8. ஸிங்கா³லஸுத்தவண்ணனா

நிதா³னவண்ணனா

242. ஏவம் மே ஸுதந்தி ஸிங்கா³லஸுத்தம். தத்ராயமனுத்தானபத³வண்ணனா – வேளுவனே கலந்த³கனிவாபேதி வேளுவனந்தி தஸ்ஸ உய்யானஸ்ஸ நாமம். தம் கிர வேளூஹி பரிக்கி²த்தம் அஹோஸி அட்டா²ரஸஹத்தே²ன ச பாகாரேன கோ³புரட்டாலகயுத்தம் நீலோபா⁴ஸம் மனோரமம், தேன வேளுவனந்தி வுச்சதி. கலந்த³கானஞ்சேத்த² நிவாபம் அத³ம்ஸு, தேன கலந்த³கனிவாபோதி வுச்சதி.

புப்³பே³ கிர அஞ்ஞதரோ ராஜா தத்த² உய்யானகீளனத்த²ம் ஆக³தோ ஸுராமதே³ன மத்தோ தி³வா நித்³த³ம் ஓக்கமி. பரிஜனோபிஸ்ஸ ‘‘ஸுத்தோ ராஜா’’தி புப்ப²ப²லாதீ³ஹி பலோபி⁴யமானோ இதோ சிதோ ச பக்காமி. அத² ஸுராக³ந்தே⁴ன அஞ்ஞதரஸ்மா ஸுஸிரருக்கா² கண்ஹஸப்போ நிக்க²மித்வா ரஞ்ஞோ அபி⁴முகோ² ஆக³ச்ச²தி, தம் தி³ஸ்வா ருக்க²தே³வதா ‘‘ரஞ்ஞோ ஜீவிதம் த³ம்மீ’’தி காளகவேஸேன ஆக³ந்த்வா கண்ணமூலே ஸத்³த³மகாஸி. ராஜா படிபு³ஜ்ஜி². கண்ஹஸப்போ நிவத்தோ. ஸோ தம் தி³ஸ்வா ‘‘இமாய காளகாய மம ஜீவிதம் தி³ன்ன’’ந்தி காளகானம் தத்த² நிவாபம் பட்ட²பேஸி, அப⁴யகோ⁴ஸஞ்ச கோ⁴ஸாபேஸி. தஸ்மா தம் ததோ பபு⁴தி ‘‘கலந்த³கனிவாபோ’’தி ஸங்க்²யம் க³தம். கலந்த³காதி ஹி காளகானம் ஏதம் நாமம்.

தேன கோ² பன ஸமயேனாதி யஸ்மிம் ஸமயே ப⁴க³வா ராஜக³ஹம் கோ³சரகா³மம் கத்வா வேளுவனே கலந்த³கனிவாபே விஹரதி, தேன ஸமயேன. ஸிங்கா³லகோ க³ஹபதிபுத்தோதி ஸிங்கா³லகோதி தஸ்ஸ நாமம். க³ஹபதிபுத்தோதி க³ஹபதிஸ்ஸ புத்தோ க³ஹபதிபுத்தோ. தஸ்ஸ கிர பிதா க³ஹபதிமஹாஸாலோ, நித³ஹித்வா ட²பிதா சஸ்ஸ கே³ஹே சத்தாலீஸ த⁴னகோடியோ அத்தி². ஸோ ப⁴க³வதி நிட்ட²ங்க³தோ உபாஸகோ ஸோதாபன்னோ, ப⁴ரியாபிஸ்ஸ ஸோதாபன்னாயேவ. புத்தோ பனஸ்ஸ அஸ்ஸத்³தோ⁴ அப்பஸன்னோ. அத² நம் மாதாபிதரோ அபி⁴க்க²ணம் ஏவம் ஓவத³ந்தி – ‘‘தாத ஸத்தா²ரம் உபஸங்கம, த⁴ம்மஸேனாபதிம் மஹாமோக்³க³ல்லானம் மஹாகஸ்ஸபம் அஸீதிமஹாஸாவகே உபஸங்கமா’’தி. ஸோ ஏவமாஹ – ‘‘நத்தி² மம தும்ஹாகம் ஸமணானம் உபஸங்கமனகிச்சம், ஸமணானம் ஸந்திகம் க³ந்த்வா வந்தி³தப்³ப³ம் ஹோதி, ஓனமித்வா வந்த³ந்தஸ்ஸ பிட்டி² ருஜ்ஜதி, ஜாணுகானி க²ரானி ஹோந்தி, பூ⁴மியம் நிஸீதி³தப்³ப³ம் ஹோதி, தத்த² நிஸின்னஸ்ஸ வத்தா²னி கிலிஸ்ஸந்தி ஜீரந்தி, ஸமீபே நிஸின்னகாலதோ பட்டா²ய கதா²ஸல்லாபோ ஹோதி, தஸ்மிம் ஸதி விஸ்ஸாஸோ உப்பஜ்ஜதி, ததோ நிமந்தேத்வா சீவரபிண்ட³பாதாதீ³னி தா³தப்³பா³னி ஹோந்தி. ஏவம் ஸந்தே அத்தோ² பரிஹாயதி, நத்தி² மய்ஹம் தும்ஹாகம் ஸமணானம் உபஸங்கமனகிச்ச’’ந்தி. இதி நம் யாவஜீவம் ஓவத³ந்தாபி மாதாபிதரோ ஸாஸனே உபனேதும் நாஸக்கி²ம்ஸு.

அத²ஸ்ஸ பிதா மரணமஞ்சே நிபன்னோ ‘‘மம புத்தஸ்ஸ ஓவாத³ம் தா³தும் வட்டதீ’’தி சிந்தேத்வா புன சிந்தேஸி – ‘‘தி³ஸா தாத நமஸ்ஸாஹீ’’தி ஏவமஸ்ஸ ஓவாத³ம் த³ஸ்ஸாமி, ஸோ அத்த²ம் அஜானந்தோ தி³ஸா நமஸ்ஸிஸ்ஸதி, அத² நம் ஸத்தா² வா ஸாவகா வா பஸ்ஸித்வா ‘‘கிம் கரோஸீ’’தி புச்சி²ஸ்ஸந்தி. ததோ ‘‘மய்ஹம் பிதா தி³ஸா நமஸ்ஸனம் கரோஹீதி மம் ஓவதீ³’’தி வக்க²தி. அத²ஸ்ஸ தே ‘‘ந துய்ஹம் பிதா ஏதா தி³ஸா நமஸ்ஸாபேதி, இமா பன தி³ஸா நமஸ்ஸாபேதீ’’தி த⁴ம்மம் தே³ஸேஸ்ஸந்தி. ஸோ பு³த்³த⁴ஸாஸனே கு³ணம் ஞத்வா ‘‘புஞ்ஞகம்மம் கரிஸ்ஸதீ’’தி. அத² நம் ஆமந்தாபேத்வா ‘‘தாத, பாதோவ உட்டா²ய ச² தி³ஸா நமஸ்ஸேய்யாஸீ’’தி ஆஹ. மரணமஞ்சே நிபன்னஸ்ஸ கதா² நாம யாவஜீவம் அனுஸ்ஸரணீயா ஹோதி. தஸ்மா ஸோ க³ஹபதிபுத்தோ தம் பிதுவசனம் அனுஸ்ஸரந்தோ ததா² அகாஸி. தஸ்மா ‘‘காலஸ்ஸேவ உட்டா²ய ராஜக³ஹா நிக்க²மித்வா’’திஆதி³ வுத்தம்.

243. புது²தி³ஸாதி ப³ஹுதி³ஸா. இதா³னி தா த³ஸ்ஸேந்தோ புரத்தி²மம் தி³ஸந்திஆதி³மாஹ. பாவிஸீதி ந தாவ பவிட்டோ², பவிஸிஸ்ஸாமீதி நிக்க²ந்தத்தா பன அந்தராமக்³கே³ வத்தமானோபி ஏவம் வுச்சதி. அத்³த³ஸா கோ² ப⁴க³வாதி ந இதா³னேவ அத்³த³ஸ, பச்சூஸஸமயேபி பு³த்³த⁴சக்கு²னா லோகம் வோலோகேந்தோ ஏதம் தி³ஸா நமஸ்ஸமானம் தி³ஸ்வா ‘‘அஜ்ஜ அஹம் ஸிங்கா³லஸ்ஸ க³ஹபதிபுத்தஸ்ஸ கி³ஹிவினயம் ஸிங்கா³லஸுத்தந்தம் கதே²ஸ்ஸாமி, மஹாஜனஸ்ஸ ஸா கதா² ஸப²லா ப⁴விஸ்ஸதி, க³ந்தப்³ப³ம் மயா ஏத்தா²’’தி. தஸ்மா பாதோவ நிக்க²மித்வா ராஜக³ஹம் பிண்டா³ய பாவிஸி, பவிஸந்தோ ச நம் ததே²வ அத்³த³ஸ. தேன வுத்தம் – ‘‘அத்³த³ஸா கோ² ப⁴க³வா’’தி. ஏதத³வோசாதி ஸோ கிர அவிதூ³ரே டி²தம்பி ஸத்தா²ரம் ந பஸ்ஸதி, தி³ஸாயேவ நமஸ்ஸதி. அத²ம் நம் ப⁴க³வா ஸூரியரஸ்மிஸம்ப²ஸ்ஸேன விகஸமானம் மஹாபது³மம் விய முக²ம் விவரித்வா ‘‘கிம் நு கோ² த்வம், க³ஹபதிபுத்தா’’திஆதி³கம் ஏதத³வோச.

