2. உது³ம்ப³ரிகஸுத்தவண்ணனா

நிக்³ரோத⁴பரிப்³பா³ஜகவத்து²வண்ணனா

49. ஏவம் மே ஸுதந்தி உது³ம்ப³ரிகஸுத்தம். தத்ராயமபுப்³ப³பத³வண்ணனா – பரிப்³பா³ஜகோதி ச²ன்னபரிப்³பா³ஜகோ. உது³ம்ப³ரிகாய பரிப்³பா³ஜகாராமேதி உது³ம்ப³ரிகாய தே³வியா ஸந்தகே பரிப்³பா³ஜகாராமே. ஸந்தா⁴னோதி தஸ்ஸ நாமம். அயம் பன மஹானுபா⁴வோ பரிவாரேத்வா விசரந்தானம் பஞ்சன்னம் உபாஸகஸதானம் அக்³க³புரிஸோ அனாகா³மீ ப⁴க³வதா மஹாபரிஸமஜ்ஜே² ஏவம் ஸம்வண்ணிதோ –

‘‘ச²ஹி, பி⁴க்க²வே, அங்கே³ஹி ஸமன்னாக³தோ ஸந்தா⁴னோ க³ஹபதி ததா²க³தே நிட்ட²ங்க³தோ ஸத்³த⁴ம்மே இரியதி. கதமேஹி ச²ஹி? பு³த்³தே⁴ அவேச்சப்பஸாதே³ன த⁴ம்மே அவேச்சப்பஸாதே³ன ஸங்கே⁴ அவேச்சப்பஸாதே³ன அரியேன ஸீலேன அரியேன ஞாணேன அரியாய விமுத்தியா. இமேஹி கோ², பி⁴க்க²வே, ச²ஹி அங்கே³ஹி ஸமன்னாக³தோ ஸந்தா⁴னோ க³ஹபதி ததா²க³தே நிட்ட²ங்க³தோ ஸத்³த⁴ம்மே இரியதீ’’தி (அ. நி. 6.120-139).

ஸோ பாதோயேவ உபோஸத²ங்கா³னி அதி⁴ட்டா²ய புப்³ப³ண்ஹஸமயே பு³த்³த⁴ப்பமுக²ஸ்ஸ ஸங்க⁴ஸ்ஸ தா³னம் த³த்வா பி⁴க்கூ²ஸு விஹாரம் க³தேஸு க⁴ரே கு²த்³த³கமஹல்லகானம் தா³ரகானம் ஸத்³தே³ன உப்³பா³ள்ஹோ ஸத்து² ஸந்திகே ‘‘த⁴ம்மம் ஸோஸ்ஸாமீ’’தி நிக்க²ந்தோ. தேன வுத்தம் தி³வா தி³வஸ்ஸ ராஜக³ஹா நிக்க²மீதி. தத்த² தி³வா தி³வஸ்ஸாதி தி³வஸஸ்ஸ தி³வா நாம மஜ்ஜ²ன்ஹாதிக்கமோ, தஸ்மிம் தி³வஸஸ்ஸாபி தி³வாபூ⁴தே அதிக்கந்தமத்தே மஜ்ஜ²ன்ஹிகே நிக்க²மீதி அத்தோ². படிஸல்லீனோதி ததோ ததோ ரூபாதி³கோ³சரதோ சித்தம் படிஸம்ஹரித்வா நிலீனோ ஜா²னரதிஸேவனாவஸேன ஏகீபா⁴வம் க³தோ. மனோபா⁴வனீயானந்தி மனவட்³ட⁴கானம். யே ச ஆவஜ்ஜதோ மனஸிகரோதோ சித்தம் வினீவரணம் ஹோதி உன்னமதி வட்³ட⁴தி.

50. உன்னாதி³னியாதிஆதீ³னி போட்ட²பாத³ஸுத்தே வித்தா²ரிதனயேனேவ வேதி³தப்³பா³னி.

51. யாவதாதி யத்தகா. அயம் தேஸம் அஞ்ஞதரோதி அயம் தேஸம் அப்³ப⁴ந்தரோ ஏகோ ஸாவகோ, ப⁴க³வதோ கிர ஸாவகா கி³ஹிஅனாகா³மினோயேவ பஞ்சஸதா ராஜக³ஹே படிவஸந்தி. யேஸம் ஏகேகஸ்ஸ பஞ்ச பஞ்ச உபாஸகஸதானி பரிவாரா, தே ஸந்தா⁴ய ‘‘அயம் தேஸம் அஞ்ஞதரோ’’தி ஆஹ. அப்பேவ நாமாதி தஸ்ஸ உபஸங்கமனம் பத்த²யமானோ ஆஹ. பத்த²னாகாரணம் பன போட்ட²பாத³ஸுத்தே வுத்தமேவ.

52. ஏதத³வோசாதி ஆக³ச்ச²ந்தோ அந்தராமக்³கே³யேவ தேஸம் கதா²ய ஸுதத்தா ஏதம் அஞ்ஞதா² கோ² இமேதிஆதி³வசனம் அவோச. தத்த² அஞ்ஞதித்தி²யாதி த³ஸ்ஸனேனபி ஆகப்பேனபி குத்தேனபி ஆசாரேனபி விஹாரேனபி இரியாபதே²னபி அஞ்ஞே தித்தி²யாதி அஞ்ஞதித்தி²யா. ஸங்க³ம்ம ஸமாக³ம்மாதி ஸங்க³ந்த்வா ஸமாக³ந்த்வா ராஸி ஹுத்வா நிஸின்னட்டா²னே. அரஞ்ஞவனபத்தா²னீதி அரஞ்ஞவனபத்தா²னி கா³மூபசாரதோ முத்தானி தூ³ரஸேனாஸனானி. பந்தானீதி தூ³ரதரானி மனுஸ்ஸூபசாரவிரஹிதானி. அப்பஸத்³தா³னீதி விஹாரூபசாரேன க³ச்ச²தோ அத்³தி⁴கஜனஸ்ஸபி ஸத்³தே³ன மந்த³ஸத்³தா³னி. அப்பனிக்³கோ⁴ஸானீதி அவிபா⁴விதத்தே²ன நிக்³கோ⁴ஸேன மந்த³னிக்³கோ⁴ஸானி. விஜனவாதானீதி அந்தோஸஞ்சாரினோ ஜனஸ்ஸ வாதேன விக³தவாதானி. மனுஸ்ஸராஹஸ்ஸேய்யகானீதி மனுஸ்ஸானம் ரஹஸ்ஸகரணஸ்ஸ யுத்தானி அனுச்ச²விகானி. படிஸல்லானஸாருப்பானீதி ஏகீபா⁴வஸ்ஸ அனுரூபானி. இதி ஸந்தா⁴னோ க³ஹபதி ‘‘அஹோ மம ஸத்தா² யோ ஏவரூபானி ஸேனாஸனானி படிஸேவதீ’’தி அஞ்ஜலிம் பக்³க³ய்ஹ உத்தமங்கே³ ஸிரஸ்மிம் பதிட்ட²பேத்வா இமம் உதா³னம் உதா³னேந்தோ நிஸீதி³.

