உத்³தா³னகா³தா²வண்ணனா

‘‘யுத⁴ஞ்ஜயோ’’திஆதி³கா உத்³தா³னகா³தா². தத்த² பி⁴ஸேனாதி பி⁴ஸாபதே³ஸேன மஹாகஞ்சனசரியம் (சரியா. 3.34 ஆத³யோ) த³ஸ்ஸேதி. ஸோணனந்தோ³தி இமினா ஸோணபண்டி³தசரியம் (சரியா. 3.42 ஆத³யோ ) த³ஸ்ஸேதி. ததா² மூக³பக்கோ²தி மூக³பக்கா²பதே³ஸேன தேமியபண்டி³தசரியம் (சரியா. 3.48 ஆத³யோ) த³ஸ்ஸேதி. உபேக்கா²பாரமிஸீஸேன மஹாலோமஹம்ஸசரியம் (சரியா. 3.119 ஆத³யோ) த³ஸ்ஸேதி. ஆஸி இதி வுட்ட²ம் மஹேஸினாதி யதா², ஸாரிபுத்த, துய்ஹம் ஏதரஹி தே³ஸிதம், இதி ஏவம் இமினா விதா⁴னேன மஹந்தானம் தா³னபாரமிஆதீ³னம் போ³தி⁴ஸம்பா⁴ரானம் ஏஸனதோ மஹேஸினா ததா³ போ³தி⁴ஸத்தபூ⁴தேன மயா வுட்ட²ம் சிண்ணம் சரிதம் படிபன்னம் ஆஸி அஹோஸீதி அத்தோ². இதா³னி பாரமிபரிபூரணவஸேன சிரகாலப்பவத்திதம் இத⁴ வுத்தம் அவுத்தஞ்ச அத்தனோ து³க்கரகிரியம் ஏகஜ்ஜ²ம் கத்வா யத³த்த²ம் ஸா பவத்திதா, தஞ்ச ஸங்கே²பேனேவ த³ஸ்ஸேதும் ‘‘ஏவம் ப³ஹுப்³பி³த⁴’’ந்தி கா³த²மாஹ.

தத்த² ஏவந்தி இமினா வுத்தனயேன. ப³ஹுப்³பி³த⁴ம் து³க்க²ந்தி அகித்திபண்டி³தாதி³காலே காரபண்ணாதி³ஆஹாரதாய தஞ்ச யாசகஸ்ஸ த³த்வா ஆஹாரூபச்சே²தா³தி³னா ச ப³ஹுவித⁴ம் நானப்பகாரம் து³க்க²ம். ததா² குருராஜாதி³காலே ஸக்கஸம்பத்திஸதி³ஸா ஸம்பத்தீ ச ப³ஹுப்³பி³தா⁴. ப⁴வாப⁴வேதி கு²த்³த³கே சேவ மஹந்தே ச ப⁴வே. ப⁴வாப⁴வே வா வுத்³தி⁴ஹானியோ அனுப⁴வித்வா ப³ஹுவிதே⁴ஹி து³க்கே²ஹி அவிஹஞ்ஞமானோ ப³ஹுவிதா⁴ஹி ச ஸம்பத்தீஹி அனாகட்³டி⁴யமானோ பாரமிபரிபூரணபஸுதோ ஏவ ஹுத்வா தத³னுரூபம் படிபத்திம் படிபன்னோ உத்தமம் அனுத்தரம் ஸம்மாஸம்போ³தி⁴ம் ஸப்³ப³ஞ்ஞுதம் பத்தோ, அதி⁴க³தோஸ்மீதி அத்தோ².

இதா³னி யாஸம் பாரமீனம் பரிபூரணத்த²ம் ஏஸா து³க்கரசரியா சிரம் பவத்திதா, தாஸம் அனவஸேஸதோ பரிபுண்ணபா⁴வம் தேன ச பத்தப்³ப³ப²லஸ்ஸ அத்தனா அதி⁴க³தபா⁴வம் த³ஸ்ஸேதும் ‘‘த³த்வா தா³தப்³ப³கம் தா³னம், ஸீலம் பூரேத்வா அஸேஸதோ’’திஆதி³ வுத்தம்.

தத்த² த³த்வா தா³தப்³ப³கம் தா³னந்தி ததா³ அனுத்தரம் ஸம்மாஸம்போ³தி⁴ம் அபி⁴ஸம்பு³ஜ்ஜி²தும் அக்³க³யானபடிபத³ம் படிபன்னேன மஹாபோ³தி⁴ஸத்தேன தா³தப்³ப³ம் தே³ய்யத⁴ம்மம் பா³ஹிரம் ரஜ்ஜாதி³ம் அப்³ப⁴ந்தரம் அத்தபரிச்சாகோ³தி பஞ்ச மஹாபரிச்சாக³பரியோஸானம் தா³னபாரமிதா³னஉபபாரமிதா³னபரமத்த²பாரமிப்பபே⁴த³ம் தா³னம் அனவஸேஸதோ ஸம்பாதே³த்வாதி அத்தோ². தத்த² அகித்திப்³ராஹ்மணகாலே (சரியா. 1.1 ஆத³யோ; ஜா. 1.13.83 ஆத³யோ) ஸங்க²ப்³ராஹ்மணகாலேதி (சரியா. 1.11 ஆத³யோ; ஜா. 1.10.39 ஆத³யோ) ஏவமாதீ³ஸு இத⁴ ஆக³தேஸு அனாக³தேஸு ச விஸய்ஹஸேட்டி²காலே (ஜா. 1.4.157 ஆத³யோ) வேலாமகாலேதி (அ. நி. 9.20) ஏவமாதீ³ஸுபி தா³னபாரமியா மஹாபுரிஸஸ்ஸ பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ ஸஸபண்டி³தகாலே –

‘‘பி⁴க்கா²ய உபக³தம் தி³ஸ்வா, ஸகத்தானம் பரிச்சஜிம்;

தா³னேன மே ஸமோ நத்தி², ஏஸா மே தா³னபாரமீ’’தி. (சரியா. 1. தஸ்ஸுத்³தா³ன) –

ஏவம் அத்தபரிச்சாக³ம் கரோந்தஸ்ஸ தா³னபாரமீ பரமத்த²பாரமீ நாம ஜாதா. இதரேஸு பன யதா²ரஹம் பாரமிஉபபாரமியோ வேதி³தப்³பா³.

ஸீலம் பூரேத்வா அஸேஸதோதி ததா² அனவஸேஸதோ காயிகோ ஸம்வரோ, வாசஸிகோ ஸம்வரோ, காயிகவாசஸிகோ ஸம்வரோ, இந்த்³ரியஸம்வரோ, போ⁴ஜனே மத்தஞ்ஞுதா, ஸுவிஸுத்³தா⁴ஜீவதாதி ஏவமாதி³கம் போ³தி⁴ஸத்தஸீலம் ஸம்பாதே³ந்தேன ஸீலபாரமிஸீலஉபபாரமிஸீலபரமத்த²பாரமிப்பபே⁴த³ம் பூரேதப்³ப³ம் ஸப்³ப³ம் ஸீலம் பூரேத்வா ஸம்மதே³வ ஸம்பாதே³த்வா. இதா⁴பி ஸீலவனாக³ராஜகாலே (சரியா. 2.1 ஆத³யோ; ஜா. 1.1.72) சம்பேய்யனாக³ராஜகாலேதி (சரியா. 2.20 ஆத³யோ; ஜா. 1.15.240 ஆத³யோ) ஏவமாதீ³ஸு இத⁴ ஆக³தேஸு, அனாக³தேஸு ச மஹாகபிகாலே (சரியா. 3.67 ஆத³யோ; ஜா. 1.7.83 ஆத³யோ; 1.16.178 ஆத³யோ) ச²த்³த³ந்தகாலேதி (ஜா. 1.16.97 ஆத³யோ) ஏவமாதீ³ஸு மஹாஸத்தஸ்ஸ ஸீலபாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ ஸங்க²பாலகாலே –

‘‘ஸூலேஹி வினிவிஜ்ஜ²ந்தே, கோட்டயந்தேபி ஸத்திபி⁴;

போ⁴ஜபுத்தே ந குப்பாமி, ஏஸா மே ஸீலபாரமீ’’தி. (சரியா. 2.91) –

ஏவம் அத்தபரிச்சாக³ம் கரோந்தஸ்ஸ ஸீலபாரமீ பரமத்த²பாரமீ நாம ஜாதா. இதரேஸு பன யதா²ரஹம் பாரமிஉபபாரமியோ வேதி³தப்³பா³.

நேக்க²ம்மே பாரமிம் க³ந்த்வாதி ததா² திவிதே⁴பி மஹாபி⁴னிக்க²மனே பாரமிம் பரமுக்கம்ஸம் க³ந்த்வா. தத்த² யுத⁴ஞ்ஜயகாலே (சரியா. 3.1 ஆத³யோ; ஜா. 1.11.73 ஆத³யோ) ஸோமனஸ்ஸகுமாரகாலேதி (சரியா. 3.7 ஆத³யோ; ஜா. 1.15.211 ஆத³யோ) ஏவமாதீ³ஸு இத⁴ ஆக³தேஸு, அனாக³தேஸு ச ஹத்தி²பாலகுமாரகாலே (ஜா. 1.15.337 ஆத³யோ) மக⁴தே³வகாலேதி (ம. நி. 2.308 ஆத³யோ; ஜா. 1.1.9) ஏவமாதீ³ஸு மஹாரஜ்ஜம் பஹாய நேக்க²ம்மபாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ சூளஸுதஸோமகாலே –

‘‘மஹாரஜ்ஜம் ஹத்த²க³தம், கே²ளபிண்ட³ம்வ ச²ட்³ட³யிம்;

சஜதோ ந ஹோதி லக்³க³னம், ஏஸா மே நேக்க²ம்மபாரமீ’’தி. (த⁴. ஸ. அட்ட². நிதா³னகதா²; ஜா. அட்ட². 1.தூ³ரேனிதா³னகதா²; அப. அட்ட². 1.தூ³ரேனிதா³னகதா²);

ஏவம் நிஸ்ஸங்க³தாய ரஜ்ஜம் ச²ட்³டே³த்வா நிக்க²மந்தஸ்ஸ நேக்க²ம்மபாரமீ பரமத்த²பாரமீ நாம ஜாதா. இதரேஸு பன யதா²ரஹம் பாரமிஉபபாரமியோ வேதி³தப்³பா³.

பண்டி³தே பரிபுச்சி²த்வாதி கிம் குஸலம் கிம் அகுஸலம் கிம் ஸாவஜ்ஜம் கிம் அனவஜ்ஜந்திஆதி³னா குஸலாதி³த⁴ம்மவிபா⁴க³ம் கம்மகம்மப²லவிபா⁴க³ம் ஸத்தானம் உபகாராவஹம் அனவஜ்ஜகம்மாயதனஸிப்பாயதனவிஜ்ஜாட்டா²னாதி³ம் பண்டி³தே ஸப்பஞ்ஞே பரிபுச்சி²த்வா. ஏதேன பஞ்ஞாபாரமிம் த³ஸ்ஸேதி. தத்த² விது⁴ரபண்டி³தகாலே (ஜா. 2.22.1346 ஆத³யோ) மஹாகோ³விந்த³பண்டி³தகாலே (தீ³. நி. 2.293 ஆத³யோ; சரியா 1.37 ஆத³யோ) குதா³லபண்டி³தகாலே (ஜா. 1.1.70) அரகபண்டி³தகாலே (ஜா. 1.2.37 ஆத³யோ) போ³தி⁴பரிப்³பா³ஜககாலே மஹோஸத⁴பண்டி³தகாலேதி (ஜா. 2.22.590 ஆத³யோ) ஏவமாதீ³ஸு பஞ்ஞாபாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ ஸேனகபண்டி³தகாலே –

‘‘பஞ்ஞாய விசினந்தோஹம், ப்³ராஹ்மணம் மோசயிம் து³கா²;

பஞ்ஞாய மே ஸமோ நத்தி², ஏஸா மே பஞ்ஞாபாரமீ’’தி. (த⁴. ஸ. அட்ட². நிதா³னகதா²; ஜா. அட்ட². 1.தூ³ரேனிதா³னகதா²; அப. அட்ட². 1.தூ³ரேனிதா³னக்கதா²) –

அந்தோப⁴ஸ்தக³தம் ஸப்பம் த³ஸ்ஸேந்தஸ்ஸ பஞ்ஞாபாரமீ பரமத்த²பாரமீ நாம ஜாதா. வீரியம் கத்வான உத்தமந்தி ஸம்மாஸம்போ³தி⁴ம் பாபேதும் ஸமத்த²தாய உத்தமம் பதா⁴னம் வீரியந்தி விவித⁴ம்பி வீரியபாரமிம் கத்வா உப்பாதே³த்வா. தத்த² மஹாஸீலவராஜகாலே (ஜா. 1.1.51) பஞ்சாவுத⁴குமாரகாலே (ஜா. 1.1.55) மஹாவானரிந்த³காலேதி (ஜா. 1.1.57) ஏவமாதீ³ஸு வீரியபாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ மஹாஜனககாலே –

‘‘அதீரத³ஸ்ஸீ ஜலமஜ்ஜே², ஹதா ஸப்³பே³வ மானுஸா;

சித்தஸ்ஸ அஞ்ஞதா² நத்தி², ஏஸா மே வீரியபாரமீ’’தி. (த⁴. ஸ. அட்ட². நிதா³னகதா²; ஜா. அட்ட². 1.தூ³ரேனிதா³னகதா²; அப. அட்ட². 1.தூ³ரேனிதா³னகதா²) –

ஏவம் மஹாஸமுத்³த³ம் தரந்தஸ்ஸ வீரியபாரமீ பரமத்த²பாரமீ நாம ஜாதா.

க²ந்தியா பாரமிம் க³ந்த்வாதி அதி⁴வாஸனக²ந்திஆதி³ க²ந்திபரமுக்கம்ஸபா⁴வம் பாபேந்தோ க²ந்தியா பாரமிம் பரமகோடிம் க³ந்த்வா, க²ந்திபாரமிம் ஸம்பாதே³த்வாதி அத்தோ². தத்த² மஹாகபிகாலே (சரியா. 3.67 ஆத³யோ; ஜா. 1.7.83 ஆத³யோ) மஹிம்ஸராஜகாலே (ஜா. 1.3.82 ஆத³யோ) ருருமிக³ராஜகாலே (ஜா. 1.13.117 ஆத³யோ) த⁴ம்மதே³வபுத்தகாலேதி (ஜா. 1.11.26 ஆத³யோ) ஏவமாதீ³ஸு க²ந்திபாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ க²ந்திவாதி³காலே –

‘‘அசேதனம் வ கோட்டேந்தே, திண்ஹேன ப²ரஸுனா மமம்;

காஸிராஜே ந குப்பாமி, ஏஸா மே க²ந்திபாரமீ’’தி. (த⁴. ஸ. அட்ட². நிதா³னகதா²; ஜா. அட்ட². 1.தூ³ரேனிதா³னகதா²; அப. அட்ட². 1.தூ³ரேனிதா³னகதா²) –

ஏவம் அசேதனபா⁴வேன விய மஹாது³க்க²ம் அனுப⁴வந்தஸ்ஸ க²ந்திபாரமீ பரமத்த²பாரமீ நாம ஜாதா.

கத்வா த³ள்ஹமதி⁴ட்டா²னந்தி குஸலஸமாதா³னாதி⁴ட்டா²னம் தஸ்ஸ தஸ்ஸ பாரமிஸமாதா³னஸ்ஸ தது³பகாரகஸமாதா³னஸ்ஸ ச அதி⁴ட்டா²னம் த³ள்ஹதரம் அஸிதி²லம் கத்வா, தம் தம் வதஸமாதா³னம் அனிவத்திபா⁴வேன அதி⁴ட்ட²ஹித்வாதி அத்தோ². தத்த² ஜோதிபாலகாலே (ம. நி. 2.282 ஆத³யோ) ஸரப⁴ங்க³காலே (ஜா. 2.17.50 ஆத³யோ) நேமிகாலேதி (சரியா. 1.40 ஆத³யோ; ஜா.2.22.421 ஆத³யோ) ஏவமாதீ³ஸு அதி⁴ட்டா²னபாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ தேமியகுமாரகாலே –

‘‘மாதாபிதா ந மே தே³ஸ்ஸா, அத்தா மே ந ச தே³ஸ்ஸியோ;

ஸப்³ப³ஞ்ஞுதம் பியம் மய்ஹம், தஸ்மா வதமதி⁴ட்ட²ஹி’’ந்தி. (சரியா. 3.65) –

ஏவம் ஜீவிதம் பரிச்சஜித்வா வதம் அதி⁴ட்ட²ஹந்தஸ்ஸ அதி⁴ட்டா²னபாரமீ பரமத்த²பாரமீ நாம ஜாதா.

ஸச்சவாசானுரக்கி²யாதி ஸச்சவாசம் அனுரக்கி²த்வா ஜீவிதந்தராயேபி அனரியவோஹாரம் கூ³த²ம் விய ஜிகு³ச்ச²ந்தோ பரிஹரித்வா ஸப்³ப³ஸோ அவிஸம்வாதி³பா⁴வம் ரக்கி²த்வா. தத்த² கபிராஜகாலே (சரியா. 3.67 ஆத³யோ) ஸச்சதாபஸகாலே மச்ச²ராஜகாலேதி ஏவமாதீ³ஸு ஸச்சபாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ மஹாஸுதஸோமகாலே –

‘‘ஸச்சவாசம் அனுரக்க²ந்தோ, சஜித்வா மம ஜீவிதம்;

மோசேஸிம் ஏகஸதம் க²த்தியே, ஏஸா மே ஸச்சபாரமீ’’தி. (த⁴. ஸ. அட்ட². நிதா³னகதா²; ஜா. அட்ட². 1.தூ³ரேனிதா³னகதா²; அப. அட்ட². 1.தூ³ரேனிதா³னகதா²) –

ஏவம் ஜீவிதம் சஜித்வா ஸச்சம் அனுரக்க²ந்தஸ்ஸ ஸச்சபாரமீ பரமத்த²பாரமீ நாம ஜாதா.

மேத்தாய பாரமிம் க³ந்த்வாதி ஸப்³ப³ஸத்தேஸு அனோதி⁴ஸோ ஹிதூபஸம்ஹாரலக்க²ணாய மேத்தாய பாரமிம் பரமுக்கம்ஸதம் பத்வா. தத்த² சூளத⁴ம்மபாலகாலே (ஜா. 1.5.44 ஆத³யோ) மஹாஸீலவராஜகாலே (ஜா. 1.1.51) ஸாமபண்டி³தகாலேதி (சரியா. 3.111 ஆத³யோ; ஜா. 2.22.296 ஆத³யோ) ஏவமாதீ³ஸு மேத்தாபாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ ஸுவண்ணஸாமகாலே –

‘‘ந மம் கோசி உத்தஸதி, நபிஹம் பா⁴யாமி கஸ்ஸசி;

மேத்தாப³லேனுபத்த²த்³தோ⁴, ரமாமி பவனே ததா³’’தி. (சரியா. 3.113) –

ஏவம் ஜீவிதம்பி அனோலோகேத்வா மேத்தாயந்தஸ்ஸ மேத்தாபாரமீ பரமத்த²பாரமீ நாம ஜாதா.