ச²தி³ஸாதி³வண்ணனா

244. யதா² கத²ம் பன, ப⁴ந்தேதி ஸோ கிர தம் ப⁴க³வதோ வசனம் ஸுத்வாவ சிந்தேஸி ‘‘யா கிர மம பிதரா ச² தி³ஸா நமஸ்ஸிதப்³பா³’’தி வுத்தா, ந கிர தா ஏதா, அஞ்ஞா கிர அரியஸாவகேன ச² தி³ஸா நமஸ்ஸிதப்³பா³. ஹந்தா³ஹம் அரியஸாவகேன நமஸ்ஸிதப்³பா³ தி³ஸாயேவ புச்சி²த்வா நமஸ்ஸாமீதி. ஸோ தா புச்ச²ந்தோ யதா² கத²ம் பன, ப⁴ந்தேதிஆதி³மாஹ. தத்த² யதா²தி நிபாதமத்தம். கத²ம் பனாதி இத³மேவ புச்சா²பத³ம். கம்மகிலேஸாதி தேஹி கம்மேஹி ஸத்தா கிலிஸ்ஸந்தி, தஸ்மா கம்மகிலேஸாதி வுச்சந்தி. டா²னேஹீதி காரணேஹி. அபாயமுகா²னீதி வினாஸமுகா²னி. ஸோதி ஸோ ஸோதாபன்னோ அரியஸாவகோ. சுத்³த³ஸ பாபகாபக³தோதி ஏதேஹி சுத்³த³ஸஹி பாபகேஹி லாமகேஹி அபக³தோ. ச²த்³தி³ஸாபடிச்சா²தீ³தி ச² தி³ஸா படிச்சா²தே³ந்தோ. உபோ⁴லோகவிஜயாயாதி உபி⁴ன்னம் இத⁴லோகபரலோகானம் விஜினனத்தா²ய. அயஞ்சேவ லோகோ ஆரத்³தோ⁴ ஹோதீதி ஏவரூபஸ்ஸ ஹி இத⁴ லோகே பஞ்ச வேரானி ந ஹோந்தி, தேனஸ்ஸ அயஞ்சேவ லோகோ ஆரத்³தோ⁴ ஹோதி பரிதோஸிதோ சேவ நிப்பா²தி³தோ ச. பரலோகேபி பஞ்ச வேரானி ந ஹோந்தி, தேனஸ்ஸ பரோ ச லோகோ ஆராதி⁴தோ ஹோதி. தஸ்மா ஸோ காயஸ்ஸ பே⁴தா³ பரம்மரணா ஸுக³திம் ஸக்³க³ம் லோகம் உபபஜ்ஜதி.

245. இதி ப⁴க³வா ஸங்கே²பேன மாதிகம் ட²பேத்வா இதா³னி தமேவ வித்தா²ரேந்தோ கதமஸ்ஸ சத்தாரோ கம்மகிலேஸாதிஆதி³மாஹ. கம்மகிலேஸோதி கம்மஞ்ச தம் கிலேஸஸம்பயுத்தத்தா கிலேஸோ சாதி கம்மகிலேஸோ. ஸகிலேஸோயேவ ஹி பாணம் ஹனதி, நிக்கிலேஸோ ந ஹனதி, தஸ்மா பாணாதிபாதோ ‘‘கம்மகிலேஸோ’’தி வுத்தோ. அதி³ன்னாதா³னாதீ³ஸுபி ஏஸேவ நயோ. அதா²பரந்தி அபரம்பி ஏதத³த்த²பரிதீ³பகமேவ கா³தா²ப³ந்த⁴ம் அவோசாதி அத்தோ².

சதுடா²னாதி³வண்ணனா

246. பாபகம்மம் கரோதீதி இத³ம் ப⁴க³வா யஸ்மா காரகே த³ஸ்ஸிதே அகாரகோ பாகடோ ஹோதி, தஸ்மா ‘‘பாபகம்மம் ந கரோதீ’’தி மாதிகம் ட²பேத்வாபி தே³ஸனாகுஸலதாய பட²மதரம் காரகம் த³ஸ்ஸேந்தோ ஆஹ. தத்த² ச²ந்தா³க³திம் க³ச்ச²ந்தோதி ச²ந்தே³ன பேமேன அக³திம் க³ச்ச²ந்தோ அகத்தப்³ப³ம் கரோந்தோ. பரபதே³ஸுபி ஏஸேவ நயோ. தத்த² யோ ‘‘அயம் மே மித்தோ வா ஸம்ப⁴த்தோ வா ஸந்தி³ட்டோ² வா ஞாதகோ வா லஞ்ஜம் வா பன மே தே³தீ’’தி ச²ந்த³வஸேன அஸ்ஸாமிகம் ஸாமிகம் கரோதி, அயம் ச²ந்தா³க³திம் க³ச்ச²ந்தோ பாபகம்மம் கரோதி நாம. யோ ‘‘அயம் மே வேரீ’’தி பகதிவேரவஸேன தங்க²ணுப்பன்னகோத⁴வஸேன வா ஸாமிகம் அஸ்ஸாமிகம் கரோதி, அயம் தோ³ஸாக³திம் க³ச்ச²ந்தோ பாபகம்மம் கரோதி நாம. யோ பன மந்த³த்தா மோமூஹத்தா யம் வா தம் வா வத்வா அஸ்ஸாமிகம் ஸாமிகம் கரோதி, அயம் மோஹாக³திம் க³ச்ச²ந்தோ பாபகம்மம் கரோதி நாம. யோ பன ‘‘அயம் ராஜவல்லபோ⁴ வா விஸமனிஸ்ஸிதோ வா அனத்த²ம்பி மே கரேய்யா’’தி பீ⁴தோ அஸ்ஸாமிகம் ஸாமிகம் கரோதி, அயம் ப⁴யாக³திம் க³ச்ச²ந்தோ பாபகம்மம் கரோதி நாம. யோ பன யம்கிஞ்சி பா⁴ஜேந்தோ ‘‘அயம் மே ஸந்தி³ட்டோ² வா ஸம்ப⁴த்தோ வா’’தி பேமவஸேன அதிரேகம் தே³தி, ‘‘அயம் மே வேரீ’’தி தோ³ஸவஸேன ஊனகம் தே³தி, மோமூஹத்தா தி³ன்னாதி³ன்னம் அஜானமானோ கஸ்ஸசி ஊனம் கஸ்ஸசி அதி⁴கம் தே³தி, ‘‘அயம் இமஸ்மிம் அதி³ய்யமானே மய்ஹம் அனத்த²ம்பி கரேய்யா’’தி பீ⁴தோ கஸ்ஸசி அதிரேகம் தே³தி, ஸோ சதுப்³பி³தோ⁴பி யதா²னுக்கமேன ச²ந்தா³க³திஆதீ³னி க³ச்ச²ந்தோ பாபகம்மம் கரோதி நாம.

அரியஸாவகோ பன ஜீவிதக்க²யம் பாபுணந்தோபி ச²ந்தா³க³திஆதீ³னி ந க³ச்ச²தி. தேன வுத்தம் – ‘‘இமேஹி சதூஹி டா²னேஹி பாபகம்மம் ந கரோதீ’’தி.

நிஹீயதி யஸோ தஸ்ஸாதி தஸ்ஸ அக³திகா³மினோ கித்தியஸோபி பரிவாரயஸோபி நிஹீயதி பரிஹாயதி.

ச²அபாயமுகா²தி³வண்ணனா

247. ஸுராமேரயமஜ்ஜப்பமாத³ட்டா²னானுயோகோ³தி ஏத்த² ஸுராதி பிட்ட²ஸுரா பூவஸுரா ஓத³னஸுரா கிண்ணபக்கி²த்தா ஸம்பா⁴ரஸம்யுத்தாதி பஞ்ச ஸுரா. மேரயந்தி புப்பா²ஸவோ ப²லாஸவோ மத்⁴வாஸவோ கு³ளாஸவோ ஸம்பா⁴ரஸம்யுத்தோதி பஞ்ச ஆஸவா. தம் ஸப்³ப³ம்பி மத³கரணவஸேன மஜ்ஜம். பமாத³ட்டா²னந்தி பமாத³காரணம். யாய சேதனாய தம் மஜ்ஜம் பிவதி, தஸ்ஸ ஏதம் அதி⁴வசனம். அனுயோகோ³தி தஸ்ஸ ஸுராமேரயமஜ்ஜப்பமாத³ட்டா²னஸ்ஸ அனுஅனுயோகோ³ புனப்புனம் கரணம். யஸ்மா பனேதம் அனுயுத்தஸ்ஸ உப்பன்னா சேவ போ⁴கா³ பரிஹாயந்தி, அனுப்பன்னா ச நுப்பஜ்ஜந்தி, தஸ்மா ‘‘போ⁴கா³னம் அபாயமுக²’’ந்தி வுத்தம். விகாலவிஸிகா²சரியானுயோகோ³தி அவேலாய விஸிகா²ஸு சரியானுயுத்ததா.

ஸமஜ்ஜாபி⁴சரணந்தி நச்சாதி³த³ஸ்ஸனவஸேன ஸமஜ்ஜாக³மனம். ஆலஸ்யானுயோகோ³தி காயாலஸியதாய யுத்தப்பயுத்ததா.

ஸுராமேரயஸ்ஸ ச²ஆதீ³னவாதி³வண்ணனா

248. ஏவம் ச²ன்னம் அபாயமுகா²னம் மாதிகம் ட²பேத்வா இதா³னி தானி விப⁴ஜந்தோ ச² கோ² மே, க³ஹபதிபுத்த ஆதீ³னவாதிஆதி³மாஹ. தத்த² ஸந்தி³ட்டி²காதி ஸாமம் பஸ்ஸிதப்³பா³, இத⁴லோகபா⁴வினீ. த⁴னஜானீதி த⁴னஹானி. கலஹப்பவட்³ட⁴னீதி வாசாகலஹஸ்ஸ சேவ ஹத்த²பராமாஸாதி³காயகலஹஸ்ஸ ச வட்³ட⁴னீ. ரோகா³னம் ஆயதனந்தி தேஸம் தேஸம் அக்கி²ரோகா³தீ³னம் கே²த்தம். அகித்திஸஞ்ஜனனீதி ஸுரம் பிவித்வா ஹி மாதரம்பி பஹரந்தி பிதரம்பி, அஞ்ஞம் ப³ஹும்பி அவத்தப்³ப³ம் வத³ந்தி, அகத்தப்³ப³ம் கரோந்தி. தேன க³ரஹம்பி த³ண்ட³ம்பி ஹத்த²பாதா³தி³சே²த³ம்பி பாபுணந்தி, இத⁴லோகேபி பரலோகேபி அகித்திம் பாபுணந்தி, இதி தேஸம் ஸா ஸுரா அகித்திஸஞ்ஜனனீ நாம ஹோதி. கோபீனனித³ம்ஸனீதி கு³ய்ஹட்டா²னஞ்ஹி விவரியமானம் ஹிரிம் கோபேதி வினாஸேதி, தஸ்மா ‘‘கோபீன’’ந்தி வுச்சதி, ஸுராமத³மத்தா ச தம் தம் அங்க³ம் விவரித்வா விசரந்தி, தேன நேஸம் ஸா ஸுரா கோபீனஸ்ஸ நித³ம்ஸனதோ ‘‘கோபீனனித³ம்ஸனீ’’தி வுச்சதி. பஞ்ஞாய து³ப்³ப³லிகரணீதி ஸாக³தத்தே²ரஸ்ஸ விய கம்மஸ்ஸகதபஞ்ஞம் து³ப்³ப³லம் கரோதி, தஸ்மா ‘‘பஞ்ஞாய து³ப்³ப³லிகரணீ’’தி வுச்சதி. மக்³க³பஞ்ஞம் பன து³ப்³ப³லம் காதும் ந ஸக்கோதி. அதி⁴க³தமக்³கா³னஞ்ஹி ஸா அந்தோமுக²மேவ ந பவிஸதி. ச²ட்ட²ம் பத³ந்தி ச²ட்ட²ம் காரணம்.