53. ஏவம் வுத்தேதி ஏவம் ஸந்தா⁴னேன க³ஹபதினா உதா³னம் உதா³னேந்தேன வுத்தே. நிக்³ரோதோ⁴ பரிப்³பா³ஜகோ அயம் க³ஹபதி மம ஸந்திகே நிஸின்னோபி அத்தனோ ஸத்தா²ரம்யேவ தோ²மேதி உக்கம்ஸதி, அம்ஹே பன அத்தீ²திபி ந மஞ்ஞதி, ஏதஸ்மிம் உப்பன்னகோபம் ஸமணஸ்ஸ கோ³தமஸ்ஸ உபரி பாதேஸ்ஸாமீதி ஸந்தா⁴னம் க³ஹபதிம் ஏதத³வோச.

யக்³கே⁴தி சோத³னத்தே² நிபாதோ. ஜானேய்யாஸீதி பு³ஜ்ஜே²ய்யாஸி பஸ்ஸேய்யாஸி. கேன ஸமணோ கோ³தமோ ஸத்³தி⁴ம் ஸல்லபதீதி கேன காரணேன கேன புக்³க³லேன ஸத்³தி⁴ம் ஸமணோ கோ³தமோ ஸல்லபதி வத³தி பா⁴ஸதி. கிம் வுத்தம் ஹோதி – ‘‘யதி³ கிஞ்சி ஸல்லாபகாரணம் ப⁴வேய்ய, யதி³ வா கோசி ஸமணஸ்ஸ கோ³தமஸ்ஸ ஸந்திகம் ஸல்லாபத்தி²கோ க³ச்சே²ய்ய, ஸல்லபேய்ய, ந பன காரணம் அத்தி², ந தஸ்ஸ ஸந்திகம் கோசி க³ச்ச²தி, ஸ்வாயம் கேன ஸமணோ கோ³தமோ ஸத்³தி⁴ம் ஸல்லபதி, அஸல்லபந்தோ கத²ம் உன்னாதீ³ ப⁴விஸ்ஸதீ’’தி.

ஸாகச்ச²ந்தி ஸம்ஸந்த³னம். பஞ்ஞாவேய்யத்தியந்தி உத்தரபச்சுத்தரனயேன ஞாணப்³யத்தபா⁴வம். ஸுஞ்ஞாகா³ரஹதாதி ஸுஞ்ஞாகா³ரேஸு நட்டா², ஸமணேன ஹி கோ³தமேன போ³தி⁴மூலே அப்பமத்திகா பஞ்ஞா அதி⁴க³தா, ஸாபிஸ்ஸ ஸுஞ்ஞாகா³ரேஸு ஏககஸ்ஸ நிஸீத³தோ நட்டா². யதி³ பன மயம் விய க³ணஸங்க³ணிகம் கத்வா நிஸீதே³ய்ய, நாஸ்ஸ பஞ்ஞா நஸ்ஸேய்யாதி த³ஸ்ஸேதி. அபரிஸாவசரோதி அவிஸாரத³த்தா பரிஸம் ஓதரிதும் ந ஸக்கோதி. நாலம் ஸல்லாபாயாதி ந ஸமத்தோ² ஸல்லாபம் காதும். அந்தமந்தானேவாதி கோசி மம் பஞ்ஹம் புச்சே²ய்யாதி பஞ்ஹாபீ⁴தோ அந்தமந்தானேவ பந்தஸேனாஸனானி ஸேவதி. கோ³காணாதி ஏகக்கி²ஹதா காணகா³வீ. ஸா கிர பரியந்தசாரினீ ஹோதி, அந்தமந்தானேவ ஸேவதி. ஸா கிர காணக்கி²பா⁴வேன வனந்தாபி⁴முகீ²பி ந ஸக்கோதி ப⁴விதும். கஸ்மா? யஸ்மா பத்தேன வா ஸாகா²ய வா கண்டகேன வா பஹாரஸ்ஸ பா⁴யதி. கு³ன்னம் அபி⁴முகீ²பி ந ஸக்கோதி ப⁴விதும். கஸ்மா? யஸ்மா ஸிங்கே³ன வா கண்ணேன வா வாலேன வா பஹாரஸ்ஸ பா⁴யதி. இங்கா⁴தி சோத³னத்தே² நிபாதோ. ஸம்ஸாதே³ய்யாமாதி ஏகபஞ்ஹபுச்ச²னேனேவ ஸம்ஸாத³னம் விஸாத³மாபன்னம் கரேய்யாம. துச்ச²கும்பீ⁴வ நந்தி ரித்தக⁴டம் விய நம். ஓரோதே⁴ய்யாமாதி வினந்தே⁴ய்யாம. பூரிதக⁴டோ ஹி இதோ சிதோ ச பரிவத்தேத்வா ந ஸுவினந்த⁴னீயோ ஹோதி. ரித்தகோ யதா²ருசி பரிவத்தேத்வா ஸக்கா ஹோதி வினந்தி⁴தும், ஏவமேவ ஹதபஞ்ஞதாய ரித்தகும்பி⁴ஸதி³ஸம் ஸமணம் கோ³தமம் வாத³வினந்த⁴னேன ஸமந்தா வினந்தி⁴ஸ்ஸாமாதி வத³தி.

இதி பரிப்³பா³ஜகோ ஸத்து² ஸுவண்ணவண்ணம் நலாடமண்ட³லம் அபஸ்ஸந்தோ த³ஸப³லஸ்ஸ பரம்முகா² அத்தனோ ப³லம் தீ³பேந்தோ அஸம்பி⁴ன்னம் க²த்தியகுமாரம் ஜாதியா க⁴ட்டயந்தோ சண்டா³லபுத்தோ விய அஸம்பி⁴ன்னகேஸரஸீஹம் மிக³ராஜானம் தா²மேன க⁴ட்டேந்தோ ஜரஸிங்கா³லோ விய ச நானப்பகாரம் துச்ச²க³ஜ்ஜிதம் க³ஜ்ஜி. உபாஸகோபி சிந்தேஸி ‘‘அயம் பரிப்³பா³ஜகோ அதி விய க³ஜ்ஜதி, அவீசிபு²ஸனத்தா²ய பாத³ம், ப⁴வக்³க³க்³க³ஹணத்தா²ய ஹத்த²ம் பஸாரயந்தோ விய நிரத்த²கம் வாயமதி. ஸசே மே ஸத்தா² இமம் டா²னமாக³ச்சே²ய்ய, இமஸ்ஸ பரிப்³பா³ஜகஸ்ஸ யாவ ப⁴வக்³கா³ உஸ்ஸிதம் மானத்³த⁴ஜம் டா²னஸோவ ஓபாதேய்யா’’தி.

54. ப⁴க³வாபி தேஸம் தம் கதா²ஸல்லாபம் அஸ்ஸோஸியேவ. தேன வுத்தம் ‘‘அஸ்ஸோஸி கோ² இமம் கதா²ஸல்லாப’’ந்தி.

