4. காளயக்கி²னீவத்து²

ந ஹி வேரேனாதி இமம் த⁴ம்மதே³ஸனம் ஸத்தா² ஜேதவனே விஹரந்தோ அஞ்ஞதரம் வஞ்ஜி²த்தி²ம் ஆரப்³ப⁴ கதே²ஸி.

ஏகோ கிர குடும்பி³கபுத்தோ பிதரி காலகதே கே²த்தே ச க⁴ரே ச ஸப்³ப³கம்மானி அத்தனாவ கரோந்தோ மாதரம் படிஜக்³கி³. அத²ஸ்ஸ மாதா ‘‘குமாரிகம் தே, தாத, ஆனேஸ்ஸாமீ’’தி ஆஹ. ‘‘அம்ம, மா ஏவம் வதே³த², அஹம் யாவஜீவம் தும்ஹே படிஜக்³கி³ஸ்ஸாமீ’’தி. ‘‘தாத, கே²த்தே ச க⁴ரே ச கிச்சம் த்வமேவ கரோஸி, தேன மய்ஹம் சித்தஸுக²ம் நாம ந ஹோதி, ஆனேஸ்ஸாமீ’’தி. ஸோ புனப்புனம் படிக்கி²பித்வா துண்ஹீ அஹோஸி. ஸா ஏகம் குலம் க³ந்துகாமா கே³ஹா நிக்க²மி. அத² நம் புத்தோ ‘‘கதரம் குலம் க³ச்ச²தா²’’தி புச்சி²த்வா ‘‘அஸுககுலம் நாமா’’தி வுத்தே தத்த² க³மனம் படிஸேதே⁴த்வா அத்தனோ அபி⁴ருசிதம் குலம் ஆசிக்கி². ஸா தத்த² க³ந்த்வா குமாரிகம் வாரேத்வா தி³வஸம் வவத்த²பேத்வா தம் ஆனேத்வா தஸ்ஸ க⁴ரே அகாஸி. ஸா வஞ்ஜா² அஹோஸி. அத² நம் மாதா, புத்த, த்வம் அத்தனோ ருசியா குமாரிகம் ஆணாபேஸி, ஸா இதா³னி வஞ்ஜா² ஜாதா, அபுத்தகஞ்ச நாம குலம் வினஸ்ஸதி, பவேணீ ந க⁴டீயதி, தேன அஞ்ஞம் தே குமாரிகம் ஆனேமீதி. தேன ‘‘அலம், அம்மா’’தி வுச்சமானாபி புனப்புனம் கதே²ஸி. வஞ்ஜி²த்தீ² தம் கத²ம் ஸுத்வா ‘‘புத்தா நாம மாதாபிதூனம் வசனம் அதிக்கமிதும் ந ஸக்கோந்தி, இதா³னி அஞ்ஞம் விஜாயினிம் இத்தி²ம் ஆனேத்வா மம் தா³ஸிபோ⁴கே³ன பு⁴ஞ்ஜிஸ்ஸதி. யம்னூனாஹம் ஸயமேவ ஏகம் குமாரிகம் ஆனேய்ய’’ந்தி சிந்தேத்வா ஏகம் குலம் க³ந்த்வா தஸ்ஸத்தா²ய குமாரிகம் வாரேத்வா ‘‘கிம் நாமேதம், அம்ம, வதே³ஸீ’’தி தேஹி படிக்கி²த்தா ‘‘அஹம் வஞ்ஜா², அபுத்தகம் நாம குலம் வினஸ்ஸதி, தும்ஹாகம் பன தீ⁴தா புத்தம் வா தீ⁴தரம் வா லபி⁴த்வா குடும்பி³கஸ்ஸ ஸாமினீ ப⁴விஸ்ஸதி, மய்ஹம் ஸாமிகஸ்ஸ நம் தே³தா²’’தி யாசித்வா ஸம்படிச்சா²பேத்வா ஆனேத்வா ஸாமிகஸ்ஸ க⁴ரே அகாஸி.

