14. ஏகராஜசரியாவண்ணனா

114. சுத்³த³ஸமே ஏகராஜாதி விஸ்ஸுதோதி ஏகராஜாதி இமினா அன்வத்த²னாமேன ஜம்பு³தீ³பதலே பாகடோ.

மஹாஸத்தோ ஹி ததா³ பா³ராணஸிரஞ்ஞோ புத்தோ ஹுத்வா நிப்³ப³த்தி. வயப்பத்தோ ஸப்³ப³ஸிப்பனிப்ப²த்திம் பத்தோ ஹுத்வா பிது அச்சயேன ரஜ்ஜம் காரேந்தோ குஸலஸீலாசாரஸத்³தா⁴ஸுதாதி³அனஞ்ஞஸாதா⁴ரணகு³ணவிஸேஸயோகே³ன பாரமிபரிபா⁴வனேன ச ஜம்பு³தீ³பதலே அது³தியத்தா பதா⁴னபா⁴வேன ச ‘‘ஏகராஜா’’தி பகாஸனாமோ அஹோஸி. பரமம் ஸீலம் அதி⁴ட்டா²யாதி ஸுபரிஸுத்³த⁴காயிகவாசஸிகஸம்வரஸங்கா²தஞ்சேவ ஸுபரிஸுத்³த⁴மனோஸமாசாரஸங்கா²தஞ்ச பரமம் உத்தமம் த³ஸகுஸலகம்மபத²ஸீலம் ஸமாதா³னவஸேன ச அவீதிக்கமனவஸேன ச அதி⁴ட்ட²ஹித்வா அனுட்ட²ஹித்வா. பஸாஸாமி மஹாமஹிந்தி தியோஜனஸதிகே காஸிரட்டே² மஹதிம் மஹிம் அனுஸாஸாமி ரஜ்ஜம் காரேமி.

115. த³ஸகுஸலகம்மபதே²தி பாணாதிபாதாவேரமணி யாவ ஸம்மாதி³ட்டீ²தி ஏதஸ்மிம் த³ஸவிதே⁴ குஸலகம்மபதே², ஏதே வா அனவஸேஸதோ ஸமாதா³ய வத்தாமி. சதூஹி ஸங்க³ஹவத்தூ²ஹீதி தா³னம் பியவசனம் அத்த²சரியா ஸமானத்ததாதி இமேஹி சதூஹி ஸங்க³ஹவத்தூ²ஹி ஸங்க³ண்ஹனகாரணேஹி யதா³ ஏகராஜாதி விஸ்ஸுதோ ஹோமி, ததா³ யதா²ரஹம் மஹாஜனம் ஸங்க³ண்ஹாமீதி ஸம்ப³ந்தோ⁴.

116. ஏவந்தி த³ஸகுஸலகம்மபத²ஸீலபரிபூரணம் சதூஹி ஸங்க³ஹவத்தூ²ஹி மஹாஜனஸங்க³ண்ஹனந்தி யதா²வுத்தேன இமினா ஆகாரேன அப்பமத்தஸ்ஸ. இத⁴லோகே பரத்த² சாதி இமஸ்மிம் லோகே யம் அப்பமஜ்ஜனம், தத்த² தி³ட்ட²த⁴ம்மிகே அத்தே², பரலோகே யம் அப்பமஜ்ஜனம் தத்த² ஸம்பராயிகே அத்தே² அப்பமத்தஸ்ஸ மே ஸதோதி அத்தோ². த³ப்³ப³ஸேனோதி ஏவம்னாமகோ கோஸலராஜா. உபக³ந்த்வாதி சதுரங்கி³னிம் ஸேனம் ஸன்னய்ஹித்வா அப்³பு⁴ய்யானவஸேன மம ரஜ்ஜம் உபக³ந்த்வா. அச்சி²ந்த³ந்தோ புரம் மமாதி மம பா³ராணஸினக³ரம் ப³லக்காரேன க³ண்ஹந்தோ.