ஸுமாக³தா⁴யாதி ஸுமாக³தா⁴ நாம போக்க²ரணீ, யஸ்ஸா தீரே நிஸின்னோ அஞ்ஞதரோ புரிஸோ பது³மனாளந்தரேஹி அஸுரப⁴வனம் பவிஸந்தம் அஸுரஸேனம் அத்³த³ஸ. மோரனிவாபோதி நிவாபோ வுச்சதி ப⁴த்தம், யத்த² மோரானம் அப⁴யேன ஸத்³தி⁴ம் நிவாபோ தி³ன்னோ, தம் டா²னந்தி அத்தோ². அப்³போ⁴காஸேதி அங்க³ணட்டா²னே. அஸ்ஸாஸபத்தாதி துட்டி²பத்தா ஸோமனஸ்ஸபத்தா. அஜ்ஜா²ஸயந்தி உத்தமனிஸ்ஸயபூ⁴தம். ஆதி³ப்³ரஹ்மசரியந்தி புராணப்³ரஹ்மசரியஸங்கா²தம் அரியமக்³க³ம். இத³ம் வுத்தம் ஹோதி – ‘‘கோ நாம ஸோ, ப⁴ந்தே, த⁴ம்மோ யேன ப⁴க³வதா ஸாவகா வினீதா அஜ்ஜா²ஸயாதி³ப்³ரஹ்மசரியபூ⁴தம் அரியமக்³க³ம் பூரேத்வா அரஹத்தாதி⁴க³மவஸேன அஸ்ஸாஸபத்தா படிஜானந்தீ’’தி.

தபோஜிகு³ச்சா²வாத³வண்ணனா

55. விப்பகதாதி மமாக³மனபச்சயா அனிட்டி²தா, வ ஹுத்வா டி²தா, கதே²ஹி, அஹமேதம் நிட்ட²பேத்வா மத்த²கம் பாபேத்வா த³ஸ்ஸேமீதி ஸப்³ப³ஞ்ஞுபவாரணம் பவாரேஸி.

56. து³ஜ்ஜானம் கோ²தி ப⁴க³வா பரிப்³பா³ஜகஸ்ஸ வசனம் ஸுத்வா ‘‘அயம் பரிப்³பா³ஜகோ மயா ஸாவகானம் தே³ஸேதப்³ப³ம் த⁴ம்மம் தேஹி பூரேதப்³ப³ம் படிபத்திம் புச்ச²தி, ஸசஸ்ஸாஹம் ஆதி³தோவ தம் கதே²ஸ்ஸாமி, கதி²தம்பி நம் ந ஜானிஸ்ஸதி, அயம் பன வீரியேன பாபஜிகு³ச்ச²னவாதோ³, ஹந்தா³ஹம் ஏதஸ்ஸேவ விஸயே பஞ்ஹம் புச்சா²பேத்வா புது²ஸமணப்³ராஹ்மணானம் லத்³தி⁴யா நிரத்த²கபா⁴வம் த³ஸ்ஸேமி. அத² பச்சா² இமம் பஞ்ஹம் ப்³யாகரிஸ்ஸாமீ’’தி சிந்தேத்வா து³ஜ்ஜானம் கோ² ஏதந்திஆதி³மாஹ. தத்த² ஸகே ஆசரியகேதி அத்தனோ ஆசரியவாதே³. அதி⁴ஜேகு³ச்சே²தி வீரியேன பாபஜிகு³ச்ச²னபா⁴வே. கத²ம் ஸந்தாதி கத²ம் பூ⁴தா. தபோஜிகு³ச்சா²தி வீரியேன பாபஜிகு³ச்சா² பாபவிவஜ்ஜனா. பரிபுண்ணாதி பரிஸுத்³தா⁴. கத²ம் அபரிபுண்ணாதி கத²ம் அபரிஸுத்³தா⁴ ஹோதீதி ஏவம் புச்சா²தி. யத்ர ஹி நாமாதி யோ நாம.

57. அப்பஸத்³தே³ கத்வாதி நிரவே அப்பஸத்³தே³ கத்வா. ஸோ கிர சிந்தேஸி – ‘‘ஸமணோ கோ³தமோ ஏகம் பஞ்ஹம்பி ந கதே²தி, ஸல்லாபகதா²பிஸ்ஸ அதிப³ஹுகா நத்தி², இமே பன ஆதி³தோ பட்டா²ய ஸமணம் கோ³தமம் அனுவத்தந்தி சேவ பஸம்ஸந்தி ச, ஹந்தா³ஹம் இமே நிஸ்ஸத்³தே³ கத்வா ஸயம் கதே²மீ’’தி. ஸோ ததா² அகாஸி. தேன வுத்தம் ‘‘அப்பஸத்³தே³ கத்வா’’தி. ‘‘தபோஜிகு³ச்ச²வாதா³’’திஆதீ³ஸு தபோஜிகு³ச்ச²ம் வதா³ம, மனஸாபி தமேவ ஸாரதோ க³ஹேத்வா விசராம, காயேனபிம்ஹா தமேவ அல்லீனா, நானப்பகாரகம் அத்தகிலமதா²னுயோக³மனுயுத்தா விஹராமாதி அத்தோ².

உபக்கிலேஸவண்ணனா

58. தபஸ்ஸீதி தபனிஸ்ஸிதகோ. ‘‘அசேலகோ’’திஆதீ³னி ஸீஹனாதே³ (தீ³. நி. அட்ட². 1.393) வித்தா²ரிதனயேனேவ வேதி³தப்³பா³னி. தபம் ஸமாதி³யதீதி அசேலகபா⁴வாதி³கம் தபம் ஸம்மா ஆதி³யதி, த³ள்ஹம் க³ண்ஹாதி. அத்தமனோ ஹோதீதி கோ அஞ்ஞோ மயா ஸதி³ஸோ இமஸ்மிம் தபே அத்தீ²தி துட்ட²மனோ ஹோதி. பரிபுண்ணஸங்கப்போதி அலமேத்தாவதாதி ஏவம் பரியோஸிதஸங்கப்போ, இத³ஞ்ச தித்தி²யானம் வஸேன ஆக³தம். ஸாஸனாவசரேனாபி பன தீ³பேதப்³ப³ம். ஏகச்சோ ஹி து⁴தங்க³ம் ஸமாதி³யதி, ஸோ தேனேவ து⁴தங்கே³ன கோ அஞ்ஞோ மயா ஸதி³ஸோ து⁴தங்க³த⁴ரோதி அத்தமனோ ஹோதி பரிபுண்ணஸங்கப்போ. தபஸ்ஸினோ உபக்கிலேஸோ ஹோதீதி து³வித⁴ஸ்ஸாபேதஸ்ஸ தபஸ்ஸினோ அயம் உபக்கிலேஸோ ஹோதி. ஏத்தாவதாயம் தபோ உபக்கிலேஸோ ஹோதீதி வதா³மி.

அத்தானுக்கம்ஸேதீதி ‘‘கோ மயா ஸதி³ஸோ அத்தீ²’’தி அத்தானம் உக்கம்ஸதி உக்கி²பதி. பரம் வம்பே⁴தீதி ‘‘அயம் ந மாதி³ஸோ’’தி பரம் ஸம்ஹாரேதி அவக்கி²பதி.