அத²ஸ்ஸா ஏதத³ஹோஸி – ‘‘ஸசாயம் புத்தம் வா தீ⁴தரம் வா லபி⁴ஸ்ஸதி, அயமேவ குடும்ப³ஸ்ஸ ஸாமினீ ப⁴விஸ்ஸதி. யதா² தா³ரகம் ந லப⁴தி, ததே²வ நம் காதும் வட்டதீ’’தி. அத² நம் ஸா ஆஹ – ‘‘அம்ம, யதா³ தே குச்சி²யம் க³ப்³போ⁴ பதிட்டா²தி, அத² மே ஆரோசேய்யாஸீ’’தி. ஸா ‘‘ஸாதூ⁴’’தி படிஸ்ஸுணித்வா க³ப்³பே⁴ பதிட்டி²தே தஸ்ஸா ஆரோசேஸி. இதரிஸ்ஸா பன ஸா ஸயமேவ நிச்சம் யாகு³ப⁴த்தம் தே³தி, அத²ஸ்ஸா ஆஹாரேனேவ ஸத்³தி⁴ம் க³ப்³ப⁴பாதனபே⁴ஸஜ்ஜமதா³ஸி, க³ப்³போ⁴ பதி. து³தியம்பி க³ப்³பே⁴ பதிட்டி²தே ஆரோசேஸி, இதரா து³தியம்பி ததே²வ பாதேஸி. அத² நம் படிவிஸ்ஸகித்தி²யோ புச்சி²ம்ஸு – ‘‘கச்சி தே ஸபத்தி அந்தராயம் கரோதீ’’தி? ஸா தமத்த²ம் ஆரோசேத்வா ‘‘அந்த⁴பா³லே, கஸ்மா ஏவமகாஸி, அயம் தவ இஸ்ஸரியப⁴யேன க³ப்³ப⁴ஸ்ஸ பாதனபே⁴ஸஜ்ஜம் யோஜேத்வா தே³தி, தேன தே க³ப்³போ⁴ பததி, மா புன ஏவமகத்தா²’’தி வுத்தா ததியவாரே ந கதே²ஸி. அத² ஸா இதரிஸ்ஸா உத³ரம் தி³ஸ்வா ‘‘கஸ்மா மய்ஹம் க³ப்³ப⁴ஸ்ஸ பதிட்டி²தபா⁴வம் ந கதே²ஸீ’’தி வத்வா ‘‘த்வம் மம் ஆனேத்வா வஞ்சேத்வா த்³வே வாரே க³ப்³ப⁴ம் பாதேஸி, கிமத்த²ம் துய்ஹம் கதே²மீ’’தி வுத்தே ‘‘நட்டா² தா³னிம்ஹீ’’தி சிந்தேத்வா தஸ்ஸா பமாத³ம் ஓலோகேந்தீ பரிணதே க³ப்³பே⁴ ஓகாஸம் லபி⁴த்வா பே⁴ஸஜ்ஜம் யோஜேத்வா அதா³ஸி. க³ப்³போ⁴ பரிணதத்தா பதிதும் அஸக்கோந்தோ திரியம் நிபதி, க²ரா வேத³னா உப்பஜ்ஜி, ஜீவிதஸம்ஸயம் பாபுணி. ஸா ‘‘நாஸிதம்ஹி தயா, த்வமேவ மம் ஆனேத்வா த்வமேவ தயோபி வாரே தா³ரகே நாஸேஸி, இதா³னி அஹம்பி நஸ்ஸாமி, இதோ தா³னி சுதா யக்கி²னீ ஹுத்வா தவ தா³ரகே கா²தி³தும் ஸமத்தா² ஹுத்வா நிப்³ப³த்தேய்ய’’ந்தி பத்த²னம் பட்ட²பேத்வா காலம் கத்வா தஸ்மிம்யேவ கே³ஹே மஜ்ஜாரீ ஹுத்வா நிப்³ப³த்தி. இதரம்பி ஸாமிகோ க³ஹேத்வா ‘‘தயா மே குலூபச்சே²தோ³ கதோ’’தி கப்பரஜண்ணுகாதீ³ஹி ஸுபோதி²தம் போதே²ஸி. ஸா தேனேவாபா³தே⁴ன காலம் கத்வா தத்தே²வ குக்குடீ ஹுத்வா நிப்³ப³த்தா.