ஸம்மானனாவமானனேதி ஸக்கச்சம் பூஜாஸக்காராதி³னா ஸம்மானனே ஓட்டு²ப⁴னாதி³னா அவமானனே ச ஸப்³ப³த்த² லோகத⁴ம்மே ஸமகோ ஸமசித்தோ நிப்³பி³காரோ ஹுத்வா உத்தமம் அனுத்தரம் லப்³ப³ஞ்ஞுதம் அதி⁴க³தோஸ்மீதி அத்தோ². தத்த² மஹாவானரிந்த³காலே (ஜா. 1.1.57) காஸிராஜகாலே கே²மப்³ராஹ்மணகாலே அட்டி²ஸேனபரிப்³பா³ஜககாலேதி (ஜா. 1.7.54 ஆத³யோ) ஏவமாதீ³ஸு உபேக்கா²பாரமியா பூரிதத்தபா⁴வானம் பரிமாணம் நாம நத்தி². ஏகந்தேன பனஸ்ஸ மஹாலோமஹம்ஸகாலே –

‘‘ஸுஸானே ஸேய்யம் கப்பேமி, ச²வட்டி²கம் உபனிதா⁴யஹம்;

கா³மண்ட³லா உபாக³ந்த்வா, ரூபம் த³ஸ்ஸேந்தினப்பக’’ந்தி. (சரியா. 3.119) –

ஏவம் கா³மதா³ரகேஸு ஓட்டு²ப⁴னாதீ³ஹி சேவ மாலாக³ந்தூ⁴பஹாராதீ³ஹி ச ஸுக²து³க்க²ம் உப்பாதே³ந்தேஸுபி உபேக்க²ம் அனதிவத்தந்தஸ்ஸ உபேக்கா²பாரமீ பரமத்த²பாரமீ நாம ஜாதா. இதி ப⁴க³வா –

‘‘ஏவம் ப³ஹுப்³பி³த⁴ம் து³க்க²ம், ஸம்பத்தீ ச ப³ஹுப்³பி³தா⁴;

ப⁴வாப⁴வே அனுப⁴வித்வா, பத்தோ ஸம்போ³தி⁴முத்தம’’ந்தி. –

ஸம்மாஸம்போ³தி⁴ம் அதி⁴க³ந்தும் இமஸ்மிம் ப⁴த்³த³கப்பே அத்தனா கதம் து³க்கரசரியம் ஸங்கே²பேனேவ வத்வா புன –

‘‘த³த்வா தா³தப்³ப³கம் தா³னம், ஸீலம் பூரேத்வா அஸேஸதோ;

நேக்க²ம்மே பாரமிம் க³ந்த்வா, பத்தோ ஸம்போ³தி⁴முத்தமம்.

‘‘பண்டி³தே பரிபுச்சி²த்வா, வீரியம் கத்வான முத்தமம்;

க²ந்தியா பாரமிம் க³ந்த்வா, பத்தோ ஸம்போ³தி⁴முத்தமம்.

‘‘கத்வா த³ள்ஹமதி⁴ட்டா²னம், ஸச்சவாசானுரக்கி²ய;

மேத்தாய பாரமிம் க³ந்த்வா, பத்தோ ஸம்போ³தி⁴முத்தமம்.

‘‘லாபா⁴லாபே⁴ யஸாயஸே, ஸம்மானனாவமானனே;

ஸப்³ப³த்த² ஸமகோ ஹுத்வா, பத்தோ ஸம்போ³தி⁴முத்தம’’ந்தி. –

அத்தனா ஸம்மதே³வ பரிபூரிதா த³ஸ பாரமியோ த³ஸ்ஸேதி.

பகிண்ணககதா²

இமஸ்மிம் பன டா²னே ட²த்வா மஹாபோ³தி⁴யானபடிபத்தியம் உஸ்ஸாஹஜாதானம் குலபுத்தானம் போ³தி⁴ஸம்பா⁴ரேஸு நானப்பகாரகோஸல்லத்த²ம் ஸப்³ப³பாரமீஸு பகிண்ணககதா² கதே²தப்³பா³.

தத்ரித³ம் பஞ்ஹகம்மம் – கா பனேதா பாரமியோ? கேனட்டே²ன பாரமியோ? கதிவிதா⁴ சேதா? கோ தாஸம் கமோ? கானி லக்க²ணரஸபச்சுபட்டா²னபத³ட்டா²னானி? கோ பச்சயோ? கோ ஸம்கிலேஸோ? கிம் வோதா³னம்? கோ படிபக்கோ²? கா படிபத்தி? கோ விபா⁴கோ³? கோ ஸங்க³ஹோ? கோ ஸம்பாத³னூபாயோ? கித்தகேன காலேன ஸம்பாத³னம்? கோ ஆனிஸம்ஸோ? கிம் சேதாஸம் ப²லந்தி?

தத்ரித³ம் விஸ்ஸஜ்ஜனம் – கா பனேதா பாரமியோதி? தண்ஹாமானதி³ட்டீ²ஹி அனுபஹதா கருணூபாயகோஸல்லபரிக்³க³ஹிதா தா³னாத³யோ கு³ணா பாரமியோ.

கேனட்டே²ன பாரமியோதி? தா³னஸீலாதி³கு³ணவிஸேஸயோகே³ன ஸத்துத்தமதாய பரமா மஹாஸத்தா போ³தி⁴ஸத்தா, தேஸம் பா⁴வோ கம்மம் வா பாரமீ, தா³னாதி³கிரியா. அத² வா பரதீதி பரமோ, தா³னாதி³கு³ணானம் பூரகோ பாலகோ சாதி போ³தி⁴ஸத்தோ, பரமஸ்ஸ அயம், பரமஸ்ஸ வா பா⁴வோ, கம்மம் வா பாரமீ, தா³னாதி³கிரியாவ. அத² வா பரம் ஸத்தம் அத்தனி மவதி ப³ந்த⁴தி கு³ணவிஸேஸயோகே³ன, பரம் வா அதி⁴கதரம் மஜ்ஜதி ஸுஜ்ஜ²தி ஸம்கிலேஸமலதோ, பரம் வா ஸேட்ட²ம் நிப்³பா³னம் விஸேஸேன மயதி க³ச்ச²தி, பரம் வா லோகம் பமாணபூ⁴தேன ஞாணவிஸேஸேன இத⁴லோகம் விய முனாதி பரிச்சி²ந்த³தி, பரம் வா அதிவிய ஸீலாதி³கு³ணக³ணம் அத்தனோ ஸந்தானே மினோதி பக்கி²பதி, பரம் வா அத்தபூ⁴ததோ த⁴ம்மகாயதோ அஞ்ஞம் படிபக்க²ம் வா தத³னத்த²கரம் கிலேஸசோரக³ணம் மினாதி ஹிம்ஸதீதி பரமோ, மஹாஸத்தோ. பரமஸ்ஸ அயந்திஆதி³ வுத்தனயேன யோஜேதப்³ப³ம். பாரே வா நிப்³பா³னே மஜ்ஜதி ஸுஜ்ஜ²தி ஸத்தே ச ஸோதே⁴தி, தத்த² வா ஸத்தே மவதி ப³ந்த⁴தி யோஜேதி, தம் வா மயதி க³ச்ச²தி க³மேதி ச, முனாதி வா தம் யாதா²வதோ, தத்த² வா ஸத்தே மினோதி பக்கி²பதி, கிலேஸாரயோ வா ஸத்தானம் தத்த² மினாதி ஹிம்ஸதீதி பாரமீ, மஹாபுரிஸோ. தஸ்ஸ பா⁴வோ கம்மம் வா பாரமிதா, தா³னாதி³கிரியாவ. இமினா நயேன பாரமீஸத்³த³த்தோ² வேதி³தப்³போ³.

கதிவிதா⁴தி? ஸங்கே²பதோ த³ஸவிதா⁴. தா பன பாளியம் ஸரூபதோ ஆக³தாயேவ. யதா²ஹ –

‘‘விசினந்தோ ததா³ த³க்கி²ம், பட²மம் தா³னபாரமிம்;

புப்³ப³கேஹி மஹேஸீஹி, அனுசிண்ணம் மஹாபத²’’ந்தி. (பு³. வம். 2.116) –

ஆதி³. யதா² சாஹ – ‘‘கதி நு கோ², ப⁴ந்தே, பு³த்³த⁴காரகா த⁴ம்மா? த³ஸ கோ², ஸாரிபுத்த, பு³த்³த⁴காரகா த⁴ம்மா. கதமே த³ஸ? தா³னம் கோ², ஸாரிபுத்த, பு³த்³த⁴காரகோ த⁴ம்மோ, ஸீலம், நேக்க²ம்மம், பஞ்ஞா, வீரியம், க²ந்தி, ஸச்சம், அதி⁴ட்டா²னம், மேத்தா, உபேக்கா² பு³த்³த⁴காரகோ த⁴ம்மோ. இமே கோ², ஸாரிபுத்த, த³ஸ பு³த்³த⁴காரகா த⁴ம்மா’’தி. இத³மவோச ப⁴க³வா, இத³ம் வத்வா ஸுக³தோ அதா²பரம் ஏதத³வோச ஸத்தா² –

‘‘தா³னம் ஸீலஞ்ச நேக்க²ம்மம், பஞ்ஞா வீரியேன பஞ்சமம்;

க²ந்தி ஸச்சமதி⁴ட்டா²னம், மேத்துபேக்கா²தி தே த³ஸா’’தி. (பு³. வம். 1.76 தோ²கம் விஸதி³ஸம்);

கேசி பன ‘‘ச²ப்³பி³தா⁴’’தி வத³ந்தி. தம் ஏதாஸம் ஸங்க³ஹவஸேன வுத்தம். ஸோ பன ஸங்க³ஹோ பரதோ ஆவி ப⁴விஸ்ஸதி.

கோ தாஸம் கமோதி? ஏத்த² கமோதி தே³ஸனாக்கமோ, ஸோ ச பட²மஸமாதா³னஹேதுகோ, ஸமாதா³னம் பவிசயஹேதுகம், இதி யதா² ஆதி³ம்ஹி பவிசிதா ஸமாதி³ன்னா ச, ததா² தே³ஸிதா. தத்த² தா³னம் ஸீலஸ்ஸ ப³ஹூபகாரம் ஸுகரஞ்சாதி தம் ஆதி³ம்ஹி வுத்தம். தா³னம் ஸீலபரிக்³க³ஹிதம் மஹப்ப²லம் ஹோதி மஹானிஸம்ஸந்தி தா³னானந்தரம் ஸீலம் வுத்தம். ஸீலம் நேக்க²ம்மபரிக்³க³ஹிதம், நேக்க²ம்மம் பஞ்ஞாபரிக்³க³ஹிதம், பஞ்ஞா வீரியபரிக்³க³ஹிதா, வீரியம் க²ந்திபரிக்³க³ஹிதம், க²ந்தி ஸச்சபரிக்³க³ஹிதா, ஸச்சம் அதி⁴ட்டா²னபரிக்³க³ஹிதம், அதி⁴ட்டா²னம் மேத்தாபரிக்³க³ஹிதம், மேத்தா உபேக்கா²பரிக்³க³ஹிதா மஹப்ப²லா ஹோதி மஹானிஸம்ஸாதி மேத்தானந்தரமுபேக்கா² வுத்தா. உபேக்கா² பன கருணாபரிக்³க³ஹிதா கருணா ச உபேக்கா²பரிக்³க³ஹிதாதி வேதி³தப்³பா³. ‘‘கத²ம் பன மஹாகாருணிகா போ³தி⁴ஸத்தா ஸத்தேஸு உபேக்க²கா ஹோந்தீ’’தி? ‘‘உபேக்கி²தப்³ப³யுத்தேஸு கஞ்சி காலம் உபேக்க²கா ஹோந்தி, ந பன ஸப்³ப³த்த² ஸப்³ப³தா³ சா’’தி கேசி. அபரே பன – ‘‘ந ஸத்தேஸு உபேக்க²கா, ஸத்தகதேஸு பன விப்பகாரேஸு உபேக்க²கா ஹோந்தீ’’தி.

அபரோ நயோ – பசுரஜனேஸுபி பவத்தியா ஸப்³ப³ஸத்தஸாதா⁴ரணத்தா அப்பப²லத்தா ஸுகரத்தா ச ஆதி³ம்ஹி தா³னம் வுத்தம். ஸீலேன தா³யகபடிக்³கா³ஹகஸுத்³தி⁴தோ பரானுக்³க³ஹம் வத்வா பரபீளானிவத்திவசனதோ கிரியத⁴ம்மம் வத்வா அகிரியத⁴ம்மவசனதோ போ⁴க³ஸம்பத்திஹேதும் வத்வா ப⁴வஸம்பத்திஹேதுவசனதோ ச தா³னஸ்ஸ அனந்தரம் ஸீலம் வுத்தம். நேக்க²ம்மேன ஸீலஸம்பத்திஸித்³தி⁴தோ காயவசீஸுசரிதம் வத்வா மனோஸுசரிதவசனதோ விஸுத்³த⁴ஸீலஸ்ஸ ஸுகே²னேவ ஜா²னஸமிஜ்ஜ²னதோ கம்மாபராத⁴ப்பஹானேன பயோக³ஸுத்³தி⁴ம் வத்வா கிலேஸாபராத⁴ப்பஹானேன ஆஸயஸுத்³தி⁴வசனதோ வீதிக்கமப்பஹானேன சித்தஸ்ஸ பரியுட்டா²னப்பஹானவசனதோ ச ஸீலஸ்ஸ அனந்தரம் நேக்க²ம்மம் வுத்தம். பஞ்ஞாய நேக்க²ம்மஸ்ஸ ஸித்³தி⁴பரிஸுத்³தி⁴தோ ஜா²னாபா⁴வேன பஞ்ஞாபா⁴வவசனதோ ‘‘ஸமாதி⁴பத³ட்டா²னா ஹி பஞ்ஞா, பஞ்ஞாபச்சுபட்டா²னோ ச ஸமாதி⁴’’. ஸமத²னிமித்தம் வத்வா உபேக்கா²னிமித்தவசனதோ பரஹிதஜ்ஜா²னேன பரஹிதகரணூபாயகோஸல்லவசனதோ ச நேக்க²ம்மஸ்ஸ அனந்தரம் பஞ்ஞா வுத்தா. வீரியாரம்பே⁴ன பஞ்ஞாகிச்சஸித்³தி⁴தோ ஸத்தஸுஞ்ஞதாத⁴ம்மனிஜ்ஜா²னக்க²ந்திம் வத்வா ஸத்தஹிதாய ஆரம்ப⁴ஸ்ஸ அச்ச²ரியதாவசனதோ உபேக்கா²னிமித்தம் வத்வா பக்³க³ஹனிமித்தவசனதோ நிஸம்மகாரிதம் வத்வா உட்டா²னவசனதோ ச ‘‘நிஸம்மகாரினோ ஹி உட்டா²னம் ப²லவிஸேஸமாவஹதீ’’தி பஞ்ஞாய அனந்தரம் வீரியம் வுத்தம்.

வீரியேன திதிக்கா²ஸித்³தி⁴தோ ‘‘வீரியவா ஹி ஆரத்³த⁴வீரியத்தா ஸத்தஸங்கா²ரேஹி உபனீதம் து³க்க²ம் அபி⁴பு⁴ய்ய விஹரதி’’. வீரியஸ்ஸ திதிக்கா²லங்காரபா⁴வதோ ‘‘வீரியவதோ ஹி திதிக்கா² ஸோப⁴தி’’. பக்³க³ஹனிமித்தம் வத்வா ஸமத²னிமித்தவசனதோ அச்சாரம்பே⁴ன உத்³த⁴ச்சதோ³ஸப்பஹானவசனதோ ‘‘த⁴ம்மனிஜ்ஜா²னக்க²ந்தியா ஹி உத்³த⁴ச்சதோ³ஸோ பஹீயதி’’. வீரியவதோ ஸாதச்சகரணவசனதோ ‘‘க²ந்திப³ஹுலோ ஹி அனுத்³த⁴தோ ஸாதச்சகாரீ ஹோதி’’. அப்பமாத³வதோ பரஹிதகிரியாரம்பே⁴ பச்சுபகாரதண்ஹாபா⁴வவசனதோ ‘‘யாதா²வதோ த⁴ம்மனிஜ்ஜா²னே ஹி ஸதி தண்ஹா ந ஹோதி’’. பரஹிதாரம்பே⁴ பரமேபி பரகதது³க்க²ஸஹனதாவசனதோ ச வீரியஸ்ஸ அனந்தரம் க²ந்தி வுத்தா. ஸச்சேன க²ந்தியா சிராதி⁴ட்டா²னதோ அபகாரினோ அபகாரக²ந்திம் வத்வா தது³பகாரகரணே அவிஸம்வாத³வசனதோ க²ந்தியா அபவாத³வாசாவிகம்பனேன பூ⁴தவாதி³தாய அவிஜஹனவசனதோ ஸத்தஸுஞ்ஞதாத⁴ம்மனிஜ்ஜா²னக்க²ந்திம் வத்வா தது³பப்³ரூஹிதஞாணஸச்சவசனதோ ச க²ந்தியா அனந்தரம் ஸச்சம் வுத்தம்.

அதி⁴ட்டா²னேன ஸச்சஸித்³தி⁴தோ ‘‘அசலாதி⁴ட்டா²னஸ்ஸ ஹி விரதி ஸிஜ்ஜ²தி’’. அவிஸம்வாதி³தம் வத்வா தத்த² அசலபா⁴வவசனதோ ‘‘ஸச்சஸந்தோ⁴ ஹி தா³னாதீ³ஸு படிஞ்ஞானுரூபம் நிச்சலோவ பவத்ததி’’. ஞாணஸச்சம் வத்வா ஸம்பா⁴ரேஸு பவத்தினிட்டா²பனவசனதோ ‘‘யதா²பூ⁴தஞாணவா ஹி போ³தி⁴ஸம்பா⁴ரே அதி⁴ட்டா²தி, தே ச நிட்டா²பேதி படிபக்கே²ஹி அகம்பியபா⁴வதோ’’தி ஸச்சஸ்ஸ அனந்தரம் அதி⁴ட்டா²னம் வுத்தம். மேத்தாய பரஹிதகரணஸமாதா³னாதி⁴ட்டா²னஸித்³தி⁴தோ அதி⁴ட்டா²னம் வத்வா ஹிதூபஸம்ஹாரவசனதோ ‘‘போ³தி⁴ஸம்பா⁴ரே ஹி அதி⁴திட்ட²மானோ மேத்தாவிஹாரீ ஹோதி’’. அசலாதி⁴ட்டா²னஸ்ஸ ஸமாதா³னாவிகோபனேன ஸமாதா³னஸம்ப⁴வதோ ச அதி⁴ட்டா²னஸ்ஸ அனந்தரம் மேத்தா வுத்தா. உபேக்கா²ய மேத்தாவிஸுத்³தி⁴தோ ஸத்தேஸு ஹிதூபஸம்ஹாரம் வத்வா தத³பராதே⁴ஸு உதா³ஸீனதாவசனதோ மேத்தாபா⁴வனம் வத்வா தன்னிஸ்ஸந்த³பா⁴வனாவசனதோ ஹிதகாமஸத்தேபி உபேக்க²கோதி அச்ச²ரியகு³ணதாவசனதோ ச மேத்தாய அனந்தரம் உபேக்கா² வுத்தாதி ஏவமேதாஸம் கமோ வேதி³தப்³போ³.

கானி லக்க²ணரஸபச்சுபட்டா²னபத³ட்டா²னானீதி ஏத்த² அவிஸேஸேன தாவ ஸப்³பா³பி பாரமியோ பரானுக்³க³ஹலக்க²ணா, பரேஸம் உபகாரகரணரஸா, அவிகம்பனரஸா வா, ஹிதேஸிதாபச்சுபட்டா²னா, பு³த்³த⁴த்தபச்சுபட்டா²னா வா, மஹாகருணாபத³ட்டா²னா, கருணூபாயகோஸல்லபத³ட்டா²னா வா.

விஸேஸேன பன யஸ்மா கருணூபாயகோஸல்லபரிக்³க³ஹிதா அத்தூபகரணபரிச்சாக³சேதனா தா³னபாரமிதா, கருணூபாயகோஸல்லபரிக்³க³ஹிதம் காயவசீஸுசரிதம் அத்த²தோ அகத்தப்³ப³விரதிகத்தப்³ப³கரணசேதனாத³யோ ச ஸீலபாரமிதா. கருணூபாயகோஸல்லபரிக்³க³ஹிதோ ஆதீ³னவத³ஸ்ஸனபுப்³ப³ங்க³மோ காமப⁴வேஹி நிக்க²மனசித்துப்பாதோ³ நேக்க²ம்மபாரமிதா, கருணூபாயகோஸல்லபரிக்³க³ஹிதோ த⁴ம்மானம் ஸாமஞ்ஞவிஸேஸலக்க²ணாவபோ³தோ⁴ பஞ்ஞாபாரமிதா. கருணூபாயகோஸல்லபரிக்³க³ஹிதோ காயசித்தேஹி பரஹிதாரம்போ⁴ வீரியபாரமிதா, கருணூபாயகோஸல்லபரிக்³க³ஹிதம் ஸத்தஸங்கா²ராபராத⁴ஸஹனம் அதோ³ஸப்பதா⁴னோ ததா³காரப்பவத்தசித்துப்பாதோ³ க²ந்திபாரமிதா, கருணூபாயகோஸல்லபரிக்³க³ஹிதம் விரதிசேதனாதி³பே⁴த³ம் அவிஸம்வாத³னம் ஸச்சபாரமிதா, கருணூபாயகோஸல்லபரிக்³க³ஹிதம் அசலஸமாதா³னாதி⁴ட்டா²னம் ததா³காரப்பவத்தோ சித்துப்பாதோ³ அதி⁴ட்டா²னபாரமிதா, கருணூபாயகோஸல்லபரிக்³க³ஹிதோ லோகஸ்ஸ ஹிதஸுகூ²பஸம்ஹாரோ அத்த²தோ அப்³யாபாதோ³ மேத்தாபாரமிதா, கருணூபாயகோஸல்லபரிக்³க³ஹிதா அனுனயபடிக⁴வித்³த⁴ம்ஸனீ இட்டா²னிட்டே²ஸு ஸத்தஸங்கா²ரேஸு ஸமப்பவத்தி உபேக்கா²பாரமிதா.