மஜ்ஜதீதி மானமத³கரணேன மஜ்ஜதி. முச்ச²தீதி முச்சி²தோ ஹோதி க³தி⁴தோ அஜ்ஜா²பன்னோ. பமாத³மாபஜ்ஜதீதி ஏததே³வ ஸாரந்தி பமாத³மாபஜ்ஜதி. ஸாஸனே பப்³ப³ஜிதோபி து⁴தங்க³ஸுத்³தி⁴கோ ஹோதி, ந கம்மட்டா²னஸுத்³தி⁴கோ. து⁴தங்க³மேவ அரஹத்தம் விய ஸாரதோ பச்சேதி.

59. லாப⁴ஸக்காரஸிலோகந்தி ஏத்த² சத்தாரோ பச்சயா லப்³ப⁴ந்தீதி லாபா⁴, தேயேவ ஸுட்டு² கத்வா படிஸங்க²ரித்வா லத்³தா⁴ ஸக்காரோ, வண்ணப⁴ணனம் ஸிலோகோ. அபி⁴னிப்³ப³த்தேதீதி அசேலகாதி³பா⁴வம் தேரஸது⁴தங்க³ஸமாதா³னம் வா நிஸ்ஸாய மஹாலாபோ⁴ உப்பஜ்ஜதி, தஸ்மா ‘‘அபி⁴னிப்³ப³த்தேதீ’’தி வுத்தோ. ஸேஸமேத்த² புரிமவாரனயேனேவ து³வித⁴ஸ்ஸாபி தபஸ்ஸினோ வஸேன வேதி³தப்³ப³ம்.

60. வோதா³ஸம் ஆபஜ்ஜதீதி த்³வேபா⁴க³ம் ஆபஜ்ஜதி, த்³வே பா⁴கே³ கரோதி. க²மதீதி ருச்சதி. நக்க²மதீதி ந ருச்சதி. ஸாபேக்கோ² பஜஹதீதி ஸதண்ஹோ பஜஹதி. கத²ம்? பாதோவ கீ²ரப⁴த்தம் பு⁴த்தோ ஹோதி. அத²ஸ்ஸ மம்ஸபோ⁴ஜனம் உபனேதி. தஸ்ஸ ஏவம் ஹோதி ‘‘இதா³னி ஏவரூபம் கதா³ லபி⁴ஸ்ஸாம, ஸசே ஜானேய்யாம, பாதோவ கீ²ரப⁴த்தம் ந பு⁴ஞ்ஜேய்யாம, கிம் மயா ஸக்கா காதும், க³ச்ச² போ⁴, த்வமேவ பு⁴ஞ்ஜா’’தி ஜீவிதம் பரிச்சஜந்தோ விய ஸாபேக்கோ² பஜஹதி. க³தி⁴தோதி கே³த⁴ஜாதோ. முச்சி²தோதி ப³லவதண்ஹாய முச்சி²தோ ஸம்முட்ட²ஸ்ஸதீ ஹுத்வா. அஜ்ஜா²பன்னோதி ஆமிஸே அதிலக்³கோ³, ‘‘பு⁴ஞ்ஜிஸ்ஸத², ஆவுஸோ’’தி த⁴ம்மனிமந்தனமத்தம்பி அகத்வா மஹந்தே மஹந்தே கப³ளே கரோதி. அனாதீ³னவத³ஸ்ஸாவீதிஆதீ³னவமத்தம்பி ந பஸ்ஸதி. அனிஸ்ஸரணபஞ்ஞோதி இத⁴ மத்தஞ்ஞுதானிஸ்ஸரணபச்சவேக்க²ணபரிபோ⁴க³மத்தம்பி ந கரோதி. லாப⁴ஸக்காரஸிலோகனிகந்திஹேதூதி லாபா⁴தீ³ஸு தண்ஹாஹேது.

61. ஸம்ப⁴க்கே²தீதி ஸம்கா²த³தி. அஸனிவிசக்கந்தி விசக்கஸண்டா²னா அஸனியேவ. இத³ம் வுத்தம் ஹோதி ‘‘அஸனிவிசக்கம் இமஸ்ஸ த³ந்தகூடம் மூலபீ³ஜாதீ³ஸு ந கிஞ்சி ந ஸம்பு⁴ஞ்ஜதி. அத² ச பன நம் ஸமணப்பவாதே³ன ஸமணோதி ஸஞ்ஜானந்தீ’’தி. ஏவம் அபஸாதே³தி அவக்கி²பதி. இத³ம் தித்தி²யவஸேன ஆக³தம். பி⁴க்கு²வஸேன பனேத்த² அயம் யோஜனா, அத்தனா து⁴தங்க³த⁴ரோ ஹோதி, ஸோ அஞ்ஞம் ஏவம் அபஸாதே³தி ‘‘கிம் ஸமணா நாம இமே ஸமணம்ஹாதி வத³ந்தி, து⁴தங்க³மத்தம்பி நத்தி², உத்³தே³ஸப⁴த்தாதீ³னி பரியேஸந்தா பச்சயபா³ஹுல்லிகா விசரந்தீ’’தி. லூகா²ஜீவிந்தி அசேலகாதி³வஸேன வா து⁴தங்க³வஸேன வா லூகா²ஜீவிம். இஸ்ஸாமச்ச²ரியந்தி பரஸ்ஸ ஸக்காராதி³ஸம்பத்திகீ²யனலக்க²ணம் இஸ்ஸம், ஸக்காராதி³கரணஅக்க²மனலக்க²ணம் மச்ச²ரியஞ்ச.

62. ஆபாத²கனிஸாதீ³ ஹோதீதி மனுஸ்ஸானம் ஆபாதே² த³ஸ்ஸனட்டா²னே நிஸீத³தி. யத்த² தே பஸ்ஸந்தி, தத்த² டி²தோ வக்³கு³லிவதம் சரதி, பஞ்சாதபம் தப்பதி, ஏகபாதே³ன திட்ட²தி, ஸூரியம் நமஸ்ஸதி. ஸாஸனே பப்³ப³ஜிதோபி ஸமாதி³ன்னது⁴தங்கோ³ ஸப்³ப³ரத்திம் ஸயித்வா மனுஸ்ஸானம் சக்கு²பதே² தபம் கரோதி, மஹாஸாயன்ஹேயேவ சீவரகுடிம் கரோதி, ஸூரியே உக்³க³தே படிஸம்ஹரதி, மனுஸ்ஸானம் ஆக³தபா⁴வம் ஞத்வா க⁴ண்டி³ம் பஹரித்வா சீவரம் மத்த²கே ட²பேத்வா சங்கமம் ஓதரதி, ஸம்முஞ்ஜனிம் க³ஹேத்வா விஹாரங்க³ணம் ஸம்மஜ்ஜதி.