குக்குடீ ந சிரஸ்ஸேவ அண்டா³னி விஜாயி, மஜ்ஜாரீ ஆக³ந்த்வா தானி அண்டா³னி கா²தி³. து³தியம்பி ததியம்பி கா²தி³யேவ. குக்குடீ சிந்தேஸி – ‘‘தயோ வாரே மம அண்டா³னி கா²தி³த்வா இதா³னி மம்பி கா²தி³துகாமாஸீ’’தி. ‘‘இதோ சுதா ஸபுத்தகம் தம் கா²தி³தும் லபே⁴ய்ய’’ந்தி பத்த²னம் கத்வா ததோ சுதா அரஞ்ஞே தீ³பினீ ஹுத்வா நிப்³ப³த்தி. இதரா மிகீ³ ஹுத்வா நிப்³ப³த்தி. தஸ்ஸா விஜாதகாலே தீ³பினீ ஆக³ந்த்வா தயோ வாரே புத்தகே கா²தி³. மிகீ³ மரணகாலே ‘‘அயம் மே திக்க²த்தும் புத்தகே கா²தி³த்வா இதா³னி மம்பி கா²தி³ஸ்ஸதி, இதோ தா³னி சுதா ஏதம் ஸபுத்தகம் கா²தி³தும் லபே⁴ய்ய’’ந்தி பத்த²னம் கத்வா இதோ சுதா யக்கி²னீ ஹுத்வா நிப்³ப³த்தி. தீ³பினீபி ததே²வ ததோ சுதா ஸாவத்தி²யம் குலதீ⁴தா ஹுத்வா நிப்³ப³த்தி, ஸா வுத்³தி⁴ப்பத்தா த்³வாரகா³மகே பதிகுலம் அக³மாஸி, அபரபா⁴கே³ ச புத்தம் விஜாயி. யக்கி²னீபி தஸ்ஸா பியஸஹாயிகாவண்ணேன ஆக³ந்த்வா ‘‘குஹிம் மே ஸஹாயிகா’’தி ‘‘அந்தோக³ப்³பே⁴ விஜாதா’’தி வுத்தே ‘‘புத்தம் நு கோ² விஜாதா, உதா³ஹு தீ⁴தரந்தி பஸ்ஸிஸ்ஸாமி ந’’ந்தி க³ப்³ப⁴ம் பவிஸித்வா பஸ்ஸந்தீ விய தா³ரகம் க³ஹேத்வா கா²தி³த்வா க³தா. புன து³தியவாரேபி ததே²வ கா²தி³. ததியவாரே இதரா க³ருபா⁴ரா ஹுத்வா ஸாமிகம் ஆமந்தேத்வா, ‘‘ஸாமி, இமஸ்மிம் டா²னே ஏகா யக்கி²னீ மம த்³வே புத்தே கா²தி³த்வா க³தா, இதா³னி மம குலகே³ஹம் க³ந்த்வா விஜாயிஸ்ஸாமீ’’தி குலகே³ஹம் க³ந்த்வா விஜாயி.