தஸ்மா பரிச்சாக³லக்க²ணா தா³னபாரமீ, தே³ய்யத⁴ம்மே லோப⁴வித்³த⁴ம்ஸனரஸா, அனாஸத்திபச்சுபட்டா²னா, ப⁴வவிப⁴வஸம்பத்திபச்சுபட்டா²னா வா, பரிச்சஜிதப்³ப³வத்து²பத³ட்டா²னா. ஸீலனலக்க²ணா ஸீலபாரமீ, ஸமாதா⁴னலக்க²ணா பதிட்டா²னலக்க²ணா சாதி வுத்தம் ஹோதி. து³ஸ்ஸீல்யவித்³த⁴ம்ஸனரஸா, அனவஜ்ஜரஸா வா, ஸோசேய்யபச்சுபட்டா²னா, ஹிரோத்தப்பபத³ட்டா²னா. காமதோ ச ப⁴வதோ ச நிக்க²மனலக்க²ணா நேக்க²ம்மபாரமீ, ததா³தீ³னவவிபா⁴வனரஸா, ததோ ஏவ விமுக²பா⁴வபச்சுபட்டா²னா, ஸம்வேக³பத³ட்டா²னா. யதா²ஸபா⁴வபடிவேத⁴லக்க²ணா பஞ்ஞாபாரமீ, அக்க²லிதபடிவேத⁴லக்க²ணா வா குஸலிஸ்ஸாஸகி²த்தஉஸுபடிவேதோ⁴ விய, விஸயோபா⁴ஸனரஸா பதீ³போ விய, அஸம்மோஹபச்சுபட்டா²னா அரஞ்ஞக³தஸுதே³ஸிகோ விய, ஸமாதி⁴பத³ட்டா²னா, சதுஸச்சபத³ட்டா²னா வா. உஸ்ஸாஹலக்க²ணா வீரியபாரமீ, உபத்த²ம்ப⁴னரஸா, அஸம்ஸீத³னபச்சுபட்டா²னா, வீரியாரம்ப⁴வத்து²பத³ட்டா²னா, ஸம்வேக³பத³ட்டா²னா வா. க²மனலக்க²ணா க²ந்திபாரமீ, இட்டா²னிட்ட²ஸஹனரஸா, அதி⁴வாஸனபச்சுபட்டா²னா, அவிரோத⁴பச்சுபட்டா²னா வா, யதா²பூ⁴தத³ஸ்ஸனபத³ட்டா²னா. அவிஸம்வாத³னலக்க²ணா ஸச்சபாரமீ, யதா²ஸபா⁴வவிபா⁴வனரஸா, ஸாது⁴தாபச்சுபட்டா²னா, ஸோரச்சபத³ட்டா²னா. போ³தி⁴ஸம்பா⁴ரேஸு அதி⁴ட்டா²னலக்க²ணா அதி⁴ட்டா²னபாரமீ, தேஸம் படிபக்கா²பி⁴ப⁴வனரஸா, தத்த² அசலதாபச்சுபட்டா²னா, போ³தி⁴ஸம்பா⁴ரபத³ட்டா²னா. ஹிதாகாரப்பவத்திலக்க²ணா மேத்தாபாரமீ, ஹிதூபஸம்ஹாரரஸா, ஆகா⁴தவினயனரஸா வா, ஸோம்மபா⁴வபச்சுபட்டா²னா, ஸத்தானம் மனாபபா⁴வத³ஸ்ஸனபத³ட்டா²னா. மஜ்ஜ²த்தாகாரப்பவத்திலக்க²ணா உபேக்கா²பாரமீ, ஸமபா⁴வத³ஸ்ஸனரஸா, படிகா⁴னுனயவூபஸமபச்சுபட்டா²னா, கம்மஸ்ஸகதாபச்சவேக்க²ணபத³ட்டா²னா.

ஏத்த² ச கருணூபாயகோஸல்லபரிக்³க³ஹிததா தா³னாதீ³னம் பரிச்சாகா³தி³லக்க²ணஸ்ஸ விஸேஸனபா⁴வேன வத்தப்³பா³. கருணூபாயகோஸல்லபரிக்³க³ஹிதானி ஹி தா³னாதீ³னி போ³தி⁴ஸத்தஸந்தானே பவத்தானி தா³னாதி³பாரமியோ நாம ஹோந்தி.

கோ பச்சயோதி? அபி⁴னீஹாரோ தாவ பாரமீனம் பச்சயோ. யோ ஹி அயம் –

‘‘மனுஸ்ஸத்தம் லிங்க³ஸம்பத்தி, ஹேது ஸத்தா²ரத³ஸ்ஸனம்;

பப்³ப³ஜ்ஜா கு³ணஸம்பத்தி, அதி⁴காரோ ச ச²ந்த³தா;

அட்ட²த⁴ம்மஸமோதா⁴னா, அபி⁴னீஹாரோ ஸமிஜ்ஜ²தீ’’தி. (பு³. வம். 2.59) –

ஏவம் வுத்தோ அட்ட²த⁴ம்மஸமோதா⁴னஸம்பாதி³தோ ‘‘திண்ணோ தாரேய்யம் முத்தோ மோசேய்யம் த³ந்தோ த³மேய்யம் ஸந்தோ ஸமேய்யம் அஸ்ஸத்தோ² அஸ்ஸாஸேய்யம் பரினிப்³பு³தோ பரினிப்³பா³பேய்யம் ஸுத்³தோ⁴ ஸோதே⁴ய்யம் பு³த்³தோ⁴ போ³தே⁴ய்ய’’ந்திஆதி³னயப்பவத்தோ அபி⁴னீஹாரோ. ஸோ அவிஸேஸேன ஸப்³ப³பாரமீனம் பச்சயோ. தப்பவத்தியா ஹி உத்³த⁴ம் பாரமீனம் பவிசயுபட்டா²னஸமாதா³னாதி⁴ட்டா²னனிப்ப²த்தியோ மஹாபுரிஸானம் ஸம்ப⁴வந்தி.

தத்த² மனுஸ்ஸத்தந்தி மனுஸ்ஸத்தபா⁴வோ. மனுஸ்ஸத்தபா⁴வேயேவ ஹி ட²த்வா பு³த்³த⁴த்தம் பத்தே²ந்தஸ்ஸ பத்த²னா ஸமிஜ்ஜ²தி, ந நாக³ஸுபண்ணாதி³ஜாதீஸு டி²தஸ்ஸ. கஸ்மாதி சே? பு³த்³த⁴பா⁴வஸ்ஸ அனனுச்ச²விகபா⁴வதோ.

லிங்க³ஸம்பத்தீதி மனுஸ்ஸத்தபா⁴வே டி²தஸ்ஸாபி புரிஸஸ்ஸேவ பத்த²னா ஸமிஜ்ஜ²தி, ந இத்தி²யா ந பண்ட³கனபும்ஸகஉப⁴தோப்³யஞ்ஜனகானம் வா ஸமிஜ்ஜ²தி. கஸ்மாதி சே? யதா²வுத்தகாரணதோ லக்க²ணபாரிபூரியா அபா⁴வதோ ச. வுத்தஞ்சேதம் – ‘‘அட்டா²னமேதம், பி⁴க்க²வே, அனவகாஸோ, யம் இத்தீ² அரஹம் அஸ்ஸ ஸம்மாஸம்பு³த்³தோ⁴’’தி (அ. நி. 1.279; விப⁴. 809) வித்தா²ரோ. தஸ்மா மனுஸ்ஸஜாதிகஸ்ஸாபி இத்தி²லிங்கே³ டி²தஸ்ஸ பண்ட³காதீ³னம் வா பத்த²னா ந ஸமிஜ்ஜ²தி.

ஹேதூதி உபனிஸ்ஸயஸம்பத்தி. மனுஸ்ஸபுரிஸஸ்ஸாபி ஹி உபனிஸ்ஸயஸம்பன்னஸ்ஸேவ ஹேதுஸம்பத்தியா பத்த²னா ஸமிஜ்ஜ²தி, ந இதரஸ்ஸ.

ஸத்தா²ரத³ஸ்ஸனந்தி ஸத்து²ஸம்முகீ²பா⁴வோ. த⁴ரமானகபு³த்³த⁴ஸ்ஸேவ ஹி ஸந்திகே பத்தே²ந்தஸ்ஸ பத்த²னா ஸமிஜ்ஜ²தி, பரினிப்³பு³தே பன ப⁴க³வதி சேதியஸ்ஸ ஸந்திகே வா போ³தி⁴மூலே வா படிமாய வா பச்சேகபு³த்³த⁴பு³த்³த⁴ஸாவகானம் வா ஸந்திகே பத்த²னா ந ஸமிஜ்ஜ²தி. கஸ்மா? அதி⁴காரஸ்ஸ ப³லவபா⁴வாபா⁴வதோ. பு³த்³தா⁴னம் ஏவ பன ஸந்திகே பத்த²னா ஸமிஜ்ஜ²தி, அஜ்ஜா²ஸயஸ்ஸ உளாரபா⁴வேன தத³தி⁴காரஸ்ஸ ப³லவபா⁴வாபத்திதோ.

பப்³ப³ஜ்ஜாதி பு³த்³த⁴ஸ்ஸ ப⁴க³வதோ ஸந்திகே பத்தே²ந்தஸ்ஸாபி கம்மகிரியவாதீ³ஸு தாபஸேஸு வா பி⁴க்கூ²ஸு வா பப்³ப³ஜிதஸ்ஸேவ பத்த²னா ஸமிஜ்ஜ²தி, நோ கி³ஹிலிங்கே³ டி²தஸ்ஸ. கஸ்மா? பு³த்³த⁴பா⁴வஸ்ஸ அனனுச்ச²விகபா⁴வதோ. பப்³ப³ஜிதா ஏவ ஹி மஹாபோ³தி⁴ஸத்தா ஸம்மாஸம்போ³தி⁴ம் அதி⁴க³ச்ச²ந்தி, ந க³ஹட்ட²பூ⁴தா, தஸ்மா பணிதா⁴னகாலே ச பப்³ப³ஜ்ஜாலிங்க³ம் ஏவ ஹி யுத்தரூபம் கிஞ்ச கு³ணஸம்பத்திஅதி⁴ட்டா²னபா⁴வதோ.

கு³ணஸம்பத்தீதி அபி⁴ஞ்ஞாதி³கு³ணஸம்பதா³. பப்³ப³ஜிதஸ்ஸாபி ஹி அட்ட²ஸமாபத்திலாபி⁴னோ பஞ்சாபி⁴ஞ்ஞஸ்ஸேவ பத்த²னா ஸமிஜ்ஜ²தி, ந யதா²வுத்தகு³ணஸம்பத்தியா விரஹிதஸ்ஸ. கஸ்மா? பாரமிபவிசயஸ்ஸ அஸமத்த²பா⁴வதோ, உபனிஸ்ஸயஸம்பத்தியா அபி⁴ஞ்ஞாஸம்பத்தியா ச ஸமன்னாக³தத்தா மஹாபுரிஸா கதாபி⁴னீஹாரா ஸயமேவ பாரமீ பவிசேதும் ஸமத்தா² ஹோந்தி.

அதி⁴காரோதி அதி⁴கோ உபகாரோ. யதா²வுத்தகு³ணஸம்பன்னோபி ஹி யோ அத்தனோ ஜீவிதம்பி பு³த்³தா⁴னம் பரிச்சஜித்வா தஸ்மிம் காலே அதி⁴கம் உபகாரம் கரோதி, தஸ்ஸேவ அபி⁴னீஹாரோ ஸமிஜ்ஜ²தி, ந இதரஸ்ஸ.

ச²ந்த³தாதி கத்துகாமதாகுஸலச்ச²ந்தோ³. யஸ்ஸ ஹி யதா²வுத்தத⁴ம்மஸமன்னாக³தஸ்ஸ பு³த்³த⁴காரகத⁴ம்மானம் அத்தா²ய மஹந்தோ ச²ந்தோ³ மஹதீ பத்த²னா மஹதீ கத்துகாமதா அத்தி², தஸ்ஸேவ ஸமிஜ்ஜ²தி, ந இதரஸ்ஸ.

தத்ரித³ம் ச²ந்த³மஹந்ததாய ஓபம்மம் – யோ ஸகலசக்கவாளக³ப்³ப⁴ம் ஏகோத³கீபூ⁴தம் அத்தனோ பா³ஹுப³லேனேவ உத்தரித்வா பாரம் க³ந்தும் ஸமத்தோ², ஸோ பு³த்³த⁴த்தம் பாபுணாதீதி ஸுத்வா தம் து³க்கரதோ அத³ஹந்தோ ‘‘அஹம் தம் உத்தரித்வா பாரம் க³மிஸ்ஸாமீ’’தி ச²ந்த³ஜாதோ ஹோதி, ந தத்த² ஸங்கோசம் ஆபஜ்ஜதி. ததா² யோ ஸகலசக்கவாளம் வீதச்சிகானம் விக³ததூ⁴மானம் அங்கா³ரானம் பூரம் பாதே³ஹி அக்கமந்தோ அதிக்கமித்வா பரபா⁴க³ம் பாபுணிதும் ஸமத்தோ²…பே… ந தத்த² ஸங்கோசம் ஆபஜ்ஜதி. ததா² யோ ஸகலசக்கவாளம் ஸத்திஸூலேஹி ஸுனிஸிதப²லேஹி நிரந்தரம் ஆகிண்ணம் பாதே³ஹி அக்கமந்தோ அதிக்கமித்வா…பே… ந தத்த² ஸங்கோசம் ஆபஜ்ஜதி. ததா² யோ ஸகலசக்கவாளம் நிரந்தரம் க⁴னவேளுகு³ம்ப³ஸஞ்ச²ன்னம் கண்டகலதாவனக³ஹனம் வினிவிஜ்ஜி²த்வா பரபா⁴க³ம் க³ந்தும் ஸமத்தோ²…பே… ந தத்த² ஸங்கோசம் ஆபஜ்ஜதி. ததா² யோ ‘‘சத்தாரி அஸங்க்²யேய்யானி ஸதஸஹஸ்ஸஞ்ச கப்பே நிரயே பச்சித்வா பு³த்³த⁴த்தம் பத்தப்³ப³’’ந்தி ஸுத்வா தம் து³க்கரதோ அத³ஹந்தோ ‘‘அஹம் தத்த² பச்சித்வா பு³த்³த⁴த்தம் பாபுணிஸ்ஸாமீ’’தி ச²ந்த³ஜாதோ ஹோதி, ந தத்த² ஸங்கோசம் ஆபஜ்ஜதீதி ஏவமாதி³னா நயேன ஏத்த² ச²ந்த³ஸ்ஸ மஹந்தபா⁴வோ வேதி³தப்³போ³.

ஏவம் அட்ட²ங்க³ஸமன்னாக³தோ பனாயம் அபி⁴னீஹாரோ அத்த²தோ தேஸம் அட்ட²ன்னம் அங்கா³னம் ஸமோதா⁴னேன ததா²பவத்தோ சித்துப்பாதோ³தி வேதி³தப்³போ³. ஸோ ஸம்மதே³வ ஸம்மாஸம்போ³தி⁴யா பணிதா⁴னலக்க²ணோ. ‘‘அஹோ வதாஹம் அனுத்தரம் ஸம்மாஸம்போ³தி⁴ம் அபி⁴ஸம்பு³ஜ்ஜே²ய்யம், ஸப்³ப³ஸத்தானம் ஹிதஸுக²ம் நிப்பா²தே³ய்ய’’ந்தி ஏவமாதி³பத்த²னாரஸோ, போ³தி⁴ஸம்பா⁴ரஹேதுபா⁴வபச்சுபட்டா²னோ, மஹாகருணாபத³ட்டா²னோ, உபனிஸ்ஸயஸம்பத்திபத³ட்டா²னோ வா. அசிந்தேய்யம் பு³த்³த⁴பூ⁴மிம் அபரிமாணம் ஸத்தலோகஹிதஞ்ச ஆரப்³ப⁴ பவத்தியா ஸப்³ப³பு³த்³த⁴காரகத⁴ம்மமூலபூ⁴தோ பரமப⁴த்³த³கோ பரமகல்யாணோ அபரிமேய்யப்பபா⁴வோ புஞ்ஞவிஸேஸோதி த³ட்ட²ப்³போ³.

யஸ்ஸ ச உப்பத்தியா ஸஹேவ மஹாபுரிஸோ மஹாபோ³தி⁴யானபடிபத்திம் ஓதிண்ணோ நாம ஹோதி நியதபா⁴வஸமதி⁴க³மனதோ ததோ அனிவத்தனஸபா⁴வத்தா போ³தி⁴ஸத்தோதி ஸமஞ்ஞம் படிலப⁴தி, ஸப்³ப³பா⁴வேன ஸம்மாஸம்போ³தி⁴யம் ஸமாஸத்தமானஸதா போ³தி⁴ஸம்பா⁴ரஸிக்கா²ஸமத்த²தா சஸ்ஸ ஸந்திட்ட²தி. யதா²வுத்தாபி⁴னீஹாரஸமிஜ்ஜ²னேன ஹி மஹாபுரிஸா ஸப்³ப³ஞ்ஞுதஞ்ஞாணாதி⁴க³மனபுப்³ப³லிங்கே³ன ஸயம்பு⁴ஞாணேன ஸம்மதே³வ ஸப்³ப³பாரமியோ பவிசினித்வா ஸமாதா³ய அனுக்கமேன பரிபூரேந்தி. ததா² கதமஹாபி⁴னீஹாரோ ஹி ஸுமேத⁴பண்டி³தோ படிபஜ்ஜி. யதா²ஹ –

‘‘ஹந்த³ பு³த்³த⁴கரே த⁴ம்மே, விசினாமி இதோ சிதோ;

உத்³த⁴ம் அதோ⁴ த³ஸ தி³ஸா, யாவதா த⁴ம்மதா⁴துயா;

விசினந்தோ ததா³ த³க்கி²ம், பட²மம் தா³னபாரமி’’ந்தி. (பு³. வம். 2.115-116) –

வித்தா²ரோ. தஸ்ஸ ச அபி⁴னீஹாரஸ்ஸ சத்தாரோ பச்சயா சத்தாரோ ஹேதூ சத்தாரி ச ப³லானி வேதி³தப்³பா³னி.

தத்த² கதமே சத்தாரோ பச்சயா? இத⁴ மஹாபுரிஸோ பஸ்ஸதி ததா²க³தம் மஹதா பு³த்³தா⁴னுபா⁴வேன அச்ச²ரியப்³பு⁴தம் பாடிஹாரியம் கரோந்தம். தஸ்ஸ தம் நிஸ்ஸாய தம் ஆரம்மணம் கத்வா மஹாபோ³தி⁴யம் சித்தம் ஸந்திட்ட²தி – ‘‘மஹானுபா⁴வா வதாயம் த⁴ம்மதா⁴து, யஸ்ஸா ஸுப்படிவித்³த⁴த்தா ப⁴க³வா ஏவம் அச்ச²ரியப்³பு⁴தத⁴ம்மோ அசிந்தேய்யானுபா⁴வோ சா’’தி. ஸோ தமேவ மஹானுபா⁴வத³ஸ்ஸனம் நிஸ்ஸாய தம் பச்சயம் கத்வா ஸம்போ³தி⁴யம் அதி⁴முச்சந்தோ தத்த² சித்தம் ட²பேதி. அயம் பட²மோ பச்சயோ மஹாபி⁴னீஹாராய.