249. அத்தாபிஸ்ஸ அகு³த்தோ அரக்கி²தோ ஹோதீதி அவேலாய சரந்தோ ஹி கா²ணுகண்டகாதீ³னிபி அக்கமதி, அஹினாபி யக்கா²தீ³ஹிபி ஸமாக³ச்ச²தி, தம் தம் டா²னம் க³ச்ச²தீதி ஞத்வா வேரினோபி நம் நிலீயித்வா க³ண்ஹந்தி வா ஹனந்தி வா. ஏவம் அத்தாபிஸ்ஸ அகு³த்தோ ஹோதி அரக்கி²தோ. புத்ததா³ராபி ‘‘அம்ஹாகம் பிதா அம்ஹாகம் ஸாமி ரத்திம் விசரதி, கிமங்க³ம் பன மய’’ந்தி இதிஸ்ஸ புத்ததீ⁴தரோபி ப⁴ரியாபி ப³ஹி பத்த²னம் கத்வா ரத்திம் சரந்தா அனயப்³யஸனம் பாபுணந்தி. ஏவம் புத்ததா³ரோபிஸ்ஸ அகு³த்தோ அரக்கி²தோ ஹோதி. ஸாபதேய்யந்தி தஸ்ஸ புத்ததா³ரபரிஜனஸ்ஸ ரத்திம் சரணகபா⁴வம் ஞத்வா சோரா ஸுஞ்ஞம் கே³ஹம் பவிஸித்வா யம் இச்ச²ந்தி, தம் ஹரந்தி. ஏவம் ஸாபதேய்யம்பிஸ்ஸ அகு³த்தம் அரக்கி²தம் ஹோதி. ஸங்கியோ ச ஹோதீதி அஞ்ஞேஹி கதபாபகம்மேஸுபி ‘‘இமினா கதம் ப⁴விஸ்ஸதீ’’தி ஸங்கிதப்³போ³ ஹோதி. யஸ்ஸ யஸ்ஸ க⁴ரத்³வாரேன யாதி, தத்த² யம் அஞ்ஞேன சோரகம்மம் பரதா³ரிககம்மம் வா கதம், தம் ‘‘இமினா கத’’ந்தி வுத்தே அபூ⁴தம் அஸந்தம்பி தஸ்மிம் ரூஹதி பதிட்டா²தி. ப³ஹூனஞ்ச து³க்க²த⁴ம்மானந்தி ஏத்தகம் து³க்க²ம், ஏத்தகம் தோ³மனஸ்ஸந்தி வத்தும் ந ஸக்கா, அஞ்ஞஸ்மிம் புக்³க³லே அஸதி ஸப்³ப³ம் விகாலசாரிம்ஹி ஆஹரிதப்³ப³ம் ஹோதி, இதி ஸோ ப³ஹூனம் து³க்க²த⁴ம்மானம் புரக்க²தோ புரேகா³மீ ஹோதி.

250. க்வ நச்சந்தி ‘‘கஸ்மிம் டா²னே நடனாடகாதி³னச்சம் அத்தீ²’’தி புச்சி²த்வா யஸ்மிம் கா³மே வா நிக³மே வா தம் அத்தி², தத்த² க³ந்தப்³ப³ம் ஹோதி, தஸ்ஸ ‘‘ஸ்வே நச்சத³ஸ்ஸனம் க³மிஸ்ஸாமீ’’தி அஜ்ஜ வத்த²க³ந்த⁴மாலாதீ³னி படியாதே³ந்தஸ்ஸேவ ஸகலதி³வஸம்பி கம்மச்சே²தோ³ ஹோதி, நச்சத³ஸ்ஸனேன ஏகாஹம்பி த்³வீஹம்பி தீஹம்பி தத்தே²வ ஹோதி, அத² வுட்டி²ஸம்பத்தியாதீ³னி லபி⁴த்வாபி வப்பாதி³காலே வப்பாதீ³னி அகரோந்தஸ்ஸ அனுப்பன்னா போ⁴கா³ நுப்பஜ்ஜந்தி, தஸ்ஸ ப³ஹி க³தபா⁴வம் ஞத்வா அனாரக்கே² கே³ஹே சோரா யம் இச்ச²ந்தி, தம் கரோந்தி, தேனஸ்ஸ உப்பன்னாபி போ⁴கா³ வினஸ்ஸந்தி. க்வ கீ³தந்திஆதீ³ஸுபி ஏஸேவ நயோ. தேஸம் நானாகரணம் ப்³ரஹ்மஜாலே வுத்தமேவ.

251. ஜயம் வேரந்தி ‘‘ஜிதம் மயா’’தி பரிஸமஜ்ஜே² பரஸ்ஸ ஸாடகம் வா வேட²னம் வா க³ண்ஹாதி, ஸோ ‘‘பரிஸமஜ்ஜே² மே அவமானம் கரோஸி, ஹோது, ஸிக்கா²பேஸ்ஸாமி ந’’ந்தி தத்த² வேரம் ப³ந்த⁴தி, ஏவம் ஜினந்தோ ஸயம் வேரம் பஸவதி. ஜினோதி அஞ்ஞேன ஜிதோ ஸமானோ யம் தேன தஸ்ஸ வேட²னம் வா ஸாடகோ வா அஞ்ஞம் வா பன ஹிரஞ்ஞஸுவண்ணாதி³வித்தம் க³ஹிதம், தம் அனுஸோசதி ‘‘அஹோஸி வத மே, தம் தம் வத மே நத்தீ²’’தி தப்பச்சயா ஸோசதி. ஏவம் ஸோ ஜினோ வித்தம் அனுஸோசதி. ஸபா⁴க³தஸ்ஸ வசனம் ந ரூஹதீதி வினிச்ச²யட்டா²னே ஸக்கி²புட்ட²ஸ்ஸ ஸதோ வசனம் ந ரூஹதி, ந பதிட்டா²தி, ‘‘அயம் அக்க²ஸோண்டோ³ ஜூதகரோ, மா தஸ்ஸ வசனம் க³ண்ஹித்தா²’’தி வத்தாரோ ப⁴வந்தி. மித்தாமச்சானம் பரிபூ⁴தோ ஹோதீதி தஞ்ஹி மிதாமச்சா ஏவம் வத³ந்தி – ‘‘ஸம்ம, த்வம்பி நாம குலபுத்தோ ஜூதகரோ சி²ன்னபி⁴ன்னகோ ஹுத்வா விசரஸி, ந தே இத³ம் ஜாதிகோ³த்தானம் அனுரூபம், இதோ பட்டா²ய மா ஏவம் கரேய்யாஸீ’’தி. ஸோ ஏவம் வுத்தோபி தேஸம் வசனம் ந கரோதி. ததோ தேன ஸத்³தி⁴ம் ஏகதோ ந திட்ட²ந்தி ந நிஸீத³ந்தி. தஸ்ஸ காரணா ஸக்கி²புட்டா²பி ந கதே²ந்தி. ஏவம் மித்தாமச்சானம் பரிபூ⁴தோ ஹோதி.

ஆவாஹவிவாஹகானந்தி ஆவாஹகா நாம யே தஸ்ஸ க⁴ரதோ தா³ரிகம் க³ஹேதுகாமா. விவாஹகா நாம யே தஸ்ஸ கே³ஹே தா³ரிகம் தா³துகாமா. அபத்தி²தோ ஹோதீதி அனிச்சி²தோ ஹோதி. நாலம் தா³ரப⁴ரணாயாதி தா³ரப⁴ரணாய ந ஸமத்தோ². ஏதஸ்ஸ கே³ஹே தா³ரிகா தி³ன்னாபி ஏதஸ்ஸ கே³ஹதோ ஆக³தாபி அம்ஹேஹி ஏவ போஸிதப்³பா³ ப⁴விஸ்ஸதியேவ.

பாபமித்ததாய ச²ஆதீ³னவாதி³வண்ணனா

252. து⁴த்தாதி அக்க²து⁴த்தா. ஸோண்டா³தி இத்தி²ஸோண்டா³ ப⁴த்தஸோண்டா³ பூவஸோண்டா³ மூலகஸோண்டா³. பிபாஸாதி பானஸோண்டா³. நேகதிகாதி பதிரூபகேன வஞ்சனகா. வஞ்சனிகாதி ஸம்முகா²வஞ்சனாஹி வஞ்சனிகா. ஸாஹஸிகாதி ஏகாகா³ரிகாதி³ஸாஹஸிககம்மகாரினோ. த்யாஸ்ஸ மித்தா ஹோந்தீதி தே அஸ்ஸ மித்தா ஹோந்தி. அஞ்ஞேஹி ஸப்புரிஸேஹி ஸத்³தி⁴ம் ந ரமதி க³ந்த⁴மாலாதீ³ஹி அலங்கரித்வா வரஸயனம் ஆரோபிதஸூகரோ கூ³த²கூபமிவ, தே பாபமித்தேயேவ உபஸங்கமதி. தஸ்மா தி³ட்டே² சேவ த⁴ம்மே ஸம்பராயஞ்ச ப³ஹும் அனத்த²ம் நிக³ச்ச²தி.

253. அதிஸீதந்தி கம்மம் ந கரோதீதி மனுஸ்ஸேஹி காலஸ்ஸேவ வுட்டா²ய ‘‘ஏத² போ⁴ கம்மந்தம் க³ச்சா²மா’’தி வுத்தோ ‘‘அதிஸீதம் தாவ, அட்டீ²னி பி⁴ஜ்ஜந்தி விய, க³ச்ச²த² தும்ஹே பச்சா² ஜானிஸ்ஸாமீ’’தி அக்³கி³ம் தபந்தோ நிஸீத³தி. தே க³ந்த்வா கம்மம் கரோந்தி. இதரஸ்ஸ கம்மம் பரிஹாயதி. அதிஉண்ஹந்திஆதீ³ஸுபி ஏஸேவ நயோ.