ததா³ ஸா யக்கி²னீ உத³கவாரம் க³தா ஹோதி. வேஸ்ஸவணஸ்ஸ ஹி யக்கி²னியோ வாரேன அனோதத்தத³ஹதோ ஸீஸபரம்பராய உத³கமாஹரந்தி. தா சதுமாஸச்சயேனபி பஞ்சமாஸச்சயேனபி முச்சந்தி. அபரா யக்கி²னியோ கிலந்தகாயா ஜீவிதக்க²யம்பி பாபுணந்தி. ஸா பன உத³கவாரதோ முத்தமத்தாவ வேகே³ன தம் க⁴ரம் க³ந்த்வா ‘‘குஹிம் மே ஸஹாயிகா’’தி புச்சி². ‘‘குஹிம் நம் பஸ்ஸிஸ்ஸஸி, தஸ்ஸா இமஸ்மிம் டா²னே ஜாதஜாததா³ரகே யக்கி²னீ ஆக³ந்த்வா கா²த³தி, தஸ்மா குலகே³ஹம் க³தா’’தி. ஸா ‘‘யத்த² வா தத்த² வா க³ச்ச²து, ந மே முச்சிஸ்ஸதீ’’தி வேரவேக³ஸமுஸ்ஸாஹிதமானஸா நக³ராபி⁴முகீ² பக்க²ந்தி³. இதராபி நாமக்³க³ஹணதி³வஸே நம் தா³ரகம் ந்ஹாபேத்வா நாமம் கத்வா, ‘‘ஸாமி, இதா³னி ஸகக⁴ரம் க³ச்சா²மா’’தி புத்தமாதா³ய ஸாமிகேன ஸத்³தி⁴ம் விஹாரமஜ்ஜே² க³தமக்³கே³ன க³ச்ச²ந்தீ புத்தம் ஸாமிகஸ்ஸ த³த்வா விஹாரபோக்க²ரணியா ந்ஹாத்வா ஸாமிகே ந்ஹாயந்தே உத்தரித்வா புத்தஸ்ஸ த²ஞ்ஞம் பாயமானா டி²தா யக்கி²னிம் ஆக³ச்ச²ந்திம் தி³ஸ்வா ஸஞ்ஜானித்வா, ‘‘ஸாமி, வேகே³ன ஏஹி, அயம் ஸா யக்கி²னீ, வேகே³ன ஏஹி, அயம் ஸா யக்கி²னீ’’தி உச்சாஸத்³த³ம் கத்வா யாவ தஸ்ஸ ஆக³மனம் ஸண்டா²தும் அஸக்கோந்தீ நிவத்தேத்வா அந்தோவிஹாராபி⁴முகீ² பக்க²ந்தி³.

தஸ்மிம் ஸமயே ஸத்தா² பரிஸமஜ்ஜே² த⁴ம்மம் தே³ஸேஸி. ஸா புத்தம் ததா²க³தஸ்ஸ பாத³பிட்டே² நிபஜ்ஜாபேத்வா ‘‘தும்ஹாகம் மயா ஏஸ தி³ன்னோ, புத்தஸ்ஸ மே ஜீவிதம் தே³தா²’’தி ஆஹ. த்³வாரகோட்ட²கே அதி⁴வத்தோ² ஸுமனதே³வோ நாம யக்கி²னியா அந்தோ பவிஸிதும் நாதா³ஸி. ஸத்தா² ஆனந்த³த்தே²ரம் ஆமந்தேத்வா ‘‘க³ச்ச², ஆனந்த³, தம் யக்கி²னிம் பக்கோஸாஹீ’’தி ஆஹ. தே²ரோ பக்கோஸி. இதரா ‘‘அயம், ப⁴ந்தே, ஆக³ச்ச²தீ’’தி ஆஹ. ஸத்தா² ‘‘ஏது, மா ஸத்³த³மகாஸீ’’தி வத்வா தம் ஆக³ந்த்வா டி²தம் ‘‘கஸ்மா ஏவம் கரோஸி, ஸசே தும்ஹே மாதி³ஸஸ்ஸ பு³த்³த⁴ஸ்ஸ ஸம்முகீ²பா⁴வம் நாக³மிஸ்ஸத², அஹினகுலானம் விய அச்ச²ப²ந்த³னானம் விய காகோலூகானம் விய ச கப்பட்டி²திகம் வோ வேரம் அப⁴விஸ்ஸ, கஸ்மா வேரம் படிவேரம் கரோத². வேரஞ்ஹி அவேரேன உபஸம்மதி, நோ வேரேனா’’தி வத்வா இமம் கா³த²மாஹ –

5. ‘‘ந ஹி வேரேன வேரானி, ஸம்மந்தீத⁴ குதா³சனம்;

அவேரேன ச ஸம்மந்தி, ஏஸ த⁴ம்மோ ஸனந்தனோ’’தி.