தத்ராயம் அனுபுப்³பி³கதா² – மஹாஸத்தோ ஹி ததா³ நக³ரஸ்ஸ சதூஸு த்³வாரேஸு சதஸ்ஸோ மஜ்ஜே² ஏகம் நிவேஸனத்³வாரே ஏகந்தி ச² தா³னஸாலாயோ காரேத்வா கபணத்³தி⁴காதீ³னம் தா³னம் தே³தி, ஸீலம் ரக்க²தி, உபோஸத²கம்மம் கரோதி, க²ந்திமேத்தானுத்³த³யஸம்பன்னோ அங்கே நிஸின்னம் புத்தம் பரிதோஸயமானோ விய ஸப்³ப³ஸத்தே பரிதோஸயமானோ த⁴ம்மேன ரஜ்ஜம் காரேதி. தஸ்ஸேகோ அமச்சோ அந்தேபுரம் பது³ஸ்ஸித்வா அபரபா⁴கே³ பாகடோவ ஜாதோ. அமச்சா ரஞ்ஞோ ஆரோசேஸும். ராஜா பரிக்³க³ண்ஹந்தோ தம் அத்தனா பச்சக்க²தோ ஞத்வா தம் அமச்சம் பக்கோஸாபேத்வா ‘‘அந்த⁴பா³ல, அயுத்தம் தே கதம், ந த்வம் மம விஜிதே வஸிதும் அரஹஸி, அத்தனோ த⁴னஞ்ச புத்ததா³ரஞ்ச க³ஹேத்வா அஞ்ஞத்த² யாஹீ’’தி ரட்டா² பப்³பா³ஜேஸி.

ஸோ கோஸலஜனபத³ம் க³ந்த்வா த³ப்³ப³ஸேனம் நாம கோஸலராஜானம் உபட்ட²ஹந்தோ அனுக்கமேன தஸ்ஸ விஸ்ஸாஸிகோ ஹுத்வா ஏகதி³வஸம் தம் ராஜானம் ஆஹ – ‘‘தே³வ, பா³ராணஸிரஜ்ஜம் நிம்மக்கி²கமது⁴படலஸதி³ஸம், அதிமுது³கோ ராஜா, ஸுகே²னேவ தம் ரஜ்ஜம் க³ண்ஹிதும் ஸக்கோஸீ’’தி. த³ப்³ப³ஸேனோ பா³ராணஸிரஞ்ஞோ மஹானுபா⁴வதாய தஸ்ஸ வசனம் அஸத்³த³ஹந்தோ மனுஸ்ஸே பேஸேத்வா காஸிரட்டே² கா³மகா⁴தாதீ³னி காரேத்வா தேஸம் சோரானம் போ³தி⁴ஸத்தேன த⁴னம் த³த்வா விஸ்ஸஜ்ஜிதபா⁴வம் ஸுத்வா ‘‘அதிவிய த⁴ம்மிகோ ராஜா’’தி ஞத்வா ‘‘பா³ராணஸிரஜ்ஜம் க³ண்ஹிஸ்ஸாமீ’’தி ப³லவாஹனம் ஆதா³ய நிய்யாஸி. அத² பா³ராணஸிரஞ்ஞோ மஹாயோதா⁴ ‘‘கோஸலராஜா ஆக³ச்ச²தீ’’தி ஸுத்வா ‘‘அம்ஹாகம் ரஜ்ஜஸீமம் அனோக்கமந்தமேவ நம் போதே²த்வா க³ண்ஹாமா’’தி அத்தனோ ரஞ்ஞோ வதி³ம்ஸு.

