² ஜாதா, அஹம் இமம் நிஸ்ஸாய ப⁴வனிஸ்ஸரணம் பத்தோம்ஹீ’’தி சிந்தேத்வா, ‘‘இமஸ்மிம் தாவ மே அத்தபா⁴வே பதிட்டா² ஜாதா, ஸம்ஸாரே பன மே ஸம்ஸரந்தஸ்ஸ அஞ்ஞேஸுபி அத்தபா⁴வேஸு அயம் பதிட்டா² பூ⁴தபுப்³பா³, நோ’’தி உபதா⁴ரேந்தோ ஏகூனஅத்தபா⁴வஸதம் அனுஸ்ஸரி. ஸாபி ஏகூனஅத்தபா⁴வஸதே தஸ்ஸ பாத³பரிசாரிகா அஞ்ஞேஸு படிப³த்³த⁴சித்தா ஹுத்வா தம் ஜீவிதா வோரோபேஸி. தே²ரோ தஸ்ஸா ஏத்தகம் அகு³ணம் தி³ஸ்வா, ‘‘அஹோ மயம் மஹாஉபாஸிகா பா⁴ரியம் கம்மம் அகாஸீ’’தி சிந்தேஸி.

மஹாஉபாஸிகாபி கே³ஹே நிஸின்னாவ ‘‘கிம் நு கோ² மய்ஹம் புத்தஸ்ஸ பப்³ப³ஜிதகிச்சம் மத்தகம் பத்தம், நோ’’தி உபதா⁴ரயமானா தஸ்ஸ அரஹத்தபத்திம் ஞத்வா உத்தரி உபதா⁴ரியமானா, ‘‘மம புத்தோ அரஹத்தம் பத்வா அஹோ வத மே அயம் உபாஸிகா மஹதீ பதிட்டா² ஜாதா’’தி சிந்தேத்வா, ‘‘அதீதேபி நு கோ² மே அயம் பதிட்டா² பூ⁴தபுப்³பா³, நோ’’தி உபதா⁴ரேந்தோ ஏகூனஅத்தபா⁴வஸதம் அனுஸ்ஸரி, ‘‘அஹம் கோ² பன ஏகூனஅத்தபா⁴வஸதே அஞ்ஞேஹி ஸத்³தி⁴ம் ஏகதோ ஹுத்வா ஏதம் ஜீவிதா வோரோபேஸிம், அயம் மே ஏத்தகம் அகு³ணம் தி³ஸ்வா ‘அஹோ பா⁴ரியம் கம்மம் கதம் உபாஸிகாயா’’தி சிந்தேஸி. ‘‘அத்தி² நு கோ² ஏவம் ஸம்ஸாரே ஸம்ஸரந்தியா மம புத்தஸ்ஸ உபகாரோ கதபுப்³போ³’’தி உபதா⁴ரயமானா ததோ உத்தரிம் ஸதமம் அத்தபா⁴வம் அனுஸ்ஸரித்வா ஸதமே அத்தபா⁴வே மயா ஏதஸ்ஸ பாத³பரிசாரிகாய ஹுத்வா ஏதஸ்மிம் ஜீவிதா வோரோபனட்டா²னே ஜீவிததா³னம் தி³ன்னம், அஹோ மயா மம புத்தஸ்ஸ மஹாஉபகாரோ கதபுப்³போ³’’தி கே³ஹே நிஸின்னாவ உத்தரிம் விஸேஸேத்வா ‘‘உபதா⁴ரேதா²’’தி ஆஹ. ஸோ தி³ப்³பா³ய ஸோததா⁴துயா ஸத்³த³ம் ஸுத்வா விஸேஸேத்வா ஸதமம் அத்தபா⁴வம் அனுஸ்ஸரித்வா தத்த² தாய அத்தனோ ஜீவிதஸ்ஸ தி³ன்னபா⁴வம் தி³ஸ்வா, ‘‘அஹோ மம இமாய மஹாஉபாஸிகாய உபகாரோ கதபுப்³போ³’’தி அத்தமனோ ஹுத்வா தஸ்ஸா தத்தே²வ சதூஸு மக்³க³ப²லேஸு பஞ்ஹம் கதே²த்வா அனுபாதி³ஸேஸாய நிப்³பா³னதா⁴துயா பரினிப்³பா³யீதி.

அஞ்ஞதரபி⁴க்கு²வத்து² து³தியம்.

3. அஞ்ஞதரஉக்கண்டி²தபி⁴க்கு²வத்து²

ஸுது³த்³த³ஸந்தி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ அஞ்ஞதரம் உக்கண்டி²தபி⁴க்கு²ம் ஆரப்³ப⁴ கதே²ஸி.

ஸத்த²ரி கிர ஸாவத்தி²யம் விஹரந்தே ஏகோ ஸேட்டி²புத்தோ அத்தனோ குலூபக³த்தே²ரம் உபஸங்கமித்வா, ‘‘ப⁴ந்தே, அஹம் து³க்கா² முச்சிதுகாமோ, ஏகம் மே து³க்க²தோ முச்சனகாரணம் கதே²தா²’’தி ஆஹ. ‘‘ஸாதா⁴வுஸோ, ஸசேஸி து³க்கா² முச்சிதுகாமோ, ஸலாகப⁴த்தம் தே³ஹி, பக்கி²கப⁴த்தம் தே³ஹி, வஸ்ஸாவாஸிகம் தே³ஹி, சீவராத³யோ பச்சயே தே³ஹி, அத்தனோ ஸாபதேய்யம் தயோ கோட்டா²ஸே கத்வா ஏகேன கம்மந்தம் பயோஜேஹி, ஏகேன புத்ததா³ரம் போஸேஹி, ஏகம் பு³த்³த⁴ஸாஸனே தே³ஹீ’’தி ஆஹ. ஸோ ‘‘ஸாது⁴, ப⁴ந்தே’’தி வுத்தபடிபாடியா ஸப்³ப³ம் கத்வா புன தே²ரம் புச்சி² – ‘‘ததோ உத்தரிம் அஞ்ஞம் கிம் கரோமி, ப⁴ந்தே’’தி? ‘‘ஆவுஸோ, தீணி ஸரணானி க³ண்ஹ, பஞ்ச ஸீலானி க³ண்ஹாஹீ’’தி. தானிபி படிக்³க³ஹேத்வா ததோ உத்தரிம் புச்சி². ‘‘தேன ஹி த³ஸ ஸீலானி க³ண்ஹாஹீ’’தி. ‘‘ஸாது⁴, ப⁴ந்தே’’தி க³ண்ஹி. ஸோ ஏவம் அனுபுப்³பே³ன புஞ்ஞகம்மஸ்ஸ கதத்தா அனுபுப்³ப³ஸேட்டி²புத்தோ நாம ஜாதோ. ததோ ‘‘உத்தரிம்பி கத்தப்³ப³ம் அத்தி², ப⁴ந்தே’’தி புன புச்சி²த்வா, ‘‘தேன ஹி பப்³ப³ஜாஹீ’’தி வுத்தோ நிக்க²மித்வா பப்³ப³ஜி. தஸ்ஸேகோ ஆபி⁴த⁴ம்மிகபி⁴க்கு² ஆசரியோ அஹோஸி. ஏகோ வினயத⁴ரோ உபஜ்ஜா²யோ. தஸ்ஸ லத்³தூ⁴பஸம்பத³ஸ்ஸ ஆசரியோ அத்தனோ ஸந்திகம் ஆக³தகாலே அபி⁴த⁴ம்மே பஞ்ஹம் கதே²ஸி – ‘‘பு³த்³த⁴ஸாஸனே நாம இத³ம் காதும் வட்டதி, இத³ம் ந வட்டதீ’’தி. உபஜ்ஜா²யோபிஸ்ஸ அத்தனோ ஸந்திகம் ஆக³தகாலே வினயே பஞ்ஹம் கதே²ஸி – ‘‘பு³த்³த⁴ஸாஸனே நாம இத³ம் காதும் வட்டதி, இத³ம் ந வட்டதி, இத³ம் கப்பதி, இத³ம் ந கப்பதீ’’தி. ஸோ சிந்தேஸி – ‘‘அஹோ பா⁴ரியம் இத³ம் கம்மம், அஹம் து³க்கா² முச்சிதுகாமோ பப்³ப³ஜிதோ, இத⁴ ச மம ஹத்த²பஸாரணட்டா²னம்பி ந பஞ்ஞாயதி, கே³ஹே ட²த்வாவ து³க்கா² முச்சிதும் ஸக்கா, மயா கி³ஹினா ப⁴விதும் வட்டதீ’’தி. ஸோ ததோ பட்டா²ய உக்கண்டி²தோ அனபி⁴ரதோ த்³வத்திம்ஸாகாரே ஸஜ்ஜா²யம் ந கரோதி, உத்³தே³ஸம் ந க³ண்ஹாதி, கிஸோ லூகோ² த⁴மனிஸந்த²தக³த்தோ ஆலஸ்ஸியாபி⁴பூ⁴தோ கச்சு²பரிகிண்ணோ அஹோஸி.

அத² நம் த³ஹரஸாமணேரா, ‘‘ஆவுஸோ, கிம் த்வம் டி²தட்டா²னே டி²தோவ நிஸின்னட்டா²னே நிஸின்னோவ அஹோஸி, பண்டு³ரோகா³பி⁴பூ⁴தோ கிஸோ லூகோ² த⁴மனிஸந்த²தக³த்தோ ஆலஸ்ஸியாபி⁴பூ⁴தோ கச்சு²பரிகிண்ணோ, கிம் தே கத’’ந்தி புச்சி²ம்ஸு. ‘‘உக்கண்டி²தோம்ஹி, ஆவுஸோ’’தி. ‘‘கிம் காரணா’’தி? ஸோ தம் பவத்திம் ஆரோசேஸி. தே தஸ்ஸ ஆசரியுபஜ்ஜா²யானம் ஆசிக்கி²ம்ஸு. ஆசரியுபஜ்ஜா²யா தம் ஆதா³ய ஸத்து² ஸந்திகம் அக³மம்ஸு. ஸத்தா² ‘‘கிம், பி⁴க்க²வே, ஆக³தத்தா²’’தி ஆஹ. ‘‘ப⁴ந்தே, அயம் பி⁴க்கு² தும்ஹாகம் ஸாஸனே உக்கண்டி²தோ’’தி. ‘‘ஏவம் கிர பி⁴க்கூ²’’தி. ‘‘ஆம, ப⁴ந்தே’’தி. ‘‘கிம் காரணா’’தி? ‘‘அஹம், ப⁴ந்தே, து³க்கா² முச்சிதுகாமோவ பப்³ப³ஜிதோ, தஸ்ஸ மே ஆசரியோ அபி⁴த⁴ம்மகத²ம் கதே²ஸி, உபஜ்ஜா²யோ வினயகத²ம் கதே²ஸி, ஸ்வாஹம் ‘இத⁴ மே ஹத்த²பஸாரணட்டா²னம்பி நத்தி², கி³ஹினா ஹுத்வா ஸக்கா து³க்கா² முச்சிதும், கி³ஹி ப⁴விஸ்ஸாமீ’தி ஸன்னிட்டா²னமகாஸிம், ப⁴ந்தே’’தி. ‘‘ஸசே த்வம், பி⁴க்கு², ஏகமேவ ரக்கி²தும் ஸக்கி²ஸ்ஸஸி, அவஸேஸானம் ரக்க²னகிச்சம் நத்தீ²’’தி. ‘‘கிம், ப⁴ந்தே’’தி? ‘‘தவ சித்தமேவ ரக்கி²தும் ஸக்கி²ஸ்ஸஸீ’’தி. ‘‘ஸக்கி²ஸ்ஸாமி, ப⁴ந்தே’’தி. ‘‘தேன ஹி அத்தனோ சித்தமேவ ரக்கா²ஹி, ஸக்கா து³க்கா² முச்சிது’’ந்தி இமம் ஓவாத³ம் த³த்வா இமம் கா³த²மாஹ –

36. ‘‘ஸுது³த்³த³ஸம் ஸுனிபுணம், யத்த²காமனிபாதினம்;

சித்தம் ரக்கே²த² மேதா⁴வீ, சித்தம் கு³த்தம் ஸுகா²வஹ’’ந்தி.

தத்த² ஸுது³த்³த³ஸந்தி ஸுட்டு² து³த்³த³ஸம். ஸுனிபுணந்தி ஸுட்டு² நிபுணம் பரமஸண்ஹம். யத்த²காமனிபாதினந்தி ஜாதிஆதீ³னி அனோலோகேத்வா லபி⁴தப்³பா³லபி⁴தப்³ப³யுத்தாயுத்தட்டா²னேஸு யத்த² கத்த²சி நிபதனஸீலம். சித்தம் ரக்கே²த² மேதா⁴வீதி அந்த⁴பா³லோ து³ம்மேதோ⁴ அத்தனோ சித்தம் ரக்கி²தும் ஸமத்தோ² நாம நத்தி², சித்தவஸிகோ ஹுத்வா அனயப்³யஸனம் பாபுணாதி. மேதா⁴வீ பன பண்டி³தோவ சித்தம் ரக்கி²தும் ஸக்கோதி, தஸ்மா த்வம்பி சித்தமேவ கோ³பேஹி. இத³ஞ்ஹி சித்தம் கு³த்தம் ஸுகா²வஹம் மக்³க³ப²லனிப்³பா³னஸுகா²னி ஆவஹதீதி.

தே³ஸனாபரியோஸானே ஸோ பி⁴க்கு² ஸோதாபத்திப²லம் பாபுணி, அஞ்ஞேபி ப³ஹூ ஸோதாபன்னாத³யோ அஹேஸும், தே³ஸனா மஹாஜனஸ்ஸ ஸாத்தி²கா அஹோஸீதி.

அஞ்ஞதரஉக்கண்டி²தபி⁴க்கு²வத்து² ததியம்.