தத்த² ந ஹி வேரேனாதி யதா² ஹி கே²ளஸிங்கா⁴ணிகாதீ³ஹி அஸுசீஹி மக்கி²தம் டா²னம் தேஹேவ அஸுசீஹி தோ⁴வந்தா ஸுத்³த⁴ம் நிக்³க³ந்த⁴ம் காதும் ந ஸக்கோந்தி, அத² கோ² தம் டா²னம் பி⁴ய்யோஸோமத்தாய அஸுத்³த⁴தரஞ்சேவ து³க்³க³ந்த⁴தரஞ்ச ஹோதி; ஏவமேவ அக்கோஸந்தம் பச்சக்கோஸந்தோ பஹரந்தம் படிபஹரந்தோ வேரேன வேரம் வூபஸமேதும் ந ஸக்கோதி, அத² கோ² பி⁴ய்யோ பி⁴ய்யோ வேரமேவ கரோதி. இதி வேரானி நாம வேரேன கிஸ்மிஞ்சி காலே ந ஸம்மந்தி, அத² கோ² வட்³ட⁴ந்தியேவ. அவேரேன ச ஸம்மந்தீதி யதா² பன தானி கே²ளாதீ³னி அஸுசீனி விப்பஸன்னேன உத³கேன தோ⁴வியமானானி நஸ்ஸந்தி, தம் டா²னம் ஸுத்³த⁴ம் ஹோதி ஸுக³ந்த⁴ம்; ஏவமேவ அவேரேன க²ந்திமேத்தோத³கேன யோனிஸோ மனஸிகாரேன பச்சவேக்க²ணேன வேரானி வூபஸம்மந்தி படிப்பஸ்ஸம்ப⁴ந்தி அபா⁴வம் க³ச்ச²ந்தி. ஏஸ த⁴ம்மோ ஸனந்தனோதி ஏஸ அவேரேன வேரூபஸமனஸங்கா²தோ போராணகோ த⁴ம்மோ; ஸப்³பே³ஸம் பு³த்³த⁴பச்சேகபு³த்³த⁴கீ²ணாஸவானம் க³தமக்³கோ³தி.

கா³தா²பரியோஸானே யக்கி²னீ ஸோதாபத்திப²லே பதிட்ட²ஹி. ஸம்பத்தபரிஸாயபி த⁴ம்மதே³ஸனா ஸாத்தி²கா அஹோஸி.