ந ஹேவ கோ² பஸ்ஸதி ததா²க³தஸ்ஸ யதா²வுத்தம் மஹானுபா⁴வதம், அபி ச கோ² ஸுணாதி ‘‘ஏதி³ஸோ ச ஏதி³ஸோ ச ப⁴க³வா’’தி. ஸோ தம் நிஸ்ஸாய தம் பச்சயம் கத்வா ஸம்போ³தி⁴யம் அதி⁴முச்சந்தோ தத்த² சித்தம் ட²பேதி. அயம் து³தியோ பச்சயோ மஹாபி⁴னீஹாராய.

ந ஹேவ கோ² பஸ்ஸதி ததா²க³தஸ்ஸ யதா²வுத்தம் மஹானுபா⁴வதம், நபி தம் பரதோ ஸுணாதி, அபி ச கோ² ததா²க³தஸ்ஸ த⁴ம்மம் தே³ஸேந்தஸ்ஸ ‘‘த³ஸப³லஸமன்னாக³தோ, பி⁴க்க²வே, ததா²க³தோ’’திஆதி³னா (ஸம். நி. 2.21-22) பு³த்³தா⁴னுபா⁴வபடிஸம்யுத்தம் த⁴ம்மம் ஸுணாதி. ஸோ தம் நிஸ்ஸாய தம் பச்சயம் கத்வா ஸம்போ³தி⁴யம் அதி⁴முச்சந்தோ தத்த² சித்தம் ட²பேதி. அயம் ததியோ பச்சயோ மஹாபி⁴னீஹாராய.

ந ஹேவ கோ² பஸ்ஸதி ததா²க³தஸ்ஸ யதா²வுத்தம் மஹானுபா⁴வதம், நபி தம் பரதோ ஸுணாதி, நபி ததா²க³தஸ்ஸ த⁴ம்மம் ஸுணாதி, அபி ச கோ² உளாரஜ்ஜா²ஸயோ கல்யாணாதி⁴முத்திகோ ‘‘அஹமேதம் பு³த்³த⁴வம்ஸம் பு³த்³த⁴தந்திம் பு³த்³த⁴பவேணிம் பு³த்³த⁴த⁴ம்மதம் பரிபாலேஸ்ஸாமீ’’தி யாவதே³வ த⁴ம்மம் ஏவ ஸக்கரோந்தோ க³ருகரோந்தோ மானேந்தோ பூஜேந்தோ த⁴ம்மம் அபசாயமானோ தம் நிஸ்ஸாய தம் பச்சயம் கத்வா ஸம்போ³தி⁴யம் அதி⁴முச்சந்தோ தத்த² சித்தம் ட²பேதி. அயம் சதுத்தோ² பச்சயோ மஹாபி⁴னீஹாராய.

தத்த² கதமே சத்தாரோ ஹேதூ மஹாபி⁴னீஹாராய? இத⁴ மஹாபுரிஸோ பகதியா உபனிஸ்ஸயஸம்பன்னோவ ஹோதி புரிமகேஸு பு³த்³தே⁴ஸு கதாதி⁴காரோ. அயம் பட²மோ ஹேது மஹாபி⁴னீஹாராய. புன சபரம் மஹாபுரிஸோ பகதியா கருணாஜ்ஜா²ஸயோ ஹோதி கருணாதி⁴முத்தோ ஸத்தானம் து³க்க²ம் அபனேதுகாமோ அபி ச அத்தனோ காயஜீவிதம் பரிச்சஜித்வா. அயம் து³தியோ ஹேது மஹாபி⁴னீஹாராய. புன சபரம் மஹாபுரிஸோ ஸகலதோபி வட்டது³க்க²தோ ஸத்தஹிதாய ச து³க்கரசரியதோ ஸுசிரம்பி காலம் க⁴டேந்தோ வாயமந்தோ அனிப்³பி³ன்னோ ஹோதி அனுத்ராஸீ யாவ இச்சி²தத்த²னிப்ப²த்தி. அயம் ததியோ ஹேது மஹாபி⁴னீஹாராய. புன சபரம் மஹாபுரிஸோ கல்யாணமித்தஸன்னிஸ்ஸிதோ ஹோதி, யோ அஹிததோ நிவாரேதி, ஹிதே பதிட்ட²பேதி. அயம் சதுத்தோ² ஹேது மஹாபி⁴னீஹாராய.

தத்ராயம் மஹாபுரிஸஸ்ஸ உபனிஸ்ஸயஸம்பதா³ – ஏகந்தேனேவஸ்ஸ யதா² அஜ்ஜா²ஸயோ ஸம்போ³தி⁴னின்னோ ஹோதி ஸம்போ³தி⁴போணோ ஸம்போ³தி⁴பப்³பா⁴ரோ, ததா² ஸத்தானம் ஹிதசரியா. யதோ சானேன புரிமபு³த்³தா⁴னம் ஸந்திகே ஸம்போ³தி⁴யா பணிதா⁴னம் கதம் ஹோதி மனஸா வாசாய ச ‘‘அஹம்பி ஏதி³ஸோ ஸம்மாஸம்பு³த்³தோ⁴ ஹுத்வா ஸம்மதே³வ ஸத்தானம் ஹிதஸுக²ம் நிப்பா²தே³ய்ய’’ந்தி. ஏவம் ஸம்பன்னூபனிஸ்ஸயஸ்ஸ பனஸ்ஸ இமானி உபனிஸ்ஸயஸம்பத்தியா லிங்கா³னி ப⁴வந்தி யேஹி ஸமன்னாக³தஸ்ஸ ஸாவகபோ³தி⁴ஸத்தேஹி ச பச்சேகபோ³தி⁴ஸத்தேஹி ச மஹாவிஸேஸோ மஹந்தம் நானாகரணம் பஞ்ஞாயதி இந்த்³ரியதோ படிபத்திதோ கோஸல்லதோ ச. இத⁴ உபனிஸ்ஸயஸம்பன்னோ மஹாபுரிஸோ யதா² விஸதி³ந்த்³ரியோ ஹோதி விஸத³ஞாணோ, ந ததா² இதரே. பரஹிதாய படிபன்னோ ஹோதி, ந அத்தஹிதாய. ததா² ஹி ஸோ யதா² ப³ஹுஜனஹிதாய ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானம் படிபஜ்ஜதி, ந ததா² இதரே. தத்த² ச கோஸல்லம் ஆவஹதி டா²னுப்பத்திகபடிபா⁴னேன டா²னாடா²னகுஸலதாய ச.

ததா² மஹாபுரிஸோ பகதியா தா³னஜ்ஜா²ஸயோ ஹோதி தா³னாபி⁴ரதோ, ஸதி தே³ய்யத⁴ம்மே தே³தி ஏவ, ந தா³னதோ ஸங்கோசம் ஆபஜ்ஜதி, ஸததம் ஸமிதம் ஸம்விபா⁴க³ஸீலோ ஹோதி, பமுதி³தோவ தே³தி ஆத³ரஜாதோ, ந உதா³ஸீனசித்தோ, மஹந்தம்பி தா³னம் த³த்வா ந ச தா³னேன ஸந்துட்டோ² ஹோதி, பகே³வ அப்பம், பரேஸஞ்ச உஸ்ஸாஹம் ஜனேந்தோ தா³னே வண்ணம் பா⁴ஸதி, தா³னபடிஸம்யுத்தம் த⁴ம்மகத²ம் கரோதி, அஞ்ஞே ச பரேஸம் தே³ந்தே தி³ஸ்வா அத்தமனோ ஹோதி, ப⁴யட்டா²னேஸு ச பரேஸம் அப⁴யம் தே³தீதி ஏவமாதீ³னி தா³னஜ்ஜா²ஸயஸ்ஸ மஹாபுரிஸஸ்ஸ தா³னபாரமியா லிங்கா³னி.

ததா² பாணாதிபாதாதீ³ஹி பாபத⁴ம்மேஹி ஹிரீயதி ஓத்தப்பதி, ஸத்தானம் அவிஹேட²னஜாதிகோ ஹோதி ஸோரதோ ஸுக²ஸீலோ அஸடோ² அமாயாவீ உஜுஜாதிகோ ஸுவசோ ஸோவசஸ்ஸகரணீயேஹி த⁴ம்மேஹி ஸமன்னாக³தோ முது³ஜாதிகோ அத்த²த்³தோ⁴ அனதிமானீ, பரஸந்தகம் நாதி³யதி அந்தமஸோ திணஸலாகம் உபாதா³ய, அத்தனோ ஹத்தே² நிக்கி²த்தம் இணம் வா க³ஹேத்வா பரம் ந விஸம்வாதே³தி, பரஸ்மிம் வா அத்தனோ ஸந்தகே ப்³யாமூள்ஹே விஸ்ஸரிதே வா தம் ஸஞ்ஞாபேத்வா படிபாதே³தி யதா² தம் ந பரஹத்த²க³தம் ஹோதி, அலோலுப்போ ஹோதி, பரபரிக்³க³ஹேஸு பாபகம் சித்தம்பி ந உப்பாதே³தி, இத்தி²ப்³யஸனாதீ³னி தூ³ரதோ பரிவஜ்ஜேதி, ஸச்சவாதீ³ ஸச்சஸந்தோ⁴ பி⁴ன்னானம் ஸந்தா⁴தா ஸஹிதானம் அனுப்பதா³தா, பியவாதீ³ மிஹிதபுப்³ப³ங்க³மோ புப்³ப³பா⁴ஸீ அத்த²வாதீ³ த⁴ம்மவாதீ³ அனபி⁴ஜ்ஜா²லு அப்³யாபன்னசித்தோ அவிபரீதத³ஸ்ஸனோ, கம்மஸ்ஸகதஞாணேன ஸச்சானுலோமிகஞாணேன கதஞ்ஞூ கதவேதீ³ வுத்³தா⁴பசாயீ ஸுவிஸுத்³தா⁴ஜீவோ த⁴ம்மகாமோ பரேபி த⁴ம்மே ஸமாத³பேதா ஸப்³பே³ன ஸப்³ப³ம் அகிச்சதோ ஸத்தே நிவாரேதா கிச்சேஸு பதிட்ட²பேதா அத்தனா ச தத்த² கிச்சே யோக³ம் ஆபஜ்ஜிதா, கத்வா வா பன ஸயம் அகத்தப்³ப³ம் ஸீக⁴ஞ்ஞேவ ததோ படிவிரதோ ஹோதீதி ஏவமாதீ³னி ஸீலஜ்ஜா²ஸயஸ்ஸ மஹாபுரிஸஸ்ஸ ஸீலபாரமியா லிங்கா³னி.

ததா² மந்த³கிலேஸோ ஹோதி மந்த³னீவரணோ, பவிவேகஜ்ஜா²ஸயோ அவிக்கே²பப³ஹுலோ, ந தஸ்ஸ பாபகா விதக்கா சித்தம் அன்வாஸ்ஸவந்தி, விவேகக³தஸ்ஸ சஸ்ஸ அப்பகஸிரேனேவ சித்தம் ஸமாதி⁴யதி, அமித்தபக்கே²பி துவடம் மேத்தசித்ததா ஸந்திட்ட²தி, பகே³வ இதரஸ்மிம், ஸதிமா ச ஹோதி சிரகதம்பி சிரபா⁴ஸிதம்பி ஸரிதா அனுஸ்ஸரிதா, மேதா⁴வீ ச ஹோதி த⁴ம்மோஜபஞ்ஞாய ஸமன்னாக³தோ, நிபகோ ச ஹோதி தாஸு தாஸு இதிகத்தப்³ப³தாஸு, ஆரத்³த⁴வீரியோ ச ஹோதி ஸத்தானம் ஹிதகிரியாஸு, க²ந்திப³லஸமன்னாக³தோ ச ஹோதி ஸப்³ப³ஸஹோ, அசலாதி⁴ட்டா²னோ ச ஹோதி த³ள்ஹஸமாதா³னோ, அஜ்ஜு²பேக்க²கோ ச ஹோதி உபேக்கா²டா²னீயேஸு த⁴ம்மேஸூதி ஏவமாதீ³னி மஹாபுரிஸஸ்ஸ நேக்க²ம்மஜ்ஜா²ஸயாதீ³னம் வஸேன நேக்க²ம்மபாரமிஆதீ³னம் லிங்கா³னி வேதி³தப்³பா³னி.

ஏவமேதேஹி போ³தி⁴ஸம்பா⁴ரலிங்கே³ஹி ஸமன்னாக³தஸ்ஸ மஹாபுரிஸஸ்ஸ யம் வுத்தம் ‘‘மஹாபி⁴னீஹாராய கல்யாணமித்தஸன்னிஸ்ஸயோ ஹேதூ’’தி. தத்ரித³ம் ஸங்கே²பதோ கல்யாணமித்தலக்க²ணம் – இத⁴ கல்யாணமித்தோ ஸத்³தா⁴ஸம்பன்னோ ஹோதி ஸீலஸம்பன்னோ ஸுதஸம்பன்னோ சாக³ஸம்பன்னோ வீரியஸம்பன்னோ ஸதிஸம்பன்னோ ஸமாதி⁴ஸம்பன்னோ பஞ்ஞாஸம்பன்னோ. தத்த² ஸத்³தா⁴ஸம்பத்தியா ஸத்³த³ஹதி ததா²க³தஸ்ஸ போ³தி⁴ம் கம்மப²லஞ்ச, தேன ஸம்மாஸம்போ³தி⁴யா ஹேதுபூ⁴தம் ஸத்தேஸு ஹிதேஸிதம் ந பரிச்சஜதி, ஸீலஸம்பத்தியா ஸத்தானம் பியோ ஹோதி மனாபோ க³ரு பா⁴வனீயோ சோத³கோ பாபக³ரஹீ வத்தா வசனக்க²மோ, ஸுதஸம்பத்தியா ஸத்தானம் ஹிதஸுகா²வஹம் க³ம்பீ⁴ரம் த⁴ம்மகத²ம் கத்தா ஹோதி, சாக³ஸம்பத்தியா அப்பிச்சோ² ஹோதி ஸந்துட்டோ² பவிவித்தோ அஸம்ஸட்டோ², வீரியஸம்பத்தியா ஆரத்³த⁴வீரியோ ஹோதி ஸத்தானம் ஹிதபடிபத்தியம், ஸதிஸம்பத்தியா உபட்டி²தஸதி ஹோதி அனவஜ்ஜத⁴ம்மேஸு, ஸமாதி⁴ஸம்பத்தியா அவிக்கி²த்தோ ஹோதி ஸமாஹிதசித்தோ, பஞ்ஞாஸம்பத்தியா அவிபரீதம் பஜானாதி, ஸோ ஸதியா குஸலாகுஸலானம் த⁴ம்மானம் க³தியோ ஸமன்வேஸமானோ பஞ்ஞாய ஸத்தானம் ஹிதாஹிதம் யதா²பூ⁴தம் ஜானித்வா ஸமாதி⁴னா தத்த² ஏகக்³க³சித்தோ ஹுத்வா வீரியேன அஹிதா ஸத்தே நிஸேதே⁴த்வா ஹிதே நியோஜேதி. தேனாஹ –

‘‘பியோ க³ரு பா⁴வனீயோ, வத்தா ச வசனக்க²மோ;

க³ம்பீ⁴ரஞ்ச கத²ம் கத்தா, நோ சட்டா²னே நியோஜகோ’’தி. (அ. நி. 7.37; நேத்தி. 113) –

ஏவம் கு³ணஸமன்னாக³தஞ்ச கல்யாணமித்தம் உபனிஸ்ஸாய மஹாபுரிஸோ அத்தனோ உபனிஸ்ஸயஸம்பத்திம் ஸம்மதே³வ பரியோத³பேதி. ஸுவிஸுத்³தா⁴ஸயபயோகோ³ ச ஹுத்வா சதூஹி ப³லேஹி ஸமன்னாக³தோ ந சிரேனேவ அட்ட²ங்கே³ ஸமோதா⁴னேத்வா மஹாபி⁴னீஹாரம் கரோந்தோ போ³தி⁴ஸத்தபா⁴வே பதிட்ட²ஹதி அனிவத்தித⁴ம்மோ நியதோ ஸம்போ³தி⁴பராயனோ.

தஸ்ஸிமானி சத்தாரி ப³லானி. அஜ்ஜ²த்திகப³லம் யா ஸம்மாஸம்போ³தி⁴யம் அத்தஸன்னிஸ்ஸயா த⁴ம்மகா³ரவேன அபி⁴ருசி ஏகந்தனின்னஜ்ஜா²ஸயதா, யாய மஹாபுரிஸோ அத்தாதி⁴பதி லஜ்ஜாபஸ்ஸயோ அபி⁴னீஹாரஸம்பன்னோ ச ஹுத்வா பாரமியோ பூரேத்வா ஸம்மாஸம்போ³தி⁴ம் பாபுணாதி. பா³ஹிரப³லம் யா ஸம்மாஸம்போ³தி⁴யம் பரஸன்னிஸ்ஸயா அபி⁴ருசி ஏகந்தனின்னஜ்ஜா²ஸயதா, யாய மஹாபுரிஸோ லோகாதி⁴பதி மானாபஸ்ஸயோ அபி⁴னீஹாரஸம்பன்னோ ச ஹுத்வா பாரமியோ பூரேத்வா ஸம்மாஸம்போ³தி⁴ம் பாபுணாதி. உபனிஸ்ஸயப³லம் யா ஸம்மாஸம்போ³தி⁴யம் உபனிஸ்ஸயஸம்பத்தியா அபி⁴ருசி ஏகந்தனின்னஜ்ஜா²ஸயதா, யாய மஹாபுரிஸோ திக்கி²ந்த்³ரியோ விஸத³தா⁴துகோ ஸதிஸன்னிஸ்ஸயோ அபி⁴னீஹாரஸம்பன்னோ ச ஹுத்வா பாரமியோ பூரேத்வா ஸம்மாஸம்போ³தி⁴ம் பாபுணாதி. பயோக³ப³லம் யா ஸம்மாஸம்போ³தி⁴யம் தஜ்ஜா பயோக³ஸம்பதா³ ஸக்கச்சகாரிதா ஸாதச்சகாரிதா, யாய மஹாபுரிஸோ விஸுத்³த⁴பயோகோ³ நிரந்தரகாரீ அபி⁴னீஹாரஸம்பன்னோ ச ஹுத்வா பாரமியோ பூரேத்வா ஸம்மாஸம்போ³தி⁴ம் பாபுணாதி.

ஏவமயம் சதூஹி பச்சயேஹி சதூஹி ஹேதூஹி சதூஹி ச ப³லேஹி ஸம்பன்னஸமுதா³க³மோ அட்ட²ங்க³ஸமோதா⁴னஸம்பாதி³தோ அபி⁴னீஹாரோ பாரமீனம் பச்சயோ மூலகாரணபா⁴வதோ. யஸ்ஸ ச பவத்தியா மஹாபுரிஸே சத்தாரோ அச்ச²ரியா அப்³பு⁴தா த⁴ம்மா பதிட்ட²ஹந்தி, ஸப்³ப³ஸத்தனிகாயம் அத்தனோ ஓரஸபுத்தம் விய பியசித்தேன பரிக்³க³ண்ஹாதி. ந சஸ்ஸ சித்தம் புத்தஸம்கிலேஸவஸேன ஸம்கிலிஸ்ஸதி. ஸத்தானம் ஹிதஸுகா²வஹோ சஸ்ஸ அஜ்ஜா²ஸயோ பயோகோ³ ச ஹோதி. அத்தனோ ச பு³த்³த⁴காரகத⁴ம்மா உபரூபரி வட்³ட⁴ந்தி பரிபச்சந்தி ச. யதோ ச மஹாபுரிஸோ உளாரதமேன புஞ்ஞாபி⁴ஸந்தே³ன குஸலாபி⁴ஸந்தே³ன பவத்தியா பச்சயேன ஸுக²ஸ்ஸாஹாரேன ஸமன்னாக³தோ ஸத்தானம் த³க்கி²ணேய்யோ உத்தமகா³ரவட்டா²னம் அஸதி³ஸம் புஞ்ஞக்கே²த்தஞ்ச ஹோதி. ஏவமனேககு³ணோ அனேகானிஸம்ஸோ மஹாபி⁴னீஹாரோ பாரமீனம் பச்சயோதி வேதி³தப்³போ³.