4. ஸங்க⁴ரக்கி²தபா⁴கி³னேய்யத்தே²ரவத்து²

தூ³ரங்க³மந்தி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ ஸங்க⁴ரக்கி²தம் நாம பி⁴க்கு²ம் ஆரப்³ப⁴ கதே²ஸி.

ஸாவத்தி²யம் கிரேகோ குலபுத்தோ ஸத்து² த⁴ம்மதே³ஸனம் ஸுத்வா நிக்க²மித்வா பப்³ப³ஜிதோ லத்³தூ⁴பஸம்பதோ³ ஸங்க⁴ரக்கி²தத்தே²ரோ நாம ஹுத்வா கதிபாஹேனேவ அரஹத்தம் பாபுணி. தஸ்ஸ கனிட்ட²ப⁴கி³னீ புத்தம் லபி⁴த்வா தே²ரஸ்ஸ நாமம் அகாஸி. ஸோ பா⁴கி³னேய்யஸங்க⁴ரக்கி²தோ நாம ஹுத்வா வயப்பத்தோ தே²ரஸ்ஸேவ ஸந்திகே பப்³ப³ஜித்வா லத்³தூ⁴பஸம்பதோ³ அஞ்ஞதரஸ்மிம் கா³மகாராமே வஸ்ஸம் உபக³ந்த்வா, ‘‘ஏகம் ஸத்தஹத்த²ம், ஏகம் அட்ட²ஹத்த²’’ந்தி த்³வே வஸ்ஸாவாஸிகஸாடகே லபி⁴த்வா அட்ட²ஹத்த²ம் ‘‘உபஜ்ஜா²யஸ்ஸ மே ப⁴விஸ்ஸதீ’’தி ஸல்லக்கே²த்வா ‘‘ஸத்தஹத்த²ம் மய்ஹம் ப⁴விஸ்ஸதீ’’தி சிந்தேத்வா வுட்ட²வஸ்ஸோ ‘‘உபஜ்ஜா²யம் பஸ்ஸிஸ்ஸாமீ’’தி ஆக³ச்ச²ந்தோ அந்தராமக்³கே³ பிண்டா³ய சரந்தோ ஆக³ந்த்வா தே²ரே விஹாரம் அனாக³தேயேவ விஹாரம் பவிஸித்வா தே²ரஸ்ஸ தி³வாட்டா²னம் ஸம்மஜ்ஜித்வா பாதோ³த³கம் உபட்ட²பேத்வா ஆஸனம் பஞ்ஞபேத்வா ஆக³மனமக்³க³ம் ஓலோகேந்தோ நிஸீதி³. அத²ஸ்ஸாக³மனபா⁴வம் தி³ஸ்வா பச்சுக்³க³மனம் கத்வா பத்தசீவரம் படிக்³க³ஹேத்வா, ‘‘நிஸீத³த², ப⁴ந்தே’’தி தே²ரம் நிஸீதா³பேத்வா தாலவண்டம் ஆதா³ய பீ³ஜித்வா பானீயம் த³த்வா பாதே³ தோ⁴வித்வா தம் ஸாடகம் ஆனேத்வா பாத³மூலே ட²பேத்வா, ‘‘ப⁴ந்தே, இமம் பரிபு⁴ஞ்ஜதா²’’தி வத்வா பீ³ஜயமானோ அட்டா²ஸி.

அத² நம் தே²ரோ ஆஹ – ‘‘ஸங்க⁴ரக்கி²த, மய்ஹம் சீவரம் பரிபுண்ணம், த்வமேவ பரிபு⁴ஞ்ஜா’’தி. ‘‘ப⁴ந்தே, மயா லத்³த⁴காலதோ பட்டா²ய அயம் தும்ஹாகமேவ ஸல்லக்கி²தோ, பரிபோ⁴க³ம் கரோதா²’’தி. ‘‘ஹோது, ஸங்க⁴ரக்கி²த, பரிபுண்ணம் மே சீவரம், த்வமேவ பரிபு⁴ஞ்ஜா’’தி. ‘‘ப⁴ந்தே, மா ஏவம் கரோத², தும்ஹேஹி பரிபு⁴த்தே மய்ஹம் மஹப்ப²லம் ப⁴விஸ்ஸதீ’’தி. அத² நம் தஸ்ஸ புனப்புனம் கதே²ந்தஸ்ஸபி தே²ரோ ந இச்சி²யேவ.

ஏவம் ஸோ பீ³ஜயமானோ டி²தோவ சிந்தேஸி – ‘‘அஹம் தே²ரஸ்ஸ கி³ஹிகாலே பா⁴கி³னேய்யோ, பப்³ப³ஜிதகாலே ஸத்³தி⁴விஹாரிகோ, ஏவம்பி மயா ஸத்³தி⁴ம் உபஜ்ஜா²யோ பரிபோ⁴க³ம் ந கத்துகாமோ. இமஸ்மிம் மயா ஸத்³தி⁴ம் பரிபோ⁴க³ம் அகரோந்தே கிம் மே ஸமணபா⁴வேன, கி³ஹி ப⁴விஸ்ஸாமீ’’தி. அத²ஸ்ஸ ஏதத³ஹோஸி – ‘‘து³ஸ்ஸண்டா²பிதோ க⁴ராவாஸோ, கிம் நு கோ² கத்வா கி³ஹிபூ⁴தோ ஜீவிஸ்ஸாமீ’’தி. ததோ சிந்தேஸி – ‘‘அட்ட²ஹத்த²ஸாடகம் விக்கிணித்வா ஏகம் ஏளிகம் க³ண்ஹிஸ்ஸாமி, ஏளிகா நாம கி²ப்பம் விஜாயதி, ஸ்வாஹம் விஜாதம் விஜாதம் விக்கிணித்வா மூலம் கரிஸ்ஸாமி, மூலே ப³ஹூ கத்வா ஏகம் பஜாபதிம் ஆனேஸ்ஸாமி, ஸா ஏகம் புத்தம் விஜாயிஸ்ஸதி. அத²ஸ்ஸ மம மாதுலஸ்ஸ நாமம் கத்வா சூளயானகே நிஸீதா³பேத்வா மம புத்தஞ்ச ப⁴ரியஞ்ச ஆதா³ய மாதுலம் வந்தி³தும் ஆக³மிஸ்ஸாமி, ஆக³ச்ச²ந்தே அந்தராமக்³கே³ மம ப⁴ரியம் ஏவம் வக்கா²மி – ‘ஆனேஹி தாவ மே புத்தம் வஹிஸ்ஸாமின’ந்தி. ஸா ‘கிம் தே புத்தேன, ஏஹி, இமம் யானகம் பாஜேஹீ’தி வத்வா புத்தம் க³ஹேத்வா, ‘அஹம் நேஸ்ஸாமி ந’ந்தி நேத்வா ஸந்தா⁴ரேதும் அஸக்கோந்தீ சக்கபதே² ச²ட்³டே³ஸ்ஸதி. அத²ஸ்ஸ ஸரீரம் அபி⁴ருஹித்வா சக்கம் க³மிஸ்ஸதி, அத² நம் ‘த்வம் மம புத்தம் நேவ மய்ஹம் அதா³ஸி, நம் ஸந்தா⁴ரேதும் நாஸக்கி² நாஸிதோஸ்மி தயா’தி வத்வா பதோத³யட்டி²யா பிட்டி²யம் பஹரிஸ்ஸாமீ’’தி.

ஸோ ஏவம் சிந்தேந்தோவ ட²த்வா பீ³ஜயமானோ தே²ரஸ்ஸ ஸீஸே தாலவண்டேன பஹரி. தே²ரோ ‘‘கிம் நு கோ² அஹம் ஸங்க⁴ரக்கி²தேன ஸீஸே பஹதோ’’தி உபதா⁴ரேந்தோ தேன சிந்திதசிந்திதம் ஸப்³ப³ம் ஞத்வா, ‘‘ஸங்க⁴ரக்கி²த, மாதுகா³மஸ்ஸ பஹாரம் தா³தும் நாஸக்கி², கோ ஏத்த² மஹல்லகத்தே²ரஸ்ஸ தோ³ஸோ’’தி ஆஹ. ஸோ ‘‘அஹோ நட்டோ²ம்ஹி, ஞாதம் கிர மே உபஜ்ஜா²யேன சிந்திதசிந்திதம், கிம் மே ஸமணபா⁴வேனா’’தி தாலவண்டம் ச²ட்³டே³த்வா பலாயிதும் ஆரத்³தோ⁴.

அத² நம் த³ஹரா ச ஸாமணேரா ச அனுப³ந்தி⁴த்வா ஆதா³ய ஸத்து² ஸந்திகம் அக³மம்ஸு. ஸத்தா² தே பி⁴க்கூ² தி³ஸ்வாவ ‘‘கிம், பி⁴க்க²வே, ஆக³தத்த², ஏகோ வோ பி⁴க்கு² லத்³தோ⁴’’தி புச்சி². ‘‘ஆம, ப⁴ந்தே, இமம் த³ஹரம் உக்கண்டி²த்வா பலாயந்தம் க³ஹேத்வா தும்ஹாகம் ஸந்திகம் ஆக³தம்ஹா’’தி. ‘‘ஏவம் கிர பி⁴க்கூ²’’தி? ‘‘ஆம, ப⁴ந்தே’’தி. ‘‘கிமத்த²ம் தே பி⁴க்கு² ஏவம் பா⁴ரியம் கம்மம் கதம், நனு த்வம் ஆரத்³த⁴வீரியஸ்ஸ ஏகஸ்ஸ பு³த்³த⁴ஸ்ஸ புத்தோ, மாதி³ஸஸ்ஸ நாம பு³த்³த⁴ஸ்ஸ ஸாஸனே பப்³ப³ஜித்வா அத்தானம் த³மேத்வா ஸோதாபன்னோதி வா ஸகதா³கா³மீதி வா அனாகா³மீதி வா அரஹாதி வா வதா³பேதும் நாஸக்கி², கிமத்த²ம் ஏவம் பா⁴ரியம் கம்மமகாஸீ’’தி? ‘‘உக்கண்டி²தோஸ்மி, ப⁴ந்தே’’தி. ‘‘கிம் காரணா உக்கண்டி²தோஸீ’’தி? ஸோ ஏவம் வஸ்ஸாவாஸிகஸாடகானம் லத்³த⁴தி³வஸதோ பட்டா²ய யாவ தே²ரஸ்ஸ தாலவண்டேன பஹாரா ஸப்³ப³ம் தம் பவத்திம் ஆரோசேத்வா, ‘‘இமினா காரணேன பலாதோஸ்மி, ப⁴ந்தே’’தி ஆஹ. அத² நம் ஸத்தா² ‘‘ஏஹி பி⁴க்கு², மா சிந்தயி சித்தம் நாமேதம் தூ³ரே ஹோந்தம்பி ஆரம்மணம் ஸம்படிச்ச²னகஜாதிகம், ராக³தோ³ஸமோஹப³ந்த⁴னா முச்சனத்தா²ய வாயமிதும் வட்டதீ’’தி வத்வா இமம் கா³த²மாஹ –

37. ‘‘தூ³ரங்க³மம் ஏகசரம், அஸரீரம் கு³ஹாஸயம்;

யே சித்தம் ஸம்யமேஸ்ஸந்தி, மோக்க²ந்தி மாரப³ந்த⁴னா’’தி.

தத்த² தூ³ரங்க³மந்தி சித்தஸ்ஸ ஹி மக்கடஸுத்தமத்தகம்பி புரத்தி²மாதி³தி³ஸாபா⁴கே³ன க³மனாக³மனம் நாம நத்தி², தூ³ரே ஸந்தம்பி பன ஆரம்மணம் ஸம்படிச்ச²தீதி தூ³ரங்க³மம் நாம ஜாதம். ஸத்தட்ட²சித்தானி பன ஏகதோ கண்ணிகப³த்³தா⁴னி ஏகக்க²ணே உப்பஜ்ஜிதும் ஸமத்தா²னி நாம நத்தி². உப்பத்திகாலே ஏகேகமேவ சித்தம் உப்பஜ்ஜதி, தஸ்மிம் நிருத்³தே⁴ புன ஏகேகமேவ உப்பஜ்ஜதீதி ஏகசரம் நாம ஜாதம். சித்தஸ்ஸ ஸரீரஸண்டா²னம் வா நீலாதி³ப்பகாரோ வண்ணபே⁴தோ³ வா நத்தீ²தி அஸரீரம் நாம ஜாதம். கு³ஹா நாம சதுமஹாபூ⁴தகு³ஹா, இத³ஞ்ச ஹத³யரூபம் நிஸ்ஸாய பவத்ததீதி கு³ஹாஸயம் நாம ஜாதம். யே சித்தந்தி யே கேசி புரிஸா வா இத்தி²யோ வா க³ஹட்டா² வா பப்³ப³ஜிதா வா அனுப்பஜ்ஜனககிலேஸஸ்ஸ உப்பஜ்ஜிதும் அதே³ந்தா ஸதிஸம்மோஸேன உப்பன்னகிலேஸம் பஜஹந்தா சித்தம் ஸம்யமேஸ்ஸந்தி ஸம்யதம் அவிக்கி²த்தம் கரிஸ்ஸந்தி. மோக்க²ந்தி மாரப³ந்த⁴னாதி ஸப்³பே³தே கிலேஸப³ந்த⁴னாபா⁴வேன மாரப³ந்த⁴னஸங்கா²தா தேபூ⁴மகவட்டா முச்சிஸ்ஸந்தீதி.

தே³ஸனாபரியோஸானே பா⁴கி³னேய்யஸங்க⁴ரக்கி²தத்தே²ரோ ஸோதாபத்திப²லம் பாபுணி, அஞ்ஞேபி ப³ஹூ ஸோதாபன்னாத³யோ ஜாதா, மஹாஜனஸ்ஸ ஸாத்தி²கா த⁴ம்மதே³ஸனா அஹோஸீதி.

ஸங்க⁴ரக்கி²தபா⁴கி³னேய்யத்தே²ரவத்து² சதுத்த²ம்.