ஸத்தா² தம் இத்தி²ம் ஆஹ – ‘‘ஏதிஸ்ஸா தவ புத்தம் தே³ஹீ’’தி. ‘‘பா⁴யாமி, ப⁴ந்தே’’தி. ‘‘மா பா⁴யி, நத்தி² தே ஏதம் நிஸ்ஸாய பரிபந்தோ²’’தி ஆஹ. ஸா தஸ்ஸா புத்தமதா³ஸி. ஸா தம் சும்பி³த்வா ஆலிங்கே³த்வா புன மாதுயேவ த³த்வா ரோதி³தும் ஆரபி⁴. அத² நம் ஸத்தா² ‘‘கிமேத’’ந்தி புச்சி². ‘‘ப⁴ந்தே, அஹம் புப்³பே³ யதா² வா ததா² வா ஜீவிகம் கப்பேந்தீபி குச்சி²பூரம் நாலத்த²ம், இதா³னி கத²ம் ஜீவிஸ்ஸாமீ’’தி. அத² நம் ஸத்தா² ‘‘மா சிந்தயீ’’தி ஸமஸ்ஸாஸேத்வா தம் இத்தி²மாஹ – ‘‘இமம் நேத்வா அத்தனோ கே³ஹே நிவாஸாபேத்வா அக்³க³யாகு³ப⁴த்தேஹி படிஜக்³கா³ஹீ’’தி. ஸா தம் நேத்வா பிட்டி²வம்ஸே பதிட்டா²பேத்வா அக்³க³யாகு³ப⁴த்தேஹி படிஜக்³கி³, தஸ்ஸா வீஹிபஹரணகாலே முஸலக்³கே³ன முத்³த⁴ம் பஹரந்தம் விய உபட்டா²ஸி. ஸா ஸஹாயிகம் ஆமந்தேத்வா ‘‘இமஸ்மிம் டா²னே வஸிதும் ந ஸக்கோமி, அஞ்ஞத்த² மம் பதிட்டா²பேஹீ’’தி வத்வா முஸலஸாலாய உத³கசாடியம் உத்³த⁴னே நிப்³ப³கோஸே ஸங்காரகூடே கா³மத்³வாரே சாதி ஏதேஸு டா²னேஸு பதிட்டா²பிதாபி இத⁴ மே முஸலேன ஸீஸம் பி⁴ந்த³ந்தம் விய உபட்டா²தி, இத⁴ தா³ரகா உச்சி²ட்டோ²த³கம் ஓதாரேந்தி, இத⁴ ஸுனகா² நிபஜ்ஜந்தி, இத⁴ தா³ரகா அஸுசிம் கரோந்தி, இத⁴ கசவரம் ச²ட்³டே³ந்தி, இத⁴ கா³மதா³ரகா லக்க²யோக்³க³ம் கரோந்தீதி ஸப்³பா³னி தானி படிக்கி²பி. அத² நம் ப³ஹிகா³மே விவித்தோகாஸே பதிட்டா²பேத்வா தத்த² தஸ்ஸா அக்³க³யாகு³ப⁴த்தாதீ³னி ஹரித்வா படிஜக்³கி³. ஸா யக்கி²னீ ஏவம் சிந்தேஸி – ‘‘அயம் மே ஸஹாயிகா இதா³னி ப³ஹூபகாரா, ஹந்தா³ஹம் கிஞ்சி படிகு³ணம் கரோமீ’’தி. ஸா ‘‘இமஸ்மிம் ஸம்வச்ச²ரே ஸுப்³பு³ட்டி²கா ப⁴விஸ்ஸதி, த²லட்டா²னே ஸஸ்ஸம் கரோஹி, இமஸ்மிம் ஸம்வச்ச²ரே து³ப்³பு³ட்டி²கா ப⁴விஸ்ஸதி, நின்னட்டா²னேயேவ ஸஸ்ஸம் கரோஹீ’’தி ஸஹாயிகாய ஆரோசேதி. ஸேஸஜனேஹி கதஸஸ்ஸம் அதிஉத³கேன வா அனோத³கேன வா நஸ்ஸதி, தஸ்ஸா அதிவிய ஸம்பஜ்ஜதி. அத² நம் ஸேஸஜனா, ‘‘அம்ம, தயா கதஸஸ்ஸம் நேவ அச்சோத³கேன, ந அனுத³கேன நஸ்ஸதி, ஸுப்³பு³ட்டி²து³ப்³பு³ட்டி²பா⁴வம் ஞத்வா கம்மம் கரோஸி, கிம் நு கோ² ஏத’’ந்தி புச்சி²ம்ஸு. ‘‘அம்ஹாகம் ஸஹாயிகா யக்கி²னீ ஸுப்³பு³ட்டி²து³ப்³பு³ட்டி²பா⁴வம் ஆசிக்க²தி, மயம் தஸ்ஸா வசனேன த²லேஸு நின்னேஸு ஸஸ்ஸானி கரோம, தேன நோ ஸம்பஜ்ஜதி. கிம் ந பஸ்ஸத²? நிப³த்³த⁴ம் அம்ஹாகம் கே³ஹதோ யாகு³ப⁴த்தாதீ³னி ஹரியமானானி, தானி ஏதிஸ்ஸா ஹரீயந்தி, தும்ஹேபி ஏதிஸ்ஸா அக்³க³யாகு³ப⁴த்தாதீ³னி ஹரத², தும்ஹாகம்பி கம்மந்தே ஓலோகேஸ்ஸதீ’’தி. அத²ஸ்ஸா ஸகலனக³ரவாஸினோ ஸக்காரம் கரிம்ஸு. ஸாபி ததோ பட்டா²ய ஸப்³பே³ஸம் கம்மந்தே ஓலோகேந்தீ லாப⁴க்³க³ப்பத்தா அஹோஸி மஹாபரிவாரா. ஸா அபரபா⁴கே³ அட்ட² ஸலாகப⁴த்தானி பட்ட²பேஸி. தானி யாவஜ்ஜகாலா தீ³யந்தியேவாதி.

காளயக்கி²னீவத்து² சதுத்த²ம்.