அத்தானந்தி அத்தனோ கு³ணம் அத³ஸ்ஸயமானோதி ஏத்த² அ-காரோ நிபாதமத்தம், த³ஸ்ஸயமானோதி அத்தோ². இத³ம்பி மே தபஸ்மிந்தி இத³ம்பி கம்மம் மமேவ தபஸ்மிம், பச்சத்தே வா பு⁴ம்மம், இத³ம்பி மம தபோதி அத்தோ². ஸோ ஹி அஸுகஸ்மிம் டா²னே அசேலகோ அத்தி² முத்தாசாரோதிஆதீ³னி ஸுத்வா அம்ஹாகம் ஏஸ தபோ, அம்ஹாகம் ஸோ அந்தேவாஸிகோதிஆதீ³னி ப⁴ணதி. அஸுகஸ்மிம் வா பன டா²னே பம்ஸுகூலிகோ பி⁴க்கு² அத்தீ²திஆதீ³னி ஸுத்வா அம்ஹாகம் ஏஸ தபோ, அம்ஹாகம் ஸோ அந்தேவாஸிகோதிஆதீ³னி ப⁴ணதி.

கிஞ்சிதே³வாதி கிஞ்சி வஜ்ஜம் தி³ட்டி²க³தம் வா. படிச்ச²ன்னம் ஸேவதீதி யதா² அஞ்ஞே ந ஜானந்தி, ஏவம் ஸேவதி. அக்க²மமானம் ஆஹ க²மதீதி அருச்சமானம்யேவ ருச்சதி மேதி வத³தி. அத்தனா கதம் அதிமஹந்தம்பி வஜ்ஜம் அப்பமத்தகம் கத்வா பஞ்ஞபேதி, பரேன கதம் து³க்கடமத்தம் வீதிக்கமம்பி பாராஜிகஸதி³ஸம் கத்வா த³ஸ்ஸேதி. அனுஞ்ஞேய்யந்தி அனுஜானிதப்³ப³ம் அனுமோதி³தப்³ப³ம்.

63. கோத⁴னோ ஹோதி உபனாஹீதி குஜ்ஜ²னலக்க²ணேன கோதே⁴ன, வேரஅப்படினிஸ்ஸக்³க³லக்க²ணேன உபனாஹேன ச ஸமன்னாக³தோ. மக்கீ² ஹோதி பளாஸீதி பரகு³ணமக்க²னலக்க²ணேன மக்கே²ன, யுக³க்³கா³ஹலக்க²ணேன பளாஸேன ச ஸமன்னாக³தோ.

இஸ்ஸுகீ ஹோதி மச்ச²ரீதி பரஸக்காராதீ³ஸு உஸூயனலக்க²ணாய இஸ்ஸாய, ஆவாஸகுலலாப⁴வண்ணத⁴ம்மேஸு மச்ச²ராயனலக்க²ணேன பஞ்சவித⁴மச்சே²ரேன ச ஸமன்னாக³தோ ஹோதி. ஸடோ² ஹோதி மாயாவீதி கேராடிகலக்க²ணேன ஸாடே²ய்யேன, கதப்படிச்சா²த³னலக்க²ணாய மாயாய ச ஸமன்னாக³தோ ஹோதி. த²த்³தோ⁴ ஹோதி அதிமானீதி நிஸ்ஸினேஹனிக்கருணத²த்³த⁴லக்க²ணேன த²ம்பே⁴ன, அதிக்கமித்வா மஞ்ஞனலக்க²ணேன அதிமானேன ச ஸமன்னாக³தோ ஹோதி. பாபிச்சோ² ஹோதீதி அஸந்தஸம்பா⁴வனபத்த²னலக்க²ணாய பாபிச்ச²தாய ஸமன்னாக³தோ ஹோதி. பாபிகானந்தி தாஸம்யேவ லாமகானம் இச்சா²னம் வஸம் க³தோ. மிச்சா²தி³ட்டி²கோதி நத்தி² தி³ன்னந்திஆதி³னயப்பவத்தாய அயாதா²வதி³ட்டி²யா உபேதோ. அந்தக்³கா³ஹிகாயாதி ஸாயேவ தி³ட்டி² உச்சே²த³ந்தஸ்ஸ க³ஹிதத்தா ‘‘அந்தக்³கா³ஹிகா’’தி வுச்சதி, தாய ஸமன்னாக³தோதி அத்தோ². ஸந்தி³ட்டி²பராமாஸீதிஆதீ³ஸு ஸயம் தி³ட்டி² ஸந்தி³ட்டி², ஸந்தி³ட்டி²மேவ பராமஸதி க³ஹேத்வா வத³தீதி ஸந்தி³ட்டி²பராமாஸீ. ஆதா⁴னம் வுச்சதி த³ள்ஹம் ஸுட்டு² ட²பிதம், ததா² கத்வா க³ண்ஹாதீதி ஆதா⁴னக்³கா³ஹீ. அரிட்டோ² விய ந ஸக்கா ஹோதி படினிஸ்ஸஜ்ஜாபேதுந்தி து³ப்படினிஸ்ஸக்³கீ³. யதி³மேதி யதி³ இமே.

பரிஸுத்³த⁴பபடிகப்பத்தகதா²வண்ணனா

64. இத⁴, நிக்³ரோத⁴, தபஸ்ஸீதி ஏவம் ப⁴க³வா அஞ்ஞதித்தி²யேஹி க³ஹிதலத்³தி⁴ம் தேஸம் ரக்கி²தம் தபம் ஸப்³ப³மேவ ஸம்கிலிட்ட²ந்தி உபக்கிலேஸபாளிம் த³ஸ்ஸேத்வா இதா³னி பரிஸுத்³த⁴பாளித³ஸ்ஸனத்த²ம் தே³ஸனமாரப⁴ந்தோ இத⁴, நிக்³ரோதா⁴திஆதி³மாஹ. தத்த² ‘‘ந அத்தமனோ’’திஆதீ³னி வுத்தவிபக்க²வஸேனேவ வேதி³தப்³பா³னி. ஸப்³ப³வாரேஸு ச லூக²தபஸ்ஸினோ சேவ து⁴தங்க³த⁴ரஸ்ஸ ச வஸேன யோஜனா வேதி³தப்³பா³. ஏவம் ஸோ தஸ்மிம் டா²னே பரிஸுத்³தோ⁴ ஹோதீதி ஏவம் ஸோ தேன ந அத்தமனதா ந பரிபுண்ணஸங்கப்பபா⁴வஸங்கா²தேன காரணேன பரிஸுத்³தோ⁴ நிருபக்கிலேஸோ ஹோதி, உத்தரி வாயமமானோ கம்மட்டா²னஸுத்³தி⁴கோ ஹுத்வா அரஹத்தம் பாபுணாதி. இமினா நயேன ஸப்³ப³வாரேஸு அத்தோ² வேதி³தப்³போ³.