போ³தி⁴ஸத்தோ ‘‘தாதா, மம் நிஸ்ஸாய அஞ்ஞேஸம் கிலமனகிச்சம் நத்தி², ரஜ்ஜத்தி²கா ரஜ்ஜம் க³ண்ஹந்து, மா க³மித்தா²’’தி நிவாரேஸி. கோஸலராஜா ஜனபத³மஜ்ஜ²ம் பாவிஸி. மஹாயோதா⁴ புனபி ரஞ்ஞோ ததே²வ வதி³ம்ஸு. ராஜா புரிமனயேனேவ நிவாரேஸி. த³ப்³ப³ஸேனோ ப³ஹினக³ரே ட²த்வா ‘‘ரஜ்ஜம் வா தே³து யுத்³த⁴ம் வா’’தி ஏகராஜஸ்ஸ ஸாஸனம் பேஸேஸி. ஏகராஜா ‘‘நத்தி² மயா யுத்³த⁴ம், ரஜ்ஜம் க³ண்ஹாதூ’’தி படிஸாஸனம் பேஸேஸி. புனபி மஹாயோதா⁴ ‘‘தே³வ, ந மயம் கோஸலரஞ்ஞோ நக³ரம் பவிஸிதும் தே³ம, ப³ஹினக³ரேயேவ நம் போதே²த்வா க³ண்ஹாமா’’தி ஆஹம்ஸு. ராஜா புரிமனயேனேவ நிவாரேத்வா நக³ரத்³வாரானி அவாபுராபேத்வா மஹாதலே பல்லங்கமஜ்ஜே² நிஸீதி³. த³ப்³ப³ஸேனோ மஹந்தேன ப³லவாஹனேன நக³ரம் பவிஸித்வா ஏகம்பி படிஸத்தும் அபஸ்ஸந்தோ ஸப்³ப³ரஜ்ஜம் ஹத்த²க³தம் கத்வா ராஜனிவேஸனம் க³ந்த்வா மஹாதலம் ஆருய்ஹ நிரபராத⁴ம் போ³தி⁴ஸத்தம் க³ண்ஹாபேத்வா ஆவாடே நிக²ணாபேஸி. தேன வுத்தம் –

‘‘த³ப்³ப³ஸேனோ உபக³ந்த்வா, அச்சி²ந்த³ந்தோ புரம் மம.

117. ‘‘ராஜூபஜீவே நிக³மே, ஸப³லட்டே² ஸரட்ட²கே;

ஸப்³ப³ம் ஹத்த²க³தம் கத்வா, காஸுயா நிக²ணீ மம’’ந்தி.

தத்த² ராஜூபஜீவேதி அமச்சபாரிஸஜ்ஜப்³ராஹ்மணக³ஹபதிஆதி³கே ராஜானம் உபனிஸ்ஸாய ஜீவந்தே. நிக³மேதி நேக³மே. ஸப³லட்டே²தி ஸேனாபரியாபன்னதாய ப³லே திட்ட²ந்தீதி ப³லட்டா², ஹத்தா²ரோஹாத³யோ, ப³லட்டே²ஹி ஸஹாதி ஸப³லட்டே². ஸரட்ட²கேதி ஸஜனபதே³, ராஜூபஜீவே நிக³மே ச அஞ்ஞஞ்ச ஸப்³ப³ம் ஹத்த²க³தம் கத்வா. காஸுயா நிக²ணீ மமந்தி ஸப³லவாஹனம் ஸகலம் மம ரஜ்ஜம் க³ஹேத்வா மம்பி க³லப்பமாணே ஆவாடே நிக²ணாபேஸி. ஜாதகேபி –

‘‘அனுத்தரே காமகு³ணே ஸமித்³தே⁴, பு⁴த்வான புப்³பே³ வஸி ஏகராஜா;

ஸோ தா³னி து³க்³கே³ நரகம்ஹி கி²த்தோ, நப்பஜ்ஜஹே வண்ணப³லம் புராண’’ந்தி. (ஜா. 1.4.9) –

ஆவாடே கி²த்தபா⁴வோ ஆக³தோ. ஜாதகட்ட²கதா²யம் (ஜா. அட்ட². 3.4.9) பன ‘‘ஸிக்காய பக்கி²பாபேத்வா உத்தரும்மாரே ஹேட்டா²ஸீஸகம் ஓலம்பே³ஸீ’’தி வுத்தம்.