யதா² ச அபி⁴னீஹாரோ, ஏவம் மஹாகருணா உபாயகோஸல்லஞ்ச. தத்த² உபாயகோஸல்லம் நாம தா³னாதீ³னம் போ³தி⁴ஸம்பா⁴ரபா⁴வஸ்ஸ நிமித்தபூ⁴தா பஞ்ஞா, யாஹி மஹாகருணூபாயகோஸல்லதாஹி மஹாபுரிஸானம் அத்தஸுக²னிரபேக்க²தா நிரந்தரம் பரஹிதகரணபஸுததா ஸுது³க்கரேஹிபி மஹாபோ³தி⁴ஸத்தசரிதேஹி விஸாதா³பா⁴வோ பஸாத³ஸம்பு³த்³தி⁴த³ஸ்ஸனஸவனானுஸ்ஸரணகாலேஸுபி ஸத்தானம் ஹிதஸுக²ப்படிலாப⁴ஹேதுபா⁴வோ ச ஸம்பஜ்ஜதி. ததா² ஹிஸ்ஸ பஞ்ஞாய பு³த்³த⁴பா⁴வஸித்³தி⁴, கருணாய பு³த்³த⁴கம்மஸித்³தி⁴, பஞ்ஞாய ஸயம் தரதி, கருணாய பரே தாரேதி, பஞ்ஞாய பரது³க்க²ம் பரிஜானாதி, கருணாய பரது³க்க²பதிகாரம் ஆரப⁴தி, பஞ்ஞாய ச து³க்கே² நிப்³பி³ந்த³தி, கருணாய து³க்க²ம் ஸம்படிச்ச²தி, ததா² பஞ்ஞாய நிப்³பா³னாபி⁴முகோ² ஹோதி, கருணாய வட்டம் பாபுணாதி, ததா² கருணாய ஸம்ஸாராபி⁴முகோ² ஹோதி, பஞ்ஞாய தத்ர நாபி⁴ரமதி, பஞ்ஞாய ச ஸப்³ப³த்த² விரஜ்ஜதி, கருணானுக³தத்தா ந ச ந ஸப்³பே³ஸம் அனுக்³க³ஹாய பவத்தோ, கருணாய ஸப்³பே³பி அனுகம்பதி, பஞ்ஞானுக³தத்தா ந ச ந ஸப்³ப³த்த² விரத்தசித்தோ, பஞ்ஞாய ச அஹம்காரமமம்காராபா⁴வோ, கருணாய ஆலஸியதீ³னதாபா⁴வோ, ததா² பஞ்ஞாகருணாஹி யதா²க்கமம் அத்தபரனாத²தா தீ⁴ரவீரபா⁴வோ, அனத்தந்தபஅபரந்தபதா, அத்தஹிதபரஹிதனிப்ப²த்தி, நிப்³ப⁴யாபி⁴ம்ஸனகபா⁴வோ, த⁴ம்மாதி⁴பதிலோகாதி⁴பதிதா, கதஞ்ஞுபுப்³ப³காரிபா⁴வோ, மோஹதண்ஹாவிக³மோ, விஜ்ஜாசரணஸித்³தி⁴, ப³லவேஸாரஜ்ஜனிப்ப²த்தீதி ஸப்³ப³ஸ்ஸாபி பாரமிதாப²லஸ்ஸ விஸேஸேன உபாயபா⁴வதோ பஞ்ஞாகருணா பாரமீனம் பச்சயோ. இத³ஞ்ச த்³வயம் பாரமீனம் விய பணிதா⁴னஸ்ஸாபி பச்சயோ.

ததா² உஸ்ஸாஹஉம்மங்க³அவத்தா²னஹிதசரியா ச பாரமீனம் பச்சயாதி வேதி³தப்³பா³, யா பு³த்³த⁴பா⁴வஸ்ஸ உப்பத்திட்டா²னதாய பு³த்³த⁴பூ⁴மியோதி வுச்சந்தி. தத்த² உஸ்ஸாஹோ நாம போ³தி⁴ஸம்பா⁴ரானம் அப்³பு⁴ஸ்ஸஹனவீரியம். உம்மங்கோ³ நாம போ³தி⁴ஸம்பா⁴ரேஸு உபாயகோஸல்லபூ⁴தா பஞ்ஞா. அவத்தா²னம் நாம அதி⁴ட்டா²னம் அசலாதி⁴ட்டா²னதா. ஹிதசரியா நாம மேத்தாபா⁴வனா கருணாபா⁴வனா ச.

ததா² நேக்க²ம்மபவிவேகஅலோபா⁴தோ³ஸாமோஹனிஸ்ஸரணப்பபே⁴தா³ ச² அஜ்ஜா²ஸயா. நேக்க²ம்மஜ்ஜா²ஸயா ஹி போ³தி⁴ஸத்தா ஹோந்தி காமேஸு க⁴ராவாஸே ச தோ³ஸத³ஸ்ஸாவினோ, ததா² பவிவேகஜ்ஜா²ஸயா ஸங்க³ணிகாய தோ³ஸத³ஸ்ஸாவினோ, அலோப⁴ஜ்ஜா²ஸயா லோபே⁴ தோ³ஸத³ஸ்ஸாவினோ, அதோ³ஸஜ்ஜா²ஸயா தோ³ஸே தோ³ஸத³ஸ்ஸாவினோ, அமோஹஜ்ஜா²ஸயா மோஹே தோ³ஸத³ஸ்ஸாவினோ, நிஸ்ஸரணஜ்ஜா²ஸயா ஸப்³ப³ப⁴வேஸு தோ³ஸத³ஸ்ஸாவினோதி. தஸ்மா ஏதே போ³தி⁴ஸத்தானம் ச² அஜ்ஜா²ஸயா தா³னாதீ³னம் பாரமீனம் பச்சயாதி வேதி³தப்³பா³. ந ஹி லோபா⁴தீ³ஸு ஆதீ³னவத³ஸ்ஸனேன அலோபா⁴தீ³னம் அதி⁴கபா⁴வேன ச வினா தா³னாதி³பாரமியோ ஸம்ப⁴வந்தி, அலோபா⁴தீ³னஞ்ஹி அதி⁴கபா⁴வேன பரிச்சாகா³தி³னின்னசித்ததா அலோப⁴ஜ்ஜா²ஸயாதி³தாதி வேதி³தப்³பா³.

யதா² சேதே ஏவம் தா³னஜ்ஜா²ஸயதாத³யோபி போ³தி⁴யா சரந்தானம் போ³தி⁴ஸத்தானம் தா³னாதி³பாரமீனம் பச்சயோ. தா³னஜ்ஜா²ஸயதாய ஹி போ³தி⁴ஸத்தா தப்படிபக்கே² மச்சே²ரே தோ³ஸத³ஸ்ஸாவினோ ஹுத்வா ஸம்மதே³வ தா³னபாரமிம் பரிபூரேந்தி. ஸீலஜ்ஜா²ஸயதாய து³ஸ்ஸீல்யே தோ³ஸத³ஸ்ஸாவினோ ஹுத்வா ஸம்மதே³வ ஸீலபாரமிம் பரிபூரேந்தி. நேக்க²ம்மஜ்ஜா²ஸயதாய காமேஸு க⁴ராவாஸே ச, யதா²பூ⁴தஞாணஜ்ஜா²ஸயதாய அஞ்ஞாணே விசிகிச்சா²ய ச, வீரியஜ்ஜா²ஸயதாய கோஸஜ்ஜே, க²ந்தியஜ்ஜா²ஸயதாய அக்க²ந்தியம், ஸச்சஜ்ஜா²ஸயதாய விஸம்வாதே³, அதி⁴ட்டா²னஜ்ஜா²ஸயதாய அனதி⁴ட்டா²னே, மேத்தாஜ்ஜா²ஸயதாய ப்³யாபாதே³, உபேக்கா²ஜ்ஜா²ஸயதாய லோகத⁴ம்மேஸு ஆதீ³னவத³ஸ்ஸாவினோ ஹுத்வா ஸம்மதே³வ நேக்க²ம்மாதி³பாரமியோ பரிபூரேந்தி. தா³னஜ்ஜா²ஸயதாத³யோ தா³னாதி³பாரமீனம் நிப்ப²த்திகாரணத்தா பச்சயோ.

ததா² அபரிச்சாக³பரிச்சாகா³தீ³ஸு யதா²க்கமம் ஆதீ³னவானிஸம்ஸபச்சவேக்க²ணா தா³னாதி³பாரமீனம் பச்சயோ. தத்தா²யம் பச்சவேக்க²ணாவிதி⁴கே²த்தவத்து²ஹிரஞ்ஞஸுவண்ணகோ³மஹிம்ஸதா³ஸிதா³ஸபுத்ததா³ராதி³பரிக்³க³ஹப்³யாஸத்தசித்தானம் ஸத்தானம் கே²த்தாதீ³னம் வத்து²காமபா⁴வேன ப³ஹுபத்த²னீயபா⁴வதோ ராஜசோராதி³ஸாதா⁴ரணபா⁴வதோ விவாதா³தி⁴ட்டா²னதோ ஸபத்தகரணதோ நிஸ்ஸாரதோ படிலாப⁴பரிபாலனேஸு பரவிஹேட²னஹேதுதோ வினாஸனிமித்தஞ்ச ஸோகாதி³அனேகவிஹிதப்³யஸனாவஹதோ ததா³ஸத்தினிதா³னஞ்ச மச்சே²ரமலபரியுட்டி²தசித்தானம் அபாயூபபத்திஹேதுபா⁴வதோதி ஏவம் விவித⁴விபுலானத்தா²வஹானி பரிக்³க³ஹவத்தூ²னி நாம. தேஸம் பரிச்சாகோ³யேவ ஏகோ ஸோத்தி²பா⁴வோதி பரிச்சாகே³ அப்பமாதோ³ கரணீயோ.

அபி ச யாசகோ யாசமானோ அத்தனோ கு³ய்ஹஸ்ஸ ஆசிக்க²னதோ ‘‘மய்ஹம் விஸ்ஸாஸிகோ’’தி ச, ‘‘பஹாய க³மனீயமத்தனோ ஸந்தகம் க³ஹேத்வா பரலோகம் யாஹீதி மய்ஹம் உபதே³ஸகோ’’தி ச, ‘‘ஆதி³த்தே விய அகா³ரே மரணக்³கி³னா ஆதி³த்தே லோகே ததோ மய்ஹம் ஸந்தகஸ்ஸ அபவாஹகஸஹாயோ’’தி ச, ‘‘அபவாஹிதஸ்ஸ சஸ்ஸ அஜா²பனனிக்கே²பட்டா²னபூ⁴தோ’’தி ச தா³னஸங்கா²தே கல்யாணகம்மஸ்மிம் ஸஹாயபா⁴வதோ ஸப்³ப³ஸம்பத்தீனம் அக்³க³பூ⁴தாய பரமது³ல்லபா⁴ய பு³த்³த⁴பூ⁴மியா ஸம்பத்திஹேதுபா⁴வதோ ச ‘‘பரமோ கல்யாணமித்தோ’’தி ச பச்சவேக்கி²தப்³ப³ம்.

ததா² ‘‘உளாரே கம்மனி அனேனாஹம் ஸம்பா⁴விதோ, தஸ்மா ஸா ஸம்பா⁴வனா அவிததா² காதப்³பா³’’தி ச, ‘‘ஏகந்தபே⁴தி³தாய ஜீவிதஸ்ஸ அயாசிதேனாபி மயா தா³தப்³ப³ம், பகே³வ யாசிதேனா’’தி ச, ‘‘உளாரஜ்ஜா²ஸயேஹி க³வேஸித்வாபி தா³தப்³ப³தோ ஸயமேவாக³தோ மம புஞ்ஞேனா’’தி ச ‘‘யாசகஸ்ஸ தா³னாபதே³ஸேன மய்ஹமேவாயமனுக்³க³ஹோ’’தி ச, ‘‘அஹம் விய அயம் ஸப்³போ³பி லோகோ மயா அனுக்³க³ஹேதப்³போ³’’தி ச, ‘‘அஸதி யாசகே கத²ம் மய்ஹம் தா³னபாரமீ பூரேய்யா’’தி ச, ‘‘யாசகானமேவ சத்தா²ய மயா ஸப்³போ³ பரிக்³க³ஹேதப்³போ³’’தி ச, ‘‘மம் அயாசித்வாவ மம ஸந்தகம் யாசகா கதா³ ஸயமேவ க³ண்ஹேய்யு’’ந்தி ச, ‘‘கத²மஹம் யாசகானம் பியோ சஸ்ஸம் மனாபோ’’தி ச, ‘‘கத²ம் வா தே மய்ஹம் பியா சஸ்ஸு மனாபா’’தி ச, ‘‘கத²ம் வாஹம் த³த³மானோ த³த்வாபி ச அத்தமனோ சஸ்ஸம் பமுதி³தோ பீதிஸோமனஸ்ஸஜாதோ’’தி ச, ‘‘கத²ம் வா மே யாசகா ப⁴வேய்யும் உளாரோ ச தா³னஜ்ஜா²ஸயோ’’தி ச, ‘‘கத²ம் வாஹமயாசிதோ ஏவ யாசகானம் ஹத³யமஞ்ஞாய த³தே³ய்ய’’ந்தி ச, ‘‘ஸதி த⁴னே யாசகே ச அபரிச்சாகோ³ மஹதீ மய்ஹம் வஞ்சனா’’தி ச, ‘‘கத²ம் வாஹம் அத்தனோ அங்கா³னி ஜீவிதம் வாபி யாசகானம் பரிச்சஜேய்ய’’ந்தி ச பரிச்சாக³னின்னதா உபட்ட²பேதப்³பா³. அபி ச ‘‘அத்தோ² நாமாயம் நிரபேக்க²ம் தா³யகமனுக³ச்ச²தி, யதா² தம் நிரபேக்க²ம் கே²பகம் கிடகோ’’தி ச அத்தே² நிரபேக்க²தாய சித்தம் உப்பாதே³தப்³ப³ம்.

யாசமானோ பன யதி³ பியபுக்³க³லோ ஹோதி, ‘‘பியோ மம் யாசதீ’’தி ஸோமனஸ்ஸம் உப்பாதே³தப்³ப³ம். அத² உதா³ஸீனபுக்³க³லோ ஹோதி, ‘‘அயம் மம் யாசமானோ அத்³தா⁴ இமினா பரிச்சாகே³ன மித்தோ ஹோதீ’’தி ஸோமனஸ்ஸம் உப்பாதே³தப்³ப³ம். த³த³ந்தோபி ஹி யாசகானம் பியோ ஹோதீதி. அத² பன வேரீ புக்³க³லோ யாசதி, ‘‘பச்சத்தி²கோ மம் யாசதி, அயம் மம் யாசமானோ அத்³தா⁴ இமினா பரிச்சாகே³ன வேரீ பியோ மித்தோ ஹோதீ’’தி விஸேஸேன ஸோமனஸ்ஸம் உப்பாதே³தப்³ப³ம். ஏவம் பியபுக்³க³லே விய மஜ்ஜ²த்தவேரிபுக்³க³லேஸுபி மேத்தாபுப்³ப³ங்க³மம் கருணம் உபட்ட²பேத்வாவ தா³தப்³ப³ம்.

ஸசே பனஸ்ஸ சிரகாலபரிபா⁴விதத்தா லோப⁴ஸ்ஸ தே³ய்யத⁴ம்மவிஸயா லோப⁴த⁴ம்மா உப்பஜ்ஜேய்யும், தேன போ³தி⁴ஸத்தபடிஞ்ஞேன இதி படிஸஞ்சிக்கி²தப்³ப³ம் ‘‘நனு தயா ஸப்புரிஸஸம்போ³தா⁴ய அபி⁴னீஹாரம் கரோந்தேன ஸப்³ப³ஸத்தானம் உபகாரத்தா²ய அயம் காயோ நிஸ்ஸட்டோ² தப்பரிச்சாக³மயஞ்ச புஞ்ஞம், தத்த² நாம தே பா³ஹிரேபி வத்து²ஸ்மிம் அபி⁴ஸங்க³ப்பவத்தி ஹத்தி²ஸினானஸதி³ஸீ ஹோதி, தஸ்மா தயா ந கத்த²சி ஸங்கோ³ உப்பாதே³தப்³போ³. ஸேய்யதா²பி நாம மஹதோ பே⁴ஸஜ்ஜருக்க²ஸ்ஸ திட்ட²தோ மூலம் மூலத்தி²கா ஹரந்தி, பபடிகம் தசம் க²ந்த⁴ம் விடபம் ஸாரம் ஸாக²ம் பலாஸம் புப்ப²ம் ப²லம் ப²லத்தி²கா ஹரந்தி, ந தஸ்ஸ ருக்க²ஸ்ஸ ‘மய்ஹம் ஸந்தகம் ஏதே ஹரந்தீ’தி விதக்கஸமுதா³சாரோ ஹோதி, ஏவமேவ ஸப்³ப³லோகஹிதாய உஸ்ஸுக்கமாபஜ்ஜந்தேன மயா மஹாது³க்கே² அகதஞ்ஞுகே நிச்சாஸுசிம்ஹி காயே பரேஸம் உபகாராய வினியுஜ்ஜமானே அணுமத்தோபி மிச்சா²விதக்கோ ந உப்பாதே³தப்³போ³. கோ வா ஏத்த² விஸேஸோ அஜ்ஜ²த்திகபா³ஹிரேஸு மஹாபூ⁴தேஸு ஏகந்தபே⁴த³னவிகிரணவித்³த⁴ம்ஸனத⁴ம்மேஸு, கேவலம் பன ஸம்மோஹவிஜம்பி⁴தமேதம், யதி³த³ம் ஏதம் மம ஏஸோஹமஸ்மி ஏஸோ மே அத்தாதி அபி⁴னிவேஸோ. தஸ்மா பா³ஹிரேஸு விய அஜ்ஜ²த்திகேஸுபி கரசரணனயனாதீ³ஸு மம்ஸாதீ³ஸு ச அனபேக்கே²ன ஹுத்வா ‘தம் தத³த்தி²கா ஹரந்தூ’தி நிஸ்ஸட்ட²சித்தேன ப⁴விதப்³ப³’’ந்தி.

ஏவம் படிஸஞ்சிக்க²தோ சஸ்ஸ ஸம்போ³தா⁴ய பஹிதத்தஸ்ஸ காயஜீவிதேஸு நிரபேக்க²ஸ்ஸ அப்பகஸிரேனேவ காயவசீமனோகம்மானி ஸுவிஸுத்³தா⁴னி ஹோந்தி. ஸோ ஸுவிஸுத்³த⁴காயவசீமனோகம்மந்தோ விஸுத்³தா⁴ஜீவோ ஞாயபடிபத்தியம் டி²தோ அபாயுபாயகோஸல்லஸமன்னாக³மேன பி⁴ய்யோஸோமத்தாய தே³ய்யத⁴ம்மபரிச்சாகே³ன அப⁴யதா³னஸத்³த⁴ம்மதா³னேஹி ச ஸப்³ப³ஸத்தே அனுக்³க³ண்ஹிதும் ஸமத்தோ² ஹோதீதி அயம் தாவ தா³னபாரமியம் பச்சவேக்க²ணானயோ.

ஸீலபாரமியம் பன ஏவம் பச்சவேக்கி²தப்³ப³ம் – இத³ஞ்ஹி ஸீலம் நாம க³ங்கோ³த³காதீ³ஹி விஸோதே⁴தும் அஸக்குணேய்யஸ்ஸ தோ³ஸமலஸ்ஸ விக்கா²லனஜலம், ஹரிசந்த³னாதீ³ஹி வினேதும் அஸக்குணேய்யஸ்ஸ ராகா³தி³பரிளாஹஸ்ஸ வினயனம், ஹாரமகுடகுண்ட³லாதீ³ஹி பசுரஜனாலங்காரேஹி அஸாதா⁴ரணோ ஸாதூ⁴னம் அலங்காரவிஸேஸோ, ஸப்³ப³தி³ஸாவாயனதோ அகித்திமோ ஸப்³ப³காலானுரூபோ ச ஸுரபி⁴க³ந்தோ⁴, க²த்தியமஹாஸாலாதீ³ஹி தே³வதாஹி ச வந்த³னீயாதி³பா⁴வாவஹனதோ பரமோ வஸீகரணமந்தோ, சாதுமஹாராஜிகாதி³தே³வலோகாரோஹணஸோபானபந்தி, ஜா²னாபி⁴ஞ்ஞானம் அதி⁴க³மூபாயோ, நிப்³பா³னமஹானக³ரஸ்ஸ ஸம்பாபகமக்³கோ³, ஸாவகபோ³தி⁴பச்சேகபோ³தி⁴ஸம்மாஸம்போ³தீ⁴னம் பதிட்டா²னபூ⁴மி, யம் யம் வா பனிச்சி²தம் பத்தி²தம், தஸ்ஸ தஸ்ஸ ஸமிஜ்ஜ²னூபாயபா⁴வதோ சிந்தாமணிகப்பருக்கா²தி³கே ச அதிஸேதி.