5. சித்தஹத்த²த்தே²ரவத்து²

அனவட்டி²தசித்தஸ்ஸாதி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ சித்தஹத்த²த்தே²ரம் ஆரப்³ப⁴ கதே²ஸி.

ஏகோ கிர ஸாவத்தி²வாஸீ குலபுத்தோ நட்ட²கோ³ணம் பரியேஸந்தோ அரஞ்ஞம் பவிஸித்வா மஜ்ஜ²ன்ஹிகே காலே கோ³ணம் தி³ஸ்வா கோ³யூதே² விஸ்ஸஜ்ஜேத்வா, ‘‘அவஸ்ஸம் அய்யானம் ஸந்திகே ஆஹாரமத்தம் லபி⁴ஸ்ஸாமீ’’தி கு²ப்பிபாஸாபீளிதோ விஹாரம் பவிஸித்வா பி⁴க்கூ²னம் ஸந்திகம் க³ந்த்வா வந்தி³த்வா ஏகமந்தம் நிஸீதி³. தஸ்மிம் கோ² பன ஸமயே பி⁴க்கூ²னம் அவக்காரபாதியம் பு⁴த்தாவஸேஸகம் ப⁴த்தம் ஹோதி, தே தம் சா²தகபீளிதம் தி³ஸ்வா, ‘‘இதோ ப⁴த்தம் க³ஹேத்வா பு⁴ஞ்ஜாஹீ’’தி வதி³ம்ஸு. பு³த்³த⁴காலே ச பன அனேகஸூபப்³யஞ்ஜனம் ப⁴த்தம் உப்பஜ்ஜதி, ஸோ ததோ யாபனமத்தம் க³ஹேத்வா பு⁴ஞ்ஜித்வா பானீயம் பிவித்வா ஹத்தே² தோ⁴வித்வா பி⁴க்கூ² வந்தி³த்வா, ‘‘கிம், ப⁴ந்தே, அஜ்ஜ, அய்யா, நிமந்தனட்டா²னம் அக³மம்ஸூ’’தி புச்சி². ‘‘நத்தி², உபாஸக, பி⁴க்கூ² இமினாவ நீஹாரேன நிப³த்³த⁴ம் லப⁴ந்தீ’’தி. ஸோ ‘‘மயம் உட்டா²ய ஸமுட்டா²ய ரத்திந்தி³வம் நிப³த்³த⁴ம் கம்மம் கரோந்தாபி ஏவம் மது⁴ரப்³யஞ்ஜனம் ப⁴த்தம் ந லபா⁴ம, இமே கிர நிப³த்³த⁴ம் பு⁴ஞ்ஜந்தி, கிம் மே கி³ஹிபா⁴வேன, பி⁴க்கு² ப⁴விஸ்ஸாமீ’’தி சிந்தேத்வா பி⁴க்கூ² உபஸங்கமித்வா பப்³ப³ஜ்ஜம் யாசி. அத² நம் பி⁴க்கூ² ‘‘ஸாது⁴ உபாஸகா’’தி பப்³பா³ஜேஸும்.

ஸோ லத்³தூ⁴பஸம்பதோ³ ஸப்³ப³ப்பகாரம் வத்தபடிவத்தம் அகாஸி. ஸோ பு³த்³தா⁴னம் உப்பன்னேன லாப⁴ஸக்காரேன கதிபாஹச்சயேன தூ²லஸரீரோ அஹோஸி. ததோ சிந்தேஸி – ‘‘கிம் மே பி⁴க்கா²ய சரித்வா ஜீவிதேன, கி³ஹீ ப⁴விஸ்ஸாமீ’’தி. ஸோ விப்³ப⁴மித்வா கே³ஹம் பாவிஸி. தஸ்ஸ கே³ஹே கம்மம் கரோந்தஸ்ஸ கதிபாஹேனேவ ஸரீரம் மிலாயி. ததோ ‘‘கிம் மே இமினா து³க்கே²ன, ஸமணோ ப⁴விஸ்ஸாமீ’’தி சிந்தேத்வா புன க³ந்த்வா பப்³ப³ஜி. ஸோ கதிபாஹம் வீதினாமேத்வா புன உக்கண்டி²த்வா விப்³ப⁴மி, பப்³ப³ஜிதகாலே பன பி⁴க்கூ²னம் உபகாரகோ ஹோதி. ஸோ கதிபாஹேனேவ புனபி உக்கண்டி²த்வா, ‘‘கிம் மே கி³ஹிபா⁴வேன, பப்³ப³ஜிஸ்ஸாமீ’’தி க³ந்த்வா பி⁴க்கூ² வந்தி³த்வா பப்³ப³ஜ்ஜம் யாசி. அத² நம் பி⁴க்கூ² உபகாரவஸேன புன பப்³பா³ஜயிம்ஸு. ஏவம் ஸோ இமினா நியாமேனேவ ச²க்க²த்தும் பப்³ப³ஜித்வா உப்பப்³ப³ஜிதோ. தஸ்ஸ பி⁴க்கூ² ‘‘ஏஸ சித்தவஸிகோ ஹுத்வா விசரதீ’’தி சித்தஹத்த²த்தே²ரோதி நாமம் கரிம்ஸு.

தஸ்ஸேவம் அபராபரம் விசரந்தஸ்ஸேவ ப⁴ரியா க³ப்³பி⁴னீ அஹோஸி. ஸோ ஸத்தமே வாரே அரஞ்ஞதோ கஸிப⁴ண்ட³மாதா³ய கே³ஹம் க³ந்த்வா ப⁴ண்ட³கம் ட²பேத்வா ‘‘அத்தனோ காஸாவம் க³ண்ஹிஸ்ஸாமீ’’தி க³ப்³ப⁴ம் பாவிஸி. தஸ்மிம் க²ணே தஸ்ஸ ப⁴ரியா நிபஜ்ஜித்வா நித்³தா³யதி. தஸ்ஸா நிவத்த²ஸாடகோ அபக³தோ ஹோதி, முக²தோ ச லாலா பக்³க⁴ரதி, நாஸா கு⁴ரகு⁴ராயதி, முக²ம் விவட்டம், த³ந்தம் க⁴ம்ஸதி, ஸா தஸ்ஸ உத்³து⁴மாதகஸரீரம் விய உபட்டா²ஸி. ஸோ ‘‘அனிச்சம் து³க்க²ம் இத³’’ந்தி ஸஞ்ஞம் லபி⁴த்வா, ‘‘அஹம் ஏத்தகம் காலம் பப்³ப³ஜித்வா இமம் நிஸ்ஸாய பி⁴க்கு²பா⁴வே ஸண்டா²தும் நாஸக்கி²’’ந்தி காஸாயகோடியம் க³ஹேத்வா உத³ரே ப³ந்தி⁴த்வா கே³ஹா நிக்க²மி.

அத²ஸ்ஸ அனந்தரகே³ஹே டி²தா ஸஸ்ஸு தம் ததா² க³ச்ச²ந்தம் தி³ஸ்வா, ‘‘அயம் படிஉக்கண்டி²தோ ப⁴விஸ்ஸதி, இதா³னேவ அரஞ்ஞதோ ஆக³ந்த்வா காஸாவம் உத³ரே ப³ந்தி⁴த்வாவ கே³ஹா நிக்க²ந்தோ விஹாராபி⁴முகோ² க³ச்ச²தி, கிம் நு கோ²’’தி கே³ஹம் பவிஸித்வா நித்³தா³யமானம் தீ⁴தரம் பஸ்ஸித்வா ‘‘இமம் தி³ஸ்வா ஸோ விப்படிஸாரீ ஹுத்வா க³தோ’’தி ஞத்வா தீ⁴தரம் பஹரித்வா ‘‘உட்டே²ஹி காளகண்ணி, ஸாமிகோ தே தம் நித்³தா³யமானம் தி³ஸ்வா விப்படிஸாரீ ஹுத்வா க³தோ, நத்தி² ஸோ இதோ பட்டா²ய துய்ஹ’’ந்தி ஆஹ. ‘‘அபேஹி அபேஹி, அம்ம, குதோ தஸ்ஸ க³மனம் அத்தி², கதிபாஹேனேவ புனாக³மிஸ்ஸதீ’’தி ஆஹ. ஸோபி ‘‘அனிச்சம் து³க்க²’’ந்தி வத்வா க³ச்ச²ந்தோ க³ச்ச²ந்தோவ ஸோதாபத்திப²லம் பாபுணி. ஸோ க³ந்த்வா பி⁴க்கூ² வந்தி³த்வா பப்³ப³ஜ்ஜம் யாசி. ‘‘ந ஸக்கி²ஸ்ஸாம மம்யம் தம் பப்³பா³ஜேதும், குதோ துய்ஹம் ஸமணபா⁴வோ, ஸத்த²கனிஸானபாஸாணஸதி³ஸம் தவ ஸீஸ’’ந்தி. ‘‘ப⁴ந்தே, இதா³னி மம் அனுகம்பாய ஏகவாரம் பப்³பா³ஜேதா²’’தி. தே தம் உபகாரவஸேன பப்³பா³ஜயிம்ஸு. ஸோ கதிபாஹேனேவ ஸஹ படிஸம்பி⁴தா³ஹி அரஹத்தம் பாபுணி.

தேபி நம் ஆஹம்ஸு – ‘‘ஆவுஸோ சித்தஹத்த², தவ க³மனஸமயம் த்வமேவ ஜானேய்யாஸி, இமஸ்மிம் வாரே தே சிராயித’’ந்தி. ‘‘ப⁴ந்தே, ஸம்ஸக்³க³ஸ்ஸ அத்தி²பா⁴வகாலே க³தம்ஹா, ஸோ நோ ஸம்ஸக்³கோ³ சி²ன்னோ, இதா³னி அக³மனத⁴ம்மா ஜாதம்ஹா’’தி. பி⁴க்கூ² ஸத்து² ஸந்திகம் க³ந்த்வா, ‘‘ப⁴ந்தே, அயம் பி⁴க்கு² அம்ஹேஹி ஏவம் வுத்தோ ஏவம் நாம கதே²ஸி, அஞ்ஞம் ப்³யாகரோதி, அபூ⁴தம் வத³தீ’’தி ஆஹம்ஸு. ஸத்தா² ‘‘ஆம, பி⁴க்க²வே, மம புத்தோ அத்தனோ அனவட்டி²தசித்தகாலே ஸத்³த⁴ம்மம் அஜானனகாலே க³மனாக³மனம் அகாஸி, இதா³னிஸ்ஸ புஞ்ஞஞ்ச பாபஞ்ச பஹீன’’ந்தி வத்வா இமா த்³வே கா³தா² ஆஹ –

38. ‘‘அனவட்டி²தசித்தஸ்ஸ, ஸத்³த⁴ம்மம் அவிஜானதோ;

பரிப்லவபஸாத³ஸ்ஸ, பஞ்ஞா ந பரிபூரதி.

39. ‘‘அனவஸ்ஸுதசித்தஸ்ஸ, அனன்வாஹதசேதஸோ;

புஞ்ஞபாபபஹீனஸ்ஸ, நத்தி² ஜாக³ரதோ ப⁴ய’’ந்தி.

தத்த² அனவட்டி²தசித்தஸ்ஸாதி சித்தம் நாமேதம் கஸ்ஸசி நிப³த்³த⁴ம் வா தா²வரம் வா நத்தி². யோ பன புக்³க³லோ அஸ்ஸபிட்டே² ட²பிதகும்ப⁴ண்ட³ம் விய ச து²ஸராஸிம்ஹி கோட்டிதகா²ணுகோ விய ச க²ல்லாடஸீஸே ட²பிதகத³ம்ப³புப்ப²ம் விய ச ந கத்த²சி ஸண்டா²தி, கதா³சி பு³த்³த⁴ஸாவகோ ஹோதி, கதா³சி ஆஜீவகோ, கதா³சி நிக³ண்டோ², கதா³சி தாபஸோ. ஏவரூபோ புக்³க³லோ அனவட்டி²தசித்தோ நாம. தஸ்ஸ அனவட்டி²தசித்தஸ்ஸ. ஸத்³த⁴ம்மம் அவிஜானதோதி ஸத்ததிம்ஸபோ³தி⁴பக்கி²யத⁴ம்மபே⁴த³ம் இமம் ஸத்³த⁴ம்மம் அவிஜானந்தஸ்ஸ பரித்தஸத்³த⁴தாய வா உப்லவஸத்³த⁴தாய வா பரிப்லவபஸாத³ஸ்ஸ காமாவசரரூபாவசராதி³பே⁴தா³ பஞ்ஞா ந பரிபூரதி. காமாவசராயபி அபரிபூரயமானாய குதோவ ரூபாவசராரூபாவசரலோகுத்தரபஞ்ஞா பரிபூரிஸ்ஸதீதி தீ³பேதி. அனவஸ்ஸுதசித்தஸ்ஸாதி ராகே³ன அதிந்தசித்தஸ்ஸ. அனன்வாஹதசேதஸோதி ‘‘ஆஹதசித்தோ கி²லஜாதோ’’தி (தீ³. நி. 3.319; விப⁴. 941; ம. நி. 1.185) ஆக³தட்டா²னே தோ³ஸேன சித்தஸ்ஸ பஹதபா⁴வோ வுத்தோ, இத⁴ பன தோ³ஸேன அப்படிஹதசித்தஸ்ஸாதி அத்தோ². புஞ்ஞபாபபஹீனஸ்ஸாதி சதுத்த²மக்³கே³ன பஹீனபுஞ்ஞஸ்ஸ சேவ பஹீனபாபஸ்ஸ ச கீ²ணாஸவஸ்ஸ. நத்தி² ஜாக³ரதோ ப⁴யந்தி கீ²ணாஸவஸ்ஸ ஜாக³ரந்தஸ்ஸேவ அப⁴யபா⁴வோ கதி²தோ விய. ஸோ பன ஸத்³தா⁴தீ³ஹி பஞ்சஹி ஜாக³ரத⁴ம்மேஹி ஸமன்னாக³தத்தா ஜாக³ரோ நாம. தஸ்மா தஸ்ஸ ஜாக³ரந்தஸ்ஸாபி அஜாக³ரந்தஸ்ஸாபி கிலேஸப⁴யம் நத்தி² கிலேஸானம் அபச்சா²வத்தனதோ. ந ஹி தம் கிலேஸா அனுப³ந்த⁴ந்தி தேன தேன மக்³கே³ன பஹீனானம் கிலேஸானம் புன அனுபக³மனதோ. தேனேவாஹ – ‘‘ஸோதாபத்திமக்³கே³ன யே கிலேஸா பஹீனா, தே கிலேஸே ந புனேதி ந பச்சேதி ந பச்சாக³ச்ச²தி, ஸகதா³கா³மிஅனாகா³மிஅரஹத்தமக்³கே³ன யே கிலேஸா பஹீனா, தே கிலேஸே ந புனேதி ந பச்சேதி ந பச்சாக³ச்ச²தீ’’தி (சூளனி. மேத்தகூ³மாணவபுச்சா²னித்³தே³ஸ 27).