மஹாஸத்தோ சோரராஜானம் ஆரப்³ப⁴ மேத்தம் பா⁴வேத்வா கஸிணபரிகம்மம் கத்வா ஜா²னாபி⁴ஞ்ஞாயோ நிப்³ப³த்தேத்வா காஸுதோ உக்³க³ந்த்வா ஆகாஸே பல்லங்கேன நிஸீதி³. தேன வுத்தம் –

118. ‘‘அமச்சமண்ட³லம் ரஜ்ஜம், பீ²தம் அந்தேபுரம் மம;

அச்சி²ந்தி³த்வான க³ஹிதம், பியபுத்தம்வ பஸ்ஸஹ’’ந்தி.

தத்த² அமச்சமண்ட³லந்தி தஸ்மிம் தஸ்மிம் ராஜகிச்சே ரஞ்ஞா அமா ஸஹ வத்தந்தீதி அமச்சா, ஸத்³தி⁴ம் வா தேஸம் மண்ட³லம் ஸமூஹம். பீ²தந்தி ப³லவாஹனேன நக³ரஜனபதா³தீ³ஹி ஸமித்³த⁴ம் ரஜ்ஜம். இத்தா²கா³ரதா³ஸிதா³ஸபரிஜனேஹி சேவ வத்தா²ப⁴ரணாதி³உபபோ⁴கூ³பகரணேஹி ச ஸமித்³த⁴ம் மம அந்தேபுரஞ்ச அச்சி²ந்தி³த்வா க³ஹிதகம் க³ண்ஹந்தம் அமித்தராஜானம் யாய அத்தனோ பியபுத்தம்வ பஸ்ஸிம் அஹம், தாய ஏவம்பூ⁴தாய மேத்தாய மே ஸமோ ஸகலலோகே நத்தி², தஸ்மா ஏவம்பூ⁴தா ஏஸா மே மேத்தாபாரமீ பரமத்த²பாரமிபா⁴வம் பத்தாதி அதி⁴ப்பாயோ.

ஏவம் பன மஹாஸத்தே தம் சோரராஜானம் ஆரப்³ப⁴ மேத்தம் ப²ரித்வா ஆகாஸே பல்லங்கேன நிஸின்னே தஸ்ஸ ஸரீரே தா³ஹோ உப்பஜ்ஜி. ஸோ ‘‘ட³ய்ஹாமி ட³ய்ஹாமீ’’தி பூ⁴மியம் அபராபரம் பரிவத்ததி. ‘‘கிமேத’’ந்தி வுத்தே, மஹாராஜ, தும்ஹே நிரபராத⁴ம் த⁴ம்மிகராஜானம் ஆவாடே நிக²ணாபயித்தா²தி. ‘‘தேன ஹி வேகே³ன க³ந்த்வா தம் உத்³த⁴ரதா²’’தி ஆஹ. புரிஸா க³ந்த்வா தம் ராஜானம் ஆகாஸே பல்லங்கேன நிஸின்னம் தி³ஸ்வா ஆக³ந்த்வா த³ப்³ப³ஸேனஸ்ஸ ஆரோசேஸும். ஸோ வேகே³ன க³ந்த்வா வந்தி³த்வா க²மாபேத்வா ‘‘தும்ஹாகம் ரஜ்ஜம் தும்ஹேவ காரேத², அஹம் வோ சோரே படிபா³ஹேஸ்ஸாமீ’’தி வத்வா தஸ்ஸ து³ட்டா²மச்சஸ்ஸ ராஜாணம் காரேத்வா பக்காமி. போ³தி⁴ஸத்தோபி ரஜ்ஜம் அமச்சானம் நிய்யாதேத்வா இஸிபப்³ப³ஜ்ஜம் பப்³ப³ஜித்வா மஹாஜனம் ஸீலாதி³கு³ணேஸு பதிட்டா²பேத்வா ஆயுபரியோஸானே ப்³ரஹ்மலோகபராயனோ அஹோஸி.