69. அத்³தா⁴ கோ², ப⁴ந்தேதி ப⁴ந்தே ஏவம் ஸந்தே ஏகம்ஸேனேவ வீரியேன பாபஜிகு³ச்ச²னவாதோ³ பரிஸுத்³தோ⁴ ஹோதீதி அனுஜானாதி. இதோ பரஞ்ச அக்³க³பா⁴வம் வா ஸாரபா⁴வம் வா அஜானந்தோ அக்³க³ப்பத்தா ஸாரப்பத்தா சாதி ஆஹ. அத²ஸ்ஸ ப⁴க³வா ஸாரப்பத்தபா⁴வம் படிஸேதே⁴ந்தோ ந கோ² நிக்³ரோதா⁴திஆதி³மாஹ. பபடிகப்பத்தா ஹோதீதி ஸாரவதோ ருக்க²ஸ்ஸ ஸாரம் பே²க்³கு³ம் தசஞ்ச அதிக்கம்ம ப³ஹிபபடிகஸதி³ஸா ஹோதீதி த³ஸ்ஸேதி.

பரிஸுத்³த⁴தசப்பத்தாதி³கதா²வண்ணனா

70. அக்³க³ம் பாபேதூதி தே³ஸனாவஸேன அக்³க³ம் பாபேத்வா தே³ஸேது, ஸாரம் பாபேத்வா தே³ஸேதூதி த³ஸப³லம் யாசதி. சாதுயாமஸம்வரஸம்வுதோதி சதுப்³பி³தே⁴ன ஸம்வரேன பிஹிதோ. ந பாணம் அதிபாதேதீதி பாணம் ந ஹனதி. ந பா⁴விதமாஸீஸதீதி பா⁴விதம் நாம தேஸம் ஸஞ்ஞாய பஞ்ச காமகு³ணா, தே ந ஆஸீஸதி ந ஸேவதீதி அத்தோ².

அது³ம் சஸ்ஸ ஹோதீதி ஏதஞ்சஸ்ஸ இதா³னி வுச்சமானம் ‘‘ஸோ அபி⁴ஹரதீ’’திஆதி³லக்க²ணம். தபஸ்ஸிதாயாதி தபஸ்ஸிபா⁴வேன ஹோதி. தத்த² ஸோ அபி⁴ஹரதீதி ஸோ தம் ஸீலம் அபி⁴ஹரதி, உபரூபரி வட்³டே⁴தி. ஸீலம் மே பரிபுண்ணம், தபோ ஆரத்³தோ⁴, அலமேத்தாவதாதி ந வீரியம் விஸ்ஸஜ்ஜேதி. நோ ஹீனாயாவத்ததீதி ஹீனாய கி³ஹிபா⁴வத்தா²ய ந ஆவத்ததி. ஸீலதோ உத்தரி விஸேஸாதி⁴க³மத்தா²ய வீரியம் கரோதியேவ, ஏவம் கரோந்தோ ஸோ விவித்தம் ஸேனாஸனம் ப⁴ஜதி. ‘‘அரஞ்ஞ’’ந்திஆதீ³னி ஸாமஞ்ஞப²லே (தீ³. நி. அட்ட². 1.216) வித்தா²ரிதானேவ. ‘‘மேத்தாஸஹக³தேனா’’திஆதீ³னி விஸுத்³தி⁴மக்³கே³ வண்ணிதானி. தசப்பத்தாதி பபடிகதோ அப்³ப⁴ந்தரம் தசம் பத்தா. பே²க்³கு³ப்பத்தாதி தசதோ அப்³ப⁴ந்தரம் பே²க்³கு³ம் பத்தா, பே²க்³கு³ஸதி³ஸா ஹோதீதி அத்தோ².

74. ‘‘ஏத்தாவதா, கோ² நிக்³ரோத⁴, தபோஜிகு³ச்சா² அக்³க³ப்பத்தா ச ஹோதி ஸாரப்பத்தா சா’’தி இத³ம் ப⁴க³வா தித்தி²யானம் வஸேனாஹ. தித்தி²யானஞ்ஹி லாப⁴ஸக்காரோ ருக்க²ஸ்ஸ ஸாகா²பலாஸஸதி³ஸோ. பஞ்சஸீலமத்தகம் பபடிகஸதி³ஸம். அட்ட²ஸமாபத்திமத்தம் தசஸதி³ஸம். புப்³பே³னிவாஸஞாணாவஸானா அபி⁴ஞ்ஞா பே²க்³கு³ஸதி³ஸா. தி³ப்³ப³சக்கு²ம் பனேதே அரஹத்தந்தி க³ஹேத்வா விசரந்தி. தேன நேஸம் தம் ருக்க²ஸ்ஸ ஸாரஸதி³ஸம். ஸாஸனே பன லாப⁴ஸக்காரோ ஸாகா²பலாஸஸதி³ஸோ. ஸீலஸம்பதா³ பபடிகஸதி³ஸா. ஜா²னஸமாபத்தியோ தசஸதி³ஸா. லோகியாபி⁴ஞ்ஞா பே²க்³கு³ஸதி³ஸா. மக்³க³ப²லம் ஸாரோ. இதி ப⁴க³வதா அத்தனோ ஸாஸனம் ஓனதவினதப²லபா⁴ரப⁴ரிதருக்கூ²பமாய உபமிதம். ஸோ தே³ஸனாகுஸலதாய ததோ தசஸாரஸம்பத்திதோ மம ஸாஸனம் உத்தரிதரஞ்சேவ பணீததரஞ்ச, தம் துவம் கதா³ ஜானிஸ்ஸஸீதி அத்தனோதே³ஸனாய விஸேஸபா⁴வம் த³ஸ்ஸேதும் ‘‘இதி கோ² நிக்³ரோதா⁴’’தி தே³ஸனம் ஆரபி⁴. தே பரிப்³பா³ஜகாதி தே தஸ்ஸ பரிவாரா திம்ஸஸதஸங்க்²யா பரிப்³பா³ஜகா. ஏத்த² மயம் அனஸ்ஸாமாதி ஏத்த² அசேலகபாளிஆதீ³ஸு, இத³ம் வுத்தம் ஹோதி ‘‘அம்ஹாகம் அசேலகபாளிமத்தம்பி நத்தி², குதோ பரிஸுத்³த⁴பாளி. அம்ஹாகம் பரிஸுத்³த⁴பாளிமத்தம்பி நத்தி², குதோ சாதுயாமஸம்வராதீ³னி. சாதுயாமஸம்வரோபி நத்தி², குதோ அரஞ்ஞவாஸாதீ³னி. அரஞ்ஞவாஸோபி நத்தி², குதோ நீவரணப்பஹானாதீ³னி. நீவரணப்பஹானம்பி நத்தி², குதோ ப்³ரஹ்மவிஹாராதீ³னி. ப்³ரஹ்மவிஹாரமத்தம்பி நத்தி², குதோ புப்³பே³னிவாஸாதீ³னி. புப்³பே³னிவாஸஞாணமத்தம்பி நத்தி², குதோ அம்ஹாகம் தி³ப்³ப³சக்கு². ஏத்த² மயம் ஸஆசரியகா நட்டா²’’தி. இதோ பி⁴ய்யோ உத்தரிதரந்தி இதோ தி³ப்³ப³சக்கு²ஞாணாதி⁴க³மதோ பி⁴ய்யோ அஞ்ஞம் உத்தரிதரம் விஸேஸாதி⁴க³மம் மயம் ஸுதிவஸேனாபி ந ஜானாமாதி வத³ந்தி.