ஹோதி பானஸகா² நாமாதி ஏகச்சோ பானட்டா²னே ஸுராகே³ஹேயேவ ஸஹாயோ ஹோதி. ‘‘பன்னஸகா²’’திபி பாடோ², அயமேவத்தோ². ஸம்மியஸம்மியோதி ஸம்ம ஸம்மாதி வத³ந்தோ ஸம்முகே²யேவ ஸஹாயோ ஹோதி, பரம்முகே² வேரீஸதி³ஸோ ஓதாரமேவ க³வேஸதி. அத்தே²ஸு ஜாதேஸூதி ததா²ரூபேஸு கிச்சேஸு ஸமுப்பன்னேஸு. வேரப்பஸவோதி வேரப³ஹுலதா. அனத்த²தாதி அனத்த²காரிதா. ஸுகத³ரியதாதி ஸுட்டு² கத³ரியதா த²த்³த⁴மச்ச²ரியபா⁴வோ. உத³கமிவ இணம் விகா³ஹதீதி பாஸாணோ உத³கம் விய ஸம்ஸீத³ந்தோ இணம் விகா³ஹதி.

ரத்தினுட்டா²னதே³ஸ்ஸினாதி ரத்திம் அனுட்டா²னஸீலேன. அதிஸாயமித³ம் அஹூதி இத³ம் அதிஸாயம் ஜாதந்தி யே ஏவம் வத்வா கம்மம் ந கரோந்தி. இதி விஸ்ஸட்ட²கம்மந்தேதி ஏவம் வத்வா பரிச்சத்தகம்மந்தே. அத்தா² அச்சேந்தி மாணவேதி ஏவரூபே புக்³க³லே அத்தா² அதிக்கமந்தி, தேஸு ந திட்ட²ந்தி.

திணா பி⁴ய்யோதி திணதோபி உத்தரி. ஸோ ஸுக²ம் ந விஹாயதீதி ஸோ புரிஸோ ஸுக²ம் ந ஜஹாதி, ஸுக²ஸமங்கீ³யேவ ஹோதி. இமினா கதா²மக்³கே³ன இமமத்த²ம் த³ஸ்ஸேதி ‘‘கி³ஹிபூ⁴தேன ஸதா ஏத்தகம் கம்மம் ந காதப்³ப³ம், கரோந்தஸ்ஸ வட்³டி⁴ நாம நத்தி². இத⁴லோகே பரலோகே க³ரஹமேவ பாபுணாதீ’’தி.

மித்தபதிரூபகாதி³வண்ணனா

254. இதா³னி யோ ஏவம் கரோதோ அனத்தோ² உப்பஜ்ஜதி, அஞ்ஞானி வா பன யானி கானிசி ப⁴யானி யேகேசி உபத்³த³வா யேகேசி உபஸக்³கா³, ஸப்³பே³ தே பா³லம் நிஸ்ஸாய உப்பஜ்ஜந்தி. தஸ்மா ‘‘ஏவரூபா பா³லா ந ஸேவிதப்³பா³’’தி பா³லே மித்தபதிரூபகே அமித்தே த³ஸ்ஸேதும் சத்தாரோமே, க³ஹபதிபுத்த அமித்தாதிஆதி³மாஹ. தத்த² அஞ்ஞத³த்து²ஹரோதி ஸயம் துச்ச²ஹத்தோ² ஆக³ந்த்வா ஏகம்ஸேன யம்கிஞ்சி ஹரதியேவ. வசீபரமோதி வசனபரமோ வசனமத்தேனேவ தா³யகோ காரகோ விய ஹோதி. அனுப்பியபா⁴ணீதி அனுப்பியம் ப⁴ணதி. அபாயஸஹாயோதி போ⁴கா³னம் அபாயேஸு ஸஹாயோ ஹோதி.

255. ஏவம் சத்தாரோ அமித்தே த³ஸ்ஸேத்வா புன தத்த² ஏகேகம் சதூஹி காரணேஹி விப⁴ஜந்தோ சதூஹி கோ², க³ஹபதிபுத்தாதிஆதி³மாஹ. தத்த² அஞ்ஞத³த்து²ஹரோ ஹோதீதி ஏகம்ஸேன ஹாரகோயேவ ஹோதி. ஸஹாயஸ்ஸ கே³ஹம் ரித்தஹத்தோ² ஆக³ந்த்வா நிவத்த²ஸாடகாதீ³னம் வண்ணம் பா⁴ஸதி, ஸோ ‘‘அதிவிய த்வம் ஸம்ம இமஸ்ஸ வண்ணம் பா⁴ஸஸீ’’தி அஞ்ஞம் நிவாஸேத்வா தம் தே³தி. அப்பேன ப³ஹுமிச்ச²தீதி யம்கிஞ்சி அப்பகம் த³த்வா தஸ்ஸ ஸந்திகா ப³ஹும் பத்தே²தி. ப⁴யஸ்ஸ கிச்சம் கரோதீதி அத்தனோ ப⁴யே உப்பன்னே தஸ்ஸ தா³ஸோ விய ஹுத்வா தம் தம் கிச்சம் கரோதி, அயம் ஸப்³ப³தா³ ந கரோதி, ப⁴யே உப்பன்னே கரோதி, ந பேமேனாதி அமித்தோ நாம ஜாதோ. ஸேவதி அத்த²காரணாதி மித்தஸந்த²வவஸேன ந ஸேவதி, அத்தனோ அத்த²மேவ பச்சாஸீஸந்தோ ஸேவதி.

256. அதீதேன படிஸந்த²ரதீதி ஸஹாயே ஆக³தே ‘‘ஹிய்யோ வா பரே வா ந ஆக³தோஸி, அம்ஹாகம் இமஸ்மிம் வாரே ஸஸ்ஸம் அதிவிய நிப்ப²ன்னம், ப³ஹூனி ஸாலியவபீ³ஜாதீ³னி ட²பேத்வா மக்³க³ம் ஓலோகேந்தா நிஸீதி³ம்ஹ, அஜ்ஜ பன ஸப்³ப³ம் கீ²ண’’ந்தி ஏவம் அதீதேன ஸங்க³ண்ஹாதி. அனாக³தேனாதி ‘‘இமஸ்மிம் வாரே அம்ஹாகம் ஸஸ்ஸம் மனாபம் ப⁴விஸ்ஸதி, ப²லபா⁴ரப⁴ரிதா ஸாலிஆத³யோ, ஸஸ்ஸஸங்க³ஹே கதே தும்ஹாகம் ஸங்க³ஹம் காதும் ஸமத்தா² ப⁴விஸ்ஸாமா’’தி ஏவம் அனாக³தேன ஸங்க³ண்ஹாதி. நிரத்த²கேனாதி ஹத்தி²க்க²ந்தே⁴ வா அஸ்ஸபிட்டே² வா நிஸின்னோ ஸஹாயம் தி³ஸ்வா ‘‘ஏஹி, போ⁴, இத⁴ நிஸீதா³’’தி வத³தி. மனாபம் ஸாடகம் நிவாஸேத்வா ‘‘ஸஹாயகஸ்ஸ வத மே அனுச்ச²விகோ அஞ்ஞோ பன மய்ஹம் நத்தீ²’’தி வத³தி, ஏவம் நிரத்த²கேன ஸங்க³ண்ஹாதி நாம. பச்சுப்பன்னேஸு கிச்சேஸு ப்³யஸனம் த³ஸ்ஸேதீதி ‘‘ஸகடேன மே அத்தோ²’’தி வுத்தே ‘‘சக்கமஸ்ஸ பி⁴ன்னம், அக்கோ² சி²ன்னோ’’திஆதீ³னி வத³தி.

257. பாபகம்பிஸ்ஸ அனுஜானாதீதி பாணாதிபாதாதீ³ஸு யம்கிஞ்சி கரோமாதி வுத்தே ‘‘ஸாது⁴ ஸம்ம கரோமா’’தி அனுஜானாதி. கல்யாணேபி ஏஸேவ நயோ. ஸஹாயோ ஹோதீதி ‘‘அஸுகட்டா²னே ஸுரம் பிவந்தி, ஏஹி தத்த² க³ச்சா²மா’’தி வுத்தே ஸாதூ⁴தி க³ச்ச²தி. ஏஸ நயோ ஸப்³ப³த்த². இதி விஞ்ஞாயாதி ‘‘மித்தபதிரூபகா ஏதே’’தி ஏவம் ஜானித்வா.

ஸுஹத³மித்தாதி³வண்ணனா

260. ஏவம் ந ஸேவிதப்³பே³ பாபமித்தே த³ஸ்ஸேத்வா இதா³னி ஸேவிதப்³பே³ கல்யாணமித்தே த³ஸ்ஸேந்தோ புன சத்தாரோமே, க³ஹபதிபுத்தாதிஆதி³மாஹ. தத்த² ஸுஹதா³தி ஸுந்த³ரஹத³யா.

261. பமத்தம் ரக்க²தீதி மஜ்ஜம் பிவித்வா கா³மமஜ்ஜே² வா கா³மத்³வாரே வா மக்³கே³ வா நிபன்னம் தி³ஸ்வா ‘‘ஏவம்னிபன்னஸ்ஸ கோசிதே³வ நிவாஸனபாருபனம்பி ஹரேய்யா’’தி ஸமீபே நிஸீதி³த்வா பபு³த்³த⁴காலே க³ஹேத்வா க³ச்ச²தி. பமத்தஸ்ஸ ஸாபதேய்யந்தி ஸஹாயோ ப³ஹிக³தோ வா ஹோதி ஸுரம் பிவித்வா வா பமத்தோ, கே³ஹம் அனாரக்க²ம் ‘‘கோசிதே³வ யம்கிஞ்சி ஹரேய்யா’’தி கே³ஹம் பவிஸித்வா தஸ்ஸ த⁴னம் ரக்க²தி. பீ⁴தஸ்ஸாதி கிஸ்மிஞ்சிதே³வ ப⁴யே உப்பன்னே ‘‘மா பா⁴யி, மாதி³ஸே ஸஹாயே டி²தே கிம் பா⁴யஸீ’’தி தம் ப⁴யம் ஹரந்தோ படிஸரணம் ஹோதி. தத்³தி³கு³ணம் போ⁴க³ந்தி கிச்சகரணீயே உப்பன்னே ஸஹாயம் அத்தனோ ஸந்திகம் ஆக³தம் தி³ஸ்வா வத³தி ‘‘கஸ்மா ஆக³தோஸீ’’தி? ராஜகுலே கம்மம் அத்தீ²தி. கிம் லத்³து⁴ம் வட்டதீதி? ஏகோ கஹாபணோதி. ‘‘நக³ரே கம்மம் நாம ந ஏககஹாபணேன நிப்ப²ஜ்ஜதி, த்³வே க³ண்ஹாஹீ’’தி ஏவம் யத்தகம் வத³தி, ததோ தி³கு³ணம் தே³தி.