தே³ஸனா மஹாஜனஸ்ஸ ஸாத்தி²கா ஸப²லா அஹோஸி.

அதே²கதி³வஸம் பி⁴க்கூ² த⁴ம்மஸபா⁴யம் கத²ம் ஸமுட்டா²பேஸும் ‘‘பா⁴ரியா வதிமே, ஆவுஸோ, கிலேஸா நாம, ஏவரூபஸ்ஸ அரஹத்தஸ்ஸ உபனிஸ்ஸாயஸம்பன்னோ குலபுத்தோ கிலேஸேஹி ஆலோளிதோ ஸத்தவாரே கி³ஹீ ஹுத்வா ஸத்தவாரே பப்³ப³ஜிதோ’’தி. ஸத்தா² தேஸம் தம் கதா²பவத்திம் ஸுத்வா தங்க²ணானுரூபேன க³மனேன த⁴ம்மஸப⁴ம் க³ந்த்வா பு³த்³தா⁴ஸனே நிஸின்னோ ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா, ‘‘இமாய நாமா’’தி வுத்தே ஏவமேவ, பி⁴க்க²வே, கிலேஸா நாம பா⁴ரியா, ஸசே ஏதே ரூபினோ ஹுத்வா கத்த²சி பக்கி²பிதும் ஸக்கா ப⁴வேய்யும், சக்கவாளம் அதிஸம்பா³த⁴ம், ப்³ரஹ்மலோகோ அதினீசகோதி ஓகாஸோ நேஸம் ந ப⁴வேய்ய, மாதி³ஸம்பி நாமேதே பஞ்ஞாஸம்பன்னம் புரிஸாஜானேய்யம் ஆலோளேந்தி, அவஸேஸேஸு கா கதா²? ‘‘அஹஞ்ஹி அட்³ட⁴னாளிமத்தம் வரகசோரகம் குண்ட²குதா³லஞ்ச நிஸ்ஸாய ச² வாரே பப்³ப³ஜித்வா உப்பப்³ப³ஜிதபுப்³போ³’’தி. ‘‘கதா³, ப⁴ந்தே, கதா³ ஸுக³தா’’தி? ‘‘ஸுணிஸ்ஸத², பி⁴க்க²வே’’தி. ‘‘ஆம, ப⁴ந்தே’’தி. ‘‘தேன ஹி ஸுணாதா²’’தி அதீதம் ஆஹரி –

அதீதே பா³ராணஸியம் ப்³ரஹ்மத³த்தே ரஜ்ஜம் காரேந்தே குதா³லபண்டி³தோ நாம பா³ஹிரகபப்³ப³ஜ்ஜம் பப்³ப³ஜித்வா அட்ட² மாஸே ஹிமவந்தே வஸித்வா வஸ்ஸாரத்தஸமயே பூ⁴மியா திந்தாய ‘‘கே³ஹே மே அட்³ட⁴னாளிமத்தோ வரகசோரகோ ச குண்ட²குதா³லகோ ச அத்தி², வரகசோரகபீ³ஜம் மா நஸ்ஸீ’’தி உப்பப்³ப³ஜித்வா ஏகம் டா²னம் குதா³லேன கஸித்வா தம் பீ³ஜம் வபித்வா வதிம் கத்வா பக்ககாலே உத்³த⁴ரித்வா நாளிமத்தபீ³ஜம் ட²பேத்வா ஸேஸம் கா²தி³. ஸோ ‘‘கிம் மே தா³னி கே³ஹேன, புன அட்ட² மாஸே பப்³ப³ஜிஸ்ஸாமீ’’தி சிந்தேத்வா நிக்க²மித்வா பப்³ப³ஜி. இமினாவ நீஹாரேன நாளிமத்தம் வரகசோரகஞ்ச குண்ட²குதா³லஞ்ச நிஸ்ஸாய ஸத்தவாரே கி³ஹீ ஹுத்வா ஸத்தவாரே பப்³ப³ஜித்வா ஸத்தமே பன வாரே சிந்தேஸி – ‘‘அஹம் ச² வாரே இமம் குண்ட²குதா³லம் நிஸ்ஸாய கி³ஹீ ஹுத்வா பப்³ப³ஜிதோ, கத்த²சிதே³வ நம் ச²ட்³டே³ஸ்ஸாமீ’’தி. ஸோ க³ங்கா³ய தீரம் க³ந்த்வா, ‘‘பதிதட்டா²னம் பஸ்ஸந்தோ ஓதரித்வா க³ண்ஹேய்யம், யதா²ஸ்ஸ பதிதட்டா²னம் ந பஸ்ஸாமி, ததா² நம் ச²ட்³டே³ஸ்ஸாமீ’’தி சிந்தேத்வா நாளிமத்தம் பீ³ஜம் பிலோதிகாய ப³ந்தி⁴த்வா பிலோதிகம் குதா³லப²லகே ப³ந்தி⁴த்வா குதா³லம் அக்³க³த³ண்ட³கே க³ஹேத்வா க³ங்கா³ய தீரே டி²தோ அக்கீ²னி நிமீலேத்வா உபரிஸீஸே திக்க²த்தும் ஆவிஜ்ஜி²த்வா க³ங்கா³யம் கி²பித்வா நிவத்தித்வா ஓலோகேந்தோ பதிதட்டா²னம் அதி³ஸ்வா ‘‘ஜிதம் மே, ஜிதம் மே’’தி திக்க²த்தும் ஸத்³த³மகாஸி.

தஸ்மிம் க²ணே பா³ராணஸிராஜா பச்சந்தம் வூபஸமேத்வா ஆக³ந்த்வா நதீ³தீரே க²ந்தா⁴வாரம் நிவாஸேத்வா ந்ஹானத்தா²ய நதி³ம் ஓதிண்ணோ தம் ஸத்³த³ம் அஸ்ஸோஸி. ராஜூனஞ்ச நாம ‘‘ஜிதம் மே’’தி ஸத்³தோ³ அமனாபோ ஹோதி, ஸோ தஸ்ஸ ஸந்திகம் க³ந்த்வா, ‘‘அஹம் இதா³னி அமித்தமத்³த³னம் கத்வா ‘ஜிதம் மே’தி ஆக³தோ, த்வம் பன ‘ஜிதம் மே, ஜிதம் மே’தி விரவஸி, கிம் நாமேத’’ந்தி புச்சி². குதா³லபண்டி³தோ ‘‘த்வம் பா³ஹிரகசோரே ஜினி, தயா ஜிதம் புன அவஜிதமேவ ஹோதி, மயா பன அஜ்ஜ²த்திகோ லோப⁴சோரோ ஜிதோ, ஸோ புன மம் ந ஜினிஸ்ஸதி, தஸ்ஸேவ ஜயோ ஸாதூ⁴’’தி வத்வா இமம் கா³த²மாஹ –

‘‘ந தம் ஜிதம் ஸாது⁴ ஜிதம், யம் ஜிதம் அவஜீயதி;

தம் கோ² ஜிதம் ஸாது⁴ ஜிதம், யம் ஜிதம் நாவஜீயதீ’’தி. (ஜா. 1.1.70);

தம் க²ணம்யேவ ச க³ங்க³ம் ஓலோகேந்தோ ஆபோகஸிணம் நிப்³ப³த்தேத்வா அதி⁴க³தவிஸேஸோ ஆகாஸே பல்லங்கேன நிஸீதி³. ராஜா மஹாபுரிஸஸ்ஸ த⁴ம்மகத²ம் ஸுத்வா வந்தி³த்வா பப்³ப³ஜ்ஜம் யாசித்வா ஸத்³தி⁴ம் ப³லகாயேன பப்³ப³ஜி. யோஜனமத்தா பரிஸா அஹோஸி. அபரோபி ஸாமந்தராஜா தஸ்ஸ பப்³ப³ஜிதபா⁴வம் ஸுத்வா, ‘‘தஸ்ஸ ரஜ்ஜம் க³ண்ஹிஸ்ஸாமீ’’தி ஆக³ந்த்வா ததா² ஸமித்³த⁴ம் நக³ரம் ஸுஞ்ஞம் தி³ஸ்வா, ‘‘ஏவரூபம் நக³ரம் ச²ட்³டே³த்வா பப்³ப³ஜிதோ ராஜா ஓரகே டா²னே ந பப்³ப³ஜிஸ்ஸதி, மயாபி பப்³ப³ஜிதும் வட்டதீ’’தி சிந்தேத்வா தத்த² க³ந்த்வா மஹாபுரிஸம் உபஸங்கமித்வா பப்³ப³ஜ்ஜம் யாசித்வா ஸபரிவாரோ பப்³ப³ஜி. ஏதேனேவ நீஹாரேன ஸத்த ராஜானோ பப்³ப³ஜிம்ஸு. ஸத்தயோஜனிகோ அஸ்ஸமோ அஹோஸி. ஸத்த ராஜானோ போ⁴கே³ ச²ட்³டே³த்வா ஏத்தகம் ஜனம் க³ஹேத்வா பப்³ப³ஜிம்ஸு. மஹாபுரிஸோ ப்³ரஹ்மசரியவாஸம் வஸித்வா ப்³ரஹ்மலோகூபகோ³ அஹோஸி.

ஸத்தா² இமம் த⁴ம்மதே³ஸனம் ஆஹரித்வா, ‘‘அஹம், பி⁴க்க²வே, ததா³ குதா³லபண்டி³தோ அஹோஸிம், கிலேஸா நாமேதே ஏவம் பா⁴ரியா’’தி ஆஹ.

சித்தஹத்த²த்தே²ரவத்து² பஞ்சமம்.

6. பஞ்சஸதபி⁴க்கு²வத்து²

கும்பூ⁴பமந்தி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ ஆரத்³த⁴விபஸ்ஸகே பி⁴க்கூ² ஆரப்³ப⁴ கதே²ஸி.

ஸாவத்தி²யம் கிர பஞ்சஸதா பி⁴க்கூ² ஸத்து² ஸந்திகே யாவ அரஹத்தா கம்மட்டா²னம் க³ஹேத்வா, ‘‘ஸமணத⁴ம்மம் கரிஸ்ஸாமா’’தி யோஜனஸதமக்³க³ம் க³ந்த்வா ஏகம் மஹாவாஸகா³மம் அக³மம்ஸு. அத² தே மனுஸ்ஸா தி³ஸ்வா பஞ்ஞத்தாஸனே நிஸீதா³பேத்வா பணீதேஹி யாகு³ப⁴த்தாதீ³ஹி பரிவிஸித்வா, ‘‘கஹம், ப⁴ந்தே, க³ச்ச²தா²’’தி புச்சி²த்வா, ‘‘யதா²பா²ஸுகட்டா²ன’’ந்தி வுத்தே, ‘‘ப⁴ந்தே, இமம் தேமாஸம் இதே⁴வ வஸத², மயம்பி தும்ஹாகம் ஸந்திகே ஸரணேஸு பதிட்டா²ய பஞ்ச ஸீலானி ரக்கி²ஸ்ஸாமா’’தி யாசித்வா தேஸம் அதி⁴வாஸனம் விதி³த்வா, ‘‘அவிதூ³ரே டா²னே மஹந்தோ வனஸண்டோ³ அத்தி², ஏத்த² வஸத², ப⁴ந்தே’’தி வத்வா உய்யோஜேஸும். பி⁴க்கூ² தம் வனஸண்ட³ம் பவிஸிம்ஸு. தஸ்மிம் வனஸண்டே³ அதி⁴வத்தா² தே³வதா ‘‘ஸீலவந்தோ, அய்யா, இமம் வனஸண்ட³ம் அனுப்பத்தா, அயுத்தம் கோ² பன அஸ்மாகம் அய்யேஸு இத⁴ வஸந்தேஸு புத்ததா³ரே க³ஹேத்வா ருக்கே² அபி⁴ருய்ஹ வஸிது’’ந்தி ருக்க²தோ ஓதரித்வா பூ⁴மியம் நிஸீதி³த்வா சிந்தயிம்ஸு, ‘‘அய்யா, இமஸ்மிம் டா²னே அஜ்ஜேகரத்திம் வஸித்வா அத்³தா⁴ ஸ்வே க³மிஸ்ஸந்தீ’’தி. பி⁴க்கூ²பி புனதி³வஸே அந்தோகா³மே பிண்டா³ய சரித்வா புன தமேவ வனஸண்ட³ம் ஆக³மிம்ஸு. தே³வதா ‘‘பி⁴க்கு²ஸங்கோ⁴ ஸ்வாதனாய கேனசி நிமந்திதோ ப⁴விஸ்ஸதி, தஸ்மா புனாக³ச்ச²தி, அஜ்ஜ க³மனம் ந ப⁴விஸ்ஸதி, ஸ்வே க³மிஸ்ஸதி மஞ்ஞே’’தி இமினா உபாயேன அட்³ட⁴மாஸமத்தம் பூ⁴மியமேவ அச்சி²ம்ஸு.