வுத்தஞ்சேதம் ப⁴க³வதா – ‘‘இஜ்ஜ²தி, பி⁴க்க²வே, ஸீலவதோ சேதோபணிதி⁴விஸுத்³த⁴த்தா’’தி (தீ³. நி. 3.337; அ. நி. 8.35). அபரம்பி வுத்தம் – ‘‘ஆகங்கே²ய்ய சே, பி⁴க்க²வே, பி⁴க்கு² ‘ஸப்³ரஹ்மசாரீனம் பியோ ச அஸ்ஸம் மனாபோ ச க³ரு ச பா⁴வனீயோ சா’தி, ஸீலேஸ்வேவஸ்ஸ பரிபூரகாரீ’’திஆதி³ (ம. நி. 1.65). ததா² ‘‘அவிப்படிஸாரத்தா²னி கோ², ஆனந்த³, குஸலானி ஸீலானீ’’தி (அ. நி. 11.1). ‘‘பஞ்சிமே, க³ஹபதயோ, ஆனிஸம்ஸா ஸீலவதோ ஸீலஸம்பதா³யா’’திஆதி³ஸுத்தானஞ்ச (தீ³. நி. 2.150; 3.316; அ. நி. 5.213; மஹாவ. 285) வஸேன ஸீலஸ்ஸ கு³ணா பச்சவேக்கி²தப்³பா³. ததா² அக்³கி³க்க²ந்தோ⁴பமஸுத்தாதீ³னம் (அ. நி. 7.72) வஸேன ஸீலவிரஹே ஆதீ³னவா. பீதிஸோமனஸ்ஸனிமித்ததோ அத்தானுவாத³பராபவாத³த³ண்ட³து³க்³க³திப⁴யாபா⁴வதோ விஞ்ஞூஹி பாஸம்ஸபா⁴வதோ அவிப்படிஸாரஹேதுதோ ஸோத்தி²ட்டா²னதோ அதிஜனஸாபதேய்யாதி⁴பதேய்யாயுரூபட்டா²னப³ந்து⁴மித்தஸம்பத்தீனம் அதிஸயனதோ ச ஸீலம் பச்சவேக்கி²தப்³ப³ம். ஸீலவதோ ஹி அத்தனோ ஸீலஸம்பதா³ஹேது மஹந்தம் பீதிஸோமனஸ்ஸம் உப்பஜ்ஜதி – ‘‘கதம் வத மயா குஸலம், கதம் கல்யாணம், கதம் பீ⁴ருத்தாண’’ந்தி.

ததா² ஸீலவதோ அத்தா ந உபவத³தி, ந பரே விஞ்ஞூ, த³ண்ட³து³க்³க³திப⁴யானம் ஸம்ப⁴வோ ஏவ நத்தி². ‘‘ஸீலவா புரிஸபுக்³க³லோ கல்யாணத⁴ம்மோ’’தி விஞ்ஞூனம் பாஸம்ஸோ ஹோதி. ததா² ஸீலவதோ ய்வாயம் ‘‘கதம் வத மயா பாபம், கதம் லுத்³த³கம், கதம் கிப்³பி³ஸ’’ந்தி து³ஸ்ஸீலஸ்ஸ விப்படிஸாரோ உப்பஜ்ஜதி, ஸோ ந ஹோதி. ஸீலஞ்ச நாமேதம் அப்பமாதா³தி⁴ட்டா²னதோ போ⁴க³ப்³யஸனாதி³பரிஹாரமுகே²ன மஹதோ அத்த²ஸ்ஸ ஸாத⁴னதோ மங்க³லபா⁴வதோ ச பரமம் ஸோத்தி²ட்டா²னம், நிஹீனஜச்சோபி ஸீலவா க²த்தியமஹாஸாலாதீ³னம் பூஜனீயோ ஹோதீதி குலஸம்பத்திம் அதிஸேதி ஸீலஸம்பதா³, ‘‘தம் கிம் மஞ்ஞஸி, மஹாராஜ? இத⁴ தே அஸ்ஸ தா³ஸோ கம்மகரோ’’திஆதி³வசனஞ்சேத்த² (தீ³. நி. 1.186) ஸாத⁴கம். சோராதீ³ஹி அஸாதா⁴ரணதோ பரலோகானுக³மனதோ மஹப்ப²லபா⁴வதோ ஸமதா²தி³கு³ணாதி⁴ட்டா²னதோ ச பா³ஹிரத⁴னம் அதிஸேதி ஸீலம். பரமஸ்ஸ சித்திஸ்ஸரியஸ்ஸ அதி⁴ட்டா²னபா⁴வதோ க²த்தியாதீ³னம் இஸ்ஸரியம் அதிஸேதி ஸீலம். ஸீலனிமித்தஞ்ஹி தம்தம்ஸத்தனிகாயேஸு ஸத்தானம் இஸ்ஸரியம், வஸ்ஸஸததீ³க⁴ப்பமாணதோ ஜீவிததோ ஏகாஹம்பி ஸீலவதோ ஜீவிதஸ்ஸ விஸிட்ட²தாவசனதோ ஸதி ச ஜீவிதே ஸிக்கா²னிக்கி²பனஸ்ஸ மரணதாவசனதோ ஸீலம் ஜீவிததோ விஸிட்ட²தரம். வேரீனம்பி மனுஞ்ஞபா⁴வாவஹனதோ ஜராரோக³விபத்தீஹி அனபி⁴ப⁴வனீயதோ ச ரூபஸம்பத்திம் அதிஸேதி ஸீலம். பாஸாத³ஹம்மியாதி³ட்டா²னவிஸேஸே ராஜயுவராஜஸேனாபதிஆதி³ட்டா²னவிஸேஸே ச அதிஸேதி ஸீலம் ஸுக²விஸேஸாதி⁴ட்டா²னபா⁴வதோ. ஸபா⁴வஸினித்³தே⁴ ஸந்திகாவசரேபி ப³ந்து⁴ஜனே மித்தஜனே ச அதிஸேதி ஏகந்தஹிதஸம்பாத³னதோ பரலோகானுக³மனதோ ச ‘‘ந தம் மாதாபிதா கயிரா’’திஆதி³வசனஞ்சேத்த² (த⁴. ப. 43) ஸாத⁴கம். ததா² ஹத்தி²அஸ்ஸரத²பத்திப³லகாயேஹி மந்தாக³த³ஸோத்தா²னப்பயோகே³ஹி ச து³ராரக்க²ம் அத்தானம் ஆரக்கா²பா⁴வேன ஸீலமேவ விஸிட்ட²தரம் அத்தாதீ⁴னதோ அபராதீ⁴னதோ மஹாவிஸயதோ ச. தேனேவாஹ – ‘‘த⁴ம்மோ ஹவே ரக்க²தி த⁴ம்மசாரி’’ந்திஆதி³ (ஜா. 1.10.102). ஏவமனேககு³ணஸமன்னாக³தம் ஸீலந்தி பச்சவேக்க²ந்தஸ்ஸ அபரிபுண்ணா சேவ ஸீலஸம்பதா³ பாரிபூரிம் க³ச்ச²தி அபரிஸுத்³தா⁴ ச பாரிஸுத்³தி⁴ம்.

ஸசே பனஸ்ஸ தீ³க⁴ரத்தம் பரிசயேன ஸீலபடிபக்கா² த⁴ம்மா தோ³ஸாத³யோ அந்தரந்தரா உப்பஜ்ஜேய்யும், தேன போ³தி⁴ஸத்தபடிஞ்ஞேன ஏவம் படிஸஞ்சிக்கி²தப்³ப³ம் – நனு தயா ஸம்போ³தா⁴ய பணிதா⁴னம் கதம், ஸீலவிகலேன ச ந ஸக்கா லோகியாபி ஸம்பத்தியோ பாபுணிதும், பகே³வ லோகுத்தரா, ஸப்³ப³ஸம்பத்தீனம் பன அக்³க³பூ⁴தாய ஸம்மாஸம்போ³தி⁴யா அதி⁴ட்டா²னபூ⁴தேன ஸீலேன பரமுக்கம்ஸக³தேன ப⁴விதப்³ப³ம், தஸ்மா ‘‘கிகீவ அண்ட³’’ந்திஆதி³னா (விஸுத்³தி⁴. 1.19; தீ³. நி. அட்ட². 1.7) வுத்தனயேன ஸம்மா ஸீலம் ரக்க²ந்தேன ஸுட்டு²தரம் தயா பேஸலேன ப⁴விதப்³ப³ம்.

அபி ச தயா த⁴ம்மதே³ஸனாய யானத்தயே ஸத்தானம் அவதாரணபரிபாசனானி காதப்³பா³னி, ஸீலவிகலஸ்ஸ ச வசனம் ந பச்சேதப்³ப³ம் ஹோதி, அஸப்பாயாஹாரவிசாரஸ்ஸ விய வேஜ்ஜஸ்ஸ திகிச்ச²னம், தஸ்மா கதா²ஹம் ஸத்³தே⁴ய்யோ ஹுத்வா ஸத்தானம் அவதாரணபரிபாசனானி கரேய்யந்தி ஸபா⁴வபரிஸுத்³த⁴ஸீலேன ப⁴விதப்³ப³ம். கிஞ்ச ஜா²னாதி³கு³ணவிஸேஸயோகே³ன மே ஸத்தானம் உபகாரகரணஸமத்த²தா பஞ்ஞாபாரமிஆதி³பரிபூரணஞ்ச, ஜா²னாத³யோ ச கு³ணா ஸீலபாரிஸுத்³தி⁴ம் வினா ந ஸம்ப⁴வந்தீதி ஸம்மதே³வ ஸீலம் பரிஸோதே⁴தப்³ப³ம்.

ததா² ‘‘ஸம்பா³தோ⁴ க⁴ராவாஸோ ரஜோபதோ²’’திஆதி³னா (தீ³. நி. 1.191; ஸம். நி. 2.154; ம. நி. 1.291; 2.10) க⁴ராவாஸே, ‘‘அட்டி²கங்கலூபமா காமா’’திஆதி³னா (ம. நி. 1.234; பாசி. 175) ‘‘மாதாபி புத்தேன விவத³தீ’’திஆதி³னா (ம. நி. 1.178) ச காமேஸு, ‘‘ஸேய்யதா²பி புரிஸோ இணம் ஆதா³ய கம்மந்தே பயோஜேய்யா’’திஆதி³னா (தீ³. நி. 1.218) காமச்ச²ந்தா³தீ³ஸு ஆதீ³னவத³ஸ்ஸனபுப்³ப³ங்க³மா வுத்தவிபரியாயேன ‘‘அப்³போ⁴காஸோ பப்³ப³ஜ்ஜா’’திஆதி³னா (தீ³. நி. 1.191; ஸம். நி. 2.154) பப்³ப³ஜ்ஜாதீ³ஸு ஆனிஸம்ஸபடிஸங்கா²வஸேன நேக்க²ம்மபாரமியம் பச்சவேக்க²ணா வேதி³தப்³பா³. அயமேத்த² ஸங்கே²போ, வித்தா²ரோ பன து³க்க²க்க²ந்த⁴- (ம. நி. 1.163 ஆத³யோ) ஆஸிவிஸோபமஸுத்தா- (ஸம். நி. 4.238) தி³வஸேன வேதி³தப்³போ³.

ததா² ‘‘பஞ்ஞாய வினா தா³னாத³யோ த⁴ம்மா ந விஸுஜ்ஜ²ந்தி, யதா²ஸகம் ப்³யாபாரஸமத்தா² ச ந ஹோந்தீ’’தி பஞ்ஞாகு³ணா மனஸிகாதப்³பா³. யதே²வ ஹி ஜீவிதேன வினா ஸரீரயந்தம் ந ஸோப⁴தி, ந ச அத்தனோ கிரியாஸு படிபத்திஸமத்த²ம் ஹோதி, யதா² ச சக்கா²தீ³னி இந்த்³ரியானி விஞ்ஞாணேன வினா யதா²ஸகம் விஸயேஸு கிச்சம் காதும் நப்பஹோந்தி, ஏவம் ஸத்³தா⁴தீ³னி இந்த்³ரியானி பஞ்ஞாய வினா ஸகிச்சபடிபத்தியம் அஸமத்தா²னீதி பரிச்சாகா³தி³படிபத்தியம் பஞ்ஞா பதா⁴னகாரணம். உம்மீலிதபஞ்ஞாசக்கு²கா ஹி மஹாபோ³தி⁴ஸத்தா அத்தனோ அங்க³பச்சங்கா³னிபி த³த்வா அனத்துக்கம்ஸகா அபரவம்ப⁴கா ச ஹோந்தி, பே⁴ஸஜ்ஜருக்கா² விய விகப்பரஹிதா காலத்தயேபி ஸோமனஸ்ஸஜாதா. பஞ்ஞாவஸேன ஹி உபாயகோஸல்லயோக³தோ பரிச்சாகோ³ பரஹிதப்பவத்தியா தா³னபாரமிபா⁴வம் உபேதி. அத்தத்த²ஞ்ஹி தா³னம் வட்³டி⁴ஸதி³ஸம் ஹோதி.

ததா² பஞ்ஞாய அபா⁴வேன தண்ஹாதி³ஸம்கிலேஸாவியோக³தோ ஸீலஸ்ஸ விஸுத்³தி⁴ ஏவ ந ஸம்ப⁴வதி, குதோ ஸப்³ப³ஞ்ஞுகு³ணாதி⁴ட்டா²னபா⁴வோ. பஞ்ஞவா ஏவ ச க⁴ராவாஸே காமகு³ணேஸு ஸம்ஸாரே ச ஆதீ³னவம் பப்³ப³ஜ்ஜாய ஜா²னஸமாபத்தியம் நிப்³பா³னே ச ஆனிஸம்ஸம் ஸுட்டு² ஸல்லக்கே²ந்தோ பப்³ப³ஜித்வா ஜா²னஸமாபத்தியோ நிப்³ப³த்தேத்வா நிப்³பா³னாபி⁴முகோ² பரே ச தத்த² பதிட்டா²பேதி. வீரியஞ்ச பஞ்ஞாவிரஹிதம் யதி²ச்சி²தமத்த²ம் ந ஸாதே⁴தி து³ராரம்ப⁴பா⁴வதோ. வரமேவ ஹி அனாரம்போ⁴ து³ராரம்ப⁴தோ, பஞ்ஞாஸஹிதேன பன வீரியேன ந கிஞ்சி து³ரதி⁴க³மம் உபாயபடிபத்திதோ. ததா² பஞ்ஞவா ஏவ பராபகாராதீ³னம் அதி⁴வாஸகஜாதிகோ ஹோதி, ந து³ப்பஞ்ஞோ. பஞ்ஞாவிரஹிதஸ்ஸ ச பரேஹி உபனீதா அபகாரா க²ந்தியா படிபக்க²மேவ அனுப்³ரூஹேந்தி, பஞ்ஞவதோ பன தே க²ந்திஸம்பத்தியா பரிப்³ரூஹனவஸேன அஸ்ஸா தி²ரபா⁴வாய ஸம்வத்தந்தி. பஞ்ஞவா ஏவ தீணிபி ஸச்சானி நேஸம் காரணானி படிபக்கே² ச யதா²பூ⁴தம் ஜானித்வா பரேஸம் அவிஸம்வாத³கோ ஹோதி.

ததா² பஞ்ஞாப³லேன அத்தானம் உபத்த²ம்பே⁴த்வா தி⁴திஸம்பதா³ய ஸப்³ப³பாரமீஸு அசலஸமாதா³னாதி⁴ட்டா²னோ ஹோதி. பஞ்ஞவா ஏவ ச பியமஜ்ஜ²த்தவேரிவிபா⁴க³ம் அகத்வா ஸப்³ப³த்த² ஹிதூபஸம்ஹாரகுஸலோ ஹோதி. ததா² பஞ்ஞாவஸேன லாபா⁴லாபா⁴தி³லோகத⁴ம்மஸன்னிபாதே நிப்³பி³காரதாய மஜ்ஜ²த்தோ ஹோதி. ஏவம் ஸப்³பா³ஸம் பாரமீனம் பஞ்ஞாவ பாரிஸுத்³தி⁴ஹேதூதி பஞ்ஞாகு³ணா பச்சவேக்கி²தப்³பா³. அபி ச பஞ்ஞாய வினா ந த³ஸ்ஸனஸம்பத்தி, அந்தரேன ச தி³ட்டி²ஸம்பத³ம் ந ஸீலஸம்பதா³, ஸீலதி³ட்டி²ஸம்பதா³விரஹிதஸ்ஸ ந ஸமாதி⁴ஸம்பதா³, அஸமாஹிதேன ச ந ஸக்கா அத்தஹிதமத்தம்பி ஸாதே⁴தும், பகே³வ உக்கம்ஸக³தம் பரஹிதந்தி பரஹிதாய படிபன்னேன ‘‘நனு தயா ஸக்கச்சம் பஞ்ஞாய பரிவுத்³தி⁴யம் ஆயோகோ³ கரணீயோ’’தி போ³தி⁴ஸத்தேன அத்தா ஓவதி³தப்³போ³. பஞ்ஞானுபா⁴வேன ஹி மஹாஸத்தோ சதுரதி⁴ட்டா²னாதி⁴ட்டி²தோ சதூஹி ஸங்க³ஹவத்தூ²ஹி லோகம் அனுக்³க³ண்ஹந்தோ ஸத்தே நிய்யானமக்³கே³ அவதாரேதி, இந்த்³ரியானி ச நேஸம் பரிபாசேதி.

ததா² பஞ்ஞாப³லேன க²ந்தா⁴யதனாதீ³ஸு பவிசயப³ஹுலோபவத்தினிவத்தியோ யாதா²வதோ பரிஜானந்தோ தா³னாத³யோ கு³ணே விஸேஸனிப்³பே³த⁴பா⁴கி³யபா⁴வம் நயந்தோ போ³தி⁴ஸத்தஸிக்கா²ய பரிபூரகாரீ ஹோதீதி ஏவமாதி³னா அனேகாகாரவோகாரே பஞ்ஞாகு³ணே வவத்த²பேத்வா பஞ்ஞாபாரமீ அனுப்³ரூஹேதப்³பா³.