262. கு³ய்ஹமஸ்ஸ ஆசிக்க²தீதி அத்தனோ கு³ய்ஹம் நிகூ³ஹிதும் யுத்தகத²ம் அஞ்ஞஸ்ஸ அகதே²த்வா தஸ்ஸேவ ஆசிக்க²தி. கு³ய்ஹமஸ்ஸ பரிகூ³ஹதீதி தேன கதி²தம் கு³ய்ஹம் யதா² அஞ்ஞோ ந ஜானாதி, ஏவம் ரக்க²தி. ஆபதா³ஸு ந விஜஹதீதி உப்பன்னே ப⁴யே ந பரிச்சஜதி. ஜீவிதம்பிஸ்ஸ அத்தா²யாதி அத்தனோ ஜீவிதம்பி தஸ்ஸ ஸஹாயஸ்ஸ அத்தா²ய பரிச்சத்தமேவ ஹோதி, அத்தனோ ஜீவிதம் அக³ணேத்வாபி தஸ்ஸ கம்மம் கரோதியேவ.

263. பாபா நிவாரேதீதி அம்ஹேஸு பஸ்ஸந்தேஸு பஸ்ஸந்தேஸு த்வம் ஏவம் காதும் ந லப⁴ஸி, பஞ்ச வேரானி த³ஸ அகுஸலகம்மபதே² மா கரோஹீதி நிவாரேதி. கல்யாணே நிவேஸேதீதி கல்யாணகம்மே தீஸு ஸரணேஸு பஞ்சஸீலேஸு த³ஸகுஸலகம்மபதே²ஸு வத்தஸ்ஸு, தா³னம் தே³ஹி புஞ்ஞம் கரோஹி த⁴ம்மம் ஸுணாஹீதி ஏவம் கல்யாணே நியோஜேதி. அஸ்ஸுதம் ஸாவேதீதி அஸ்ஸுதபுப்³ப³ம் ஸுகு²மம் நிபுணம் காரணம் ஸாவேதி. ஸக்³க³ஸ்ஸ மக்³க³ந்தி இத³ம் கம்மம் கத்வா ஸக்³கே³ நிப்³ப³த்தந்தீதி ஏவம் ஸக்³க³ஸ்ஸ மக்³க³ம் ஆசிக்க²தி.

264. அப⁴வேனஸ்ஸ ந நந்த³தீதி தஸ்ஸ அப⁴வேன அவுட்³டி⁴யா புத்ததா³ரஸ்ஸ வா பரிஜனஸ்ஸ வா ததா²ரூபம் பாரிஜுஞ்ஞம் தி³ஸ்வா வா ஸுத்வா வா ந நந்த³தி, அனத்தமனோ ஹோதி. ப⁴வேனாதி வுட்³டி⁴யா ததா²ரூபஸ்ஸ ஸம்பத்திம் வா இஸ்ஸரியப்படிலாப⁴ம் வா தி³ஸ்வா வா ஸுத்வா வா நந்த³தி, அத்தமனோ ஹோதி. அவண்ணம் ப⁴ணமானம் நிவாரேதீதி ‘‘அஸுகோ விரூபோ ந பாஸாதி³கோ து³ஜ்ஜாதிகோ து³ஸ்ஸீலோ’’தி வா வுத்தே ‘‘ஏவம் மா ப⁴ணி, ரூபவா ச ஸோ பாஸாதி³கோ ச ஸுஜாதோ ச ஸீலஸம்பன்னோ சா’’திஆதீ³ஹி வசனேஹி பரம் அத்தனோ ஸஹாயஸ்ஸ அவண்ணம் ப⁴ணமானம் நிவாரேதி. வண்ணம் ப⁴ணமானம் பஸம்ஸதீதி ‘‘அஸுகோ ரூபவா பாஸாதி³கோ ஸுஜாதோ ஸீலஸம்பன்னோ’’தி வுத்தே ‘‘அஹோ ஸுட்டு² வத³ஸி, ஸுபா⁴ஸிதம் தயா, ஏவமேதம், ஏஸ புரிஸோ ரூபவா பாஸாதி³கோ ஸுஜாதோ ஸீலஸம்பன்னோ’’தி ஏவம் அத்தனோ ஸஹாயகஸ்ஸ பரம் வண்ணம் ப⁴ணமானம் பஸம்ஸதி.

265. ஜலம் அக்³கீ³வ பா⁴ஸதீதி ரத்திம் பப்³ப³தமத்த²கே ஜலமானோ அக்³கி³ விய விரோசதி.

போ⁴கே³ ஸம்ஹரமானஸ்ஸாதி அத்தானம்பி பரம்பி அபீளேத்வா த⁴ம்மேன ஸமேன போ⁴கே³ ஸம்பிண்டே³ந்தஸ்ஸ ராஸிம் கரோந்தஸ்ஸ. ப⁴மரஸ்ஸேவ இரீயதோதி யதா² ப⁴மரோ புப்பா²னம் வண்ணக³ந்த⁴ம் அபோத²யம் துண்டே³னபி பக்கே²ஹிபி ரஸம் ஆஹரித்வா அனுபுப்³பே³ன சக்கப்பமாணம் மது⁴படலம் கரோதி, ஏவம் அனுபுப்³பே³ன மஹந்தம் போ⁴க³ராஸிம் கரோந்தஸ்ஸ. போ⁴கா³ ஸன்னிசயம் யந்தீதி தஸ்ஸ போ⁴கா³ நிசயம் க³ச்ச²ந்தி. கத²ம்? அனுபுப்³பே³ன உபசிகாஹி ஸம்வட்³டி⁴யமானோ வம்மிகோ விய. தேனாஹ ‘‘வம்மிகோவுபசீயதீ’’தி. யதா² வம்மிகோ உபசியதி, ஏவம் நிசயம் யந்தீதி அத்தோ².

ஸமாஹத்வாதி ஸமாஹரித்வா. அலமத்தோ²தி யுத்தஸபா⁴வோ ஸமத்தோ² வா பரியத்தரூபோ க⁴ராவாஸம் ஸண்டா²பேதும்.

இதா³னி யதா² வா க⁴ராவாஸோ ஸண்ட²பேதப்³போ³, ததா² ஓவத³ந்தோ சதுதா⁴ விப⁴ஜே போ⁴கே³திஆதி³மாஹ. தத்த² ஸ வே மித்தானி க³ந்த²தீதி ஸோ ஏவம் விப⁴ஜந்தோ மித்தானி க³ந்த²தி நாம அபே⁴ஜ்ஜமானானி ட²பேதி. யஸ்ஸ ஹி போ⁴கா³ ஸந்தி, ஸோ ஏவ மித்தே ட²பேதும் ஸக்கோதி, ந இதரோ.

ஏகேன போ⁴கே³ பு⁴ஞ்ஜேய்யாதி ஏகேன கோட்டா²ஸேன போ⁴கே³ பு⁴ஞ்ஜேய்ய. த்³வீஹி கம்மம் பயோஜயேதி த்³வீஹி கோட்டா²ஸேஹி கஸிவாணிஜ்ஜாதி³கம்மம் பயோஜேய்ய. சதுத்த²ஞ்ச நிதா⁴பேய்யாதி சதுத்த²ம் கோட்டா²ஸம் நிதா⁴பேத்வா ட²பேய்ய. ஆபதா³ஸு ப⁴விஸ்ஸதீதி குலானஞ்ஹி ந ஸப்³ப³காலம் ஏகஸதி³ஸம் வத்ததி, கதா³சி ராஜாதி³வஸேன ஆபதா³பி உப்பஜ்ஜந்தி, தஸ்மா ஏவம் ஆபதா³ஸு உப்பன்னாஸு ப⁴விஸ்ஸதீதி ‘‘ஏகம் கோட்டா²ஸம் நிதா⁴பேய்யா’’தி ஆஹ. இமேஸு பன சதூஸு கோட்டா²ஸேஸு கதரகோட்டா²ஸம் க³ஹேத்வா குஸலம் காதப்³ப³ந்தி? ‘‘போ⁴கே³ பு⁴ஞ்ஜேய்யா’’தி வுத்தகோட்டா²ஸம். ததோ க³ண்ஹித்வா பி⁴க்கூ²னம்பி கபணத்³தி⁴காதீ³னம்பி தா³தப்³ப³ம், பேஸகாரன்ஹாபிதாதீ³னம்பி வேதனம் தா³தப்³ப³ம்.

ச²த்³தி³ஸாபடிச்சா²த³னகண்ட³வண்ணனா

266. இதி ப⁴க³வா ஏத்தகேன கதா²மக்³கே³ன ஏவம் க³ஹபதிபுத்தஸ்ஸ அரியஸாவகோ சதூஹி காரணேஹி அகுஸலம் பஹாய ச²ஹி காரணேஹி போ⁴கா³னம் அபாயமுக²ம் வஜ்ஜேத்வா ஸோளஸ மித்தானி ஸேவந்தோ க⁴ராவாஸம் ஸண்ட²பேத்வா தா³ரப⁴ரணம் கரோந்தோ த⁴ம்மிகேன ஆஜீவேன ஜீவதி, தே³வமனுஸ்ஸானஞ்ச அந்தரே அக்³கி³க்க²ந்தோ⁴ விய விரோசதீதி வஜ்ஜனீயத⁴ம்மவஜ்ஜனத்த²ம் ஸேவிதப்³ப³த⁴ம்மஸேவனத்த²ஞ்ச ஓவாத³ம் த³த்வா இதா³னி நமஸ்ஸிதப்³பா³ ச² தி³ஸா த³ஸ்ஸேந்தோ கத²ஞ்ச க³ஹபதிபுத்தாதிஆதி³மாஹ.