ததோ சிந்தயிம்ஸு – ‘‘ப⁴த³ந்தா இமம் தேமாஸம் இதே⁴வ மஞ்ஞே வஸிஸ்ஸந்தி, இதே⁴வ கோ² பன இமேஸு வஸந்தேஸு அம்ஹாகம் ருக்கே² அபி⁴ருஹித்வா நிஸீதி³தும்பி ந யுத்தம், தேமாஸம் புத்ததா³ரே க³ஹேத்வா பூ⁴மியம் நிஸீத³னட்டா²னானிபி து³க்கா²னி, கிஞ்சி கத்வா இமே பி⁴க்கூ² பலாபேதும் வட்டதீ’’தி. தா தேஸு தேஸு ரத்திட்டா²னதி³வாட்டா²னேஸு சேவ சங்கமனகோடீஸு ச சி²ன்னஸீஸானி கப³ந்தா⁴னி த³ஸ்ஸேதும் அமனுஸ்ஸஸத்³த³ஞ்ச பா⁴வேதும் ஆரபி⁴ம்ஸு. பி⁴க்கூ²னம் கி²பிதகாஸாத³யோ ரோகா³ பவத்திம்ஸு. தே அஞ்ஞமஞ்ஞம் ‘‘துய்ஹம், ஆவுஸோ, கிம் ருஜ்ஜதீ’’தி புச்ச²ந்தா, ‘‘மய்ஹம் கி²பிதரோகோ³, மய்ஹம் காஸோ’’தி வத்வா, ‘‘ஆவுஸோ, அஹம் அஜ்ஜ சங்கமனகோடியம் சி²ன்னஸீஸம் அத்³த³ஸம், அஹம் ரத்திட்டா²னே கப³ந்த⁴ம் அத்³த³ஸம், அஹம் தி³வாட்டா²னே அமனுஸ்ஸஸத்³த³ம் அஸ்ஸோஸிம், பரிவஜ்ஜேதப்³ப³யுத்தகமித³ம் டா²னம், அம்ஹாகம் இத⁴ அபா²ஸுகம் அஹோஸி, ஸத்து² ஸந்திகம் க³மிஸ்ஸாமா’’தி நிக்க²மித்வா அனுபுப்³பே³ன ஸத்து² ஸந்திகம் க³ந்த்வா வந்தி³த்வா ஏகமந்தம் நிஸீதி³ம்ஸு.

அத² நே ஸத்தா² ஆஹ – ‘‘கிம், பி⁴க்க²வே, தஸ்மிம் டா²னே வஸிதும் ந ஸக்கி²ஸ்ஸதா²’’தி? ‘‘ஆம, ப⁴ந்தே, அம்ஹாகம் தஸ்மிம் டா²னே வஸந்தானம் ஏவரூபானி பே⁴ரவாரம்மணானி உபட்ட²ஹந்தி, ஏவரூபம் அபா²ஸுகம் ஹோதி, தேன மயம் ‘வஜ்ஜேதப்³ப³யுத்தகமித³ம் டா²ன’ந்தி தம் ச²ட்³டே³த்வா தும்ஹாகம் ஸந்திகம் ஆக³தா’’தி. ‘‘பி⁴க்க²வே, தத்தே²வ தும்ஹாகம் க³ந்தும் வட்டதீ’’தி. ‘‘ந ஸக்கா, ப⁴ந்தே’’தி. ‘‘பி⁴க்க²வே, தும்ஹே ஆவுத⁴ம் அக்³க³ஹேத்வா க³தா, இதா³னி ஆவுத⁴ம் க³ஹேத்வா க³ச்ச²தா²’’தி. ‘‘கதராவுத⁴ம், ப⁴ந்தே’’தி? ஸத்தா² ‘‘அஹம் ஆவுத⁴ம் வோ த³ஸ்ஸாமி, மயா தி³ன்னம் ஆவுத⁴ம் க³ஹேத்வா க³ச்ச²தா²’’தி வத்வா –

‘‘கரணீயமத்த²குஸலேன, யந்த ஸந்தம் பத³ம் அபி⁴ஸமேச்ச;

ஸக்கோ உஜூ ச ஸுஹுஜூ ச, ஸுவசோ சஸ்ஸ முது³ அனதிமானீ’’தி. (கு². பா. 9.1; ஸு. நி. 143) –

ஸகலம் மேத்தஸுத்தம் கதே²த்வா, ‘‘பி⁴க்க²வே, இமம் தும்ஹே ப³ஹி விஹாரஸ்ஸ வனஸண்ட³தோ பட்டா²ய ஸஜ்ஜா²யந்தா அந்தோவிஹாரம் பவிஸேய்யாதா²’’தி உய்யோஜேஸி. தே ஸத்தா²ரம் வந்தி³த்வா நிக்க²மித்வா அனுபுப்³பே³ன தம் டா²னம் பத்வா ப³ஹிவிஹாரே க³ணஸஜ்ஜா²யம் கத்வா ஸஜ்ஜா²யமானா வனஸண்ட³ம் பவிஸிம்ஸு. ஸகலவனஸண்டே³ தே³வதா மேத்தசித்தம் படிலபி⁴த்வா தேஸம் பச்சுக்³க³மனம் கத்வா பத்தசீவரபடிக்³க³ஹணம் ஆபுச்சி²ம்ஸு, ஹத்த²பாத³ஸம்பா³ஹனம் ஆபுச்சி²ம்ஸு, தேஸம் தத்த² தத்த² ஆரக்க²ம் ஸம்வித³ஹிம்ஸு, பக்கதூ⁴பனதேலம் விய ஸன்னிஸின்னா அஹேஸும். கத்த²சி அமனுஸ்ஸஸத்³தோ³ நாம நாஹோஸி. தேஸம் பி⁴க்கூ²னம் சித்தம் ஏகக்³க³ம் அஹோஸி. தே ரத்திட்டா²னதி³வாட்டா²னேஸு நிஸின்னா விபஸ்ஸனாய சித்தம் ஓதாரேத்வா அத்தனி க²யவயம் பட்ட²பேத்வா, ‘‘அயம் அத்தபா⁴வோ நாம பி⁴ஜ்ஜனகட்டே²ன அதா²வரட்டே²ன குலாலபா⁴ஜனஸதி³ஸோ’’தி விபஸ்ஸனம் வட்³ட⁴யிம்ஸு. ஸம்மாஸம்பு³த்³தோ⁴ க³ந்த⁴குடியா நிஸின்னோவ தேஸம் விபஸ்ஸனாய ஆரத்³த⁴பா⁴வம் ஞத்வா தே பி⁴க்கூ² ஆமந்தேத்வா, ‘‘ஏவமேவ, பி⁴க்க²வே, அயம் அத்தபா⁴வோ நாம பி⁴ஜ்ஜனகட்டே²ன அதா²வரட்டே²ன குலாலபா⁴ஜனஸதி³ஸோ ஏவா’’தி வத்வா ஓபா⁴ஸம் ப²ரித்வா யோஜனஸதே டி²தோபி அபி⁴முகே² நிஸின்னோ விய ச²ப்³ப³ண்ணரம்ஸியோ விஸ்ஸஜ்ஜேத்வா தி³ஸ்ஸமானேன ரூபேன இமம் கா³த²மாஹ –

40. ‘‘கும்பூ⁴பமம் காயமிம்ம விதி³த்வா, நக³ரூபமம் சித்தமித³ம் ட²பேத்வா;

யோதே⁴த² மாரம் பஞ்ஞாவுதே⁴ன, ஜிதஞ்ச ரக்கே² அனிவேஸனோ ஸியா’’தி.

தத்த² கும்பூ⁴பமந்தி அப³லது³ப்³ப³லட்டே²ன அனத்³த⁴னியதாவகாலிகட்டே²ன இமம் கேஸாதி³ஸமூஹஸங்கா²தம் காயம் கும்பூ⁴பமம் குலாலபா⁴ஜனஸதி³ஸம் விதி³த்வா. நக³ரூபமம் சித்தமித³ம் ட²பேத்வாதி நக³ரம் நாம ப³ஹித்³தா⁴ தி²ரம் ஹோதி, க³ம்பீ⁴ரபரிக²ம் பாகாரபரிக்கி²த்தம் த்³வாரட்டாலகயுத்தம், அந்தோஸுவிப⁴த்தவீதி²சதுக்கஸிங்கா⁴டகஸம்பன்னம் அந்தராபணம், தம் ‘‘விலும்பிஸ்ஸாமா’’தி ப³ஹித்³தா⁴ சோரா ஆக³ந்த்வா பவிஸிதும் அஸக்கோந்தா பப்³ப³தம் ஆஸஜ்ஜ படிஹதா விய க³ச்ச²ந்தி, ஏவமேவ பண்டி³தோ குலபுத்தோ அத்தனோ விபஸ்ஸனாசித்தம் தி²ரம் நக³ரஸதி³ஸம் கத்வா ட²பேத்வா நக³ரே டி²தோ ஏகதோதா⁴ராதி³னானப்பகாராவுதே⁴ன சோரக³ணம் விய விபஸ்ஸனாமயேன ச அரியமக்³க³மயேன ச பஞ்ஞாவுதே⁴ன தம்தம்மக்³க³வஜ்ஜ²ம் கிலேஸமாரம் படிபா³ஹந்தோ தம் தம் கிலேஸமாரம் யோதே⁴த², பஹரேய்யாதா²தி அத்தோ². ஜிதஞ்ச ரக்கே²தி ஜிதஞ்ச உப்பாதி³தம் தருணவிபஸ்ஸனம் ஆவாஸஸப்பாயஉதுஸப்பாயபோ⁴ஜனஸப்பாயபுக்³க³லஸப்பாயத⁴ம்மஸ்ஸவனஸப்பாயாதீ³னி ஆஸேவந்தோ அந்தரந்தரா ஸமாபத்திம் ஸமாபஜ்ஜித்வா ததோ வுட்டா²ய ஸுத்³த⁴சித்தேன ஸங்கா²ரே ஸம்மஸந்தோ ரக்கே²ய்ய.

அனிவேஸனோ ஸியாதி அனாலயோ ப⁴வேய்ய. யதா² நாம யோதோ⁴ ஸங்கா³மஸீஸே ப³லகோட்ட²கம் கத்வா அமித்தேஹி ஸத்³தி⁴ம் யுஜ்ஜ²ந்தோ சா²தோ வா பிபாஸிதோ வா ஹுத்வா ஸன்னாஹே வா ஸிதி²லே ஆவுதே⁴ வா பதிதே ப³லகோட்ட²கம் பவிஸித்வா விஸ்ஸமித்வா பு⁴ஞ்ஜித்வா பிவித்வா ஸன்னஹித்வா ஆவுத⁴ம் க³ஹேத்வா புன நிக்க²மித்வா யுஜ்ஜ²ந்தோ பரஸேனம் மத்³த³தி, அஜிதம் ஜினாதி, ஜிதம் ரக்க²தி. ஸோ ஹி ஸசே ப³லகோட்ட²கே டி²தோ ஏவம் விஸ்ஸமந்தோ தம் அஸ்ஸாதே³ந்தோ அச்சே²ய்ய, ரஜ்ஜம் பரஹத்த²க³தம் கரேய்ய, ஏவமேவ, பி⁴க்கு², படிலத்³த⁴ம் தருணவிபஸ்ஸனம் புனப்புனம் ஸமாபத்திம் ஸமாபஜ்ஜித்வா ததோ வுட்டா²ய ஸுத்³த⁴சித்தேன ஸங்கா²ரே ஸம்மஸந்தோ ரக்கி²தும் ஸக்கோதி, உத்தரிமக்³க³ப²லபடிலாபே⁴ன கிலேஸமாரம் ஜினாதி. ஸசே பன ஸோ ஸமாபத்திமேவ அஸ்ஸாதே³தி, ஸுத்³த⁴சித்தேன புனப்புனம் ஸங்கா²ரே ந ஸம்மஸதி, மக்³க³ப²லபடிவேத⁴ம் காதும் ந ஸக்கோதி. தஸ்மா ரக்கி²தப்³ப³யுத்தகம் ரக்க²ந்தோ அனிவேஸனோ ஸியா, ஸமாபத்திம் நிவேஸனம் கத்வா தத்த² ந நிவேஸேய்ய, ஆலயம் ந கரேய்யாதி அத்தோ². ‘‘அத்³தா⁴ தும்ஹேபி ஏவம் கரோதா²’’தி ஏவம் ஸத்தா² தேஸம் பி⁴க்கூ²னம் த⁴ம்மம் தே³ஸேஸி.

தே³ஸனாவஸானே பஞ்சஸதா பி⁴க்கூ² நிஸின்னட்டா²னே நிஸின்னாயேவ ஸஹ படிஸம்பி⁴தா³ஹி அரஹத்தம் பத்வா ததா²க³தஸ்ஸ ஸுவண்ணவண்ணம் ஸரீரம் வண்ணயந்தா தோ²மேந்தா வந்த³ந்தாவ ஆக³ச்சி²ம்ஸூதி.

பஞ்சஸதபி⁴க்கு²வத்து² ச²ட்ட²ம்.

7. பூதிக³த்ததிஸ்ஸத்தே²ரவத்து²

அசிரம் வதயம் காயோதி இமம் த⁴ம்மதே³ஸனம் ஸத்தா² ஸாவத்தி²யம் விஹரந்தோ பூதிக³த்ததிஸ்ஸத்தே²ரம் ஆரப்³ப⁴ கதே²ஸி.