நிக்³ரோத⁴ஸ்ஸபஜ்ஜா²யனவண்ணனா

75. அத² நிக்³ரோத⁴ம் பரிப்³பா³ஜகந்தி ஏவம் கிரஸ்ஸ அஹோஸி ‘‘இமே பரிப்³பா³ஜகா இதா³னி ப⁴க³வதோ பா⁴ஸிதம் ஸுஸ்ஸூஸந்தி, இமினா ச நிக்³ரோதே⁴ன ப⁴க³வதோ பரம்முகா² கக்க²ளம் து³ராஸத³வசனம் வுத்தம், இதா³னி அயம்பி ஸோதுகாமோ ஜாதோ, காலோ தா³னி மே இமஸ்ஸ மானத்³த⁴ஜம் நிபாதேத்வா ப⁴க³வதோ ஸாஸனம் உக்கி²பிது’’ந்தி. அத² நிக்³ரோத⁴ம் பரிப்³பா³ஜகம் ஏதத³வோச. அபரம்பிஸ்ஸ அஹோஸி ‘‘அயம் மயி அகதே²ந்தே ஸத்தா²ரம் ந க²மாபேஸ்ஸதி, தத³ஸ்ஸ அனாக³தே அஹிதாய து³க்கா²ய ஸம்வத்திஸ்ஸதி, மயா பன கதி²தே க²மாபேஸ்ஸதி, தத³ஸ்ஸ ப⁴விஸ்ஸதி தீ³க⁴ரத்தம் ஹிதாய ஸுகா²யா’’தி. அத² நிக்³ரோத⁴ம் பரிப்³பா³ஜகம் ஏதத³வோச. அபரிஸாவசரம் பன நம் கரோதா²தி ஏத்த² பனாதி நிபாதோ, அத² நம் அபரிஸாவசரம் கரோதா²தி அத்தோ². ‘‘அபரிஸாவசரேத’’ந்திபி பாடோ², அபரிஸாவசரம் வா ஏதம் கரோத², கோ³காணாதீ³னம் வா அஞ்ஞதரந்தி அத்தோ².

கோ³காணந்தி ஏத்தா²பி கோ³காணம் பரியந்தசாரினிம் விய கரோதா²தி அத்தோ². துண்ஹீபூ⁴தோதி துண்ஹீபா⁴வம் உபக³தோ. மங்குபூ⁴தோதி நித்தேஜதம் ஆபன்னோ. பத்தக்க²ந்தோ⁴தி ஓனதகீ³வோ. அதோ⁴முகோ²தி ஹேட்டா²முகோ².

76. பு³த்³தோ⁴ ஸோ ப⁴க³வா போ³தா⁴யாதி ஸயம் பு³த்³தோ⁴ ஸத்தானம்பி சதுஸச்சபோ³த⁴த்தா²ய த⁴ம்மம் தே³ஸேதி. த³ந்தோதி சக்கு²தோபி த³ந்தோ…பே… மனதோபி த³ந்தோ. த³மதா²யாதி அஞ்ஞேஸம்பி த³மனத்தா²ய ஏவ, ந வாத³த்தா²ய. ஸந்தோதி ராக³ஸந்ததாய ஸந்தோ, தோ³ஸமோஹஸந்ததாய ஸப்³ப³ அகுஸலஸப்³பா³பி⁴ஸங்கா²ரஸந்ததாய ஸந்தோ. ஸமதா²யாதி மஹாஜனஸ்ஸ ராகா³தி³ஸமனத்தா²ய த⁴ம்மம் தே³ஸேதி. திண்ணோதி சத்தாரோ ஓகே⁴ திண்ணோ. தரணாயாதி மஹாஜனஸ்ஸ ஓக⁴னித்த²ரணத்தா²ய. பரினிப்³பு³தோதி கிலேஸபரினிப்³பா³னேன பரினிப்³பு³தோ. பரினிப்³பா³னாயாதி மஹாஜனஸ்ஸாபி ஸப்³ப³கிலேஸபரினிப்³பா³னத்தா²ய த⁴ம்மம் தே³ஸேதி.

ப்³ரஹ்மசரியபரியோஸானாதி³வண்ணனா

77. அச்சயோதிஆதீ³னி ஸாமஞ்ஞப²லே (தீ³. நி. அட்ட². 1.250) வுத்தானி. உஜுஜாதிகோதி காயவங்காதி³விரஹிதோ உஜுஸபா⁴வோ. அஹமனுஸாஸாமீதி அஹம் தாதி³ஸம் புக்³க³லம் அனுஸாஸாமி, த⁴ம்மம் அஸ்ஸ தே³ஸேமி. ஸத்தாஹந்தி ஸத்ததி³வஸானி, இத³ம் ஸப்³ப³ம்பி ப⁴க³வா த³ந்த⁴பஞ்ஞம் புக்³க³லம் ஸந்தா⁴யாஹ அஸடோ² பன அமாயாவீ உஜுஜாதிகோ தம்முஹுத்தேனேவ அரஹத்தம் பத்தும் ஸக்கி²ஸ்ஸதி. இதி ப⁴க³வா ‘‘அஸட²’’ந்திஆதி³வசனேன ஸடோ² ஹி வங்கவங்கோ, மயாபி ந ஸக்கா அனுஸாஸிதுந்தி தீ³பேந்தோ பரிப்³பா³ஜகம் பாதே³ஸு க³ஹேத்வா மஹாமேருபாத³தலே விய கி²பித்த². கஸ்மா? அயஞ்ஹி அதிஸடோ², குடிலசித்தோ ஸத்த²ரி ஏவம் கதே²ந்தேபி பு³த்³த⁴த⁴ம்மஸங்கே⁴ஸு நாதி⁴முச்சதி, அதி⁴முச்சனத்தா²ய ஸோதம் ந ஓத³ஹதி, கோஹஞ்ஞே டி²தோ ஸத்தா²ரம் க²மாபேதி. தஸ்மா ப⁴க³வா தஸ்ஸஜ்ஜா²ஸயம் விதி³த்வா ‘‘ஏது விஞ்ஞூ புரிஸோ அஸடோ²’’திஆதி³மாஹ. ஸட²ம் பனாஹம் அனுஸாஸிதும் ந ஸக்கோமீதி.