தத்த² ச²த்³தி³ஸாபடிச்சா²தீ³தி யதா² ச²ஹி தி³ஸாஹி ஆக³மனப⁴யம் ந ஆக³ச்ச²தி, கே²மம் ஹோதி நிப்³ப⁴யம் ஏவம் விஹரந்தோ ‘‘ச²த்³தி³ஸாபடிச்சா²தீ³’’தி வுச்சதி. ‘‘புரத்தி²மா தி³ஸா மாதாபிதரோ வேதி³தப்³பா³’’திஆதீ³ஸு மாதாபிதரோ புப்³பு³பகாரிதாய புரத்தி²மா தி³ஸாதி வேதி³தப்³பா³. ஆசரியா த³க்கி²ணேய்யதாய த³க்கி²ணா தி³ஸாதி. புத்ததா³ரா பிட்டி²தோ அனுப³ந்த⁴னவஸேன பச்சி²மா தி³ஸாதி. மித்தாமச்சா யஸ்மா ஸோ மித்தாமச்சே நிஸ்ஸாய தே தே து³க்க²விஸேஸே உத்தரதி, தஸ்மா உத்தரா தி³ஸாதி. தா³ஸகம்மகரா பாத³மூலே பதிட்டா²னவஸேன ஹேட்டி²மா தி³ஸாதி. ஸமணப்³ராஹ்மணா கு³ணேஹி உபரி டி²தபா⁴வேன உபரிமா தி³ஸாதி வேதி³தப்³பா³.

267. ப⁴தோ நே ப⁴ரிஸ்ஸாமீதி அஹம் மாதாபிதூஹி த²ஞ்ஞம் பாயேத்வா ஹத்த²பாதே³ வட்³டே⁴த்வா முகே²ன ஸிங்கா⁴ணிகம் அபனேத்வா நஹாபேத்வா மண்டே³த்வா ப⁴தோ ப⁴ரிதோ ஜக்³கி³தோ, ஸ்வாஹம் அஜ்ஜ தே மஹல்லகே பாத³தோ⁴வனன்ஹாபனயாகு³ப⁴த்ததா³னாதீ³ஹி ப⁴ரிஸ்ஸாமி.

கிச்சம் நேஸம் கரிஸ்ஸாமீதி அத்தனோ கம்மம் ட²பேத்வா மாதாபிதூனம் ராஜகுலாதீ³ஸு உப்பன்னம் கிச்சம் க³ந்த்வா கரிஸ்ஸாமி. குலவம்ஸம் ஸண்ட²பேஸ்ஸாமீதி மாதாபிதூனம் ஸந்தகம் கே²த்தவத்து²ஹிரஞ்ஞஸுவண்ணாதி³ம் அவினாஸேத்வா ரக்க²ந்தோபி குலவம்ஸம் ஸண்ட²பேதி நாம. மாதாபிதரோ அத⁴ம்மிகவம்ஸதோ ஹாரேத்வா த⁴ம்மிகவம்ஸே ட²பேந்தோபி, குலவம்ஸேன ஆக³தானி ஸலாகப⁴த்தாதீ³னி அனுபச்சி²ந்தி³த்வா பவத்தேந்தோபி குலவம்ஸம் ஸண்ட²பேதி நாம. இத³ம் ஸந்தா⁴ய வுத்தம் – ‘‘குலவம்ஸம் ஸண்ட²பேஸ்ஸாமீ’’தி.

தா³யஜ்ஜம் படிபஜ்ஜாமீதி மாதாபிதரோ அத்தனோ ஓவாதே³ அவத்தமானே மிச்சா²படிபன்னே தா³ரகே வினிச்ச²யம் பத்வா அபுத்தே கரோந்தி, தே தா³யஜ்ஜாரஹா ந ஹோந்தி. ஓவாதே³ வத்தமானே பன குலஸந்தகஸ்ஸ ஸாமிகே கரோந்தி, அஹம் ஏவம் வத்திஸ்ஸாமீதி அதி⁴ப்பாயேன ‘‘தா³யஜ்ஜம் படிபஜ்ஜாமீ’’தி வுத்தம்.

த³க்கி²ணம் அனுப்பத³ஸ்ஸாமீதி தேஸம் பத்திதா³னம் கத்வா ததியதி³வஸதோ பட்டா²ய தா³னம் அனுப்பத³ஸ்ஸாமி. பாபா நிவாரேந்தீதி பாணாதிபாதாதீ³னம் தி³ட்ட²த⁴ம்மிகஸம்பராயிகம் ஆதீ³னவம் வத்வா, ‘‘தாத, மா ஏவரூபம் கரீ’’தி நிவாரேந்தி, கதம்பி க³ரஹந்தி. கல்யாணே நிவேஸேந்தீதி அனாத²பிண்டி³கோ விய லஞ்ஜம் த³த்வாபி ஸீலஸமாதா³னாதீ³ஸு நிவேஸேந்தி. ஸிப்பம் ஸிக்கா²பேந்தீதி அத்தனோ ஓவாதே³ டி²தபா⁴வம் ஞத்வா வம்ஸானுக³தம் முத்³தா³க³ணனாதி³ஸிப்பம் ஸிக்கா²பேந்தி. பதிரூபேனாதி குலஸீலரூபாதீ³ஹி அனுரூபேன.

ஸமயே தா³யஜ்ஜம் நிய்யாதே³ந்தீதி ஸமயே த⁴னம் தே³ந்தி. தத்த² நிச்சஸமயோ காலஸமயோதி த்³வே ஸமயா. நிச்சஸமயே தே³ந்தி நாம ‘‘உட்டா²ய ஸமுட்டா²ய இமம் க³ண்ஹிதப்³ப³ம் க³ண்ஹ, அயம் தே பரிப்³ப³யோ ஹோது, இமினா குஸலம் கரோஹீ’’தி தே³ந்தி. காலஸமயே தே³ந்தி நாம ஸிகா²ட²பனஆவாஹவிவாஹாதி³ஸமயே தே³ந்தி. அபிச பச்சி²மே காலே மரணமஞ்சே நிபன்னஸ்ஸ ‘‘இமினா குஸலம் கரோஹீ’’தி தே³ந்தாபி ஸமயே தே³ந்தி நாம. படிச்ச²ன்னா ஹோதீதி யம் புரத்தி²மதி³ஸதோ ப⁴யம் ஆக³ச்சே²ய்ய, யதா² தம் நாக³ச்ச²தி, ஏவம் பிஹிதா ஹோதி. ஸசே ஹி புத்தா விப்படிபன்னா, அஸ்ஸு, மாதாபிதரோ த³ஹரகாலதோ பட்டா²ய ஜக்³க³னாதீ³ஹி ஸம்மா படிபன்னா, ஏதே தா³ரகா, மாதாபிதூனம் அப்பதிரூபாதி ஏதம் ப⁴யம் ஆக³ச்சே²ய்ய. புத்தா ஸம்மா படிபன்னா, மாதாபிதரோ விப்படிபன்னா, மாதாபிதரோ புத்தானம் நானுரூபாதி ஏதம் ப⁴யம் ஆக³ச்சே²ய்ய. உபோ⁴ஸு விப்படிபன்னேஸு து³வித⁴ம்பி தம் ப⁴யம் ஹோதி. ஸம்மா படிபன்னேஸு ஸப்³ப³ம் ந ஹோதி. தேன வுத்தம் – ‘‘படிச்ச²ன்னா ஹோதி கே²மா அப்படிப⁴யா’’தி.

ஏவஞ்ச பன வத்வா ப⁴க³வா ஸிங்கா³லகம் ஏதத³வோச – ‘‘ந கோ² தே, க³ஹபதிபுத்த, பிதா லோகஸம்மதம் புரத்தி²மம் தி³ஸம் நமஸ்ஸாபேதி. மாதாபிதரோ பன புரத்தி²மதி³ஸாஸதி³ஸே கத்வா நமஸ்ஸாபேதி. அயஞ்ஹி தே பிதரா புரத்தி²மா தி³ஸா அக்கா²தா, நோ அஞ்ஞா’’தி.

268. உட்டா²னேனாதி ஆஸனா உட்டா²னேன. அந்தேவாஸிகேன ஹி ஆசரியம் தூ³ரதோவ ஆக³ச்ச²ந்தம் தி³ஸ்வா ஆஸனா வுட்டா²ய பச்சுக்³க³மனம் கத்வா ஹத்த²தோ ப⁴ண்ட³கம் க³ஹேத்வா ஆஸனம் பஞ்ஞபேத்வா நிஸீதா³பேத்வா பீ³ஜனபாத³தோ⁴வனபாத³மக்க²னானி காதப்³பா³னி. தம் ஸந்தா⁴ய வுத்தம் ‘‘உட்டா²னேனா’’தி. உபட்டா²னேனாதி தி³வஸஸ்ஸ திக்க²த்தும் உபட்டா²னக³மனேன. ஸிப்புக்³க³ஹணகாலே பன அவஸ்ஸகமேவ க³ந்தப்³ப³ம் ஹோதி. ஸுஸ்ஸூஸாயாதி ஸத்³த³ஹித்வா ஸவனேன. அஸத்³த³ஹித்வா ஸுணந்தோ ஹி விஸேஸம் நாதி⁴க³ச்ச²தி. பாரிசரியாயாதி அவஸேஸகு²த்³த³கபாரிசரியாய. அந்தேவாஸிகேன ஹி ஆசரியஸ்ஸ பாதோவ வுட்டா²ய முகோ²த³கத³ந்தகட்ட²ம் த³த்வா ப⁴த்தகிச்சகாலேபி பானீயம் க³ஹேத்வா பச்சுபட்டா²னாதீ³னி கத்வா வந்தி³த்வா க³ந்தப்³ப³ம். கிலிட்ட²வத்தா²தீ³னி தோ⁴விதப்³பா³னி, ஸாயம் நஹானோத³கம் பச்சுபட்ட²பேதப்³ப³ம். அபா²ஸுகாலே உபட்டா²தப்³ப³ம். பப்³ப³ஜிதேனபி ஸப்³ப³ம் அந்தேவாஸிகவத்தம் காதப்³ப³ம். இத³ம் ஸந்தா⁴ய வுத்தம் – ‘‘பாரிசரியாயா’’தி. ஸக்கச்சம் ஸிப்பபடிக்³க³ஹணேனாதி ஸக்கச்சம் படிக்³க³ஹணம் நாம தோ²கம் க³ஹேத்வா ப³ஹுவாரே ஸஜ்ஜா²யகரணம், ஏகபத³ம்பி விஸுத்³த⁴மேவ க³ஹேதப்³ப³ம்.