ததா³ த³ப்³ப³ஸேனோ ஆனந்த³த்தே²ரோ அஹோஸி, ஏகராஜா லோகனாதோ².

தஸ்ஸ தி³வஸே தி³வஸே ச²ஸு தா³னஸாலாஸு ச²ஸதஸஹஸ்ஸவிஸ்ஸஜ்ஜனேன பச்சத்தி²கரஞ்ஞோ ஸகலரஜ்ஜபரிச்சாகே³ன ச தா³னபாரமீ, நிச்சஸீலஉபோஸத²கம்மவஸேன பப்³ப³ஜிதஸ்ஸ அனவஸேஸஸீலஸம்வரவஸேன ச ஸீலபாரமீ, பப்³ப³ஜ்ஜாவஸேன ஜா²னாதி⁴க³மவஸேன ச நேக்க²ம்மபாரமீ, ஸத்தானம் ஹிதாஹிதவிசாரணவஸேன தா³னஸீலாதி³ஸம்வித³ஹனவஸேன ச பஞ்ஞாபாரமீ, தா³னாதி³புஞ்ஞஸம்பா⁴ரஸ்ஸ அப்³பு⁴ஸ்ஸஹனவஸேன காமவிதக்காதி³வினோத³னவஸேன ச வீரியபாரமீ, து³ட்டா²மச்சஸ்ஸ த³ப்³ப³ஸேனரஞ்ஞோ ச அபராத⁴ஸஹனவஸேன க²ந்திபாரமீ, யதா²படிஞ்ஞம் தா³னாதி³னா அவிஸம்வாத³னவஸேன ச ஸச்சபாரமீ, தா³னாதீ³னம் அசலஸமாதா³னாதி⁴ட்டா²னவஸேன அதி⁴ட்டா²னபாரமீ, பச்சத்தி²கேபி ஏகந்தேன ஹிதூபஸம்ஹாரவஸேன மேத்தாஜா²னனிப்³ப³த்தனேன ச மேத்தாபாரமீ, து³ட்டா²மச்சேன த³ப்³ப³ஸேனேன ச கதாபராதே⁴ ஹிதேஸீஹி அத்தனோ அமச்சாதீ³ஹி நிப்³ப³த்திதே உபகாரே ச அஜ்ஜு²பேக்க²ணேன ரஜ்ஜஸுக²ப்பத்தகாலே பச்சத்தி²கரஞ்ஞா நரகே கி²த்தகாலே ஸமானசித்ததாய ச உபேக்கா²பாரமீ வேதி³தப்³பா³. வுத்தஞ்ஹேதம் –

‘‘பனுஜ்ஜ து³க்கே²ன ஸுக²ம் ஜனிந்த³, ஸுகே²ன வா து³க்க²மஸய்ஹஸாஹி;

உப⁴யத்த² ஸந்தோ அபி⁴னிப்³பு³தத்தா, ஸுகே² ச து³க்கே² ச ப⁴வந்தி துல்யா’’தி. (ஜா. 1.4.12);

யஸ்மா பனேத்த² மேத்தாபாரமீ அதிஸயவதீ, தஸ்மா தத³த்த²தீ³பனத்த²ம் ஸா ஏவ பாளி ஆருள்ஹா. ததா² இத⁴ மஹாஸத்தஸ்ஸ ஸப்³ப³ஸத்தேஸு ஓரஸபுத்தே விய ஸமானுகம்பதாத³யோ கு³ணவிஸேஸா நித்³தா⁴ரேதப்³பா³தி.

ஏகராஜசரியாவண்ணனா நிட்டி²தா.

மேத்தாபாரமீ நிட்டி²தா.