ததா² தி³ஸ்ஸமானானிபி லோகியானி கம்மானி நிஹீனவீரியேன பாபுணிதும் அஸக்குணேய்யானி, அக³ணிதகே²தே³ன பன ஆரத்³த⁴வீரியேன து³ரதி⁴க³மம் நாம நத்தி². நிஹீனவீரியோ ஹி ‘‘ஸம்ஸாரமஹோக⁴தோ ஸப்³ப³ஸத்தே ஸந்தாரேஸ்ஸாமீ’’தி ஆரபி⁴துமேவ ந ஸக்குணாதி. மஜ்ஜி²மோ ஆரபி⁴த்வா அந்தரா வோஸானமாபஜ்ஜதி. உக்கட்ட²வீரியோ பன அத்தஸுக²னிரபேக்கோ² ஆரம்ப⁴பாரமிமதி⁴க³ச்ச²தீதி வீரியஸம்பத்தி பச்சவேக்கி²தப்³பா³. அபி ச ‘‘யஸ்ஸ அத்தனோ ஏவ ஸம்ஸாரபங்கதோ ஸமுத்³த⁴ரணத்த²மாரம்போ⁴, தஸ்ஸாபி ந வீரியஸ்ஸ ஸிதி²லபா⁴வே மனோரதா²னம் மத்த²கப்பத்தி ஸக்கா ஸம்பா⁴வேதும், பகே³வ ஸதே³வகஸ்ஸ லோகஸ்ஸ ஸமுத்³த⁴ரணத்த²ம் கதாபி⁴னீஹாரேனா’’தி ச ‘‘ராகா³தீ³னம் தோ³ஸக³ணானம் மத்தமஹாக³ஜானம் விய து³ன்னிவாரபா⁴வதோ தன்னிதா³னானஞ்ச கம்மஸமாதா³னானம் உக்கி²த்தாஸிகவத⁴கஸதி³ஸபா⁴வதோ தன்னிமித்தானஞ்ச து³க்³க³தீனம் ஸப்³ப³தா³ விவடமுக²பா⁴வதோ, தத்த² நியோஜகானஞ்ச பாபமித்தானம் ஸதா³ ஸன்னிஹிதபா⁴வதோ ததோ³வாத³காரிதாய ச பா³லஸ்ஸ புது²ஜ்ஜனபா⁴வஸ்ஸ ஸதிஸம்ப⁴வே யுத்தம் ஸயமேவ ஸம்ஸாரது³க்க²தோ நிஸ்ஸரிதுந்தி மிச்சா²விதக்கா வீரியானுபா⁴வேன தூ³ரீப⁴வந்தீ’’தி ச ‘‘யதி³ பன ஸம்போ³தி⁴ அத்தாதீ⁴னேன வீரியேன ஸக்கா ஸமதி⁴க³ந்தும், கிமேத்த² து³க்கர’’ந்தி ச ஏவமாதி³னா நயேன வீரியகு³ணா பச்சவேக்கி²தப்³பா³.

ததா² க²ந்தி நாமாயம் நிரவஸேஸகு³ணபடிபக்க²ஸ்ஸ கோத⁴ஸ்ஸ வித⁴மனதோ கு³ணஸம்பாத³னே ஸாதூ⁴னமப்படிஹதமாயுத⁴ம், பராபி⁴ப⁴வஸமத்தா²னம் அலங்காரோ, ஸமணப்³ராஹ்மணானம் ப³லஸம்பதா³, கோத⁴க்³கி³வினயனஉத³கதா⁴ரா, கல்யாணஸ்ஸ கித்திஸத்³த³ஸ்ஸ ஸஞ்ஜாதிதே³ஸோ, பாபபுக்³க³லானம் வசீவிஸவூபஸமகரோ மந்தாக³தோ³, ஸம்வரே டி²தானம் பரமா தீ⁴ரபகதி, க³ம்பீ⁴ராஸயதாய ஸாக³ரோ, தோ³ஸமஹாஸாக³ரஸ்ஸ வேலா, அபாயத்³வாரஸ்ஸ பித³ஹனகவாடம், தே³வப்³ரஹ்மலோகானம் ஆரோஹணஸோபானம், ஸப்³ப³கு³ணானம் அதி⁴வாஸனபூ⁴மி, உத்தமா காயவசீமனோவிஸுத்³தீ⁴தி மனஸிகாதப்³ப³ம்.

அபி ச ‘‘ஏதே ஸத்தா க²ந்திஸம்பத்தியா அபா⁴வதோ இத⁴லோகே தப்பந்தி, பரலோகே ச தபனீயத⁴ம்மானுயோக³தோ’’தி ச ‘‘யதி³பி பராபகாரனிமித்தம் து³க்க²ம் உப்பஜ்ஜதி, தஸ்ஸ பன து³க்க²ஸ்ஸ கே²த்தபூ⁴தோ அத்தபா⁴வோ பீ³ஜபூ⁴தஞ்ச கம்மம் மயாவ அபி⁴ஸங்க²த’’ந்தி ச ‘‘தஸ்ஸ ச து³க்க²ஸ்ஸ ஆணண்யகாரணமேத’’ந்தி ச ‘‘அபகாரகே அஸதி கத²ம் மய்ஹம் க²ந்திஸம்பதா³ ஸம்ப⁴வதீ’’தி ச ‘‘யதி³பாயம் ஏதரஹி அபகாரகோ, அயம் நாம புப்³பே³ அனேன மய்ஹம் உபகாரோ கதோ’’தி ச ‘‘அபகாரோ ஏவ வா க²ந்தினிமித்ததாய உபகாரோ’’தி ச ‘‘ஸப்³பே³பிமே ஸத்தா மய்ஹம் புத்தஸதி³ஸா, புத்தகதாபராதே⁴ஸு ச கோ குஜ்ஜி²ஸ்ஸதீ’’தி ச ‘‘யேன கோத⁴பிஸாசாவேஸேன அயம் மய்ஹம் அபரஜ்ஜ²தி, ஸ்வாயம் கோத⁴பூ⁴தாவேஸோ மயா வினேதப்³போ³’’தி ச, ‘‘யேன அபகாரேன இத³ம் மய்ஹம் து³க்க²ம் உப்பன்னம், தஸ்ஸ அஹம்பி நிமித்த’’ந்தி ச, ‘‘யேஹி த⁴ம்மேஹி அபகாரோ கதோ, யத்த² ச கதோ, ஸப்³பே³பி தே தஸ்மிம் ஏவ க²ணே நிருத்³தா⁴ கஸ்ஸிதா³னி கேன கோபோ காதப்³போ³’’தி ச, ‘‘அனத்ததாய ஸப்³ப³த⁴ம்மானம் கோ கஸ்ஸ அபரஜ்ஜ²தீ’’தி ச பச்சவேக்க²ந்தேன க²ந்திஸம்பதா³ அனுப்³ரூஹேதப்³பா³.

யதி³ பனஸ்ஸ தீ³க⁴ரத்தம் பரிசயேன பராபகாரனிமித்தகோ கோதோ⁴ சித்தம் பரியாதா³ய திட்டே²ய்ய, தேன இதி படிஸஞ்சிக்கி²தப்³ப³ம் – ‘‘க²ந்தி நாமேஸா பராபகாரஸ்ஸ படிபக்க²படிபத்தீனம் பச்சுபகாரகாரண’’ந்தி ச ‘‘அபகாரோ ச மய்ஹம் து³க்கூ²பனிஸா ஸத்³தா⁴தி து³க்கு²ப்பாத³னேன ஸத்³தா⁴ய ஸப்³ப³லோகே அனபி⁴ரதிஸஞ்ஞாய ச பச்சயோ’’தி ச, ‘‘இந்த்³ரியபகதி ஹேஸா யதி³த³ம் இட்டா²னிட்ட²விஸயஸமாயோகோ³. தத்த² அனிட்ட²விஸயஸமாயோகோ³ மய்ஹம் ந ஸியாதி தம் குதேத்த² லப்³பா⁴’’தி ச ‘‘கோத⁴வஸிகோ ஸத்தோ கோதே⁴ன உம்மத்தோ விக்கி²த்தசித்தோ, தத்த² கிம் பச்சபகாரேனா’’தி ச ‘‘ஸப்³பே³பிமே ஸத்தா ஸம்மாஸம்பு³த்³தே⁴ன ஓரஸபுத்தா விய பரிபாலிதா, தஸ்மா ந தத்த² மயா சித்தகோபோ காதப்³போ³’’தி ச, ‘‘அபராத⁴கே ச ஸதி கு³ணே கு³ணவதி மயா கோபோ ந காதப்³போ³’’தி ச, ‘‘அஸதி கு³ணே விஸேஸேன கருணாயிதப்³போ³’’தி ச ‘‘கோபேன ச மய்ஹம் கு³ணயஸா நிஹீயந்தீ’’தி ச, ‘‘குஜ்ஜ²னேன மய்ஹம் து³ப்³ப³ண்ணது³க்க²ஸேய்யாத³யோ ஸபத்தகந்தா ஆக³ச்ச²ந்தீ’’தி ச, ‘‘கோதோ⁴ ச நாமாயம் ஸப்³பா³ஹிதகாரகோ ஸப்³ப³ஹிதவினாஸகோ ப³லவா பச்சத்தி²கோ’’தி ச, ‘‘ஸதி ச க²ந்தியா ந கோசி பச்சத்தி²கோ’’தி ச, ‘‘அபராத⁴கேன அபராத⁴னிமித்தம் யம் ஆயதிம் லத்³த⁴ப்³ப³ம் து³க்க²ம் ஸதி ச க²ந்தியா மய்ஹம் தத³பா⁴வோ’’தி ச, ‘‘சிந்தனேன குஜ்ஜ²ந்தேன ச மயா பச்சத்தி²கோயேவ அனுவத்திதோ ஹோதீ’’தி ச, ‘‘கோதே⁴ ச மயா க²ந்தியா அபி⁴பூ⁴தே தஸ்ஸ தா³ஸபூ⁴தோ பச்சத்தி²கோ ஸம்மதே³வ அபி⁴பூ⁴தோ ஹோதீ’’தி ச, ‘‘கோத⁴னிமித்தம் க²ந்திகு³ணபரிச்சாகோ³ மய்ஹம் ந யுத்தோ’’தி ச, ‘‘ஸதி ச கோதே⁴ கு³ணவிரோத⁴பச்சனீகத⁴ம்மே கத²ம் மே ஸீலாதி³த⁴ம்மா பாரிபூரிம் க³ச்சே²ய்யும், அஸதி ச தேஸு கதா²ஹம் ஸத்தானம் உபகாரப³ஹுலோ படிஞ்ஞானுரூபம் உத்தமம் ஸம்பத்திம் பாபுணிஸ்ஸாமீ’’தி ச, ‘‘க²ந்தியா ச ஸதி ப³ஹித்³தா⁴ விக்கே²பாபா⁴வதோ ஸமாஹிதஸ்ஸ ஸப்³பே³ ஸங்கா²ரா அனிச்சதோ து³க்க²தோ ஸப்³பே³ த⁴ம்மா அனத்ததோ நிப்³பா³னஞ்ச அஸங்க²தாமதஸந்தபணீததாதி³பா⁴வதோ நிஜ்ஜா²னம் க²மந்தி பு³த்³த⁴த⁴ம்மா ச அசிந்தேய்யாபரிமேய்யப்பபா⁴வா’’தி.

ததோ ச அனுலோமியம் க²ந்தியம் டி²தோ கேவலா இமே அத்தத்தனியபா⁴வரஹிதா த⁴ம்மமத்தா யதா²ஸகம் பச்சயேஹி உப்பஜ்ஜந்தி வயந்தி, ந குதோசி ஆக³ச்ச²ந்தி, ந குஹிஞ்சி க³ச்ச²ந்தி, ந ச கத்த²சி பதிட்டி²தா, ந சேத்த² கோசி கஸ்ஸசி ப்³யாபாரோதி அஹம்காரமமம்காரானதி⁴ட்டா²னதா நிஜ்ஜா²னம் க²மதி, யேன போ³தி⁴ஸத்தோ போ³தி⁴யா நியதோ அனாவத்தித⁴ம்மோ ஹோதீதி ஏவமாதி³னா க²ந்திபாரமியா பச்சவேக்க²ணா வேதி³தப்³பா³.

ததா² ஸச்சேன வினா ஸீலாதீ³னம் அஸம்ப⁴வதோ படிஞ்ஞானுரூபம் படிபத்தியா அபா⁴வதோ ச, ஸச்சத⁴ம்மாதிக்கமே ச ஸப்³ப³பாபத⁴ம்மானம் ஸமோஸரணதோ அஸச்சஸந்த⁴ஸ்ஸ அபச்சயிகபா⁴வதோ ஆயதிஞ்ச அனாதே³ய்யவசனதாவஹனதோ ஸம்பன்னஸச்சஸ்ஸ ச, ஸப்³ப³கு³ணாதி⁴ட்டா²னபா⁴வதோ ஸச்சாதி⁴ட்டா²னேன ஸப்³ப³போ³தி⁴ஸம்பா⁴ரானம் பாரிஸுத்³தி⁴பாரிபூரிஸாமத்தி²யதோ ஸபா⁴வத⁴ம்மாவிஸம்வாத³னேன ஸப்³ப³போ³தி⁴ஸம்பா⁴ரகிச்சகரணதோ போ³தி⁴ஸத்தபடிபத்தியா ச, பரினிப்ப²த்திதோதிஆதி³னா ஸச்சபாரமியா ஸம்பத்தியோ பச்சவேக்கி²தப்³பா³.

ததா² தா³னாதீ³ஸு த³ள்ஹஸமாதா³னம் தம்படிபக்க²ஸன்னிபாதே ச நேஸம் அசலாதி⁴ட்டா²னம் தத்த² ச தீ⁴ரவீரபா⁴வம் வினா ந தா³னாதி³ஸம்பா⁴ரா ஸம்போ³தி⁴னிமித்தா ஸம்ப⁴வந்தீதிஆதி³னா அதி⁴ட்டா²னே கு³ணா பச்சவேக்கி²தப்³பா³.

ததா² ‘‘அத்தஹிதமத்தே அவதிட்ட²ந்தேனாபி ஸத்தேஸு ஹிதசித்ததம் வினா ந ஸக்கா இத⁴லோகபரலோகஸம்பத்தியோ பாபுணிதும், பகே³வ ஸப்³ப³ஸத்தே நிப்³பா³னஸம்பத்தியம் பதிட்டா²பேதுகாமேனா’’தி ச, ‘‘பச்சா² ஸப்³ப³ஸத்தானம் லோகுத்தரஸம்பத்திம் ஆகங்க²ந்தேன இதா³னி லோகியஸம்பத்திஆகங்கா² யுத்தரூபா’’தி ச, ‘‘இதா³னி ஆஸயமத்தேன பரேஸம் ஹிதஸுகூ²பஸம்ஹாரம் காதும் அஸக்கோந்தோ கதா³ பயோகே³ன தம் ஸாதே⁴ஸ்ஸாமீ’’தி ச, ‘‘இதா³னி மயா ஹிதஸுகூ²பஸம்ஹாரேன ஸம்வட்³டி⁴தா பச்சா² த⁴ம்மஸம்விபா⁴க³ஸஹாயா மய்ஹம் ப⁴விஸ்ஸந்தீ’’தி ச, ‘‘ஏதேஹி வினா ந மய்ஹம் போ³தி⁴ஸம்பா⁴ரா ஸம்ப⁴வந்தி, தஸ்மா ஸப்³ப³பு³த்³த⁴கு³ணவிபூ⁴தினிப்ப²த்திகாரணத்தா மய்ஹம் ஏதே பரமம் புஞ்ஞக்கே²த்தம் அனுத்தரம் குஸலாயதனம் உத்தமம் கா³ரவட்டா²ன’’ந்தி ச, ஸவிஸேஸம் ஸத்தேஸு ஸப்³பே³ஸு ஹிதஜ்ஜா²ஸயதா பச்சுபட்ட²பேதப்³பா³, கிஞ்ச கருணாதி⁴ட்டா²னதோபி ஸப்³ப³ஸத்தேஸு மேத்தா அனுப்³ரூஹேதப்³பா³. விமரியாதீ³கதேன ஹி சேதஸா ஸத்தேஸு ஹிதஸுகூ²பஸம்ஹாரனிரதஸ்ஸ தேஸம் அஹிதது³க்கா²பனயனகாமதா ப³லவதீ உப்பஜ்ஜதி த³ள்ஹமூலா. கருணா ச ஸப்³பே³ஸம் பு³த்³த⁴காரகத⁴ம்மானம் ஆதி³ சரணம் பதிட்டா² மூலம் முக²ம் பமுக²ந்தி ஏவமாதி³னா மேத்தாய கு³ணா பச்சவேக்கி²தப்³பா³.

ததா² ‘‘உபேக்கா²ய அபா⁴வே ஸத்தேஹி கதா விப்பகாரா சித்தஸ்ஸ விகாரம் உப்பாதே³ய்யும், ஸதி ச சித்தவிகாரே தா³னாதீ³னம் ஸம்பா⁴ரானம் ஸம்ப⁴வோ ஏவ நத்தீ²’’தி ச, ‘‘மேத்தாஸினேஹேன ஸினேஹிதே சித்தே உபேக்கா²ய வினா ஸம்பா⁴ரானம் பாரிஸுத்³தி⁴ ந ஹோதீ’’தி ச, ‘‘அனுபேக்க²கோ ஸம்பா⁴ரேஸு புஞ்ஞஸம்பா⁴ரம் தப்³பி³பாகஞ்ச ஸத்தஹிதத்த²ம் பரிணாமேதும் ந ஸக்கோதீ’’தி ச, ‘‘உபேக்கா²ய அபா⁴வே தே³ய்யத⁴ம்மபடிக்³கா³ஹகானம் விபா⁴க³ம் அகத்வா பரிச்சஜிதும் ந ஸக்கோதீ’’தி ச, ‘‘உபேக்கா²ரஹிதேன ஜீவிதபரிக்கா²ரானம் ஜீவிதஸ்ஸ ச அந்தராயம் அமனஸிகரித்வா ஸீலவிஸோத⁴னம் காதும் ந ஸக்கோதீ’’தி ச, ததா² உபேக்கா²வஸேன அரதிரதிஸஹஸ்ஸேவ நேக்க²ம்மப³லஸித்³தி⁴தோ உபபத்திதோ இக்க²ணவஸேன ஸப்³ப³ஸம்பா⁴ரகிச்சனிப்ப²த்திதோ அச்சாரத்³த⁴ஸ்ஸ வீரியஸ்ஸ அனுபேக்க²ணே பதா⁴னகிச்சாகரணதோ உபேக்க²தோ ஏவ திதிக்கா²னிஜ்ஜா²னஸம்ப⁴வதோ உபேக்கா²வஸேன ஸத்தஸங்கா²ரானம் அவிஸம்வாத³னதோ லோகத⁴ம்மானம் அஜ்ஜு²பேக்க²ணேன ஸமாதி³ன்னத⁴ம்மேஸு அசலாதி⁴ட்டா²னஸித்³தி⁴தோ பராபகாராதீ³ஸு அனாபோ⁴க³வஸேனேவ மேத்தாவிஹாரனிப்ப²த்திதோதி ஸப்³ப³போ³தி⁴ஸம்பா⁴ரானம் ஸமாதா³னாதி⁴ட்டா²னபாரிபூரினிப்ப²த்தியோ உபேக்கா²னுபா⁴வேன ஸம்பஜ்ஜந்தீதி ஏவமாதி³னா நயேன உபேக்கா²பாரமீ பச்சவேக்கி²தப்³பா³. ஏவம் அபரிச்சாக³பரிச்சாகா³தீ³ஸு யதா²க்கமம் ஆதீ³னவானிஸம்ஸபச்சவேக்க²ணா தா³னாதி³பாரமீனம் பச்சயோதி த³ட்ட²ப்³ப³ம்.