ஏகோ கிர ஸாவத்தி²வாஸீ குலபுத்தோ ஸத்து² ஸந்திகே த⁴ம்மம் ஸுத்வா ஸாஸனே உரம் த³த்வா பப்³ப³ஜிதோ, ஸோ லத்³தூ⁴பஸம்பதோ³ திஸ்ஸத்தே²ரோ நாம அஹோஸி. க³ச்ச²ந்தே க³ச்ச²ந்தே காலே தஸ்ஸ ஸரீரே ரோகோ³ உத³பாதி³. ஸாஸபமத்தியோ பிளகா உட்ட²ஹிம்ஸு. தா அனுபுப்³பே³ன முக்³க³மத்தா கலாயமத்தா கோலட்டி²மத்தா ஆமலகமத்தா பே³ளுவஸலாடுமத்தா பே³ளுவமத்தா ஹுத்வா பபி⁴ஜ்ஜிம்ஸு, ஸகலஸரீரம் சி²த்³தா³வசி²த்³த³ம் அஹோஸி. பூதிக³த்ததிஸ்ஸத்தே²ரோத்வேவஸ்ஸ நாமம் உத³பாதி³. அத²ஸ்ஸ அபரபா⁴கே³ அட்டீ²னி பி⁴ஜ்ஜிம்ஸு. ஸோ அப்படிஜக்³கி³யோ அஹோஸி. நிவாஸனபாருபனம் புப்³ப³லோஹிதமக்கி²தம் ஜாலபூவஸதி³ஸம் அஹோஸி. ஸத்³தி⁴விஹாரிகாத³யோ படிஜக்³கி³தும் அஸக்கோந்தா ச²ட்³ட³யிம்ஸு. ஸோ அனாதோ² ஹுத்வா நிபஜ்ஜி.

பு³த்³தா⁴னஞ்ச நாம த்³வே வாரே லோகவோலோகனம் அவிஜஹிதம் ஹோதி. பச்சூஸகாலே லோகம் வோலோகேந்தா சக்கவாளமுக²வட்டிதோ பட்டா²ய க³ந்த⁴குடிஅபி⁴முக²ம் ஞாணம் கத்வா ஓலோகேந்தி, ஸாயம் ஓலோகேந்தா க³ந்த⁴குடிதோ பட்டா²ய பா³ஹிராபி⁴முக²ம் ஞாணம் கத்வா ஓலோகேந்தி. தஸ்மிம் பன ஸமயே ப⁴க³வதோ ஞாணஜாலஸ்ஸ அந்தோ பூதிக³த்ததிஸ்ஸத்தே²ரோ பஞ்ஞாயி. ஸத்தா² தஸ்ஸ பி⁴க்கு²னோ அரஹத்தஸ்ஸ உபனிஸ்ஸயம் தி³ஸ்வா, ‘‘அயம் ஸத்³தி⁴விஹாரிகாதீ³ஹி ச²ட்³டி³தோ, இதா³னிஸ்ஸ மம் ட²பேத்வா அஞ்ஞம் படிஸரணம் நத்தீ²’’தி க³ந்த⁴குடிதோ நிக்க²மித்வா விஹாரசாரிகம் சரமானோ விய அக்³கி³ஸாலம் க³ந்த்வா உக்க²லிம் தோ⁴வித்வா உத³கம் த³த்வா உத்³த⁴னம் ஆரோபேத்வா உத³கஸ்ஸ தத்தபா⁴வம் ஆக³மயமானோ அக்³கி³ஸாலாயமேவ அட்டா²ஸி. தத்தபா⁴வம் ஜானித்வா க³ந்த்வா தஸ்ஸ பி⁴க்கு²னோ நிபன்னமஞ்சகோடியம் க³ண்ஹி, ததா³ பி⁴க்கூ² ‘‘அபேத², ப⁴ந்தே, மயம் க³ண்ஹிஸ்ஸாமா’’தி மஞ்சகம் க³ஹேத்வா அக்³கி³ஸாலம் ஆனயிம்ஸு. ஸத்தா² அம்ப³ணம் ஆஹராபேத்வா உண்ஹோத³கம் ஆஸிஞ்சித்வா தேஹி பி⁴க்கூ²ஹி தஸ்ஸ பாருபனம் கா³ஹாபேத்வா உண்ஹோத³கே மத்³தா³பேத்வா மந்தா³தபே விஸ்ஸஜ்ஜாபேஸி. அத²ஸ்ஸ ஸந்திகே ட²த்வா ஸரீரம் உண்ஹோத³கேன தேமேத்வா க⁴ம்ஸித்வா ந்ஹாபேஸி, தஸ்ஸ நஹானபரியோஸானே பாருபனம் ஸுக்கி². அத² நம் தம் நிவாஸாபேத்வா நிவத்த²காஸாவம் உத³கே மத்³தா³பேத்வா ஆதபே விஸ்ஸஜ்ஜாபேஸி. அத²ஸ்ஸ க³த்தே உத³கே சி²ன்னமத்தே தம்பி ஸுக்கி². ஸோ ஏகம் காஸாவம் நிவாஸேத்வா ஏகம் பாருபித்வா ஸல்லஹுகஸரீரோ ஏகக்³க³சித்தோ மஞ்சகே நிபஜ்ஜி. ஸத்தா² தஸ்ஸ உஸ்ஸீஸகே ட²த்வா, ‘‘பி⁴க்கு² அயம் தவ காயோ அபேதவிஞ்ஞாணோ நிருபகாரோ ஹுத்வா கலிங்க³ரம் விய பத²வியம் ஸேஸ்ஸதீ’’தி வத்வா இமம் கா³த²மாஹ –

41. ‘‘அசிரம் வதயம் காயோ, பத²விம் அதி⁴ஸேஸ்ஸதி;

சு²த்³தோ⁴ அபேதவிஞ்ஞாணோ, நிரத்த²ம்வ கலிங்க³ர’’ந்தி.

தத்த² அசிரம் வதாதி பி⁴க்கு² ந சிரஸ்ஸேவ அயம் காயோ பத²விம் அதி⁴ஸேஸ்ஸதி, இமிஸ்ஸா பகதிஸயனேன ஸயிதாய பத²வியா உபரி ஸயிஸ்ஸதி. சு²த்³தோ⁴தி அபவித்³தோ⁴, அபக³தவிஞ்ஞாணதாய துச்சோ² ஹுத்வா ஸேஸ்ஸதீதி த³ஸ்ஸேதி. யதா² கிம்? நிரத்த²ம்வ கலிங்க³ரம் நிருபகாரம் நிரத்த²கம் கட்ட²க²ண்ட³ம் விய. த³ப்³ப³ஸம்பா⁴ரத்தி²கா ஹி மனுஸ்ஸா அரஞ்ஞம் பவிஸித்வா உஜுகம் உஜுகஸண்டா²னேன வங்கம் வங்கஸண்டா²னேன சி²ந்தி³த்வா த³ப்³ப³ஸம்பா⁴ரம் க³ண்ஹந்தி, அவஸேஸம் பன ஸுஸிரஞ்ச பூதிகஞ்ச அஸாரகஞ்ச க³ண்டி²ஜாதஞ்ச சி²ந்தி³த்வா தத்தே²வ ச²ட்³டே³ந்தி. அஞ்ஞே த³ப்³ப³ஸம்பா⁴ரத்தி²கா ஆக³ந்த்வா தம் க³ஹேதாரோ நாம நத்தி², ஓலோகேத்வா அத்தனோ உபகாரகமேவ க³ண்ஹந்தி, இதரம் பத²வீக³தமேவ ஹோதி. தம் பன தேன தேன உபாயேன மஞ்சபடிபாத³கம் வா பாத³கத²லிகம் வா ப²லகபீட²ம் வா காதும் ஸக்காபி ப⁴வேய்ய. இமஸ்மிம் பன அத்தபா⁴வே த்³வத்திம்ஸாய கோட்டா²ஸேஸு ஏககோட்டா²ஸோபி மஞ்சபடிபாத³காதி³வஸேன அஞ்ஞேன வா உபகாரமுகே²ன க³ய்ஹூபகோ³ நாம நத்தி², கேவலம் நிரத்த²ம்வ கலிங்க³ரம் அயம் காயோ அபக³தவிஞ்ஞாணோ கதிபாஹேனேவ பத²வியம் ஸேஸ்ஸதீதி.

தே³ஸனாவஸானே பூதிக³த்ததிஸ்ஸத்தே²ரோ ஸஹ படிஸம்பி⁴தா³ஹி அரஹத்தம் பாபுணி, அஞ்ஞேபி ப³ஹூ ஸோதாபன்னாத³யோ அஹேஸும். தே²ரோபி அரஹத்தம் பத்வாவ பரினிப்³பா³யி. ஸத்தா² தஸ்ஸ ஸரீரகிச்சம் காராபேத்வா தா⁴துயோ க³ஹேத்வா சேதியம் காராபேஸி. பி⁴க்கூ² ஸத்தா²ரம் புச்சி²ம்ஸு – ‘‘ப⁴ந்தே, பூதிக³த்ததிஸ்ஸத்தே²ரோ குஹிம் நிப்³ப³த்தோ’’தி. ‘‘பரினிப்³பு³தோ, பி⁴க்க²வே’’தி. ‘‘ப⁴ந்தே, ஏவரூபஸ்ஸ பன அரஹத்தூபனிஸ்ஸயஸம்பன்னஸ்ஸ பி⁴க்கு²னோ கிம் காரணா க³த்தம் புதிகம் ஜாதம், கிம் காரணா அட்டீ²னி பி⁴ன்னானி, கிமஸ்ஸ காரணம் அரஹத்தஸ்ஸ உபனிஸ்ஸயபா⁴வம் பத்த’’ந்தி? ‘‘பி⁴க்க²வே, ஸப்³ப³மேதம் ஏதஸ்ஸ அத்தனா கதகம்மேனேவ நிப்³ப³த்த’’ந்தி. ‘‘கிம் பன தேன, ப⁴ந்தே, கத’’ந்தி? ‘‘தேன ஹி, பி⁴க்க²வே, ஸுணாதா²’’தி அதீதம் ஆஹரி –

அயம் கஸ்ஸபஸம்மாஸம்பு³த்³த⁴காலே ஸாகுணிகோ ஹுத்வா ப³ஹூ ஸகுணே வதி⁴த்வா இஸ்ஸரஜனம் உபட்ட²ஹி. தேஸம் தி³ன்னாவஸேஸே விக்கிணாதி, ‘‘விக்கிதாவஸேஸா மாரேத்வா ட²பிதா பூதிகா ப⁴விஸ்ஸந்தீ’’தி யதா² உப்பதிதும் ந ஸக்கோந்தி, ததா² தேஸம் ஜங்க⁴ட்டீ²னி ச பக்க²ட்டீ²னி ச பி⁴ந்தி³த்வா ராஸிம் கத்வா ட²பேதி, தே புனதி³வஸே விக்கிணாதி. அதிப³ஹூனம் பன லத்³த⁴காலே அத்தனோபி அத்தா²ய பசாபேதி. தஸ்ஸேகதி³வஸம் ரஸபோ⁴ஜனே பக்கே ஏகோ கீ²ணாஸவோ பிண்டா³ய சரந்தோ கே³ஹத்³வாரே அட்டா²ஸி. ஸோ தே²ரம் தி³ஸ்வா சித்தம் பஸாதே³த்வா, ‘‘மயா ப³ஹூ பாணா மாரேத்வா கா²தி³தா, அய்யோ ச மே கே³ஹத்³வாரே டி²தோ, அந்தோகே³ஹே ச ரஸபோ⁴ஜனம் ஸம்விஜ்ஜதி, பிண்ட³பாதமஸ்ஸ த³ஸ்ஸாமீ’’தி தஸ்ஸ பத்தம் ஆதா³ய பூரேத்வா ரஸபிண்ட³பாதம் த³த்வா தே²ரம் பஞ்சபதிட்டி²தேன வந்தி³த்வா, ‘‘ப⁴ந்தே, தும்ஹேஹி தி³ட்ட²த⁴ம்மஸ்ஸ மத்த²கம் பாபுணேய்ய’’ந்தி ஆஹ. தே²ரோ ‘‘ஏவம் ஹோதூ’’தி அனுமோத³னம் அகாஸி. ‘‘பி⁴க்க²வே, ததா³ கதகம்மவஸேனேதம் திஸ்ஸஸ்ஸ நிப்ப²ன்னம், ஸகுணானம் அட்டி²பே⁴த³னனிஸ்ஸந்தே³ன திஸ்ஸஸ்ஸ க³த்தஞ்ச பூதிகம் ஜாதம், அட்டீ²னி ச பி⁴ன்னானி, கீ²ணாஸவஸ்ஸ ரஸபிண்ட³பாததா³னனிஸ்ஸந்தே³ன அரஹத்தம் பத்தோ’’தி.

பூதிக³த்ததிஸ்ஸத்தே²ரவத்து² ஸத்தமம்.

8. நந்த³கோ³பாலகவத்து²

தி³ஸோ தி³ஸந்தி இமம் த⁴ம்மதே³ஸனம் ஸத்தா² கோஸலஜனபதே³ நந்த³கோ³பாலகம் ஆரப்³ப⁴ கதே²ஸி.