ஸுவினீதம் வினேந்தீதி ‘‘ஏவம் தே நிஸீதி³தப்³ப³ம், ஏவம் டா²தப்³ப³ம், ஏவம் கா²தி³தப்³ப³ம், ஏவம் பு⁴ஞ்ஜிதப்³ப³ம், பாபமித்தா வஜ்ஜேதப்³பா³, கல்யாணமித்தா ஸேவிதப்³பா³’’தி ஏவம் ஆசாரம் ஸிக்கா²பேந்தி வினேந்தி. ஸுக்³க³ஹிதம் கா³ஹாபேந்தீதி யதா² ஸுக்³க³ஹிதம் க³ண்ஹாதி, ஏவம் அத்த²ஞ்ச ப்³யஞ்ஜனஞ்ச ஸோதே⁴த்வா பயோக³ம் த³ஸ்ஸேத்வா க³ண்ஹாபேந்தி. மித்தாமச்சேஸு படியாதே³ந்தீதி ‘‘அயம் அம்ஹாகம் அந்தேவாஸிகோ ப்³யத்தோ ப³ஹுஸ்ஸுதோ மயா ஸமஸமோ, ஏதம் ஸல்லக்கே²ய்யாதா²’’தி ஏவம் கு³ணம் கதே²த்வா மித்தாமச்சேஸு பதிட்ட²பேந்தி.

தி³ஸாஸு பரித்தாணம் கரோந்தீதி ஸிப்பஸிக்கா²பனேனேவஸ்ஸ ஸப்³ப³தி³ஸாஸு ரக்க²ம் கரோந்தி. உக்³க³ஹிதஸிப்போ ஹி யம் யம் தி³ஸம் க³ந்த்வா ஸிப்பம் த³ஸ்ஸேதி, தத்த² தத்த²ஸ்ஸ லாப⁴ஸக்காரோ உப்பஜ்ஜதி. ஸோ ஆசரியேன கதோ நாம ஹோதி, கு³ணம் கதே²ந்தோபிஸ்ஸ மஹாஜனோ ஆசரியபாதே³ தோ⁴வித்வா வஸிதஅந்தேவாஸிகோ வத அயந்தி பட²மம் ஆசரியஸ்ஸேவ கு³ணம் கதே²ந்தி, ப்³ரஹ்மலோகப்பமாணோபிஸ்ஸ லாபோ⁴ உப்பஜ்ஜமானோ ஆசரியஸந்தகோவ ஹோதி. அபிச யம் விஜ்ஜம் பரிஜப்பித்வா க³ச்ச²ந்தம் அடவியம் சோரா ந பஸ்ஸந்தி, அமனுஸ்ஸா வா தீ³க⁴ஜாதிஆத³யோ வா ந விஹேடே²ந்தி, தம் ஸிக்கா²பேந்தாபி தி³ஸாஸு பரித்தாணம் கரோந்தி. யம் வா ஸோ தி³ஸம் க³தோ ஹோதி, ததோ கங்க²ம் உப்பாதே³த்வா அத்தனோ ஸந்திகம் ஆக³தமனுஸ்ஸே ‘‘ஏதிஸ்ஸம் தி³ஸாயம் அம்ஹாகம் அந்தேவாஸிகோ வஸதி, தஸ்ஸ ச மய்ஹஞ்ச இமஸ்மிம் ஸிப்பே நானாகரணம் நத்தி², க³ச்ச²த² தமேவ புச்ச²தா²’’தி ஏவம் அந்தேவாஸிகம் பக்³க³ண்ஹந்தாபி தஸ்ஸ தத்த² லாப⁴ஸக்காருப்பத்தியா பரித்தாணம் கரோந்தி நாம, பதிட்ட²ம் கரோந்தீதி அத்தோ². ஸேஸமேத்த² புரிமனயேனேவ யோஜேதப்³ப³ம்.

269. ததியதி³ஸாவாரே ஸம்மானனாயாதி தே³வமாதே திஸ்ஸமாதேதி ஏவம் ஸம்பா⁴விதகதா²கத²னேன. அனவமானனாயாதி யதா² தா³ஸகம்மகராத³யோ போதே²த்வா விஹேடே²த்வா கதே²ந்தி, ஏவம் ஹீளேத்வா விமானேத்வா அகத²னேன. அனதிசரியாயாதி தம் அதிக்கமித்வா ப³ஹி அஞ்ஞாய இத்தி²யா ஸத்³தி⁴ம் பரிசரந்தோ தம் அதிசரதி நாம, ததா² அகரணேன. இஸ்ஸரியவோஸ்ஸக்³கே³னாதி இத்தி²யோ ஹி மஹாலதாஸதி³ஸம்பி ஆப⁴ரணம் லபி⁴த்வா ப⁴த்தம் விசாரேதும் அலப⁴மானா குஜ்ஜ²ந்தி, கடச்சு²ம் ஹத்தே² ட²பேத்வா தவ ருசியா கரோஹீதி ப⁴த்தகே³ஹே விஸ்ஸட்டே² ஸப்³ப³ம் இஸ்ஸரியம் விஸ்ஸட்ட²ம் நாம ஹோதி, ஏவம் கரணேனாதி அத்தோ². அலங்காரானுப்பதா³னேனாதி அத்தனோ விப⁴வானுரூபேன அலங்காரதா³னேன. ஸுஸம்விஹிதகம்மந்தாதி யாகு³ப⁴த்தபசனகாலாதீ³னி அனதிக்கமித்வா தஸ்ஸ தஸ்ஸ ஸாது⁴கம் கரணேன ஸுட்டு² ஸம்விஹிதகம்மந்தா. ஸங்க³ஹிதபரிஜனாதி ஸம்மானனாதீ³ஹி சேவ பஹேணகபேஸனாதீ³ஹி ச ஸங்க³ஹிதபரிஜனா. இத⁴ பரிஜனோ நாம ஸாமிகஸ்ஸ சேவ அத்தனோ ச ஞாதிஜனோ. அனதிசாரினீதி ஸாமிகம் முஞ்சித்வா அஞ்ஞம் மனஸாபி ந பத்தே²தி. ஸம்ப⁴தந்தி கஸிவாணிஜ்ஜாதீ³னி கத்வா ஆப⁴தத⁴னம். த³க்கா² ச ஹோதீதி யாகு³ப⁴த்தஸம்பாத³னாதீ³ஸு சே²கா நிபுணா ஹோதி. அனலஸாதி நிக்கோஸஜ்ஜா. யதா² அஞ்ஞா குஸீதா நிஸின்னட்டா²னே நிஸின்னாவ ஹோந்தி டி²தட்டா²னே டி²தாவ, ஏவம் அஹுத்வா விப்பா²ரிதேன சித்தேன ஸப்³ப³கிச்சானி நிப்பா²தே³தி. ஸேஸமிதா⁴பி புரிமனயேனேவ யோஜேதப்³ப³ம்.

270. சதுத்த²தி³ஸாவாரே அவிஸம்வாத³னதாயாதி யஸ்ஸ யஸ்ஸ நாமம் க³ண்ஹாதி, தம் தம் அவிஸம்வாதே³த்வா இத³ம்பி அம்ஹாகம் கே³ஹே அத்தி², இத³ம்பி அத்தி², க³ஹேத்வா க³ச்சா²ஹீதி ஏவம் அவிஸம்வாதே³த்வா தா³னேன. அபரபஜா சஸ்ஸ படிபூஜேந்தீதி ஸஹாயஸ்ஸ புத்ததீ⁴தரோ பஜா நாம, தேஸம் பன புத்ததீ⁴தரோ ச நத்துபனத்தகா ச அபரபஜா நாம. தே படிபூஜேந்தி கேளாயந்தி மமாயந்தி மங்க³லகாலாதீ³ஸு தேஸம் மங்க³லாதீ³னி கரோந்தி. ஸேஸமிதா⁴பி புரிமனயேனேவ வேதி³தப்³ப³ம்.

271. யதா²ப³லம் கம்மந்தஸம்விதா⁴னேனாதி த³ஹரேஹி காதப்³ப³ம் மஹல்லகேஹி, மஹல்லகேஹி வா காதப்³ப³ம் த³ஹரேஹி, இத்தீ²ஹி காதப்³ப³ம் புரிஸேஹி, புரிஸேஹி வா காதப்³ப³ம் இத்தீ²ஹி அகாரேத்வா தஸ்ஸ தஸ்ஸ ப³லானுரூபேனேவ கம்மந்தஸம்விதா⁴னேன. ப⁴த்தவேதனானுப்பதா³னேனாதி அயம் கு²த்³த³கபுத்தோ, அயம் ஏகவிஹாரீதி தஸ்ஸ தஸ்ஸ அனுரூபம் ஸல்லக்கே²த்வா ப⁴த்ததா³னேன சேவ பரிப்³ப³யதா³னேன ச. கி³லானுபட்டா²னேனாதி அபா²ஸுககாலே கம்மம் அகாரேத்வா ஸப்பாயபே⁴ஸஜ்ஜாதீ³னி த³த்வா படிஜக்³க³னேன. அச்ச²ரியானம் ரஸானம் ஸம்விபா⁴கே³னாதி அச்ச²ரியே மது⁴ரரஸே லபி⁴த்வா ஸயமேவ அகா²தி³த்வா தேஸம்பி ததோ ஸம்விபா⁴க³கரணேன. ஸமயே வோஸ்ஸக்³கே³னாதி நிச்சஸமயே ச காலஸமயே ச வோஸ்ஸஜ்ஜனேன. நிச்சஸமயே வோஸ்ஸஜ்ஜனம் நாம ஸகலதி³வஸம் கம்மம் கரோந்தா கிலமந்தி. தஸ்மா யதா² ந கிலமந்தி, ஏவம் வேலம் ஞத்வா விஸ்ஸஜ்ஜனம். காலஸமயே வோஸ்ஸக்³கோ³ நாம ச²ணனக்க²த்தகீளாதீ³ஸு அலங்காரப⁴ண்ட³கா²த³னீயபோ⁴ஜனீயாதீ³னி த³த்வா விஸ்ஸஜ்ஜனம். தி³ன்னாதா³யினோதி சோரிகாய கிஞ்சி அக³ஹேத்வா ஸாமிகேஹி தி³ன்னஸ்ஸேவ ஆதா³யினோ. ஸுகதகம்மகராதி ‘‘கிம் ஏதஸ்ஸ கம்மேன கதேன, ந மயம் கிஞ்சி லபா⁴மா’’தி அனுஜ்ஜா²யித்வா துட்ட²ஹத³யா யதா² தம் கம்மம் ஸுகதம் ஹோதி, ஏவம் காரகா. கித்திவண்ணஹராதி பரிஸமஜ்ஜே² கதா²ய ஸம்பத்தாய ‘‘கோ அம்ஹாகம் ஸாமிகேஹி ஸதி³ஸோ அத்தி², மயம் அத்தனோ தா³ஸபா⁴வம்பி ந ஜானாம, தேஸம் ஸாமிகபா⁴வம்பி ந ஜானாம, ஏவம் நோ அனுகம்பந்தீ’’தி கு³ணகதா²ஹாரகா. ஸேஸமிதா⁴பி புரிமனயேனேவ யோஜேதப்³ப³ம்.