ததா² ஸபரிக்கா²ரா பஞ்சத³ஸ சரணத⁴ம்மா பஞ்ச ச அபி⁴ஞ்ஞாயோ. தத்த² சரணத⁴ம்மா நாம ஸீலஸம்வரோ, இந்த்³ரியேஸு கு³த்தத்³வாரதா, போ⁴ஜனே மத்தஞ்ஞுதா, ஜாக³ரியானுயோகோ³, ஸத்த ஸத்³த⁴ம்மா, சத்தாரி ஜா²னானி ச. தேஸு ஸீலாதீ³னம் சதுன்னம் தேரஸாபி து⁴தத⁴ம்மா அப்பிச்ச²தாத³யோ ச பரிக்கா²ரா. ஸத்³த⁴ம்மேஸு ஸத்³தா⁴ய பு³த்³த⁴த⁴ம்மஸங்க⁴ஸீலசாக³தே³வதூபஸமானுஸ்ஸதிலூக²புக்³க³லபரிவஜ்ஜன- ஸினித்³த⁴புக்³க³லஸேவனபஸாத³னீயத⁴ம்மபச்சவேக்க²ணதத³தி⁴முத்ததா பரிக்கா²ரோ. ஹிரோத்தப்பானம் அகுஸலாதீ³னவபச்சவேக்க²ணஅபாயாதீ³னவபச்சவேக்க²ணகுஸலத⁴ம்மூபத்த²ம்ப⁴ன- பா⁴வபச்சவேக்க²ணஹிரோத்தப்பரஹிதபுக்³க³லபரிவஜ்ஜனஹிரோத்தப்பஸம்பன்னபுக்³க³லஸேனதத³தி⁴முத்ததா. பா³ஹுஸச்சஸ்ஸ புப்³ப³யோக³பரிபுச்ச²க- பா⁴வஸத்³த⁴ம்மாபி⁴யோக³அனவஜ்ஜவிஜ்ஜாட்டா²னாதி³பரிசயபரிபக்கிந்த்³ரியதாகிலேஸதூ³ரீபா⁴வஅப்பஸ்ஸுத- பரிவஜ்ஜனப³ஹுஸ்ஸுதஸேவனதத³தி⁴முத்ததா. வீரியஸ்ஸ அபாயப⁴யபச்சவேக்க²ண- க³மனவீதி²பச்சவேக்க²ணத⁴ம்மமஹத்தபச்சவேக்க²ணதி²னமித்³த⁴வினோத³னகுஸீதபுக்³க³லபரிவஜ்ஜன- ஆரத்³த⁴வீரியபுக்³க³லஸேவனஸம்மப்பதா⁴னபச்சவேக்க²ணதத³தி⁴முத்ததா. ஸதியா ஸதிஸம்பஜஞ்ஞமுட்ட²ஸ்ஸதிபுக்³க³லபரிவஜ்ஜனஉபட்டி²தஸ்ஸதிபுக்³க³லஸேவனதத³தி⁴முத்ததா. பஞ்ஞாய பரிபுச்ச²கபா⁴ரவத்து²விஸத³கிரியாஇந்த்³ரியஸமத்தபடிபாத³னது³ப்பஞ்ஞபுக்³க³ல- பரிவஜ்ஜனபஞ்ஞவந்தபுக்³க³லஸேவனக³ம்பீ⁴ரஞாணசரியபச்சவேக்க²ணதத³தி⁴முத்ததா. சதுன்னம் ஜா²னானம் ஸீலாதி³சதுக்கம் அட்ட²திம்ஸாய ஆரம்மணேஸு புப்³ப³பா⁴க³பா⁴வனா ஆவஜ்ஜனாதி³வஸீபா⁴வகரணஞ்ச பரிக்கா²ரோ. தத்த² ஸீலாதீ³ஹி பயோக³ஸுத்³தி⁴யா ஸத்தானம் அப⁴யதா³னே ஆஸயஸுத்³தி⁴யா ஆமிஸதா³னே உப⁴யஸுத்³தி⁴யா த⁴ம்மதா³னே ஸமத்தோ² ஹோதீதிஆதி³னா சரணாதீ³னம் தா³னாதி³ஸம்பா⁴ரானம் பச்சயபா⁴வோ யதா²ரஹம் நித்³தா⁴ரேதப்³போ³. அதிவித்தா²ரப⁴யேன ந நித்³தா⁴ரயிம்ஹாதி. ஏவம் ஸம்பத்திசக்காத³யோபி தா³னாதீ³னம் பச்சயோதி வேதி³தப்³பா³.

கோ ஸம்கிலேஸோதி? அவிஸேஸேன தண்ஹாதீ³ஹி பராமட்ட²பா⁴வோ பாரமீனம் ஸம்கிலேஸோ, விஸேஸேன பன தே³ய்யத⁴ம்மபடிக்³கா³ஹகவிகப்பா தா³னபாரமியா ஸம்கிலேஸோ. ஸத்தகாலவிகப்பா ஸீலபாரமியா, காமப⁴வதது³பஸமேஸு அபி⁴ரதிஅனபி⁴ரதிவிகப்பா நேக்க²ம்மபாரமியா, அஹம் மமாதி விகப்பா பஞ்ஞாபாரமியா, லீனுத்³த⁴ச்சவிகப்பா வீரியபாரமியா, அத்தபரவிகப்பா க²ந்திபாரமியா, அதி³ட்டா²தீ³ஸு தி³ட்டா²தி³விகப்பா ஸச்சபாரமியா, போ³தி⁴ஸம்பா⁴ரதப்³பி³பக்கே²ஸு தோ³ஸகு³ணவிகப்பா அதி⁴ட்டா²னபாரமியா, ஹிதாஹிதவிகப்பா மேத்தாபாரமியா, இட்டா²னிட்ட²விகப்பா உபேக்கா²பாரமியா ஸம்கிலேஸோதி த³ட்ட²ப்³ப³ம்.

கிம் வோதா³னந்தி? தண்ஹாதீ³ஹி அனுபகா⁴தோ யதா²வுத்தவிகப்பவிரஹோ ச ஏதாஸம் வோதா³னந்தி வேதி³தப்³ப³ம். அனுபஹதா ஹி தண்ஹாமானதி³ட்டி²கோதூ⁴பனாஹமக்க²பளாஸஇஸ்ஸாமச்ச²ரிய- மாயாஸாடே²ய்யத²ம்ப⁴ஸாரம்ப⁴மத³ப்பமாதா³தீ³ஹி கிலேஸேஹி தே³ய்யத⁴ம்மபடிக்³கா³ஹகவிகப்பாதி³ரஹிதா ச தா³னாதி³பாரமியோ பரிஸுத்³தா⁴ பப⁴ஸ்ஸரா ப⁴வந்தீதி.

கோ படிபக்கோ²தி? அவிஸேஸேன ஸப்³பே³பி ஸம்கிலேஸா ஸப்³பே³பி அகுஸலா த⁴ம்மா ஏதாஸம் படிபக்கோ², விஸேஸேன பன புப்³பே³ வுத்தா மச்சே²ராத³யோதி வேதி³தப்³பா³. அபி ச தே³ய்யத⁴ம்மபடிக்³கா³ஹகதா³னப²லேஸு அலோபா⁴தோ³ஸாமோஹகு³ணயோக³தோ லோப⁴தோ³ஸமோஹபடிபக்க²ம் தா³னம், காயாதி³தோ³ஸவங்காபக³மதோ லோபா⁴தி³படிபக்க²ம் ஸீலம், காமஸுக²பரூபகா⁴தஅத்தகிலமத²பரிவஜ்ஜனதோ தோ³ஸத்தயபடிபக்க²ம் நேக்க²ம்மம், லோபா⁴தீ³னம் அந்தீ⁴கரணதோ ஞாணஸ்ஸ ச அனந்தீ⁴கரணதோ லோபா⁴தி³படிபக்கா² பஞ்ஞா, அலீனானுத்³த⁴தஞாயாரம்ப⁴வஸேன லோபா⁴தி³படிபக்க²ம் வீரியம், இட்டா²னிட்ட²ஸுஞ்ஞதானம் க²மனதோ லோபா⁴தி³படிபக்கா² க²ந்தி, ஸதிபி பரேஸம் உபகாரே அபகாரே ச யதா²பூ⁴தப்பவத்தியா லோபா⁴தி³படிபக்க²ம் ஸச்சம், லோகத⁴ம்மே அபி⁴பு⁴ய்ய யதா²ஸமாதி³ன்னேஸு ஸம்பா⁴ரேஸு அசலனதோ லோபா⁴தி³படிபக்க²ம் அதி⁴ட்டா²னம், நீவரணவிவேகதோ லோபா⁴தி³படிபக்கா² மேத்தா, இட்டா²னிட்டே²ஸு அனுனயபடிக⁴வித்³த⁴ம்ஸனதோ ஸமப்பவத்திதோ ச லோபா⁴தி³படிபக்கா² உபேக்கா²தி த³ட்ட²ப்³ப³ம்.

கா படிபத்தீதி? தா³னபாரமியா தாவ ஸுகூ²பகரணஸரீரஜீவிதபரிச்சாகே³ன ப⁴யாபனுத³னேன த⁴ம்மோபதே³ஸேன ச ப³ஹுதா⁴ ஸத்தானம் அனுக்³க³ஹகரணம் படிபத்தி. தத்த² ஆமிஸதா³னம் அப⁴யதா³னம் த⁴ம்மதா³னந்தி தா³தப்³ப³வத்து²வஸேன திவித⁴ம் தா³னம். தேஸு போ³தி⁴ஸத்தஸ்ஸ தா³தப்³ப³வத்து² அஜ்ஜ²த்திகம் பா³ஹிரந்தி து³வித⁴ம். தத்த² பா³ஹிரம் அன்னம் பானம் வத்த²ம் யானம் மாலாக³ந்த⁴விலேபனம் ஸேய்யாவஸத²பதீ³பேய்யந்தி த³ஸவித⁴ம். அன்னாதீ³னம் கா²த³னீயபோ⁴ஜனீயாதி³விபா⁴கே³ன அனேகவித⁴ம். ததா² ரூபாரம்மணம் யாவ த⁴ம்மாரம்மணந்தி ஆரம்மணதோ ச²ப்³பி³த⁴ம். ரூபாரம்மணாதீ³னஞ்ச நீலாதி³விபா⁴கே³ன அனேகவித⁴ம். ததா² மணிகனகரஜதமுத்தாபவாளாதி³, கே²த்தவத்து²ஆராமாதி³, தா³ஸிதா³ஸகோ³மஹிம்ஸாதி³ நானாவித⁴வித்தூபகரணவஸேன அனேகவித⁴ம்.

தத்த² மஹாபுரிஸோ பா³ஹிரம் வத்து²ம் தே³ந்தோ ‘‘யோ யேன அத்தி²கோ, தம் தஸ்ஸ தே³தி, தே³ந்தோ ச தஸ்ஸ அத்தி²கோ’’தி ஸயமேவ ஜானந்தோ அயாசிதோபி தே³தி பகே³வ யாசிதோ. முத்தசாகோ³ தே³தி, நோ அமுத்தசாகோ³, பரியத்தம் தே³தி, நோ அபரியத்தம் ஸதி தே³ய்யத⁴ம்மே. ந பச்சுபகாரஸன்னிஸ்ஸிதோ தே³தி. அஸதி தே³ய்யத⁴ம்மே ஹி பரியத்தே ஸம்விபா⁴கா³ரஹம் ஸம்விப⁴ஜதி. ந ச தே³தி பரூபகா⁴தாவஹம் ஸத்த²விஸமஜ்ஜாதி³கம், நாபி கீளனகம் யம் அனத்தூ²பஸம்ஹிதம் பமாதா³வஹஞ்ச. ந ச கி³லானஸ்ஸ யாசகஸ்ஸ பானபோ⁴ஜனாதி³அஸப்பாயம் பமாணரஹிதம் வா தே³தி, பமாணயுத்தம் பன ஸப்பாயமேவ தே³தி.

ததா² யாசிதோ க³ஹட்டா²னம் க³ஹட்டா²னுச்ச²விகம் தே³தி, பப்³ப³ஜிதானம் பப்³ப³ஜிதானுச்ச²விகம் தே³தி, மாதாபிதரோ ஞாதிஸாலோஹிதா மித்தாமச்சா புத்ததா³ரதா³ஸகம்மகராதி ஏதேஸு கஸ்ஸசி பீளம் அஜனேந்தோ தே³தி, ந ச உளாரம் தே³ய்யத⁴ம்மம் படிஜானித்வா லூக²ம் தே³தி, ந ச லாப⁴ஸக்காரஸிலோகஸன்னிஸ்ஸிதோ தே³தி, ந ச பச்சுபகாரஸன்னிஸ்ஸிதோ தே³தி, ந ச ப²லபாடிகங்கீ² தே³தி அஞ்ஞத்ர ஸம்மாஸம்போ³தி⁴யா, ந ச யாசகே தே³ய்யத⁴ம்மம் வா ஜிகு³ச்ச²ந்தோ தே³தி, ந ச அஸஞ்ஞதானம் யாசகானம் அக்கோஸகரோஸகானம்பி அபவித்³த⁴ம் தா³னம் தே³தி, அஞ்ஞத³த்து² பஸன்னசித்தோ அனுகம்பந்தோ ஸக்கச்சமேவ தே³தி, ந ச கோதூஹலமங்க³லிகோ ஹுத்வா தே³தி, கம்மப²லமேவ பன ஸத்³த³ஹந்தோ தே³தி, நபி யாசகே பயிருபாஸனாதீ³ஹி பரிகிலேஸேத்வா தே³தி, அபரிகிலேஸந்தோ ஏவ பன தே³தி, ந ச பரேஸம் வஞ்சனாதி⁴ப்பாயோ பே⁴த³னாதி⁴ப்பாயோ வா தா³னம் தே³தி, அஸம்கிலிட்ட²சித்தோ ஏவ தே³தி, நபி ப²ருஸவாசோ பா⁴குடிமுகோ² தா³னம் தே³தி, பியவாதீ³ பன புப்³ப³பா⁴ஸீ மிதவசனோ ஹுத்வா தே³தி, யஸ்மிஞ்ச தே³ய்யத⁴ம்மே உளாரமனுஞ்ஞதாய வா சிரபரிசயேன வா கே³த⁴ஸபா⁴வதாய வா லோப⁴த⁴ம்மோ அதி⁴மத்தோ ஹோதி, ஜானந்தோ போ³தி⁴ஸத்தோ தம் கி²ப்பமேவ படிவினோதே³த்வா யாசகே பரியேஸித்வாபி தே³தி, யஞ்ச தே³ய்யவத்து² பரித்தம் யாசகோபி பச்சுபட்டி²தோ, தம் அசிந்தேத்வாபி அத்தானம் பா³தே⁴த்வா தே³ந்தோ யாசகம் ஸம்மானேதி யதா² தம் அகித்திபண்டி³தோ. ந ச மஹாபுரிஸோ அத்தனோ புத்ததா³ரதா³ஸகம்மகரபோரிஸே யாசிதோ தே அஸஞ்ஞாபிதே தோ³மனஸ்ஸப்பத்தே யாசகானம் தே³தி, ஸம்மதே³வ பன ஸஞ்ஞாபிதே ஸோமனஸ்ஸப்பத்தே தே³தி. தே³ந்தோ ச யக்க²ரக்க²ஸபிஸாசாதீ³னம் வா மனுஸ்ஸானம் குரூரகம்மந்தானம் வா ஜானந்தோ ந தே³தி, ததா² ரஜ்ஜம்பி தாதி³ஸானம் ந தே³தி. யே லோகஸ்ஸ அஹிதாய து³க்கா²ய அனத்தா²ய படிபஜ்ஜந்தி, யே பன த⁴ம்மிகா த⁴ம்மேன லோகம் பாலேந்தி, தேஸம் தே³தி. ஏவம் தாவ பா³ஹிரதா³னே படிபத்தி வேதி³தப்³பா³.

அஜ்ஜ²த்திகதா³னம் பன த்³வீஹி ஆகாரேஹி வேதி³தப்³ப³ம். கத²ம்? யதா² நாம கோசி புரிஸோ கா⁴ஸச்சா²த³னஹேது அத்தானம் பரஸ்ஸ நிஸ்ஸஜ்ஜதி, விதே⁴ய்யபா⁴வம் உபக³ச்ச²தி தா³ஸப்³யம், ஏவமேவ மஹாபுரிஸோ ஸம்போ³தி⁴ஹேது நிராமிஸசித்தோ ஸத்தானம் அனுத்தரம் ஹிதஸுக²ம் இச்ச²ந்தோ அத்தனோ தா³னபாரமிம் பரிபூரேதுகாமோ அத்தானம் பரஸ்ஸ நிஸ்ஸஜ்ஜதி, விதே⁴ய்யபா⁴வம் உபக³ச்ச²தி யதா²காமகரணீயதம். கரசரணனயனாதி³அங்க³பச்சங்க³ம் தேன தேன அத்தி²கானம் அகம்பிதோ அனோலீனோ அனுப்பதே³தி, ந தத்த² ஸஜ்ஜதி ந ஸங்கோசம் ஆபஜ்ஜதி யதா² தம் பா³ஹிரவத்து²ஸ்மிம், ததா² ஹி மஹாபுரிஸோ த்³வீஹி ஆகாரேஹி பா³ஹிரவத்து²ம் பரிச்சஜதி யதா²ஸுக²ம் பரிபோ⁴கா³ய வா யாசகானம் தேஸம் மனோரத²ம் பரிபூரேந்தோ, அத்தனோ வஸீபா⁴வாய வா, தத்த² ஸப்³பே³ன ஸப்³ப³ம் முத்தசாகோ³, ஏவமஹம் நிஸ்ஸங்க³பா⁴வனாய ஸம்போ³தி⁴ம் பாபுணிஸ்ஸாமீதி. ஏவம் அஜ்ஜ²த்திகவத்து²ஸ்மிந்தி வேதி³தப்³ப³ம்.

தத்த² யம் அஜ்ஜ²த்திகவத்து² தீ³யமானம் யாசகஸ்ஸ ஏகந்தேனேவ ஹிதாய ஸம்வத்ததி, தம் தே³தி, ந இதரம். ந ச மஹாபுரிஸோ மாரஸ்ஸ மாரகாயிகானம் தே³வதானம் வா விஹிம்ஸாதி⁴ப்பாயானம் அத்தனோ அத்தபா⁴வம் அங்க³பச்சங்கா³னி வா ஜானமானோ தே³தி ‘‘மா தேஸம் அனத்தோ² அஹோஸீ’’தி. யதா² ச மாரகாயிகானம், ஏவம் தேஹி அன்வாவிட்டா²னம்பி ந தே³தி, நபி உம்மத்தகானம். இதரேஸம் பன யாசியமானோ ஸமனந்தரமேவ தே³தி, தாதி³ஸாய யாசனாய து³ல்லப⁴பா⁴வதோ தாதி³ஸஸ்ஸ ச தா³னஸ்ஸ து³க்கரபா⁴வதோ.

அப⁴யதா³னம் பன ராஜதோ சோரதோ அக்³கி³தோ உத³கதோ வேரிபுக்³க³லதோ ஸீஹப்³யக்³கா⁴தி³வாளமிக³தோ நாக³யக்க²ரக்க²ஸபிஸாசாதி³தோ ஸத்தானம் ப⁴யே பச்சுபட்டி²தே ததோ பரித்தாணபா⁴வேன வேதி³தப்³ப³ம்.

த⁴ம்மதா³னம் பன அஸம்கிலிட்ட²சித்தஸ்ஸ அவிபரீதா த⁴ம்மதே³ஸனா, ஓபாயிகோ ஹிதஸ்ஸ உபதே³ஸோ தி³ட்ட²த⁴ம்மிகஸம்பராயிகபரமத்த²வஸேன யேன ஸாஸனே அனோதிண்ணானம் அவதாரணம் ஓதிண்ணானம் பரிபாசனம். தத்தா²யம் நயோ – ஸங்கே²பதோ தாவ தா³னகதா² ஸீலகதா² ஸக்³க³கதா² காமானம் ஆதீ³னவோ ஸம்கிலேஸோ ச நேக்க²ம்மே ஆனிஸம்ஸோ. வித்தா²ரதோ பன ஸாவகபோ³தி⁴யம் அதி⁴முத்தசித்தானம் ஸரணக³மனம் ஸீலஸம்வரோ இந்த்³ரியேஸு கு³த்தத்³வாரதா போ⁴ஜனே மத்தஞ்ஞுதா ஜாக³ரியானுயோகோ³ ஸத்த ஸத்³த⁴ம்மா அட்ட²திம்ஸாய ஆரம்மணேஸு கம்மகரணவஸேன ஸமதா²னுயோகோ³ ரூபகாயாதீ³ஸு விபஸ்ஸனாபி⁴னிவேஸேஸு யதா²ரஹம் அபி⁴னிவேஸமுகே²ன விபஸ்ஸனானுயோகோ³, ததா² விஸுத்³தி⁴படிபதா³ ஸம்மத்தக³ஹணம் திஸ்ஸோ விஜ்ஜா ச² அபி⁴ஞ்ஞா சதஸ்ஸோ படிஸம்பி⁴தா³ ஸாவகபோ³தீ⁴தி ஏதேஸம் கு³ணஸம்கித்தனவஸேன யதா²ரஹம் தத்த² தத்த² பதிட்டா²பனா பரியோத³பனா ச. ததா² பச்சேகபோ³தி⁴யம் ஸம்மாஸம்போ³தி⁴யஞ்ச அதி⁴முத்தானம் ஸத்தானம் யதா²ரஹம் தா³னாதி³பாரமீனம் ஸபா⁴வரஸலக்க²ணாதி³ஸம்கித்தனமுகே²ன தீஸுபி அவத்தா²ஸு தேஸம் பு³த்³தா⁴னம் மஹானுபா⁴வதாவிபா⁴வனேன யானத்³வயே பதிட்டா²பனா பரியோத³பனா ச. ஏவம் மஹாபுரிஸோ ஸத்தானம் த⁴ம்மதா³னம் தே³தி.