ஸாவத்தி²யம் கிர அனாத²பிண்டி³கஸ்ஸ க³ஹபதினோ நந்தோ³ நாம கோ³பாலகோ கோ³யூத²ம் ரக்க²தி அட்³டோ⁴ மஹத்³த⁴னோ மஹாபோ⁴கோ³. ஸோ கிர யதா² கேணியோ ஜடிலோ பப்³ப³ஜ்ஜாவேஸேன, ஏவம் கோ³பாலகத்தேன ராஜப³லிம் பரிஹரந்தோ அத்தனோ குடும்ப³ம் ரக்க²தி. ஸோ காலேன காலம் பஞ்ச கோ³ரஸே ஆதா³ய அனாத²பிண்டி³கஸ்ஸ ஸந்திகம் ஆக³ந்த்வா ஸத்தா²ரம் பஸ்ஸதி, த⁴ம்மம் ஸுணாதி, அத்தனோ வஸனட்டா²னம் ஆக³மனத்தா²ய ஸத்தா²ரம் யாசதி. ஸத்தா² தஸ்ஸ ஞாணபரிபாகம் ஆக³மயமானோ ஆக³ந்த்வா பரிபக்கபா⁴வம் ஞத்வா ஏகதி³வஸம் மஹாபி⁴க்கு²ஸங்க⁴பரிவுதோ சாரிகம் சரந்தோ மக்³கா³ ஓக்கம்ம தஸ்ஸ வஸனட்டா²னாஸன்னே அஞ்ஞதரஸ்மிம் ருக்க²மூலே நிஸீதி³. நந்தோ³ ஸத்து² ஸந்திகம் அக³ந்த்வா வந்தி³த்வா படிஸந்தா²ரம் கத்வா ஸத்தா²ரம் நிமந்தேத்வா ஸத்தா²ஹம் பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ பணீதம் பஞ்சகோ³ரஸதா³னம் அதா³ஸி. ஸத்தமே தி³வஸே ஸத்தா² அனுமோத³னம் கத்வா தா³னகதா²தி³பே⁴த³ம் அனுபுப்³பி³ம் கத²ம் கதே²ஸி. கதா²பரியோஸானே நந்த³கோ³பாலகோ ஸோதாபத்திப²லே பதிட்டா²ய ஸத்து² பத்தம் க³ஹேத்வா ஸத்தா²ரம் அனுக³ச்ச²ந்தோ தூ³ரம் க³ந்த்வா, ‘‘திட்ட², உபாஸகா’’தி நிவத்தியமானோ வந்தி³த்வா நிவத்தி. அத² நம் ஏகோ லுத்³த³கோ விஜ்ஜி²த்வா மாரேஸி. பச்ச²தோ ஆக³ச்ச²ந்தா பி⁴க்கூ² நம் தி³ஸ்வா க³ந்த்வா ஸத்தா²ரம் ஆஹம்ஸு – ‘‘நந்தோ³, ப⁴ந்தே, கோ³பாலகோ தும்ஹாகம் இதா⁴க³தத்தா மஹாதா³னம் த³த்வா அனுக³ந்த்வா நிவத்தேந்தோ மாரிதோ, ஸசே தும்ஹே நாக³ச்சி²ஸ்ஸத², நாஸ்ஸ மரணம் அப⁴விஸ்ஸா’’தி. ஸத்தா², ‘‘பி⁴க்க²வே, மயி ஆக³தேபி அனாக³தேபி தஸ்ஸ சதஸ்ஸோ தி³ஸா சதஸ்ஸோ அனுதி³ஸா ச க³ச்ச²ந்தஸ்ஸாபி மரணதோ முச்சனூபாயோ நாம நத்தி². யஞ்ஹி நேவ சோரா, ந வேரினோ கரோந்தி, தம் இமேஸம் ஸத்தானம் அந்தோபது³ட்ட²ம் மிச்சா²பணிஹிதம் சித்தமேவ கரோதீ’’தி வத்வா இமம் கா³த²மாஹ –

42. ‘‘தி³ஸோ தி³ஸம் யம் தம் கயிரா, வேரீ வா பன வேரினம்;

மிச்சா²பணிஹிதம் சித்தம், பாபியோ நம் ததோ கரே’’தி.

தத்த² தி³ஸோ தி³ஸந்தி சோரோ சோரம். ‘‘தி³ஸ்வா’’தி பாட²ஸேஸோ. யம் தம் கயிராதி யம் தம் தஸ்ஸ அனயப்³யஸனம் கரேய்ய. து³தியபதே³பி ஏஸேவ நயோ. இத³ம் வுத்தம் ஹோதி – ஏகோ ஏகஸ்ஸ மித்தது³ப்³பீ⁴ சோரோ புத்ததா³ரகே²த்தவத்து² கோ³மஹிம்ஸாதீ³ஸு அபரஜ்ஜ²ந்தோ யஸ்ஸ அபரஜ்ஜ²தி, தம்பி ததே²வ அத்தனி அபரஜ்ஜ²ந்தம் சோரம் தி³ஸ்வா, வேரி வா பன கேனசிதே³வ காரணேன ப³த்³த⁴வேரம் வேரிம் தி³ஸ்வா அத்தனோ கக்க²ளதாய தா³ருணதாய யம் தம் தஸ்ஸ அனயப்³யஸனம் கரேய்ய, புத்ததா³ரம் வா பீளேய்ய, கே²த்தாதீ³னி வா நாஸேய்ய, ஜீவிதா வா பன நம் வோரோபேய்ய, த³ஸஸு அகுஸலகம்மபதே²ஸு மிச்சா²ட²பிதத்தா மிச்சா²பஹிணிதம் சித்தம் பாபியோ நம் ததோ கரே தம் புரிஸம் ததோ பாபதரம் கரேய்ய. வுத்தப்பகாரேஹி, தி³ஸோ தி³ஸஸ்ஸ வா வேரீ வேரினோ வா இமஸ்மிம்யேவ அத்தபா⁴வே து³க்க²ம் வா உப்பாதே³ய்ய, ஜீவிதக்க²யம் வா கரேய்ய. இத³ம் பன அகுஸலகம்மபதே²ஸு மிச்சா²ட²பிதம் சித்தம் தி³ட்டே²வ த⁴ம்மே அனயப்³யஸனம் பாபேதி, அத்தபா⁴வஸதஸஹஸ்ஸேஸுபி சதூஸு அபாயேஸு கி²பித்வா ஸீஸம் உக்கி²பிதும் ந தே³தீதி.

தே³ஸனாபரியோஸானே ப³ஹூ ஸோதாபத்திப²லாதீ³னி பத்தா. மஹாஜனஸ்ஸ ஸாத்தி²கா தே³ஸனா ஜாதா. உபாஸகேன பன ப⁴வந்தரே கதகம்மம் பி⁴க்கூ²ஹி ந புச்சி²தம், தஸ்மா ஸத்தா²ரா ந கதி²தந்தி.

நந்த³கோ³பாலகவத்து² அட்ட²மம்.

9. ஸோரேய்யத்தே²ரவத்து²

ந தம் மாதா பிதா கயிராதி இமம் த⁴ம்மதே³ஸனம் ஸத்தா² ஸாவத்தி²யம் ஜேதவனே விஹரந்தோ ஸோரேய்யத்தே²ரம் ஆரப்³ப⁴ கதே²ஸி.

வத்து² ஸோரேய்யனக³ரே ஸமுட்டி²தம், ஸாவத்தி²யம் நிட்டா²பேஸி. ஸம்மாஸம்பு³த்³தே⁴ ஸாவத்தி²யம் விஹரந்தே ஸோரேய்யனக³ரே ஸோரேய்யஸேட்டி²புத்தோ ஏகேன ஸஹாயகேன ஸத்³தி⁴ம் ஸுக²யானகே நிஸீதி³த்வா மஹந்தேன பரிவாரேன ந்ஹானத்தா²ய நக³ரா நிக்க²மி. தஸ்மிம் க²ணே மஹாகச்சாயனத்தே²ரோ ஸோரேய்யனக³ரம் பிண்டா³ய பவிஸிதுகாமோ ஹுத்வா ப³ஹினக³ரே ஸங்கா⁴டிம் பாருபதி. தே²ரஸ்ஸ ச ஸுவண்ணவண்ணம் ஸரீரம். ஸோரேய்யஸேட்டி²புத்தோ தம் தி³ஸ்வா சிந்தேஸி – ‘‘அஹோ வத அயம் வா தே²ரோ மம ப⁴ரியா ப⁴வேய்ய, மம வா ப⁴ரியாய ஸரீரவண்ணோ ஏதஸ்ஸ ஸரீரவண்ணோ விய ப⁴வேய்யா’’தி. தஸ்ஸ சிந்திதமத்தேயேவ புரிஸலிங்க³ம் அந்தரதா⁴யி, இத்தி²லிங்க³ம் பாதுரஹோஸி. ஸோ லஜ்ஜமானோ யானகா ஓருய்ஹ பலாயி. பரிஜனோ தம் அஸஞ்ஜானந்தோ ‘‘கிமேத’’ந்தி ஆஹ. ஸாபி தக்கஸிலமக்³க³ம் படிபஜ்ஜி. ஸஹாயகோபிஸ்ஸா இதோ சிதோ ச விசரித்வாபி நாத்³த³ஸ. ஸப்³பே³ ந்ஹாயித்வா கே³ஹம் அக³மிம்ஸு. ‘‘கஹம் ஸேட்டி²புத்தோ’’தி ச வுத்தே, ‘‘ந்ஹத்வா ஆக³தோ ப⁴விஸ்ஸதீதி மஞ்ஞிம்ஹா’’தி வதி³ம்ஸு. அத²ஸ்ஸ மாதாபிதரோ தத்த² தத்த² பரியேஸித்வா அபஸ்ஸந்தா ரோதி³த்வா பரிதே³வித்வா, ‘‘மதோ ப⁴விஸ்ஸதீ’’தி மதகப⁴த்தம் அத³ம்ஸு. ஸா ஏகம் தக்கஸிலகா³மிம் ஸத்த²வாஹம் தி³ஸ்வா யானகஸ்ஸ பச்ச²தோ பச்ச²தோ அனுப³ந்தி⁴.

அத² நம் மனுஸ்ஸா தி³ஸ்வா, ‘‘அம்ஹாகம் யானகஸ்ஸ பச்ச²தோ பச்ச²தோ அனுக³ச்ச²தி, மயம் ‘கஸ்ஸேஸா தா³ரிகா’தி தம் ந ஜானாமா’’தி வதி³ம்ஸு. ஸாபி ‘‘தும்ஹே அத்தனோ யானகம் பாஜேத², அஹம் பத³ஸா க³மிஸ்ஸாமீ’’தி க³ச்ச²ந்தீ அங்கு³லிமுத்³தி³கம் த³த்வா ஏகஸ்மிம் யானகே ஓகாஸம் காரேஸி. மனுஸ்ஸா சிந்தயிம்ஸு – ‘‘தக்கஸிலனக³ரே அம்ஹாகம் ஸேட்டி²புத்தஸ்ஸ ப⁴ரியா நத்தி², தஸ்ஸ ஆசிக்கி²ஸ்ஸாம, மஹாபண்ணாகாரோ நோ ப⁴விஸ்ஸதீ’’தி. தே கே³ஹம் க³ந்த்வா, ‘‘ஸாமி, அம்ஹேஹி தும்ஹாகம் ஏகம் இத்தி²ரதனம் ஆனீத’’ந்தி ஆஹம்ஸு. ஸோ தம் ஸுத்வா தம் பக்கோஸாபேத்வா அத்தனோ வயானுரூபம் அபி⁴ரூபம் பாஸாதி³கம் தி³ஸ்வா உப்பன்னஸினேஹோ கே³ஹே அகாஸி. புரிஸா ஹி இத்தி²யோ, இத்தி²யோ வா புரிஸா அபூ⁴தபுப்³பா³ நாம நத்தி². புரிஸா ஹி பரஸ்ஸ தா³ரேஸு அதிசரித்வா காலம் கத்வா ப³ஹூனி வஸ்ஸஸதஸஹஸ்ஸானி நிரயே பச்சித்வா மனுஸ்ஸஜாதிம் ஆக³ச்ச²ந்தா அத்தபா⁴வஸதே இத்தி²பா⁴வம் ஆபஜ்ஜந்தி.

ஆனந்த³த்தே²ரோபி கப்பஸதஸஹஸ்ஸம் பூரிதபாரமீ அரியஸாவகோ ஸம்ஸாரே ஸம்ஸரந்தோ ஏகஸ்மிம் அத்தபா⁴வே கம்மாரகுலே நிப்³ப³த்தோ. பரதா³ரகம்மம் கத்வா நிரயே பச்சித்வா பக்காவஸேஸேன சுத்³த³ஸஸு அத்தபா⁴வேஸு புரிஸஸ்ஸ பாத³பரிசாரிகா இத்தீ² அஹோஸி, ஸத்தஸு அத்தபா⁴வேஸு பீ³ஜுத்³த⁴ரணம் பாபுணி. இத்தி²யோ பன தா³னாதீ³னி புஞ்ஞானி கத்வா இத்தி²பா⁴வே ச²ந்த³ம் விராஜேத்வா, ‘‘இத³ம் நோ புஞ்ஞம் புரிஸத்தபா⁴வபடிலாபா⁴ய ஸம்வத்ததூ’’தி சித்தம் அதி⁴ட்ட²ஹித்வா காலம் கத்வா புரிஸத்தபா⁴வம் படிலப⁴ந்தி, பதிதே³வதா ஹுத்வா ஸாமிகே ஸம்மாபடிபத்திவஸேனாபி புரிஸத்தபா⁴வம் படிலப⁴ந்தேவ.