272. மேத்தேன காயகம்மேனாதிஆதீ³ஸு மேத்தசித்தம் பச்சுபட்ட²பேத்வா கதானி காயகம்மாதீ³னி மேத்தானி நாம வுச்சந்தி. தத்த² பி⁴க்கூ² நிமந்தேஸ்ஸாமீதி விஹாரக³மனம், த⁴மகரணம் க³ஹேத்வா உத³கபரிஸ்ஸாவனம், பிட்டி²பரிகம்மபாத³பரிகம்மாதி³கரணஞ்ச மேத்தம் காயகம்மம் நாம. பி⁴க்கூ² பிண்டா³ய பவிட்டே² தி³ஸ்வா ‘‘ஸக்கச்சம் யாகு³ம் தே³த², ப⁴த்தம் தே³தா²’’திஆதி³வசனஞ்சேவ, ஸாது⁴காரம் த³த்வா த⁴ம்மஸவனஞ்ச ஸக்கச்சம் படிஸந்தா²ரகரணாதீ³னி ச மேத்தம் வசீகம்மம் நாம. ‘‘அம்ஹாகம் குலூபகத்தே²ரா அவேரா ஹோந்து அப்³யாபஜ்ஜா’’தி ஏவம் சிந்தனம் மேத்தம் மனோகம்மம் நாம. அனாவடத்³வாரதாயாதி அபிஹிதத்³வாரதாய. தத்த² ஸப்³ப³த்³வாரானி விவரித்வாபி ஸீலவந்தானம் அதா³யகோ அகாரகோ பிஹிதத்³வாரோயேவ. ஸப்³ப³த்³வாரானி பன பித³ஹித்வாபி தேஸம் தா³யகோ காரகோ விவடத்³வாரோயேவ. இதி ஸீலவந்தேஸு கே³ஹத்³வாரம் ஆக³தேஸு ஸந்தம்யேவ நத்தீ²தி அவத்வா தா³தப்³ப³ம். ஏவம் அனாவடத்³வாரதா நாம ஹோதி.

ஆமிஸானுப்பதா³னேனாதி புரேப⁴த்தம் பரிபு⁴ஞ்ஜிதப்³ப³கம் ஆமிஸம் நாம, தஸ்மா ஸீலவந்தானம் யாகு³ப⁴த்தஸம்பதா³னேனாதி அத்தோ². கல்யாணேன மனஸா அனுகம்பந்தீதி ‘‘ஸப்³பே³ ஸத்தா ஸுகி²தா ஹோந்து அவேரா அரோகா³ அப்³யாபஜ்ஜா’’தி ஏவம் ஹிதப²ரணேன. அபிச உபட்டா²கானம் கே³ஹம் அஞ்ஞே ஸீலவந்தே ஸப்³ரஹ்மசாரீ க³ஹேத்வா பவிஸந்தாபி கல்யாணேன சேதஸா அனுகம்பந்தி நாம. ஸுதம் பரியோதா³பேந்தீதி யம் தேஸம் பகதியா ஸுதம் அத்தி², தஸ்ஸ அத்த²ம் கதே²த்வா கங்க²ம் வினோதே³ந்தி, தத²த்தாய வா படிபஜ்ஜாபேந்தி. ஸேஸமிதா⁴பி புரிமனயேனேவ யோஜேதப்³ப³ம்.

273. அலமத்தோதி புத்ததா³ரப⁴ரணம் கத்வா அகா³ரம் அஜ்ஜா²வஸனஸமத்தோ². பண்டி³தோதி தி³ஸானமஸ்ஸனட்டா²னே பண்டி³தோ ஹுத்வா. ஸண்ஹோதி ஸுகு²மத்த²த³ஸ்ஸனேன ஸண்ஹவாசாப⁴ணனேன வா ஸண்ஹோ ஹுத்வா. படிபா⁴னவாதி தி³ஸானமஸ்ஸனட்டா²னே படிபா⁴னவா ஹுத்வா நிவாதவுத்தீதி நீசவுத்தி. அத்த²த்³தோ⁴தி த²ம்ப⁴ரஹிதோ. உட்டா²னகோதி உட்டா²னவீரியஸம்பன்னோ. அனலஸோதி நிக்கோஸஜ்ஜோ. அச்சி²ன்னவுத்தீதி நிரந்தரகரணவஸேன அக²ண்ட³வுத்தி. மேதா⁴வீதி டா²னுப்பத்தியா பஞ்ஞாய ஸமன்னாக³தோ.

ஸங்கா³ஹகோதி சதூஹி ஸங்க³ஹவத்தூ²ஹி ஸங்க³ஹகரோ. மித்தகரோதி மித்தக³வேஸனோ. வத³ஞ்ஞூதி புப்³ப³காரினா, வுத்தவசனம் ஜானாதி. ஸஹாயகஸ்ஸ க⁴ரம் க³தகாலே ‘‘மய்ஹம் ஸஹாயகஸ்ஸ வேட²னம் தே³த², ஸாடகம் தே³த², மனுஸ்ஸானம் ப⁴த்தவேதனம் தே³தா²’’தி வுத்தவசனமனுஸ்ஸரந்தோ தஸ்ஸ அத்தனோ கே³ஹம் ஆக³தஸ்ஸ தத்தகம் வா ததோ அதிரேகம் வா படிகத்தாதி அத்தோ². அபிச ஸஹாயகஸ்ஸ க⁴ரம் க³ந்த்வா இமம் நாம க³ண்ஹிஸ்ஸாமீதி ஆக³தம் ஸஹாயகம் லஜ்ஜாய க³ண்ஹிதும் அஸக்கோந்தம் அனிச்சா²ரிதம்பி தஸ்ஸ வாசம் ஞத்வா யேன அத்தே²ன ஸோ ஆக³தோ, தம் நிப்பா²தே³ந்தோ வத³ஞ்ஞூ நாம. யேன யேன வா பன ஸஹாயகஸ்ஸ ஊனம் ஹோதி, ஓலோகேத்வா தம் தம் தே³ந்தோபி வத³ஞ்ஞூயேவ. நேதாதி தம் தம் அத்த²ம் த³ஸ்ஸேந்தோ பஞ்ஞாய நேதா. விவிதா⁴னி காரணானி த³ஸ்ஸேந்தோ நேதீதி வினேதா. புனப்புனம் நேதீதி அனுனேதா.

தத்த² தத்தா²தி தஸ்மிம் தஸ்மிம் புக்³க³லே. ரத²ஸ்ஸாணீவ யாயதோதி யதா² ஆணியா ஸதியேவ ரதோ² யாதி, அஸதி ந யாதி, ஏவம் இமேஸு ஸங்க³ஹேஸு ஸதியேவ லோகோ வத்ததி, அஸதி ந வத்ததி. தேன வுத்தம் – ‘‘ஏதே கோ² ஸங்க³ஹா லோகே, ரத²ஸ்ஸாணீவ யாயதோ’’தி.

ந மாதா புத்தகாரணாதி யதி³ மாதா ஏதே ஸங்க³ஹே புத்தஸ்ஸ ந கரேய்ய, புத்தகாரணா மானம் வா பூஜம் வா ந லபே⁴ய்ய.

ஸங்க³ஹா ஏதேதி உபயோக³வசனே பச்சத்தம். ‘‘ஸங்க³ஹே ஏதே’’தி வா பாடோ². ஸம்மபேக்க²ந்தீதி ஸம்மா பேக்க²ந்தி. பாஸம்ஸா ச ப⁴வந்தீதி பஸம்ஸனீயா ச ப⁴வந்தி.

274. இதி ப⁴க³வா யா தி³ஸா ஸந்தா⁴ய தே க³ஹபதிபுத்த பிதா ஆஹ ‘‘தி³ஸா நமஸ்ஸேய்யாஸீ’’தி, இமா தா ச² தி³ஸா. யதி³ த்வம் பிது வசனம் கரோஸி, இமா தி³ஸா நமஸ்ஸாதி த³ஸ்ஸேந்தோ ஸிங்கா³லஸ்ஸ புச்சா²ய ட²த்வா தே³ஸனம் மத்த²கம் பாபேத்வா ராஜக³ஹம் பிண்டா³ய பாவிஸி. ஸிங்கா³லகோபி ஸரணேஸு பதிட்டா²ய சத்தாலீஸகோடித⁴னம் பு³த்³த⁴ஸாஸனே விகிரித்வா புஞ்ஞகம்மம் கத்வா ஸக்³க³பராயணோ அஹோஸி. இமஸ்மிஞ்ச பன ஸுத்தே யம் கி³ஹீஹி கத்தப்³ப³ம் கம்மம் நாம, தம் அகதி²தம் நத்தி², கி³ஹிவினயோ நாமாயம் ஸுத்தந்தோ. தஸ்மா இமம் ஸுத்வா யதா²னுஸிட்ட²ம் படிபஜ்ஜமானஸ்ஸ வுத்³தி⁴யேவ பாடிகங்கா², நோ பரிஹானீதி.

ஸுமங்க³லவிலாஸினியா தீ³க⁴னிகாயட்ட²கதா²ய

ஸிங்கா³லஸுத்தவண்ணனா நிட்டி²தா.