78. அந்தேவாஸிகம்யதாதி அந்தேவாஸிகம்யதாய, அம்ஹே அந்தேவாஸிகே இச்ச²ந்தோ. ஏவமாஹாதி ‘‘ஏது விஞ்ஞுபுரிஸோ’’திஆதி³மாஹ. யோ ஏவ வோ ஆசரியோதி யோ ஏவ தும்ஹாகம் பகதியா ஆசரியோ. உத்³தே³ஸா நோ சாவேதுகாமோதி அத்தனோ அனுஸாஸனிம் கா³ஹாபேத்வா அம்ஹே அம்ஹாகம் உத்³தே³ஸதோ சாவேதுகாமோ. ஸோ ஏவ வோ உத்³தே³ஸோ ஹோதூதி யோ தும்ஹாகம் பகதியா உத்³தே³ஸோ, ஸோ தும்ஹாகம்யேவ ஹோது, ந மயம் தும்ஹாகம் உத்³தே³ஸேன அத்தி²கா. ஆஜீவாதி ஆஜீவதோ. அகுஸலஸங்கா²தாதி அகுஸலாதி கோட்டா²ஸம் பத்தா. அகுஸலா த⁴ம்மாதி த்³வாத³ஸ அகுஸலசித்துப்பாத³த⁴ம்மா தண்ஹாயேவ வா விஸேஸேன. ஸா ஹி புனப்³ப⁴வகரணதோ ‘‘போனோப்³ப⁴விகா’’தி வுத்தா. ஸத³ரதா²தி கிலேஸத³ரத²ஸம்பயுத்தா. ஜாதிஜராமரணியாதி ஜாதிஜராமரணானம் பச்சயபூ⁴தா. ஸம்கிலேஸிகா த⁴ம்மாதி த்³வாத³ஸ அகுஸலசித்துப்பாதா³. வோதா³னியாதி, ஸமத²விபஸ்ஸனா த⁴ம்மா. தே ஹி ஸத்தே வோதா³பேந்தி, தஸ்மா ‘‘வோதா³னியா’’தி வுச்சந்தி. பஞ்ஞாபாரிபூரிந்தி மக்³க³பஞ்ஞாபாரிபூரிம். வேபுல்லத்தஞ்சாதி ப²லபஞ்ஞாவேபுல்லதம், உபோ⁴பி வா ஏதானி அஞ்ஞமஞ்ஞவேவசனானேவ. இத³ம் வுத்தம் ஹோதி ‘‘ததோ தும்ஹே மக்³க³பஞ்ஞஞ்சேவ ப²லபஞ்ஞஞ்ச தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதா²’’தி. ஏவம் ப⁴க³வா பரிப்³பா³ஜகே ஆரப்³ப⁴ அத்தனோ ஓவாதா³னுஸாஸனியா ப²லம் த³ஸ்ஸேந்தோ அரஹத்தனிகூடேன தே³ஸனம் நிட்ட²பேஸி.

79. யதா² தம் மாரேனாதி யதா² மாரேன பரியுட்டி²தசித்தா நிஸீத³ந்தி ஏவமேவ துண்ஹீபூ⁴தா…பே… அப்படிபா⁴னா நிஸின்னா.

மாரோ கிர ஸத்தா² அதிவிய க³ஜ்ஜந்தோ பு³த்³த⁴ப³லம் தீ³பேத்வா இமேஸம் பரிப்³பா³ஜகானம் த⁴ம்மம் தே³ஸேதி, கதா³சி த⁴ம்மாபி⁴ஸமயோ ப⁴வேய்ய, ஹந்தா³ஹம் பரியுட்டா²மீதி ஸோ தேஸம் சித்தானி பரியுட்டா²ஸி. அப்பஹீனவிபல்லாஸானஞ்ஹி சித்தம் மாரஸ்ஸ யதா²காமகரணீயம் ஹோதி. தேபி மாரேன பரியுட்டி²தசித்தா த²த்³த⁴ங்க³பச்சங்கா³ விய துண்ஹீ அப்படிபா⁴னா நிஸீதி³ம்ஸு. அத² ஸத்தா² இமே பரிப்³பா³ஜகா அதிவிய நிரவா ஹுத்வா நிஸின்னா, கிம் நு கோ²தி ஆவஜ்ஜந்தோ மாரேன பரியுட்டி²தபா⁴வம் அஞ்ஞாஸி. ஸசே பன தேஸம் மக்³க³ப²லுப்பத்திஹேது ப⁴வேய்ய, மாரம் படிபா³ஹித்வாபி ப⁴க³வா த⁴ம்மம் தே³ஸேய்ய, ஸோ பன தேஸம் நத்தி². ‘‘ஸப்³பே³பி மே துச்ச²புரிஸா’’தி அஞ்ஞாஸி. தேன வுத்தம் ‘‘அத² கோ² ப⁴க³வதோ ஏதத³ஹோஸி ஸப்³பே³பி மே மோக⁴புரிஸா’’திஆதி³.

தத்த² பு²ட்டா² பாபிமதாதி பாபிமதா மாரேன பு²ட்டா². யத்ர ஹி நாமாதி யேஸு நாம. அஞ்ஞாணத்த²ம்பீதி ஜானனத்த²ம்பி. கிம் கரிஸ்ஸதி ஸத்தாஹோதி ஸமணேன கோ³தமேன பரிச்சி²ன்னஸத்தாஹோ அம்ஹாகம் கிம் கரிஸ்ஸதி. இத³ம் வுத்தம் ஹோதி ‘‘ஸமணேன கோ³தமேன ‘ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரிஸ்ஸதி ஸத்தாஹ’ந்தி வுத்தம், ஸோ ஸத்தாஹோ அம்ஹாகம் கிம் அப்பா²ஸுகம் கரிஸ்ஸதி. ஹந்த³ மயம் ஸத்தாஹப்³ப⁴ந்தரே ஏதம் த⁴ம்மம் ஸச்சி²காதும் ஸக்கா, ந ஸக்காதி அஞ்ஞாணத்த²ம்பி ப்³ரஹ்மசரியம் சரிஸ்ஸாமா’’தி. அத² வா ஜானாம தாவஸ்ஸ த⁴ம்மந்தி ஏகதி³வஸே ஏகவாரம் அஞ்ஞாணத்த²ம்பி ஏதேஸம் சித்தம் நுப்பன்னம், ஸத்தாஹோ பன ஏதேஸம் குஸீதானம் கிம் கரிஸ்ஸதி, கிம் ஸக்கி²ஸ்ஸந்தி தே ஸத்தாஹம் பூரேதுந்தி அயமேத்த² அதி⁴ப்பாயோ. ஸீஹனாத³ந்தி பரவாத³பி⁴ந்த³னம் ஸகவாத³ஸமுஸ்ஸாபனஞ்ச அபீ⁴தனாத³ம் நதி³த்வா. பச்சுபட்டா²ஸீதி பதிட்டி²தோ. தாவதே³வாதி தஸ்மிஞ்ஞேவ க²ணே. ராஜக³ஹம் பாவிஸீதி ராஜக³ஹமேவ பவிட்டோ². தேஸம் பன பரிப்³பா³ஜகானம் கிஞ்சாபி இத³ம் ஸுத்தந்தம் ஸுத்வா விஸேஸோ ந நிப்³ப³த்தோ, ஆயதிம் பன நேஸம் வாஸனாய பச்சயோ ப⁴விஸ்ஸதீதி. ஸேஸம் ஸப்³ப³த்த² உத்தானமேவாதி.

ஸுமங்க³லவிலாஸினியா தீ³க⁴னிகாயட்ட²கதா²ய

உது³ம்ப³ரிகஸுத்தவண்ணனா நிட்டி²தா.