அயம் பன ஸேட்டி²புத்தோ தே²ரே அயோனிஸோ சித்தம் உப்பாதே³த்வா இமஸ்மிம்யேவ அத்தபா⁴வே இத்தி²பா⁴வம் படிலபி⁴. தக்கஸிலாயம் ஸேட்டி²புத்தேன ஸத்³தி⁴ம் ஸம்வாஸமன்வாய பன தஸ்ஸா குச்சி²யம் க³ப்³போ⁴ பதிட்டா²ஸி. ஸா த³ஸமாஸச்சயேன புத்தம் லபி⁴த்வா தஸ்ஸ பத³ஸா க³மனகாலே அபரம்பி புத்தம் படிலபி⁴. ஏவமஸ்ஸா குச்சி²யம் வுத்தா² த்³வே, ஸோரேய்யனக³ரே தம் படிச்ச நிப்³ப³த்தா த்³வேதி சத்தாரோ புத்தா அஹேஸும். தஸ்மிம் காலே ஸோரேய்யனக³ரதோ தஸ்ஸா ஸஹாயகோ ஸேட்டி²புத்தோ பஞ்சஹி ஸகடஸதேஹி தக்கஸிலம் க³ந்த்வா ஸுக²யானகே நிஸின்னோ நக³ரம் பாவிஸி. அத² நம் ஸா உபரிபாஸாத³தலே வாதபானம் விவரித்வா அந்தரவீதி²ம் ஓலோகயமானா டி²தா தி³ஸ்வா ஸஞ்ஜானித்வா தா³ஸிம் பேஸேத்வா பக்கோஸாபேத்வா மஹாதலே நிஸீதா³பேத்வா மஹந்தம் ஸக்காரஸம்மானம் அகாஸி. அத² நம் ஸோ ஆஹ – ‘‘ப⁴த்³தே³, த்வம் இதோ புப்³பே³ அம்ஹேஹி ந தி³ட்ட²புப்³பா³, அத² ச பன நோ மஹந்தம் ஸக்காரம் கரோஸி, ஜானாஸி த்வம் அம்ஹே’’தி. ‘‘ஆம, ஸாமி, ஜானாமி, நனு தும்ஹே ஸோரேய்யனக³ரவாஸினோ’’தி? ‘‘ஆம, ப⁴த்³தே³’’தி. ஸா மாதாபிதூனஞ்ச ப⁴ரியாய ச புத்தானஞ்ச அரோக³பா⁴வம் புச்சி². இதரோ ‘‘ஆம, ப⁴த்³தே³, அரோகா³’’தி வத்வா ‘‘ஜானாஸி த்வம் ஏதே’’தி ஆஹ. ‘‘ஆம ஸாமி, ஜானாமி. தேஸம் ஏகோ புத்தோ அத்தி², ஸோ கஹம், ஸாமீ’’தி? ‘‘ப⁴த்³தே³, மா ஏதம் கதே²ஹி, மயம் தேன ஸத்³தி⁴ம் ஏகதி³வஸம் ஸுக²யானகே நிஸீதி³த்வா ந்ஹாயிதும் நிக்க²ந்தா நேவஸ்ஸ க³திம் ஜானாம, இதோ சிதோ ச விசரித்வா தம் அதி³ஸ்வா மாதாபிதூனம் ஆரோசயிம்ஹா, தேபிஸ்ஸ ரோதி³த்வா கந்தி³த்வா பேதகிச்சம் கிரிம்ஸூ’’தி. ‘‘அஹம் ஸோ, ஸாமீ’’தி. ‘‘அபேஹி, ப⁴த்³தே³, கிம் கதே²ஸி மய்ஹம் ஸஹாயோ தே³வகுமாரோ விய ஏகோ புரிஸோ’’தி? ‘‘ஹோது, ஸாமி, அஹம் ஸோ’’தி. ‘‘அத² இத³ம் கிம் நாமா’’தி? ‘‘தம் தி³வஸம் தே அய்யோ மஹாகச்சாயனத்தே²ரோ தி³ட்டோ²’’தி? ‘‘ஆம, தி³ட்டோ²’’தி. அஹம் அய்யம் மஹாகச்சாயனத்தே²ரம் ஓலோகேத்வா, ‘‘அஹோ வத அயம் வா தே²ரோ மம ப⁴ரியா ப⁴வேய்ய, ஏதஸ்ஸ வா ஸரீரவண்ணோ விய மம ப⁴ரியாய ஸரீரவண்ணோ ப⁴வேய்யா’’தி சிந்தேஸிம். சிந்திதக்க²ணேயேவ மே புரிஸலிங்க³ம் அந்தரதா⁴யி, இத்தி²லிங்க³ம் பாதுப⁴வி. அதா²ஹம் லஜ்ஜமானா கஸ்ஸசி கிஞ்சி வத்தும் அஸக்குணித்வா ததோ பலாயித்வா இதா⁴க³தா, ஸாமீதி.

‘‘அஹோ வத தே பா⁴ரியம் கம்மம் கதம், கஸ்மா மய்ஹம் நாசிக்கி², அபிச பன தே தே²ரோ க²மாபிதோ’’தி? ‘‘ந க²மாபிதோ, ஸாமி. ஜானாஸி பன த்வம் கஹம் தே²ரோ’’தி? ‘‘இமமேவ நக³ரம் உபனிஸ்ஸாய விஹரதீ’’தி. ‘‘ஸசே பிண்டா³ய சரந்தோ இதா⁴க³ச்சே²ய்ய, அஹம் மம அய்யஸ்ஸ பி⁴க்கா²ஹாரம் த³தே³ய்யம், ஸாமீ’’தி. ‘‘தேன ஹி ஸீக⁴ம் ஸக்காரம் கரோஹி, அம்ஹாகம் அய்யம் க²மாபேஸ்ஸாமா’’தி ஸோ தே²ரஸ்ஸ வஸனட்டா²னம் க³ந்த்வா வந்தி³த்வா ஏகமந்தம் நிஸின்னோ, ‘‘ப⁴ந்தே, ஸ்வே மய்ஹம் பி⁴க்க²ம் க³ண்ஹதா²’’தி ஆஹ. ‘‘நனு த்வம், ஸேட்டி²புத்த, ஆக³ந்துகோஸீ’’தி. ‘‘ப⁴ந்தே, மா அம்ஹாகம் ஆக³ந்துகபா⁴வம் புச்ச²த², ஸ்வே மே பி⁴க்க²ம் க³ண்ஹதா²’’தி. தே²ரோ அதி⁴வாஸேஸி, கே³ஹேபி தே²ரஸ்ஸ மஹாஸக்காரோ படியத்தோ. தே²ரோ புனதி³வஸே தம் கே³ஹத்³வாரம் அக³மாஸி. அத² நம் நிஸீதா³பேத்வா பணீதேனாஹாரேன பரிவிஸித்வா ஸேட்டி²புத்தோ தம் இத்தி²ம் க³ஹேத்வா தே²ரஸ்ஸ பாத³மூலே நிபஜ்ஜாபேத்வா, ‘‘ப⁴ந்தே, மய்ஹம் ஸஹாயிகாய க²மதா²’’தி ஆஹ. ‘‘கிமேத’’ந்தி? ‘‘அயம், ப⁴ந்தே, புப்³பே³ மய்ஹம் பியஸஹாயகோ ஹுத்வா தும்ஹே ஓலோகேத்வா ஏவம் நாம சிந்தேஸி, அத²ஸ்ஸ புரிஸலிங்க³ம் அந்தரதா⁴யி, இத்தி²லிங்க³ம் பாதுப⁴வி, க²மத², ப⁴ந்தே’’தி. ‘‘தேன ஹி உட்ட²ஹத², க²மாமி வோ அஹ’’ந்தி. தே²ரேன ‘‘க²மாமீ’’தி வுத்தமத்தேயேவ இத்தி²லிங்க³ம் அந்தரதா⁴யி, புரிஸலிங்க³ம் பாதுப⁴வி.

புரிஸலிங்கே³ பாதுபூ⁴தமத்தேயேவ தம் தக்கஸிலாய ஸேட்டி²புத்தோ ஆஹ – ‘‘ஸம்ம ஸஹாயக, இமே த்³வே தா³ரகா தவ குச்சி²யம் வுத்த²த்தா மம் படிச்ச நிப்³ப³த்தத்தா உபி⁴ன்னம்பினோ புத்தா ஏவ, இதே⁴வ வஸிஸ்ஸாம, மா உக்கண்டீ²’’தி. ‘‘ஸம்ம, அஹம் ஏகேனத்தபா⁴வேன பட²மம் புரிஸோ ஹுத்வா இத்தி²பா⁴வம் பத்வா புன புரிஸோ ஜாதோதி விப்பகாரப்பத்தோ, பட²மம் மம் படிச்ச த்³வே புத்தா நிப்³ப³த்தா, இதா³னி மே குச்சி²தோ த்³வே புத்தா நிக்க²ந்தா, ஸ்வாஹம் ஏகேனத்தபா⁴வேன விப்பகாரப்பத்தோ, புன ‘கே³ஹே வஸிஸ்ஸதீ’தி ஸஞ்ஞம் மா கரி, அஹம் மம அய்யஸ்ஸ ஸந்திகே பப்³ப³ஜிஸ்ஸாமி. இமே த்³வே தா³ரகா தவ பா⁴ராதி, இமேஸு மா பமஜ்ஜீ’’தி வத்வா புத்தே ஸீஸே பரிசும்பி³த்வா பரிமஜ்ஜித்வா உரே நிபஜ்ஜாபேத்வா பிது நிய்யாதே³த்வா நிக்க²மித்வா தே²ரஸ்ஸ ஸந்திகே பப்³ப³ஜ்ஜம் யாசி. தே²ரோபி நம் பப்³பா³ஜேத்வா உபஸம்பாதே³த்வா க³ண்ஹித்வாவ சாரிகம் சரமானோ அனுபுப்³பே³ன ஸாவத்தி²ம் அக³மாஸி. தஸ்ஸ ஸோரேய்யத்தே²ரோதி நாமம் அஹோஸி. ஜனபத³வாஸினோ தம் பவத்திம் ஞத்வா ஸங்கு²பி⁴த்வா கோதூஹலஜாதா தம் உபஸங்கமித்வா புச்சி²ம்ஸு – ‘‘ஏவம் கிர, ப⁴ந்தே’’தி? ‘‘ஆம, ஆவுஸோ’’தி. ‘‘ப⁴ந்தே, ஏவரூபம்பி காரணம் நாம ஹோதி’’? ‘‘தும்ஹாகம் குச்சி²யம் கிர த்³வே புத்தா நிப்³ப³த்தா, தும்ஹே படிச்ச த்³வே ஜாதா, தேஸம் வோ கதரேஸு ப³லவஸினேஹோ ஹோதீ’’தி? ‘‘குச்சி²யம் வுத்த²கேஸு, ஆவுஸோ’’தி. ஆக³தாக³தா நிப³த்³த⁴ம் ததே²வ புச்சி²ம்ஸு.

தே²ரோ ‘‘குச்சி²யம் வுத்தகேஸு ஏவ ஸினேஹோ ப³லவா’’தி புனப்புனம் கதே²ந்தோ ஹராயமானோ ஏகோவ நிஸீத³தி, ஏகோவ திட்ட²தி. ஸோ ஏவம் ஏகத்தூபக³தோ அத்தபா⁴வே க²யவயம் ஸமுட்டா²பேத்வா ஸஹ படிஸம்பி⁴தா³ஹி அரஹத்தம் பாபுணி. அத² நம் ஆக³தாக³தா புச்ச²ந்தி – ‘‘ப⁴ந்தே, ஏவம் கிர நாம அஹோஸீ’’தி? ‘‘ஆமாவுஸோ’’தி. ‘‘கதரேஸு ஸினேஹோ ப³லவா’’தி? ‘‘மய்ஹம் கத்த²சி ஸினேஹோ நாம நத்தீ²’’தி. பி⁴க்கூ² ‘‘அயம் அபூ⁴தம் கதே²ஸி, புரிமதி³வஸேஸு ‘குச்சி²யம் வுத்த²புத்தேஸு ஸினேஹோ ப³லவா’தி வத்வா இதா³னி ‘மய்ஹம் கத்த²சி ஸினேஹோ நத்தீ²’தி வத³தி, அஞ்ஞம் ப்³யாகரோதி, ப⁴ந்தே’’தி ஆஹம்ஸு. ஸத்தா² ‘‘ந, பி⁴க்க²வே, மம புத்தோ அஞ்ஞம் ப்³யாகரோதி, மம புத்தஸ்ஸ ஸம்மாபணிஹிதேன சித்தேன மக்³க³ஸ்ஸ தி³ட்ட²காலதோ பட்டா²ய ந கத்த²சி ஸினேஹோ ஜாதோ, யம் ஸம்பத்திம் நேவ மாதா, ந பிதா காதும் ஸக்கோதி, தம் இமேஸம் ஸத்தானம் அப்³ப⁴ந்தரே பவத்தம் ஸம்மாபணிஹிதம் சித்தமேவ தே³தீ’’தி வத்வா இமம் கா³த²மாஹ –

43. ‘‘ந தம் மாதா பிதா கயிரா, அஞ்ஞே வாபி ச ஞாதகா;

ஸம்மாபணிஹிதம் சித்தம், ஸேய்யஸோ நம் ததோ கரே’’தி.

தத்த²ந தந்தி தம் காரணம் நேவ மாதா கரேய்ய, ந பிதா, ந அஞ்ஞே ஞாதகா. ஸம்மாபணிஹிதந்தி த³ஸஸு குஸலகம்மபதே²ஸு ஸம்மா ட²பிதம். ஸேய்யஸோ நம் ததோ கரேதி ததோ காரணதோ ஸேய்யஸோ நம் வரதரம் உத்தரிதரம் கரேய்ய, கரோதீதி அத்தோ². மாதாபிதரோ ஹி புத்தானம் த⁴னம் த³த³மானா ஏகஸ்மிம்யேவ அத்தபா⁴வே கம்மம் அகத்வா ஸுகே²ன ஜீவிககப்பனம் த⁴னம் தா³தும் ஸக்கோந்தி. விஸாகா²ய மாதாபிதரோபி தாவ மஹத்³த⁴னா மஹாபோ⁴கா³, தஸ்ஸா ஏகஸ்மிம்யேவ அத்தபா⁴வே ஸுகே²ன ஜீவிககப்பனம் த⁴னம் அத³ம்ஸு. சதூஸு பன தீ³பேஸு சக்கவத்திஸிரிம் தா³தும் ஸமத்தா² மாதாபிதரோபி நாம புத்தானம் நத்தி², பகே³வ தி³ப்³ப³ஸம்பத்திம் வா பட²மஜ்ஜா²னாதி³ஸம்பத்திம் வா, லோகுத்தரஸம்பத்திதா³னே கதா²வ நத்தி², ஸம்மாபணிஹிதம் பன சித்தம் ஸப்³ப³ம்பேதம் ஸம்பத்திம் தா³தும் ஸக்கோதி. தேன வுத்தம் ‘‘ஸேய்யஸோ நம் ததோ கரே’’தி.

தே³ஸனாவஸானே ப³ஹூ ஸோதாபத்திப²லாதீ³னி பத்தா. தே³ஸனா மஹாஜனஸ்ஸ ஸாத்தி²கா ஜாதாதி.

ஸோரேய்யத்தே²ரவத்து² நவமம்.

சித்தவக்³க³வண்ணனா நிட்டி²தா.

ததியோ வக்³கோ³.